رواية لو انك لم تعد ..... الفصل السابع 7 - بقلم نورا ناصر

السابع
ريم ... رورو يعني هو كال يخطبج لو شنو بالضبط ؟
غرور ... ولج هو حيل مؤدب كال انت خوش بنيه اريد اجي اخطب منكم
ريم .. اي
غرور .. اني گلت اله نتشرف بيك عندي اخت اكبر مني ..
كال اذا اختج مثل ادبج واخلاقج وجمالج
تمام  يعني الي افتهمته منه انه هو يختار وحده منه
ريم .. بس اني لسه مااريد اتزوج ممستعده
غرور .. عادي هو ماصار شي رسمي اني ماردت اخجله وكتله تعال خو مااطرده
ريم .. حبي اذا رادج توافقين عليه
غرور .. ههه ماادري افكر
ريم .. ماكو بقلبج احد لسه
غرور .. اخخ قلبي .. گتلها لا حبي اطمئني لسه قلبي مقفول
ريم .. وليش قافلته
غرور .. محد يستاهل يفوت بي لسه
ريم .. والاستاذ اياد
غرور .. لج ماكو شي بيناتنه ابد هي شبيج
شنو رايج نكول الماما ننزل للسوگ نشتري شغلات
ناقصنا هوايه
رحنا لامي وانطتنا مبلغ وكالت اشتروا
عدنا راتب ابويه احنا
طلعنا اني وريم ومرينه على المكان الي جان يوكف بي كرم واصعد ويا بالسياره اخذني الحنين والشوق اله مدداكدر اشيله من خيالي كلما احاول ترجعه كلمه او حدث او مكان
عشت ويا شهور مو قليله صعب انساه وغير العشره الحب الي بداخلي اله موبسهوله ينمحي
اوف بس اوف شون انساك كرم بس انساك
المهم افترينا بالمحلات
الفلوس العدنا يادوب تكفي نشتري بيها فساتين حتى مراح نكدر نشتري ملحقاتها
اجت عيني على فستان وردي وبي طوبات بيض كلوش وعلى الخصر حرام ذهبي نازك
وورده ذهبية اللون بالصدر على صفحه .. ودكم ناعمه وياخه ناعمه
ريم عجبها قميص وردي وتنوره كلوش بيضه تول ومبطنه ..
اخذناهم وبينما نمشي ونباوع على الاكسسوارات والجنط والشوزات والشالات الغاليه واحنه منكدر نشتريهم ..
لازمين ايد بيد اني وريم
هسه شيصير بعد لو عندي فد80الف اشتري شوز ذهبي المرصع ب30الف وشال ب10 كلش عجبني ذاك الذهبي وبي وردي
واكسسوارت فد بـ 40 سلسال ذهبي طويل
وشباحيه  نازكه وبالايد الثانيه سوار وساعه جلد ذهبي هسه منريد ذهب عادي ذهب تقليد مو اشكال
ريم .. هههه اني اريد اسوي تنضيف بشره بالصالون وارسم حواجبي واسوي شفتي كلش ممسوحه ياالله اريد شفه مثل شفتج وهم ادك الي شامه جوه شفتي مثلج
غرور .. هههه تفكرينه هواي مختلف
ثواني وفات واحد من يمنه كال اويلي شامه وجوه الشفه تكتتتتل
ضحكت لريم كتلها هذا سمعج شنو
ضحكت اندارينه شفنا يمشي ورانه هو وصاحبه
حضنه ايدين بعض ومشينه سريع سريع
ونضحك والدنيا غروب .. والوقت شهر 11 جو بي بروده وحلو .. واخيرا ضيعناهم ووصلنه للشقه
طبينه رفل وامي كاعدات بالهول
سلمنه عليهم ..
رفل .. هاا ششتريتن
غرور .. اني فستان وريم تنوره وقميص طلعناهم شافتهن وتكلب بيهن
الام .. الف عافيه حبيباتي الله يهنيجن بجاه كلمن عنده جاه يم رب العالمين
ريم .. حياتي ماما الله يخليج النا
رفل .. هسه بدال هذن الملابس لو مشتريات ذهب بمكانهن
غرور .. ولج ياذهب يمعوده شبيج انت الذهب وين واحنه وين
رفل .. حبيبتي احط الفلس ع الفلس ولا هالخلاكين الي لبسه وحده ويروح موديلهن
غرور .. اي انت منو مثلج ام الذهب بس اريد اعرف الذهب العدج شكد يساوي
رفل .. هه حبيبتي اني مااشتري هدوم اشتري ذهب من مصرفي الي ينطينيا رضا
