رواية ما بين الحب وعذابه الفصل الأول 1 - بقلم حبيبة الديب

كنت قاعده بتفرج على الشاشه وانا مبسوطه بحسس على بطنى و اهمس كل شويا ل بناتي و فرحانه بيهم
كانت اختى قاعده جنبي بتتفرج على الشاشه بعد ما جوزها نزل القهوه و كانت ماسكه ابنها في أيدها كان عند سنه و كام شهر بصتلي و ابتسمت :
_اول مره تضحكي كده من ساعة اللى حصلك مبسوطالك .!
ضحكت و بعدها ابتسمتي اختفت لما افتكرت تهديد حماتي ليا :
_انا اه فرحانه بس خايفه اوي بجد
خايفه اخسرهم و ياخدوهم منى و مش هيخلوني اشوفهم تاني .!
_بصي انا في فكره في بالي بس
سكتت و بصتلي بتوتر
_بس اي ؟
_بصي اسمعي للآخر انا عارفه أن الكلام ده ممكن يبقى صعب عليكي بس انا شايفه أن ده الحل المناسب .!
_في اي يا جنه قلقتيني ؟
_حماتك كده كده هتكسب القضيه يا ريتاچ و انا مش بقولك كده عشان تقلقي و تخافي بس دي الحقيقه
دي واحده اهم حاجه عندها مصلحتها و شكل عليتها و بس
ومش هترضى تسيب لك البنات مهما عملتي .!
بصيت لها بخوف و دمعه نزلت منى غصب عني :
_طب والحل ؟ اعمل اي يا جنه؟
_بصي انا رائي انك تعرفي حماتك انك حامل في بنت و لما تولدي تاخدها و انتى تاخدي التانيه و تعيش بيها بعيد عن هنا ..!
بصيت لها بصدمه :
_انتى بتقولي اي ؟
عايزاني اسيب بنتي؟
انا مستحيل اعمل كده
فاهمه ..!
سابت ابنها على الكنبه و قعدت جنبي طبطبت عليا :
_بصي يا ريتاچ انتى دلوقتي لو عرفتيها انك حامل في بنتين تؤام أما هتاخد الاتنين عافيه أما هترفع قضيه و تاخدهم بالقانون و ساعتها قابليني لو شفتيهم في يوم .!
كلامها صح انا بحركه ممكن اخسرهم الاتنين و بحركه ممكن اخسر واحده و التانيه تفضل معايا
بس مينفعش الاتنين يفضلوا معايا
ده حلم بالنسبه لي بس
حلم مستحيل يتحقق .!
جنه كملت :
_وعلى فكره يا ريتاچ خليكي فاكره أنها هتعيش مع ابوها و جدها و جدتها و عيلتها
اكيد مش هيعملوها وحش
و هتعيش في مستوى كويس معاهم .
_انا ازاي …… ازاي هقدر اني أفضل واحده عن التانيه؟
ازاي هقدر اعيش من غير واحده فيهم؟
الاتنين بناتي
ازاي هضحي بواحدة فيهم عشان احمي التانيه؟
_انتي مضطره يا ريتاچ ..!
_بس ده … ده مش مبرر يا جنه .!
حضنتني و فضلت تطبطب عليا لحد ما هديت شويا و دخلت الاوضه اللى قاعده فيها .
الليل عدى عليا بالعافيه
كان في تقل على قلبي كنت حاسه انى ممكن يجرالي حاجه
مخي مش مبطل تفكير
خايفه اسيب نفسي للقضيه و اخسرهم الاتنين فعلاً و اندم .
هو اه خسارتهم صعب عليا اوي
بس لو واحده معايا هتهون عليا شويا
بس برضوا قلبي هيفضل محروق على بُعد واحده من بناتي عني .
قومت اتعدلت و فضلت احسس على بطني و انا بكلمهم و بعيط
و بعدها بشويا بدأت اقراء لهم قرأن و بعدها قصه قبل النوم
وانا بحكي نمت
و ايام بتعدى ورا بعضها من غير جديد و انا كل يوم بهون على نفسي انى اتكلم معاهم
عارفه انهم حاسين بيا
وسمعني كمان
كنت بقولهم قد اي انا بحبهم أوي و انى اسفه للبنت اللى هسيبها
بس طمنتها أنها هتبقى مع ابوها .!
ماجبتش سيره لحماتي انى حامل في تؤام
قولت لها انى حامل في بنت و بس كده
واللى طمني أنها فرحت اوي لما عرفت
و ده معناه أنها اكيد هتحبها
و مش هتقسى عليها لمجرد أنها بنتى .!
عدت الايام و جيه اليوم المنتظر يوم الولاده
و اول ما اتحدد اليوم ده كلمت اختي الكبيره منار و خليتها تيجي عشان اول ما اولد و اخرج من المستشفى هتاخد بنت منهم و تروح بيها أسماعليه و انا كنت هحصلها على هناك ..!
