رواية ما بين النسر والشيخه الفصل الثالث 3 - بقلم اوسار

#قدك_المياس
مابين النسر و الشيخة

من كتابات زهراء العراقية

الفصل الثالث

حسين

-ما توقعتك حسوني اتاخبرني وتطلبني هسة؟

جاوبتها وهي بين احضاني

يعني اعوفج ؟

اووي اشبيك وين اتعوفني .......هو اني اخليك تهدني

هههههه ضحكت بغنج 

واني اصابعي مشربكة بشعرها الاصفر

نغم  ليش ما اتخليه اسود

كلت الها واني اتخيل ذيج اللي صعدت وياي العصر وعينها على كتابها تقرأ طول الطريق
اتخيل شعرها اسود حرير  اكيد اسود الي مثلها مستغنية عن اي شي مصنع بوجهه اكيد. شعرها بعده اسود ...  
من نزلت من السيارة و ودعت امي  ونست حافظة نظاراتها واني  ابسرعه لمحتها ورايه .. اخذتها ونزلت ما اتحركت عن الباب

- اختي بلا زحمة .. نسيتي هااي
التفتت علية  بعيونها الحادة .. واتقربت عليه ... خطت رجليها يمي ... نظرتها  وهي تشكرني وتوجه كلام الي و هي بهذا القرب مني ... خلاني ما صد نظري عنها

خوية هدها ..

همست عايده كلامها
هدها
حسين الحافظة

خزرتها غصبا عني من  نطقت اسمي مطالبها بنظرتي اتكرر اسمي واتظل واكفة ..

بس وعيت على نفسي و انطيتها الحافظة

هي راحت واني هزيت راسي
اشبيك حسين تخبلت ليش هاي البني ادمة تفقدني صوابي هيج ؟؟

اول ما وصلت امي خابرت على نغم الليلة تجي يمي .. تعرفت عليها من عشرين يوم آفة  مال افلوس بس مو مهم عندي اشكد تطلب الاهم تريح مطالبي وبس .اصلا زين من لكيتها بهذا الوقت مصارلي شهر من رجعت للعراق وماعندي صداقات من الجنس اللطيف ..
اخذت نغم مرة ثانية لأحضاني واني اتخيلها ذيج المرة !!!
..
من عرفت المرة طلعت مدرسة بالحوزة وملتزمة  تركت عادتي وما رحت للمضيف مرة ثانية .. التهيت  بتحديد موقع لمشروعي ...

اما اختي رغدة  تمت مشيتها  وشيخ عشيرة اجه خطبها مني ...

....
كاعد وامي اجتني
يمة والله عيب من عمامك .  خابروني يعاتبون ليش ما كلنا الهم وليش انت ماترد عليهم ..

اكل لوز واباوع للعبة بالتلفون

يوم اخوتج كافي    مو زين من كلت الهم    والله لوما العيب من الناس اللي جايين جان حتى اخوتج ما كلت الهم ..

مو يمة حادثة ابنهم صارت ويه المشية

يوم قابل اني عندي علم الغيب واجل المشية اشمدرني يسوي حادث  بالليل ..

لا حول ولا قوة الا بالله .. والله يا يمة ما اعرف شكلك انت راسك يابس بس جان قصدي اتعلمهم  مو يتفاجئون ومناك حادثة ابنهم زودتها علينا  هم يبقون عمامك ...

،

..  ورة ايام اتوفى ابن عمي ..

بس احنه ما ندري لأن جانوا مسفريه للخارج
وهم احنه ملتهين بخطبة رغدة و عقدت شيخ
بس محسن جان ضايج من العريس ... اعرفه شيفكر
. اختي عدها علاقة بيه سابقة وظال كاتلته الغيره على اخته اما اني مدام دك الباب مراح احاسبها لمجرد شك محسن ...

اما عمامي احنه اصلا شبه المنقطعين عنهم 
فما عرفت الا بعد ما جابوا الجنازة للعراق .
وجان ثاني يوم من عقد رغده
ورحت للفاتحة اني و محسن  وامي لفاتحة النسوان

**

ليان

بغرفتنا كاعده واسمع كلام  ست رغدة وية زوجها او خطيبها ولا كأن ابن عمنا متوفي    وحسين هم ما خلانا انروح بس امي ..

