رواية ما بين النسر والشيخه الفصل التاسع 9 - بقلم اوسار

#مابين_النسر_والشيخة
قدك المياس

من كتابات زهراء العراقية

الفصل التاسع

يقين

جنت ادرس  ودخلت علية عمتي وجها اصفر شاحب ... ابسرعه ذبت العباة والحجاب وكعدت  يمي

ماي .. جيبي الي ماي

رحت للبراد  جبت الها صكته ..

حار هذا

اي عمة غير الدنيا شتا

بارد بارد ابسرعة كلبي فحم

جبت الها واجيت

شربته ..

اااخ ياربي امنين طلع الي هذا الغضب

شكو عمة شصاير ؟؟

حماج حماج المختل وكفني بالطريق وهددني بسلاحة

شنو ؟؟؟منو حماية ؟؟؟

سولفت الي عمتي شصاير وياها واني حلكي متسع

عمة هذا يخوف ...

طول ما اني وياه واكفة كلبي يريد يوكف من الخوف منه و من الناس اذا احد شافنه

صدك تصرفة ارعن

بس ارعن كولي اجرامي 
خلاني اتوسل للسايق لا يجيب سيرة لا يصير الدم للركب  الكلب اني اتوسل بسببة و انحط بموقف مخيف اكيد الولد عبالة بينا شي

اروح احاجي ابوي يعجل بموضوع هذا صاحب ....  وهذا حسين ترة ما سكتت اله الا لخاطرج ولخاطر عمج

خابرت محسن وكلت اله على عملة اخوه الارعن اجه يخرب كلشي علينا انصدم وكال اروح اشوفه وسد الخط.

***
حسين
اجاني محسن يلوم طردته من الغرفة .طلعت من البيت رحت للشقة بس مخابرت نغم تجي ...
احس نفسي نزلت روحي حيل الها تخسأ هي وابوها  يذلوني  ...
مرن ثلاث  ايام وما ردوا خبر الرفض فكرت ادز خبر بيد الوالدة احنه غيرنا رأينا وما انريدها ....
..
جنت نايم بالشقة ... الساعه ٧ بالليل .. اجتني الفكرة اروح لأمي اتدز الهم خبر ردا لكرامتي  .. واشوفلك نغم كدامي واكفة بالصالة

حبيبي
واجت حضنتني

اني طالع
ليش صارلك اربعة ايام  لا تدوك لا تسأل عني

مشغول

مشغول واجي لهنا الكاك ...

نغم هسة ما فارغ اريد اطلع

باستني
ما اتروح ...حيل مشتاقة لك ...
ورجعتني للغرفة ....

***
يقين

انتشر خبر عمتي اتريد ابوها يفاتح ابن اخوه  وياخذها ... وطلع الحجي اللي يكول عاشكها وعاشكته لان خطبها مرتين وجدي هو اللي رافض ومن فكرت بالزواج بدته على المهندس  والي يكول اشمعنا هو اولاد عمامها اثنين منهم خطبوها ورفضت ... واللي بدة بهذي البلبلة امي وسمر لان اخوتهن اللي انرفضوا هم
خالي مزوج ورادها ع مرته   ..

حيل متضايقة حتى رغده تكعد اتحش بيها ..... وصل الكلام لمرت جدي كومي وكولي لجدي خلته يكلب البيت كلاب على روسهن وحلف اللي تحجي كلمة تطلك وتترجع لهلها  ... اما جواهر مجانت مرتاحه لكل اللي يصير بس ساكته و دومها شاردة الذهن  ....

دخلت للغرفة واني طالعة روحي ..
شفتها واكفة كدام المراية الشعر محلول و لابسة ثوب احمر  بلا ردن بهالبرد ..

عمة شسوين ؟؟

جاوبت بهدوء ولا يكلك اللي يصير جوة يهمها

دقيس   بهذا الثوب جسمي واشوف جسمي  سمنان لو لا ...
اكول  يقين صدوك خصري نحيف زيادة عن اللزوم احسة مكبر وركي

لا عمة يخبل ...هاي رباب اتكلي احلى شي بيج جوة خصرج ..بس اني ضايجة منه . .

الصمت ما حجيت شي شريد ارد والذهول اخذ من عقلي فص  هاي عمتي اللي تسأل ياربي وتهتم هاي اللي ثقتها بنفسها ابد ما تهتز تسألني ...

اشبيج صافنه ...غير عروس ولازم اهتم

قرت افكاري   وجاوبت ..

....
بعصرية ثاني يوم جان جدي يريد يروح لديوان شيخ ثاني
واجانة اليوم صاحب اكيد اخته وصلت اله خبر وطلب ايدها من جديد...
طلعت عمتي عدها غاية من كالت كدام اخته حتى هو يجي مرة لخ ..
طلع من البيت صاحب
وجدي كعد بالهول شافني
صيحي لعمتج وينها ..

