رواية #ما_بيننا_كان_اعظم الفصل العشرون 20 - بقلم اسراء الجميلي

#ما_بيننا_كان_اعظم
الفصل التاسع عشر
#بقلمي_اسراءالجميلي

زيد يا ابوية بأذيتي و بعدني عن ايهم و كل الي احبهم ..
ادري بچي و توسلاتي مراح تفيد وياك بشئ ..
بس اني راح ابقه طول ما اني داخل هذا سجنك ..
اتأمل يجي يوم و ربي ينصرني ..
حيظل عندي امل اعيش مثل باقي خلگ الله ..
راح ابقه اتامل تتغير ..
يرجع حضنك الدافي يلمني من ابچي و بس انت الي تسكتني و متخلي احد يأذيني مثل قبل ..
لو تعرف يا بابا شنو مقدار الالم الي سويته بداخلي ..
چان ما ظليت تزيد جروحي يوم بعد يوم ..
املي بيك يا رب تغير حالي من هذا الوضع الاحسنه ..

بقيت على الدوشك ما اعرف شگد ..
اسمع اصواتهم بالبيت بعيدة بس الي افهمه اكو عياط و صراخ و عركه ..
منو وي منو ما عرفت و لا فهمت اي كلمه !!!
شوية و اسمع صوت يم الباب ..
اتقربت اريد اعرف منو ؟
منو يم الباب ؟
ليش يمه ليش ؟
ليش تكسريني و تكسريني خواتچ گدام ابوچ ؟
ماما انتِ مصدگة متعرفيني يووووم ؟
متعرفين بنتچ و تربات ايدچ ؟
لعد ليش هيچ ابوچ يگول ؟
يممممه ابيش تريديني احلفلچ ..
و داعت حبيبي و حبيبچ عامر الغايب الحاضر بگلوبنه ..
اني ممسوية شئ ..
اسمعها تبچي و تنحب و تضرب مدري على رجلها مدري صدرها ..
يممه اني بتكم حتى من ردت ايهم ما نزلت راسكم ..
ردته بالحلال و منعتوني منه ..
من تزوجت حتى تلفون ما خليت حتى ما اضعف و اخابره ..
لعد ليش هيچ يگلون عليچ ؟
يمه ابوية راد يرجعني المهند ..............
حچيتلها كلشي بوسط دموعي المنسابه مثل الشلال ..
و لطمها و قهرها ..
ابوية اتفاجاءة بـ أفنان و هو عود رجال و گال كلمة گدام الكل من ديسافر عامر انو يطلگني ..
فاتبلى عليه حتى متحچون شئ ..
سكتت امي ..
ماما يوووم يمممه وينچ ؟
رحتي و عفتيني مثل كل الي عافوني ..
رجعت تحچي و تبچي ..
يمه ابوچ گال هذا الي صار ..
هددنه اذا فتحتوا حلگكم و ردتوا اطلعوها ..
امشي بكل العشيرة و احچي الي شفته و اخليهم يذبحوها ..
حتى ثامر مگدر يحچي وياه شئ ..
ثامر يگول خلي تصبر لحد ما ابوية يهدئ و نحچي وياه ..
هههه يعني لو ابقى مسجونه لو اطلع بلا شرف و مذبوحة ..
ها هي يمه خليني اهنا اناجي ربي يفك كربي ..
امي دتعاني نفس المي لا اگدر اواسيها و لا تگدر تواسيني ..
راحت امي من يمي ..

