رواية ما بين النسر والشيخه الفصل الثامن 8 - بقلم اوسار

#قدك_المياس
مابين النسر والشيخة
من كتابات زهراء العراقية
الفصل الثامن

حسين

رجعت للبيت دايخ 
ياالله كل ما اريد انساها تطلع الي ادري شنو من صدف تلاگيني بيچ لا انتي اللي مريحتني ولا انت اللي عايفتني ....كل يوم اشوفج بشكل وكل شكل بيج حبيته للنخاع تفاصيلج من دون البشر تنخزن وما تمر علية عابرة  حتى وانت تتألمين
بكبرياء ماشفته عند مرة قوتج يجواهر اخذت تفكيري ......  مشكلتج صعبة   ومشكلتي  اعشق الصعب    ..!!

***
يقين

دخلت للبيت ...
تتألم
وكفتني گدامها وكالت احلفي
ما متفقة وية رباب ...احلفي .

هااا
باوعت لرباب اللي تاشر بلا

احلفي يقين

اهااا م م م
ظليت امتمت

هيج لعد .... رباب راح اتخليني اقسم
ما اطلع وياج بيوم بعد
سحولتيني لحد عنده ...... ليش خليتيني بهذا الموقف .....

غير لمصلحتج ....

مصلحتي ...رباب ...كلمة منج و بعد صدك  افقد اعصابي عليج

اتفقدين ما اتفقدين راح اظل وراج وراج منا من ازوجج

على صوتهن اجتي مرت جدي وحوراء ورغده جانن بالمطبخ

اشرت عمتي عليها وهزت ايدها بمعنى كافي جزعت منها

جاوبتها رباب

المهم هسة لا اظلين تزعلين عليه خوش من اخابرج ردي راجعه لبيتي اني وها صدك رجلج اذا ظلت توجعج كلي لابوج يزوجج
خزرتها

يوووه خربطت اقصد ياخذج للطبيب اخاف بيها شي صار تدرين احنه العراقين جنه دمية ام الف دينار اقل زلكه نتفسخ

مرت جدي سألت اشبيها رجلها

رباب
يلا اودعناكم

عمتي سكتت مجاوبت مرت ابوها او رباب وراحت

يا شدعوة عمتج ما تتحاجة

لا جدة  بس هي تعبت ... رجلها توجعها .....

خابرت على محسن سألته على ام شعر الاصفر ...تهرب بعدين كال خطيبته ..!!!!!

كولت اله ع الخير ...
..
سألت رغدة هم تلكات وكالت اي اي
بس شو اكو شي مريب بيهم
***
محسن
جذبت وكلت خطيبته واكلت ذيج الرزالة من حسين لأن ما بلغته بوصولهم ..
المهم  وصيت رغده هم من غير ما افهمها بس كلت الها صديقه اله بس حفاظا على سمعتنا كولي خطيبته  مرت فترة تقريبا شهر وكلت اتكول الهم فسخ ....

رغده هم سوت هيج لخاطر صورتها كدامهم
شسوي اخونا البرطاني خلانا بهذا الموقف السخيف  بس يا خوفي يوصل الكلام لأمي يبووو اذا تعرف ابنها خطب وفسخ مصيبة شخلصنا ...... كتله اشلون تتصرف اذا وصل الخبر لأمك .....هو راح سبقهم وكال الها جان بالي مشروع زواج والتقيت بالبنية و ما اتفقنا وما صارت !!!

امي هم الفطيرة صدكت ....واني كلت الها اجتنه ويه اهلها للسنتر و التقت بيقين شافتها خلصنا نفسنا من الفلم التعبان هذا

***
حسين مرن شهرين تقريبا واني استقريت بمكتبي الهندسي  مو شي الشغل بس على الاقل شكليا منا من افكر بمشروع جديد ...

اتصلت بيه نغم اجي اليوم للشقة ..ما رديت ..... ضايج ومالي مزاج امي مريضة واريد اخذها للطبيب للعصر..
رحنا احالها عملية عاجلة  وجع بطنها  
طلع من الزائدة الدودية

