رواية لمْ تكُنْ خطيئَتُنا الفصل الخامس والثلاثون 35 - بقلم نورا ناصر

#لم_تكن_خطيئتنا
بارت 33

لقد رحلو عنا ولم يهتمو
لما قد يكون ما سوف يحدث معنا
رحلو دون سابق انذار ولم ادرك رحيلهم عني
الا بعد فوات الاوان ..لحظتها كنت مشتاقةً كثيرا لسماع صوتهم ..
اه كم كنت اتمنى فرصة واحدةً قبل رحيلهم
اتصال واحد
لقاء واحد
نظرة واحدة
ونفسٌ واحد من انفاسهم .
كم انا بحاجةً لكي استنشق عطر انفاسهم
فما اصعب الرحيل عندما لا ندركه
قطعوا اخبارهم عني فكنت اظن
بسبب انشغالهم بالحياة
ولكن فجأةً وبرسالةً واحدة قطعوا كل شي بيني
وبينهم ..فما اسهلها عندكم
وما اصعبها عندي هذه الرسالة ...

لقد انتهى كل شي سامحيني ....

وداعاً ....

سوف تبقين حبي الوحيد ...

لكن الى متى ...

ارحلو ما دمتم اتخذتم الرحيل ولا تعودو مجدداً

Aخاطرتي

سمية .. دخلت واحس صارت الانظار عليه
اشواق وبناتها ..  احتارن شيسون من شافني
وحدة تباوع للثانية ويتبسبسن
وملامحهن متحيرة ومتسائلة
حتى ام العروس .. اجاني احساس كلها تعرف بقصتنا.

.. ظليت ادور على بيبيتي الي راحت الهم قبل يوم ..
لازمه بدلتي بيدي لان طويلة تسح
والشال الي على اكتافي بيدي الثانية
وابعد شعري من على وجهي بحركة من راسي ..
والابتسامه ماخليتها تنمحي من وجهي ..

شفت بيبي وعمه زينب وامتثال وامل وايناس
رحت يمهم .سلمت عليهم. كعدت على نفس الطاولة ..قريبة على ايناس وامها.
اباوع بيبيتي نظراتها كلها حزن عليه.
حاجيتها بعيوني  مو كت حزنج بيبي لاتخليني ابجي عفية كوه صابرة والله ..
ايناس باوعتلي فهمت من نظراتها كل شي
گالت شعجب جيتي سمية ..

بعدت شعري عن وجهي  بتكبر
گتلها وليش مااجي يعني تره حالي من حالج هم بنت خاله انا مايصير اجي واتونس يعني لو بس انت جايه تتونسين وبطنج شگدهه ..

كالت هااي شبيج خذيتيني حاصل فاصل هو سؤال..

: اي وادري وره سؤالج شنو واطمئني من هالناحية ..

امتثال .. سمية شعجب فاطمة ما اجت للحفلة ..

سمية .. تعبانه عمه مابيهه تجي ..

: وشلونها وياج بالبيت ..

: زينه حبابة وطيبة ماشفنه عليها شي موزين ..

: ها الحمدلله بس مبينة معقدة كلش ماتطلع ولاتواصل. ..

: لا عمة انت مامعاشرتها وهي الحمل متعبها اذا تطلع تتخربط ففضلت تظل بالبيت ..

: والله خوش ماتنطين بمرة ابوج. 

: ليش انطي بيها مامأذيتني بشي ..

: اي عاد انت حقانية الله يهديها الكم ..

خلصت عمه امتثال .. درت وجهي شفت اشواق وبناتها وام العروس صاحولهن
عرفت راح يدخلون .. فتحت جنطتي طلعت توربان وردي متناسق وي لون الفستان وردي بي كرستال  خليته على راسي ونزلت كذلتي صفح ..
واستعديت حتى اشوف حبيبي وهو بيده وحدة ثانية قبل لاتكون خطيبته جنت اموت روحي من الغيرة مو بعد هسه وراح اشوفهم ؟ لبعض ..
ياربي صبر قلبي وارحمني .. .. .. ..
مااعرف منين اجتني القوة واحتفضت بابتسامتي
رغم احس قلبي يبجي ويلعنني بكل نبضة ..

