رواية ماء مغلي الفصل العشرون 20 - بقلم Zoka 🌷

..♣️🩸 ماء مغلي 🩸♣️..
* adzzon *

كطعت الخط وباوعت لريري وكلتلهه ..
- ابويه وعادل جايين علينه بالطريق

ضربت على رجلهه وكالت ..
- صخااااام الصخمك ولك شعدهم جاييين

- ييييييي غير كلتلهم عمج مريض واجينه عليه

-وااانته مافكرت من حطيت عمي بالنص
منين اجيبلهم عم هسسسسه

- دبريهه ريري فكري بحل

- هو انتو تصخموهه وتعزوهه وتجون حليهه ياريري

اوووف اووف شعدهم اجوووي شعدددهم
احد عاتب عليهم ! ابوك مو مريض شجابه هنا

- لاتنسين همه ماشايفين احد من اهلج وتضل بالهم فضول يعرفوهم
واهلنه صاحبين واجب

- راح ينهجم بيتنا بهالواجب مالكم
لك وين اولي بيهم هسسسه اني محد يدري بيه تزوجت وصخمت افضح روحي كدامهم هسه !!!

- استغفر الله يمعوده شغله ساعتين بس دبريهه رحمه لاهلج تره نروح بيهه والله

ضلت ساكته وتكلب بتلفونها وانه الطريق بالكوه اشوفه انشدهت .. وتلفوني قفلته
وانتظر منهه حل ...

تالي  كلتلي ..
- دبرتلك اهل حبزبز

- شنووووووووووه

- شسويلك هذا الموجود مافضح روحي يم البقيه هذا حبزبز حرف يطلع منه اكفخه واسكته

- وهو هذا هم عنده اهل !

- عنده شبي لعد

- وينهم لعد اهله مسيبيه

- هو ميكعد راحه واني اخذته ضبيته يمي
شبعت اهله فلوس وربطته لشغلي وفضت وراحت
يلااا هسه اطلع كبل للبيت خلي ابدل ويجي هو ياخذنا لبيتهم

- ريررري انلاصت وعلييي

- الجذبه الوحده يحتاجلهه تسعه وتسعين جذبه وياهه يلا تضبط فعادي مصار شي

هسه نطكطكهم ساعتين وناخذهم ونرجع للنجف وفضت وراحت يلاااااا دوسلهه عاد لتضل فاهي اكسر بالسير وفضنه

سوينا الشارع مغالب هي دوس هورن وتأشر يوخرون وانه اسوق لحد ما وصلنه للبيت
وركض ركض بدلت ولملمت غراضهه
وقفلت وطلعنه ويه حبزبز ..

هو يسوق وريري ويه جلبهه وره كاعده
وانه اخابر بعادل ادليه البيت ...

وصلنه بيتهم وجنت خجلان من الناس شكول شحجيلهم !!!

بس ريري ضبطت كلشي وياهم
لمتهم امه وابوه واخوته اثنين توهم شباب
وكعدت حجتلهم ..

- هسه انتو منووو عمي ومرت عمي ولد عمي زيين
عمي انته مريض عندك جلطه وطلعناك اليوم من المستشفى وهيج دبروهه دبروهه زين
عيوووونييي
و سوي نفسك تعبان فد نوب حتى لا تضل تحجي ومتدري شنو السالفه

ضل الرجال يضحك وهي اشرت لحبزبز بس خزرته وهو كعد يم ابوه يشاوره وبعدين كام رتبله مكان ونومه وهي تصيحله

- حط خاولي وحط دوا لملم شعندكم حطه يمه
غطيه  زين

وانه من خبصتي مادري اضحك على حالنه مادري اخاف من الجاي يصير ووين وديت نفسي !!

دزته يجيب غدا وضلينه ننتظر باهلي لحد ماوصلو .. طلعت تلكيتهم ووياي ولد اخوه حبزبز ..

عاتبت ابويه ليش اجه وتعب نفسه وهو يكلي
اريد اشوف نسابتنه بعد هذوله من اهلنه صارو ولانعرفهم ولا يعرفونا

كعدو وانه متوتر اباوع لريري والعرك يزخ من وجهي وامسح بي ..

