رواية لمْ تكُنْ خطيئَتُنا الفصل التاسع والأربعون 49 - بقلم نورا ناصر

السلام عليكم

رمضان كريم وكل سنة وانتوا طيبين وان شاءالله من العايدين 💜

...... اعتذر ع تأخير .

‏حين أحببتك ..
أدركت معنى أن يكون للإنسان روحاً
بعيدة عنه لكنها أقرب إليه من كل شيء ♥️

.......

سمية ...

وكفت بمكاني عاصرة التليفون بيدي حيل ، تنهدت بقهر وبيبتي تصيح من المطبخ ؛ ولج مو احاجيج ردي شصار ..ولج سمية مابيه اكوم ولج لا توهدنيني ..

طلعت من الغرفة وانه امسح بدموووعي .. شون ابلغها هسه وهيه بروحها صحتها على كدها .. شلووون !!

رحت للمطبخ باوعتلها بخوف وجاوبتها ها بيبي

ووجعه ولج مو اصيح عليج ليش ماتجاوبين

سحبت نفس وزفرته وانه احك بالشعر القريب من كصتي .. كتلهه بيبي هو قدر وصار ..
..طويرة من طيور من طيور الجنة مو هيج تكولون ؟

لطمت على فخذهه ولج منوه هااا منووووو

كتلها بنحيب بيبي ابن رضوان توفى ..

بفزع سألتني وولج يا مصخم الوجه كلج ...

هسه صفا اختي خابرتني ...

ظلت تدك وتلطم على وجهه لزمتهه حضنتها ابجي وياهه وهيه تنعي وتبجي على رضوان ...

كالت خابري على عمتج اشواق ...
خابرتها من تليفونها ظلت تحجي وياهه وأكدت الهه الخبر ..

بقينه انه وبيبيتي وهمه بيت عمتي اشواق سوو ابيتهم استخلاف لان هو طفل مايسووله فاتحة بس فتحوا بيتهم للناس الي تجي تتخلف الهم

رحنه كلنه لبيت عمتي اشواق وخطية رضوان وراهه اجه بس مرته موو وياه .. ماعرفنه شنو السبب ..

راح دفن ابنه واجه وعيونه حمرة دم خطية بس تخلفوله الناس ماقبل يبقى أصر اله يروح لبيته كال يريد يبقى وحده ..

الكل متعجب على موتة الطفل ويكولون عين وصابته خطية شكد حلو ومايستغرب من احد ولا يشكي من شي مرض ولا بي اي شي رأساً مات ..

بس هذا حظه رضوان خطية ما تهنى بأبنه وبعده ماشبع منه ..

مر الاسبوع احنه كلنا ضايجين عليه ميتين قهر خابرت أمان وحجيت وياه كال اني جاي وعرفت منه انو رضوان حالته تعبانه ومايريد اي احد

بحيث يروحون اله للبيت مايستقبل احد حتى مرته عايفها ابيت اهلها وكايل الهم بعد ما اريدها

لأن هيه جانت مصرة تروح بدون الطفل كايلة اريد اتونس خلي يم امي احسن هو مايفتهم شي ..

فهو محملها سبب موتتة ابنه ..

اكيد هسه بحالة صدمة بعدين لمن يصحى يوعى على كل شي ويتعايش ويه الوضع ..

خابرته ماجاوبني كلت يله مايعجبه يجاوب يمكن مايحب يحجي بس انه جنت اريد اطمأن عليه ..

ظليت اراسل صفا واحجي وياهه ..
سألتني بعدها فاطمة ( مرة ابوهم المتوفي) يم أهلها ..

جاوبتها أي بعدهه هناك امها ماتريد أحد بس تريد فاطمة لذلك هيه هالايام كله يمهم ..

بيبيتي شلونها ؟
_ شلونها بعد هالايام هواي تبجي هووواي وخاصة بعد مامات ابن رضوان واليوم ودتهه أشواق للطبيب ضغطها صاعد الدكتور كايل الهه بينها وبين الجلطة شعرة شسويلها تقهر بروحها شكد احاول وياهه مايفيد ابد بيبي صحتج عافيتج مايصير هيج كافي بجي مو زين هذا قضاء الله وقدره مايفيد وياهه

جنت جاي احجي وياهه اتصل رضوان ..

