رواية ما بين الحب وعذابه الفصل الثالث 3 - بقلم حبيبة الديب

_ منار انا قررت انى ارجع ل عمر ..!
صرخت فيا بصدمه :
_انتى اتجننتي؟
بعد اللى عمله فيكي؟
ازاي هتقبلي على نفسك كده ..!
عيطت بضعف و بصيت لها :
_عشان بناتي !
انا هقبل على نفسي اي حاجه بس افضل جنبهم هما الاتنين
مش هبعدهم عني
و مش هحرمهم من بعض
و مش عايزه واحده تبقى من غير ام و التانيه من غير اب .
بصتلي و اتنهدت بعدها خدتني في حضنها و طبطبت عليا :
_طب و حماتك اكيد مش هتسكت ..!
_ميهمنيش حد المهم بناتي و بس ..!
_طب اهدي ياحبيبتي لما نخرج من هنا نبقى نشوف الحوار ده ..!
عدى تلت ايام و خرجت من المستشفى و لما حماتي كانت بتتصل كانت جنه بترد عليها و تقولها نايمه و حماتي بتصدق عشان فاكره انى بنام كتير بسبب الحمل ..!
كنت في الاوضه بغير للبنات و بفكر هعمل اي لازم اسميهمو اوديهم التطعيم و لسه محتاره ارجع ل عمر ولا لأ ..!
الباب خبط و منار دخلت و بعدها جنه
كانوا بيبصوا لبعض و جنه بتشاور لها بدماغه “لأ”
بصيت ليهم :
_ في أي مالكوا ؟
اتكلمت منار :
_في حاجه مهمه لازم تعرفيها ..!
جنه شاورت لها :
_خلاص يا منار مش لازم تعرف ..!
_ لا لازم بصي يا ريتاچ
بصي عمر اللى كنتي عايزه ترجعيله ..!
مسكت التلفون منها و شوفت صوره ل عمر كان ببدله و جنبه ساره بنت خاله بفستان الفرح و كانت دي الصوره اللى اعلن بيها جوازه منها ..!
اتكلمت منار بعصبيه :
_هو ده اللى هيطلقها يا ريتاچ؟
ده بيضحك عليكي يابنتي ..!
قعدت على السرير و خدت بناتي في حضني و كنت ساكته
اتكلمت منار :
_انا رائي تكلمي حماتك تيجي تخدها و انا بكرا الصبح او ممكن دلوقتي أخد ريتال و أمشي و يبقي تعليلي على البيت و نستقر هناك
و كده كده عمر و عيلته ميعرفوش عنوان بيتي و مش هيجوا في بالهم خالص ..!
قعدت افكر في الموضوع بشكل جدي
ماهو لو مطلقهاش مش هيرجعني و ده مش عشان انا هرفض لأ ده عشان حماتي هترفض
و هو بيمشى وراها
و خصوصاً لما بتهدده او تمسكه من أيده اللى بتوجعه
انا فاكره أن قبل جوازنا أصلا ساره بنت خاله دي كانت متجوزه
بس جوزها اتوفي بعد جوازهم بسنتين و دلوقتي معاها ولد اسمه رحيم عنده تلت سنين
ف اكيد لو عمر حتى بيحبها كان اتجوزها أما قبل ما تتجوز أو بعد ما جوزها مات
لكن اتجوز بعد فرحنا باسبوع و ده دليل أن أمه و أبوه هددوه
اكيد عشان ساره ورثت بعد موت جوزها و بقت أغنى من عمر نفسه
وده اللى خلى حماتي تصر أن عمر يتجوزها في الوقت ده ..!
ف مهما يحصل أظن انى مستحيل ارجع
و لو طلبت انى ارجع
و هنت نفسي و كرمتي ساعتها هتهيني
و تاخد البنتين
و تبعدهم عني ..!
بصيت ل منار و اتنهدت :
_الساعه لسه ٦ لو ينفع تخدي ريتال و تسافري بيها يبقى ياريت .!
بصت للبنتين وقالت بحيره :
_ انى واحده فيهم ؟
اتنهدت بحزن :
_ معرفش خدي اي واحده
أصلاً الاتنين عندي غاليين بس مضطره ..!
جنه حضنتنى و منار شالت بنت منهم و لسه هتمشي :
_ استنى يا منار ثواني
قومت و انا حاطه ايدي على بطني بتعب و خدت منها ريتال و حضنتها و بوستها :
_خلي بالك منها يا منار بالله عليكي !
_ياحبيبتى دي بنتي اللى بتوصيني عليها دي ماتقلقيش .!
خدت ريتال و مشيت و جنه كلمت حماتي .
حماتي جت و خدت البنت و سألتني ليه مقولتش في وقتها و قولتلها أن ولدت فجأة و الموضوع جيه بسرعه و لسه خارجه من المستشفى .