مممم يعني عجبك الفستان

اكولك صدوك شو اختك الوحيده اللي دوم اسولف عنها ما اجت ..

هااا خطية .. معافاية انشالله

خلصت مكالمة وسألتها

- عنده اخت ؟ ليش ما اجت

يكول لزمتها الباردة .. اكولج وين اكو بارده بالحر
........
يقين
طلعت من الغرفة استحي انطرح وجدي بيها كاعد ومكابل  عمتي  يقرة الها ايات وهي نايمة اصلا . مصخنه وتعبانه ما ادري اشبيها

تلفونه ما سكت جدي ومايرد على احد.  باله مشغول عليها 

بس نامت مريضة استلمت البيت مرت عمي عايد سمر  ... تختار الغديات والعشيات ...
صارت عود هي النادرة وكالت طبخ الزلم محد يلزمه غيري قصدها طبخ الخطار جان عدنا جايين من محافظات وكلهم رجال  ..
ساعدناها وقطعنا وياها  عشرين دجاجه 
وجبنا الجدر ونصبنا الجدورة عمتي رسل وعمتي حوارء  وحده للتمن والثانية للخضرة اللي ما تخلص منا لباجر واني اثرم زلايط.و بت عمو عايد اسمها فرح اكبر مني بسنتين  تسوي المرك و الباقي البنات المراهقات هم كلمن تسويلها شي وعمتي بغرفتها نايمة .. طبخنا وخلصنا و عمتي سمر نبهت محد يدخل بالتشريب والدجاج ..
فتحت الجدر رسل
اجتها تركض

شسوين انت هااات
عوفي لا يصير يجرجر لحمة وبعد ما يستوي اذا طلع البخار

وحدها تفتي سدته ابسرعه ..
خلصنا من الطبخ اني صعدت اسبح ...
طلعت من الحمام بطرك الاتك واتراجعت من شفت جدوا منحني على بته .. رجعت احترمت نفسي ولبستي ثوبي اللي نزعته لأن ممدخله شي وياي معبالي جدي يشغل الغرفة حتى من عده خطار . ..

- بوية  هاي انت

صحت عمتي من مسد شعرها . 
حاولت اتكوم بس جانت مكسرة

ساعدتها تنتچي على المخده ..

-ها بوية اشلون صرتي

-اووف اشلون مرضه هدت حيلي .. عبالي مرضة موت

سكتها وضاج من ذكرت الموت . وكال الها تطلع لا اظل اهنا كامده نفسها حتى يطلع الفايروس لبرة .. نزل وصاح لحوارء اجته تركض اني نزلت وراه اجيب ماي بارد لعمتي لأني بكل فهاوة نسيت اشكل كيبل البارد اللي يمنا من حطيت شاحنتي

-حوارء اصعدي فوك هوي غرفة جواهر ونضفيها
باوعت الي حوارء بغل لأن ما يصخرني جدي ابد ...

وراحت لفوك ....

ورة اشويه اجت كالت عمتج اتريدج .. صعدت لكيت حوارء فاتحه الشباك والبرد وانتظف وتمسح بالاثاث وعمتي بالحمام ..
وكفت وره الباب

هااا عمة .. صحتي الي ...

حضري اللي المبخرة وحطي العود الي جابة ابوية من الكويت ... اظني انحسدت على هاي النومة مالتي ...

حاضر عمة

نزلت عمتي بعد ما بخرتها ....
جانت لابسة زي باكستاني  طويل بيه فتحات بس وية ستريج وكردانه طوويلة من الذهب

صبوا الغدة بعد الصلاة .. دناكل وعمتي اول من مد ايده على الدجاج
طبعا احنه النساء بالهول صبينا
والزلم بالديوان  البراني عدنا اثنين واحد براني للزلم والكعدات كلش فخم ولو هو بيتنا كله فخم والثاني استقبال عادي حجمة وهم ما قاصر هذا للخطار اللي منا وبينا ..