كتلهه روحي هذا رضوان يخابر عليه بعدين احاجيج ..

كالت يا شيريد ؟؟

اي مو انه خابرته رووحي هسه بعدين ...

راحت هيه وانه جاوبت رضوان اجاني صوته بايح ومكسور : ها سمية مخابرة عليه؟

جاوبته اي والله ردت اطمأن عليك شلونك هسه ؟

سلوني بعد سمية ماتكليلي ؟

ميخالف شبيدك عليه انته بعد صدكني يشفعلك بالاخرة طير بالجنة هسه ..

ولج سمية الي حارك كلبي مات وانه بعيد عنه مات بغير حضني مو كبال عيني مات وانه رايح اتونسسسس ...

اووف رضوان قدر وصار ليش هيج تسوي بنفسك وانته بعدك شاب تعوضه ان شاءالله يصير عندك عشرة غيره بس ارحم نفسك هيج راح تتعب ..

كال هيه كله السبب منهه لو ماخذه وياي ماصار هيج !! بس تحرم عليه بعد واله اطلكهه

رضوان شتكول شتحجي انته هو هم ابنهه واكيد ماجان تريد يصير بي كل هذا

انت هسه المفروض تبقيهه يمك واحد يصبر على االثاني انته وياهه هيه اكيد حالتها تعبانة هسه وقرارك ابد مو بمحله ميصير تتخذ قرار وانته بحالة انفعال وعصبية ..

تحسر وكال ماريدهه سمية ماااريدهه بعد لعبت نفسي منهه والله كل الصار بسببها

قدر الله رضوان صدك منك جذب شبيدهه هيه قابل انت هسه اهدى وفكر زين واطرد الشيطان
والله يعوضك ان شاءالله

ختمت المكالمة ويا وبيوم الجمعة المفروض أمان يوصل للبصرة جاي من أربيل ..

اجه علينه اسلام زوج اختي صفا ورحنه كلنه لبيت عمتي اشواق مسوين ثواب طبخ ...

العصر جنت عدهم بعدني راسلني امان ..
كاتبلي اكلج حبيبي ..

كتبتله ها يروحي وصلت لارض الوطن ..

كتب مشتاكلج اكثر مما مشتاك للوطن يولي....

ابتسمت رديت عليه ؛ لك اروح فدوة للوطن الي جمعني بيك ....

رد : بعد عمري سمية وينج هسه انتي خما رجعتي للشقة مالتكم ابقي للمغرب ترا راح أوصل وأريد أشووفج تمام ؟

اي حبيبي والله اني ملهوفة على شوفتك ان شاءالله باقية ..

بقينه يم بيت أشواق ، ورقية أختي ، رغم هم عدهم بنغالية بس هيه تشكلت وخلت ابنهه الصغير بحضني وجلغت البيت جلف اخذهه الواهس والبيت كلش حلوو يسوي واهس للتنظيف ...

بقيت أنتظر أمان وكفت بالديوانية مالتهم وعيني ع الحديقة والكراج خاف هسه شوية ويجي مشتاقتله ..

ومن شفت الباب انفتحت وطبت سيارته وتلكنه خواته وامه نزلت وياه فرح بنت عمه وخطيبته السابقة ومرة عمه جايين وياه

والله حتى فيوزاتي طكت هيج احس عروك الي براسي ظلت تركص .. سديته لبرده بعصبية ورحت كعدت يم صفا اختي

ندستهه بيدي ولج صفا خابري إسلام خل يجي علينه نروووح

كالت شنو هو لعب مساع گلتي خلي نبقى لليل هسه تردين ترحين شبيچ ..

جاوبتهه ماعليج يله خابريله يلله ...

اووو هسه يرزلني يكول شنو تلعبن عليه ... خلي الله هادي نظل لليل نتعشى ونرجع

ما ماا ماريد اتعشى هنانه

ياا شبيج تخبلتي جنج زعطوطة شصار ...وتقربت مني همست : لج مو ع اساس تردين تشوفين أمان!!