الذهب على گولتهم زينه وخزينه وخلت رجل على رجل وهي كاعده على التخم
غرور .. عاد وكت العوز تنطينهم الرضا هالذهبات الي من تعبه ؟!
اندارت صفح وصار تلعب بتراجيها الي ساحبات اذنها سحب هالكد ما طوال وفخمات
كالت اي ليش لا
بس حسيت ماكو استعداد عدهه تتخلى عن ذهبها الزوجها فقط حجي السان ..
لملمت فساتينه اني وريم
گتلها انت دومج تضوجينه وتهبطينه هسه دكولي بالعافيه وفضيها ضحكت كالت اني اريد مصلحتجن شبيجن
دخلنه بالغرفه ونسولف اني وريم ونفكر بالاستاذ اياد حيختار منو منه ومحتاريين
باليوم اليوم الي متفقين احنه ويا اهل اياد انهم يجون احنه مسبقا منطين خبر لامي والرضا وعدهم علم بهالشي اكيد
نضفنا الشقه ورتبناهه وقبل جيتهم لبسنا ملابسنه الي اشتريناهم ..
ووكفنا نباوع للمرايه حضنت ريم وحضنتني
گتلها احنا ليش منتشابه
انت ابيض مني
ريم .. وانت ملامحج احلى مني
غرور .. حياتي وانت شايله اطيب قلب بالكوون
الله يسعدج
ريم .. ويسعدج ياروحي انت
غرور .. بوستها ودمعت عيونا گتلها مااعرف سواء تزوجنا اياد او غيره بس شون راح نتفارگ
ريم... منتفارك ولج يوميه نتشاوف غصبن عليهم يجيبونا نتشاوف
غرور .. اندكت الباب وعرفنا اجوي
جنه بالغرفه وخجلانين نطلع ووحده تباوع للثانيه
جتي امي دفرت الباب وطبت
يلا يلا ولجن وحده تاخذ علبة الحلويات ووحده تاخذ
العصير ..
باوعت الريم ضحكنا
رحنا بالاول للمطبخ اخذت العصير اني ماما محضرته بالصينيه
وريم اخذت الحلويات طبينه سلمنه عليهم
رحت اقدم الهم
قدمت اله بالاول رفع راسه مكدرت ماابتسم اله وهو هم ابتسم الي وقدمت لنسوان اثنين جايات ويا
وكعدت مقابيلهم .باوعت اله لابس قميص زيتوني بي لمعه سطحيه
وبنطرون اسود ومدخل القميص بي وجسمه مليان
شعره منثور ويلمع.
اكو مره كاعده بصفه وتباوع عالشقه بنضره كانها معاجبتها
لابسه كوستم بيجي مبين عليه الفخامه
حجت المراه كالت اني امه منو بيكم غرور
اشر الها اياد هي غرور
كالت ماشاءالله
باوعت الهم مبتسمه واغلب نضراته عليه خجلت دنكت
رفعت راسي اباوع الريم مخنزره .. ومنصيه راسها
ياا صح فشله اني مكضيتها اوزع ابتسامات والله عيب ..
حاولت اسوي نفسي ثگيله موبيدي مااكدر هه
امي ورفل كاعدين كلنا احنه سطر مقابيلهم
ورضا بالجنب الي كاعد بي اياد ..
حجو وكملوا كالو ا انتظروا منا خبر وكاموا بس مرتاحيت لنضرات امه لشقتنا مااحب هيج ناس تدور فخفخه
احب الناس المتواضعه رغم نضراتها الي ودوده
طلعوا واحنه ركض للغرفه اني وريم
طكيناهه ضحكه حجت ريم
ولج هذا صاك وين حصلتي
صراحه هو حصلني مو اني ههه سؤال ريم اذا خطبني الي انت مراح تزعلين
علويش ازعل اذا اختي حبيبتي تنخطب طبعا افرح
لابس انت الاكبر مني لزمتني من وجناتي وعدلت شعري وكالت
لا حبي مدام اانت مرتاحه اني ارتاح
حضنتها وافكر ياتره لو عرفت بعلاقتي بكرم جان راح تفرح الي او لا
شويه سمعنا صوت امي يابنات تعالن اخذن المواعين للمطبخ
صار ماما
رحنا اخذت الكلاصات وغسلتهن نشفتهن خليتهن بالكاونتر
رجعت للغرفه ..
صار الليل وكالعاده بالليل افكر بكرم
شلون السبيل النسيانه وقلبي متقلب مرات مااكدر انكر اعجابي بأياد مجرد اعجاب بس داخلي ينادي كرم

