رواية لمْ تكُنْ خطيئَتُنا الفصل الخمسون 50 - بقلم نورا ناصر

السلام عليكم
اعتذر ع تأخير
صارت عندي حالة وفاة لشخص جدا عزيز
ومريت بأيام صعبة الفترة الفاتت .. لذلك تأخرت عليكم ..

.......

(((والفاكد عزيز النوح يحلاله ...

موجع موعد الرحيل موعد الوداع بدون عودة ، بعد هالخبر صرت بروح ثانية .. موجوعة ومتأذية ومجروووحة ..

الموت خطف مني روح ماتوقعت بيوم راح تفاركني وماجنت اريد افاركها جنت اريدها طول العمر يمي مثل ما جانت دومها يمي   ..

لكن انا اريد وانت تريد والله يفعل مايريد ...

صرررخت بصوووت ماتتتت مااااتتتتت رضوووان لاااا تكلي ماتتتت

بعد ماجنت مركزة بالكلام الي كاله الي رضوان بس حسيت فاطمة يمي تبجي وتلطم على خدودها
وتصيح ماااتتت عمتي ماااتتت ...

وانه بيدي التليفون عاصرته حيل بيدي وموخرته من اذني واصرررخ ...

مااعرف شكد بقينا على هذا الحال انه وفاطمة نبجي ونصررخ واللتموا الجيران علينا وشاركونا مصيبتنا ...

وراها دخلت صفا هم تصررخ وتبجي ... كابلتنه وفقدت ويانه .. لحد ما وحدة من النسوان كالت يمه هذا الولد برا يكول يريد مستمسكات المرحومة خطية يسوولها شهادة وفااة وحده منجن تطلعها ..

صررخت ووينه منو هنااا أمان ؟؟ خلي يوديني أروح أشوفها للمرة الاخيرة لا تحرموني من شوفتها ..

صفا كالت وهيه تبجي لااا هذا اسلام كالي يريد الجنسية وانه انثبررررت ...

رحت للغرفة ركض طلعت جنسيتها خليتها على كلبي وابجي حييل واصيح بيبي عفية ليش عفتيني ولج بيبي راح اوديلهم جنسيتج يسوولج شهااادة وفااة بيبيي زززكية ليش ليش ماظليتي يمي ..

مادري منو اخذ مني الجنسية وانه فقدت شبكتني صفا واثنينه استسلمة لنوبة بجي ..

ظليت اتوسل بيهم يودوني الهه للمستشفى  ... كالو لا راح يودونها للمغيسل .. والفاتحة تصير بيت عمي سلمان ..

جلبت بعمتي زينب مرة عمي سلمان اله اروح وياهه للمغيسل اشوفهه اخر مرة .. قبلت واخذتني وياهه ..

بروح خايفة  وقلب منكسر اصريت اشوفها بالمغيسل وشون يغسلولها ردت اشبع عيوني شوف منها ..

جنت اعرف هو هذا بس جسدها وانو روحها صارت يم رب رحيم

جانت شمعة مضيئة بحياتي المعتمة بالحزن ، راحت وانطفت وبقيت وحدي بهالعتمة ..

إرجعي بيبي فدوة والله ماضوجج ولا بوسج هواي ولا اتشاقة وياج هواي شقة ماصخ يعصبج

جنت مرات اضوج واتعارك ويه أمان جان يعصب عليه يهزمني بشخصيته وبحضوره جنت اضوج من هالشي لمن اتاكد هو اقوة مني ابقى ايام ماا اضحك مااسولف هيه جانت تستغرب الوضع وماتريدني هيج

متعودة عليه اضحك اسولف اشاقة وياهه هواي واحمقها واعصبها تعصب تغلط عليه وتضربني وبالاخير اطكها بحجاية تضحك ضحكتها الاحبها

مرات اصيحلها بيبي ماترد عليه اصيح زكية تجاوب ..

ومرات وانه ضايجة اكللها بيبي تجاوبني شو ليوم بيبي مو زكية شعجب ..

وهواي شغلات راح افتقدها وشون راح اتحمل بدونها والله احتاجها اكثر من امي والله ..

شفتهم خلوها ع الدجة مال لمغيسل والنسوان بدوا يكصون ملابسها بالمكص ويوخرونها من على جسمها ..

جانن اشواق وامتثال وعمة زينب وانه وياهه بالمغيسل ..

وبدوا يغسلونها يكصون اظافرها يعصرون بطنها ويوضوها ويخلون كطن بحلكها وخشمها اي بما معناه يحنطونهه

هاي كل التفاصيل شفته وگلبي يگطر دم ....

طول عمرها نظيفة جسد ، گلب وروح ...

جانت نظيفة حيل وريحتها دومها حلوة ومعطرة اموت على ريحتها الخاصة ..

جانت يومية تسبح وتبدل ملابسها وتتعطر بس باخر ايامها انه ظليت اساعدها تسبح وبعدها لا ظليت انه اسبحها مو بس اساعدها حد ما تعودت عليه

هواي جانت تجينه اشواق تكللها خليني اسبحج هيه ماتقبل تكللها لا سمية تسبحني .... تضوج اشواق وتعوج حلكها وتدور وجهه

وانه اخذها للحمام اسبحها واشاقيها واضحكها حتى لا تستحي او تحس انو هيه عاجزة اومتعبتني .. واظل ابوس باديها

وافرك بشعرها واكول الها ييمه فدوة زكية شنو هالشعر الحلو هذا شنوو هالبياض هذا مانطيتيني شويه مو بت ابنج انه ....

هواي سوالف شنسى منج بيبي شنسى !!!

بعدها اخذوها وانطلقوا بجنازتها شيعوها وودوهه للنجف مثواهه الاخير ..