والرجال مسوي نفسه فدنوووب بس يأشر ويحجي كلمتين وياخذله صفنه ويحجي كلمتين نوب ..

ومرته هي الي تحجي وتجامل واجه حبزبز جايب الغدا وصاح ريري راحت وياه وضلو يرتبون سفره اثنينهم ..

كعدو اهلي واهل حبزبز ونتغدا بس انه مشدوه حالي احس راح افضح نفسي بنفسي

لما كمل الغدا وشربنا الجاي انه استعجلتهم حتى نرجع وخبصت ريري يلا ويلا
وهمه استحو بعد وكامو

ولما طلعنه من المنطقه يلاا اخذت نفس براحه ..
بقدره قااادر انسترنا اليوم وعدت على خير

وصلنه نص المغربيه لبيتنه .. وبس سلمنه على امي ورتبت كعده ابويه اخذت ريري وصعدنا لغرفتنا ..

ذبيت روحي على الفراش واكللهه..
- يااااااابوووووويه تعببببت وعليييي
احس روحي جنت اجاهد
بالحسين هاليومين بعدال شهر صارن عليه
كلهه ركض بركض وحركان دم

- ديلااااا هسه هو شصار وخبصت الدنيا
تره عادي هاي الركضه عندي زلااطه

- بوويه انتي حياتج اكشن انه رجال مسالم وعيشتي كلهه هدوء
راسي مسطور تره احسه راح ينفجر ممتعود هلكد هوسه

- ديلاااا نااام
راح انزل اسبح واشوف شسوي عشه
خلي اخابر هاي تكولي شطكطك بالمطبخ هسه

- منو هاي ؟

- ام البصره  الحووك تكفلتني بالطبخ
خلي اشوفهه شمسويه عشه واسوي مثلهه

عفتهه تخابرهه ولفيت راسي ونمت ..
تالي كعدت على صوت تلفوني هي تخابرني
حتى انزل اتعشى ..

نزلت تعشيت ومن جاي اشرب جاي كلتلي
ريري ...

- حيدااار تره اليوم اجني نسوان على طنطول
- منين ماعرفتيهن
- امك كالت هم اجني قبل كم يوم مدري شعدهن من فاينه
- هاااي شلون النوووب نلحك النسوان !
- يبووو
عيشه الكشره
جيبلنه الكاميرا باجر مو تنسى
- هو ششتغلت انه صارلي يومين كاعد
- انطيك اني وفضنه
-ماااريد
- وتاااالي وياااك لتخليني اوصيهن واحطهن بحضنك وغصبا ماعليك تاخذهن
- وعلييييي اكسرهن فوك راسج
استجلي عاد لتلحين
- ديلاااااا اوووكييي داشوفك شوكت تدبرهه
وتفضنه

ضلينه ساعه يم اهلي وبعدين صعدنا
هي كبل نامت وانه ضليت على الحاسبه سهران ..

وصرت اسمع صوت الدبيج فوك بالسطح
هم رجعووو

ضليت اتعوذ من الشيطان واقرا ايات
وريري فزت على هالصوت ..

- لك هااااي شكوو انهجمنا شكووو

- عادي ماتعودتي ؟

- يبووووو ياحيداار يبوووو
لك اريد انااام شلون بيه

- نامي ماكو شي

- فوك راسي يدبجون شنو ماكو شي شبيييك

- خلي سماعات باذنج ونامي

- وشسمع بله ؟

- اسمعي قران وتنامين

- ماااريد

- لييش ولج

- ماريد بكيفي عوفني اشوف جاره لنفسي

اندارت وخلت مخده فوك راسهه وضلت تحوص ..
ضليت اسمع صوت تركع شباك السطح
وهي فزت وجلبت بيه ..
- لك ويين رايح
- اسد الشباك ليكعدون الجهال خطيه
- ولك ليجلب بيك واحد من هالصخايم
اكعد عوفه خلي يولي
- لااااا صوت يقلق خلي اسده واخلص

جريت ايدي منهه ورحت وهي لحكتني
اباوع ماكو شي هنا بس شباك يتركع

سديته وتأكدت باب السطح مقفوله ورجعنه للغرفه ..

