رواية لمْ تكُنْ خطيئَتُنا الفصل الثامن والأربعون 48 - بقلم نورا ناصر

لم تكن خطيئتنا
نورا ناصر

أنا أُنثى بصلابة جبل ..
اخرُج من بين النيران بقُشورٌ حديديةً
أشق طرق نجاتي بأظافري
قوية كحرارة الشمس.
صلبة كجبال الجليد.
احب بقوّة عظيمة وأتخلّى بنفس القُوة .

سمية .. يوم جمعة الظهر جان عدنا شغل بالمذخر
لبست كوت كاوبوي لحد الركبة
ياخته طبقيتين عريضة مثلثة
حزام على الخصر .. من جوة كصات مثلثة
وبنطرون بيجي .. وشال بيجي ..

اجه عليه يوسف السايق وطلعنه ..
وصلت للمذخر ..
بلشت اشتغل .. جان عدنه جرد
عزلت الادوية الي بلشت صلاحيتها تنتهي قريباً
حتى نمشيها باسرع وقت وبنص السعر ..

وياي بنات اثنين يشتغلن وكم ولد
ماعندي اختلاط بأحد
رغم اشوفهم يسولفون ويضحكون يشربون وياكلون سوى بس انا عليه بس بالشغل واحب اكون وحيدة ومااكون صداقات عاجبني ابقى هيج ..

كملت شغلي وطلعت برة المذخر
صار گدامي ولد
ماركزت بي .. بس حسيت بنظراته عليه..

شفت يوسف ...
گتله هاا نروح
گال بس انتظر الباقيين يجون ..

باوعلي الولد گال انتِ وين بيتكم؟

اللتفتت اله ظل يباوع بعيوني
بشرته حنطاوي على املح هيج شي
شعره جوزي مرفوع ليفوك
ولحية خفيفة ..

رديت نظراته بتكبر وصديت عنه شعليه هو و يسأل اعرفه يعرفني

جاوبه يوسف
گله بيتهم بفلان منطقة...

صاح وهيه شبيها ماتجاوب بلسانها عظمة
مو سألتهه؟ ؟

باوعت عليه وحاجيته بانفعال
اكلك انت شنو تريد تاخذ السيڤي مالتي.

صاح شبيج وشدعوة عليج هو سؤال وانت فد مندلة وماتجاوبين.

كتله : مدام فد مندلة انت ليش تسأل ؟

يوسف .. ياجماعه صلوا على محمد
سمية صعدي بالسيارة بينما يجون البقية.

هزيت ايدي وتحركت من مكاني
گلت ياربي شون شكوول ..

مشى صوبي يريد يجي يمي
بعصبية كال : عليمن هاي.؟

لزمه يوسف گله يمعود حسن شارع ومنا ناس ..

وگفت باوعتله گتله بلله اتركه شيريد يسوي تره ماتايهه اله .. ولا عباله ما بظهري أحد .

أشر بأيديه وظل ينتر باعصاب انت شنووو ناوية على اخرتج اليوم ..

حسيت بالانتصار بداخلي بده يشيل روحه ويطگها بالگاع تمنيت استفزه اكثر.

أخذه يوسف وراحوا لبعيد عن مكاني
خليت ايدي على حلگي ظليت اضحك
وصعدت بالسيارة ..

اباوعلهم .. اشوف يوسف يهدي بي وهو يرفع شعره ليفوك دلالة على عصبيته..

اجن البنات وصعدن .. انا صرت بنصهن
صعد يوسف السايق .. ومن بعده صعد الي تعاركت ويا قبل شوية
اول ماصعد طل بوجهي يباوعلي بحقد ومخنزر عود يخوفني ..

مانزلت عيني من عينه حتى اأكد اله اني ماخايفة منه ..
رفع حاجبه عود يتحداني انزل عيني
مايعرفني حقه
بعدها جبرته ينزل عينه مني ..

دخل ولد سمين .ومبين مو كلش كبير
طب باللسيارة طل بوجوهتنا احنا البنات كلنا
كال اللهم اجعلهن في عيوني بقرات ..

كاله يوسف غير يكعد راحة الثور .. دكعد اكعد انت وصماخك ..

بالطريق نزلنه لصيدلية مهمتي اروح اتعامل وياهم على بيع الدواء ..

نزل يوسف كراتين الدوة
كتله يوسف لاتنسى حليب الاطفال هم نزله لاننساه مثل هذيج المرة ..

يوسف : لا سمية خليهن اكو ماركت خابرني عليهن .
: اوك بقت يمك لعد .

دنكت للكاع اخذ كارتون الادوية وكمت التفتت بسرعة خاطفة صار بوجهي حسن ..

كلش قريب عليه خرعني كوة لزمت نفسي وماصيحت بوجهه بنص الشارع ..

بس رمقته بنظرات قاسية كلش وخزرته .
وهو كل عيونه عليه يباع بعصبية

ابتعدت عنه اريد اصعد للرصيف من كد الخرعة عثرت بالصبة جيت اوكع انه والكارتون .

بعده هو واكف يمي لزمني من عكسي
على أثر لزمته الي وكع الكارتون مني .

