رواية ما بين الحب وعذابه الفصل الثامن 8 - بقلم حبيبة الديب

بصت لينا بتوهان و انا حاولت اسحب ايدي منه بس هو متبت و هى اتكلمت :
_معلش مفهمتش هى مين اللى مراتك؟
_ريتال مراتي ..!
حطت أيدها الاتنين على رأسها و بصت لنا بجنون و قالت اللى صدمني :
_رحيم انت بتهزر؟
ء انا … انا تالين حبيبتك و خطيبتك
احنا فرحنا انهارده يا رحيم ..!
بصت لهم بصدمه و هنا بس فهمت خطته
يخليني اسيب آدم يوم الخطوبه
و هو يسيب تالين يوم فرحها
و يتجوز اختها
بصيت له و سبحت ايدي عنه و زقيته و اتكلمت معاه بزعيق :
_انت ازاي واطي كده؟
و ازاي قدرت تعمل كده ؟!
تالين بصت لي و زعقت :
_انتى هتستهبلي
يعني مكنتيش تعرفي أنه خطيبي
وبعدين انتى ليه ظهرتي في حياتي في الوقت ده بالذات؟
مانا طول عمري معنديش اخوات
و طول عمري عارفه أن امي ميته
ليه تظهروا دلوقتي و تبوظوا حياتي..!؟
قربت منها و حاولت أهديها :
_تالين يا حبيبتي اهدي
انا والله ماعرف
و بعدين ده اتجوزني غصب عني اصلا
زقتني جامد لدرجة انى كنت هقع بس رحيم لحقني و انا زقيته بعيد عني
و الكل طلع لينا على الصوت ده :
_ابعد عني حرام عليك انت دمرت علقتي ب اختي من قبل ماعرفها أصلا
ذنبنا اي احنا تعمل فينا كده؟
حسبي الله ونعم الوكيل فيك ..!
ماما كانت واقفة بعيد مش عارفه تواجه تالين و آدم قرب مني :
_ريتال في اي فهميني؟
بص ل رحيم :
_عملك حاجه يا ريتال؟!
تالين حطت أيدها الاتنين على راسها و بصت لنا بتوهان و وقعت مره واحده
جريت عليها انا و ماما و خالتو و جدتي ،
آدم كان فضل واقف مكانه بيبص لرحيم بشك و كان حاسس ان في مصيبه حصلت.
اياد شال تالين بسرعه و دخلها أوضتها
و الكل دخل معاه و انتصار كانت بتكلم الدكتور يجيي .
وقبل مادخل آدم مسك ايدي و منعني :
_استنى هنا انتى لازم تفهميني حصل اي
و كنتي فين كل ده ؟
اتوترت و كنت خايفة و مش عارفه اقول ايه و رحيم كان ساكت و مستمتع ب توتري و جيه وقف جنبي و مسك ايدي :
_ اي ياحبيبتي مالك اتوترتي كده ليه؟
قولي له اننا اتجوزنا عادي ..!
آدم بص لنا و بص لمسكة أيدينا و سكت لحظه و هو مصدوم و بيحاول يستوعب و انا بعدت عن رحيم و قولت بجنون :
_ماتبطل بقا هى مشاعر الناس لعبه عندك..!؟
اتكلم رحيم ببرود :
_ليه مش دي الحقيقه؟
آدم بص ل ايدي و ملقاش دبله بس شاف البصمه مسك ايدي و رفعها كأنه بيتأكد و بص ل ايد رحيم و شاف البصمه برضوا
ساب ايدي و سكت لحظه
و بصلي نظرة خذلان
نظره عمري ما هنساها
انا متخيلتش أنه يصدق بسهوله كده من غير حتى ما يسألني
ولا يعاتب خد بعضه و مشي و ساب الفيلا
انا من صدمتي في أنه صدق بسهوله كده معرفتش ابرر له حتى.!
بصيت حواليا مكنش في حد موجود
محدش مهتم بيا كلوا كان حوليها هى ..!
بصيت ل رحيم بتوهان و كانت ملامحه عاديه ولا اهتهم
بوظ علقتي ب اهلي في لحظه
بصيت له :
_ خلصت انتقامك ولا لسه..؟!
ممكن تطلقني بقى؟!
قرب كام خطوه :
_ تؤ
ده انا لسه ببداء و بقول يا هادي ..!
_انت انسان مريض
بتستمتع بأذى اللى حواليك
مريض ..!
ملامحه اتغيرت
بان عليه الغضب و العصبيه و مسك ايدي و بيشدني أمشي معاه و انا صرخت فيه :
_سيبني مش هاجي معاك تاني
سيب ايدي ..!
جت ماما و خالتي جنه و جوزها و اياد على صوتي و اتكلمت ماما و هى بتقرب مننا :
_في اي ؟
و انت ماسك أيدها كده ليه؟
سيبها .!
كانت بتتكلم معاه و هى بتحاول تفك أيده عني و رحيم اتكلم :
_سيبيها انتى
دي مراتي و انا هخدها و همشي..!