ضلت لازكه بيه ونايمه وانه اشتغل بالحاسبه
لساعه تلاثه طفيت ونمت ...

ثاني يوم  طلعت لشغلي وكدرت ادبر فلوس زوج كاميرا بس ..
اخذت بس لغرفتي ..

ورجعت بالليل شديتهه بزاويه الباب وخليت عليهه سندانه ورد صغيره .. خليت وحده هم بالزاويه الثانيه صارت مرتبه السالفه وممبينه  ..

ربطتها بحاسبتي وعلمت ريري على الرمز وشلون تفتحهن وتباوع ..

وضلينه بالليل نشغل التسجيل ونشوف مال اليوم كله ...

ماشفنه شي غريب كلشي عادي بس ضلينه نتابع وهي تفردش بالبيت وكلشي ماتلكه ..

يوم الجمعه بالمحل العصريه وخابرتني ريري ..

- اكولك متروح للسوك تجيبلنه معلاك داشوي لاهلك يتعشون وجوهم مصفره مثلك معظمين
خلي ننطيهم حيل باللكمه

- عفيييه شلوون تداريهم عفيه بالسبعه

- اييي ديلاااا بلا لواكه

جيبلهم وتعال يلا

- تره عدنا بالمجمده تلكين من ذبحنه بقن محد اكلهن

- اييي ادري بس طنطول ماخلتني اخذهن
جان اكو الكلب ردت اخذ منه نص بس هي كلتلي

لااا عيني لااااا هذا مال عااادل عوفيه لتمدين ايدج عليه

كلتله ديلااا معايزين حجيب كيلوات وتازه
هم

- ريري

-هاااا

- عادل مياكل شي بي دم هيج تلعب نفسه من ريحتهن

- عزاااا صدددك تحجي !!!

- والله متشوفيني كلتلج محد اكلهن ضالات
ادري اخوتي يتخبلون من هالشي لان تضل بي ريحه دم وهيج تلعب نفسهم ولو تغسليه الف غسله مياكلوه
احنه كل مره من نذبح نوزعه لو نخلي لابويه هو يحب ياكله بس اخوتي ميحطوه بحلكهم

- لعدددد هااااي شبيهه تخبلت عليه بس مديت ايدي على المجمده !!

- شوفيهه ريري اكيد بالهه شي

- دروح هسه جيبلي خلي اسويلهم عشه واني حكعد انبش بسالفتهه

- ماشي

سديته وكملت شغله بايدي وطلعت للسوك
اخذتلهم المعلاك ورجعت للبيت انطيتهه وهي كلتلي ..

- امشي دنحجي
- تعاي بره نوكف مابيه اصعد.

طلعنه بره وكلتلي ..
- تره لا كلب لا مصارين لا صخام موجود بالمجمده

- دورتي زين !

- ايييي نبشتهه نبش
خليتهه تصعد لجهالهه تكافشو واني دورت بس كلششي ماااالكيييت
وهاي من درت بيه اريد اسوي مشاوي لاهلك وفتحت المجمده كبل اجتي وخرتني وسدتهه
وتكولي مال عادل وهو جذب كلشي ماكو هنا

- خرررررب ويييين ولت بيهن !!

- هنه هالسوالف يفيدن بالسحوره؟

- رب اليفيدن
لج هذا الكلب ياخذوهه يخيطوه خياااط
بالسيامه والابر والبسامير ويلعبن بالوادم لعب بي

شايفته شكد غالي يبيعوه هيج كامل يتوسلن يلا يحصلنه بتميته ما مكصكص

- عزااا بعينهن
وهاي مصخمه شعدهه بي ؟
لك خاف تطلع هي الي تسوي السحوره !

