رواية لو انك لم تعد ..... الفصل الحادي عشر 11 - بقلم نورا ناصر

#لو_انك_لم_تعد
البارت ..11..
بقلمي نوره ....

فاجئتني ريم وصدمتني فرحت الها حييل من كل قلبي هي اختي وتوأم روحي .. بس بنفس الوقت
ضجت على نفسي والي جنيته من فعلتي دمرت نفسي واذيت اياد واول واحد تأذى هو كرم
اه كرم لو اعرف وين اراضيك حتى يرتاح بالي

صدك ريمو حياتي الف مبروووك ياعمري انت والله تستاهلين اكثر واكثر وربي يسعدج ويا طول العمر ويرزقكم الذريه الصالحه

امين ياربي وحضنه بعض يوم الالج غرور وافرح بيج
حياتي اني ماافكر بالزواج انت تدرين بوضعي
معقوله غرور ولج لاتئيسين رحمة الله واسعه
هيج والله ... يشملني برحمته ... ياربي
شنو رايج اني اكول لزيد بلي سواه بيج كرم
لالالا عفيه موهيج لتجيبين اله سيره اتركي هالموضوع
اوك حبيبتي الي تشوفي

امي ورضا ورفل .. كلش فرحوا الريم فرحه ماتنوصف .. تستاهل ريم بريئه وماعدهه حقد
على احد رغم الي سواه بيها بس سامحته
وابد مافد يوم حجت عليه حجي مو زين
فقط عن ذكرياتها ويا وشوقها اله والحنين

بليلتها جان موعد جيتهم تحضرنا كلنا وفرحانين
هيج المفروض يصير من الاول لازم هي التزوج
قبلي مو اني هي صبرت ونالت اما اني صرت
وحيده وراح ابقى وحيده والشعور بالوحده قاتل

بدلت ريم لبست فستان بنفسجي وبي طوبات صفر طلعت كانها فراشه تجنن رتبت الها شعرها والميكب  كعدنا ننتظرهم ..
وريم منتظرتهم على نار واهلي ممصدكين شبسرعه
صار كل هذا
واخيرا اجو لمعت عيونها الريم ونزلت دمعة الفرح
وطول الكعده زيد مشال عيونه منها وهي فدوه لالله
تبتسم ودنج .. اتفقوا على كل  شي وراحو

ومرت الايام وريم اسعد انسانه بالدنيا بالليل كل اتصالات هي ويا وبالنهار هم سوا بالشغل
واستعجلوا على العرس وحددو الموعد

وبيوم العرس ريم تجنن طلعت هي فعلا حلوه
لو لان اني احبها واموت عليها وهي اختي الوحيده
شفتها احلى عروسه بالدنيا 
*ولج ريم معقوله راح تتزوجين وتتركيني وحده
اني حتى صرت اغار من زيد لان اخذج مني

* هههه ياروحي ان شاءالله دوم اجيكم ومااكطع ابد منكم هسه خليني بواهس فرحتي انتي اكثر وحده تعرفين شكد عانيت وهسه شكد فرحانه

*يابعد عمري .. ادري والله لهيج اني دالاشيج
اريد استفزج .. ادري فرحتج هسه متنوصف
وياربي دوم هالفرحه انت طيبه وتستاهلين

زفيناهه للفندق وسط صفكات وهلاهل الاهل والاقارب اني وامي وگفنا نبجي فرحانين الها
وضايجين لان مراح تعيش ويانه بعد
ريم وزيد مبين عليهم الفرحه
طبعا كرم ابد ماحضر للعرس ومااعرف عنه شي

رجعنا للبيت .. امي كعدت بالهول يم رضا  كل شويه يتذكروها ريم هيج جانت وريم هيج ماتحملت حبيت ابجي الوحدي
طبيت للغرفه .. احس روحي انتزعت مني
بطريقه  فرحانه الها وبطريقه ثانيه ضايجه من روحي والي سويته واكثر وحده تضررت هي اني
اياد مراح يهمه شي وكرم هم ابد ابد
بس اني كرهت روحي كلش والي سويته
ماالومهم هم ولاالوم الزمن الومها النفسي
مرات الوجع يجي من تحت راسنا احنا
واني الي جبته النفسي وصنعته بيدي
نعيب زماننا والعيب فينا
بالضبط ينطبق عليه بس هسه
ميفيد الندم ابد بعد ..