سابت اديا و بصت لي بصدمه :
_انت بتقول ايه؟
مراتك ازاي يعني؟
مش انت خطيب تالين و المفروض هتتجوزوا قريب؟!
_لأ مانا كتبت كتابي على ريتال امبارح
كنا مخططتين سوا أنها تنزل القاهره و نهرب سوا ..!
بصيت له بصدمه و زقيته :
_يا حقير يا كداب يا واطي انت ازاي كده ؟!
تجاهل كلامي و بص ل ماما و اتكلم :
_ريتال مراتي
كتب كتابنا كان امبارح
و انا هخدها و همشي و محدش هيقدر يمنعني ..!
_انتى اتجوزتيه يا ريتال؟
بصت لي من فوق لتحت و كانت بتشوف الفستان عليا
و برضوا شافت البصمه
مسكت ايدي :
_اتجوزتي يا ريتال؟
_يا ماما …..
زعقت:
_اتجوزتي؟
عيطت و بصيت للأرض و همست :
_اه
رفعت راسي بسرعه و بكمل كلامي :
_بس والله كا…..
قطعت كلامي و هى بتضربني بالقلم
و لأول مره ..!
بصيت لها بصدمه
معقول محدش مصدقني
معقول محدش عايز يسمعني حتى؟!
خلصت كلامها و دخلت ل تالين و سابتني
اتخلت عني
اه اختارتني و انا صغيره و اتخلت عن تالين
و دلوقتي جيه دوري
هتسيبني عشانها
رحيم سحبني وراه وانا المره دي استسلمت له
و مشيت معاه
استسلمت لمصيري و إلى يحصل لي
بس اللى اعرفه
هو اني عمري ما هنسى اليوم ده
ابداً ..!
أول ما وصلنا الفيلا طلعت جري على الاوضه اللى كنت قاعده فيها و قفلت الباب ب المفتاح
و قعدت وراه عيطت بحرقه و انا بفتكر اللى حصل لي كله
وان انهارده المفروض كان هيبقى احسن يوم في حياتى
زي ماكنت فاكره
و اكيد تالين كانت فاكره كده
أنه هيبقى احسن يوم في حياتها بس اللى حصل كسرها
و كسرني
بس الفرق أن الكل معاها
وانا
وحيده ..!
_________________
لا حول ولا قوه إلا بالله العلي العظيم
_________________
بليل…!
في أوضة تالين ..!
كنت نايمه على السرير و باصه قدامي في الولا حاجه
كنت سرحانه
بفتكر ايامي مع رحيم
في الاول كان زميل في الجامعه عادي
بعدين بقينا صحاب مقربين
بعدين عرفت أنه صديق للعيله و مامته كانت بنت خال بابا
علاقتنا اتطورت و بقيت اشتغل في الشركه و طلع هو شريك معانا
مسكنا الشغل سوا و عدى وقت حبيته و حبني
و اتخطبنا و في الاخر؟
اتجوز اختي؟!
طب ازاي!؟
هتخيل أنها عملت كده بمزاجها
طب و هو ؟
اكيد كان عارف انها مش انا
اسمها في البطاقه يثبت أنها مش انا
رحيم عمل كده بمزاجه
بس ليه؟
معرفش ..!
قومت دخلت على البلكونة اشم هوا
وقفت شويا بعدها دخلت جوا
و سيبت الباب مفتوح
فتحت الدولاب و خدت فستان الفرح و الهيلز و كل الحاجات اللى كنت جايباها لليوم ده
و طلعت كرتونه كبيره و

حطيت فيها الفستان و الحاجات
و حطيت صوري مع رحيم
و الهدايا بتاعته
و اخيرا قلعت الدبله
و حطيتها معاهم
قفلت الكرتونه و لفيت عشان اجيب لزق اقفل بيه الكرتونه بس لقيت حد حط أيده على بوقي و كتم نفسي
و كتفني ..!
_________________
سبحان الله وبحمده سبحان الله العظيم
_________________
في فيلة رحيم..!
أوضة ريتال..!
كنت قاعده على سجادة الصلاة بعد ما خلصت صلاتي
كنت قاعده بقراء قران بعد ما طلبت مصحف و مصليه من صفا الطباخه
و انا قاعده سمعت صوت غريب جاي من برا
صوت حد كأنه وقع و قام تاني
و صوت خبط و رزع .!
صدقت و قفلت المصحف و قومت وقفت ورا الباب بتوتر و فجاء الباب اتفتح
و دخل رحيم ووقع
و قام وقف تاني
_انت بتعمل اي هنا اطلع برا ..!
قرب مني بخطوات غير متزنه و باين عليه أنه مش في وعيه
و عيونه حمرا و شعره مش مظبوط
و اتكلم بتهتها :
_انا مش وحش زي ماقولتي
مش مريض
انا بكره عمر أبوكي
أذاني و أذي أمي هو السبب ..!
زقيته بعيد عني :
_طب اثبت مكانك و اطلع برا الاوضه
متقربش مني لو سمحت.
كشر ملامحه و رجع شعره لورا و اتكلم و هو بيقرب :
_انتى مراتي فاهمه؟
قرب خطوه تانيه و انا محستش بنفسي غير وانا بمسك أقرب فازه ليا و بضربه على راسه بعنف ..!