سوو الفاتحة ببيت عمي سليمان ، دخلت الهالبيت بعد سنوات ، دخلت تعبانة ومدمرة .. كسرني فراك بيبيتي كسرة شكبرهه ..

مرت أيام الفاتحة ... جان  هواي حزن هواي تعب وشويه صبر ...

اخر يوم جنت كاعدة بالصالة مخلية حنجي على رجليه وعيوني بالفراغ ، عيوني تعبت من البجي واحسها ثكيلة رموشي مبللة ..

النسوان يجن يتخلفن يبووسني وانه كاعدة حتى مابيه أكوم كل حيل وطاقة مابيه

والي تشبكني وتظل تبجي وتبجيني اكثر وبالزايد والي تتذكر سوالفها حنيتها طيبتها ويظل كلبي ينعصر عصر من الألم

قريب المغرب فرغت الصالة بس اقاربنه المقربيين بقوا وكل اثنين بسالفة وانه كاعدة ويمي اخواتي وفاطمة  صافنات وسارحات والحزن يشع من عيونه وهيئتنا ..

بهاللحظة اجت كرفصت يمي هجران بت عمتي اشواق جانت بتها على ايدها شاورتني وباوعت لأمها
همست يم إذني : سمية كومي فد دقيقة رايدتج .

باوعتلها بتساؤول ؛- هاا هجران شنو ؟
اشرتلي براسه وعيونها باتجاه إمها بارتباك 
شوويه بس عندي موضوع وياج ..

هزيت راسي وكمت نكتت صايتي الي لابستها
فاتحة والجهال يطبون باحذيتهم ويدوسون صارت الصالة كلها تراب من وراهم ..

كمت ورى هجران كوة امشي احس كل شي ثكيلي حواليه ..

شفتها طلعت من الباب الخلفي مال ورة البيت
حسيت الموضوع بي أمان ..

هيه خلتني وراحت كالت وصلت الأمانة ..رحت يمه باوعت لعيونه وهو يباوع بعمق عيوني و بحزن ..

رمشت بعيوني تجمع الدمع بعيوني لا ارادي هاي اول مرة اشووفه من قبل لا تمووت ...

لزمني من ايدي واخذني على صفحة ورى البيت لازم ايدي بقوة انه بسرعة كرفصت ورجعت ظهري على الحايط كل قوة مابيه

هو كرفص كبالي  ... كال هاي شصاير بيج يمعودة كولي يالله ..

كتله مابقالي احد أمان مابقالي ..

ليش تكولين هيج لعد و أني وين رحت ؟

انت هم يجي يوم وتعوفني ...

كال اي صحيح اعوفج بحالة وحدة بس من ينزلوني بالكبر ..

رفعت راسي كتله لاااسم الله عليك لاتكول هيج فدوةة ..

رد انت هم لاتكولين اعوفج حبچ دين برگبتي لأخر يوم بعمري نذرت نفسي الچ ...

الله يخليك الي ..

اتصل عليج ما تردين جنت خايف لازعلانة عليه لان رجعتج من المستشفى بوقتها غصب ..

لا مو هيج بس تليفوني مادري بي والله يمكن ظل بالشقة ..

هسه ارتاح بالي تدرين كلش مشغول بيج

رفعت راسي باوعتله بحزن همست بامتنان  حبيبي ..

رد .. لاتسوين بنفسج هيج ادعيلها اقري قرآن وإهدي الها هيه ترتاح وانت ترتاحين واني ان شاءالله ما اعوفج مستحيل ..

بلعت الغصة ماكدر احجي .. كمت من يمه ودعته مشينه سوى انه فتت بالبيت وهو راح دار دورة ع البيت وطلع لان البيت كله نسوان ..

من دخلت جانت اشواق كاعدة على كرسي كبال الباب الي دخلت منه باوعتلي بنظرات شك من بين عيونها الحزينة والمدمعة على امها ..

ما اهتميت لنظراتهها مشيت من يمها وتعديت ..

بقينه اسبوع ابيت عمي سليمان وبعدها رحنه انه وفاطمة للشقة .اول مادخلت اباوع لكل مكان بيها بي مكانهه سوالفهه شغلاتها جانت

عصاتهه نعالهه فوطتهه دشداشتها ... شووون ويه قهر كلبي ماكو شي يعوضني عنها ماكو شي يسليني على فراكها .. ماكو ..

مرت أيام وبالايام الي تروح فاطمة يم امها تجي يمي صفا لو رقية مايخلوني وحدي ..

لو مرات تجي عمة زينب مرة عمي سليمان تبقى يمي جم يوم ..

امي وبيبيتي الي هيه ام امي اجو ورى الفاتحة للشقة تخلفوا النه .. وراحو .. امي تمشي على عكازة لان بسبب مرض السكر صار بيها كنكري وكصو رجلها ...

كلتلي يمه سمية ماتجين تعيشين يمي ابيت خالج شون تبقين هنا وحدج ..

كبل لا اجاوبها انه جاوبتها عمتي زينب
لا وين يقبل عمها يمعودة

امي باستغراب جاوبتهه ليش مايقبل انه امها مو غريبة وهيه مو صغيرة ..

جاوبتها لا يمه انه ابقى هنا ارتاح اكثر اذا تحبين انت تعاي يمي ...

كالت لا يمه مايصير ..
عرفتها تستحي من مرة ابوي تجي يمي ..

عدت الاربعين يوم مال بيبيتي ورحنه زرناهه قبرها وقبر ابوي رجعتلي احزاني عبالك اول يوم ماتت ..

جنت اريد ابقى يمها بيبي والله مشتاقتلج الشقة ظلمة بدونج ماناوية ترجعين وتفرحيني ، شيصير لو باقية بعد أكثر وياي ..

