رواية #ما_بيننا_كان_اعظم الفصل التاسع عشر 19 - بقلم اسراء الجميلي

#ما_بيننا_كان_اعظم
الفصل الثامن عشر
#قصص_اسراءالجميلي

اني لحگته بس بقيت بالباب مال الصالة اسمع الي دينحچي ..
يلا ياب خلص الموضوع ..
عمي : يعني راح تجي ويانه خيال ؟
مهند : لا يابه حتبقه ابيت ابوه ..
متريدني خيال ..
عامر : غير من فعلك متريدك ..
مهند باوعله صفح ..
اني مجاي احچي وي الصغار ..
اتقرب عامر عليه ..
ليش حضرتك شد شوف مصاصة بيدي ..
ابوية خزر عامر يسكته ...
اتقرب على مهند لزم جتفه و يربت عليه ..
يابه بنتي ما ممترباية اربيها و اني اجيبها بديه الك ..
عامر : اختي مترباية ما بيها شئ ..
رجع ابوية باوعله : اسكت عامر ..
مهند يباوعله الـ عامر : عوفه عمي حقه ميعرف شئ ..
عامر اتقرب له اكثر : اعرف كلشي اختي ما تضم عليه ..
عمي : كافي مهند و عامر سكتوا ..
لا حشاك عمي ..
انت ما قصرت بتربيتك ..
اني ما قصرت بس هي طلعت عوجه ليش ما ادري !!!
عمي : خير ان شاء الله ابو ثامر ..
اني يعز عليه اروح و ما ماخذه ويايه ..
ابوية : بسيطة خوية هي تجيك و تبوس راسك بعد ..
بالله لو متبرع بيه الدار الايتام مو احسن ..
بكيفه يجيبني و يوديني ..
عمي : الله كريم ..
ابوية اتقرب على عمي ..
بس خوية ابو مهند هاي القصة ما اريد احد يعرفها من اهاليتنه ؟
خوية شلون تنضم ؟
بسيطة اي احد يجيبكم راحت الاهلها ..
و اني ياهو اليجينه جاي تزورنه ..
عمي : تأمر ابو ثامر ميصير خاطرك الا طيب ..
طلعوا بيت عمي ضايجين ..
خايف من العالم اكثر مما خايف على ضناه ..

صاحني ابوية بالصالة : سمعتي مو ؟
اي ياب ..
اني اربيچ و ارجعج ..
اني متربية ابن اخوك هو الي ناقص ..
گام عليه راد يضربني ختلت ورى عامر و امي جرت ابوية ..
بت الكلب تراددني ..
اني ممراددتك اني اگول الصدگ ..
و مدام تگلي اربيچ و ارجعج ..
انجبي لچ اسكتي ..
و يريد يهد عليه و اني حامية راسي بچتف عامر ..
اني حبقه ممتربية حتى ابقى يمك ..
ظلمك و انت ابوية احسن من ظلم الغريب ..
گام يعيط : و الله الا اشوفچ ايام اطوخ من سواد الليل و اخليچ تتمنين ليلة يم الي تسميه ناقص ..
امي : كافي يا رجال حتروح الابنية منا علمود گال فلان و حچه علان ..
انتِ معليچ لا تدخلين ..
عامر : مدامني عايش يابه كلشي ميصير الـ خيال ..
تبقه اهنا معززه مكرمة منا لحد ما هي يعجبه ترجع او لا ..
ابوية : خلي انشوف كلام منو يمشي ..
كلامي لو كلامك يالحمش ..
طلع ابوية و لحگته امي ..
اندار عليه عامر يضحك ..
لچ عزه بعينچ صايره تجاوبين ..
باوعتله بحزن ..
الظلم خوية يحچي الاخرس ..
صح تحچين يا خوختي ..

بقينه هيچ و مشت الايام و الاسابيع و الاشهر ..
و زاد ضغط ابوية الحنون و منع عني الطلعة الا وي عامر الي يجبره عليها او ينتظره يكون ماكو يطلعني ..
طبعاً ريم وصلت بشهرها ..
حسب مگالتلي رغد ..
و مهند الگاع متشيله من فرحته بيها ..
هي رغم بشهره و تعبانه بس عالگتله العشرة شمع ..
و رايحين يشوفون الطفل شنو ممبين ..
هو متأمل ولد و بس يشتري غراض ولد ..
اتگلي حتى الحجلة و البايسكل و مرجوحة عبالك مولود كلها لونها ازرگ ..
و ميقبل يصيحوله الا ابو حسام ..

