رواية لو انك لم تعد ..... الفصل الثاني عشر 12 - بقلم نورا ناصر

#لو_انك_لم_تعد ....12......
بقلمي نوره

بحلظه وحده ماعادت تتحرك .. اسمع الي حواليه
يكولون لاحول ولاقوة الا بالله
وناس تكول ماتت خطيه هم انقهروا عليها زين اني شنو اكول صرت اباوعلهم بعيون تبجي ومخليه راسها بحضني واصرخ نقذوها نقذوها احد يوديها المستشفى محد ماتحرك ينتظرون الاسعاف
هي الموده الجديده الي يندعم بالشارع محد يشيله يخافون تنشمر براسهم وتصير عشاير والي دعمنا انهزم ومابقى بالشارع
بقت بحظني نايمه واني اناجيها ولج مو الج الموت كعدي ولج انه العار انه لازم اموت ليش مستعجله ليش ماانتظرتي زيد هاا ليش مستعجله على الموت
ولج تركت كرم على مودج واني احبه خفت لااذيج واجرح مشاعرج هسه تعوفيني وترحين
مااتهنيتي بزواجج من عشق حياتج كومي ريم لاتسوينهه بيه
منين اجيب ابويه ويخلفلي اخت شو ابويه مات
فدوه العمرج الحلو هستوج عروسه وطلعت من الصالون وراح تنزفين للكبر
مااعرف شوكت اجت الاسعاف واخذونه للمستشفى
وشوكت خابرتهم وجوي زيد ورضا وولد خالاتي وخوالي اخذوني كوه وورجعوني للبيت بس الي اتذكره من انتزعوا ريم من بين ايديه وحضني
شلعوها شلع مني شلعوا روحي وياهه وسعادتي وفرحي وكل شي
شفت امي كاعده يم باب بيت خالي ومدده رجليها ومرتكيه على الحايط
وفاقده كلش رحت شمرت نفسي عليها
ونصرخ ونبجي شافت ملابسي كلها دم تهسترت
ولج لاتكليلي هذا دم ريم ولج لاتكليلي ولج ليش ماجبتيها وياج ليش خليتيهم ياخذونها

يمه كبالي عيني ماتت يمه بحضني طلعت روحها وعيونها عليه شلت حالي و انهد يمه

بقينه بنفس المكان كاعدين اني وامي وامي منهاره
واني مو اقل منها وحالتي مو احسن منها ابد
الا ان جابو التابوت بعد عدة ساعات وطول انتظار اتمنيت يجيبوهه عايشه ويكولون مو ميته
شفت التابوت بعيني وممصدگه وشون حعيش بدونها
تمنيت انام وياهه بالتابوت ويدفنوني وياهه
لمحت رضا يم التابوت محني ضهره وعيونه كلها دموع تجري رحت يمه حتدفنها رضا بس كولي عفيه
شون يهون عليك تهل عليها التراب. هو اخذني لحظنه ويبجي كتله زين اخذني خليني وياهه مااتحمل الحياة بعدهه ابد وزدنا بالبجي وهو يدك على رجله وسحبو التابوت وراحو
مااخذوا ريم البنت البريئه والحساسه والصادقه والطيبه تملئ قلبها
لااخذوها جثه هامده وتركتلي ذكريات حلوه ومره حزن فرح مال سنييين طويله عشناهه سوه اني وهي جنه جسدين بروح وحده والقدر فرق بينا ..

ممصدكه هي الي بالتابوت احس روحها ويايه لسه موجوده مو يمكن دتشتغل بللمطبخ او فوك دترضع ملوكه زين ملوكه منو حيرضعها شون تعيش بعد امها

هي اني مااخذتلي ركن وابجي وامي كبالي منهاره والناس كلها جتي واني مااميز حتى بينهم كلهم خالاتي وكل اقارب امي
وام زيد هم تبجي وتصرخ وتكول طيبه وماشفت منها اي اذيه
اي ماهو الطيب الي يروح بيها ويبقى النذل
جوي يمي البنات .. وكابلني ويبجن على حجي واني اهذي وابجي
اكول جانت كلش مستعجله خابرت زيد
كللها اني بالازدحام مااكدر اجي وبين كل كلمه وكلمه اشهك
هي جانت مستعجله وتمشي سريع اني عبالي
تريد ترجع للبيت ولملك اثاريها مستعجله تقابل عزرائيل
متواعد وياهه على الموت اويلي خيه شسويتي بيه
شليتيني هديتيني انمرد قلبي