جان يوم صعب علينا كلنا .. زرناهه ورجعنه وبدت معاناتي بعد الاربعين .. أمان راح طلبني من عمي بس هو همين رفض ..

فد يوم وهاي  جانت فاطمة يمي واندكت الباب فتحتها
شفت اشواق طبت سلمنا عليها وكعدت ، فاطمة اخذت فراس وراحت للمطبخ تسوي جاي ..

كعدت كبالها لابسة اسود ناطيها منظر قاسي أكثر رغم اناقتهه ، مخلية رجل على االثانية عينها ماتخليها بعيني

بقت ساكتة ثواني وانه اباوع عليهه منتظرة تفجر القنبلة .. التفتت عليه كالت انت جاي تلحين على أمان مو ؟

باستغراب سألته على شنو ألح ؟

ردت علمود يخطبج لأن متعارك ويه خاله علمودج

سحبت  ثوبي من يم رجليه بتوتر وجاوبتها
لا عمة انه ماعليه لا كتله ولا شي ..
ودرت وجهي

ردت صديقتي ابنها مهندس .......

جاوبت عمه ماريد لاتحاولين ...

بصياح كالت خل احجي لاتقاطعيني

ولان ادري شراح تحجين اقاطعج عمه ماريد اتزوج

يعني اله امان مووو

سكتت ما جاوبتها ..

كالت اي هل اكمل ابن صديقتي  مطلك وانت هم مطلكة تتراهمون

باوعتلها بنظرة اللاوالله صدك ؟

وهيه كملت هو رجال مايعيبه شي عنده جهال تلاثة .. وانه من باب وصية امي اسعيلج

لا والله عمه مو هالله هالله بوصية امج ابد بس انت ماترديني لأمان

ردت بانفعال وعصبية :  اي ماريدج انت وحدة ممناسبة اله فرق السماء عن الكاع بينكم

انت مطلكة وهو لا انت عرمة ولسان هو وين تلكين مثل اخلاقه

وفوك هذا كله ماريد اخرب وي اخوي وتصير مشاكل من وراج واخسره طول العمر

فاحسلج عوفي امان احسن الج واله

كمت على حيلي بجية فاطمة جايبة الجاي ظلت واكفة مستغربة على صياحها

كتله انه ماا اسمح الج تهينيني بهالطريقة

وخلي تطلع من امان هو خلي يكلي ماريدج ذيج اللحظة ماابقى اله بعد بس هو يحبني ورايدني

وانت رفضج هذا الي ولارتباطنا كله نابع عن حقد وكره

اخر شي دايرة واحجي وياهه واشدد على حروف كلماتي ؛  شربي جايج عمه وانه من رخصتج 

رحت طبيت للغرفة وسديت وراي الباب بهوووء وكعدت فايرة واغلي من القهر شون غثتني

باوعت للتليفوني فتحته ، صورة امان مخليتها خلفية امرر اصبعي على صورته انه تعبت خاف هو هم يتعب ويتركني شون ياربي

وراها بدقايق طبت فاطمة كعدت يمي
تحجي بعتب على بختج سماسم ليش هالعصبية ولج مو ابنها يحبج ورايدج انت هسه كون تكسبينها تتقربين منها

جاوبتها يعني بين قوسين اتلوك الهه ...
وخليت ايدي على كتفها اطبطب عليها
وكملت ؛  وانه يم فروسي الوردة  ماعرف اتلوك اعذريني ..

تأشرلي بايدي ولج مو علمود هالمكرود هذا الي ميت عليج علموده اسعي ويا مو جاي يسعي علمودج  مو الف عين لاجل عين تكرموا المفروض هاي تعرفينها انتي ..

دنكت راسي واهز براسي ..

بعدها راحت فاطمة وجابت امها يمنه ظلت جم يوم جنت اباوع عليها واتذكر بيبيتي .. حاولت اتقرب منها واداريها من فاطمة تروح للدوام ..

هيه هم مرة جبيرة ومريضة صحتها على كدها ..

بس بالليل ظلت تكعد تبجي وتنعي وتلووب وتصيح على فاطمة وديني لبيتي ما ابقى هنا

هاي روح زكية بالشقة تفتر عليه تريد تاخذني وياهه حلمت بيها ماخذتني وياهه ..

تكرر هالشي لا ليلة ولا ليلتين وخطية فاطمة محتارة بيني وبين امها ..

كتلها اخذيها وروحي انه اخلي امي تجي يمي .. اخذتها وراحت ..

يوم ثاني اجت عمه زينب وعمو سليمان كعدوا بالصالة رحت سويت جاي وجبته

هو خاط الاستكانة وشرب منهه باوعلي خازرني
كال تظلين طول عمرج حمارة شدعوة مخليه طن شكر بالاستكانة

كتله عمو هيه استكانة وين تشيل طن شكر ..

كال بعصبية وبعد تراددين الله يطيح حظج كوومي صبيلي غيره ..

هو يصيح ومرته  تكله على كيفك وياهه .. وهو يسكتها بعصبية خطية عمة زينب حصلتلها رزالة من وراي ..

كمت اخذت الاستكانة رحت غسلتهه وصبيتله وقللت الشكر ..

كعدت كال ماتصير هاي الحالة كل يومية ناس عايفين بيوتهم وجايين يمج

عمة زينب كلتله انطيها لابن عمتها رايدهه ورايدته بس انت واكف بدربهم

هيه كالت هيج وهو رزلها صاح بصوت عالي انجبي سدي حلكج لاتحجين هذا الحجي كدامها

وانت سمية لو توافقين ع الولد لجايبته عمتج لو ترجعين لامير ...