هالمرة ماتحملته ابد شون مستفز
سحبت ايدي منه بالقوة
بعصبية : منو سمحلك تلزمني .

جاوبني بعصبية وخنزر عيونه : اي انه صوجي لزمتج لو مخليج توكعين بالماي والطين هواي احسن .

باوعت بصف الصبة اكو بقايا ماي وطين لان البارحة جان مطر .

عطت بوجهه اي لاتلزمني ماعليك بيه ..

اجه يوسف : شون وياكم ماخذ وياي توم وجيري .

ونزل للكاع شال الكارتون
بعدني اباوع لحسن بنظرات عصبية وقاسية

واكف ومنتجي ع السيارة ويباوعلي .
طلع جكارة ورثهه وظل يدخن ..

بعدها خلصنا شغل ورجعت ...من نزلت كبال العمارة حسن بس يباوع ع المكان ويجيكه ...

دخلت للشقة استقبلني اخوي فراس حبيبي انحنيت دنكت نزلت لمستواه بوسته بخدوده صار طبع لحمرة عليهن اباوع عليه انه اضحك وهو يمسح بخدوده ويكول ايع عيب تمتم عيب

لزمته كطعته من لبوس ... وبيبيتي كاعدة بالصالة تصيح عليه ولج خدود لولد مصيتهن مص تركي ولج نعالة

كمت على حيلي هاا زكية تردين واحد يبوسج ويلعوسج حمرة تغارين موو

غطت وجهه بالفوطة وتكلي انلصمي نجبي ولي ذبي هدومج يله

طلعت حمرة من الجنطة وترست شفايفي ورحت وخرت الفوطة من وجهه هيه مجلبة بيها وانه مجلبة وبستهه وصار خدهه كله حمرة

طلعت فاطمة من المطبخ ها شبيج سمية شو خابصة الدنيا

كتلها جايه تعبانة وفوك كل هذا جاي اشاقة وياهم ومايقبلون شون نفسيات

بيبيتي تمسح بالحمرة بيدها وتكول ولج نعلة عليج فوطتي بريسم هاي غالية عليه والله لو تلعوست حمرة

كتلها زاهي ماكو ؟ ماي ماكو ايدين ماعندج ؟ انه اغسل الج عود ..

غمتني ونزعت فوطتها كالت ماريد منج شي
الفوطة انطتها لفاطمة يمه قسليها وياج
اخذتها فاطمة وراحت للحمام ..

كتلها غغغغ غين غين غسليها مو قسليها بيبي

كالت بيبيتي وين النعال ولك يمه فروسي جيب نعال الحمام هاي وزغى ( ابو بريص ) واريد اكتلها

هو راح يركض هو وكرشه ويضحك وانه شردت للغرفة

بدلت ملابسي وتمددت على الجرباية طلعت الملازم اقرا شويه

اجيت اغفي سمعت صوت التليفون يدك ..

تمططت ومديت ايدي واخذته شفته رضوان فتحت خط وخليته ع اذني وكلت الو وانا منعسة

كال سكوو سمية وي منو متعاركة ليوم ؟

ضحكت ها وصلتلك الاخبار ؟

من باجر ماكو دوام تكعدين وتسكتين افتهمتي لو أعيد ؟

لا والله !!!

إي مثل ما أكلج تكعدين وتسكتين وإذا ع لفلوس توصلج ضعف الي تستلمي

رَضوان انته اكثر واحد تعرف انه مو عمود الفلوس بس احب اعتمد على نفسي وماريد امد ايدي لأحد

وانه مو غير احد افتهمتي انه سغلتج انه ابطلج وانتهى الموضوع لاتخليني اوصل كلسي لخالي سليمان وهو اخلي يتصرف وياج

رضوان لا تخبث انه ماسويت شي غلط هو الولد نرفزني وظل يتحرش وكدام يوسف خلي هو يبطل موو انه وبعدين هو جديد تره

لا موو جديد ولان هو ظل يتحرس تبطلين سمية خوس وهذا اخر حجي عندي باجر ماتروحين لا تخليني اخليهم يفسلوج ويطردوج خلي هالسي على بالج ..

يعني هسه اني المذنبة الطايحة الحظ؟ وهو البريء الشريف العفيف ؟

هو انه باجر رايح اطييييح حظه وحظ اهله بس صبريلي ، و ترا المذخر لعمه لهذا السبب اكلج تركي

ختم المكالمة ركعت التليفون على المخدة ...

بالليل خابرني امان .. جاوبت عليه بسرعة
كال شنو صاير سمية ؟ لو اكولج قبل لتجاوبين بعد متروحين للشغل مفهوم

جاوبته هاا كالك رضوان الخبيث ؟

موزين ميروح يكول لخالي !!

اي يسويهه صاير خبيث حيل شكد مكروووه ...

سمية اسمعيني متفيدج هاي الشغلة اتركيها لاتصيرين عنيدة انت ممحتاجتها تخرجي وذيج الساعة تعيني ضمن اختصاصج وبشهادتج محد يحاجيج بس هسه لا وبدون مشاكل .