عمة دتكوي شماغك  ..

صحت الها وكف كدامها  ... اجاني قبل اشوية صاحب

ادري بوية 

صاحب ما  يفيدج
مدامج وافقتي على الزواج هاي هي اني دزيت كلمة لحسين اخو زوجة اخوج و وافقت عليه ....

بس بس انت كلت الي راح توافق ع صاحب

بعد اللي انكال مستحيل  يا جواهر  ..

بوية كلام نسوان تمشي عليه ...وانت واخوتي اتعرفوني شنو

اعرفج  ... بس اني من الاساس انطيج لأي واحد من اولاد عمومتج الا صاحب
لو بيه خير ما هجت مرته منه بس من شفتج بعد.وافقتي  استكثرت على صاحب واتندمت وافقتج ....همزين قبل لا انطي كلمة بعدني

لعد هاي هي بوية انتظر نصيب ثاني

وليش تنتظرين انطيت كلمة  الولد انشالله خلال فترة اكصيرة انت ببيته

اتسعت انظار عمتي وانخطف لونها ما تعرف شنو اتكول ..... وكع منها شماغ جدي
وهو باوع الها رافع حاجبة .... دنكت اني شلته وانطيته لجدي  ما اخذه وظلت ايدي ممدودة بينهم ... وخرتها بس ظليت واكفة حسيت عمتي راح تتهور لأول مرة احس بعمتي ممكن يصدر منها تصرف مو تمام ..... بس هي كالعادة غير متوقعة بلعت ريكها
وبصوت يا دوب ينسمع
بوية وكانك ظلمتني بقرارك هذا ؟؟؟

ما ظلمتج  على العكس الزواجة هاي راح تكون من مصلحتج  .. ومصلحتي  ...لو بعد ما تهمج مصلحتي .؟

لا بوية حشى بس

الكلام اللي طلع عنج ما ينهمل الا اذا  قبلنا بحسين ....

بوية اترجاك غير قرارك

انطيت كلمة للولد ..ومهرج الارض

بوية لا تبيعني برخص  ... هذا مو...

سكتت شكول اله

الرجال اخلاق و خلق  ومن نسب طيب ..اما زواجه الاول كلنا نعرف  عادي ياما شباب ازوجوا حتى بس ياخذون الجنسية ..
اما ابن عمج يا رويحة ابوج  عصبي وايده والضرب ....انه يمكن اكتله اذا بيوم اطاول عليج ...... من الاول رافضة ...

زين بس عاد انطيني مهلة افكر

تفكيرج ما بيه فايدة بكل الاحوال هو اللي متقدم الج انسان جيد  وانت ما اتعرفيه احنه اللي نعرفة وانه ابن دواوين والي نظرتي بالناس

سكتت
جدي جر الشماغ مني

وانت واكفة تتسمعين  وين ما اتروح عمتج
وراها ارتاحي راح تاخذن الاخوة  وهم اظلين وراها

خجلت بس من داخلي فرحانة
صح هو بعض تصرفاته فاول بس والله محد يلوگ الها غيرة

***

حسين
طلعت من الحمام  .... وروحي طالعة
نغم
حبيبي مو ع بعضك احسك
ليش بعدتني ؟؟؟ ولوين طالع

لبست ..

معليج

اني الجن يطفر كدامي من هاي جواهر حتى مرتي ما اكدرت اتقرب الها تذكرتها وكرهت نفسي واني اتخيل لمسات نغم جواهر  ... جواهر اللي اكيد نزلت من عينها اكثر  اخر لقاء بينا كسرت كل الحواجز وعبرت عن هيجاني من اثر خسارتها  ...
   ابعدت نغم عني و قررت اروح لمحسن ...
بعد ما طلعت من الحمام
دك تلفوني ... باوعت شفته رقم اخو قحطان الجبير ...
عرفت توهم الا تذكروا يردون عليه بالرفض شنو من بشر ذولة

رديت ببرود

بعد السلام

اكلك خوية اني اتصلت بيك حتى اكلك طلبك مجاب ...واحنه نشتري ازلمة معدل مثلك ويشرفنا نسبك  ...

اباوع لنغم وبالي مو يمها .... عقلي مجاي يستوعب موافقتهم

اني اللي يشرفني واسعدني والله ردكم

اي خوية شوف ناسك واشوكت ما ضبطت امورك هلا بيكم .. 