ذبت عمتي سهم الدجاج وكالت وهي اتصوب نظرها بين نسوان عمامي

منو طبخت

كالت بكل فخر سمر اني
كلها من اكلت من الدجاج ظلت مخترعة .. 

رسل
عزة عزة يوكع من الحلك ..شنو سمر ما حاطة ملح ... اكلت اشوية عمتي تمن ومرك وكامت ما حجت اي شي ..
سمر وجهه صار اصفر الزلم مصبوب الهم .. خرب بالحظ لا والشاطرة ماخلتنا نضوگ لو نفتح الجدر تخبصنا وهي ناسية الملح المعدلة

-والله بالي احط وعبالي حطيت وترستها من حطيت البهار .. 

مرت جدي دردمت وسكتت هي لحظات واجه
ابوي اليوم اتغده بالديوان وياهم ...

شنو هذا السم مالتجن ... وجانت اعيونه على مرت جدي ...

جاوبته ابسرعه

هاي مرت اخوك اللي طبخت .. راح معصب وياهو اليجي من عمامي يكول اكلكم خزانه

منا من راحوا الخطار واجانه جدي بنفسه مثل الاسد الهايج

- يالفاهية ليش االاكل ماصخ اتفشلت كدام الوادم ..

مرته
والله هاي جنتك

وانت شنو شغلج هاااا شنو شغلج  .  والله طبيت جوة اهدومي من الناس ..
باوع لعمتي جواهر اللي كاعده وساكته ولا كأنه هي عايشة بعالمنا و ويانا

شفتي جواهر شصار بينا خلافج .. يومين البيت ضاااع .. 
ابتسمت اله
بوية لا تعصب  انت ابو الكرم والجود ... تتعوض انشالله بعزومه الهم ثانية نبيض وجهك وبنفسي اشرف عليهم

اشوية امتصت غضبه وراح .. 

شفت نظرات مرت جدي الها تجدح غيرة وشرر بس ما حجت وراحت لغرفتها طاكه روحها ..

مرت ايام وعمتي اتحسنت ..

عقد عمي  محكمة و  عمتي كالت اله اني اطلع اجهز وية خطيبتك .. كيف عمي حتى يعرفها على اخته ...

....

حسين
كاعد.بالهول  وانسطر راسي من رغدة

كاعده هي وامي و ليان وختام
وتدرم
- يوووم اني اللبست بس اخته الشور شورها ...
تاخذ رأي بشي واذا ما عجبني هم تاخذه واتكول هذا هدية مني .. يعني هيج فرضان رأي ما شفت ..  فد.وحده حشرية و متسلطه ما شفت

جاوبتها امي

يمة انه اعرفها بت الشيخ والله وردة ومرة مصلية و متدينة  واخلاق .. هي كريمة قابل االلي اخذته انحسب من مهرج

هم عوزة واني حجيت ويه قحطان بهذا الموضوع  بالمرة الجاية ما اتروح وياي ..
بس اريد اعرف يوم هي مو الاصول اتكول ينطوني افلوسي بيدي واني اختار ؟؟
يوم اريد افلوسي ..

رغده
سكتني  حسين بصيحته عليه معبالي منتبه النا

-اش ولج شنو ما شايفة خير ..  هااا عدي هاي الخزعبلات على خير
شنو انتو اللي عدكم تزوج لو اتحارب واتحضر عتاد  انتم العراقين ...فد شغلات عدكم شنو اجهز شنو  اتظل تشرط ... اهناك لا مهر ولا دوخه الراس هاي هو ثوب ابيض وهم مو شي اساسي فلا اظلين ثابرتنا مشيها هيج ..

سكتت

ليان 
اشبيج راح تبجين ترة المرة والله ذوقها جنان وبصراحه انت ذوقج عجيب
همست الها عبالها ما سمعت
اكو وحده اتريد روب ليلتها  اسود ؟

امي هم مدحت المرة كدامي

-يوم هاي اخته شنو ضروفها  سمعت عنها أرملة ؟؟؟

- اي يمة ارملة  وخوش مرة معدلة

كمزت رغده
-شمعدلة  وحده شايلة خشمها ومتكبرة واتباوع للناس بعين مرفوعة   .