كانت قاعده على الكنبه و انا قاعده قصادها بتعب
و كان باين عليها الفرحه و هى بتلاعب اول حفيده ليها
_ممكن لو سمحتي اطلب منك طلب؟
بس انسى اني ريتاچ اللى مش بتحبيها ..!
_عايزه اي؟
دموعي نزلت و مسحتها بسرعه :
_عايزاكي تخلي بالك منها و تحافظي عليها كويس
افتكري أنها بنت ابنك
و متخليش كرهك ليا يأثر على علاقتها بيكي
لو …. لو مرات ابوها عملتها وحش ادخلي انتى ارجوكي
مهما كان هى مش هتفضل امها على طول ..!
ملامحها لانت شويا :
_انا فهماكي و حاسه بمشاعرك بس صدقيني ده الأفضل ليها و ل ابني
انا برضوا ام و عارفه اي الأنسب ل ابني ..!
قامت من مكانها و ناولتني شنطه كبيره :
_متقلقيش حفيدتي في عنيا
خدي الفلوس دي و ابعدي عن هنا
افتحيلك مشروع أو…..
قطعتها بصراخ و غضب :
_أو اي ؟
انتى عايزاني ابيع بنتي بفلوس؟
خليلك فلوسك و لو على البُعد ف متقلقوش انا ماشيه من هنا
و مش هتشوفي وشي تاني
ولا انتى
ولا حتى عمر ..!
________________
و بعد اسبوع روحت ل منار و فضلت انا قاعده ب آدم و ريتال و هي تنزل شغل
استقريت على العيشه هناك بس الغريبه أن بعد شهر من وجودي عند منار
عمر طلق ساره
اتصدمت و مفهمتش حصل اي بس كل اللى كنت مهتمه اعرفه هو تالين وبس بنتي اللى كنت واثقه أنه هيسميها كده
كان فرحان بيها و بينزل صورها على طول
خمنت أن اكيد ساره مرضتش تربي بنتي ف عمر طلقها ..!
و عدت سنين و كنت أنا و منار شايلين البيت
و مستقرين في حياتنا آدم و ريتال بيكبروا قصاد عنينا و تالين اللى بقت دايره الشركة مع ابوها
كنت بشوفها على طول و متابعه البيدج بتاعتها على طول ..!
عدى ٢٥سنه على بُعد تالين عني
نفسي أشوفها اوي و أضمها ليا و اعرفها انى امها
و ان ليها أخت
حتى ريتال متعرفش ان ليها أخت
انا حكيت ليها على اللى ابوها عمله معايا
و قولتلها انى هربت منه
بس ماقولتش انى سيبت اختها هناك ..!
******************
قومت روحت الشغل انا و منار كنا شغاليين في مصنع ملابس مع بعض و آدم محاسب في شركه
أما ريتال ف هي اتخرجت و بقت معيده في الجامعه
و تالين اللى متبعاها على طول اتخرجت و مسكت إدارة الشركه مع عمر و رحيم ابن ساره اللى ماتت بمرض من خمس سنين
بس قبل ما كانت تطلق من عمر كانوا عملوا عقد شراكه
ف رحيم ابنها هو الوريث الوحيد ليها ..!
و اللى عرفتوا عن تالين أنها مخطوبه ل رحيم من تلت شهور و فرحهم بعد اسبوعين
شوفت فيديوهات و صور خطوبتهم سوا و فرحتلها اوي من كل قلبي
و كنت بتمنى اكون معاها في يوم زي ده
كنت خايفه تكون اتخطبت ل رحيم عشان مجرد شراكه وبس
بس من الفيديوهات

اللى بتنزلها و بيبان فيها انها بتحبه اطمنت شويا
أنه برضاها و مش مغصوبه على حاجه ..!
و اتمنيت أنه يكون كويس ليها
و الزوج الصالح و المناسب ليها ..!
من سنتين ابو عمر عمل حادثة
و كان في غيبوبهو فاق بعدها بفتره و هو دلوقتي مشلول و مش بيتحرك خالص
ولا بيقوم من الكرسي المتحرك بتاعه
عمري ما شمت في ولا في مرضه
هو ما ظلمننيش بس سكت على الظلم اللى اتظلمته
و مفكرش يدخل في أنه يخلي بنتي معايا
وكان عارف أن عمر اتجوز عليا
سكت كتير على ظلم حصل في الفيلا هناك
بس ربنا جزاه على أعماله ..!
لكن مراته ؟
لسه حقي منها مجاش
وانا سايبه حقي ربنا يجيبهولي ..!
بعد الشغل انهارده روحت انا و منار نجهز الغدا مع ريتال عشان جنه و جوزها و ابنها جايين انهارده..!