طول كل هاي الشهور فلس احمر منطوني و ذهبي و فلوسي باقيات بغرفتي ..
مهند ناقل كل غراضه الباقية يمي بغرفة ريم ..
و غرفتي قافليها على غراضي ..
همه طبعاً هدم واحد مجابولي ..
حاولت رغد هواية تدخل الغرفتي حتى تجيبيلي جزء من هدومي او فلوسي ..
بس المفتاح يم خالتي و محلفها عمي غرفتي ما تنفتح الا اذا رجعت او اطلگت ..
عامر ممخليني محتاجة شئ و لا خواتي ..
كلما يجوني جايبيلي لبس شكل ..
ثامر يخلي فلوس بدية من يطلع ..
ابوية گطع اي كلام طبيعي وياية ..
ما عدا الغلط و الطلبات المستمرة طول ما هو بالبيت ..
اذا يطلب شئ و امي رادت تسويه يرفض و يتعارك ..
يگلها لعد ليش خلفنه بنات غير الخدمتنه و يريحونه بكبرتنه ..
كلشي چنت انفذ و لا يرجعوني الـ مهند ..
چنت احس بفراغ جواية ..
ماكو اي مشاعر ..
حتى الضغط العليه و الظلم الفوگاية گمت ما اشعر بيه ..
صرت جسد يتحرك و رئة تتنفس و قلب يدگ بس ..
حالي حال اي قطعة اثاث بالبيت ..
خالتي خلال هاي الفترة زارتنه مرتين ..
من تجي ابوية يگلب وجه ..
تسأل عليه و الجواب زيارة طبعاً ..
ايهم متجيب سيرته ابد و اني الخجل كاتلني ما اسال عليه ..
و الصدگ معركتي وي ابوية صارت مو بس علمود حبي الـ ايهم ..
صارت علمود حبي لخيال لنفسي المهضومة من قبل الي كل الناس تسميهم اعزاز ..
اعز الناس اذوني و اولهم الي كان سبب بوجودي بالدنيا ..
شترجه من الغريب اذا ابوية ميحن عليه ..

بيوم گاعدين كلنه ننتظر عامر على الغده ..
اجانه و وجه مليان فرح ..
باركولي باركولي ..
ابوية باستهزاء : خير عيني ؟
باوعله عامر بتحدي ..
الشركة الي اشتغل بيها سولي عقد عمل بـ الامارات ..
امي : يعني شنو ؟
يعني سولي عقد بفرعهم الاصلي اهناك لمدة خمس سنوات ..
شاملة السكن و الامور الصحية و التعليم ..
وي راتب شهري ٥٠٠٠ دولار ..
اول مرة اشوف وجه ابوية فرحان گام على عامر ..
عامر بصفوا نيته و قلبه الطيب اتقرب عليه و باس ايده و راسه ..
امي عيونه هلت دموع الفرح لسعادته و الحزن لفراگه ..
بسمه تبچي و تضحك ..
اني بقيت گاعدة بمكاني رجلي گامت متشيلني ..
هم يبوسون و يسالوه و فرحانيله ..
و اني دموعي كتت من الحنين ..
الحنين الي اشتعل بداخلي اول ما عرفت ..
حنيني للسند و الحايط المرتچيه عليه ..
حنيني الايام چنت اعتبرها بيها نوع من السكون ..
حنيني الدفو حضنه الاخوية الحاس بيه ..
حنيني الاخوية العلمني شنو معنى الحنين ..
حنيتله قبل ميروح..
باوعلي بعد ما باركوله الكل ..
اتقرب عليه گنبص گدامي و اني گاعدة على الكرسي ..
اني گتلهم عليچ و گالو چان ممكن نضيفها عليك لو كان ما عدها احد غيرك ..
ابوية : ليش احنه وين رحنه وليدي ؟
احنه يمها و هي بتنا ..
باوعت للوالد بعجب و فتحت عيوني و حلگي ..
بدون ميتقرب يحچي من بعيد ..
هسه حتشوفين الفرق بيني و بين عامر ..
محد حيقصر وياچ ابد و يصير كل الخير الي انطمن بيه عامر ..
گام عامر و حضن ابوية ..
حچاها ابوية بلسانه بس بعيونه مشفت ذرة رحمه ..
يجوز اتخيل اني هالگد ما شفت منه اذية ..
بس هذا ابوية شميكون لا يمكن يسويلي شئ يأذيني ..
رجعلي مرة لخ عامر ..
عامر : المهم اني ابد ما انساچ و قلبي دومه وياچ و اتصل بيچ و اطمئن عليچ ..
تدرين حبيبتي اني لازم اكون شئ العائلتي ..
و هاي فرصة و ابلد عربي ..
اتقرب اكثر عليه و حچه بصوت ناصي ..
راح اوصي ثامر و البنات و اي شئ يگولولي عنچ ميعجبني اجيج راساً ..
اعرفك متقصر ..
لزمته من راسه و حضنته بقلبي مو بدية ..
بده عامر يشتغل بالمعاملة مالته و الفيزة ..