-يعني هي هيج يوم

امي
-والله ما ادري يمه اني اشوفها خوش مرة  ومعدلة بس بعد اختك راحت وياها اكثر من مرة شو هيج اتكول عليها !

ليان
-ليش تسأل حسين

-لا هيج بس اريد اطمن على بتنا عدهم

امي كالت
يمة انت ما قبلت نسأل عنهم كلت الشيخ علوان معروف وما يحتاج سؤال عن اصلهم واخلاقهم .. اجيت هسة تسأل عن دواخلهم !؟

..
وهاي ايام خطوبة رغده بس اسمع شكاوي منها  على اخت العريس
بيوم عزمنا قحطان عدهم .. محسن كال ما اروح ..

اتروح يا محسن وراسك فوك رجلك.

حسين اشعندي رايح انت كااافي

اتروح اتروح .. نقوي علاقتنا بيهم

بعد صرنا نسابتهم مو هذا اللي اتريده واجهة كدام الناس ..

ضحكت على فكرة المحدود

ولك انت غبي شنو فايدة النسابة اذا نستبعدهم
لازم نقوي العلاقات
ومو بعيد ازوجك ببتهم الارملة حتى اثبتها اكثر
كلتها واني مبتسم واعدل بقيافتي ..

فز  محسن كانه اذكر شي ... كولك حسين صدك على الطاري  اني دا اعاني من شي ..

وهو

الي احبها  ما اكدر اتوصل الها اشلون ؟؟
خطها اتصل عليه يطلع مغلق اتصلت من ميت رقم ويطلع مغلق .. 
وما عندي اي وسيلة اوصل الها

انت مو كلت جنت تشتغل عدهم سايق

شنو سايق هاي

ضحكت
كمل بحيرة
اكلك جنت انزلها وية صديقتها براس الشارع لأن جانت اخر وحده ما اظل وحدها وياي فما اندل  هي وين بيتها بالضبط

هي مو من منطقتنا  ؟؟... اذن تكدر توصل الها من خلال اسمها او اسم عائلتها

دنك راسه هذا ..

التفتت عليه
شنو ولك ؟؟؟ لا تكولها

اي والله حسين  ما اعرف احد من اهلها اللي اتكفلني وحجى وياي من  جنت سايق على كولتك .. اخو صديقتها سجلهن اثنينهن يمي وهي الله يستر عليها حيل خوافه ابد ما انطتني  شي غير اسمها

ايا مطي صدك غبي صديقتك سنوات وياك وماتعرف عنها شي ...بعدين هي اخاف ما اتريدك وجانت تلعب وياك حتى تاخذ منك  ومن انكشفت من قبل عمتها بطلت

كمز وكال بنفعال 

لا ابد والله بت خير وعمرها ما اخذت مني شي
بالعكس اني اللي اخرني عن خطبتها  ضروفي السابقة وهي مبينة بت عز وترافة .. من انفرجت عليه كلت ارتب اموري وجنت انتظرك انت تستقر اهنا حتى اخطبها ...

..
رحت للشقة لنغم واني افكر بسالفة محسن .. اني اكدر اتوصل اله عنها  اصلا اعرف عمتها تدرس امي الحوزة ومن السهولة احصلها اله ...بس ما اعرف  اني اريد محسن يناسب وحدة من عائلة الشيخ علوان  فالسكوت افضل .!!!!!

...
يقين ..ثاني يوم من صباحيات الله اتحزمت
و رحت للمطبخ شفت عمتي لابسة كلبيه هاشمية  شبابية سمائية و كلاده ام الدولارات الكبار واصلة لخصرها . 
و تراجي كبار ظافرة شعرها وبس خاطه كحل ووكاعده بالمطبخ ..

وتحجي واتوجه بيهن ..  خلتهن يحضرن   المائده قبل الساعه تسعه هي جهزت و البيت اللي خلتهن ينظفنه هم قبل العشرة ويبخرنة عن ريحة الطبخ .. هنه بينهم يدردمن عليها وعلى تسلطها ما تحط ايدها بس اتوجه .. بس والله خلتنا نخلص من وكت  وانروح نعدل نفسنا  .. مرت جدي مريضه ما تشتغل ولا عليها بشي وشخصيتها مو قيادية ...