نجبي غيرت رأيّ يله ...

رفعت ايدهه ونزلتها باوعت لرقية تهوبي منا ومنا تشوفلهه مكان ترتبه لو تنظفه ..

كلت لصفا كولي لرقية خلي تخابر على رجلها يجي علينه احسن من رجلج ابليس

دروحي بالله سمية مدري شونج

روحي ليش صيرين خبيثة تدرين بيه ماعرف احجي وياهه بالاشارة صفا اريد اروح والله اختنكت ..

ماقبلت صفا خبيثة معاندة وتريد تبقى العيارة ..
كمت لرقية جريتهه اريد اوديهه يم صفا تحاجيهه تدز مسج لمناضل رجلهه يجي علينه يرجعنه ..

طب أمان وجانت على وجهه ابتسامة وعيونه تلمع من شافني بس انه أبد ما ابتسمت سلمت عليه بثگل واخذت رقية ورحت للصالة كعدت يم صفا

خابرنه على مناظل واجه علينه اخذنه بيبيتي ماقبلت ترجع رادت تبقى وانه وصفا رحنه للشقة ورقية اخذها رجلها

صفا : شبيج ولج فلفلتي هاا شبييج مو ع اساس تشووفينه

صرخت : يولي يوولي لا تجيبيلي سيرته كرررهته

_ ولج شصار وصمخ شنوو هالمزاجية لعندج بالدقيقة الف مزاج عندج

_ هو مو فسخ خطوبته منها شكوو جايبهه وجااي شكوو ولج خاف هاي اشواك تريد ترجعهم لبعض

_ ليش تسيئين الظن بي خابريه وافتهمي منه كل شي احسن هيج تتعبين

تنهدت مااجاوبه جاي يخابر ويراسل لو يموت مااجاوبه
لاا اسم الله عليه بس ماا اجاوب ..

دك موبايلها راحت باوعت بي وضحكت كالت هذا هو جاي يخابر عليه اجاوب شنوو اكله ؟

يوولي لا تجاوبينه ...

ولج عيب شوون يصييير!!!

راحت جاوبته تحاجي وتباوعلي وتضحك ..
سدت الموبايل كالت راح يجي يحاجيج

عزااا بعينج صفيووو رايحة للغرفة اقفلها واخمد اذا اجه كليله خمدت نامت ..

طكتها ضحكة ولج شبيج ترى هو يحبج انت منو يعسنج غيره

ايباااه واذا تحملني شويه شكو بيها بس ماا اسمح له يخوني

ولج لاتسوينها دراما هو انت تدرين كلش زين ماخاينج لو يريدها جان استمر وياهه بس انت مشتعلة بنار الغيرة غيرانه وتطلعين حركتج بي ..

فريت شفايفي واعترف كلامها اثر عليه .. هيه التهت بجهالها وانه صدك طبيت للغرفة بس عبالك كاعدة على بيضة بس احوس واي حركة تنززني عبالي صدك اجه ..

لشويه خليت راسي ع المخدة وصافنة واتذكر شكله من نزل لابس بدي اسود شوون طالع عليه حلو

بوس خواته وامه ونزل الجنط وشون يتحرك بخفة ورشاقة ..

ماعرف شكد مر من الوقت واندكت باب الغرفة .. من مكاني جاوبت صفاااا روحي ماريد شي لا تضوجيني واذا تردين خابري رجلج يجي ياخذج اريد ابقى وحدي ..

اجاني صووته زين وأذا أني هم أروح ؟؟

فززز كلبي كعدت بسرعة اتنفس بصعووبة ..
كمت وكفت يم الباب : رووح أمان أي روووح تعبانة والله ومعصبة مااريد اضووجك بكلامي ...