بعد كم يوم اتصلت بيه رغد ..
اول مشلته : لچ اسكتي مو اجته بنية ..
منو هو ؟
غير ابو حسام ههههه ..
الحقيرة فرحانه بيه ..
وچ حرام كل الي الله يجيبه نعمه ..
لا استغفر لله اني مو قصدي اعتراض على الله بعدين اني شنو ولد ؟؟؟
ههههه ..
لچ بس اقصد هو خبصنه ابو حسام و ابو حسام و لحد يصيحيلي مهند ..
بس الله انطاه على گد الي سواه بيچ ..
اني ابد ما انسى من راد يتزوج عليچ شلون يگله الـ عمي اريد ولد يشيل اسمي ..
ليش هو بكيفه يجي الولد ..
صحيح مو بكيفه ..
بس ترى هو حقه يتزوج عليه ..
خايبه دولي ليش عود ؟
لان اني مقصرة وياه كلش ..
ابيش بالله مقصرة ..
هااا اتذكرت ما چنتي بلا حيّ مثل ام جنا ..
ام جنا منو ؟
مو ريم سمت بتهم جنا ..
هااا الله يسعدهم ..
مو بس هيچ رغد اكو شغله اكبر بيني و بينه ..
يعني ميصير اعرفها ..
لا يجي يوم تعرفيه بس هاي الفترة تعبانه ما بيه احچي بيها الاحد ..
هاااا خوش راح احاول اسكن دودتي بين ما الله يهديچ ..
هههههه خوش ديلا خلي اروح ام دودة ..
بوسيلي عدولة ..
تبوسچ العافية ..
سديته و حچيت وي ربي ..
سبحانك ربي ما اعدلك ..
صح الابنية مو كسره و ندخل بيها الجنه اذا ربيناها صح ..
بس لان هو ادعى عليه و قهرني بيومها ..
استغفر لله يا رب اللهم لا شماته ..

مشت الايام و مر اكثر من الشهر ..
و صار موعد وداعنه لـ عامر بيوم اسود ..
البيت كله انگلب حزن ثامر كلش اتأثر لان عامر مو بس اخوه صديقه همين ..
امي خطية بس تبچي ..
اني بكل ما بيه من قوة حاولت افرحله ..
احس فرحتي بيه منغصه ابيش ما ادري ؟
بوسنه كلنه وصل الابوية ..
بوسه و حضنه ..
يابه عندي طلب منك ؟
أأمر عموري ؟
يابه اريدك ادز على عمي و اطلگ خيال ..
ابوية بقه ساكت ممتوقع هيچ طلب ..
يابه كلنه ندري خيال متريد مهند من البداية ..
بس الابنية تعبت و الولد شاف حياته و مرتاح ..
ليش تخليها مثل البيت الوقف ..
خليها هي هم ترتاح ..
ابوية : و اهلنا شلون و گرايبنه ترضاها يسمعوني حچي بتالي عمري و شيباتي الغازية شعري ..
يابه كل لشه تتعلگ من كراعينه ..
شعلينه بيهم خو نقضي عليها الخاطر كلام العالم ..
باوع على ثامر و خواتي : مو صح احچي ..
ثامر : صح يابه بعدين ليش ترجعها و تخرب بيت مهند ..
خليها يمنه اجتها قسمه كان بها ..
مصارت قسمه تبقه يمنه احسن ما تنذل بيد الضره ..
بقه صافن ابوية شوية بعدين گال ..
يصير خير دسافروا انتوا و الله كريم ..
ودعونه و راحوا ..
 