اكلك انه تعبانة راح انام هسه عود بعدين نحجي بهذا الموضوع

لا عبالج اترك الموضوع وانسه تردين تشردين مو ؟

امااااان تعبانة والله اصلا جنت اريد انام من خابر رضوان وبسرعة وصلوله الموضوع

اي شفتي شلون ؟ بسرعة وصلوا الموضوع شفتي الناس الي تشتغلين وياهم شنو من بشر ؟

زين اوكي انه اقنع المسؤول مال المذخر اشتغل جوه بس بالمذخر ماطلع مندوبة بعد

ولج شتحجين انتي رضوان يكول هو صاحب المذخر عمه مدري خاله واكيد راح يضايقج

يخسي والله لو يموت اطيح حظه بمية رجال انه خاف ماتعرفني

يا حبيبتي انت شنووو الله خالقج من شنوو من عناد مو من طين ليش هلكد عنيدة انتي لييش!!!

وتالي شلوون ويااج ماتكليلي ؟ برووح ابووج كافي سدي الموضوع واتركي الشغل خايفين عليج احنه الدنيا مو خوش وما تتأمن كعدي وسكتي

فركت وجهي وانه ساكتة ...

كال ها شنوو قررتي هسه ؟

امان افهمني انه اذا ابقى بالبيت اعارك ذبان خشمي الكنتور اتعارك وياه والله حتى بيبتي تنجلط من وراي اختنك اختنك

اي ماتغير شي بالشقة تتعاركين وبالشغل تتعاركين بالكلية همين تتعاركين وياي كاضينهه عرايك اول الليل حلوين ونختمها بعركة من لسانج النص مترة

ادري اني على شنو حبيتج والله ما ادري دومج تستفزيني ويومية اني بانهيار عصبي من وراج انتِ ماتملين سمية

ديله هسه مجبور بيه انته اشو حتى قسمتنه لبعض ماجاي تصير تريد تتركني اتركني والله تسوي فضل
عليمن متعبة نفسي وياك وبس افكر بمستقبلنه وانت تكول متعبتني وعلى شنو احبج

اصلا انه الي على شنو احبك لا جاي تبادر ولا جاي تحرك نفسك عايفني وشغل شغل شغل خاف عندك وحدة منا ومنا وانه مادري ونايمة ورجليه بالشمس هسه منو جابرك تبقى وياي روح الله وياك

ياااايابه مو لسان بيكيسي ...

يله البيكيسي خلص الطلق مالته يريد ينام
جود نجحت ....

منو هايه جود بعد الي كمزت بنص السالفة ؟

يعني تصبح على خير بالانكليزي ...good night ...

هو هذا الي علموج ايا بالمدرسة والكلية هنيالي ...

اي والله هنيالك عليه وعلى اخوك الفتان رضوان مايضم سالفة جنه حفافة المنطقة توزع سوالف العالم منا ومنا ..

ختمت المكالمة منه وانه معصبة منه ومن رضوان ..
واحد يكبس واحد يرفع يردون يسيطرون عليه عمت عيني عليك بابا ..

خابرت على رضوان اجاني صوت مرته
كتلها هلوو
كالت هلوات هو هذا و قت تخابرين بي رجال متزوج ؟

جاوبتها شدعوة عليج عيني ابن عمتي واريد احجي وياه وادري بي هسه كاعد بعدها ماصارت بالعشرة ؟

اي عيب تخابرين بهالوكت خلي عندج ذوق واحساس شووية ..
وسدته بوجهي .. الحقيرة عبالها راح اخطفه منهه ..

ورى خمس دقايق خابرني رضوان ...
كتله هاا ماصدكت رحت ركض كلت لأمان عليه ؟

رد باستهزاء ؛ اي رحت كتله تريد اسوف حبيب الكلب سيسوي بالله ؟

وبعدين احسن مما اكول لخالي وادري بيج عنيدة راسج والف سيف ..

ميخالف رضوان ميخالف بس شوفلي غير شغلة انه تعودت ومااكدر اكعد بالبيت اختنك ياعالم اختنك ترى والله مو عمود لفلوس

كال ميخالف تعاي يمي بالمجمع استغلي ..

رديت عليه ومرتك ؟ خاف ماتقبل ..

ماامسي بكلامها انه تره سمية السغل سغل عندي ..

مادري رضوان احسها تكرهني وماريد اسويلكم مشاكل انه شوفلي غير شغلة ..

هذا هو اخر كلام عندي تردين تستغلين تعاي باجر للمجمع انه ادزلج السايق مالنه لو اجي عليج ..كبال عيني احسن انتي المساكل تمسي بدمج ادري بيج

لا يمعود لا تجي وانطيني فرصة افكر بالله وفهمها لمرتك فهمها انه مو مثل ما هيه مفكرة ..

ليس تحجين هيج صاير سي ؟

انته ليش خابرت عليه ؟

سفت مكالمتج بالسجل مال مكالمات

ها اي هيه ردت عليه وهسه يله باي باجر اردلك الخبر ..

اوكي باي ...

بقيت افكر خاف تصير مشاكل بينهم وهيه هاي مرته تكرهني .. عفت السالفة ونمت ..