جانت سابقتني بعدة خطوات السياره من دعمتها شمرتها البعيد اما اني وگعت على جنب

اووف ربي شون راح اتحمل فراكها شون راح اعيش بدونها
اني ممنتبه على نفسي راسي من الضربه على الرصيف متاذي وايدي توجعني بس من الصدمه مدااحس
جتي خالتي تعيط عليهن كومن غسللها وختبدل
اجت نزلت كعدت يمي وكالت
انت موتحبيهه باوعتله وبجيت كالت لعد كومي صلي الها صلاة الوحشه واقري الها قران احسن من كعدتج هي تره امج مابيهها وماعدهه غيرج صيري قويه لخاطر امج وهالطفله هي احسن تجيلها مرة ابو وماتدرين شنو ماشنو ويمكن تظلمها
اني رجف گلبي وزدت بجي
لزمت ايد بنت خالتي وكومتني ولخ من الايد الثانيه
اخذني البنات وغسلن الي ولبسني غير ملابس وعالجن جروحي كصتي كلها مجرحه ومشخطه
كمت صليت الها صلاة الوحشه وقريت قران ودموعي تنهمر مثل المطر وقلبي مهشم وداخلي نار نار
اشهق الوجع وازفر الالم ماتوقعت تروح هيج
احس موتتها مثل الي صعد للسما وبلحظه وكع بالكاع هستوها تزوجت وخلفت وبسرعه ماتت مصار سنه
ليش ميكمل فرحنا ليش بس ليش

بعدها امي وكعت وصارت متحجي ابد وبقت بالمستشفى وبقت يمها خالتي واني رجعت للبيت

وخايفه على امي حيل .. طبيت لكيت رضا كاعد بالكراج رجل ثانيهه ولخ مددها ومدنج ورفل كاعده بصفه .. منظره كسر كلبي يمكن المراه ردت فعلها تكون عاديه بس الرجل صعبه تشوفي مكسور ومحني ضهره خاصة هو معنده اخ يمكن شاد ضهره بخواته
رحت اركض اطل بوجهه كتله هاا خويه دفنتها خلص هاا هليت عليها التراب ماكو ريم بعد واصفك بايدي
ظل يشهك ويبجي سحبني من وره راسي وحضني وطكينه بجي
ولج غرور راحت اخيتنه راحت .. بقينه بس احنه
شكد نريد نبجي وشكد نريد ننقهر

بعدها طبيت للبيت وامشي واحس بشفقة الناس
عليه .. والخنكه لازمتني .. وعيني ممبطله دمع

ممصدگه هي فاتحة ريم ..تذكرت بعزا خالي من جنه نشتغل اني وياهه هسه هذا عزاها

صار الفجر واني لااكل ولاشرب ولانوم ابد
اذن الاذان كمنا صلينه وكعدت منهكه مابيه رجليه متشيلني .. اقتربت خالتي مني وكالت رحتي شفتي ملك .. هزيت راسي لا
ليش يايمه روحي شوفيها مالهه غيرج انت خالتها الوحيده هي هسه ماعليها شي البنات ماقصرن وياهه
بس انت هسه من تشوفيها ترتاحين
گتلها ماشي .. اشرت الروان تجي تاخذني الفوك
لزمتني روان گتلها اني امشي اكدر صعدت الدرج وهي ورايه
طبيت لغرفتها جانت خالتي ومرت خالي كاعدات
شافني ظلن يباوعلي ..
بقيت اباوع الغرفتها ودموعي تجري كالن الله يصبرج هذا قضاء الله وقدره وكلنه يجي يوم نموت
فكلنا على هذا الطريق
كتلهم عفيه اريد ابقى وحدي هنا اذا تكدرون واني اسفه بس من صدك اريد ابقى وحدي
خالتي .. لاشسالفه بنيتي حقج هذا ليش تعتذرين
هاج ملوكه اخذيهه الحضنج هسه ترتاحين

لا خاله مااريد خليها بسريرها ..باوعتلي مستغربه كالت خوش خلتها بالسرير وطلعوا بقت روان تباوعلي كتلها عفيه اريد ابقى وحدي فدوه ارحموني

