رواية لمْ تكُنْ خطيئَتُنا الفصل الرابع والثلاثون 34 - بقلم نورا ناصر

#لم_تكن_خطيئتنا
بارت 32

سمية .. ظليت واكفة اباوع لسيارته وهي تبتعد
بداخلي صرخة اگله ارجع ..

بس اعرف ماتفيد صرختي ..
رجعت خطواتي مثل غرگانه ببحر هائج
وامواجه الم ندم وحيرة ..

مشيت الفرع الرئيسي وطبيت بالفرع الي بي بيتنا
احتريت كلش ..
وصلت لبيتنه ومااكدرت ادخل طلعت گُبل
مشيت دخلت يسرى من الجهتين بيوت وشارع مبلط
اطفال يلعبون ..
لو ما النظارات جان الكل انتبه على دموعي
الي ماان تتخطى حاجز النظارة امسحها
حد ما قرب المنديل يتفتت ..
ظليت امشي عبرت جسر ..صاروا البيوت من جهه وحدة لان بصف نهر جاي امشي ..
مشيت وصلت لشط العرب .. نزلت بالجرف ..
كعدت جوه .. كبالي البلامه بالبلم مالتهم جاي يذبون شبكة الصيد .. ومناك اطفال جاي يسبحون
وبعيد عني بنات بعمري واصغر ووياهم اطفال
بيدهم تليفوناتهم ويطكون صور وصوت ضحكاتهم توصلني ..

كل شويه يفوت قارب ويخلي الامواج تتحرك وتوصلني تببللت ملابسي وحذائي
اريد شي يبردني ..
احس الكل عايش وانا ميتة ..

انبني ضميري انقهرت
راح يرجع ويصالحني مايكدر بدوني  انا متأكدة ..
واذا ماسواها انا اسويها واخابره وااراضي مااكدر بدونه ولااريد واحد غيره راح اوفي بوعدي ومااخذله
نسيت نفسي وانا افكر

دگ تليفوني بسرعة فتحت الجنطة .. فكرته امان الي اتصل بس شفته رضوان .. تحسرت وجاوبته ..

گال انت وينج ..
باوعت لنفسي ملابسي مبلله من ماي الشط
ماراح اللحگ بعد اروح البيت ابدل وارجع للمجمع ..

گتله مااجي اليوم ..
ليس خو ما صاير سي ..
لا هيج بس اخذتني نومة ..
وگعدتي غير تحجين غير تگولين ..
هسه ماصار شي عود اخصمها من راتبي دكتور ..
يلله باي مسغول ..

اووو انا نسيت نفسي بعد مو الشغل ..
كمت مكاني وتوجهت للبيت  والدنيا غروب ..،
حسيت براحة احس شمرت همومي بالشط ..

مر اسبوع .. كلما الزم التليفون اريد اخابر امان
شي يمنعني خجل على كبرياء ..
كل مرة ادك رقمه الي حافظته على قلبي واتراجع ..

خلص الاسبوع وبدأ جديد .. داومت فد يوم رحت على وكت .. طبيت من الباب .. شافتني الصيدلانية
اسمها شغاف ..
متوسطة الطول حنطاوية الي يباوع الها راح يتأكد انها ذات شخصية قوية شكلها مقبول ومرتبة  صاحتني ..
حسيت تريد تكول شي ضامته بگلبها ..
لان نظراتها تحجي ..
گتلها نعم وجريت نفس مزعوجة لأن احسها ضايجة مني ..
اشرتلي اكعد يمها ..
مو مال كعدة اريد اروح اخلص شغل بغرفة الدكتور.
قبل لايجي ..

شغاف .. اوك ندخل بالمهم اسمعي سمية احنا قبل من جنا اصدقاء انا ورضوان حاجيلي عنج وعن حبه الج واعجابه بيج ..

سمية .. بقلبي گلت اخ ياثرثار يارضوان شكو يكللهه هيج.
كتلها اي كملي بسرعه اريد اروح ..
انزعجت وظلت تنفخ گالت اي وهسه احنا متفقين على الخطوبة بس انصدمت من شفته جايبج تشتغلين ويا وصارت بينا مشاكل بسببج ..