خلصت المكالمة ..واني بين المصدك والا ..
يعني قدروني وخابرني ابن الشيخ الجبير بنفسه وما خله قحطان الصغير يوصل اللي موافقة اذن ظلمتهم قبل اشوية ..طلعوا ياخذون وقتهم بالموافقة وهذا حقهم بس اني جنت ضايج من الاخبار اللي نقلتها رغدة ....
نزلت ونغم اتصيحلي    .  واني بس وجه جواهر يبرالي ... وافقت ....وافقت بعد كل الي صار ... قبلت  ....جواهر تضم الي مشاعر .......
مشاعري مخلوطة بعدة احاسيس ..بين الانتصار والعشگ و الفرح بان لبوتي ما كرهتني  .... لبوتي راح يصيدها حضني الدافي ......  لبوتي ما كسرت بخاطري ....
لو ادري معترف الها من زمان ....!

***

يقين

عمتي طردتني من غرفتها و انفردت ويه نفسها .... لليل اجتنا رباب فجأة جابها رجلها من غير جهال .. بس بتها الصغيره ..
اتعشت يمنا وجواهر مانزلت  اتوسلت بيها رباب ما قبلت ...
جدي سألني بزعل

ليش ما نزلت عمتج

ها

رباب
بوية راسها حيل يوجعها سودة علية ....

ها راسها  ..

سكت  ما مقتنع ...

،،،

رباب كالت اللي سوي عصير الها وراحت صعدت الها لوتية اتريد تشغلني ماتدري العصير الطبيعي جاهز بالثلاجة واني ادري جواهر دازة عليها

رحت الهن .. دفتح الباب

دخلت نصي من سمعت جملة جواهر

اليوم حسيت نفسي يتيمة ومحتاجة امي
!!

دخلت متحملت دموعي هلن ...شفتها راسها على صدر رباب ورباب اطبطب عليها ....
اشرت الي اطلع بس اني عندت .. كعدت يم عمتي ..

عمة ..شنو هي بالغصب ... كولي لبوي يقنع جدي ولا اضوجين ...

رباب
اسكتي انت

خالة  يعني هي ما اتريدة بالكوة ..
بعدين مو عرفتي شنو سوة بيها بالطريق

اسكتي انت كلشي ما فاهمة الرجال هذا عاشكها والله  عاشكها هسة الا اكولها كدامج نظراته الها هايم بيها .. جواهر تخسر إذا اترفضة الوحيد اللي ما طمعان بيها ولا بأهلها ..ما داخل على طمع ....حتى ولد عمها   طمعانين بيها وبالي كاتبة الها جدج ...هذا اشمدريه بأسرار العائلة هااا هذا رادها الها ..  انه حيل مقتنعه بيه واشوفه هو خيالها
.
سكتت اني ادري بي خوش انسان بس اني احب عمتي ما اريد اشوفها ضايجة هيج

وخرت عمتي عن رباب وكالت

خيالي ؟؟؟!!

اي انشالله بعد جم يوم 

ضربت رباب على زندها

ايييي

ما اكدر اكلج مراح يصير لان ابوي مو اني اللي انزل اله كلمتة بس اني حيل ما مرتاحة .....احس نفسي راح اعاني واظلم الولد  .. .والله اني رفضته حتى لا اعذبة

عمة يمكن ينسيج المرحوم

ابتسمت بحزن

وادموعها الا اشوية تهل

مستحيل انسى المرحوم داخل جوف گلبي ...

طبعا هاي الكعدة الوحيدة اللي عمتي كلمتني كمرة يمكن لأن  شافتني كبرت ونخطبت المهم اني اللي فرضت نفسي

رباب بيومها باتت يمنا ...
على سرير جواهر ... كعدت اشرب ماي شفت رباب نايمة على ضهرها وماخذة راحتها ....وين عمتي ؟؟؟

باوعت للارض ماهي ....طلعت من الغرفة اهبد عليها ......

نزلت ...شفتها بالهول مطروحة على القنفة بس ما نايمة .

عمة  ليش كاعدة

ما اجاني نوم .. 

ها تعاي وياي نامي على سريري واني على الارض ...

ما نعسانة
***
حسين
مطروح وافكر بيها ....شنو الفكرة اللي اخذتها عني وغيرت رأيها شنو جد ...يعني لأن صارحتها هي تبدلت هيج ...؟؟؟ بشنو اتفكرين يا جواهر بيرج عميق واني غركت بيه
...
ما انطيتهم مجال ... اخذت زلم ومشينا عليها  ..  وشرطوا عليه شروط اهواي
من اجى طاري المهر توقعت الارض مثل ما كالوا لامي بالسابق  بس
طلب ابوها  عمرة لبيت الله الحرام مقدم
استغربت من تغيرهم  ... والمؤخر  50 مليون عراقي ..
ما همني مستحيل اطلك واصلا مو فد شي كدام الارض اللي جنت حيل متردد وحسبتها ثمن الشراكة  المستقبلية مع اني ما انكر اشوفها  حيل واكفة ادفع مقدم الها ارض بملاين كبيرة  ... والا هي ما الها ثمن جوهرتي غالية بس اضاهر هذا كمين مسوي ابوها يختبرني بية