صعدت بغرفتي و بدت دموعي تنزل مني ..
شفت صورتنه من چنه صغار المعلگه بحايط غرفتي ..
گمت جريتها من البسمار و ظليت احرك اصبعي على صورة عامر ..
يا اخوية يا روحي و يا سعادتي ..
يا كل هلي و ناسي و اعزازي ..
من غبت عني بقت بس صورتك سلوتي ..
انت الي چنت بحضنك انسه كل هم دنيتي ..
حضنت صورتنا و نمت ..
ثاني يوم فزيت على صوت زلم ..
فتحت عيوني گمت من الفراش ..
باوعت على شباك غرفتي المطل على ورى البيت ..
لگيت ابوية واگف و عمال يمه يشتغلون ..
امي صاحته : خير ابو ثامر ؟
نويت اجيب ابو فلح گرابتي هو و عائلته يعيشون يمنه ..
شعجب ؟
طردهم ابو البيت و ما عنده يأجر و يتلطلط من بيت البيت خطية ..
راح ابنيله بالحديقه الورة غرفه و حمام ..
لوجه الله بس الله يستر على وليداتنه ..
امي كيفت و اني همين خطية خوش رجال ..
صدك و الله و بنو غرفه بلوك ..
سگفها سندويش پنل ..
بيها شباك واحد عالي و بيه حدايد عبالك مال سجن ..
و بابها صاج قوية و عريضة ..
كملوها باسبوع رحنه انشوفها اني و امي ..
امي : اشو صغيرة الغرفه ابو ثامر ؟
كافي عليهم هو عنده اثنين بنات ..
لعد و الثالثه ؟
هااا مو زوجها ..
خطية صغيره ..
باوعلي ابوية : الزواج ستر للابنية ..
امي : ليش شباكه عالي ..
غير المقاول الزمال ما وگف على راس عماله ..
عمه شلون اغبياء و فوگاها كومت فلوس اخذوا منك ..
يلا فدوة الكم ام ثامر ..
خيال نظفيها ..
حاضر يابه ..
و انتِ ام ثامر جيبي بيها حصيرة و دوشگ و مخدات ..
بس يحتاجون بعد غراض ؟
مو همه همين عدهم كم غرض ..
هااا بيها الخير ..
عدلتها و نظفتها و رتبتها ..
و بقينه ننتظر بيت ابو فلح يجيون بيها ..