كال سمعي سمية اني دورتج بالسمه ولكيتج بالكاع تعرفين شنو معناهه هاي!! فتحي الباب نتفاهم وأرووح ترى اني مو أقل تعب منج لا تزيدين تعبي

كلامه أثر عليه مثل السحر ، فتحت الباب وقابلته بدون إبتسامة وهو ملامحه رغم التعب مبتسم بشوگ وحب وحنين ..ومركز بملامحي

كال مالج حق بيها وتزعلين

رفعت حواجبي لا والله

كال باصرار اي والله مو من حقج لازم تفهمين مني وبعدين تخليني وتطلعين مو كتلج مشتاقلج واريد اشوفج

جاوبته ماكتلي وياك خطيبتك ..

رفع ايده وجه سبابته بووجهي السابقة

مدام السابقة شسوي كاعدة يمك بالصدر ومو المفروض علاقتك وياهم مو تمام !!

رد : عمي مسافر وهو رادوا يجون يسوون واجب لامي ولرضوان وأني قريب عليهم منو يجيبهم غيري ..

درت وجهي .. هو لازم الاطار مال الباب ويباوع عليه ..
كال محضرلج مفاجأة ..

خليها لبت عمك فاجئهها بيهااا احسن ..

رد ؛ لا بنت عمي كلها كم يوم وترجع لاربيل ...

باوعت عليه باحتجاج وانت توصلها موو ؟

رد بضحكة احبج من تغارين عليه ...

خليت عيني بعيونه ماغيرانه عليك بس ماحب تستغفلني هيج جان المفروض تكلي جايين وياك

صحيح بهاي حقج ...

لزم ايدي كال ماتردين تعرفين شنوو المفاجأة!!

سحبت ايدي منه بهدوء وساكتة

خله ايده على حنجي ودار وجههي عليه وهو مبتسم يباوع لعيوني ويحجي ..
باقي يمج حبيبي تركت كل شي وراي وراح ابقى هنا وبعد ما اروح

ابتسمت شنو يعني أمان ما فهمت مراح ترجع لا لأربيل ولا لتركيا ..

لا والله ماأرجع

لخاطري ؟

اي والله علمودج انت وبس

هزيت راسي وبعدني مبتسمة .. خله ايده على خدي يمسح ابهامه على بشرتي كال والله احبج وما تخلص هالسنة هاي الا واحنه سوى وعد رجال ..

وخرت إيده وخليت ايدي على كتفه ابعده عني وحجيت بملل اييه والله شبعانة من هالحجي هذا

هو خزرني ولزم ايدي كلش قووي .. ودفعني بخفة للغرفة كال بعصبية : يله لعد رووحي كملي زعلتج

وانطاني ظهره يريد يروح .. رحت ركضت عليه خليت ايدي على ظهره .. كتله راح تروح ؟

تخصر ولتاف عليه اي رايح تعبان جاي من طريق طويل ..

خليت ايدي على ساعد ايده كتله ابقى تعشى ويانه احنه ما متعشين بعدنه ...

كال بابتسامة وتلاشت عصبيته : اي وشراح تعشيني ؟

_ بيض وطماطة اكو صفا تسوي يجنن لاجع وبي حمووضة طيب ..

ضحك كال لا اني انزل اجيب عشى ..

_ لا عليمن قابل جاي نجربك احنه لو تجربنه .. ناكل من هالموجود ..

اشرلي براسه تعاي نكعد نخطط لمستقبلنا ..

التمعت عيوني الكلام عن مستقبلنا يبعث بروحي الامل رحنه كعدنه بالصالة ظل يحجيلي عن شغله الجديد الي راح يبلش بي هنانه بالبصرة محاسب بشركة...

وشون يقنع عمي حتى نتزوج هواي شغلات حجاهه وانه فرحانة بي وبجيته واخيرا ماراح يفاركني بعد من صدك هو امان اليه ..

بعدين اجه اسلام وجايب وياه عشى وكعدنه نتعشى
كلنه سوى ...

هو راح واسلام بقى يم مرته وجهاله احتلوا الشقة وانه طبيت للغرفة ..