وامان ظل كلامه يدور براسي حقدت عليه كمت حظرته وحتى من الخط هم حظرته ...

مرت أيام حتى رضوان ماحجيت وياه بعد ع الشغل بس ضايجة ومختنكة بالشقة ، فاطمة امها تمرضت وتروح يمها وتاخذ فراس وبيبيتي تعبت اخر فترة تجي عمتي اشواق تاخذهه توديها للطبيب وترجعها يمي ..

عمي سليمان سوى عملية رفع المرارة وبعدها رجعت علاقته بعائلته تمام

كام يجي ويوطوط علينه للشقة يشوف امه ..
بيوم منهن اخذني ع جعة كال امي شكلها تريد تودع وفاطمة مادايمتلج وخواتج متزوجات وانه مستحيل اخليج تعيشين بوحدج بالشقة وانت مطلكة وامج عليها سمعة خاف تفكرين تجيبينهه يمج رجعي لاامير احسلج .

كتله الله يطول بعمر بيبتي ويخليها خيمة فوك روسنه وعمو انه تطلكت من امير ومستحيل ارجعله

الاعمار بيد الله انه هاي امي واحبهه واريد اخذهه يمي بس هيه مجلبة بيج فكري بكلامي زين ..

هزيت راسي بس اريد يسكت ، بنفس اللحظة هاجمتني افكار سلبية وسودة وقلق ياربي ناقصة انه كلامه هسه ؟؟

داومت وراهه وبيوم ...

شفت امير بالكلية وحجينه علمود كلام ابوه نفس الحجي كايلة ... احنه اثنينه رافضين نرجع لبعض ..

شافتني انصاف ظلت تحجي وياي عود هيه غيرانه وكذا ..

ولج نصيفة وصمخ انت يمتى تفتهمين انه وحبيبج تزوجنه واحنه اخوان وتطلكنا واحنه اخوان ياااعالم ياا ناس اصررخ هسه والم عليج الكلية كلهه ؟

اقترب منه أمير كال شبيج تجوعرين مثل البومة

كتله وانت شبيك جاي تمعمع مثل الحمار ...

ضحكت انصاف هو غماهه ، باوعت عليها كتلها ضحكي انتي وانه االي شلعان االگلب ...

كال امير يله ولي خليني ويه حبيبتي رحم الله من زار وخفف

وشعندي باقية ...اخذت كتبي وملازمي وجاي اروح .. رجعت كتله اموري ابن عمي اريد اسالك سؤال انه شنو بالنسبة الك

كال نعال لاستيك مكطع

جاوبته بنبرة سريعة على راسك ..

وباوعت لانصاف كتلها جنت ادري راح تجيني اهانة من وراج بس سألته حتى يطمئن كلبج

رجعت للبيت شفت فاطمة وفراس وسألت عن بيبيتي
جاوبت اخذتهه عمتج اشواق ورضوان للطبيب عدهه موعد ..

كلت لفاطمة انه رايحة ارتاح
هيه كالت اريد اروح اشوف امي بيبتج بالليل يرجعوهه ..

كتلها خوش ماشي .. ورحت نمت .. المغرب سمعت الباب تندك كمت فتحتها شفت اشواق وبيبتي ورضوان

كالعادة انه واشواق مابيننا سلام هيه من شافتني دخلت بسرعة للشقة ولا عبالك شافتني حتى مالحكت اكللها شلونج

بس رضوان سلم عليه مبتسم وانه رديت عليه ..

اخذت بيببتي للصالة نومتها بفراشها نزعتها جواريبها واخذت العباية ..

اشواق جانت كاعدة ع القنفة وعيونها تفتر بالشقة عيني مو كد المقام ..

رحت وديت العباية والجواريب بالحمام من طلعت شفت رضوان كبالي ع المغسلة مشكل رداناته وجاي يغسل لابس قميص رصاصي فاتح وبنطرون اسود

من شافني التاف عليه نص لفة وباوعلي هو يفرك بالصابونة كال اخابر عليج ماتردين صاير سي؟

كبل لا اجاوبه لكيت اشواق فوك راسي ..

باوعتلي وباوعتله كالتله يله رضوان حتى تنزل تجيبلنه عشى ..

جاوبها و هو ينشف ايده بالخاولي ... وعليمن انزل واتعب روحي هسه سمية تسويلنه احلى عشه مو صح سمسم ..