بعد يومين اجه ابوية ..
تروحون البيت ثامر ..
امي : اي هسه بس البس عباتي ..
و انتِ خيال ؟
لا يابه ما بيه حيل ..
خوش لعد سدي الباب عليچ و لا تفتحيها الاحد الا خواتچ ..
حاضر ياب ..
طلعوا گمت نظفت و عدلت البيت ..
فتت غسلت ارتاحيت ..
گعدت بالمطبخ اگلب بتلفوني ..
چان يدخل ابوية ..
وگفت على حيلي بسرعة ..
خير يابه شو بسرعة رجعتوا ؟
باوعت وراه ماكو امي ..
گومي بسرعة لبسي عباتچ ..
ليش يابه امي بيها شئ ..
لا ..
لعد شكو وين اروح ؟
ترجعين البيتچ ..
يا بيت يابه ..
بيت رجلج يا العرمه ..
لا يابه فدوة ..
گمت احچي و ارجع ليورة ..
غصباً عليچ تروحين ..
اتقرب عليه لف شعري على ايده ..
اييي يابه فدوة حيتگطع ..
لچ اني مره تمشي كلمتها عليه ..
لا و انوب مو اي مره ..
بنتي الي تعبت عليها و دللتها دوناً عن اخوتها ..
هيچ تكسريني و تخجليني گدام الزلم ..
گمت ابچي و اجر شعري من ايده ..
احس بشعري ينسلخ من فروة راسي ..
عفية بابا الله يخليك و الله مو امشي كلمتي ما اگدر اعيش وياه ..
اسمعني الله يخليك ..
بده يسحب بيه و اني اعيط ..
عياطي مله البيت بس محد يسمع ..
البيت فارغ ..
اسمع بيه صدى المي و قهري المكبوت ..
و الله ادميچ هسه ..
يجر و اني كل شوي اچلب بشئ ..
الكراسي تگلبت الطباخ تحرك من مكانه لان چلبت باليده مال الفرن ..
و صلت للباب و لزمتها قوي ..
هو يعت بيه مره من رجلي من ايدي من شعري ..
شنو يجي گدامه و اني مچلبه و اصرخ ..
وييييينك وينك عامر ..
رحت و ضيعتني بلاياك خوية ..
ويييينك يا الحنين ..
لو ميته قبل متسافر احسلي ..
و ابوية مستمر يسب و يلعن ..
و احنه بهاي الوضعيه دخلت افنان و بناتها ..
شكو صاير ؟
اجتي تحاول توخر ابوية مني ..
عوفها ياب راح تموتها ..
الخاطر الله و رسوله عوفها ..
ابوية من شافها تفاجاء ..
معرف شيگول ..
چان يگلها لو تعرفين اختچ شسوت چان ساعدتيني و گمتي تضربيها ..
بس فهمني شبيها ..
و الله مسويت شئ يريدني ارجع الـ مهند ..
باوعتلها افنان تساله بعيونها ..
ليش مو اتفقت وي عامر اطلگها ..
كذابه اختچ و يريد يجرني ..
رحنه البيت اخوچ اجيت لگيت اختچ تحچي بالتلفون وي واحد ..
اني بعد كلام گام ميطلع من حلگي ..
بلعت حروف كلماتي الحافظتهم ..
وصلت بـ ابوية يتهمني بشرفي ..
افنان : لا يابه لا متسويها خيال ..
شنو متسويها اني اكذب ..
سمعتها تحچي و تتمضك وي واحد ..
اوديها الرجلها قبل ما تفضحنه هو يتصرف وياها ..
لا كذاااااب انت ..
و چان يرجع يلزمني ..
لچ اني كذاب يا بنت الشوارع ..
گام يسحلني الداخل البيت و افنان توخره و بناتها يبچون ..
انگلب بيتنا عزه ..
جرني سحل وصلني للباب الخارجي الي اطل على ورى البيت ..
وين موديني بابا عفيه ..
گمت ابوس بيده حتى يتركني بس لا حياة لمن تنادي ..
فتح باب الغرفة البانيها و دفعني ..
و سد الباب قوي ..
گمت ادگ الباب و اتوسل بس محد سمعني و نفهلي بكلمة ..
افنان : يابه فدوه شدسوي ..
گام يضرب على راسه اسمع صوت الضرب ..
لچ حتفضحني اختكم ..
متزوجة و تحچي وي رياجيل ..
و بده صوتهم يبتعد ..
دموعي بلحظة وگفت ..
بدء شريط حياتي يمر گدامي و كانوا راح يجي عزرائيل ياخذ روحي ..
روحي المسلوبه مني اصلاً ..
افتهمت كل الفلم الي ابوية سواه ..
ابوية من البداية ناوي هاي الغرفة اليه ..
ابوية سجني بتهمت.........
صدگ شنو تهمتي ؟
لان حبيت ؟
لو لان مگدرت اتقبل زوج انفرض عليه ..
لو لان اخوية سندني بالحق ..
لو لان ردت اطلگ ..
صرت طير بقفص و ابوية سجاني ..
جريت نفسي وصلت للدوشك نمت عليه و گرفصت نفسي مثل البردان ..
اني بردانة مشاعر ..
محتاجة الدفو حضن ابوية الفقدته بيوم الي انطيت قلبي الـ ايهم ..
ليوين تاليتها وياك يابه ..
شتريد تسوي بعد بخيال ..
اتخيلت اسوء يوم بحياتي يوم الي اغتصبني مهند بأسم الزواج ..
طلع اكو اسود منه ..
يوم الي ابوية اغتصب كل شعور بالحنية بداخلي ناحيته ..
اغتصب كل حب الطفولة لمثال احسن رجل بعيني ..
اغتصب قلبي و مزقه و مخله بيه ذرة حب اله ..
قلبي الي محد عذبه غيري ..
لان حب الـ مو اله ..
زين هو اني اختاريت احبه ؟
لو قلبي اختاره و وجعني ؟؟؟؟؟؟
و وصلني لهاي المواصيل .

فالقصة قرار مفاجاء من احدهم لخيال حدث بدعوة مظلوم

السلام عليكم ورداتي الفواحات باحلى عطور و كلمات ..
اعتذر لغيابي المفاجاء لظروف لا يعلمها الا الجبار و لان يداوي جرحها غيرهُ ..
صدگوني ما منعني عنكم الا الشديد القوي ..
بس اكو الله الاقوى من كلشي و بأذن الله يفرجها عليه و على كل من احب فيهِ ..

اشكر كل من سأل عني بالگروب او الماسنجر الخاص بيه او الواتباد او حتى سئل عني عند احد الصديقات ..
اشكر اهتمامكم الي يدل على طيب اصلكم و اخلاقكم العالية ..

احبكم في الله الذي احببتوني فيه ..

للتنويه : حادثة حبس خيال صحيحه ١٠٠% و من قبل والدها فعلاً .