سمية .. يعني انت ماواثقة من مشاعره تجاهج وجايه تحمليني ذنب مدام هو وعدج بالزواج انه شكوو؟
طب الصيدلاني وسكتنا عفتها وطلعت ..
رحت للغرفة ..
اشتغل وافكر شكد جنه انا وامان نتمنى رضوان يرتبط وهسه راح هو مرتبط واحنا مفترقين اخخ ياامي اخخ ليش خليتي الكل يعيرنه بيج ..
بلله امي وحدة شهوانية عمتي اشواق وزوجها شبيهم ياخذونه بذنبها .. ..
دخل رضوان .. وكملت شغل ويا ..
عبالها شغاف اترك الشغل علمود كلامها الي كالته
نوب عليه شغاف مدري شيدلعها رضوان اكيد سوسو ماتقبل غلط .. المهم ظليت على گلبها حلو الواحد من يصير خبيث ويعرف بنفسه خبيث يحس بسعادة عارمة.
علما تخلص هالشهرين يمكن شغوفه تبلع ادوية الضغط والسكر الي يمها كلها ..

رجعت للبيت .. بدلت ملابسي وطلعت ..
بيبيتي  بالمطبخ وفاطمة يمها كاعدة بالكاع تلف كبة..
شافتني بيبيتي سألتني عن رضوان ..
كتلها زين شبي شغاال ..

بيبي : .. ولج قابل هو مولدة ..
ضحكت فاطمة. . واندگت الباب ..
بيبيتي .. كومي سمية شوفي منو بالباب خطية فاطمة مابيها تكوم. 
كتلها اي انه اطلع ..
طلعت للباب فتحتها .. انقرفت من شفت اشواق.
ووياها هجران ..،
كالت ابوج هنا ودفعت الباب ودخلت .. قبل لااجاوبها.
هجران شافتني كالت  هلاووو سمسم اممح شونج وتضحك.
دخلت وره امها ..
حسيت بشي غريب .. طليت برة بلكي امان الي موصلهن .. باوعت ماكو بس سيارتها جايين بيها.
تحسرت ردت بس اشوفه ..
رحت وراهن شفتهن دخلن بالمطبخ ..
دخلت وكفت بالباب گلبي گارصني
ظليت اباوعلهن .. كعدن على كراسي ميز الطعام وفاطمة تكللهن امشوا بالديوانيه
اشواق :.. لا احنا جايين نعزمكم على حفلة خطوبة امان الخميس الجاي ان شاءالله ..

وظلت تباوعلي .. احس انصعقت حرارتي ارتفعت لا مستحيل ماجاي اصدگ معقولة سواها بقيت جامدة بمكاني  ..

بيبي ..  شايف الف خير منين خطب؟

اشواق:  بنت عمه فرح شايفتها انت يمه خوش بنيه حلوة واخلاقها سابقتها ..

بيبي : اي يمه الف على الخير.

هجران .. مو ماتجين سمية نزعل عليج تره.

سمية .. من بين نظرات بيبيتي الحزينة الي الي ظلت تباوعلي بنظرة الفاهم كل شي.
ظليت اجر بقوتي جر بلكي تسعفني واخيرا طلع صوتي گتلها اي اكيد انا اول الحاضريين.

اشواق:  اي ماراح يحلى الحفل بدونج ..

سمية .. هي وعيونها بعيوني گالت هالكلام
هزيت راسي بابتسامة كلها الم كتلها اكيد.

اباوع لفاطمة حاسة بشي غريب بس كل شي مامفتهمة بينما بيبيتي فاهمة كل شي.
ومبينة ماراضية على خطوبته وتوزع نظراتها بيننا بقهر.
اريدهم بس يرحون حتى انهزم وانفرد بحزني ..

اشواق : يلله احنا انروح وايوب انا اخابره اعزمه .

فاطمة:  ظلوا للعشه يمنه.

اشواق:  لا دايمة  مستعجلين.

طلعوا وطلعت بيبيتي وراهم ..
وانا دخلت للهول .. وكفت يم الشباك واباوعلها اشواق وهي تمشي بالطارمة تريد تطلع
طاحن دموعي واختنگت.
اباوعلها واحجي وي روحي اكللها هاا اشواق سويتي الي ردتي ارتاحيتي هسه مووو. ؟

لحظات واسمع بيبيتي تگللهه ليش ماخطبتي سمية اله هو جان رايدها.

اشواق .. ختولي هاي سعيد ماقبل بيها.

بيبي .. ليش يمه مو بنت اخوج شناقصها؟

اشواق .. يمه ماترهم النه هاي احنه وين وهاي وين سمعة امها بالطين لاتأثر علينه.

عفتهم ودخلت للغرفة كعدت على الجرباية مالتي بدون اي حركة .. عيوني جف بيها الدمع ..

