رواية ما بين الحب وعذابه الفصل الرابع 4 - بقلم حبيبة الديب

_وحشتينى اوي يا ماما
وحشتينى
و مش ناسي عمر الكيلاني عمل معاكي اي
مش ناسي لما طلقك و رماكي
وانتى كنتي بتحبيه
و اترجتيه بس هو طلقك
و ضربك
لسه فاكر في وقت مرضك كنتى عامله ازاي و بتتمنى يجيي يشوفك بس هو مجاش
و اتخلى عنك ..!
بس اوعدك اني مش هسكت ..!
اوعدك ان كل دمعه نزلت منك قهر
هنزلها من عيون بنته بمليون
انا هخليه يتقهر عليها زي ما قهرك ..!
تالين نادت عليه :
_رحيم تعالى شوف ده ..!
قفل الفون و راحلها و رسم ابتسامه مصطنعه على وشه :
_هاا يا بيبى ورينى
اي الجمال ده ..!
_بجد عجبك؟
و عجبني انا كمان حلو اوي و مميز خلاص انا هاخده اي رايك؟
_اللى تحبيه ياروحي .
بصت للبنت و قالتلها :
_اوكيه انا خلاص هاخد ده تمام ..؟
بعد ما خلصوا ركبوا العربيه و كانوا هيمشوا بس رحيم جاله تليفون بصلها و اتكلم :
_هرد و اجيلك
_ تمام مستنيه ..!
راح بعيد و بدء يتكلم و هو عينه عليها :
_الو
_رحيم بيه انا عرفت مكان امها .
_طب كويس عايزك تراقبها كويس جدا و تعرفلي عايشه فين و مع مين و يومها عامل ازاي
تمام؟
_تحت أمر حضرتك .
قفل و راح لها وهي كانت بتظبط الميكب بتاعها .
_هتوصلني الفيلا ولا نخرج ؟
_انا تعبان و مش قادر اروح في حته خالص هروحك و اروح انا عشان عايز انام .
_اوك بيبي سلامتك ..!
روحها الفيلا و بعدين مشي و اول ما وصل فيلته لقى صاحبه قاعد مستنيه هناك و بيهز رجله بعصبيه :
_ياسين باشا منور ..!
_كنت فين يا رحيم انا هتجنن و اوصلك ؟
قعد قصاده و اتكلم بهدوء :
_ انا قدامك اهو يا سيدي عايز اي ؟
و صح عملت اللى طلبته منك ولا لسه ؟
_طلبته اي انت هتجنني؟
انت عايزني اجيب لك بنت تتجوزها أو تمثل انك اتجوزتها على تالين؟
طب هى اي ذنبها ؟
_والله ذنبها أنها حفيدة عيلة الكيلاني الوحيده
و ذنبها أن ابوها عمر الكيلاني اللى مش هيهدالي بال غير وانا شايفه مقهور على بنته ..!
_طب و هى ذنبها اي ف اللى ابوها عمله مع امك يا رحيم؟
قام و اتكلم بعصبية :
_وانا أمي ذنبها اي يهينها و يطلقها بالطريقة دي ؟
ده طردها من الفيلا قدام عيني
كنت لسه صغير
طفل عنده خمس سنين و مش فاهم حاجه
بس عمري ما هنسى اللى حصل أبداً
و أنها فضلت بتحبه و عايزاه لحد ما ماتت ..!
صحبه راح له و حاول يهديه :
_طب استهدى بالله يا رحيم كده و أهدى
انت ممكن تسيبها من دلوقتي بدل ماتتجوزها و تتجوز عليها
و تقهرها كده ..!
_لأ انا مش هتجوزها اصلا
انا هجيب لها امها يوم الفرح
و هعرفها أن امها مامتتش زي ماهى فاكره
هعرفها أنها سابتها و هى صغيره
و اتخلت عنها
و في عز صدمتها هسيبها يوم الفرح
و تاني يوم هتجوز واحده تانيه قدمها ..!
ياسين بص له :
_هو انت بتهزر يا رحيم؟
هى بنات الناس لعبه عشان تعمل معاهم كده؟
انا هروح دلوقتي ل تالين و ابوها و هعرفهم انت ناوي على اي ..!