كالت لا يمعود دروح جيب هسه انته ..من المطعم الي تعدينه عليه قبل شويه

لعد ما حجيتي يمه من تعدينه عليه

ردت ؛ مو قررت ابقى يم امي الليلة ابات وياهه عبالي مساع راح ارجع

كال صار رايح .. تعاي سمية سدي وراي الباب
رحت وراه وكف يم الباب كال اي سنو جوابج ؟

كتله ماكو شي بس جايه امتحانات واريد اركز عليها

جاوب : ماسي من تخلصين نفتح الموضوع وطلع

جانت اشواق تباوعلي من نص الصالة .. سديت الباب وراه ورحت غسلت عباية بيبيتي وجواريبها وشريتهم

رحت كعدت يم بيبيتي .. لزمت ايدها واباوع عليها وهيه هم تباوعلي .. وادعي بداخلي ياربي لا تشوفني بيها مكروه تعودت عليها

ماا تحملت الدمع تجمع بعيوني بوست ايدهه حيل وكمت للمغسلة غسلت و جهي وتنفست

حسيت باشواق واكفة يمي .. كالت شعنده رضوان يخابرج ترة مرته تحبه وتغار عليه وها اشتكت منج تكول تخابرين عليه نص الليل

تفاجئت من حجيهه جنت منحنية ع المغسلة عدلت وكفتي .. كتلها وانت بسرعة صدكتيهه ؟ ترى جذااابة

كالت وانت شون استنتجتي انه صدكتها مجرد جاي انقلج حجيهه لبنية تشتكي منج

لا دكتورة صدكتيها لو مامصدكتهه ماتكولين الي كلامها وتنقلينه حرفيا انه مامجبورة ابررلج بس انت تدرين كلش زين انه شنو بس مغمضة عينج للاسف

رفعت حواجبها الي ادري بي انتي بت اماليد وهذا يكفيني ...

جريت نفس باستسلام وغمضت عيوني وفتحتها لزمتني من ايدي لتوجعني مابيدي شي وماكدر اعير امي ..

جاوبتها ؛ شووفي انه لو راعية مشاكل جان اواجهه وياج وويه رضوان واطلع و قت المكالمة والكلام الي حجينه بي بس انه مافارغة الهه وشنو تريد تحجي خلي تحجي براحتهه وانت هم براحتج صدكيهه ..

عفتها واكفة ومشيت ورحت كعدت يم بيبيتي ..
وهيه اجت ورانه كعدت
بيبيتي تباوعلي وتباوعلها حست اكو كهرباء بيناتنه
اخر شي كالت يمه اشواق اوصيج على سمية مالها احد ديري بالج عليها ..

جاوبتها يمه لا توصين مايحتاج هسه انتي ديري بالج على روحج ولا تفكرين بأحد

مو يمه حاسة بروحي راح اموت وهاي فاطمة هم مادايمة الهه تتزوج تروح يم اهلها اي شي خو ماتاخذهه وياهه

اسم الله عليج عمرج طويل مابيج شي الدكتور طمنه عليج واذا على سمية امها موجودة ...

وباوعتلي وسالتني ماادري سمية امج تابت لو بعدها على سوالفها المكسرة !! بعد ما كصوا رجلها ..

رفعت راسي اباوع عليها بقسوووة
كتلها ترى الموت والمرض والابتلاء مابي شماته

وكملت ؛ لاتظهر الشماته لاخيك فيرحمه الله ويبليك ...

هيه رفعت راسها بغرور كالت شون استنتجتي جاي اتشمت بالله !!!!

اثنينه نتظاهر بالبرود بس اثنينه بداخلنه نار ووحدة تريد تفترس الثانية ...

بيبيتي كالت يمه شووغ مو وكته هالحجي وانه هاي وصيتج على بت اخوج تدرين بامها لاهية بضيمها وسليمان خاف يجبرهه وهيه ماتريد عاد انت مثغفة وتخافين الله وعينج عليها ..

كلت بكلبي وانه امرخ ايد بيبيتي مالكيتي غير هاي توصيني عليهه ..

هيه كالت سهلة يمه بسيطة نشوفلهه رجال نزوجها ونستر عليها

رفعت راسي باوعتلهه حطيت عيني بعينهه ..
كالت وهيه تباوعلي بس كون مو لبالها ..

عرفت تقصد على أمان ، إنعصر گلبي عصرة شكبرهه أحبه وبنفس الوقت مشتاقة إله وماكدر احجي وياه ..

كملت هيه كلامها لو نرجعها لأمير لو نخلي امها تشوفلهه واحد من أقاربها ..يلوك الها

بلعت ريك بعصبية لا مشكورة انه ادبر روحي

ضحكت هيه ؛ تدبرين روحج تشوفيلج رجال يعني والله حلو ما استغرب بنات هالوكت هنه يخطبن لروحهن .

تنفست بانفعال كبرتي عمه وصرتي ماتركزين ع الكلام الي ينكال ولا تفرزنينه .. بضحكة كلت هيج ..

عكدت حواحبهه بعصبية اي بالله شقصدج ؟

وخرت شعري على جهة بحركة تستفزهه ..
اي بيبي خاف جوعانة اسويلج عشه ؟

اسمع صوت اشواق تنفخ ..

كالت بيبيتي اي يوعانه شراح تسويلي ؟

اسلكلج بيض ؟

كالت لأ ووع ماحبه مسلوك

لعد شون وضغطج مايصير هيج مكلي وتاكلينه ..

اسويلج روبة ؟

اشواق كالت بنتر ؛- هسه رضوان يجيب مشاوي وتاكل معلاك زين الهه

بيبيتي كالت علما يجي رضوان سويلي كلاص لبن خل اسند إفادي بي ...