اختى جت و كانت جنبي هى و ابنها الصغير و جنه و جوزها كانوا معايا
بس كنت خايفه من اللى يحصل بعد خروجي من هنا
و قلقانه على بناتي ل يحصل ليهم حاجه
و متحمسه اوي اشوفهم
دخلت أوضة العمليات
كنت عارفه أن دعوة الحامل و هى بتولد مستجابه ف كنت بدعي من قلبي :
_يارب استرها يارب
يارب بناتي يجوا على الدنيا سالمين غانمين يارب
يارب احميهم من كل شر يارب
دموعي نزلت و كملت :
_حقي عندك يارب في كل اللى ظلموني
حقي عندك يارب في كل اللى ظلموني ..!
البنج بدء مفعوله و غبت عن الوعي .
________________
فتحت عنيا بضعف و قابلني ضوء ابيض بسيط
قفلت عيوني و فتحتها تاني و شوفت بوضوح انى في المستشفى
سمعت صوت عياط بناتي
و صوت اخواتي
بصيت لقيتهم كل واحده شيله بنت و مبسوطه بيها
_منار ….. احم منااار
بصت لي :
_حبيبتى فوقتي أخيراً؟
حمدلله على سلامتك يا قلب اختك .
نهت كلامها و هى بتبوس راسي :
_ عايزه بناتي يا منار
عايزه اشوفهم .
جنه قربت مني في أيدها بنت و منار جابت البنت التانيه .
كانوا صغيرين جدا و جُمال اوي حضنتهم وانا مبسوطه و كنت بعيط بالدموع
_الحمدلله يارب الحمدلله يارب الحمدلله يارب .
قعدت احمد ربنا و احضن فيهم ،بصيت لمنار :
_حد أذن في ودنهم ولا لسه !
جنه قالت بابتسامه :
_ أحمد أذن لهم ماتقلقيش
وكمان دكتور الاطفال شافهم و كويسين
_انا بقالي قد اي نايمه كده؟
_حوالي 10 ساعات كده
الاول كنتي بتبرطمي بمفعول البنج بس بعدها صرختي و قولتي محدش ياخد بناتي سيبوهم الدكتوره اضطرت تديكي نسبه بسيطه مهدئ ف نمتي تاني .!
قربت منى و حسست على شعري :
_انتى كويسه دلوقتي؟
_اه الحمد لله ، اديني بس البنات ارضعهم و اشوفهم لو محتجين حاجه !
_حاضر يا حبيبتي خدي بس خلي بالك واحده واحده ..!
اتكلم آدم ابن منار :
_هتسميهم اي ياخالتوا؟
بصيت له و افتكرت لما عرفت اني حامل و كنت أنا و عمر بنقي هنسمي اي لو بنت و هنسمي اي لو ولد .
_ لو ولد هسميه عمرو عشان يبقى اسمه عمرو عمر
بصلي و كشر ملامحه :
_اي العك ده ياحبيبتي ؟
عمرو عمر اي بس؟
_عك اي بس ايش فهمك انت؟
_طب سيبك من الولد لو بنت نسمي اي؟
_نفسي اسمي ريتال عشان كان نفسي يبقى اسمي ريتال مش ريتاچ ..!
باسني من خدي و حضن كتفي و هو قاعد جنبي على الكنبه :
_بس اسمك جميل ياروحي وانا بحبه اوي بس بحبك انتى اكتر ..!
ابتسمت و دخلت جوا حضنه :
_طب وانت؟
نفسك تبقى بنتك اسمها اي؟
_كان نفسي اسمي تالين اوي بس خلاص بقى ..!
بصيت له :
_خلاص اي؟
_ لو بنت هسميها ريتال حلو ريتال بس هدلعها ريتاچ برضوا ..!
فوقت على

صوت جنه و هى بتتكلم بابتسامة :
_ريتاچ كان نفسها تسمي ريتال صح يا روتي؟
ابتسمت و هزيت راسي :
_اه هسميها ريتال
اتكلم آدم :
_واو حلو اسمها او يا خالتوا ، طب و التانيه ؟
بصيت للتانيه و دي كانت في ايد منار ، اديت ريتال ل جنه و خدت بنتي التانيه و حضنتها اوي و دموعي نزلت :
_مش هينفع اسميها يا آدم ..!
سألني ببراءة و بطفوله : ليه هى مش بنتك. و بتاعتك سميها ..!
الإنسان بطبيعته لما بيكتم جواه بينفجر على حاجه تافهه و حاجه بسيطه
و رغم أن آدم طفل و اتكلم ببراءة بس انا انفجرت في العياط
حضنت بنتي و كنت بشم فيها بلهفه و كنت بحاول اشبع منها .
عيط بقهر مش عارفه اعمل اي للحظه كنت هرجع في كلامي واللى يحصل يحصل بس رجعت افكر تاني بعقل و انى مينفعش اتخلى عن الاتنين بسهوله ..!
منار خرجت آدم برا يقف مع أحمد جوز جنه و فضلت تهدي فيا و انا بصيت للبنتين اللى بدؤه يعيطوا و قلت ل منار و انا خلاص خدت قراري :
_منار انا قررت انى ارجع ل عمر
تفتكروا ريتاچ ممكن ترجع ل عمر؟