- شمدررريننننيييي
نعلى عليييهن
النوب شمدريني ياهي من هالنسوان اله ايد بالسالفه
ريري مو كتلج عينج عليهن وين جنتي متكليلي

- اييي يعني شصير تنظيف وطبخ ومداره
وهم عيني هنا وهنا
وهنه شيردن يحجن كدامي يعني ؟
كلتلك حط كاميرات وفضنه البيت مفارغ واني اتسرسح بي وراهن بكيفي

- استغفررر الله
صبر يمعوووده صبرر
راح ارجع للمحل

- متبقى تتعشى ويانه

- مااريد

عفتهه وطلعت وضلت بالي هالسالفه
اريد افهم وين توديهن ؟؟؟
شتسوي بيهن ؟؟
شعدهه ويه هالنسوان !!

رجعت بالعشره للبيت وحتى ويه اهلي ماكعدت كبل صعدت لغرفتي
تمددت واجتني ريري ..

- شبيييك شكلك يتلاطم
شكوو مدلغم
ولا اكل ولا شرب شجااك حويدر

- تعبان

- شكو تعبان ؟ شو من تبريد لتبريد بعد وين الحر وتتعب وكاعد على ميزك ومرتاح
شكو هالوجه المبوم منين جايبه

- ريرررررري

- هاااااا

- راسي يوجعني مابيه حيلج لتضلين تنكين

- هسه غير افهم شبيييك

درت وجهي عنهه واجتي كعدت بصفي
ودارت وجهي عليهه وجرت عيوني وتكلي ..

- لك بيك جفاف انته دشوف حالك شصاير بي
عيونك بيييض مابيك قطره دم

- مابيه شي انتي توهسين

-لااااا بيك لعد شكو راسك يوجعك ودومك مابيك حيل ومالك خلك
ورايح مصوفر صاير هالكداتك

- ريررري مابيه شي بس ضايج عوفي جسمي عوفيه

- ديلاااا من حووووره هسه وخايف عليه
احجيلي شبيك ضايج ؟
متعارك ؟

-لاااا ولج من هالصخايم

- يبوووو شكد بايخ

لك بااابه لك بطلهه هالنانسي البداخلك موتهه وخلصنه

هسه شكو تضوج ع اساس متدري بيهن
عبالي شو شبيك طلعت تتنكرز

- ريري عوفيني فدوه اروحلج عوفيني

- اكووولك صدتلك فد خبر الا يصحيييك عشره عشره

- شنوو

- الاحجار  لكيتهن

- علييييج علييييي وين لكيتيهن

- صحصح واكولك

- مابيه شي بس كولي وين !! وينهن هنه جيبيهن !!

- مو عندددي

- جا ووووييين احجي لتبطين كلبي

- يم سيف

- عليج علي !! سيف ماخذهن !!

- اييي حسب ماااشفت يعنيي
صعدت داشر ملابس اهلك وجانن هالصخايم كاعدات يم حبايبهن وقافلات باب الهول
وسيف افندي جان يسبح

طبيت لغرفته انييي هالولد مارتاحله
كلت داشوف شكو ماااكوو

- اييي

- وعينييييي اشوفلك شغلاااات توكف العقل 
مدري شلون امه مامنتبهه عليه

لك عينييي كوووله اوراااق  اسحااار وطلاسم
وكوووولهه من هاي القديمه المصوفره ومطكعه بالدم

تدري وين داحسهن !!
بنص مخدته  بس هنه صغار وقليلات كم وحده يعني

والاحجار لكيت داحسهن بنص الحذاء
وداحس الحذاء جوووه الجربايه بالاخير

عينننييي واشوفلك هههيييي اشوووفلك
جيس بخور هالكببرررره ريحته تلعب النفسسس كله ترااب ووصخ طلعت هاي امهم حتى غرف متمسح عايفتهن متلتلات وصخ وجيفه وشعر وزباله مدحسه اييييييييع
عايشين بنص الجيفه والزباله

- ولج صدددك تحجيييين رييرررري
سيييف  عنده كل هذاااا !!