مدري ليش دكات گلبي تخفگ حيل .. بدلت ولبست بنطرون ممزك مع بدي سمائي و سويت شعري كعكة  ومكياج خفيف .. ونسوان عمي كذلك  بدلن ...

نزلت من كالو وصلووا ...

**
ليان
دخلنا لقصر يجنن بس حديقته تفتح النفس بس محسن سودها علينا
دنكن لا اتضحكن واركضن للبيت !! اخير وحده ما سويناها شنو بات مان نركض احنه وعبينا حتى بس لا احد منهم يلمحنا طبعا هاي الوصيات الي ولختام المراهقة عمرها 16 سنة . 
دخلنا لصالة جبيرة
واستقبلتنا مرت ابو  العريس
والكنات  . واالحفيدات هم
اشكد حبيت لمتهم حسيتهم عزوة لبعض كعدنا بالاستقبال اول مرة اشوف بيت بيه اثنين غرف للخطار هي مو غرف هي دلهيز اشعرضة  من يوم يومج يا رغده اترسمين للعالي .. 
كاعده ونافخه ريشاتها هههه ضحكت من اذكرت اشلون جانت اتحط اجدورة من  الجذوع اللي بيتنا التجاوز  اتخر علينا من المطر وجانت ماخذتها لعبة اطب ابنص الجدر جانت طفلة ..وهسة اشلون مسوية نفسها ولا هامها العز ...

امي همست الي
بودي اشوف جواهر وهي بلاية حجاب و ما تدرس اشلون شكلها .. 
بعدھا ما مكلمة دخلت علينا وحده ....يعني ظليت صافنه عليها   كأنها شي تحفة مكملة لهذا القصر مالتهم ....  الجسم قالبة  مسقول ساعة رملية ..  والشعر مرفوع ذيل حصان اشثخنه واشطولة لو الكحل الخفيف اللي خاطته خط اني ابنية وصفنت بجمالها  صدك لا كالو  بنات البصرة حوريات  جنة صدك اني شايفتها  من طلعنا للسوك بس  هسة وحده ثانية 

سلمت على امي

-اشلونها والدة  حسن
باستها بس بوسة وحده .. !
واحنه هم .. وصلت لرغدة.. شفت رغدة اغتصبت الابتسامة 
كعدت كدامنا وتسأل عن الاحوال  . 

بينما  حسين ومحسن يم الزلم
.
اني ليان عمري 26 سنة عزباء   حسن الله يرحمة اخوي الجبير و حسين الوسطاني عمرة 32 سنة مهندس معماري ماخذ الماستر.. و  اخوية محسن كيميائي عمرة 28 سنة واني اجيت وراه و رغده عمرها 20 سنة وراية
واخر العنقود اختي ختام ...
................
يقين

تغدينا ... وخلصنا  . واني كلبي بعده يدووك حيل ما اعرف ليش .......

***
حسين

رجعنا اللبيت
دخلت لأمي اريد احجي وياها على انفراد
ها يمة بشري عدهم بنات شابة  .

ي يمة عدهم ليش تسأل

اريد ازوج ابنج منهم

يا قصدك محسن

اي اشبيج  شنو ما ترديه يزوج

يمة منى عيني  بس ردتك انت بالاول

هههه مو جربت اني لو نسيتي مايا

يمة هاي شنو الانكليزية انه ما حسبتها زواجه ولا فرحت بيها ولا شفتها  اريدلك وحده من اهنا

هسة عوفج مني وكولي عدهم بنات شابة غير الارملة  ...اذا ماكوا ترة ازوجها اله ..

ماعده قحطان خوات مو كوتلك من قبل بس وحده .... بس عنده بنات اخوته .. عدهم بنات صالحات للزواج وحده مخطوبة والثانية بت الجبير هم مخطوبة باقية بس الوسطانية  بت الجبير بعدها والله خوش ابنية جمال واخلاق من شفتها ردتها الك ..