خليت ايدي على خدهه تدلل زكاوي هيه جم زكية عدنه وووحدة وبنص الكلب

هزت بيدهه اشواق وتمتمت هو كلاص لبن شراح تسوين ؟ قوزي ..

جاوبت بدلع وانه بدون ماباوع لاشواق واباوع لبيبتي اسويلهه قوزي تدلل

كالت اشواق هه كون تدبرينه

كمت على حيلي ادبره ماكو شي يصعب على سمسم ...

ظلت تهز بيدهه وانه رحت للمطبخ سويت كلاص اللبن ووديته لبيبيتي شربتهه بيدي ..

سمعت صوت الباب تندك خليت شالي جان على جتافي خليته على راسي رحت فتحته شفت رضوان انطاني صينية ستيل بيها اكل كال لبسي شي وتعاي صعدي وياي باقي الاكل من السيارة

هزيت راسي ورحت للغرفة لبست بشت فوك التراك وتبعت رضوان نزلنه درج العمارة ...

صعدنه الاكل والمسواك كله فووك بالمطبخ .. وهو ظل يساعدني يحضر وياي العشى ..

كال سبيج امي سمعتج كلام!!!
رديت وانه انفخ كالعادة السبب انته ..
انه سعليه ؟؟؟ هم حطيتيني بالنص

خليني ساكتة رضوان رحم الله والديك ...

راح سد الباب مال المطبخ واجه يمي ..
باوعتله باستغراب ليش سديتهه ؟
رد بجدية: تدرين سمية كل الي صار من ايدج لو متزوجتني من ااالاول جان هسه انتي ملكة ابيتي !!

كتله بانفعال وهسه شنو فايدته هالحجي مو انته تزوجت وعندك ولد هسه !! دير بالك عليهم لاتفكر بالماضي

اخذت صينية المشاوي ورحت فتحت الباب وطلعت للصالة فرشت السفرة وكعدنه ناكل ..

بعدين ورى العشى راح رضوان وبقت اشواق يمنه ..

بيبيتي كلتلها اخلي سمية تفرشلج يمي تنامين ؟
ردت لا يمه ماعرف انام ع الارض اروح انام بغرفة فاطمة ...

راحت ورة شوية صاحتني سسسمية تعاي ..
تبعتها لغرفة فاطمة وكفت يم الباب كتله نعم ..

وهيه تأشرلي على الفراش مال الجرباية
كالت شيلي هذا الفراش وفرشيلي غيره ..

رحت للكنتور مال فاطمة بدون ما اجاوبها طلعت فراش جديد ووخرت الي ع الجرباية وفرشت الجديد ...

يوم ثاني الصبح اجه رضوان هو وابنه يطمأن على بيبيتي .. كلش حلو ابنه عيونه ملونه ولا يستغرب يريد الكل ..فرفوش وبس يضحك ..

مرت ايام وراهه شويه تحسنت بيبيتي .. وبقيت انه حاظرته أمان .. وهو يخابر بيبيتي ويسأل عنها بس مايسأل عني يمكن زعلان لأن حظرته ..

وبيوم رجعت من الكلية شفت عدنه خطار .. مرة جبيرة ووحدة وياهه شابة بالثلاثينات هيج عمرها ...
سلمت وكعدت بملابسي وظلوا يباوعون غليه انه مااعرفهم ..

بيبيتي كالتلهم هاي سمية ... ظلت المرة الجبيرة تباوعلي .. كالت يا هاي سمره وهو اسمر شتطلع خلفتهم ..

رفعت حواجبي اباوعلهه مستغربة ...

البنية كلتلها يمه مو سمرة حنطاوية وبعدين حسن شايفها ومقتنع بيها .

هيه كالت لا نريد عليها ماي العجين ..

كتلها يعني شنوو خالة بلا زحمة اروح اغسل بماي العجين حتى اعجبج ؟

كالت البنية لا قصدها بيضة كلش مثل ماي العجين ...

هيه امها كالت اي اريدها بيضة تلج ...يستاهل حسوني

رجعت ظهري ع القنفة كتلها والله خاله عذرينه احنه مانعجن ولا عدنه بنات للزواج ...

هيه كالت بصدمة ياا باع لسانها شطووووله

بيبيتي تعض برطمتها وتكول لاللاع تتغشمر ووياج

وفاطمة كاعدة يمي تكرص بيه .. بعدها راحو وبيبيتي ترزل بيه تكولي تزوجي احسن الج انه خاف اموت وين تروحين .

فاطمة كلتلهه اسم الله عليج عمة وانه وين رحت لعد ؟

انه استغفرت ورحت للغرفة خليتهن يحجن .. اخذت التليفون اباوع ع المحادثة مالة أمان وارجع اقرا رسايله غزل عركات حجي عادي يومياتي ويومياته بالتفصيل الممل.....

اشتاقيت اله هو هسه عليمن زعل وماتواصل بعد انه صح حظرته هو مفروض يسأل عني ع الاقل من يخابر بيبيتي ..

ورى شويه دخلت فاطمة بيدها تليفون بيبيتي
كالت هذا واحد يريد يحجي وياج

بنفس اللحظة فكرت كلت معقولة هو!! سأل عني وخابرني !! اخذت الفون منهه بحماس وخليته على ذاني ..

