الفصل الرابع

رواية ليلة لم تكن في الحسبان الجزء الرابع 4 بقلم ريمي ليلة لم تكن في الحسبانرواية ليلة لم تكن في الحسبان الحلقة الرابعة خرجنا من الشقة جري.. وسمعنا صوت صريخ فاني وشتايم زيزي عليه.. يستاهل والله دا كان عايز يسرقلي جوزي.. وصلنا العربية وإحنا بناخد نفسنا بصعوبة من كتر الجري!! _دلوقتي يا سيلا هنعمل إيه؟ الشمس بدأت تطلع وإحنا مصحيناش.. يعني إحنا مش بنحلم!! = معرفش والله. _خلاص تعالي نخبط على الجيران ونشوفهم!

= لا لا استنى.. البيوت كلها هنا مسكونة من الزومبي! _إيه؟؟ والناس راحت فين طيب؟! = مش عارفة!! .. لحظة.. أتاري دا مش عالمنا الحقيقي؟! _إزاي يعني مش عالمنا؟ أومال البنايات اللي شبه بناياتنا دي تبقى إيه؟! = يعني أنت محضرتش فيلم ميراكلس العوالم الموازية؟! _مش دا كرتون الخنفسة والقط الأسود بتاعها اللي أجبرتيني أتفرج عليه معاكي امبارح؟! = أولاً اسمها الدعسوقة!! والقط الأسود شريكها.. بس أيوه هو دا..

_طيب إيه جاب الفيلم لموقفنا؟! = تعال ندور على بوابة هنا ولا هنا.. أكيد موجودة في مكان ما.. ماهو مش معقول يكون كل دا حقيقة! _يلا تعالي! ​وبالفعل دورنا شوية جنب العربية وجواها.. وللأسف ملقيناش حاجة! _أهو يا ستي.. الأفلام مجرد خيال وملقيناش حاجة!! = يووه وهنعمل إيه؟! (قلتها وأنا بعيط) أنا بجد خايفة!! ليه كدا؟ أنا كنت طول الوقت بضحك وبهزر.. بس أنا من جوايا كنت ميتة من الرعب.. وقرفانة جداً من الوشوش اللي شفناهم!!

” ​فجأة سمعنا صوت الكلاب.. ” _هي الكلاب دي معندهاش حاجة تعملها غير إنها تجري وراكا؟! = اهرب يا آسر اهرب.. مش وقت الكلام دا! ” ​جرينا عكس اتجاههم.. بس شفنا مجموعة كبيرة من الزومبي.. دول تقريباً مية واحد!!! اتحاصرنا… ورايا الكلاب بتقرب.. والزومبي قدامنا هيأكلونا…. مسكت إيد آسر وقلت وأنا خلاص فقدت الأمل في الحياة وبعيط: ​= آسر أنا بحبك أوي.. وأنا آسفة على كل حاجة حصلتلك بسببي وآسفة لأني السبب في كل اللي حصل دا!!

أنا.. أنا… ​اتلخبطت في الكلام وخلاص مبقتش قادرة أنطق بأي حاجة.. فكرة إني أفقد آسر لوحدها مخوفاني!! _خلاص خلاص ولا يهمك يا حبيبتي…. اهدي.. دا مش ذنبك.. دا ذنبي أنا إني مقدرتش أحميكي! ​وشوية والزومبي بقوا محاوشينا!! قربت واحدة مني وعضتني في إيدي!!! صرخت صرخة معرفش يمكن وصلت لأستراليا!! بعدها سمعت صوت ضحكة أنا عارفاها!!! وبعدها أكتر من صوت كلهم بيضحكوا… فتحت عيوني… مشفتش حاجة إلا السواد!!

معقول أنا فقدت النظر بسبب العضة؟! _خلاص بقى يا سارة كفاية عليها كدا!! شيلي لها النظارة بقى! ​دا كان صوت آسر… إيه دا؟! كان في حاجة على عيوني اتشالت… فتحت عيوني شوية شوية لأن النور كان قوي!! لقيت قدامي آسر وسارة وسليم وكلهم بيضحكوا!! اتعصبت أوي وقلت: ​= لحظة إحنا إزاي رجعنا هنا؟؟ المكان دا فين؟؟ ما تبطلوا ضحك وتنطقوا!! ^ مش قادرة بصراحة يا سيلا دا أنتِ جامدة!!

نسيتي آسر ورحتي السوبر ماركت تشتري السناكات وقال إيه “أنا بحب طعم الخل والملح”.. (قالتها سارة وهي بتضحك) = أنتِ عرفتي إزاي؟! وأنت يا آسر ما تبطل ضحك بقى وتقولي حصل إيه!! _والله يا حبيبتي أنا مش قادر أمسك نفسي من الضحك!! دا أنتِ حكاية! = والله؟ وأنت يا سليم الزفت إيه اللي جابك هنا؟! ” من بعد إذنك أنا اسمي باشا فاني متغلطيش.. (ورجع يضحك تالي! ​وقفت أنا مبلمة وبحاول أستوعب… يعني كل دا مكنش حقيقة؟ كانوا هما؟!