_يعنى هتسيب صاحبك عشانها؟
_انا بمنع الغلط من أنه يحصل يا رحيم ..!
ياسين خرج قدامه و رحيم قام وقف و مسح على راسه بتعب و راح و راه :
_طب استنى يا ياسين عايزك ..!
_عايز اي تاني ؟
رحيم راح وقف قدامه و شاور براسه للحرس و هما مسكوا ياسين :
_اسف يا ياسين
مش هخليك تهد ده كله في لحظة تهور ..!
اتنين من رجالة رحيم مسكوا ياسين و ياسين اتكلم بعصبية و هو متكتف :
_ خليهم سيبوني يا رحيم متهزرش ..!
_طلعوه فوق و احبسه في أوضه و خليكوا جنبه على طول عشان ميهربش
و حطوله اكل عادي تمام ؟
_تحت أمرك يا رحيم بيه ..!
_رحيم رحيم خد يلااا
يارحيم ماتهزرش
يا رحيييم و حيات امي ماهسيبك بقا كده يا رحيم ..!
صوته اختفى لما طلعوا بيه فوق .
_________________
_ ريتال يا ريتال
_نعم يا ماما ؟
_البسي الاسدال بتاعك عشان خالتك كلمت آدم ينزل يتغدى معانا و هو نازل دلوقتي ..!
_حاضر يا ماما قايمه اهو ..!
قومت لبست الاسدال و لفيت الطرحه سمعت صوت الباب و هو بيخبط و صوت آدم طلعت له برا و حطينا الغدى و بدءنا ناكل و هو كان كل شويا عينه تجيي عليا و انا بتوتر اوي ..!
خالتي اتكلمت و هى باصاله :
_هو قسط العربيه هيخلص امتى يا آدم؟
_كام شهر كده يا ماما و يخلص إن شاء الله..!
_طب شد حيلك كده يا بنى عايزين نفرح بيك .
بصلي و ابتسم :
_قريب يا ماما بأذن الله ..!
_ طب انا هقوم اعمل
شاي حد عايز؟
ماما بصت لي و اتكلمت :
_كملي أكلك يا حبيبتي .
_لا انا الحمد لله شعبت ..!
_طب اعمليلي معاكي شاي يا روتي
_حاضر يا خالتي
اتكلم آدم :
_و انا كمان اعملي حسابي
مشيت و روحت المطبخ و اتكلمت وانا ماشيه :
_حاااضر ..!
دخلت و بدءت اعمل الشاي لقيته دخل المطبخ :
_عايز اي يا آدم؟
_نتكلم
_لأ ماما بتزعقلي لما ببقى معاك لوحدينا
تعالى برا و نتكلم قدمهم
اطلع برا بقا ..!
_استني بس عايزك في حوار
و كده كده امي و امك في البلكونه برا
قولتله و انا بصب الشاي :
_ طب أنجز عايز اي؟
_الدكتور اللى اتكلم معاكي ده عملتي معاه اي؟
_لسه هقول ل ماما ..!
_تقولي لها أي معلش؟
بصيت له بضيق :
_هقول لها أنه متقدم لي يا آدم
ماهو كل شويا بيزن عليا و عايز ميعاد
ف معرفتش أقوله اي ؟
_يعني انتى موافقة؟
_اللى تشوفه ماما يا آدم
قولت كلامي و مسكت الصينيه و لسه همشي بس هو وقف قصادي :
_ريتال انتى بتحبيه؟
عيوني وسعت و بصيت له بصدمه :
_احب مين يا آدم ؟انت اتجننت ولا اي ؟
_اومال موافقه عليه ليه؟
_عشان شايفه مناسب يا آدم
_طب وانا مش مناسب؟
بصيت له و قولت بتوتر :
_انت انت بتقول اي يا آدم ؟
بصلي لحظه و خرج من المطبخ
و بعدها روحت البلكونه عشان اديهم الشاي و كان آدم قاعد قصاد ماما
حطيت الشاي و قعدت جنب ماما و انا ببص للشارع قدامي بتوتر
و آدم اتكلم مع ماما و عيوني عليا
:خالتي انا بحب ريتال و عايز اخطبها .!