اجت صفا يمي .. كعدت بصفي ..
كالت خابرت فاطمة باجر تجي

كتلها هلا بيها ترا ماخاف خاف تردون تروحون لبيتكم انت واسلام روحوا خطية امه وحدهه هسه شتكول

لا ولج ايناس بتهه يمهه ماعليهه شي مانعوفج وحدج بالشقة .. المهم احجيلي على أمان شسوا ماسوا يمته ترتبطون

تنهدت ماادري يختي خليها على الله وعلى عمتج وعمج ... هو اجه راح يستقر هنا منا وجاي ..
اكلج رضوان بعده مصر يطلك مرته ؟

ماادري بعده مايقبل يروح يجيبها ترى هو مايصيرر يسوي هيج بيها هيه هم حالتهه حالة خطية ام وفقدت ضناهه ..

اي ادري والله كتله هالحجي .. بس هو هسه تحت تأثير صدمة يصحى ويغير رأيه ويرجعها ان شاءالله ...

بلكي تطلع حامل ....

ابنهم خطية صغير ماااعتقد جانو ناووين يسوون طفل عليه اكيد ماخذين احتياطاتهم ..

هزت راسها اي على كولتج اكيد ... يله انه اروح افرش للجهال راح انام بالهول مو تجين وتطبخين ببطنه واحنه نايمين ماتدرين بروحج ..

ضحكت لا ولج انه اجرها نوومة للصبح نادرا ما اكدر ..

يله لعد تصبحين على خير ..

وانت بخير ...

ومشت الأيام ... هو إستقر يم أهله ، قربه جان مصدر لسعادة أيامي

... بيبيتي يمي انه وياهه بالشقة بس هيه تعبانة حيل وهواي توصي عليه
خاصة بعد ما مات إبن رضوان كلش تعبت ماتتحمل قهر بعد ...

خابرني سألني عن بيبيتي شلونها ..
جانت بيبيتي كاعدة يمه هيه تعبانة بس انه ردت اغير المود مالتهه كتله زينة زكية تزهو ...

كال بعدم رضى :- زكية شنووو ؟ شنوو هالقلة الاحترام ..

جاوبته بصدمة :- يااا وين قلة الاحترام بللمووضوع ؟ هيه مو اسمها زكية لو أنه غلطانة قابل انه مسميتها أهلها سموها الله يرحمهم ..

رد ؛ والله ماتصيرلج جارة المهم اني اليوم اجيكم ..

_ صدك والله هلا بيك شنو تريد اسويلك عشى ؟

_ ههههه لا يمعودة لاتسوين أني أجيب وياي ..

_ هاا قصدك على ذاك اليوم العشى مال كباب الطاوة المفتت موو الي ماعجبك ...

_ يمعودة هو بس مفتت بس مالح بس يقطر دهن مينوكل وداعتج وبعدين قابل اني جاي اترس بطني جاي اشوفكم لتعبين نفسج

_ لا والله واذا هيج الكباب شكوو بيها انت مو تحبني المفروض تحب حتى أكلي وكِل شي بيه مو هيج الحب لو أنه غلطانه!!

_ ههههه والله مادري شون تفهمين الامور المهم سدي موضوع الاكل

_ لا والله ولا اسده اليوم اله اعشيك من ايدي ..

سديت المكالمة ويا وكمت ابحث باليوتيوب على أكله طلعت أكلة اسمها كبة البطاطا بالفرن وسويتها ورحت سبحت وبدلت ملابسي ورحت كعدت يم بيبيتي أتاني .

صار المغرب هو اجه فتحت اله الباب حبيبي يخبل طالع .. لابس بدي كاعد على جسمه هلكعدة تجنن شكد احبه يا الله ..

جان بيده علاليك هوايه اخذتهم منه وديتهم للمطبخ وهو راح للهول بيبيتي تعبانة كلش هالايام وبس نايمة ..

فتحت العلاليك وباوعت بيهم تارسهم مسواك واكل ..

رحت شفته كاعد يم راس بيبيتي ويسولف وياهه ..

كتله انه مو كتلك لتجيب أكل انه مسوية ..

ضحك هاا وشطابخة حبيبتي ؟

جريته من ايده تعال اشوفك شطابخة
اخذته للمطبخ ... طلعت الاكلة من الفرن .. وخرت ورق القصدير من على البايركس ..

. هو اشتم ريحته كال بيها جبن موو ؟

بس لا ماتحبه ...