***
يقين
ام حسن سوت عملية ومن الواجب اني كنتها اروح ازورها .
طلعنا من اللبيت اني ومرت جدي وامي و مرت عمي سمر وحوارء ورسل و عمتي جواهر
عمي قحطان ودانا اني وامي ومرت جدي وسمر 
وعمتي و نسوان عمامي ورباب لزكت روحها اتكول اعرفها المرة من نهد عرس عمج مدري اشعدها من سمعت بينا اجت تركض المهم راحن وية السواق و رباب كاعده بالصدر 
نسيت اذكر ان عمتي السيارة اللي تاخذها وين ما اتروح جدي مشتريها الها مخصوص وحاطلها سواق وهي صاير للبيت كله هم بس الاهم لعمتي ومحد يدز السواق لمكان اذا ما تأذن اله عمتي اما عمامي كلمن وسيارته   وعمتي المرة الوحيده من بين النسوان عدها سيارة

وصلنا سوة اصلا همه مو بعدين ..

طلع عمي صناديك العصائر الفاخرة

***
حسين
جنت غاسل سيارتي وخلصت وجاي اغسل بالكراج  لاف البجامة والماسحة بيدي  ....

ندكت الباب واني مورث الجكارة بيد وبالثانية انزح بالماي للبلوعه ...  غلست
واجه محسن جان لابس يريد يطلع ...

***
يقين 
ما كلت لمحسن اشوكت نجي نشوف امه
هي صارلها ثلاث ايام من سوت العملية
كلت اسويها اله مفاجاءة ...
فتح النا هو الباب والبسمة زارت وجهه فديته كاشخ ومعطر سلم على عمي وابسرعه دخلنا مثل القضا المستعجل على اخوه بالكراج

واويلي يابة
رباب كالتها من شفنا كدامنا حسين لابس فانيلة  تك تعلاكة رصاصية حاصرة عضلاته حصر و شعرة ما صاعد هالمرة بجل نازلة على كصته كذلته السرحة السودة .. و بجامته المصرفنه هيأته مخربطة بس والله جذاب خيوط شمس العصرية منطيته جاذبية فوك جاذبيته حتى الجكارة حلوة بيده ...
جدتي جبيرتنا سلمت عليه
رباب هم همست
لا وبعد يغسل الهم الحديقة  ...خوش اتربية اوربا مال ادز الهم كويظم

دنخدل وهو وكف مدنك بس ولا مهتم لمظهرة عادي عندة رحب ذاك الترحيب بقحطان  و صاح لرغده تستقبلنا  ... واصلا محسن دخلنا بعد

هو واكف يم الباب الداخلي ...
واحنه ندخل
دخلت اني ووكفت انتظرهن عمتي ورباب اخر شي
رباب
اشلونك خوية

الله يسلمج يا اهلا وسهلا زارتنا البركه

وشفته بعيوني  رفع نظرة على عمتي
عمتي رادت تنطق تسلم

رباب
يا جوااهر انت وراية
غشمت نفسها ع اساس ماتدري

تعاي ادخلي مايصير

عمتي شدخل  ادخلي يمعوده

اللوتية ما مطيه مجال يكفي تدخل عمتي

رباب لا والله الا ادخلين مايصير انت الجبيرة

جواهر
لا عزيزتي ادخلي انتي

حسين وخر من يمهن وفات من يم جواهر

اشلونك  خويه  حمدلله على سلامة امك ما شوف  شر

الله يسلمج .. رباب حرنت  اتباوع الهم

حسين راح رجع للماسحة ويمسح بالماي 
واحنه دخلنا ... 

كعدنا يم المرة .....  نص ساعة زمن .... اجتنا رغدة ..
عمة  بس اريدج اتعلميني اشلون
اسوي كهوة ..؟؟

كهوة !!!!
كالتها سمر بتعجب

اي عمة جواهر خوش اسويها
كلنا استغربنا يا كهوة وهمه ضايفونا كليجة و عصائر مع كب كيك و معجنات هم

عمتي مو من طبعها تحرج احد واتكول لا .. رغم عدم ارتايحها واضح عليها بس كامت هي وعابتها على راسها

ولج خاف اخوتج اهنا

عمة بالمطبخ محد ماكو

راحن واني عيني عليهن ....  دزلي مسج محسن يكول تعاي اني بالحديقة .. صدوك..
استأذنت من امي ورحتله بالحديقة

تعاي يقونة اشوفج غرفتنا
سحبني ودخلنا من باب الهول ويسحول بيه

لا عفية

دمشي لا اشيلج ... اخذني محسن لفوك وياريت ما صعدت حتى ما خلاني اشوف الغرفة عدل ...ظليت اركض وهو وراية !!!