جاوبته لا عمو ماريد لا هاي ولا هاي

كال بتهديد نشوف يا سمية تاليتهه وياج وبعد هاي اخر ليلة تباتين هنا ترجعين لبيتنه

كتله عمو بروح امك مارتاح انه اله هنا لا تغصبني حلفتك بروح بيبيتي

هز راسه وطلع معصب من الشقة وبقت عمة زينب يمي ..

انه مارتاح اله بالشقة هنا استحي ابيت صفا مارتاح لامتثال عمتها  شوية نفسية ...

بيت اهل فاطمة رغم اختي جنتهم بس استحي من رجلها هم يبقى غريب ..

وبيت عمي اضوج من عمي سليمان يشمر حجي يطب يطلع يريد يرجعني لأميرررر وحتى امير من اروح يشرد من البيت هم خطية ..

امي بهاي الفترة هواي تقربت مني تخابر وتجي رغم مابيها كوة يجيبهه خالي لو ابن خالي كوة تصعد الدرج من رجلهه مابيهه..

بقت عمه زينب يمي لليل اجت امي تفاجئت بجيتها وجايبه جنطها وياهه تريد تبقى يمي .. ابن خالي وصلها ودخل جنطهه بالشقة .

سلمت عليهه عمة زينب وراحت خابرت ابنها وعد اجه عليها ورجعت لبيتهه .

بقت امي يمي ظلينه نسولف هواي فرشت يمها بالهول نمنه وسهرنه تفرجنه فلم خابرنه صفا تواعدنه يوم ثاني جمعة نتجمع كلنا هنا نشوي سمج ونتغدة سوى .

نمنه وكعدنه على صوت الباب يندفر مايندك ..

كمت بسرعة خليت شال على راسي .. وفتحته

طب عمي سليمان عيونه براسها يصيح وصوته واصل لسابع جار .

دفر الباب طبكه حييل بقيت مرعووبة ومستغرلة بنفس الوقت شبي هذا !!

لزمني من ايدي وحيل يخض بيه ..
ولج انت ماتستحين هااا شنوو ترجع زينب وتجيبين امج بدالهه شنوو عدجن اثنين مطلكات هنا وحدجن بالشقة تردن تفتحن دعارة وتستفتحن بيهه ..

اجت امي تعرج تريد تفكني منه دفعها بكل قوووته وكعت على الكاع صرررخت وهديت روحي منه بقووة

ونزلت علكاع يم امي ..  هو لزمني من شعري ورفعني
كال سمعي ولج تبقين هنا حد مااجي اجيب سيد واجيب امير ونرجعكم

والله اذا رجعت وماشفتج اله ارميج وادفنج بيدي

انوب خوش جايبتلج وحدة يمج هم مطلكة مثلج وهم سمعتهه زفت .

باوعلنا وهو يخزر بينه واحنه كلش خايفين تركنه وراح كومت امي وانه امسح بدموعي .. واسألها هاا يمه خوو ما تأذيتي ؟

ردت لا يمه مابيه شي هذا شبي عمج مخبل .

اي يمه حاط دوبه ويه دوبي .. شسووي ...

وهسه شراح سوين سمية ترجعين لابنه

لايمه شبيه تخبلت ..

ساعدتهه كعدتهه على القنفة ورحت لتليفوني .. دكيت رقم امان مرة مرتين يله جاوب

اجاني صوته نعسان ..
اليوم جمعة وهو يوم استراحته ..

كال صاير شي ؟ شبيج ..

حجيت له وانه ابجي  وامسح دموعي ..

كال بسرعة جاي ...

بقيت انتظره .. الى ان اجه .. رحت فتحت له لباب دخل سلم على امي ..
كال خو ما اذاج .. هزيت راسي بحزن ..

رد وهو يخلي ايده على راسي معليج هسه اليوم اخصمها وبعد كافي ..

كتله بخوف شراح تسوي ؟

معليج الج الصافي انتي بس هسه ع السريع روحي بدلي وامشي وياي

جنت خايفة اعصر باديه خايفة عليه اكثر مما على نفسي عمي يخوف خاف ياذي لان اصر عليه

رحنه بدلنه انه وامي وهمزين عمي مارجع قبل لا نطلع من الشقة ، ظليت ادعي كون مايجي ..

رحنه وياه صعدنه بسيارته هو خطية ساعد امي تنزل من الدرج .. حمدت الله عليه لان هو ابد مايفكر بماضيها ولا مرة جاب سيرته رغم يعرف كل شي .

بالطريق خابرنه على صفا وبلغناهه خاف تجيى للشقة ومتشوفنه ..

وده امي لبيت خالي وهيه نزلت ظلت توصيه عليه
جاوبها لتخافين بأمانتي ..

رجعت صعدت ويا كاعدة بالصدر  التفتت عليه
ساألته امان على شنو ناوي شراح تسوي ؟؟

ايده على حلكه وساكت عينه ع الطريق ومبين غركان ببحر افكاره ..

عليت صوتي شويه اماان لتخليني  هيج احجي على شنوو ناوي هااا ؟

رد عليه بقلة صبر ؛ انت بس سكتي وخليها عليه ...

نفخت بعصبية ودرت وجهي ع الجامة .. مشت بينا السيارة بطريق طويل ..

باوعت عليه وين رايح بيه أمان ؟

باوعلي بشقاوة رافع تك حاجبه شنو حبيبتي مالج ثقة بيه ..

لا مو هيج بس انت ماخذني لبيت أهلك مو ؟

حبيبتي ذكية تلكفها وهيه طايرة ..

عفية مالي خلك امك من الصبح هسه قبل كم يوم مرزلتني هيه ..

التفت عليه ثواني اشو مكتيلي ليش ولج ؟

ماريد يمعود ماريد انوب تروح تحاجيها

لا تتعلمين تضمين عليه شي ابد ، تمام ؟

سكتت وبس اتأفأف هو كال بتحذير تمااام ؟

باوعتله هسه كلي على شنو ناوي ...