طلعت هي وهم جانت متاثره وعينها حمره ..
باوعت الغرفتها اتذكر من جنت اكعد يمها هنا واقرض حتى اضافر رجليها .. ومن ولدت اني سبحتها
ولبستها من جانت تعبانه كلش

فتحت كنتورها طلعت كم قطعه من ملابسها
اخذتهم القلبي واشمهم واحاجيهم بعد مااشم ريحتج بس بالملابس اويلي عليك يازمن اويلي اخخخخ

سمعت صوت من ملك هي وبسريرها رحت الها اباعلها يربي زغيره وين عفتي بنتج ريم وين عفتيها
اني عمري مشايله طفل بهيج عمر اربعين يوم اخاف
شفتها تبجي تغلبت على خوفي وشلتها هي بنت الغاليه وهي مسؤؤليتي محد ياخذها مني
ضميتها القلبي وابجي
طلع الصبح وهي بحضني . اندكت الباب ودخل زيد
منهار كلش ومحني الظهر كال بصوت مخنوك وين ملك وكفت على رجليه وقربتها اله باوعلها وظل ينحب ويبجي ويشهك مثل المراه ووكع بالكاع واني لازمه ملك وابجي .. بهالاثنااء طبت امه كالت
صدك جذب راح تنزز البنيه راح تسوون بيها شي
واخذتها مني وطلعت مسحت دمعي وكعدت يمه بالكاع خليت ايدي على كتفه وهو يبجي وكل جسمه ينهز كتله زيد صير قوي لاجل بنتك عفيه ملك محتاجه الك هوايه هسى هز راسه بمعنى اي
عفته وطلعت نزلت جوه
انصحه مايضعف واني بداخلي مملخ ومهدوم كل شي بيه كعدت على الارض وارتكيت على الحايط عود غفت عيني شويه بلكي اشوفها بالحلم
كعدت شفتهم جايبين امي ..
امي حالتها حاله مجلوطه وحلكها داير
بدون ماتصرخ ولاتبجي بس شكلها يوحي بانها
فقدت الرغبه بالحياة مدده وفاتحه عيونها
شافتني وتخربطت ملامحها تاشرلي باصابعها
عود تعاليلي حضنيني شمرت نفسي عليها حضنتها بكل مااوتيت من قوه
يربي شسوي اختي اول يوم الها تحت التراب
امي شبه ميته على فراگها ..
اخويه شكله يكطع القلب
بنت اختي لسه لحمه حمره وزغيره ومحتاره شراح يصير الها مدري تتمرض مدري يصير بيها شي
انضاف هم وحمل اضعاف الي جنت حاملته زادت مصايبي واحس حمل جبال ع اكتافي
مرت الساعات واني كاعده يم امي ولازمه ايدها
وهي كل شوي تشد على ايدي

وجان يخلص العزا ماادري شون كضا احس
كبرتني مصيبة ريم 30سنه احس نفسي عجوز
مو شابه وعمري 20

باليوم الثالث العصر كاعدين بالهول وامي نفس حالتها ماتغيرت
سمعت صوت زيد وهو ينحب ويبجي مثل بالمره
ويكول ياخويه راحت ماتت ياخويه كل هالسنين انتظر اليوم الي تصير بي اليه بسرعه صارت جوه التراب

رحت على صوته رحت اطل من الباب شفت واحد ضهره عريض عليه صاير ومتحاضنين هو وزيد
وزيد يبجي حييل

عرفته هذا كرم اعرف قفاه وجسمه قلبي وجعني اكثر وهاجت جروحي عليه
رجليه محملتني عفتهم وصعدت فوك .. كل مره اصعد الفوك ومااشوف ريم قلبي ينمرد يتقطع اشتاقيت الها صارلها 3ايام مو بالدنيا
بقيت يم ملك شويه شفتها نايمه بوستها وطلعت
سديت الباب وداانزل من الدرج صار بوجهي كرم ديصعد الدرج بسرعه لابس قميص اسود وبنطرون اسود ومشكل الردان ويباع على ساعته وصارت عيني بعينه
يتبع
عوده مصخمه كرامووو 😒
اقصد عوده ميمونه استاذ كرم 😊
توقعاتكم
اعرف البارت قصير واليوم جمعه لذلك بنات انتظروا بارت للسهره اذا كدرت خاف ماكدر بس راح احاول
جماعة وتباد صوتو 😤للبارت فدوه
جبتلكم صوره تشبه غرور وشوفوا الشامه الي على حنكهه 😅