***
يقين من راحوا الزلم

ها بوية  كلت الهم مهري شنو

اي  اي  جنت اريد اضمن الج مستقبل وياه

مو بالفوس بوية ...ما اريده يشتريني 
اني غالية بيك بوية

***
حسين
الايام حيل بطيئة تمشي . اريد يوم العقد يجي واصير حلالي باسرع وقت احسها راح اطير من اديه باي وقت ...

***
يقين
البيت هوسة عود احنه ماعزمنا احد بس نسوان عمامي وخالات جواهر .... و رباب

دخلت علينا رباب ... وين جواهر ؟؟

بغرفتها

راحت الها واحنه ورها البنات انريد نتونس اصلا البيت صح هوسة بس العروس ما تقبل تنزل وما تتحاجى وانخاف منها كلنا  محد يكدر يطلعها من وكرها غير رباب

وكفت كدام الباب ..
وغنت وهي ادك علية واطبل

و اخذوها اخذوها للحلوة اخذوها .. وحتى لو بالغصب الحلوة اخذوها

واحنه وحدنا كمنا انصفك على هوستها

  واجينااااج واجينااااج واتعنينه لحد بابج واجيناااج

وجواهر افتحي بابج ويلا وصلوا احبابج
فتحت الباب وجانت بقمة الغضب

درعمت رباب للغرفة

وبت الشيخ ملجوها 

واتهفي بعبايتها   واحنه نكمز وياها  ...

والليلة بت الشيخ يملجوها
وغصب اعليها  اخذوها ...
ومن خدها التفاحة يبوسها ..

اهنا انشمرت كوشة عليها ..

كااافي رباب
ظلت اتهوس وما سكتت وكله بسامير علنية  ...خلت جواهر تنزل وهذا هو المطلوب تنزل وانشوف وجهه البهي . حتى على ابوها مثكله وابوها متحمل بس حتى يتم العقد ...

سوينه الها صينية عقد وهي كلشي ماتقبل نسوي بس هاي اوامر جدي اجني امهات العريس ....

وطلعت الهن عمتي سلمت وجانت عادية ولا يكلك اليوم عقدها لا فرحانه  ولا مهتمة ....بس اني اعرفها هسة هي ضايجة لهذا دتمثل ....

اليوم خالي جاي هو اللي يعقد الهم  ..
حيل يحبها لجواهر

ماكو احد غريب جدي و العريس و قحطان بس حضر العقد بؤامر من جدي ما يريد زحمة زلم بالبيت ...
اني لابسة عباتي و واكفة وية البنات وحتى رباب  طلعت سلمت وكعدت هي ومرت جدي .... وام العريس ...

واخيرا طلعت عمتي عاااا هي من نص ساعة دخلت غرفتها تأملنا تعدل نفسها بيها .....بس هي شو لبست حجاب اسود ولا نقطة مكياج وطلعت

السلام عليكم

وكف الها حسين
جان لابس قاط قريب لونة للسمائي
يلمع لمع اعيونه تبرك وية شعره والفرحة واضحة عليه .....

كعدت يم خالي وجان سلامها بارد ....

وبدأ خالي
وجدي يباوع الها ومبتسم ...هي اتبادلة نظرات حزينة .....

خلص العقد ورباب جانت واكفة فوك راس العريس وطكتها هلهولة  عايقة

اقسم اهتز راسه بالاول

خلانه كلنا نضحك احنه البنات  ...خوش خرعة اكل
وامه هم هلهلت  ... خالي يفتهم بسرعة كال لأبوية اخذنا لديوان فلاح (اخ جدي ) اسلم عليه قبل لا ارجع للنجف ...

راحوا وقحطان وياهم ...تركوا ذيج اللي كاعده وايدها على حنجها وما تتحاجة اللي يبارك الها اترد علية ببرود وبصوت ما مسموع  
اما العريس غير مكانه بس طلعوا الزلم

***
حسين
رحت يمها كعدت .....
واخيرا  اخذت اسمي وصارت هاي المرة الي  ... بس ما عجبني وضعها  .   كاعدة وملامحة ضايجة ولا يكلك عروس ...

همست الها الطف الجو

ترة اني خوش شاب وسيم ...استاهل بسمة من وجهج الحلو هذا ....باوعتلي مستنكرة وجاوبتني

حتى صوتك ...؟

كامت وراحت خلت النسوان اتباوع عليه !!!!!!

يتبع

  
كو غلط مطبعي عندي يا فانزاتي  عمر البطل ٣٦ وليس ٣٢ نأسف على الغط 😍😘