رواية ما بين النسر والشيخه الفصل الثاني 2 - بقلم اوسار

#قدك_المياس

مابين النسر و الشيخة

من كتابات زهراء العراقية

الفصل الثاني

صعدت ببطئ جمدلي أطرافي واتعدتني وراحت واني وراها ....

-عمة !!! ا شسمة ردت بس يعني

- رايحة لهلج شاردة مني ؟؟ 

ظليت امتمت
حطت الغراض وكالت تعاي اكعدي كبالي ...

كعدت يمها 
- شنو نوعية علاقتج بيه
- هااا منو هوووو

- اعيونج من اتفريها هيج معناها اجذبين يا بت امج ...اخذي جنطتج وروحي لهلج ...بلكت يربوج من جديد ...

دمعتي اسرسحت ...

-عمة !؟؟
اروح ؟؟؟

- اي روحي .. واخذي كتبج وياج .. 

نزعت عباتها واني بعدني كاعده كدامها على سريري  اللي ابصف سريرها ...  شالت كيس وشمرته بحظني ....

- هاي هدية بس مو مني

تركتني وراحت للحمام ...

- عمة  بس ......

وكفت يم الباب وقاطعتني

بنرفزة وباوعت الي بعيون مليانه قساوة وبرود

- اطلعي برة ماريد اشوف خلقتج ولا اصعديلي بعد ...يلاااااااا

طلعت شاردة من قساوتها
ماكو مسافة تذكر بين بيت جدي وبين بيتنا
دخلت  ابجي ......

***
حسين
-يلا يوم  خلصت
-اشعندك تنتظرني يوم ما تسوة جان كلت لاخوك يوصلني لو المضيف بعيد بس هو هذا وينه ..

-لا يوم  الدنيا حر وين تتحملين

ضحكت وكالت
-يمة انت تعودت على جوة الغربة ونست ارويحتك حر البصرة

صعدت يمي بالصدر و رحت اوصلها  ...

صدك ماتسوة بس فرع واحد.بينا وبين المضيف اللي فاتحه شيخ دين و مخلي مدرسات دين ينطن دروس وامي مشتركة بيهن .....نزلت امي واني سقت من غير واجهه عجبني افتر بالمنطقة اللي رجعت الها بعد كل هاي السنين .....جاي اسوق واشوف مرة واكفة بالشارع الخدمي وسيارتهم سادة الشارع من باب النخوة نزلت ... 
شفت الرجال فاتحها وحاير بيها ...

-الله يساعدك اخيي تحتاج شي ... رفع راسه وكال الله يحي اصلك اخوية بس عاد ايدك وياي نحركها عن الشارع سالفتها تحتاج تصليح ...

انداريت وخلعت يلكي جنت لابسه فوك القميص واجيت احط ايدي وياه وادفعها  
واهنا المح ذيج ام خدود الريانة  واكفه على صفحه وجنطتها على معصمها

باوع الها الشاب وكال

- عمة بس نوخرها منا واخذلج تكسي ..
هزت راسها

واني كلت هاي عمة صاحبة محسن دفعناها
وعركت نسيت نفسي وحكيت شعري ماسح قطرات العرك ...وخرب شعري الواكف ...
تنهدت وباوعت لكترهم شفته اتقرب عليها وبكل تهذيب وكف يمها
اوووف هيج ترافة واكفة عركانه والله مو وجه حر هااي الاخدود

ما اعرف شجاني هي هيج حلوة لو حرماني من الجنس اللطيف خلاني هيج نفسي دنية واباوع لعرض العالم ...

رحت لسيارتي ...وكلت من باب الرجولة اطلب منهم اوصلهم .....!!!!
بالفعل عرضت عليهم بس كأن الشاب ما اله اي كلمة وهي الأمر  الناهي ..  صوتها ما وصلني بس كانها كالت لا
فالشاب اشكر مني وكال ننتظر تكسي ..
اصريت اني ....

واخيرا سمعته لصوتها

- لا راح اتصل خوية   باخوية ...نشكر منك ..

- ها على راحتكم ....