لا والله احبه واحبج .. اخذ ايدي باسها ..
كال تسلم ايدج بس ماردت اتعبج والله ..

لالا لازم اتعلم طبخ كافي اسخت وفاطمة كله يم امها وانه كاضيتها اندومي ...

ضحك كال انه اجيبلج يومية غداج و عشاج عليه لحد مانتزوج ..

حلم ابليس بالجنة موو ؟

لج صبري مابقى شي والله ...

المهم شنو اخبار رضوان مارجع ؟

لا مارجع بعده ببغداد معتزل العالم كله ..

_ اجت ام مرته قبل كم يوم تتوسل ببيبيتي حتى تقنعه يرجعها وهيه بيبيتي بروحها تعبانة انوب قهرتها بالزايد واصلا بيبيتي ماتدري بي بعده مامرجع مرته احنه مانحجي كدامها كل شي حتى لا تنقهر ..

جاوب وهو مخلي ايده ع الكاونتر ينسد جسمه ويباوعلي
_ اي مو شافو امي مانطتهم وجه ..

_ والله امك هم متناقضة جانت تموت عليها وتعيرني بيها هسه سدت الابواب بوجوهم هم الله مايرضاهه البنية صح حية ومسمومة بس ماكو ام تتسبب بموت ابنها

رفع تك حاجبه عود ماقبل احجي على امه :
_ اريده يرتاح فترة اني احجي ويا يرجعها ..
هو بس مصدوم هسه ابنه مو شووية ..

طلعت الاكل يم بيبيتي بالهول تعشينه الاكلة جانت متروسة جبن هو خطية ما حب يكسر واهسي اكل منها ..

بيبيتي جانت ساكتة سكوتها خوفنه بس تباوعلي وتباوعله بعيون مدمعة ..

صارت الساعة ب ١١ ووضع بيبيتي يخوف .. حلكها شبه داير وعيونها تغمض وتفتح ومدمعة ..

كتله بغصة مال بجي امان لاتتركني وحدي عفية جنهه بيبيتي الليلة راح تتعب تحتاج طبيب ..

كال روحي لبسي ناخذها للمستشفى .. بسرعة سمية ..

رحت لبست عباية اسلامية فوك تراكي وطلعت الكرسي المتحرك مالتها حضرته اله
كتله بخوف وتوتر انزله جوه الدرج ؟

كال لاء ثكيل عليج اني انزله هسه وارجع ..

راح نزله ورجع . اخذهه شالها جانت ثكيلة حيل مو لان سمينة لا بالعكس ضعفت حييل هالايام .. بس عظامها ثكيلة ومسنحة ..

طلعنه من الشقة وهو شايلهه .نزلها الدرج وانه خايفة لا يطيحون هيه وياه اباوع لخطواته واقرا ايات وادعية وكل خطوه اله ينزل من الدرج اكول بسم الله

نزلنه الدرج كووة احس صار طويل وبعيد حييل
لزمتله الكرسي المتحرك هو وخلاهه بي ..

بس هيه ابد ماتتحرك اديها امددتهم رجليها هم عبالك مابيها رووح خووفتني شوفتها .. شهكت شهكة شكبرها ..

هوو خله سبابته على شفايفه يسكتني راح انهار واخرب انه همين اول مرة اشوفها هيج ..

مد ايده لايدها وجس نبضها كال ضعيف شجاج سمية صيري قوية حبيبتي محتاجج هسه أني ..

هزيت راسي واكفكف دمووعي واباوع عليه ...

طلعنا من الشقة مسافة جم متر لحد سيارته
فتح السيارة رفعها من الكرسي المتحررك كووة و خلاهه ورا وانه ساعدته بس بيبيتي ثكيلة كلش ..

اشرلي كال صعدي يمها .. وصعدت يمها ..خليت راسها بحضني وابوس بكصتهه ..واخذت اديهه ابوس بيهم

باوعت من الجامة لوره شفته يخلي الكرسي المتحرك
ورى .. رجعت اقرا على بيبيتي آيات قرآنية وأدعية ودعي ربي بقلب صادق مايحرمني منها ...