خزرني خفت من خزرته درت وجهي كلت تمام تمام ..

هو ابتسم ... وصلنه لبيتهم وكف السيارة ..
كال سمية الحجي بس الي أني أحجي انت حجاية متحجين ماشي ؟

ليش ؟

مثل ما اكلج .. يله ننزل ..

نزلت من السيارة .. جانت الساعة تقريبا ب ١١ الصبح
دخلنه للبيت جان الكل هناك عدهم اخواته هجران ورجوان و حتى رضوان هم موجود ، لأن اليوم جمعة الظاهر عدهم لمة ..

الكل  يباوعلي باستغراب
واشواق ابدها تاكلني أكل ..

حتى ارتبكت أسلم .. همست سلام عليكم وعيوني دارت عليهم كلهم ودنكت ..

ابو أمان تقرب من أمان وكاله خير بويه وجوهكم ماتتفسر شنو صاير ؟ وطلعت من البيت مستعجل خو ماكو شي ؟

امان جاوبه اي يابه جايك بالحجي هسه ..

تقرب رضوان منه وكال سمية صاير سي ؟

باوعتله ونصيت راسي .. وامان كال هسه تعرفون كل شي ..

اشواق كالت خير ان شاءالله ..

كعدنه كلنا بالصالة وانه حيل متوترة وعيني ماخليهه بعين أحد . ومن اتوتر اظل اسحب بطرف هدومي ليجوا رغم لابسة صاية ياربي موقف يفشل كلش .

امان كال اسمع يابه اسمعي يوم عمي يريد يرجع سمية لامير بالغصب واني صراحة تعبت انتوا كلكم تعرفون اني رايدها و كل مرة اروح اخطبها منه ميقبل هالمرة اريدكم ويايه واذا متروحون اني هسه اخذها ونعقد واطلع من البصرة كلها تحلمون تشوفوني بعد وانتوا كيفكم واني هذا العندي ..

عاطت اشواق وكامت على حيلهه :  انت شبيك تخبلت هم تريدني اخسر اخوي وهم تريد تعقد بدون موافقتنا ..

كام وكف كبالها كال وهو يحاول يهديهه : يمه افهميني ..

دارت وجهه عنه وتأشرله بيدها يسكت
لا افهمك ولا هم يحزنون

والتفتت عليه ها سمية دسترتيها موو سويتي الي براسج

توه كتلها  عمة وهو أمان اندار عليه معصب وكالي بعصبية وتحذير سمية سكتي ولا حجاية

كتله بقوة و ثقة  بس انه اريد احجي أمان

صك اسنانه بقووة وخزرني وتقرب مني يفح عصبية
تردين تخربين كل شي مو ؟؟

تنهدت و سكتت وعاطت اشواق خࢦيها تحجي خࢦيها خلي تشوفك لسانه

اندار على امه كال لاء ماتحجي وهسه معليج منها شكلتوا ؟

اشواق كالت بتصميم ݪااااااء يعني ݪاااااا

كام على حيله أبو أمان وكاللها أشواق لبسي وامشي وياي يله نروح لاخوج ونخطبها منه واذا ماقبل نمشي عليه ناس الى ان يقبل وكافي رفض بعد

جاوبته انت مو چــنت ݛافض شغيݛ ݛأيڪ هسه ؟

رد بانفعاࢦ كافي ماتسمعينه شيحچــي!!

خل يحجي منا للصبـඋ شعࢦيڪ منه ؟؟

تݛحين أشواق لو لا؟ حتى نتوكل !"

ݛاحت گعدت على القنفة معصبة وتنفخ هزت إيدها بالهوا بعصبية ماروح هذا الارتباط كله  ماعليه بي انه

ظليت اباوع عليها بنظراتي اذكرها بوصية امها
وهيه انتبهت عليه كالت لا تباوعين عليه هيج سمية انه صح امي وصتني عليچ بس هذا مو معناه اخذچ مݛة لأبني !

نظرات أمان باتجاهي جبرتني أسكت عنها هو راح انحنى كدامها اوࢦ شي باسها من راسها وبعدين كعد على ركبة ونص گدامها لزم اديها بوسهم

وظࢦ يحچــي وياها بهدوء يمه والله أني أحبج واخليج على راسي والله لتخافين سمية ابد مراح تقلل لا من احترامج ولا من قدرج وانه موجود صدكيني

وهيه حبابة وخوش بنية صدكيني من تعاشريها راح تتغير نظرتج عليها ٩٠ درجة وعد مني

ابتسمت باستهزاء وسحبت ايدها منه وخلتها على وجهه روح يمه رووح الله يوفقك اذا هالشي بيها سعادتك الله يسعدك ان شاءالله واذا لا الله يبعدها عنك .

كام على حيله باسها على راسها .. ابوه كال بوويه سمية بوسي راس عمتج واخذي من خاطرها ورضاهه

بقيت مترددة أنه .. اباوع عليها  بتردد وهيه ولا جنها سمعت عمي ولا جنها انه موجودة

امان قرب ولزمني من ايدي جبرني ابوسهه هيه ماقبلت اتقرب منها حتى

كارهة الهوى الي اتنفسه وياهه

بس شسوي انه هاي من لا جارة ولخاطر امان وهم حجاية عمي مسموعة مدام بيها طيبة خاطر ورضى وصفحة جديدة بنفس الوقت

تقربت وبستها على راسها باوعتلي بنظرة حسيتها بيها نوع من الرضى .. دارت وجهه بسݛعة مني وانه دنگت ݛاسي

كاللها عمي ابو امان  ها طيب النفوس ان شاءالله ؟

هيه خلت رجݪ عݪى رجݪ وكالت بنبرة مامنها أمࢦ
إن شاءالله ..