بهاللحظة. اشتغلت الاغنية ودخلوا شفته لازم ايدها ودخل بيها ملامحها اعرفها مابيها ذرة فرح وكلها تجهم اعرفك حبيبي انت مو قابل بهذا الزواج ولا مغصوب وانما تريد تنتقم مني تريد تقهرني وانا مستاهلة خذلتك ..

طلعت زايد على الممر الي يمشون بي
تعمدت اريده يشوفني ..
وشافني.. ملامحه كلها مستغربة ..
خليت عيوني بعيونة ومبتسمة بعدني
حسيت عيونه راح ينطن من الغضب
ووكف مكانه من الصدمة
حتى خطيبته ظلت تباوعلي مصدومة
وكلتله يلله. .. اخذها ومشه ويباوعلي.
وصلوا للكوشة وكعدوا .. وظلت عيونه عليه من لحظة للثانية ..
وبدأت مراسيم الحفل من لبسها الحلقة حسيت نفسي ام ثكلى وفقدت ابنها للتو ..
ضميري جاي يملخني مو بس يأنبني ..
احس گاعدة بساحة حرب مو بقاعة اعراس وافراح ..،

وبعد ساعات تعبت من التمثيل .. استنزفت هواي من عاطفتي ومشاعري .. قررت الانسحاب من هالحرب.

خابرت ابوي .. حتى نروح ..
رحت للحمام .. بس اختليت بنفسي
طاحت على خدي دمعة حرگت خدي ..

لبست البشت مالتي نزعت التوربان ضميته
ومسحت المكياج .. خليت شالي لفيته زين وطلعت انتظر ابوي. . يم باب القاعة وگفت حزينه

بداخل القاعة هاي خسرت حب حياتي الاول
الي جنت معولة عليه هواي .. جنت اريده امان لروحي وحياتي الي قضيت اغلب سنواتها قلقة وضايعة ..
وانا واگفة سمعت صوته يگلي ليش اجيتي ..
غمضت قويت روحي گبل لاالتفت اله
درت عليه وتصنعت القوة

گتله امك عزمتنا وجينه ..

أمان  .. انت شنو ماتگليلي؟ ؟

سمية .. انا فرحانتلك لان لگيت الي من مستواك وتليق بيك واهلك قابلين بيها وراح تعيش حياتك وياها بدون ماتدوخ راسك بمشاكل انت ماالك ذنب بيهااا ..

أمان :  تقنعيني جاية فرحانه ..

:بهدوء ..  اطمئن امان فرحانة وداعتك ..

: .. لاتحلفين بداعتي جذب.   

اجه ابوي عفت امان وصعدت وصعدت بالسيارة ..

...........

صفا ... مرت الايام خاوية مابيها طعم الفرحة ابد
كل يومية اندب حضي شنو من قدر هذا وانكتب الي
خلال 3 اشهر احبه واتعلق بي ويروح مني بلحظة وحدة ..

ليل والغرفة ظلمة مطفينها عود انام نجذب على روحنا كل القهر يطلع بالليل .. سمعت  سمية تبجي
رحت يم سريرها .. كعدت يمها لزمتها من كتفها وهي ناطيتني ظهر ..

گلتهاا كافي سمية رحمي روحج انا شگوول ولج گلبي احترگ وصار رماد ..

سمية .. ولج حرگت گلبي اقوة والله شوفتي الي وهو يملكها تفتت روحي ..

صفا .. على الاقل عايش وراسه يشم الهوا مو مثلي اندفن وراح جوة التراب ..

سمية .. حجيت بگلبي يمه اسم الله عليه بس ردت ابين الها انه احنا نفس الحظ مدامنه توأم حضنتهه.
ظلت تهمس باذني هم اكو بعد فرحة بالحياة ليش عمرنه كله عايشين بخريف والربيع مامرنه يوم ليش هيج حظنه سمية ..

سمية .. هذا الي ربج قاسمه النا طلعنا من بطن امنا واحنه مكتوب علينه نعيش هيج.

خلصنا الليل بجي ..
يوم ثاني الصبح گعدت عيوني مورمه مثل كل يوم
شافتني بيبيتي
گالت .. ويه عليه ييمه شصاير بيج رحمي روحج  ذبلتي كلش مايصير هالشكل ..

صفا .. گعدت يمهه بحسرة گتلها تتذكرين من خطبني اسلام ورفضت وگتيلي رجال واله حوبة وحوبته ماتتعداج هاي حوبته بيبي شفتيهه بعينج هسه.