و آدم كان في شغله لسه ..!
بس جيه بعد ما روحنا ب ساعه
و بعد وقت كنا بنحط الاكل على السفره
الباب خبط و ريتال اتكلمت بحماس :
_انا هفتح يا ماما ..!
و راحت تفتح و قابلتها جنه و أحمد جوزها
و ابنها اياد
و بنتها بسمه اللى اصغر من ريتال بسنه بس هي و ريتال صحاب جدا و بيحبوا بعض اوي ..!
_بسمه وحشتني وحشتني وحشتني عاااا
ضحكنا عليها و جنه بصت لها :
_مش المفروض تحضني خالتك الاول يابت؟
اي ماوحشتكيش؟
_لا طبعاً وحشاااني موت والله تعالى تعالى ..!
دخلوا جوا و اول ما آدم شاف اياد سلموا على بعض بهدوء عكسنا تماماً
قعدنا ف قال أحمد جوز جنه و هو بيبص ل بنته و بيهزر :
_شوفتي السلام بيبقى بسيط و بهدوء ازاي؟
اتكلم اياد بضحك و هو بيقلد “ورده الجزائريه” : وحشتوني وحشتوني وحشتوووووووننييي
كلوا ضحك و انا بصيت له بغيظ :
_على فكره بقا انا كنت بقول ل بسمه بس و قولت وحشتيني مش وحشتوني ؟
ما تتكلم يا آدم دافع عني اله؟
اياد ضحك و آدم مسكوا من قفاه:
_عارف ياض لو ضايقتها تاني هعمل فيك اي ؟
اياد زق ايده :
_خلاص ياعم مش هضايقها تاني
_ولا بسمه ..!
اياد قرب من ودن آدم و قاله بهمس :
_طب وأصبح و أمسى على مين في البيت؟
مسكه من قفاه تاني :
_ولاااا
_خلاص يا عم خلاص ..!
اتكلمت ريتال :
_تعالى معايا يا بسمه الاوضه في حكاوي كتير مستنياكي ..!
عدى اليوم بسلام و جنه فضلت يومين قاعده معانا عشان احنا مش بنروح القاهره خالص ف هى بتيجي كل كام شهر ..!
و حكت لي أن عمر
على طول بيسألها عليا و على طول بيروح لها
عشان يعرف انا فين بس هى مش بتقوله حاجه ..!
_________________
تاني يوم في الشركه عند تالين .
(في مكتب رحيم)
الباب خبط و دخلت تالين اللى كانت نسخه من ريتال و اتكلمت بدلع و هى بتحضنه :
_بيبى انا خلصت شغلي و جعانه اوي
تعالى نروح نتغدى سوا ..!
قفل الملف و سابه من أيده و راح حضنها و بأس خدها بلطف :
_حاضر يا روحى تحبي تتغدى فين ؟
_في مطعم تحفه فاتح جديد تعالى نروح و بعدها هنروح الاتليه عشان فستان الفرح ..!
اتكلم بضيق بس مابينش على ملامحه :
_ما تطلبيه أونلاين من باريس ياروحي لازم
نروح اتليه ؟
اتكلمت و هى بتشده ناحية الباب :
_اه لازم عشان يبقى مظبوط عليا وحلو اوي
وبعدين الاتليه اللى بروحه تصاميمه كلها جميله يلا بس ..!
راحوا اتغدوا و بعدها راحوا على الاتليه و تالين كانت بتنقى الفستان
دخلت تلبسه و بعد شويا خرجت له :
_هاا؟ اي رأيك يا بيبي حلو؟
بص لها من فوق لتحت ، الفستان كان ضيق اوي و عريان من فوق
هو راسه و اتكلم :
_حلو ده جميل جدا خديه ..!
_اخد اي؟
انا لسه هقيس كذا واحد و هاخد الاحسن ..!
دخلت تغير و تقيس واحد تاني و هو اتنهد بضيق و اتمشى شويا و مسك موبايله فتح صوره ل ساره
أمه
كان بيحسس على صورتها بابتسامه حزينه و اتنهد :
_وحشتينى اوي يا ماما
وحشتينى
و مش ناسي عمر الكيلاني عمل معاكي اي
مش ناسي لما طلقك و رماكي
وانتى كنتي بتحبيه
و اترجتيه بس هو طلقك
و ضربك
لسه فاكر في وقت مرضك كنتى عامله ازاي و بتتمنى يجيي يشوفك بس هو مجاش
و اتخلى عنك ..!
بس اوعدك اني مش هسكت ..!
اوعدك ان كل دمعه نزلت منك قهر
هنزلها من عيون بنته بمليون
انا هخليه يتقهر عليها زي ما قهرك ..!