مدري شكال الها الشاب
وهي صوتها وصلني

-يا عدهم كعده  ولك اهنا ماكو تكاسي هلكد اتمر خط خدمي ...

اتفهة بمشيتي واسمع حوارهم ... ما ودي تنتهي هاي الشوفة ..

واسمع الشاب يكول الي خويي ... بلا زحمة وين طريقك ...ابتسمت اله ورديت
بطريقكم وين ما جان ...
- الله يوفقك راح نزحمك ...
وراح الشاب فتح الباب .. وهي اجت مثل الملكة كعدت ..... اني جنت لازم الباب مالتي وصافن عليهم ....الشاب التاف و صعد يمي ومشينا ...مو من طبعي اباوع من المراية رغم الرغبة موجودة ......... هي مرة وحده لبيت الرغبة شفتها لابسة نظارات طبية وتقرة ....
وصلنا ابسرعة ... وما كدرت احجي وياها اي شي ....
نزلت هي والشاب ....ولفت نظري هي دخلت لنفس المضيف اللي دخلت اله امي ! اذن تدرس اهنا .....

**
يقين
اجيت لبيت جدي واني حالفة اراضي عمتي واعتذر منها وما اروح منا بعد  ...طبعا عاتبت محسن ...كل ظنه عمتي سبورت و مراح تحس عليه رغم سوايته مبينه مفضوحة .. 

صدك بس اجت من الحوزة  اللي تنطي بيها دروس رحت ركض ، اجهالتني وهي تمشي بالصالة وصلت يم غرفة عمي .... وكفت يمها وكالت
-سدي بابج سمر ترة حماج توه فات منا وانتي مهلعه وبابج مفتوح  ..

- هاا والله ما انتبهت

عافتها وراحت ....من صعدت ...شافت طفل عمي يريد ينزل صاحت لأمه رسل تجي اتراقبة لا يوكع ودخلت لغرفتها واني وراها كأني عدم
كعدت نزعت حجابها و جواريبها واني كعدت على الارض يم اقدامها

-عمة والله بعد ما اظم عليج شي ...
والله اني احبج اشلون اهون عليج اطرديني ...اهون عليج ما تحجين وياي .. مو اتكولين اني نفسج بهاي الدنيا !!!
ليش قاسية وياي  ؟؟؟

سكتت وايام ظلت ما اتباوع لخلقتي  واني فارضه نفسي رجعت لغرفتي لان امي ضغطت عليه اتريد تعرف ليش رجعت ... وعمتي ما حاجتني وطردتني بس ما تحجي وياي

مايجيني نووم والسبلت يدك عليه واني مطروحه بنص تلليل واحس الغطى صار عليه ... غمضت اعيوني من حسيتها يمي لمست  شعري و راحت لسريرها ...!!!!
،
بيت جدي دوم يضج بالخطار وحيل جبير بالمساحة بيه الاحفاد والابناء اللي يريد يطلع يطلع ...بس همه يحبون ابوهم عمامي وباقين وياه حتى ابوية ما راح بغير منطقة من فكر  يعزل .......
..

جانت عمتي يم جدي بالديوان كاعده وهو يتعشى وحده لان جاي متأخر .. رحت يمهم ..

كتلتني عمتي هم ما  باوعت لوجهي واني كاعده ...

- بوية  عوفك من بت فيصل ..
اني  اخذت عنوان البنية اللي يريد يزوجها ابنك سألت عنهم وعرفت عنهم كلشي  

جاوبها
-ماندخل غرب النا ...