***
حسين
دخلت لغرفتي لبست قميص واي بنطرون  من الكنتور لا اللبوة مالتي اتروح مني ...

ونزلت امشط بشعري متجه للمطبخ شفت رغدة واكفه يمها شافتني ..
وجواهر مطيتني ضهرها وتحجي بهدوء

و اتحطين كيلتين ...بس اهم شي اتكون الكهوة اصلية اني والدي كله يجيبها
من الامارات ... لهذا اصير طيبة ومرارتها تعدل الراس .. 
تحجي وتحجي واصلا رغده راحت من يمها واني اللي يمها  صارلي اقل من اللحظة ...
رغده حضري الفنجان ..

رفعت راسها شافتني اني واكف وحاط ايدي على خدي صافن عليها وعلى هدوئها من تحجي  ...

ارتبكت اعيونها ظلت دور على احد بالمطبخ ....وهمست وين اختك ...

اختي راحت ...
الكهوة گلبت على الطباخ طفيت عنها ....

هااا راحت ... ?

اجت اتروح ..

انتظري جواهر .. 

خوية شنتظر ترة الي دا يصير مو من الأصول وحسابي ويه اختك ...
عندي وياج كلمتين بس .. 

لا خوية وخر عن طريقي مابينا كلام واخوي اللي توه وصلنا وراح رجل اختك لازم تخلي اله حساب وما تحجي ويه اخته بهاي الطريقه

اشبيها طريقتي

وخر خوية دفوت

اسمعيني ترحين منا ما اسمعين نظل هيج منا من يجي احد ويفهم غلط ....

تنهدت وظلت ساكته غاضبة اعيونها  وهي ضايجة تبث لمعان رهيب ...

زين اسمعك بس نزل اعيونك عني مايصير هيج تباوع ...

اااخ يجوهرتي ودي اضمج بوسطهن ..
اكعدي اشرت الها ...

بغضب هادئ
اشلون اكعد وانت واكف بالطريق ..
وخرت اشوية عنها فاتت كعدت

قابلتها بالكعدة ...

ليش رافضة الزواج .... اني ردتج بالحلال

سكتت

زين بس اسمعي مني هالكمتين
اليوم انت بعز شبابج واهلج محاوطينج وابوج حاميج لا صغرا باخوتج بس اولوياتهم اولادهم وبيتهم  ابوج مهما طال العمرة والله يحفظه الج ما دايم ..

خوية كعدتي وياك غلط و الموضوع هذا خاص   ......
خل اكمل مايصير هيج ...لا يغرج شبابج  باجر يروح   ..

حاجتني بأنفة
كملت ....

لا ما كملت  انت يرادلج حضن دافي يلمج

الكلمات وحدها طلعت اللي بگلبي مو برأدتي مجنت ناوي اكول الها هيج

اعيونها انفتحن عليه وبثن شرر على خجل
كامت لبوتي ..

مع الاسف والله  ...

اوكفي فهمتي غلط اقصد من اكبرين تحتاجين ولد يسندج  زوج يكمل وياج المشوار .....

اشوية كفت عني نظرات الغضب وبعدتهن عني  ...

خوية ماكو نصيب بينا ..

ليش .. لا يكون لأني اروبي . اقصد عشت سنين اهناك وعبالج مو خوش .. لا والله ترة اني اوفي وما اخون   شايف وعايف واريد أستقر  بحياتي ...

خوية خل اروح احسن  اني شعلية بيك

راح اخطبج مرة ثانية من ابوج هالمرة بنفسي    

لا تعب نفسك خوية السبب مو بيك اني رافضة الزواج اخذت نصيبي من الدنيا والحمدلله على كل حال .. 
يلا اترخص منك ...

وصلت للباب

جواهر  ...

وكفت وما دارت وجهها

فكري زين   لو انت اللي سابقة المرحوم جان هو مزوج من اول شهر . 

همست
ادري  ...

شو ما راحت ظلت واكفة ..  وبس ظهرها اشوف ..  لزمت الحايط ...

اتقربت عليها
بيج شي .   جواهر . 

اش لا تكول اسمي .. توء يوه انت تعبتني   ما اريد اشوفه لوجهك ...

عافتني وراحت بس جنها دايخه ... بس كلماتها رصاص حار وعلى گلبي  ..