كلت الو وانه مترقبه بكل حواسي ..
اجاني صوته ؛ تدرين منو هذا الي دز اهله كبل سوية وخطبج ؟

اي منوو بالله

كال بضحكة : ولج هذا نفسه الي تعاركتي ويا من جنتي تستغلين بالمذخر

جاوبته ها رضوان انته دزيته صاير تشتغل خطابة

كال دنجبي انه دازة عليج سنوو ؟؟؟

لعد شجابه عليه ؟ منو دلاه بيتنه ..

رد سألي نفسج !! المهم سنو رأيج توافقين ؟

لا رفضت مقدما اصلا ...

بيها الخير .. وختم المكالمة ..
وانه عبالي أمان هذا الي خابرني !!! حمقت خلي يولي ماافكر بي ولا الي غرض هالسنة اتخرج ان شاءالله وارتاح هذا كل همي هسه انعل ابو الحب اصلا احنه مستحيل نصير لبعض وسليمان راسه يشم الهوا

مرت الايام ومشت بين الدوام وبين اخواتي يتجمعن عدنه كل جمعة فاطمة اغلب اوقاتها يم امها ماتريد احد حتى رقية ماتريدها تريد بس فاطمة ..
صفا تخرجت قبلي بسنة ورقية ملتهية ويه جهالهه ..

وبيوم داومت الامتحانات جانت اخر يوم بالامتحان بعدها اتخرج ...

رجعت للبيت فتحت باب الشقة ودخلت اصيح وووينكم وووينكم تعالوا تلكوني وباركولي هسه صدك تخرجت ...

طبكت الباب حيييل وطبيت وصار بوجهي أمان كاعد يم بيبيتي بس شافني ظل يباوعلي اجت عيني بعينه ..

انيييق وحليان كل مرة اشوفه احلى من القبلها اكيد الخلل بعيوني هيه الي تترجم اشتياقي بكل مرررة اشوفه بيها ...

اخابره يدزلي صوره يفتح كاميرا بس مو نفس الشوف بعيووني يختلف اكيد ...

بس الفشلة شكبرها من طبيت وصيحت يله هو متعود عليه ...

كلتلي بيبتي تعاي يمه تعاي سلمي على ابن عمتج ...
وكفت بمكاني هو كام من مكانه واجه يمي مبتسم رافع حاجبه ..

انه حاضنه كتبي بيدي حييل مرتبكة من شووفته ...
مد ايده كال شوونج سمية ..
يريدني اصافح ايده ..

مديت ايدي خليتهه بيده بس مثل غصن يداعبه الهوا تتهزهز ...

كتله زينة انته شوونك ؟
عصر ايدي حييل وايده الثانية لازم بيها رسغي ..
كال زعلااان عليج من السمه للكاع زعلان ..

ضحكت .. كال يله طااح الحطب .. هسه ...

بيبيتي تراقبنه بعيونها وهو همس كال شون كدرتي شلوون انطاج كلبج كل هالمدة فوك ال ٣ أشهر !

غير ادور راحتك وراحتي بشرفك ماريحتك مني ...

لا والله مفتقدتج مشتاقلج حيل هاي جيتي علمودج والله ..

اخذت ايدي سحبتها واعدل بشالي كتله والله صدك ؟؟

كال البارحة جنت يم خالي سليمان وحجيت وياه بموضوعنه والله ...

فتحت عيوني متفاجئة .. صدك شسوويت ؟
رد هو انتي يجيج الصافي معليج لاتفكرين .. اخذج اخذج لو هسه من حلك السبع هم اخذج ..

ابتسمت .. خاف ماجاي على مودي ! جاي تشوف اهلك لو خواتك عدهن مشكلة !!

رد شسووي اذا ماعندج ثقة بيه!!

هزيت راسي ، هو راح كعد يم بيبيتي تراقبنه بعيونها جانت ورجع فراس لحضنه يسولف ويا ..

رحت للمطبخ شفت فاطمة باوعتلي تضحك
كتلها غير تجين تسدين الغارة مالتي انطيني باص تلكيني يمعودة شكد فشلة

كالت ولج انه من سمعت صوتج فشلت من يمي حتى هسه استحي اطلع والله شوون واجهتي ماادري ..

اي جان جيتي نبهتيني ..جان دزيتي فريس الخبيث كل يوم يتلكاني اليوم كاعد بحضنه ...

اكلج استحيت والله ههههههه وظلت تضحك ..
كلت هنيالي ..

ظل عدنه على الغدة وتغدينه سوى .. جنت فرحانة حيييل بس جوة هالفرحة حزن وووغصة ..

بعدها العصر راح ....

يوم ثاني .. خابرت ايناس بنت عمي ..
كالت ذاكرتني ليوم ..
كتلها اي والله على مصلحتي مو لسواد عيونج

خربيوومج سمية كلج ثقة وصراااحة

اي صدك امان اجاكم شنو حجه ويه عمج ؟

كالت اي صدك خطبج بس عمي ماقبل كله تتزوج غريب اخليها بس تتزوج باحلامكم وعمج حييل متشدد وما انطاه ووجه ..