ضحكت وكالت غربيش بوية عليه هذا الحجي .. لعد مرتك هسة مو غريبة ؟؟
ههههه بوية انت تفكر لبعيد واتريد تاخذ بت فيصل لأن والدها  مدير عام للهيئة ويفيدك اذا اترقى  بس فكرلها لقريب من سألت واطقس عن اهل البنية اللي ابنك هاويها ...عرفت اخوها مشتري الكاع اللي ابصف اراضينا  الي بال****

ما فهمت عليج يعني ابو ناصر الكلب باع قطعته اللي كاطعه علينا الري ويحاربنا بيها واخيرا ..!
يا حقير اشكد ردتها وسمتها اله بسعر ما تسواه ورفض
من اشوكت هذا الحجي ليش انه ما اعرف ؟

انت   تدري بوية  اشكد يكرهك ويكره جدي الله يرحمة حاسبكم اعداء اشلون يبيعك ...المهم بوية اخوهم جاي  من الخارج وجيبة متروس بعدين هم مو غرب يا بوية هم من نفس عشريتنا من غير فخذ ...ويجوز تعرفهم

صدك عمتي من كالت اله على تفاصيلهم تذكر جدي وكال اعرفهم ابوهم خوش ابوو وخوش ناس وامهم من مدري يا نسل ذكره جدي من نفس عشيرتنا ... بس هم كال جدي ذوله بعيدين عنا ...

باوعت الي واخيرا عمتي .. وامرتني اطلع بس طلعت ....سدت الباب وقفلته .... وارها طلعت من الاستقبال ....وبشرت اخوها جدي وافق يروح بنفسه يخطبله المرة اللي يريدها .... عمي
لكف وشبك عمتي ...
- صدك يعني قبل واخيرا الحجي

دكت على ضهرة

وخر عني ولك ...اتريد اتروح للسويد موو
خلها اتفيدك هاي ام المخابرات  تالي الليل اشوف اتفيدك لو لا ....

ضحك و بيومها صدك فرح واني هم فرحت اله ...
صارله سنتين كل ما يفتح موضوع الزواج جدي يكله تاخذ من اللي اني اشر عليهم ...
وعمتي اتباوع الهم من بعيد ولا تدخل رغم توسلات عمي الها
تاليها  بكعده وحده اتقنع جدي ااااه يا عمتي ابد مراح افهمج ...

بالليل
جانت اتريد اتنام اجيت يمها على سريرها
عمة .. عمتوووووا
اشوكت السماااح ..
جانت صافحة على يمنتها ... اسطحت على ضهرها
وكالت شفتي عمج .... راح ناخذلة اللي رادها ..

مجاوبت ..

ما دخلت من سنتين ما راغبة بيها ...... لأن تحجي وياه من ورة اهلها اشكد ردته يعوفها بس بعد هي قسمته ..

لعد ليش قنعتي جدي؟؟ بعدين الحب مو حرام ..

باوعت الي بالتفاته حانية وكالت

ياما بنات كسرن ضهروة اهلهن بالحب الحلال مالتج ...... صارلها سنتين تتوسل بعمج يخطبها ..حتى تثبت حبها حلال  .. لا اصيرين مثلها بيوم يا يقين الحب الحلال هو اللي يدك بابنا غير هيج اللي يشله من الشباك وكلام التلفونات هذا يرخص من البنية

حسيت الكلام اخترقني
- بس اني ممسوية شي غلط ...

- اذا ماكو غلط ظلي يمي ..... بس اذا عندج علاقة بيه روحي لهلج من باجر ...

سكتت

-شو سكتي ؟ على العموم مراح افتش بتلفونج ولا احاسبج ...كلمة وحده منج اصدكها .... عندج علاقة بيه بالتلفون لو بس  نظرات ؟؟؟
صفنت كأنها اتريد. تكتلني اكو واحد يهدي وحده وهو بينهم بس نظرات ؟؟

جاوبت واني حانية راسي
- اوعدج عمة والله العظيم حتى الرسائل اللي بينا تتوقف ...
انطتني ضهرها وكالت بنزعاج

- روحي اريد انام

-والله عمة ....