- وعنددده بعدددد
شوف وين مدحسهن بس مالحكت افردش بعد
سمعته يعطس  بالحمام كلت يجوز كمل وراح يطلع
فكبل نزلت
بس بعد هم اخذلي عليه فره

- لاااااا ياااااااااالله
لك ليييش هيج سيييف ويييين وديت برووحك

- طلعنه احنه ناااايمين ورجلينه بالشمس
ابو السحوره صغير البيت المدلل

- لاااا ممعقول ريري هذا جاهل شمفهمه
بيهن

- كلششششي توقع بهالدنياااا حووووبيييي
لاتكول ممعقول كلشي اكوو بس انته مطفي
شويه

-هااااااا

-ديلاااا غلسسس
هسه اني اريد الكالي طريقه اشحت بيهه
هالفارات كل شويه وناطات شعندج وشعندج
رادن يفضحنييي
لو ما دازتهن للمحل وعبيت بحلوكهن حلويات بفلوسي جان راحن شهرني

- يبوووو النوووب هالجهاال علينه
شلووون ياربي شلووون

- اكوولك مانديحهم من البيت فد يوم
ماترهم يطلعون منا منا

- ماكو شيطلعهم كلهم

- لعددد شلووون اريد افتش غرفه سيييف
اكييييد اكو بعد صخايم عنده
وهذا شلووون المعزااا لكطهن بغرفتنه واخذهن !!

- لج شمدرررينيي بي ااانه مااشفته صعد
ولا تزحزح من مكااانه

هو من ابوه موجود يخنس بعد مايتحرك
شوكت لحك يصعد وياخذهن ماادري !!!!

- تبين بعدين نفهم شيسوي ميسوي
بس خلي كاميرا على غرفته وجهه دنشوفه وين يروح وشوكت شيجيب وشيودي

- اييي ان شاء الله اجيب هالايام

- اجيبلك اكل ؟ ما جعت ؟

- لاا كلشي ماريد

عافتني ونزلت وضليت انه افكر بسيف
شلون سوا هيييج ؟ شوكت اخذهن ؟ ليش ؟
شدلاه بيهن وبهالدروب !!!

وره شويه اجتي ريري وجايبه صينيه
بيهه ماعون ركي وبطيخ وماعون عرموط وعنب

كعدت يمي وتكلي ..
- حط بحلكك لكمه لا تسلني بهالمشتهى مالتك المصفر
لك يرادلك حيل يابو حيل داتكدرلهم مو تضل خاويه روحك وبسالفتين تخرب وتوكع

- ريري ااانه بحال اكل !
هوه اليسمع هالحجي بعد تصيرله نفس للاكل !

- حتىىىى لوووو تااااكل غصبا عليك تااكل
وكعت وخربت واخذتلك يومين نايم بفراشك
والمرض والقهر كاتلك
شكول شحجييي
اضل اهورف هنا وهنا وحدي بلا فهم ولا علم !!

غير تضل وياي تفهمني شنو هذا شنو ذاك
تعلمني شسوي ويه هالمكاميع

مو تصوفر الوجه وتتمدد بفراشك واضل حايره بيك

- وااالله مابيه شيييي بس نفسيتي تعبانه منهم

- اييي واذا نفسك تعبانه .. تاااكل
مو مال تنكرز هي
شغل عدنا حرب هنا والحيل مريود

تعود عاد ولك تره راح تكضيهه صدمات باهلك فلا كل يوميه ونفسك تتعب

شويه تلحلح وتلاحك لروحك

- ياااابوووووييه شيخلصني بعد
عمي جيبي خلي اكلهن جيبي

جريت الصينيه يمي وضليت اكل بطيخ
وهي تاكل عرموط وتكلي..

- اطلبك كم بطل ولك حويدر مغلس عليهن

- منين اجيبلج ولج !

- مشكلتك هاي شروط لا هسه تكلب

- بالله العظيم ماكو ربع بطل بالنجف كلهه
منين اجيب !!

- دبرلي معليه
تره دمي دايفور فووور
وبالجكاير والليمون  مصبره روحي لحد هسه
بس بعد ماتحمل

تره داعااني وانته متفهمني متحس بروحي شلون تصير من اكطعه

- ريري جاي ادمرين نفسج تدرين لو لا

- ادري بس ماكدر
اني من كثر الشرب الشربته صرت  حتى مااسكر بسرعه

ماشفتني هذيج الايام اخلص البطل بيومين وبوعيي ضليت ماجيت عليه فد يوم ولكيتني سكرانه