بقيت عايشة بهاي الغرفة فترة طويلة ما اعرف شگد ..
ابوية الوحيد الي يفتح الباب عليه و يجيبلي الاكل ..
هواية مرات اعوفه ما اكل ..
چنت الا يدگني الجوع يلا اكل ..
فدومه ياخذ الصينية كما هي ..
چان من يفوت عليه اروح اگعد على الدوشك بزواية الغرفة ..
هو چان ميباوعلي ابد ..
كلما يدخل يحچي نفس الجملة ( هاچ اطفحي ) ..
محد عرف بيه اهنا ..
حتى ازواج خواتي ..
چانوا خواتي دومهم يحاولون يجون من هو ماكو و اثنينهم ..
حتى وحدة تجي تحچي وياية و اللخ تراقب خاف يجي ابوية و هم تبقى يم الجهال حتى ميحچون الابهاتهم ..
عشت بـ رعب داخل بيتي ..
چان على غفلة يجيبلي التلفون عامر ..
احچي وياه و قلبي يذب جراحة مو بس دم ..
جروح البيه خزنت الم و حسرة ميشيلها الا الكريم ..
فرحتي من اسمع صوت عامر و بسمة ..
عرفت بأنُ بسومة حامل ..
فرحتلهم هواية بس الالم الي بيه مخله فرحتي تظهر بوجهي ابد ..
اتصنع الفرح و من يبدي صوتي يبين عليه الحزن يجر مني التلفون ابوية و يگطعه ..
اما ابو حسام ههه ابن عمي السافل لا سأل و لا گال ..
و عرفت من خواتي زوجته صايره حامل لثاني مره ..
ايهم بعده رافض الزواج و امه تجي تبچي يم امي عليه ..
و امي علساس مقهوره عليه بس هي تبچي على حالي ..

گمت اكره تصرفات ابوية و قساوته ..
اكره ضعف امي طول حياتنه الي خلاه يصير اقسى و اقسى ..
اكره لا ابالية اخوية ثامر و اهتمامه بزوجته و عائلته و بس ...
اكره خوف اخواتي من ابوية و بالتالي من ازواجهم الي خلاهم نسخت امي بالضعف و الانهازمية ..
كرهت حتى نفسي لان مشيت و رحت للمحكمة ..
وين چان عقلي ؟
ليش مگتله ما اروح و هذا الموجود ..
تندمت على كومة امور سويتها بحياتي ..
الشئ الوحيد الي ما ندمت عليه ابد ..

حبي لملاكي ايهم ..
تضحيتي للانسان الوحيد الي احسه مقدرها ..
وينك ايهم بعيد عني و گلبي مليان دموع و قهر ..
طلعت بعشرتي وياك خسرانه ..
شلون النار من تحرگ ورق كلشي متبقي بيه ..
اه لو ابوية خوش ما اذاني و اخذني غفل و اني گاعده ..
چنت گاعدة و رجليه بالشمس مو نايمه ..
بس گدر يكسرني كسره ما وراها جبر ابد ..

الوقت مچنت احسبه ابد و لا اعد الايام ..
مچنت احسب شوكت انام لو اشوكت اگعد ..
همزين چان الجامع قريب علينه ..
و چنت وي كل اذان اصلي ..
وقتي تسبيح صلاة دعاء ..

بمرة اجتني بيان ..
طبعاً من يجوني يدگون الباب حتى اعرفهم همه ..
اتقربت يم الباب كالعادة ..
شلونچ حبيبتي ؟
عايشة بيان ..
انتوا شلونكم اخباركم ؟
زينين احنه ..
عامر مرته طلعت حامل بتوم ..
ما شاء الله ..
جابت لو بعدها ؟
جابت ولد و بنية ..
هااا الف مبروك ..
فرحتي محبوسه بين اربع جدران ..
و مهند جابت مرته ؟
اي ابو حسام جته بنية لخ ههههه ..

