رواية ما بين الحب وعذابه الفصل السابع 7 - بقلم حبيبة الديب

صحيت على خبط على الباب قومت و لقيت نفسي نايمه ورا الباب، ثواني و افتكرت انا فين و حصلي اي
الخبط زاد و قومت فتحت الباب اللى كان مقفول بالمفتاح
_انتى بجد كنتى نايمه؟
هو بعد اللى حصلك ده جالك نوم؟!
_هو اللى حصلي مصيبه سوده فعلاً و معرفش نمت ازاي
بس ممكن من كتر العياط على الهم اللى انا فيه
_طب هبعتلك لبس اجهزي بسرعه عشان نمشي
بصيت له و قلت بلهفه :
_هنروح ل آدم؟!
_لأ
سكتت لحظه بعدين ابتسمت و اتكلمت بسرعه :
_هنروح نطلق ؟!
_لأ هو انا اتجوزتك امبارح بليل عشان اطلقك تاني يوم الصبح؟
_بقولك اي ما انت لو مطلقتنيش هخلعك و هيبقى شكلك عره في وسط الرجاله كلها
هتبقى واحد مخلوع ياعيني
فطلقني بكرمتك ..!
قرب خطوتين و انا بعدت عنه :
_والله؟!
هبقى يا عيني راجل مخلوع و شكلي عره؟
_ءء اه ايوه طلقني بقا
_طب مانا مش هخليكي تخرجي برا الفيلا من غيري أصلا
وريني شطارتك كده و اخرجي ..!
_خلاص لو مطلقتنيش هموت نفسي و هعملك فصيحه ..!
ابتسم و اتكلم ببرود :
_يبقى كتر خيرك والله
اصل انا عايز أاذي عمر باي شكل فما بالك اني اوصل واحده من بناته للانتحار؟!
خلص كلامه و سكت بعدها قال :
_الفستان هيجيلك دلوقتي تلبسي بسرعه و تنزلي لي على تحت .
لف ضهره و لسه هيمشى اتكلمت بسرعه :
_طب على فكره بقى انا بحب آدم ابن خالتي
اللى المفروض يبقى خطيبي
هتقبل انت بقى تكون متجوز واحده بتحب حد تاني ؟!
قرب و ابتسم ببرود :
_ برضوا تخيلي كده لما تتقهري كده و ابوكي يتقهر عليكي .؟
_يوووه هو انت عبطك ده خلقة ربنا ولا اتعديت من حد؟!
قولتلك انا عمري ماشوفت ابويا ولا هو شافني ولا سأل عني عشان يا عيني يتقهر عليا .!
قرب مني و مسك ايدي جامد :
_شكلك كده لسانك واخد على الغلط اوي صح؟
سحبت ايدي منه :
_ايوه صح هتعمل اي يعني؟
طلقني و استريح احسن .!
_لأ مانا ممكن اقصلك لسانك و هستريح اكتر على فكره ..!
خلص كلامه و مشي و بعدها بشويه جت واحده من الخدم حطتلي فستان على السرير و مشيت
وانا اضطريت البسه و بعدها نزلت له تحت
كان الفستان أبيض سواريه
فستان كتب كتاب كده
نزلت و ملقتهوش بس شوفته في الجنينه و كان معاه واحد بيتكلم معاه ، روحت له :
_انا خلصت هنروح ل آدم امتى؟
شد ايدي و مشي بعيد عنه شويه و انا سحبت ايدي منه بعنف :
_انت عارف لو مسكت ايدي تاني هعمل فيك اي؟!
تجاهل كلامي و اتكلم هو :
_ده اي حوار آدم اللى عايزه تروحي له ده؟!
هى سهرايا ولا اي؟
_ايوه انا هطمن عليه لحد ما يبقى كويس و تسيبه في حاله و بعدين يطلقني منك ..!
_احنا رايحين بيت أهلك الاول ه…..
قاطعته بلهفه :
_هروح ل ماما؟
_لأ ل ابوكي و بالمناسبه انا متابع اخبارهم
امك دلوقتي هناك في بيت عمر الكيلاني هى و خالتك و آدم بتاعك ده ..!