سألها عمي ماتجين ويانه

كالت بسرعة ࢦااا ࢦااا ماا ضمن ردة فعࢦ أخوي أنه ابقى هنا وانتوا خابروني شيصير مايصير خࢦوني بالصورة عود انتظݛ منكم خبݛ .

صاحني أمان على جهة رحت وياه وعيونها تتابعني
الى ان ابتعدنا عن عيونهم وصرنا بس وحدنا

لزم ايدي من رسغي وصار يحجي وهو قريب مني وعيوني بعيونه
يحجي بصرامة و جدية

عيني سميه أني رايح هسه وانت راح تبقين هنا ڪُل الي اريده منج ماتحتكين بأمي وتصير مشادات بيناتڪم جاي تفهمين عليه شنو احجي

أمان أنه!!

هز راسه يقاطعني وبرفض سميه لخاطري لخاطر حياتنا الجاية سعادتنا تحملي شويه تنازلي بمقدار ذرة وحدة بس شجاج ولج اني احبج مااهوون عليج ؟ الي جاي اسوي كله هذا علمودج مايوكف بعينج

تقربت منه شسالفة شمسويه هسه انه ماتكلي طبعا يجي بعيني وحاسة بلي جاي تسوي بس ماحب ابقى هيج ساكتة اريد ادافع عن نفسي .

صك سنونه : بس ليوم كتلج باقي الايام كلها راح تترتب وتصير احلى ايام بحياتنه اوعدج ليش مالج ثقة بيه انتي خلي يعدي هذا االيوم

سحبت ايدي منه واشر على شفايفي بمعنى راح اخيط حلكي واسكت

ابتسم على حركاتي وعد توعدني ماارجع واشوفجن انت وامي من الروس

لا يمعود من الهالدرجة قابل كدها انه وبعدين انه ابيتهها هسه اكيد راح احترم نفسي واسكت وياغريب كن اديب ...

لج لا مو غريبة غير بيتج هذا

ظليت اباوع لاركان لبيت لاا صدك نتزوج هنا عود اذا صارت

التاف يريد يروح وكال هسه خلي تصير تاخرت على ابوي ابقي هنا ومثل ماوصيتج اوكي

تدلل ... حبيبي وصاياك اوامر

اندارلي كال تستهزئين حضرتج ؟؟

باوعتله كتله لالا عليمن .. ههه

طلعنه رحنه للصالة عمي ابو امان جان محضر نفسه ولابس دشداشة رصاصية وعلى جتافة مخلي بشت وبيده سبحة

شاف امان كاله يله بويه نروح تأخرنا وهم نمر على ابن عمي ابو خالد هو هم شيخ وخوش يحجي وخالك هم يعرفه

هز راسه امان يله يابه ماعندي شي ..

امان كال لرضوان تروح ويانه ؟

قبل لا يجاوب رضوان اشواق ردت لا رضوان اريده بشغلة خلي هنا ..

هز راسه رضوان بقبول وطلعوا امان و عمي .. اجيت اكعد هيه كالت يله حتى تشوين السمج غير راح تصيرين جنتنه حجتها باستهزاء

رضوان جان يباوع عليه ابتسم بطرف شفته

والبنات ضحكن وانه جبرت روحي اضحك

كالت شو واكفة يله روحي ويه لبنات للمطبخ

رحت وياهن هنه صارن كدامي ودخلنه للمطبخ ..

طلعوا السمج كالت رجوان هو نظيف بس نسويله صلصة ..
ونشوي بالفرن مال الطباخ ..

نزعت صايتي وظليت اسوي وياهن الصلصة عمى عيوني البصل وانه مامتعودة

بس سبحان الله جان المفروض اليوم اتغده وي خواتي وامي سمج بس للاسف خربها سليمان ..

كملتهن واريد اطببهن للفرن ، رجوان وهجران ملتهيات ويه جهالهن وانه وحدي بالمطبخ جانت عدهم خدامة بنغالية مدري وينها يمكن شحتتها عمتي اشواق منو يتحملها ..

فتحت الفرن وكفت افكر شلون اشويهن هسه خاف يتاخرون أمان وابوه ويبردن يصيرن مو حلوات

طب رضوان بهاللحظة سوه احم احم وكال ها اخذ السمج اسوي بالسوك ؟

ردت عليه اشواق والظاهر طبت وراه
كالت لا سمية تشويهن بالتنور مال الغاز ورى البيت

صفنت وين اعرف اشوي بتنور الغاز هاي يمكن مسويتلي كمين وتريد تحركني
ووينك اماان تعال اخذني امك ناوية عليه ليوم

كتلها بس ماعرف اشويهن بتنور خل احطهن بالفرن

كالت لا بالتنور اطيب ... طلعي من هذا الباب تلكين المشواية معلكة  غسليها وخليهم بيها ومن اخابر امان ويكول جايين انت اشويهن حتى ينوكلن حارات اطيب .

كالت اوامرها وطلعت ورضوان باوعلي كاتم ضحكة ويباوع بشماته ...

اجيت اسويله نننننن ماتضحك بس لازم اعقل اليوم ..

بقيت بالمطبخ وحدي ماريد احتك باشواق ، خابرت
على صفا وحجيتلها كل شي صار ورى ماخلصت مكالمتي ويه اختي خابرت على امان انطاه رفض خفت خاف صاير شي چــايد يربي شلوون بينه .

بقيت كاعدة بالمطبخ على الكرسي وافر برجلي متوترة
طبت رجوان كالت ماما تكول ماخابرج أمان ؟

جاوبتها تؤتؤ وهزيت راسي ..
كملت : اخابر ينطي رفض .