يوم الثاني سبت ماكو دوام
بقيت بالبيت وافكر باليوم الثاني شون اقابل اياد
صراحة يعتريني الخجل
خلص اليوم العادي ويوم ثاني داومت
كملت محاضرتين وطلعت بالحديقه
شفت اياد من بعيد خجلت عندي حركه من اخجل بالكليه اسويها اقرب الكتب البيدي او الملازم لاسناني واعض بيهن
صباح الخير غرور شونج اليوم
صباح الخير استاذ شونك وكمت من على المصطبه
غرور اكولج شي ومتزعلين
اني قلبي كرصني مااعرف شحيكول كتله لا ليش الزعل احجي براحتك واني منصيه راسي
غرور اختج معجبتني بصراحه محلامحها حييل بارده انيي اخترتج الج من البدايه واني معجب بيج
حتى امي عجبتيها وامي صعب يعجبها شي صراحه

يمه انحرجت بالزايد اتمنيت الارض تبلعني موسهله استاذي يگول الي هالكلام ابد دنكت وحجيت بصوت قريب للهمس ويرجف
استاذ اياد گول  لاهلي هالحجي  بعد الهم القرار اني اترخص عندي محاضرات
روحي براحتج
رحت وفكري يم ريم  ومااعرف ردة فعلها  وامشي وفكري يمها ..
بوقت محاضرته هم جان يغمرني بنضراته من وقت لاخر
خلص الدوام وطلعنا
رحت للبيت .. ومااعرف شون افتح الموضوع ويا ريم
طبيت عليهم كاعدين بالهول ..
هلاوو شونكم
ردوا عليه كالت امي اي شخبار الاستاذ
ها ماادري
يعني مشفتي اليوم
شفته ماما
زين شسوه ماحجه شي مكال الج شي
لا ماما محجه شي اني رايحه اغير ملابسي ماشي بتوتر
طبيت للغرفه
كعدت على السرير خليت ايدي على راسي في حركه اخفف بيها توتري واجر نفسي مستحيه كلش ثواني وجتي ورايه ريم كعدت على ركبها مقابيل السرير كالت
ها شكو اشو احسج مو على بعضج
ماكو حبيبي ليظل بالج ولزمتها من وجناتها
تضمين عليه تضيم على توامج الروحي
نزلت يمها على الارض لزمنه ايدين بعض كتلها حياتي اني مااريد تتحسسين مني ولو بقدر كلمه

رورو اني وانت واحد حياتي ميهم احجيلي شنو گلج

حياتي. ريم اياد لو مختارج الج مجان رح يفرق ويايه ابد راح افرح الفرحج هوايه صدكيني

هسه غير تحجين شگال ؟!

اوك گلي اني اختاريتج الج لان انت شفتج بالاول
(مردت اكول الها شكال مااريد اجرحها)
طبطبت على ايدي وكالت الله يتمملج على خير حياتي
كتلها لتكولين لامي خلي هم يحاجوها
تمام حبي يلا تره جوعانين دننتظرج على الغدا
ماشي ابدل ملابسي واجي
بدلت وطلعت كعدت يمهم بالهول اتغدا وياهم
مسوين دجاج على التمن وطرشي وخضورات
رضا كاعد ورفل وحمودي يلعب ويزعبل بالخضره كتلها رفل شوفي ديلعب بالخضره متوخري