بالفترة الأخيرة تعلقت بيها حيل كله انام يمها بالهول ولا ليلة تركتها حتى شغل مافكرت اشتغل حتى لا اتركها ..

دموعي غركت وجهه .. رفعت راسي ومسحت كصتها من بقايا دموووعي .. واترجاها واتوسل بيها تكعد ولا تتركني ..

اجه أمان صعد وباوع علينه انه جنت اشهك ومدنكة راسي ، مد ايده رفع راسي ..
شبيج سمية .. لاتخوفينها لاتسوين هيج كدامهه ..

كتله بنبرة بچــي وتوسل ... أمان

كال اهدي هسه نروح للمستشفى يشوفوها الاطباء ويطمنونه عليهاا ..

هو كال هالكلام بتوتر عرفته هو هم خايف عليها بس مايبين .. مايريد يخوفني

بيبيتي الحنينه الي من مات ابوي لهسه هيه مكابلتني وكاعدة ماتركتني صار سنين انه وياها سوى تعلقت بيها حيل اكثر مما يتعلق طفل بأمه
ماريد يصير بيها شي ياربي ..

رجعها الي دخيلك بس هالامنية هايه اريدك تحققها رجعها الي فدوة ....وماريد اي شي بعد ..

بالطريق هو ظل يخابر امه ويحجي وياهه وكال الها راح اوديها للمستشفى أني بالطريق انتوا تعالو لهناك وضعها حرج ..

وصلنا للمستشفى وكف السيارة يمها خلاها بالكرسي المتحرك ودخلنا .... اخذوها للطوارئ .. قاسولهه االضغط صاعد كلش ...

بعدها نقلوها للردهة اشوفها فتحت عينها تباوعلي
باوعت لايدها ترفع اصبعها باتجاهي ..

متتت بجي .. رحت يم راسها ابوس بي .. واهمس يم اذنها بيبي حبيبتي زكية الروح والرية لاتخافين والله تصيرين زينة وترجعين وياي بعد عمري ...

اجت ممرضة اخذت ايدها تشكللها المغذي ... وهيه خطية جلد وعظم صايرة ..

كتلها على كيفج وياهه خطية .. باوعتلي بعدم رضى ونفخت ..

رفعت راسي شفت أشواق ووياهه طبيب تحجي وياه طلعني أمان من الغرفة جنت اشهك ...وهو يهديني ..

أمان بيبتي بس لا تموت أمممان ...

لا اسم الله انت ادعيلها وتصير بخير ان شاءالله ارجعج للبيت ترتاحين ؟ مدام هسه امي يمها

هزيت راسي امسح دمووعي .. : لالا ابقى يمها وماعوفها هيه ماعافتني كل هالسنين اعوفها هسه لالا ماعوفها ..

كملت بجي وعيني على الغرفة الي هيه بيها .. وامسح بدموعي ...

اشواق صاحت لامان راح فات وبعدين طلع اجت يمي اشواق كالت شنو امان جان يمكم ؟ لو انت خابرتي من تخربطت امي ..

باوعتلها كتلها يعني انتي شنو الي هامج بالموضوع هسه وكته هذا سؤالج ؟

انه لان اعرف غايتها من السؤال .. هيج جاوبتها وهمين جنت حيل فاقدة ما اعرف حتى شنو احجي ..

كالت بعصبية ومخنزرة بعيونها عليه تتمنى تاكلني ..
_ سألتج سؤال جاوبي ليش طولة هاللسان هاي هاا؟

جاوبتها : اي امان جان يمنه معزوم على العشه ..

كالت باعي امي وصتني عليج صح بس هذا مو معناهه ازوجج لأمان واخرب علاقتي وي أخوي ..

خلي تطلع امي بالسلامة عندي صديقتي عدها ولد مطلك حتى اجيبها تشوفج وانصحج توافقين عليه ..

باوعتلها من بين دموعي بنظرة استهزاء ودرت وجهي والله ماتستحي وكتها هسه ، امها بين الحياة والموت وهي شوف بشنو تفكر ..