كالت اي حتى احنه هم الله يستر من خالو ...

سكتت وفركت وجهي ..

كالت تعالي يمنه للهول ليش كاعدة وحدج هنا!!

رديت : لا مرتاحة هنانه ..

كالت براحتج وطلعت ..

مرت الساعات واحنا على نار اخابر على امان يفصله بقيت خايفة خاف عمي يسوي سالفة خاصة انه طلعت من الشقة ويه امان ..

ورى اربع ساعات يله اجو واسمعهم يحجون ويه عمتي .. بقيت كاعدة بمكاني بالصالة وهم بالديوانية يسولفون حتى متجرأت أروح يمهم

بعدها طلع امان كمت على حيلي هو شافني ابتسم
ضحكت كتله ها بشر ؟

كال والله قنعناه بس ما حصلت رزالة بسببج

كتله يعني اهلهل ؟

طكهه ضحكه كال هلهلي

كتله خاف عيب

كرصني من خشمي وكعد يمي يسولفلي الي صار ويه عمي

اول شي من طلعنا من البيت خابرته وكتله سمية يمنه وعندي موضوع وياك اريد اجيك للبيت

جاوب بنتر وصياح  انه طالع ادور على ابني امير ابيت خواله وبعدين صخام سمية شعدهه يمكم ؟

خالي ميصير احنه لازم نحسم الموضوع سمية ماتريد امير ولا حتى امير يريدها كافي انطينه الموافقة خلينه نتزوج ليش تخليني اسوي شي يضوجك

هو ضال يفشر عليه  ويصيح وكبل ابويه اخذ مني التلفون وحجه ويا اذا عندي خاطر يمك انه وشيباتي لا تردني

كال لابويه هو منو سمحله ياخذهه من البيت

يابه نعتذر وجايين الك للبيت ونريد منك كلمة واحنه اهل وماكو فرق بيناتنه ...

وفعلا توجهنه  لبيت خالي واخذنا وياهنه الشيخ مالتهم هو هناك جان معصب بس من شاف ااشيخ جر بوشه
وهدأ شويه

وظلينه نسولف ويقنعون بي ابوي والشيخ
وانه كاعد اتمنى اكوم اكتله على عناده وصخام وجهه

يتحجج ابني امير يريدها وهيه مرته واحق بيها

وخابرنا  على امير وامير اجه  وكال انه ماريدهه ومابيننا توافق وعندي وحدة بحياتي من سنين رايدهه وابوي رافض

الشيخ كال لخالي سليمان ماكو فرق بين امير وامان وانته يا ابو وعد شلك بوجع الراس فرضا رجعتهم بالغصب تكعد تحل مشاكلهم وانت رجال مريض داري صحتك شلك بعوار الراس هذا ...

حجايه من ابوي و حجاية من الشيخ قنعوه بس بعده منطط عيونه وحاقد ..

وكال موافق بس امير مااخطبله هاي الي ويا بالكلية

الشيخ كاله انه اروح اخطبله ماكو فرق بيني وبينك ..

وهسه هاي جيتنه من عنده صدك امي كالت مصخرتج شويتي السمج

ضحكت اي راح يضوكون طبخي اليوم

اي عفية رفعي راسي خو ما خربتي سمية بداعتي ..

لا شسالفة صفا دوختها حركت غداهم في سبيل تعلمني ع الشوي

ميخالف خل تنكتل صفا بس اليوم اهم شي احنه نطلع رافعين راسنا

هههه ادري طابين حرب

والله علواه على الحرب ديلله جوعانين ترى ....

فركت اديه اي هسه اصب .. بس جنهم امك وابوك بعدهم يتناقشون بالموضوع!!! امك بعدها ممقتنعة

معليج مدام قنعنه الراس الجبير امي سهلة وهالشي يعتمد عليج

ممممم

ماكتيلي شوكت ااخطوبة ؟

هاا اي خجلت اسال صراحة

هههههه عكب باجر

عكب باجر شنو خو كول ليوم حتى اروح انه وريحة السمج

تقرب مني يهمس مستعجلة حبيبيتي !

خجلت وطكيتها ركضة للمطبخ شردت وهو وراي يضحك ...

وراها رجعت للشقة واجن يمي خواتي و مرة ابوي وامي وظلينه نحضر للحفلة مالتي صارت بنفس الاسبوع ..

قبلها اجو للشقة مالتنه صارت المشية مال الزلم وسليمان موجود بس ابده ياكلني من صدك .. بس مجبور بعد .

عقدنا عقد سيد  ..

وراها وبيوم الحفلة امي اصرت هيه تسويلي المكياج بصالون صديقتها والتسريحة صديقتها سوتها تجنن كلش وهم اشتغلت لخواتي وجان الكل فرحان

اشواق اول باول ع التليفون تريد اطلع كاملة مكملة مو علمودي وانما علمود صديقاتها راح يجن للحفلة بالقاعة

وتلث مرات غيرنه البدلة لان عشتو ماعجبتها هاي تكول ما بيها نشعة  ووحدة مابيها لمعة وووو خبلتني وامان يصبر عليه

تالي اختاريت اثنين حلا للنزاع وحدة على ذوقها ووحدة على ذوقنا انا وامان والحمدلله ذوقنه متشابه

انه ماريدها تمشيني بكيفها بس هذا كله مايهمني الي يهمني اصير قريبة من حبي واخلص من تسلط وجبروت عمي وسيطرته خاصة بعد وفاة بيبيتي .

واريد اخلص من هالشكليات ونعقد واصير اله قبل لا سلمان يطلعلنه بسالفة صفح .