لسه هتكلم لقيته مشي راح الراجل اللي كان بيتكلم معاه و كان الراجل ده معاه مساعدين و كاميرا
شاور لي من بعيد:
_تعالي
روحت له و لقيت وقف جنبي و المصور رجع ل ورا و بيشاور له و هو بيتكلم :
_اقف وراها و احضنها و بصلها و ابتسم و هى كمان تبصلك ..!
بس ركزوا في عيون بعض أوي ..!
لسه مش مستوعبه الكلام لقيه وقف ورايا و قبل ما يلمسني بعدت عنه بسرعه و اتكلمت بعصبيه :
_اقسم بالله لو قربت مني ولا لمستني ل اصوت وألم عليكوا أمة لا إله إلا الله
هفضحكوا كلكوا
محدش يقرب مني انا مش هتزفت و اتصور اصلا
المصور و اللى معاه بصولي بدهشه و هو ملس على وشه و بصلي بنفاذ صبر بعدها قرب مني كام خطوه و انا رجعت لورا و خليت مسافه بينا :
_ممكن افهم اي اللى بتعمليه ده؟
_لو مش عجبك طلقنى
_طب احنا لازم نتصور لو حتى صوره واحده نعلن بيها جوازنا ممكن؟
_لأ طلقني على طول وريح نفسك لسه هتعلن و تتنيل
بُص انت لو طلقتني تاني يوم كتب كتاب كده هتقهر ابويا اكتر مش ده اللى انت عايزه ؟
_لأ
انا عارف انا بعمل اي ملكيش دعوه انتى
قلت بنفاذ صبر :
_يعنى عايز نتصور؟
_ياريت
_ماشي بس يكون فيه مسافه
و متلمسنيش ولا حتى تمسك ايدي ..!
_و انا لازم اسمع كلامك يعني؟
_يعنى واحد زيك فيه كل العبر متزودش عليهم انك تلمسني غصب كمان ..!
_هو انا بتهزق صح
_صح انا واحده قليقة ادب و لساني متبري مني ف ياريت تطلقني بقى .
ابتسم ببرود :
_ لأ انا عاجبني كده ملكيش دعوه .!
بصيت الناحيه التانيه و همست لنفسي :
_انما واحد مهزق بصحيح .!
_بتقولي حاجه؟
_لأ .!
_طب تعالي نتصور و متخافيش مش هلمسك انتى مش زوقي أصلا ..!
اتكلمت و انا برجع اقف مكاني :
_عارفه اكيد زوقك عره ف مش هيعجبك العجب .
مردش عليا و جيه وقف جنبي و في مسافه بسيطه
اتكلم المصور :
_معلش لو مش هزعج حضرتك بس ممكن ابتسامه ولو بسيطه .!
_لأ
رحيم بصلي بعدها بصله و شارو ليه يصور عادي
اتصورنا على الهيئه دي و بعدها دخلت جوا لما حسيت بدوخه
و هو وقف مع المصور :
_عدل الصور بقى انت بطريقتك و خليها طبيعيه تمام؟
_هحاول على قد ماقدر .!
_و ياريت تخلصها انهارده في حدود ساعه ولا اتنين كده ..!
خلص كلامه و دخل جوا لقاني قاعده على الكنبه و سانده راسي ب ايدي الاتنين و كنت حابسه دموعي :
_يلا
_مش عايزه اروح ..!
_هو بمزاجك ولا اي؟
رفعت راسي و غصب عنى دمعه نزلت منى و مسحتها بسرعه :
_لو سمحت انا فعلاً مش جاهزه أقابله فعلاً
و مش متقبله اني اشوفه خالص
ياما كنت محتاجه في حياتي وهو مكنش موجود
لا وكمان طلع ليا أخت و انا معرفش
خدت كل حنانه و طيبه لكن أنا لأ
حرمني منه و حسسني اني يتيمه و هو عايش ..!