ما ردت ...
مع ان اني ما مقتنعة ليش يحرمون الحب وخاصة اني واعية وفاهمة لا يمكن اوكع بالغلط واللي احبه يخاف عليه مخابرة ما يخابر .. احنه علاقتنا ابتدأت من هو جان سايق خط خاص وشكلت اني وياه من جنت بصف الخامس اعدادي بدت بنظرات ... من خذت رقمه حتى يرمش علية من يجي صار تبادل الارقام ...بعدها صار موقف وبانت غيرته عليه واحرجني من تعارك مع شاب واني عابرة الشارع والشاب اتقرب مني ينبهني محفظتي وكعت ....
بعدها بينت اله اني ضجت وكتله راح اعوف الخط  ... بس بيني وبين نفسي ميته من السعاده ... من رجعت للبيت اتصل واعتذر ومنا بدا حبنا ..... وهو بعدها احوالة تغيرت  ما شاء الله  اشلون اوفي بوعدي لعمتي وهو صاير النفس ...
دزيت رسالة الة "" محسن منا وجاي ما نسولف مع بعض رجائا صارت عندي مشاكل واني ما اريد اهز ثقة اهلي .... ""

عارض و خابر وما رديت انطيته حضر واني ابجي ....  بالفعل كلامها لو يريدني جان بس من رسلت اله الرسالة كال اخطبج ...بس اضاهر ما ناوي ومو اني الي اتوسل اله يجي ...
بس حيل انتهيت وبان عليه التعب النفسي ...

**
حسين
.. طلعت من الشقة .. وطلعت نغم وراية ..

ما كولت الي اشوكت اشوفك حسين ..

اشوكت ما اتصل بيج ...

اوك بس حباب لا تتأخر ..

حسب المزاج

غمزتوصعدت السيارة ووصلتها ..

.

احس بفراغ لأن لهسة ما بديت بمشروعي الخاص  كل الي سويته هسة لهلي .. 

وكفت يم البيت وشفت امي طلعت واجتني كعدت

يلا يمة امشينا وراية عشا

اي بس اشوية  ..

جنت اريدها تطلع  ... ما اعرف ليش حبيت اشوف ذيج اللي دوم ذايبة من الحر ...
طلعت من بين النسوان ...الشابة الوحيده بيهن .. حجابها اسود ما يتغير قريب حيل على اعيونها  اجفوف سود تغطي اديها وجنطتها اللي على معصمها اشيلها .. نفس الشاب ينتظرها فتح الها الباب واختفت واني صافن عليها امي ندستني

يا يمة دسوق لو ادري ماشية للبيت .

ها يمة امشينا  ...

***
يقين
عمتي راحت وية جدي ومرته للزيارة بكربلاء ويظلون يومين اهناك ...

صارت عركة جهال بين جهال عمي عايد و جهال عمي احمد  ..

اجت عمتي سمر زوجة عمي عايد
كتلت اولاد عمي احمد واخذت بناتها بعصبية ..

رسل - يا ليش هيج كرصتي الولد خده صار احمر
وانتهت السالفة بسكوت مرت عمي احمد من مدت لسانها سمر
..
اوف اجه الليل واني ما اكدر افهم كلمتين من دروسي  اوووف اوووف كل فكري وية محسن ...
......
فرشنا السفرة الطويلة و حطينا بيها ما لذ وطاب ... كل مرة كلنا نتعاون على العشا
بس بغياب جواهر لا سمر طلعت ساعدت ولا حوارء بس رسل  واني وبت سمر طلعت وامها
صاحت الها 
دا اكل
سمر كالت
- ابو عبدالله  ترة مايصير هيج بناتي ما يكدرن يلعبن  من ولدك لا وبعد ما اكدر اطلعهن من غرفتهن حصرة تجيني مرتك تعد وتصف ..

جانت مرت عمي احمد اتجيب دوالك الماي حطتهن وكعدت يم رجلها...
ضربها ع متنها ..
جم مرة اكلج لا تدخلين ويه الجهال .. 
الدفعه صارت قوية طخت بية ...
كلها كاعده.... والزجرة قوية ..سكتت ودمعتها اجت تطلع من عينها اباوع لسمر مبتسمة ..  اشكد اكره هيج شي يصير كدامي واكره ضعف عمتي رسل اللي سكتت وبلعت الرزالة اللي رزلها الها

**

ليان
كاعده وصافنه على حركات هاي المجنونه رغدة بعد ما راحوا اهل حبيبها وخطبوها اله ..
اتخبلت  وكفت تركص وتتمضحك