بصيت ليه بتفاجئ و ماما اتكلمت بجديه :
_و احنا بنطلب بنات الناس كده يا آدم؟
بصيت لي و اتكلمت :
_ادخلي انتي يا روتي اوضتك و لما انادي عليكي تطلعي ..!
_حاضر يا ماما
انا خرجت و

هما اتكلموا و خالتي كانت ساكته و بتشرب الشاي و هى مبتسمه و ساكته .
ماما اتكلمت :
_هاا يا آدم
مش المفروض تكلم عمامك و يجوا يطلبوا أيدها ولا اي ؟!
ساكته ليه يا منار؟
_هتكلم اقول اي وانا اخر من يعلم أن البيه عايز يخطب
مش المفروض تقولي ياولا ؟!
_ياجدعان متصعبوهاش عليا البت جايلها عريس و قال اي هتقول لماما ولو وفقت هوافق
أصله مناسب و كلام من اللى يحرق الدم ده
و انا عايز اخطبها دلوقتي
و الشقه فوق متوضبه و اللى هى عايزه تغيره فيه تغيره
و العفش نجيبه براحتنا
و فلوس جهزها حضرتك محوشاها
و لو على عمامي هعرفهم و هاجي اطلبها رسمي اي رايك؟!
ده اخر حاجه سمعتها و انا واقفه قدام أوضتي و بعدها دخلت الاوضه و قفلت الباب ورايا و انا مش مصدقه اللى بسمعه
يعني آدم بيحبني و هيطلبني من ماما؟!
و حركتي المعتاده لما بفرح قعدت اطنطت على السرير من الفرحه
و بعد دقايق كانت ماما بتخبط على أوضتي و دخلت :
_ممكن اعرف اي حوار العريس اللى كان متقدملك و مقولتليش عليه ده ؟
_كنت هقولك على فكره بس آدم الفتان سبقني ..!
_طب و آدم عرف منين؟
يوميها لما عدى عليا و هو مروح من الشغل و شافه واقف معايا و سألني عنه ف قولت له أنه دكتور زميل ليا في الجامعه و أنه متقدم لي و كده ..!
_طب انتى اي رأيك؟
يعنى شايفه مين مناسب ليكي اكتر ؟
آدم ولا الدكتور ده؟
نزلت راسي و قولت :
_اللى تشوفيه يا ماما
رفعتلي راسي و اتكلمت بحنيه :
_اللى تشوفيه انتى يا قلب ماما .!
_يبقى آدم .!
_بتحبيه ؟
سكتت و اتحرجت اقولها اه بحبه و هي فهمت سكوتي و اتكلمت :
_متتكسفيش منى يا روتي انا مامتك
يعنى مكان الفضفضه بتاعك ..!
_اه يا ماما بحبه
حضنتني بحب :
_كبرتي يا ريتال
كبرتي يا حبيبتى و هتبقي اجمل عروسه ..!
آدم عمامه جايين بعد بكرا هيطلبوكي مني و الخطوبه هتتحدد بعد اسبوعين إن شاء الله ..!
_________________
اللهم صلي وسلم وبارك على سيدنا محمد
_________________
تاني يوم
رحيم كان فى عربيته و في طريقه للشركه و تلفونه رن
_الو؟
_رحيم بيه في حاجه مهمه لازم تعرفها ..!
_حاجة اي ؟
_هبعت الصوره لحضرتك شوفها
_تمام
قفل معاه و ركن على جنب
مسك التليفون و شاف الصوره اللى اتبعتت له
و اللى كانت صورة ريتال و هى نازله من البيت
بص للصوره بصدمه
و الراجل بعت له ماسدج تانيه
﴿دي ريتال عمر الكيلاني أخت تالين التؤام﴾
رحيم ابتسم و بعدها رن على الراجل اللى بعته يراقبها :
_انا عايزك تبعت لي كل المعلومات عنها هى و امها
و عايز اعرف عمر يعرف أن ليه بنت تاني ولا لأ ..!
قفل معاه و ابتسم و اتكلم مع نفسه :
_كده اللعبه هتحلو اوي يا عمر يا كيلاني
انا هدمر حياة بناتك الاتنين
مش واحده بس ..!