بيبي،: عساني ما گلت ولا حجيت سودة عليه يمه بعد عمري ..

صفا:  اكوم اشوف فاطمة خاف محتاجة شي ..
دخلت للمطبخ شفتها جاي تشتغل
شافتني ضحكت ابتسمت ..
جريت كرسي وگعدت مو مثل گبل جنت شكد احب اشتغل وانضف وارتب واسوي اكلات هسه لكل شي مالي واهس  ..

گالت تردين شي؟

گتلها لا بس ردت اسألج سؤال؟

سألي عمري ..

انت حامل  بولد موو؟

اي حبيبتي ان شاءالله ..

شراح تسمينه؟

ابوج يريده طيف ..
هاا ..
جرت الكرسي گعدت يمي .. گالت مبين عليج تردين تختارين اله الاسم مو؟

بعد انتم مختارين اله اسم ..

وانت هم اخته ويحق الج تسمينه ..
دخلت سمية ..

صفا .. اريده على اسم المرحوم ..

سمية .. هيج راح تتأذين وماراح تنسين بسرعه

صفا .. رفعت راسي الها ومنو گلج اريد انساه؟

فاطمة .. خليهه سمية يمكن تتعلق بي ويعوضها

شوية صفا .. فاطمة انت بعد شگد وتجيبين؟

فاطمة : .. بعد الي شهر واحد ان شاءالله ..

صفا .. اي وترجعين تداومين موو؟

فاطمة ..: ان شاءالله اخلص امومة وارجع اداوم.

صفا ..: اي يبقى يمي انا اربي ..

سمية .. وانت صفا ماناوية ترجعين لكليتج؟

صفا..: مالي خلگ كليه ولا دراسة ولا اي شي.

سمية .. ليش ؟؟تره هذا مستقبلج فراس الله يرحمه مات ومابيدج عليه شي وهذا كله ماراح يرجعه وانت عايشة هسه والحي ابقى من الميت ..

صفا .. مالي خلگ لكل شي وخلص. ..

-------
رقية حامل بالشهر الخامس .. وكعادتها تنضف الاكو والماكو ..

الاء ورقية .. كل وحدة تحاول ترضي مناضل بطريقتها .. الاء طباخة ماهرة ونفسها بالاكل طيب وتحاول تنافس رقية ..
ورقية شاطرة بترتيبها ...
كانت الاء تريد تسبح وتسبح الجهال .. اخذت ملابسها وملابسها جهالها وعلگتهم بالحمام ..
وراحت للمطبخ تهدر على الحلاوة الشعرية الي يحبها مناضل واللتهت تراسل اختها وتنتظر الحلاوة تستوي كلش حتى تاخذ الجهال وتسبحهم ..

رقية .. دخلت للحمام وبدت تغسل كل مابطريقها من ملابس وبدون قصد منها اخذت الملابس الي معلگة وجلفتهن بيدها جلفة من هاي التمام وشطفتهم ..
بهذه الاثناء دخلت عليها شريكتها بصحبة بنتها .
اشرت الها طلعي انريد نسبح ..
رقية وهي ترفع تك حاجب وبغضب ابا ابا وطلعت  ..
الاء .. دورت على الملابس يااوينهم هسه توهم علگتهم هنا .. باوعت للسلة يا هذول هما الغبية الخرسة مبللتهم .. طلعت اركض شفتها بنهاية الممر وتريد تروح للهول .. جريتها من وره وصيحت  ولج
انت احد عاتب عليج احد كايلج غسلي الملابس ..

رقية .. بدون فهم وبالاشارة وهي تسحب نفسها منها بغضب وتسألها بلغتها عن سبب هذا التصرف العنيف.

ظلت الاء تعيط فقدت اعصابها وكمشت رقية من شعرها بعنف ..

رقية نصت جسمها على زند الاء وعضتها بقوة ..

على صياحهم .. اجه مناضل وامه ..
وفاككوهم ..

الاء .. مناضل هسه هي مو حمامها فوگ ليش هيج تخبث وياي  ليش ..

مناضل :... اشرت لرقية ليش هيج سوت ..

رقية .. جرت شال الاء تشم بيه وسوت نفسها منقرفة وسدت خشمها  بمعنى انها اشتمت ريحة الملابس مو طيبة فگامت غسلتهن بدون قصد منها ..