دا يكوم بنات مثلي ..
و شبيهم البنات نعمه ..
صحيح مصطفى اصلاً يتخبل عليهم يگول ذولة كل الرزق على گصتهم ..
اي هذا الي يفتهم خو مثل العدنه ..
ابونه متخلف خوخة و عقليته قديمه ..
مو عبالچ هو مو ضايج و لا تعبان ..
بس هو ماخذته العزه بالاثم ..
تدرين من يوم حبسچ لسه حاچي كلمات على عدد اصابع الايد الوحدة ..
يا سلام و اذا هو هالگد مقهور ليش ما يفك اسري ..
الناس اسرى يم الاعداء ..
و اني اسيره يم اقرب الناس الي ..
صدگيني يگعد ويانه صافن و اكثر وقته غير الشغل بالغرفة گاضي ..
خطية قهرتيني عليه ..
صدگيني بيان ممقهورة على احد هسه غير بس خيال ..
حقچ حبيبتي مليون مره حقچ ..
مسالتيني عامر شنو سمه اطفاله ..
يمعوده اي اسم المهم حياتهم سعيدة ..
لا مو اسماء انتِ تحبيها ..
اممم و الله ما اعرف شحب اني هسه ..
ما ابالي غير بس اسمين ظلم و ظالم ..
استغفرلله يا رب هو الوحيد الي يفك اسرچ و سجنچ ..
سماهم خيال و ايهم ..
شنوووو شسماهم ؟
و الله سماهم ايهم و خيال ..
ههههه اخيراً اجه احد ربطنه ..
الله كريم حبيبتي اني رايدتچ بموضوع خوخه ..
شنو هو ؟
اريد نتوسط يم بابا حتى يطلعچ ..
يا ريت ليش انتوا قابل قصرتوا كلكم حچيتوا وياه و مفاد ؟
لا احنه هسه راح نتوسط بعد ما انطيچ دعاء تقريه ..
و وياها ااااااا ...........
شنو وياها ااااااا ؟
وياها انگله قبلت ترجع الـ مهند ..
فضيها يا خيتي و الي فات مات و عيشي على الباقي منه شتسوين مو احسلچ من هاي الحبسه يا روحي ..
هههههه انتوا كل عقلكم ؟
كل عقلكم بعد الي صار بيه ارجع الـ مهند ..
ارجعله بعد ما راح يصير الي سنة محبوسة سؤال مسأل عليه ..
فلس احمر منطاني ..
عايش حياته و سعيد ..
ارجع على شنو ؟
الي ميريدني تاج على راسه ما اريده نعال برجلي ..
بس انتِ غلطانه وياه ..
اي صح تحچين غلطت بالبداية وياه بس هو شنو سوه ؟
مسوه شئ لان ميريدني حاله حالي ..
اي محاوله الجذبي اله مسوه ..
چان متونس على تركي اله ..
و فعلاً بس صارت الفرصه اتزوج الي يهواها قلبه ..
اني طز بيه بالطوفان مو ؟
و فوگاها طعن بيه ميصير عندي جهال حتى يتزوج براحته ..
و بالاخير كتلني و اذاني و الله شنو متعارك وي مرته ..
ليش الله يرضاها انبياءه ؟
لا محد يرضاها ..
بس هذا الي تواصلناله علمود نحل الموضوع ..
و تطلعين و تعيشين الباقيلچ من عمرچ الي ضاع هدر ..
لا ما اريد اني ..
اريد ابقه محبوسه و خلصانه من شوفت اي احد اذاني من كل البشر ..
و للعلم اني ما متندمه ابد و لا راح يجي يوم اندم لو ابقه اهنا طول العمر ..
لا حول و لا قوة الا بالله ..
ها هي الي تريدي و يريحچ سويه ..
يلا لعد خلي اگوم اكيد البنات خبلوا أمي و افنان ..
الله وياكم بوسيلياهم كلهم ..
يوصل حبيبتي ..
گامت تمشي و اسمع خطواته بدت تبتعد شوية شوية ..
اتذكرت مسالتها على الدعاء ..
بياااان بياااان ..
رجعتلي تركض ..
تلهث و تحچي : هااا هااا غيرتي رئيچ ؟
انگله الـ ابوية ترجعين الـ مهند ..
هههههه لچ لا اريد الدعاء على الاقل اكسب منچ شئ ..
ههههه خوش ..
اكتبي ..
و اللچ ابيش اكتب و على شنو ؟
ههههه صحيح لعد احفظي ..
حسبنا الله سيؤتينا الله من فضله و إِنا الى الله راغبون ..
هااا اعرفه حافظته ..
خوش لعد ..
يلا مع السلامة ..
الله وياكم ..