شبيج عيني هو جاهل
هو جاهل جاهل بس محلو تخلي يلعب بكل شي
اي سوت نفسها تفتهم بكل شي ههه كوليلي شخبار الاستاذ اليوم محجه شي مكال
لج رفل لتحرجينه كدام رضا
هههه ليش تنحرجين مني ولج اخوج اني واريد افرح بيج انت او ريم
الله يخليك النا اخوي والله يديم هاللمه الحلوه علينه
ايي والله نريد نفرح نريد نركص حمودي من صار لسه ماكو عرس ماكو فرح
ههه اصلا رفوله انت تردين تكشخين بذهبج
شصار روره ميصير نكشخ
كشخي حياتي منو كال لتكشخين
الله يفرحني بيكم ان شاءالله
ان شاءالله ماما الله يسمع منج
تغدينا وخلصنا
خلص النهار واجه الليل سوينه العشا اني وريم ونسولف بالحفله شحنسوي وشراح اللبس
زين الشقه شون حتكفي
اكيد ياخذون قاعه للحفله والا وين تكفي
يارب الله يتمم الج حياتي
يوم الج ياريوم وافرحلج واركص وطك اصبعتين هم

ههههه ياروحي فرحتج هي فرحتي
احبج ريم وان شاءالله يجيلج واحد يحبج يموت عليج ولايفاركج ويعوضج عن كل شي
ههه تدرين اني طلعت لان انت اصررت عليه والا اني شايله فكرة الزواج من بالي نهائيا بالي يم الوضيفه اريد اتوضف هذا طموحي بس
لج ياا ريم احتركت الطماطه هههه
لج عوفيها حلوه هيجي لاجعه
كملنا العشا وتعشينا
وصار وقت النوم دائما من نخلي راسنا على المخده يبدي التفكير
اني كل ليله افكر بكرم ضاعت اخباره مني ومانسيته
بيدي الكلاده الي جابها الي هديه واعصر بيها

اتمنى اشم خبر منه افوت العقله واستفسر هم يفكر بيه
ادخل القلبه واجس نبضه لسه يحبني
بين كل هالتفكير ندهتني ريم
كالت تحبي لاياد
هنا غصت الكلمه وهيجت بيه جروح نايمه
معرفت الاجابه واكيد مراح اكول اي او لا جاوبتها ان شاءالله بالايام الجايه رح احبه
ليش انت متحبي معقوله
لا يعني مجرد اعجاب لااكثر ليش هو الحب سهل وبعدين اني علاقتي بي كأ ستاذ وطالبه مو علاقة حب ولا حتى صداقه تره
انتهى حديثنا ونمنا

مرت يومين عاديه
رجعت من الكليه تغدينا سوه وجعت ارتاح شوي ريم على سريرها لازمه تليفونها واني متمدده والعب بشعري وعيوني ع السگف وسارحه بمية شغله ابالي
طبت امي
هاا بناتي هاا حبيباتي خابرتني ام اياد
كمنا من مكانه ورحنه وكفنا يم امي وفاكين حلكنا
نريد نعرف ردة فعلها لامي لان احنه عدنا علم مسبقا
كالت امي تكول ام اياد يردون غرور
باعدت شعري وره اذني وخجلت واباوع صفح
امي لزمت خدود ريم براحة كفها وكالت اني جنت اتمنى الزواج الريومه
وانت غرور .. ردتج تكملين دراستج ردت عليها ريم
ميخالف ماما ماكو فرق ابد اني او غرور اني طموحي الوضيفه ياامي
تحاضنه كلنا وبوسنا امي وبوستنا
احساسي جان بين الفرح والحزن مااكدر اوصفه ابد
موافقتي على اياد جانت لاسباب عده
اولها اياد ابد ميتعيب واي وحده تنمى
اريد اطلع من واقعي والحرمان الي دااعيشه
واخرها اريد اعيش حياتي واطلع كرم من عقلي  وقلبي
عسى ولعل اطلعه ...
طبعا حسب العادات يروحون يسألون عليه
رضا سال
من رجع كال خوش ناس ومن طبقه راقيه ومثقفه
عائلته كلهم خريجين واساتذه