بعدها صار الصبح بيبيتي على وضعها خلولها قصبة بحلكها وكالت الدكتورة شربوهه منها شوربة وعصير ..

الصبح اجو كلهم عمي و مرته عمة زينب وامتثال عمة صفا واسلام وفاطمة مرة أبوي وحتى رضوان خابر يسأل عنها وكال جلي بالطريق ..

ظلت تلث ايام بالمستشفى وانه وياها اللحظة باللحظة انطيها الشوربة والعصير بيدي بس هيه ماكو فاقدة ...بس من القصبة ينزل لمعدتها

الدكتور كال ضربتها تلث جلطات ووضعها صعب ..

امان كال امشي للبيت ارتاحي غسلي وارجعج ..
ماقبلت كتله ابقى هنا ..

ظل يلح عليه وجبرني اروح ...

قبل لا اروح بوستها هوايه على كد وجهه بس هيه بغيبوبة وماتحس ابد ..

اخذني ورحت وياه وعيون اشواق وعمي لسيمان تراقبنه بعدم رضى مهتميت الهم ..همي الاكبر جان بيبيتي ..

طول الطريق خايفة وافكر بيها وتراودني هواجس خاف ارجع ما لحك عليها ..

وصلنا للشقة انه ويا وهناك جانت فاطمة
كال انت ارتاحي شوي غيري ملابسج واني همين رايح البيت اسبح واغير ملابسي وللمغرب اجي عليج ونرجع للمستشفى .

بتوسل حاجيته لا تتأخر فدوةة ...

كال لا والله ما اتأخر وانتي اكليلج لكمة لان وجهج أصفر ومنتبه عليج بالمستشفى متاكلين ...

جاوبت بنبرة بجي : مو من قلة الاكل من الخوف أمان خاايفة افقدهه ..

لزم اديه كال اسم الله عيني وبعدين شنو بيدج يا روحي امر الله هذا لا إعتراض عليه ..

لا عفية أمان لا تكولها ....

هزززز راسه .. كال يله مثل مكتلج اروح اني ..

سديت وراه الباب وفتت فاطمة تنتظرني .. جنت منهارة رحت حضنتها وظليت ابجي ..
كتلها بيبيتي مو زينة فااطمة مووزينة ...

جرتها حسرررة ووكعت دموعهاا .. كالت روحي للحمام رايحة اجيبلج ملابس اسبحي بماي دافي هسه يهديج شوية شوفي شصاير بيج

فاطمة ماتوقعت يجي هذا اليوم اشوفها هيج مثل شمعة تذووب وردة تذبل بيبيتي طول عمرها قوية تلاثة راحو منها وجدي وياهم
هسه ابن رضوان هيج يكسرها وتتعب ..

كبرت بعد ما تتحمل من ماتوا جانت بحيلها هسه يختلف الوضع ..

بس انه ماريدها تموت ماريد ...

اسم الله بلكي تطيب تصيرر زينة ليش هيج مفاولة عليها روحي هسه سبحي وبعد شوية اذان المغرب توضي واستقبلي القبلة وصلي وادعيلها ..

هزيت راسي وهمست والنعم بالله .. رحت للحمام
سبحت ودموعي مابطلت تجري ويه المي الي يوكع على وجهي

خلصت غسل رحت نشفت شعري بسرعة حتى اتوضى لان مايصير اتوضى وهو رطب ...

نشفته ولبست خابرت أمان رنتين ماجاوب ووراهه بربع ساعة هو خابر ....

وينك قلقتني ..

رد : عمري جنت بالحمام من خابرتي ...

عفية مو تتأخر فدوة أمان ...

هسه اخلص واجي ما اتأخر والله ..

سديته منه .. فرشت سجادتي بينما يجي انه أصلي وأدعي لبيبيتي .. توه فارشتها ورن موبايلي ..

ركضت عليه شفته رضوان يخابر عليه ..

جاوبته اجاني صوته جان مبحووح وحزين ..
كال سمية حضري جنسيته ..

صررخت لااااا رضوان لااا تكلي ماتتتتتت بروووح ابنك رضوان كلي عايشةةة رضووووان ..

للحكاية بقية أخيرة ..