​^ وأنا زيزي زومبي!! (قالتها سارة وهي بتضحك) = فهموني إيه اللي حصل!! _طيب خلاص يا شباب.. أنا هفهمك يا زوجتي العزيزة!! فاكرة لما كنا في العربية وقلتلك هنام؟! وأنتِ قلتي إيه؟ قلتي إنك مش عايزة تنامي.. بس اللي حصل إنك روحتي في النوم وأنا لسه قاعد بفكر.. شوية ولقيت عربية داخلة حتتنا وكانت عربية سليم وسارة.. كانوا جايبين النظارات دول عشان نتسلى بيهم… ​كمل سليم كلامه:

” النظارات دول يا سيلا.. اسمهم PlayStation VR2 ودول لعبة محاكاة كأنك في الواقع، اشتريناهم على أساس نلعب بيهم يوم الخميس…. بس مامت سارة رنت عليكم كتير وأنتم مرديتوش فـ قالت لنا نيجي ونتطمن عليكم. ​تابعت سارة:

^ وبعدها قلت لقرة عيني ليه مناخدش النظارات معانا… اللعبة بالليل هتكون مرعبة أكتر ومناسبة لجو الزومبي.. ووقت ما وصلنا قدام العمارة شفنا عربيتكم وأنتم قاعدين فيها… حكالنا آسر اللي حصل وقلتله ليه منعملش مقلب فيكي.. وأهو بالمرة يكون انتقم منك! = نـعـم؟! تنتقموا مني؟! أنا عملت إيه… طب إزاي خرجت برة العربية من غير ما أصحى أو أسمع أصواتكم؟

_ما أنتِ نومك تقيل يا حبيبتي، أنا شلتك ووديتك عربية سارة ورحنا بيتهم وقعدنا في الأوضة دي زي ما أنتِ شايفه وبقيتي نايمة وبتشخري كمان! = أنا نسمة مبيطلعش مني صوت وأنا نايمة احترم نفسك.. خلاص متكلمنيش تاني أنا مخصماك! _لا خلاص اهدي والله أنا آسف.. بس قلت يعني العين بالعين وأنتِ خليتيني أنزل الساعة واحدة بالليل.. وأنا أعملك مقلب صغير يعني!!! = اسكت أنت.. وأنتِ يا سارة.. يا صاحبة عمري… كدا تخونيني مع دول؟!

^ لا لا يا سيسي!! دا أنا بحبك والله.. بعدين دا أخويا ودا جوزي محدش غريب… بعدين أنتِ نسيتي أنا كنت طيبة معاكي إزاي؟ مع إن أساس اللعبة إن زيزي هتهجم عليكي أكتر من مرة عشان تأكلك! = لا والله.. كتر خيرك إنك سبتيني عايشة! ^ أيوه كدا.. خلاص افردي وشك وتلعالي نأكل! = طيب ماشي.. بس مش عشان خاطر عيونك الحلوين دول.. لأ أنا هروح معاكي عشان أنا جعانة! ^ خلاص موافقة المهم تعالي!! _وأنا يا سيلا؟ سامحتيني؟ = أنت بالذات يا آسر لأ!!

_خلاص يا حبيبتي قلبك أبيض! متبقيش قموّصة كدا!! = والله أنا قموّصة يا آسر؟ خلاص وديني بيت أهلي وإلا هنكد عليك عيشتك! _لا لا اهدي كدا واستعهدي بالله… نكدي عليا براحتك أنا معنديش مشكلة.. = أيوه كدا من الأول.. تعالي يا سارة نأكل. ​رحت مع سارة المطبخ وفضل سليم وآسر في الأوضة اللي كنا فيها. ​آسر: _منك لله يا سليم… هنام في المطبخ بسببك أنا عارف جنانها! ” الله.. وأنا مالي يا سيدي أنت اللي ما صدقت ووافقت!

_اسكت اسكت وتعال نروح ونلحق نأكل. ​رحنا المطبخ بس اتفاجأت بتفاحة جت في نص وشي: = بـرّ ا يا آسر.. ​خرجت برة المطبخ وأنا مصدوم.. لسه مستوعبتش إن التفاحة جت فيا.. سليم وقع على الأرض من كتر الضحك، وسارة اتشرقت بالأكل وسليم جري يلحقها!! ​بعدين الأمور مشيت طبيعي.. وأحب أقولكم بقالي يومين بنام في الصالة!! وباليومين دول شفت العجايب… سيلا كل ما جاتلها الفرصة تعمل فيا مقلب تخضني بيه.. معلش ما أنا أستاهل!!

​= أيوه تستاهل جداً.. ومتعملش فيها بريء عشان مش هعطف عليك! _طب وأهون عليكي كدا يا عيوني؟ = أيوه زي ما هُنت عليك يا آسرووة! _خلاص قلبك أبيض.. والنبي ضهري هيبقى زي ضهر باشا فاني… الكنبة مش مريحة خالص. ​ضحكت سيلا بعد ما افتكرت منظر العجوز. _إيه دا أنتِ ضحكتِ يبقى مسامحاني! = أيون مسامحاك.. بس مش عشان خاطر عيونك الحلوين دول ولا عشان بحبك. _يبقى عشان إيه؟ = عشان تساعدني أعمل مقلب في سارة وسليم وأخضهم!!

(قلتها بابتسامة شريرة.. ما أنا أكيد مش هسكت) _وأخيراً.. موافق يا ستي.. لو عايزة أرميهم في البحر هرميهم! = لا مش للدرجادي. _خلاص المهم تعالي نتفرج على الفيلم اللي قلتيلي عنه وقت كنا مع الزومبي! كان اسمه إيه؟ = الدعسوقة والقط الأسود. _تمام.. يلا تعالي نتفرج عليه، أنا هحضر الفشار والسناكات وأنتِ جهزيه!! = حلو أوي بحبك أوي يا آسرووة! _قلب آسوورة يا عسل!! ~~~~~~~~~~~~~~~~~~~~~~~~ تمت ..