***
يقين
نزلت مرتبكة
من الدرج اعدل بشالي ...
دنزل ركاضي و هذا وراية گال

يا يقونه بعدج ما شفتي شي من الغرفة

صارت بوجهنا عمتي طالعه من مطبخهم

اجمدت على الدرج  بعد رجلية ما اشيلني ..فاتت من يمنا ولا باوعت ناحيتنا ولا كأني على الدرج على يمنتها  رجعت لغرفة ام حسن وكعدت ... واني وراها

لازمة جبينها وساكته ورة اشوية دخلت رغده وبيدها صينية بيها فناجين كهوة

هاي الكهوة من اديني علمتني عليها عمة
اتكولها وتبتسم لعمتي اللي وخرت ايدها وتباوع الها بغيض واضح ..

خالة يلا بينا انروح اتأخرنا
وجهة كلامها جواهر لمرت ابوها . 

مرت جدي ابسرعة كامت من غير نقاش وياها ... وكمنا اترخصنا ورحنا لبيتنا ورجعت ويانا  رغدة ...

عمتي من دخلنا كالت الها تعاي وياي عندي وياج كلام

رغدة
بعدين عمة تعبانه ..

تعاي مراح اشغلج ..

اخذتها وراحت ...ما صعدت اني لحد ما مر وكت كلت اكيد خلصن كلامهن السري ..

واكتشفت عمتي من طلعت من المطبخ اصلا ولا شافتني !!!!!!!!!

.....
الو محسن شنو هذا الي صار ...  اخوك ليش رجع طلب عمتي من جدي

والله بعد هذا الي صار اني هم نفسي تفاجأت بصراحة ...

لا والله اخوك يخطب وماتدري

اي والله ما دريت الا بعد ما حجى وية جدج ....بعدين تعاي جنه ما عاجبج اخوي

لا مو هيج بس انت صاير اضم عليه

والله ما ضام شي

صدكتك بس ليش اخوك مصر على عمتي

العشگ يا يقين

يااا صدوووك

اي صدوك.اخوية يريدها ويحبها
يقونة حاولي اتقنعيها ...

دخل استوعب الصدمة شحب منها وهو مرات قليلة شايفها

مرات الحب ما يجي بالكلام ...تكفي هاي النظرات

ما اومن بيه

بس راح اتقنعيها لخاطري

ممممم

احبج

اي اقنعها ههههههه
............

سديت الخط.وكلت شقنع والمغرب جدي شبه اللي اتعارك وياها واعصابة بالكوة لازمها  من هم رفضت عمتي ....

علاقتهم انشحنت
يومين همه مو على بعضهم وجدي ما يحجي وياها فما اكدر افتح لساني واحاجيها هي صايرة نار ...

من خلصنا عشى .. رادت مرت عمي تاخذ صينية الجاي ..عمتي اخذت منها استكان وكالت اني اقدمه لابوية ...

راحت اله وانطته اله اخذه منها من غير ما يباوع بوجهه ..

بنظرة منها امرت قحطان يكوم .كام وكعدت هي مكانة يم ابوها   واني اخذت استكاني واباوع الهم ....

رغده توها نزلت من غرفتها واخذت استكان وكعدت لوتية اتعشت وشردت لغرفتها خلتني وحدي اغسل مواعين ومن خلصت نزلت ...

بوية
زعلك مو هين علية ... لا تضغط علية بيه ..

اسكتي جواهر لا اتفتحين الموضوع ضغطي يصعد ...

مرت جدي لكت الها فرصة

اي جواهر سدي السالفة احسن

ما باوعت جواهر لمرت ابوها ..

بوية ياريت بعد ما نفتح هذا الموضوع ..بس لا ظلك زعلان عليه  ..

عايد
لمصلحتج يا جواهر الولد ما يتعيب

علوان
انت الى متى اظلين هيج

كلمن عنده كلمة كالها الها

وهي بس اتباوع لأبوها

بعدين جدي كال الها اني ما دايم الج
ومن هذا الحديث

اتوقعو راح اتلين لكنها وكفت وكالت

بوية اني زواج ما ازوج رجلي مات  المعنى محد دايم لاحد حتى لو ازوجت ومحد ياخذ اكثر من نصيبة

عمي علوان استغفر

جدي هم وكف و شمر الاستكان  نززنا
وكال بعصبية  ترعد

شوفي يا جواهر انت هاي السنة اشوفج بيت رجلج ... والله تعبت كل همي بيج ..