مرت الايام وصارت مشيتي واتفقوا على كل شي
هم الي يشترون الذهب وينطوني فلوس للملابس بحكم خبرتهم بالذهب اكثر منا احنا مو شرايين للذهب
رفل طنكرت كالت ليش مكتولي اني افتهم بشراء الذهب
كلتلها بعد صارت لتهتمين
بيوم حفلة المهر رحت للصالون وسوت الي تسريحه شويه رفع وباقي شعري مفتوح ومبروم
اياد يحب الوردي لبست بدله ورديه هو اختارها الي من تركيا توصيل
حييل حلوه عارية الاكتاف ومرصعه بالكرستال ومن جوه قصيره وكصيفه وتحاوطها قطعتين من الشيفون الوردي الخفيف
المكياج حمره ورديه والشدو سموكي
بعدها رحنا للقاعه الي مأجريها وعزمنا الكل وبالي يم كرم اذا عرف شنو ردة فعله
جوي خالاتي وزواجات خوالي والخ ...
ولسه ماوصلوا معاز يم اهل العريس .
من بين كل الحضور اجت روان طول هالفتره تتصل او تجينه للبيت مااستقبلها  جتي وكعت عليه وبوستني  بوستها بتكبر
كعدت يمي لزمت ايدي
غرور. انت لازم تعرفين اني ليش هيج سويت
روان مااريد اسمع شي دخيلج اتركيني اليوم اريد انسئ كل شي
ودرت عنها ونضري يروح للممر الي يودي لباب القاعه
غرور اني جانت تربطني علاقه بكرم بس عافني بسبب غلط مني من كتله عليج ماصدكني
حاجيتج واكدتيلي بعثتله سكرينات للحجي
بعدها كلتيلي مااعرف شون اتخلص منه اني ساعدتج اني عندي حساب ومصاحبته بي بس هو ميعرفني نفسه الحساب الي دزيتلج منه السكرينات هي اني

درت عليها اي بس شون تفتحين ويا كام وميعرفج
خجلت هي وكالت
اي صحيح افتح كام على اجزاء من جسمي
لان احبه غرور ولسه احبه ومدداكدر

كتلها اووك .. عكرت مزاجي طنكرت
كالت اريد اطك وياج صور طكتلنا صور سلفي ابتسمت ابتسامه تغلف حزني وحنيني لشخص تمنيته الي بهاليوم بس هي قسمه واني مو قسمته
فاتت رفل تخزي بلبسها كلش فاضح ياعزا فضحتنا هي فستانها اصفر عاري الاكتاف مبين جزء كبير من صدرها
وهي مليانه وجسمها تارس
ريم فديتها لابسه فستان اسود شيفون قصير وربع ردن
وماما لابسه صايا زيتوني ومرصعه بالكرستال

يركصون على صوت الدجي بس لسه مو عالي ينتظرون اهل العريس يجون
دقايق وجوي طب اياد لابس قاط نيلي وجوه قميص فضي مسوي سكسوكه ويضحك اخذني وحضنت ايده وفتنا الجوه .. نمشي بالاول وهم ورانه على انغام اغنية مبروك ممبروك ياحبيب قلبي مبروك
كعدنا بالكوشه واشتغلت الاغاني وبدا الكل يركص امي وريم يباوعون ودموع الفرح بعيونهم
لبسنا الحلقات والكل يطك صور
بعدها كمنا نركص سلو اضواء القاعه صارت ملونه وشبه مظلمه حضني اياد حضنته برجفه قرب شفايفه من اذني كال احبج
خجلت منه خليت راسي على كتفه خلصنا رقص سلو امه كالت اريدج تبدلين غير هي البدله جايبتلج غيرها اني اريدج غير شكل
كتلها ماشي اخذتني ريم
للحمام طبيت ابدل .. ريم وكفتلي بالباب خاف احتاج شي تليفوني جان بيدي اريد ابدل دك بيدي
رفعت خط بدون ماادري
باوعت رقم غريب خليته على اذني
كال الوو صوت مخنوك
الووو رديت
ههه مبروك حبي الف مبروك
منو انت
هه معقوله نسيتيني صدك والله
كررررررم هذا انت ...
يتبع ..