مشت و راحت بيان بقيت وحدي اتحدى نفسي بوجودي اهنا ..
شگد راح اگدر اتحمل بعد و الى متى ؟
الله اعلم ..
ابوية من يجيني و اشوف القساوة بعيونه و تصرفه ..
ميحن قلبي اله ابد ..
و لا اريد اطلع منا و ارجع اشوفه عادي و يمكن بعدها ابوسه او احضنه ..
ما اريد اتقرب عليه ابد ..
قربه ياذيني و بعده الفرضه عليه مريحني ..

احسني بهاي الغرفة لاجئة گاعدة بالكمب ..
فعلاً اني بغربة بدون اهلي و احبابي بس الفرق همه الي نفوني ..
حبقه اهنا عايشة بوحدة كسرتني و نهتني ..
و ابقه ساكته و احچي وي روحي السكوت الي ادمنت عليه ..
و ابقه احس ابرد روحي قبل برد جسمي ..
لان ماكو حضن حنين لمني و سكن الرجفة الي بضلوعي ..
حبقه عايشة بالماضي ..
بالاحرى حبقه احن للماضي ..
مع رشة اصرار على الغباء الي دا احس بيه بكل تصرف سويته قبل ..

اجه الليل الي يذكرني بكل الي راح ..
بس بهذا اليوم قررت الليل يكون الي مع ربي ..
ماكو بيه اي تفكير لا بالي راح و لا بالي ممكن يجي ..
بقيت متجه للي خلقني و وكلته بتولي اموري ..
حسيت ربي يسمعني اناجي و يردلي و يطمني ..
و بديت ادعي الدعاء الي انطتنياه بيان ..
چنت كلما اگولها مره جسمي كله يرجف ..
ظليت لحد اذان الفجر ..
اسمع الاذان و ابچي ..
بهاي حالتي و غفيت ..

بالحلم اني واگفه على جبل كله لون اسود محروگ عبالك ..
و بده يوگع منه اجزاء كأنوا راح ينهد ..
بالجهة المقابيلي جبل كله خضار و ورد الوان اشكال يجنن واگف ولد بس وجه ما اتذكره ..
و يربط بين الجبلين جسر من حبال و خشب ..
الولد يصيحني تعاي خيال اهنا ..
بديت اعبر اشوف طريقي بعيد يلا اوصل للجبل ..
بس الولد يصيح امشي خيال ..
مبقالچ بس ٣ خطوات و توصلين ..
يلا خيال يلا بسرعة مشيت خطوة وحدة ..
عفيه خيال بقتلچ خطوتين ..
فزيت على نهاية الاذان ..
لا اله الا الله ..
بس احس بشفافي بسمه حلوة ..
رفعت ايدي على شفافي فعلاً ضاحكة ..
فرحت بالحلم و استبشرت خير ..
اجه ثاني يوم و سويت نفس الدعاء بالليل لحد الاذان ..
و ثالث يوم كذلك ..
نمت بعد الاذان ..

گعدت على فتحت الباب بقوة ..
رجال واگف بالباب و الشمس قوية داخله وياه ..
فركت عيني قوي اريد اتاكد تخيلت حلم ..
طلع هذا ابوية بس مشايل صينيه مثل كل مره ..
خفت منه كلش رفعت نفسي و گعدت بالزاوية و لفيت رجليه بيدي ..
يلا گومي ..
هااا وين اگوم ..
گومي بدلي هدومچ دنروح ..
انييييي ماااا ماااا اروح الـ مهند ..
گومي مو الـ بيت عمچ ؟
لعد وين بابا ..
گومي عدنه موعد بالمحكمة ..
فتحت عيوني عليه ..
شنو عدنه بالمحكمة ؟
حـ يطلگني مهند ..
وگفت على حيلي ..
صح بابا ؟
اي صحيح بس مهند مراح يطلگچ ..
لعد شنو ؟؟؟؟؟

فالقصة حقيقة مهند الرجل

السلام عليكم ورداتي ..
مراح ابرر غيابي بس اگلكم ادعولي و لاحبابي بالفرج العاجل ..
احبكم و مبقه شئ على قصة خيال و تخلص و نعرف شنو نهايتها ..
شنو توقعاتكم للنهاية ؟؟؟
اتحفوني بيه