دخلت بيبيتي وكفت يم الباب ..
كالت مو كتلج مو حذرتج منه ليش هيج سويتي بروحج.

دفنت روحي بالمخده وماجاوبتها.
طلعت وكضيت الليل وحدي
واللوم نفسي واعاتبه
احتاريت شنو اسوي بروحي
كعدت كصيت شعري ..
طلعت الدبدوب الجابه كصصته تكصص.
وشمرته بالزبالة ..

بقى بس اسمه ظلت اعوج بي بيدي لحد ماتزلغت وانجرحت ..
الاكثر من هذا ظل ضميري يأنبني يمكن لو متصلة بي خلال هالايام ماجان خطب جان عذرني بس انه خسرته ..
لا ليش ماانتظرني لو يحبني يسوي المستحيل حتى يجي يرضيني ومايهمه كرامته وكبريائه
لعد ليش انا اهتم ..
ليش صرت انانية ويا ومغرورة .. ياربي احس تخبلت
صداع موتني ايدي تجري دم.
للفجر انا ابجي وحيدة ..
صار الصبح والكل كعد وانا احس الحياة نفسي ميته والحياة مدفونه بيه ونايمه مو راضية تگعد ..

بعد صراع طويلل ويا روحي والمي وبدون رحمة او رأفة
اخر شي قررت اروح للحفلة وبديت احضر الها.
قررت اروح لأمي للصالون مالتها
بيوم الحفلة فاطمة شوية معقدة وماتحب الاجواء الحفلات والاعراس فتحججت. بالحمل متعبها
طلعت من البيت الظهر وتوجهت لصالون امي.
دخلت وسلمت عليها ..
تمنيتها تحس بيه تمنيت اشكيلها
بس مااشوف عدها اهتمام سوا بنفسها.
تمنيتها مثل باقي الامهات تهتم النا تفكر بينا
اشو ناسيتنا
گتلها وينج اشو ماكو؟
اماليد .. ولج جنت مسافرة ورحت جبت بضاعة واجيت. 
.. اريد فساتين حلوة.
.. المحل كله كدامج بنيتي ..
اخذتني لقسم الفساتين .. سحبت فستان
اسود فخم وبي ورود حمر تأملته ..
كتلها مارريده وبداخلي اكول خاف يشوفني بالاسود ويكول حزينة ..
كالت مالازم ..هسه اطلعلج احلى الفساتين.

طلعتي فستان احمر .. كلت الاحمر يعني حب خاف يكول بعدني احبه.
هم ماردته .. گتله غيره ..

طلعتلي واحد اصفر .. والاصفر يدل على الغيرة خاف يكول غيرانة ..
حيرت امي وياي ..
اخر شي عجبني فستان وردي لونه حلو وحيوي
مشتغلي بالدانتيل والكرستال الفضي من فوگ وجوه سادة وبي فتحة من الوسط لحد الركبة  ..

گتلها هذا هو اريده .. اخذته .. وكعدت
فتحت شعري رتبته الي لان خربته كلش ..

سوته الي كاريه ..
وصلنا للمكياج كالت اختاري شنو تردين اخليلج.
بگلبي گلت اريد كحلة تمنع عيني من البجي
وحمرة تخليني مبتسمة ..
اريد بدل هذا كله شي يقوي گلبي
اتوسل بالدمع توسل بس لاتنزل وتفشلني ..
اختاريت مكياج خفيف ..
مكيجتني  .. اخذت الفستان ورجعت للبيت .دخلت للغرفة لبست الفستان وطلعت كعدت بالهول . انتظر ابوي يوديني ..
صارت بالاربعة يلله اجه وعلما سبح وبدل

يلله طلعنه وصلنه للقاعة ..
دخلت رأسا للحمام ..
طلعت مكياج من جنطتي طوخت الحمرة سويتها وردي صارخ ..
نزعت البشت وخليت شال على اكتافي الفستان بلا اكمام ..
عدلت شعري لزمت قلبي وناديت ياربي قويني ..
طلعت من الحمام ودخلت للقاعة ..
واحس الانظار كلها صارت عليه .. 

يتبع
الفديو لسان حال سمية 😭💔

يتبع
البارت قصير 😭💔اعرف واسفه وانتوا اختاروا يااما بارت يومية قصير بس اطول من هذا شوية لان والله مالحكت الماي جان مكطوع واليوم اجه 😭والملابس صارن جبل واني اريد اغسل ملابس لازم افيض الدنيا 😂لذلك اعذروني.
لوتردون بارت طويل بين يوم ويوم.