قعد قصادي على الكنبه و كان هيتكلم بس كان باين عليه التردد
سكت شويا
بعدها اتنهد و اتكلم :
_بصي واحد زي عمر ده ولا هبقى عايز ابرر له ولا بطيقه أصلاً بس هو فعلاً مكنش يعرف بيكي
امك اللى خبت عليه أنها ولدت في تؤام سابت له تالين و خدتك انتى
و هو لو يعرف بيكي مكنش سابك انتى كمان يعني اللى المفروض يزعل بجد تالين عشان امها سابتها برضاها و بعدت عنها
و زي مانتى اتحرمتي

من ابوكي
هى كمان اتحرمت من امها و حنان امها و عاشت من غير أم
و أظن ده اسوء شعور
فقدان الأم
و مع ذالك أمها عايشه و هى حست بالشعور ده و ده كان بمزاج امك ساعتها ..!
كلامه هداني شويا و ارتحت كتير بس أضايقت على تالين
اه عمري ماشوفتها ولا عرفتها
بس اكيد هى هتتقهر اكتر و خصوصاً لما تعرف أن ماما سابتها برضاها
انا مش عارفه هى عملت معاها كده ليه بس زعلانه عليها اوي ،
قومت وقفت و مسحت دموعي :
_انا عايزه أشوف تالين عايزه اروح لها اكيد هتبقى محتاجالي
صح؟
سكت شويا و لاول مره اشوف التوتر باين عليه
بس مره واحده الجمود رجع له تاني و مشي و انا مشيت وراه
و ركبت العربيه ورا و هو قدام و المره دي معلقش ..
_________________
سبحان الله وبحمده سبحان الله العظيم
_________________
في فيلة عمر كانت ريتاچ قاعده بتوتر و جنبها جنه و منار و آدم و أحمد و اياد
و قاعده قصادها حماتها بتبص لهم بتكبر و غيظ ، و كنت قاعده بفتكر اللى حصل من كام ساعه
لما آدم رن عليا :
_الو يا آدم ؟
_خالتي انتى لازم تيجي حالاً و جيبي بطاقة ريتال و ورقها اللى يثبت أنها بنت عمي عمر عشان يصدق انها بنته و يلحقها ..!
_بس ريتال كانت واخده بطاقتها معاها يا آدم .!
_خلاص كلمي امي قولي لها تيجي و تجيب معاها شهادة ميلادها طيب أو اي حاجة تثبت انها بنته
عشان يلحقها .!
استغربت و قلت :
_ اثبت انها بنته عشان يلحقها؟
هو اللى قال كده؟
_لأ أمه
احم و عايز اعرفك أن بنته منهاره ، طلعوا معرفينها انك اتوفيتي و انتى بتولديها ..!
ف اتصدمت انك طلعتي عايشه و اتصدمت اكتر انك يوم ما ظهرتي ظهرتي عشان اختها و بس ..!
_طب انا هاجي مع منار دلوقتي يا آدم
جايه أشوفها ..!
افتكرت لما جيت مع جنه و جوزها و منار،
كانت انتصار ام عمر هى اللى موجوده و عمر راح يكلم معارفه و راح القسم
مكنش اتاكد لسه انها بنته و مع ذالك راح يدور عليها
عكس أمه اللى اول ما شفتني خدت شهادة الميلاد و صوره ل بطاقه ريتال عشان تتأكد اكتر
بس تالين ماشوفتهاش خالص و اللى عرفته من آدم أنها حابسه نفسها في الاوضه من ساعتها .
انتصار بصت لي بغيظ و اتكلمت ل اول مره من ساعة ما جيت :
_انا مش عارفه قلبك طاوعك ازاي انك تبعدي الاختين عن بعض؟
و بعدتي حفيدتي عني و عن عيلتها و ابوها ..!
اتكلمت بعصبية و قهر :
_انا اللى مش عارفه انتى اللى ازاي جالك قلب تخدي بنتي مني بالعافيه و تعرفيها اني ميته ؟
و بسببك أضطريت أبعد الاختين عن بعض .!