رميت الفازه بسرعه من ايدي و حطيت ايدي الاتنين على بوقي بصدمه
رحيم وقع على الأرض و دماغه كانت بتنزل دم كتير ..!
_يانهار أبيض!!
رحيم رحيم
انا قتلته ولا اي ؟!
يعني يتجوزني غصب و اتسجن بسببه؟!
_________________
الحمد لله يارب كما ينبغي لجلال وجهك ولعظيم سلطانك.
_________________
في أوضة تالين…!
كنت بحاول اصرخ بس الشخص ده كان كاتم صوتي
و اتكلم هو بصوته الهادي :
_ اهدي اهدي انا اياد ابن خالتك
مش هأذيكي ماتخفيش…!
نفسي هدي شويا و هو سابني
بصيت له بعصبية :
_انت ازاي تدخل أوضتي من البلكونه؟
اي شغل المتسولين ده !
وبعدين انت عايز منى اي انا مش قولتلكوا الصبح مش عايزه اشوف وش حد فيكوا تاني؟
_بصي انا مش جاي لك من البلكونه عشان خاطر سواد عيونك
انا دخلت من باب البيت عادي بس ستك البومه طردضتني
و رفضت اني اشوفك اعمل اي يعني؟!
_اولاً متقولش على نّناه بومه و تحترم نفسك!
ثانياً بقا عايز منى اي؟
و عايز تشوفني ليه!!؟
_خالتي منهاره في البيت
حابسه نفسها في الاوضه و مش عايزه ولا تقابل حد
و لا تاكل لقمه..!
_وانا مالي يعنى ؟!
_وانتِ مالك اي؟
دي امك على فكره
و بعدين هى ليها عذرها في اللى حصل ده
و انا من رأيي انك تسمعيها
وتعرفي هيا عملت كده ليه؟!
و خليكي عارفه انها مسبتكيش بمزاجها
ف ياريت تسمعيها ..!
كنت واقفه مكاني أفكر في كلامه و افتكرت اول ما فوقت الصبح و شوفتها قدامي انهرت و طردتها من البيت و رفضت أشوفها تاني و بعدها هى مشيت و انا قاعده لوحدي من ساعتها رافضة اني اشوف حد ..!
اياد بص للكرتونه و بصلي و اتكلم ب ابتسامه :
_ بتعملي موڤ أون بسرعه انتى
مش اي حد بياخد الخطوه دي بسهوله على فكره…!
_خطوة اي؟
_انك تجمعي حاجته و ترميها
اصلها خطوه صعبه شويا
و كأنك بترمي ذكرياتك معاه ..!
اتنهدا و بصيت له :
_مانا لازم اتخطى الاول عشان اعرف انسى !
اصل الخيانه مش سهله ..!
_انا برضوا اللى عرفته من أمي أن خالتي اتعرضت للخيانه على فكره ..!
و من رأيي تديها فرصه تسمعيها و بس
تعرفي مبررها اي ..!
سكت شويا و بصيت له :
_ماشي
استناني تحت هلبس و هاجي على طول
وديني عندها هسمعاها
بس لو مقتنعتش بكلامها
مش هتشوفني تاني ..!
_تمام تعالي انتى بس اسمعيها و قرري ..!
شاور على الكرتونه ب عنيه :
_و جيبي معاكي الكرتونه نتخلص منها سوا اي رأيك ؟!
قالها بغمزه بعدها راح ناحية الباب :
_خد هنا رايح فين؟
انزل زي ما طلعت !
_لأ النزول اصعب أفرد وقعت و اتكسرت هتجبسيني؟!
_حد قالك تتشعلق زي القرود و تطلع.؟!
_لأ بس كلو من ستك البومه ..!
خلص كلامه و راح ناحية البلكونه و نزل زي ما طلع .
وانا لبست و خدت الكرتونه و مشيت قابلته قدام الفيلا
خد مني الكرتونه :
_هو احنا هنعمل فيها أي ؟
_نروح ل خالتي الاول بعدين هقول لك ..!
كان معاه عربيه ركبت معاه و روحنا لها و انا لحد دلوقتي مش مستوعبه اني خدت خطوه زي دي !!
بعد وقت كنا وصلنا البيت ، أهل البيت استقبلوني بفرحه و هى كانت محبوسه في الاوضه
اختها كلمتها من ورا الباب :
_ريتاچ بنتك جت و عايزه تشوفك ..!
اتكلمت بعصبية :
_و انا مش عايزه أشوفها بعد اللى عملته فيها و في اختها انا بجد مصدومه فيها ..!
فهمت أنها قصدها على ريتال، اتكلمت بتوتر :
_دي انا
تالين ..!
ثواني و كان الباب بيتفتح و ظهرت لي بوشها الشاحب و عيونه الحمرا و حضنتني بفرحه ،
بس انا مقدرتش ابادلها الحضن
بعدت عنها و اتكلمت بجمود :
_انا محتاجه أتكلم معاكي الأول
لازم تفهميني اللى حصل من الاول خالص ..!