اجو عليه للصالون واخذوني للقاعة جنت ناذرة نذر اهلهل بحفلتي .. هو جان لازمني من ايدي عمود ندخل للقاعة خليت المسكة على حلكي وهلهلت وهو خررب ضحك ويعصر بيدي حييل

همزين محد سمع لان صوت الدي جي جان عالي بس اهم شي وفيت نذري ...

جنت فرحانة وطايرة من الفرح بحيث الضحكة شاكة حلكي وبس اكركر اريد اسيطر على نفسي ما اكدر  واشواق بس تخزر بيه وامان على ضحكي يبتسم

هيه اسبوعين انطاني بيهم مجال بس اجهز نفسي للعرس وهو هم جهز نفسه واشتره غرفة ابيت اهله ورتبها النه .

جنت خايفة وايدي على كلبي لاتصير شغلة وتخرب كل شي ... بحيث جنت اريد الوقت يمر بسرعة ..

بعد صبر كم سنة واخيرا ربي فرجها ..
انه جنت رايده بالعرس بدلة بسيطة و تسريحة همين لان جنت ناوية اذب لحم اركص ركص ماصاير

بس اشواق الله يسلمهه تريد كل شي فخامة وملكية ..

هم صار بالقاعة العررس رغم امان جان ماقابل يريد عرس بسيط لان هو كلش تعبان جان بس الله يسلمها عمتي تحب الفخفخة الا انه ويا ابد مانهتم لهاي الشغلات .

وهيه مو حباً بينا لا عمود تفخفخ  وتفيك كدام ربعها ... يله هم هالشي من صالحنا يبقى عرسنا ذكرى حلوة لان جان كلش حلووو

... والحمد لله مر العرس بسلام .. واخذونا للفندق انه جنت تعبانه وميتة تعب بس دخلونه للفندق وصرنا وحدنه انداريت اله يله حبيبي نزعني البدلة ...

هو طكاهه ضحكة وتقرب مني احتضن خصري وباسني على كتفي ...

كال مستعجلة حبيبي

انه يبوو  غصت بنص البدلة من الفشلة ماجان قصدي هيج بس تعبت من البدلة ثكيلة كلش

انوب جفصت واحتاريت شون ابرر الجفصة ، اصلا انه عبارة عن جفصة

ظليت امتمت بالحجي لا والله حبييبي موقصدي بس تعبت منهه والله ها ها امان مو تفهمني غلط عليك الله

مستمر يضحك بضحكته الهاديه لا حبيبي والله مقدر وضعج

التافيت اله ضايجة هاا تنصب ؟ انه انزعها لا تنزعني

كام سحبني عليه وحضني حييييل
كال يالله شكد مشتاق لهاي لحضنه صدك حضن طال اشتياقه

فتح لي البدلة وانه ركض للحمام نزعتها
بقيت بالحمام مماخذة وياي ملابس

مديت راسي من الباب وصحت عليه امااان
اجه مبتسم ها حبيبي
حجيت خجلانة ها جيبلي ملابس ..

راح ورجع كال ماكو الج ملابس هاي بس ملابسي ملابسج وين

يااا بس لا نسوهم ماجابوهم شراح البس هسه

كال اوكفي هسه

راح اجه بيده سيت نوم ويضحك كال هذا جان ويه ملابسي ووياه ملابس طلعة يمكن امي مخليته شفتي شلون تحبج وتفكر بيج

كلت وانه اخذه منه  اي والله من ناحية تحبني تحبني بس لوو مطولته شوويه ؟

هو صدك قصير كلش وقطعتين اخذته ولبسته يادوب اكلت لكمتين وكمت غسلت ، كتلني البرد وانه بطرك سيت النوم

رحت للجرباية عود انتظره يخلص عشه لان ياكل على كيفه ، نسيت نفسي ونمت ماادري لمن جريتها نومة

لحد ماادري بشكد الساعة كعدت شفته يمي متمدد لابس تيشيرت ابيض وسروال رصاصي ..
لازم موبايله بيده ويلعب بوبجي

حس بيه كعدت باوعلي ، قفل موبايله رفع تك حاجبه
كال صح النوم

تمططت كتله بيش ساعة هسه

كال راح يطلع الفجر ولج ادري بت الاوادم جايبج تنامين

جان كعدتني

ماهان عليه اكعدج ادري تعبانه

ابتسمت كتله فديتك ..

رد مدام تفديني ومدام شبعتي نوم تعاي لعد يله .. 

وووووصرت مرررررته ....

......

بطريق رجعته من الفندق للبيت باوعتله جان يسوق كتله أمان شون ويه امك خاف تنشب وياي

كال لا اطمئني انت راح تداومين ان شاءالله بشركة وهيه دوام والدنيا تلاهي وان شاءالله ماكو مشاكل .

بس يافرحة ماتمت اجت كورونا وكعدتنا بالبيت فترة بس انه بعدها صرت حامل ونساتي كلش متعبة كضيتها مستشفيات لذلك ماجانت تصيرر بيننا مواجهات حامية .. وهيه بدت تتقبلني رغم يصير مرات اختلاف بالاراء .. وتبقى كل وحدة متمسكة برأيها .

رضوان واخيرا قبل يرجع مرته وامير  تزوج انصاف بعد جر و  عر واخيرا صاروا لبعض ..

لم تكن خطيئتي عندما رأيت في عينيك أماني حتى تسللت روحك رافعةً عن الارض أقدامي ...
فلا أريد سوى اليسار أسكنهُ بيتاً ليس لهُ سقفاً وجدراني ...بل جنةً مليئةً بورودٍ لا تحيطها أشواكاً او تخنقها أدغالِ ...
بقلم الراقية سكون .. anaswad

انتهت ..

٢٩ أبريل ٢٠٢١ ..
١٦ رمضان ..

متيهة السنة الهجرية شكد 😅

نورا ناصر ♥️