ولج ليان خطبني خطبني ....ههههه وجان اجيب ابن الشيخ للدرب وصار خطيبي ههههه
قحطان خطيبي

الف مبروك حبي والله تستاهلين اكثر بس شنو هاي مال وكعته ما عجبتني

اي ولج وكعته بثكلي واني جنت حيل معجبة بيه ووكعته بخطط مرام

انت وصديقتج مرام داهية المهم خلصت منج ومن مخابراتج تالي الليل والحمدلله عدت وما كشفج محسن جان هسة طلعناج جنازة

ضحكت وهزت ايدها واستمرت تركص

**
يقين

عمي اتلكه مرت جدي و امي من اجن من بيت الناس

ها بشرن

مرت جدي
شنو قضيتك همه لاكين مرت الشيخ تدخل بيتهم
لو نخطب منهم يحمدون ربهم

ضحك وكال هسة شفتوها ..عجبتكم

امي كالت
اي زينه شايلة نفسها ...

جانت عمتي بالمطبخ تشرف على الطبخ جدي عازم اصداقائة .. وما اعرف ليش ما راحت للخطبة .....

**
حسين
جنا نتعشا وامي كالت النا خبر خطوبة اختي ..
جنت اسمع من غير انتباه لأن رغدة صغيرة وبعدها طالبة وهم ما عاجبني تزوج قبل ليان

محسن
وشعرفهم بيها...

امي جاوبته
يا يمة اليسأل ما يتوه ...

شنو دارس .... ؟

جاوبته ليان ..

محسن ... يعني اتخرج  العام من نفس كلية
رغدة وباوع الها خزر ....خلاها ما تعرف تاكل

حسيت راح يكوم يضربها كدامنا .. 

صحت بيه

محسن ...

كملت امي واني ضجت اريدهم يسدون الموضوع

اي يا يمة خوش قسمة

جاوبتها

لا يوم سدي السالفه رغده اصغيره ..

صغيرتج يا يمة اختك جبيره 20 سنة عمرها والولد ما يتفوت .. ولك يمه ابن الشيخ علوان ..

محسن  وهو يباوع لرغده

لو ابن الملك فيصل ما يا....

قاطعته
مرته عدنا ...
صفن عليه محسن

شنو مرته عدنا شنعرف عنهم

ولك انت ما تعرف الشيخ علوان

ما اعرفه بس سامع بيه وادري بيهم كاعدين بنفس المنطقة بس شعرفني بيه حتى احنه من غير فخذ

يوم انتظري يومين وردي الهم خبر بموافقتنا .. باوعت لرغدة وكلت .. هاي اذا هي وافقت طبعا ..

خجلت وكامت  ...

،

طالع من   مكتب العقار ... واجه بالي اروح لأمي عسى ولعل اشوفها ...
من اشوفها احس ودي الوكت يتأخر ويوكف حتى بس اركز بملامحها واخزنها بثكلها وجمالها
اخذتلي فكري ...احاسيسي ما حاسهم من قبل حتى وية مايا ... اووف يا مايا ..

طلعت امي .....و وياها هي ..
دخلت وامي وكالت يوووم اريدك اتوصل بطريقك الست جواهر .. ما ركزت بالاسم جان الراديو  عالي طفيته واتمنيتها اتعيده ما عادته ..

كالت سواقها متمرض

ابتسمت اللبوة وكالت
السلام عليكم ...
عرفتها امي علية
هذا ابني الوسطاني حسين ... اصغر من حسن اللي سولفت الج عنه بسنة ..

كعدت وسدت الباب ..

وين اهلج كاعدين يا يمة
جاوبت .

لبيت خالي ... اطلعوا كبل .اهنا همه ....لو ما الحر جان مشيت الهم  مشي ...

امي يمي وهي وراية  ...

اتنازلت وباوعت الها من المراية .. شفت عينها على قرأن صغير وتقرأ .   استغفرت ونزلت نظري عنها واني اكول انت وين يا حسين وهي وين ..... الله يستر عليها ويكفيها شر اعيوني ونفسي اللي دنت عليها !!!!!!!!!

يتبع