صار الصبح .. بدلنا اني وامي وتحضرنا
واخذنا الريوك ورحنه الريم
اول مفتنه دخلنا بعدها هي نزلت
من غرفتها لابسه كلبيه البيضه رداناته كيبور والباقي
تصميمها فراشه تجنن اجت النا فرحانه وزيد يمشي وراهه مثل الملاك الحارس الهاا اجت حضنتنا وبوستنه
صدك شكلها متغير وتحولت من بنت الى امراه
وهي طايره فرح تريكنا وصعدنا فوك الغرفتها
كبال غرفة كرم بالضبط وكفت اباوعلها وتذكرت من صعدت يمه بالعزا مال خالي صفنت وراح بالي البعيد
ياتره شنو سويت الي هنا ياكرم غير الصور صحيح اخذت مني اغلى شي او لا
وعيت على صوت ريم ولج فوتي وين صفنتي تره الصفنه مو الج
ضحكت وطبيت الغرفتها كلش حلوه ومرتبه
كالت تدرين منو خابر النا اليوم
كنت حاسه انو كرم
كالت كرم بارك النا واني كلش كارهته كوه رديت عليه اي ؟
اي كال مبروك ومن هالحجي وبالاخير كال يوم الغرور ان شاءالله
شيقصد
مدري
بعدها خلص اليوم عادي ورجعنا للبيت
وافكر بكلام كرم من كال يوم الغرور شنو تهديد هذا لو شنو
باليوم الثاني ترخصت من امي وطلعت
جان ابالي ارووح للطبيبه حتى افحص
ماان وصلت لطبيبه نسائيه وكفت اباوع للافته
واقرا خجلت من روحي وخفت ونزلت دموعي
ماتجرات خفت انصدم ورجعت للبيت

مرت الايام واني وحيده لاصديقه ولا اي احد
احجي اله ريم اكثر الاوقات ملتهيه وي زوجها
مو مثل الاول

رفل ملتهيه بطعاتها وناساتهه
امي لو تطبخ لو تروح بيت خالتي
لو تطلع تتسوك للبيت

مرت الايام .. وريم صارت حامل كلش فرحنه الها
بس يافرحه ماتمت كلتلهه الطفل مهدد بالاسقاط ولازم تسوي الها ربط
هي كضتها بجي وزيد مطنكر والضحكه مفاركه وجها
بس عوزهم ينصبون جادر
كلش خايفين
ريم كلش خافت على ابنها الي ابطنها بقت من الطبيبه للبيت وكله زيد يشيلها

ويوديها للحمام ويصعدها الدرج وهو شايلها لحد فراشها
صارت تخوف اني كله اروح الها وانضف الها وجها من الشعر وباقي جسمها اسويلها هيريموڤ
وماسكات لبشرتها وحتى اضافرها اقرضهم وهي ميته خوف على طفلها
كلما افوت على غرفة كرم احس هو بيها
احس عيونه تراقبني اشم ريحته احسه
قريب مني واخاف وتلزمني قشعريره بجسمي
وانزل ركض
وصلت ريم للشهر الخامس وكالت الها الدكتوره بالسونر بين بيها بنوته واختاروا الها اسم ملك
طاروا فرح بيه واحنه هم السعاده غمرتنا وهي اول حفيده النا ورضا كال صار عندي جنه لابني
طول فترة التسع اشهر وريم خايفه على بنتها لتوكع
وجهزت الها كل شي
وصار وقت الولاده وراحت وياهه ماما وام زيد
وجاببت البنوته وزيد شايلهه وفرحان وريم متكدر تحجي متالمه ولادتها طبيعي بس بكر وصعبه

طول فترة الاربعين يوميه نجي الها
اخر الايام احس تعلقت بريم اكثر مما كانت يمنا
احس راح افقدها من اكل من اكل بيتهم احسه مر بحلكي
بيوم طلعتها من الاربعين كلتلها تره حالتج تلعب النفس هسه جبتي وبنتج جنها العافيه
امشي للصالون لحتى ترتبين نفسج تره زيد يكوم يباوع لغيرج
هي ماكالت باطل بدلنا وتحضرنا وطلعنا وخلينه
ملك يم ماما وام زيد
وصلنه زيد للصالون
وهناك جنت مخنوكه ماادري شبيه كلش روحي بخشمي بس ريم فرحانه حييل
سوت رسمه حلوه لحواجبها

وصبغت شعرها وخصلته  وكصته كصه حييل حلوه
جانت تريد تسوي فلر لشفتها تحب الشفه المنفوخه
هي وسوتها ومابقت بنفسها
فدوه لالله تخبشين صرتي
ولج شفتي احس مورمه
اي عادي بعدين تطيب وتصير حلوه
يلا راح اخابر زيد اريد ارجع للبيت
خابرته كالت اشو يكول هو بنص الازدحام
كتله راح ناخذ تكسي ونرجع للبيت خايفه على ملك لاتبجي
طلعنا من الصالون الدنيا مغرب
تمشينه شويه نريد تكسي
واحنه دنمشي احس مثل العاصفه الي كرفتنه كرف
وكعت على الرصيف العاصفه هي سياره كمت ورجلي وايديه مزلغه وراسي مصاوب
سوينا حادث سياره دعمتنه وين ريم ريم مويمي صرت اصرخ مثل المجنونه بالشارع
شفت ناس ملتمين رحت عليهم شفت ريم غرگانه بدمها ومره مخليتها بحضنها وتكول الها تشاهدي تشاهدي
نزلت عليها راسا شفتها تحرك شفايفها
كتلها بصياح  ليش تتشاهد هي مراح تمووووت لا متموووووت
تشاهدت ريم وعيونها عليه وتنطق بصوت بي موت ملل ملل
وبعدها سكتت وسكت كلشي 😭
يتبع
عفيه لتضغطون عليه خليها بارت واحد لازم تاخذ حقها القصه هذا على السريع كتبته 😭
ملاحظه .. حادثة ريم حقيقيه