جنت متوقعة هالشي سليمان يحوم ويريد يرجعني لأبنه اووف يااربي صبرني صبرررني ....

بعدها صار حفل تخرج جامعة البصرة بملعب جذع النخلة تجمع لكل جامعات البصرة وامان جان حاضر وياي ..

حيل جنت فرحانة وانه اشوفة ع المدرجات مال الملعب من فتت ويه قسمي وهو لازم علم عراقي صغير ويلوحلي بي بقيت كاسرة ركبتي عليه واباوعله حد ما تعدينا ..

بعدها رجع لأربيل ... جانت بس محاولة وفاشلة الكل رفض ارتباطنا هو كال صبري بعد والله كريم ..
نصبر والنعم بالله ..

وراها بفترة ...گعدت الصبح على صوت بچــي بيبيتي ...

تمغطت ونزلت رجليه من الچــربايه ، اخذت تليفوني من يم الدولاب الي بصف السرير ، دست على مفتاح القفل ، ضوّت الشاشة وچــان جايني إشعار رسالة منه ومكتوب "أحبج"

ابتسمت بفرح وسعادة ، التليفون بعده بيدي ، رفعت اديه وعليتهم فووك ورا راسي ورجعت جسمي ليورا وراسي رافعته ومبتسمة الضحكة شاگة حلگي

شحلاته صباحي على كلمة احبج من أمان .... ماكدر اتخيل نفسي بدونه حبيته وتعلقت بي
...

تحسرت لان بعيد عني وتعبانة حيل لأن ماتصير قسمتنا لبعض رغم شكد احبه ويحبني هواي عراقيل كدامنه امه ، ابوه وعمي سليمان ...

رحت غسلت وجهي بالمغسلة ، وتوجهت للمطبخ ، فاطمة ابيت اهلها هيه وابنها وبس انه و بيبيتي بالشقة ..

دخلت للمطبخ بيبيتي كاعدة ع الكاع وتبجي وتمسح وجهه بفوطتها ....

حاجيتها وانه متوجهة للثلاجة هاا زكية كاعدة تنوحين ع الموتى خليهم نايمين بكبرهم احسللهم من الدنيا هاي عليمن شايلة راسهم وهادكته كل يوم الصبح

حجت وهيه تمسح بقايا دمعها ..
اي ولج تذكرت ابوج وعمج وعمتج انه مكتوبلي شلعان الكلب ولج راحوا مني اربعة وانه شفتهم كبال عيوني يموتون لو ميتة كبلهم مو احسلي وفوكهه عمري تكول عمر تفگة ولا الحكهم

رحت كرفصت كدامها لزمت ايدها اخذتهه وبوستهه باوعتلها ثواني ماكافي مناحة يابيبي ..

سحبت ايدها مني كالت اذكر عزاز كلبي انه كل صباح وكل مسية جا مثلج نسيتي ابوج

لا والله بيبي بهاي جذبتي ترى مدفون بكلبي والله صح جان قاسي بس من بعده ضعنه احنه .

كتلهه وانه اريد اغير الموضوع والله زكية صايرة صاكة يراد نزوجج راجعة شباب والله

جان بصفها نعال اسود نايلون مالتها من كاعدة نازعته ومخليته يمها صفطتني بي على رجلي

كمت من يمها صخاام بس لا داخلة بي للحمام وطكيتيني بي

كالت امشي من يمي ولي يله امشي انه اهج منج ومن سوالفج اولي بيت سلمان اكعد وانت كعدي هنا مثل البومة

حجيت من بين سنوني انه بوومة هو منو ينوح من الصبح ؟؟

وسمعت صوت موبايلي من الصبح اريد اروح للغرفة وهيه شمرت النعال وراي اجه برجلي باوعت عليها كتلها كافي زكية مو ضحكنا وياج شوية

كامت شمرت الفردة الثانية عليه وانه طكيتها ركضة للغرفة

رفعت التليفون وجاوبت جانت صفا تخابر
كلت الوو جانت تبجي كالت ولج ابن رضوان مااااات
صحت صخاااام بوووجهج اشوواق يبوووي ولج شوون مات هالطفل!!!

كالت هو ماكو مسافر ويه مرته لتركيا سياحة ومخلي عند عمته ام مرته وبسرعة متخربط بالليل كام يتقيء نقلوه للمستشفى وبسرعة بسرعة واكف كلبه

انعصر كلبي عليه خطية ورضوان يمووت عليه ابنه واول فرحته انوب مات وهو بعيد عنه خطية شحاله هسه

سديت المكالمة ويه صفا وكلت ارتاحيتي زكية هسه ارتاح كلبج كاعدة تنوحين من الصبح موتيلج واحد

صاحت من يمها ولج سميو شصاير جني سمعتج تكوولين يبووووي ولج منهوو مات وولج ؟

يتبع ...



هلو بنات😘

للي طلبوا مني اكمل هاي القصة جاي اكملها
التكملة من اخلصها انزلها اوك👍

يعني ماكو موعد محدد
ماشي😁

نورا ناصر ⚘

احبكم😘