مناضل .. الاء الملابس ريحتهم مو طيبة وهي غسلتهم مابيها شي الكنتور متروس روحي طلعيلكم غيرهن.

الاء .. مو اكللك اعزلني شوف شسوت بزندي شووف زورگتني.

ام مناضل .. وانت مامقصرة ملختي شعرها هاي فوكاها بعد فوك ماتغسل هدومكم.

الاء .. انه دازه عليهه تغسلهن ياعمه اعزلني مناضل تعبت من المشاكل انه تعبت ريتني ماراجعه لهنااا ..،

مناضل .. شوفي راح اعزلج عن هنا ترجع رقيه جوه وانت  اطلعلج درج خارجي من الفوك وبعد مااشوفج هنااا ابد بس خلي توافق رقية يلله ..

الاء .. وهي شكو وتاخذ رأيها خلگ خرسة.

مناضل .. وبعد شرط ثاني يوم عندج و3 عدها ..

الاء .. اي موافقة بس خلصني من هالبلوة هاي الي ابتليت بيهااا ..

مناضل .. وعلى تجاوزج عليها عقوبة بس تفوت بشهرها ابقى شهر كامل يمها ..

الاء . . بس خلي الله يخلصني منها كل شي مااريد بعد.

------
صفا .. مرت الايام وجابت فاطمة ولد وقبلوا يسمونه فراس نزولا عند رغبتي ..

فاطمة تعبانه اول ايامها امها كبيرة بالعمر بيبيتي هم مابيها
سمية دومها متكترة .وتشتغل . انا توليت رعايته
ورعاية امه ..
مرات اشوف فاطمة نايمة وفراس يبجي اخذه للغرفة واكعد اتخيلة فراس المرحوم واشكيلة واحجيلة احس نفسي ارتاح ..

بهاي الفترة وبعدها فاطمة ماطالعة من الاربعين ابوي عطلت سيارته .. وگعد بلا شغل.

وللاسف ولا واحد من اخوته اجه سأل عنه وكال شمحتاج مامحتاج ..

فاطمة .. ايوب بدل سيارتك احسن

: ومنين اجيب فلوس يافاطمة ..

: بيع ذهبي وعندي جم فلس ونگوط فروسي وبيع هاي وجملهه واشتري احدث منها ..

: لا فاطمة هاي ذهباتج وانه مالي حق بيهن ومااكدر اخذهن.

: انا وياك ماكو فرق اثنينه واحد حبيبي وبعدين الله يرزقك وتعوضني والذهب زينة وخزينة اذا ماابيعه واحنا محتاجين شلي بي ضامته يلله اخذه ياعيني وبيعه انه المن ضامته غير للعازة ..

صفا .. اخذ ابوي فلوس فاطمة وذهبها
وباع سيارته واشتراله سيارة حديثة ..
وظل يشتغل بيها ..

جنه كاعدين بالهول بالليل وبيدي فراس
صحت سمية تعالي شوفي فراس شون حلو مايعجبج تشيلينه تلاعبينة ..

سمية .. لا انه اخاف من الاطفال بهيج عمر ..

صفا .. ولج صار عمره شهر وجاي يكبر ..

فاطمة .. لعد شون راح تتزوجين ويصير عندج طفل.

سمية .. باوعت لصفا .. ورجعت باوعت لفاطمة گتلها مااريد اتزوج انا ..
اجت ضربت على كتفي ضربه خفيفه
كالت .. گلناها گبلج حبيبتي ..
رفعت شعري ليفوك .. باوعتله جاي يطوول ..

فاطمة .. ابوكم تأخر كلش يا بنات ..
ماادري شنو السالفة ..

صفا .. خابرولة ..

فاطمة .. والله خابرت مغلق ..
هسه راح ارجع اخابر مرة ثانية ..
ورجعت خابرت مرة ثانية وثالثة وماكو جواب ..
صارت ساعه 10:00 بالليل ..
گلبنا ظل يلعب ابوي المغرب بالبيت ومايتأخر هالگد
صارت ب11 وب12 وهو ماكو ..
متنا خوف وظلينه ندعي ونبجي
خابرنه عمو سليمان .. كال راح ادور عليه ..
بقينه بقلق وبخوف وحتى النوم طار من عيوننا والتفكير اكل گلبنا ... وينه ابوب وشنو صار اله وليش الهسه ماكو ..
يتبع ..