ابنك غلط و انا و بناتي اتحملنا أخطأنا
و انا متأكدة أن ريتال دلوقتي مخطوفه بسبب عمر
اكيد حد تبع الشركات المنافسة ولا حد عدو العيله
انتو السبب في اللى بيحصل ل بناتي ..!
اتكلمت بثبات و نبره تقيله :
_ريتال حفيدة عيلة الكيلاني هترجع متقلقيش ..!
حسيت انها بتلمح أنهم هياخدوا ريتال مني و قبل ما اتكلم كان آدم رد عليها :
_ايوه ريتال بنت خالتي و خطيبتي هترجع لنا إن شاء الله ..!
بصت له من فوق ل تحت و اتكلمت :
_ خطيبتك انت؟!
اكيد لما ترجع ل بيتها في وسط أهلها هتفهم أن اختيارها كان غلط .!
آدم بص لها بغيظ بس قبل ما حد يتكلم كانوا سمعوا صوت الجرز بيرن ..!
كلو قام وقف ب انتباه على أساس أن عمر جيه و روحنا اتجاه الباب بس لقينا واحد داخل و ريتال ماشيه جنبه..!
جرينا كلنا على ريتال نطمن عليها
و انتصار راحت للشاب و ابتسمت :
_رحيم انت اللى لقيت حفيدتي صح؟
أكيد عمر قالك و انت لقيتها بسرعه و جبتها
كتر خيرك يا بنى بس اطلع ل تالين اطمن عليها عشان منهاره فوق ..!
ريتال كانت بتسلم عليا و في عينها باين الحزن و حاسه انها زعلانه مني
بس كانت بتبص ل آدم ب اشتياق و خوف في نفس الوقت
مفهمتش مالها بس اول ما جت سيرة تالين بصت ل انتصار :
_انا عايزه أشوفها
ممكن ؟
انتصار ابتسمت و بصت ل وشها شويا و بعدها راحت تحضنها :
_سبحان الله و كأن تالين هى اللى قدامي
تعالى يا حبيبتي في حضني انا جدتك
مامت عمر أبوكي ..!
بصت لها بتردد و حضنتها بعدها بصت ل رحيم و بصت ل انتصار تاني :
_ممكن اطلع لها ؟!
_اه طبعاً اطلعي يا حبيبتي دي اختك روحي شوفيها عشان مصدومه من امها لحد دلوقتي ..!
طلعت ريتال و رحيم اتكلم :
_انا كمان هروح أشوفها معاها ..!
_اتفضل يابنى طبعاً .!
آدم بص ل رحيم و اتكلم :
_طب عايز اعرف لقيتها فين؟
و حصلها اي؟
و غيرت فين مكانتش لابسه كده .!؟
انتصار بصت له بعدها بصت ل رحيم :
_روح شوف خطيبك يا بنى اطلع لها ..!
رحيم طلع و انتصار كلمت عمر عشان يجيي ..!
_________________
استغفر الله العظيم و اتوب اليه
_________________
طلعت فوق بتوتر و كانت معايا واحده من الخدم وصلتني للأوضه و مشيت
خبطت على الأوضه بتردد و وصلي صوتها اللى باين عليه مخنوق من العياط :
_ سيبوني لوحدي لو سمحتوا
مش عايزه أشوف حد ..!
_ءء انا يتال اختك ..!
ثواني و الباب اتفتح عشان تظهر واحده قدامي نسخه مني بس معيطه و عيونها حمرا اوي و منفخه
فضلت باصه لي بعدم استعياب و انا كمان لحد ما لقيتها بصت ورايا و كان رحيم جيه بصت له و اتكلمت بعياط :
_رحيم ..!
راحت حضنته و رحيم عيونه كانت عليا و انا واقفه مستغربه لسه معرفش هو يقرب لهم أي أصلا
تالين اتكلمت و هو في حضنه :
_كويس انك جيت انا كنت محتجالك يا رحيم ..!
رحيم بعدها عنه بهدوء و قرب مني مسك ايدي و بص لها بثبات و قال اللى صدمها :
_دي ريتال اختك
و مراتي …!