جانت مصدومه من ردة فعلة
هدا اشوية من شافها خايفة منه

لزمها من زندوها وباوع الها بحنان والد

جواهر اريد اشوف اولادج ... يا وحيدتي ..
حققي الي  مناي ...اسعدي ابوج باخر سنينه  ...

جانت ساكته وساكنه ..
دموعها اجت تمطر عافتنا وراحت ..
وجدي كعد وكال لا اله الا الله .

بعد عدة دقايق رجعت

بوية حتى لا اصير عاق راح اسمع كلامك واني موافقة ازوج ...

ابتسم
يعني ارد للولد خبر

اي بس مو لحسين ... لصاحب

كلها كالت شنو والي كال صاحب !!! حتى اني اتعجبت

اي بوية مو طلبك مني بعد ما طلك ورفضت ..  ابن عمي اولى بية
اذا اريد ازوج

عافتنا كلنا بحيرة صافنين بس حوراء شكت الضحكة صاحب اخوها

اووف يعمة صاحب ولا اطيقة سمين و عكرة وغير هذا يلبس كله دشداشة صح صاحب خير بس ولا احبة ..

خابرت محسن وذبيت عليه الخبر الي صدم الكل هو تعجب وضاج وعاتبني اخوي اشبي وهيج اترفضة  ..

***
محسن
ضجت حيل صح اعرف بحسين يريدها بس حتى يقوي العلاقات و سند وضهر النا قوي   بس حيل ضجت يقين مكالت الي شي غير ماكو نصيب وابن عمي يريدها ... بس رغده اخ يا رغده كالت الي اشلون بدت ابن عمها اللي صارلها اشهر من خطبها ورفضت على اخوي

***
حسين
خابرتني رغده وسولفت اللي شي خلاني افقد صوابي ... 

توكف كدام ابوها واتكول ابن عمي اولى بية شنو شايفتني هااي !!؟؟
خلصت علية الليلة واني اغلي من القهر

...

انتظر وانتظر بسيارتي بالشارع الخدمي 

اتفوت من يمي سيارات على شكل متقطع ..

واخيرا شفت سيارتها ...
دست بانزين واتحركت ....كطعت عليهم الطريق   ..

نزل السواق

خير اخيي شكووو
اذكرني الولد ..   واني واكف كدام سيارتي ...

اتقدمت عليهم ... واتعديته .. وفتحت بابها
كال الي

خير خير

انزلي
الولد
انت احجي وياك وين تنزل

جانت اتباوع الي بتعجب وسبحتها وكتيب صغير بيدها

لا تدخل انت

خوية شنو مو بعينك تكطع علينا و تنزلها

طلعت سلاحي

كلمة وحده منك يطشر دماغك اهنا

ابسرعه هي نزلت بس من الباب الثاني لتجنب قربي منها ..
واندارت علينا وهي تتباوع للشارع

ادخل انت للسيارة انتظرني
وانت ضم سلاحك لا يفوت احد
ضميته

امشي كدامي

مشت خطوتين كدامي ..

خير اشبيك  شنو هذا الاسلوب الا اندمك والله

زمخت بيها تعبني غرورها وتكبرها

اش مو حسين اللي اتهددة مرة

اهاا

ليش هيج سويتي ...  هااا ليش بالوقت اللي خطبتج بيه بديتي ابن عمج .هااا  لو تردين توصلين الي شي ..

اتباوع لسيارتها واللي كاعد بيها

رفضتك لانك غريب لاني ما اعرف طباعك اللي يمكن غيرتها  الدولة الاجنبية ... 
وتوجسي  طلع بمحلة انت الغربة   خلتك ما تعرف الاصول ....والله لو ما اخاف الله لا اختك تطلك واتروح بذنبك جان كلت لأخوتي ينفوك على هاي عملتك ..
تحجي بهدوء وصوتها ناصي بس كلامها قوي  ويجرح  ...

وخرت من يمي ..فقدت اعصابي ولزمتها من معصمها اجت عينها تطلع من مكانها
صكيت على اسنوني

يا مرة اني عاشگج  ......بس هاي هي يا بت الناس    ولا يهمج .....اعتبريني عدم

رحت من يمها ابسرعة لسيارتي واخذتها شحط ....

يتبع

آرائكم