لا يمة اني شنو ..  راح احاجي محسن ويخطبها انشالله ...
كلتي حلوة  ؟؟؟

......
اول مرة يعصب محسن هيج بوجهي ويكول لو تنطبق السما ع الارض يا حسين ما ازوج بهاي الطريقة 
- ولك اصيح بوجهي ؟.

- حسين وخر عني الله يخليك اني اكلك عاشك وحده واريدها انت اتريد تخطبلي الثاني والعباس اذا تفتح هذا الموضوع لا...

**
محسن جنت معصب واصيح
واحلف فاجئني من لزمني حسين من ياختي وجان يبتسم بهدوء ويحجي

شوف  ولك اني حلفت اجيب نسب و جاه الكم وارفعكم لفوك يالغبي  ...لا تجي انت تخرب  كلشي ......  الكوزمتك بعدها ما مداورة بأسمك والله لهدها واهدك وياها اذا ما سويت اللي طلبته منك

كأنه واحد ثاني مو اخوية .    اشلون يساومني هيج ويذلني ....
  طلعت من البيت زعلان ..ردت اركب سيارتي تذكرت هاي من ماله سديت الباب بقوة ودفرتها ورفعت نظري للسما جزعان وجان المحه يباوع الي ويدخن من الشباك ....
ما رحت ثاني يوم للكوزمتك .

خابرني ما رديت ...دك عليه رقم غريب اتمنيت تطلع يقين ..رديت طلع هوو

شوف ولك والله اذا ما اجيت اليوم للبيت احسب  كلشي حاسبة الك انباع انباع يا محسن حتى تلفونك اللي بيدك  وسد الخط .. 

لزمني من ايدي التوجعني .... رجعت للبيت كاره نفسي وكارهه حيل .. اباوع بعيونه حتى يحس بيه ...  

شمرت التلفون بوجه

- اتعيرني يا ابن ابوية
سكت مجاوب

اخذ كلشي ومراح اذلني ..

عفته ردت اصعد لغرفتي

ما الك غرفة اهنا ببيتي ...
والكوزمتك احسبة باجر ملك غيرك ...

يدخن ويحجي جانت الساعه متأخرة والكل نايم الا هو  ..
عفته وطلعت للشارع رحت لبيت صديقي  .

**
حسين .. 
جنت معزم ابيعه بس داخلي يدري مراح ابيعه
وبالفعل دخل عليه محسن الصبح للكوزمتك
خاضع ... 

اخوية واعرفة ما يواطن عشية الفكر ...

انطيت  علم لأمي اتروح تخطب اله   بتهم .

وراحت واخوية من يومها ما يتواجد هلكد بالبيت وبس تنفتح السيرة يكوم شارد  ....

امي كالت انطونا  وقت نفكر ....
........
يقين من اجوني خطابة كلت لعمتي اتكول الهم ما اقبل اريد اكمل  دراسة

جنت اشخبط بالسجل

عمتي كعدت يمي

وافقي يقين ...

عمة شوافق انت مو جنتي اتكولين  الي لا تزوجين قبل لا اكملين دراسة ؟؟
شغيرج

سكتت
جاوبتها اني
لا يكون صدك انت خليتي عمي يخطب بتهم بس على مود قطعه الارض وهسة هم على مود مصالحكم راح اتخلوني ازوج ؟؟؟

-جب ..كافي
لا اتوافقين  محد يجبرج  اني ما حابة الج الزواج هسة اصلا ...ردتج صدك اكملين ... بس غير انت الغبرة موتني ذبولج على هذا ابن الاوادم ....

صفنت ..
معقولة اتريدني انساه بخطبتي  من غيره

لا تجنين علية عمه

ضحكت  بثكل

يا عمة تدرين العريس منو ؟؟
اخو حسين ..اتعرفين حسين منو  .ابن ام حسن ام خطيبة عمج ..تدرين شسمه ....؟ محسن ويشتغل بسنتر وتدرين يا سنتر ...اللي خلاني صاحبة همزة وصل وارادني اوصلج  هدايا  ...
ضليت مثل  المضروب صعقة ....  محسن متقدم الي .... تنومت مغناطيسيا ......

  يتبع