اصلا اصحى منك وعقلي ميه ميه يشتغل
بس مجرد اطفي الحروره التصير بدمي تنرفزني

ضليت اباوعلهه وهي تاكل وتحجي باريحيه
كلتلهه..
- منين اجيبلج ؟

- روح لبغداد لمكان منا منا دور وجيب

- وين ادور هو انه اعرف ناس يشربون ؟

- حجت ست عفيفه
بابه روح لبغداد مزبلات بالشوارع المحلات
اطبك على اي واحد وجيب وتعال

- شيوديني هنا هنا واروح اجيبلج واجي

- هاااااا من هسه جريت ظهرك ولك حويدر
اشووو الاااا تجيبليييي وطلعه من الغرفه مااطلع الاااا تخلي البطل بايدي

- ريرررررري لااا هيج

- شكووو ريرري!!
شروووط هاي لو اكلان نعل
شو بكيفك تسوي اليعجبك !
عبالك بس تقشمرني هناك وكلشي حاااضر  وتدللين وهنا تكول اضبط عليهه ترضى ماترضى

ماكوو هييييج سمعتتتتت
الحجايه بعد اخذتهه منك ووعدت تجيبلي يعننننننييييييي تجيبلي

- استغفرررر الله ربي واتوب اليه
وتكلي ليش متاكل !

- ديلاااااا اكل بعدين نتعارك

- سويتيهه سم وزقنبوت

- خوش لعد شوكت تروح تجيبلي

- باجر بااجر

- اوصيلك حبزبز يجيب وانته استلمهن مو احسن
هم ماريد اتعبك رجلييي حياااتشششييي

- انجبببي عاااد

- فوك ماتلوكلك

- اكررره لواكتج هاي وياي هنا
تلعب نفسي

-هاااا بس كدام اهلك اتختخ عليهه

-هناك مجبور عليهه

- ديلاااا هسه شنو اوصي لو لا

- وصي وصي

- وانته تورق اووكييي

- اورق اورق ادري هي براسي براسي

- خوش ركيه هاي حلوه شكر شكر على حالهه
اكلت ويه امك منهه عينني تنعش
اكل منهه اكل يلا شو لكمتين وعفتهن
لعد المن جايبته !

اخذت نفس وباوعتلهه وهي شالت الركيه خلتهه بحلكي وتضحك ..

اكلتهه وضليت اكل عنب وراهه وهي تراسل بتلفونهه يمي ..

وثاني يوم بالثنتين  الظهر دك تلفوني
رقم غريب .. جاوبته وطلع ابو التوصيل
جايب الغراض للست ..

عبالي حبزبز بس طلع واحد ثاني ومبين من اصحاب المحل مو هيج عرف ..

طلع الجماعه عدهم حتى توصيل بطاله وماندري ..

استلمتهن ودفعت شكو الف بمحفظتي عليهن
موصيه بطلين  وصندوك قواطي

ضليت داحسهن بصندوك السياره وكل بالي يمهن  ..
احس جبل هالكبره صار على متوني من ساعه ماخذتهن من الولد ..

ولليل تاخرت يلا رجعت للبيت وعفتهن بالسياره .. تعشيت وتعللت ويه اهلي
وتالي يلا اخذتهن من فرغ الجوه وصعدو الجهال ..

امشي وحاضن العلاكه لا يطلع صوت البطاله من تطكطك ..
ذبيتهن ع الفراش وكعدت اباوعلهن والندم ياكل بروحي اكل

شلون انه جاي اسوي هالشكل بنص بيتي !
اجيب منكر لمرتي تشرب بفراشي !
واذب فلوسي كلهه للحرام واكعد اتفرج عليهه تشرب كدامي!!!

اجتي هي اخذتهن وخلتهن بالثلاجه
وتكلي ..
- عفييه بالسبع دبرتهه وجبتهن

- لا تخليني اعيدهه بروح اعزازج
تره ميت من القهر على هاي سوايتي

- وشروطي وموافقتك ! نكعهن ونشرب ميهن  يعني !

- ريري ارحميني يابنت الناس جاي اكره روحي من وره شروطج ارحميني ماكدر
عليهن وروح اخوتي جاي اموت الف موته كل ماشوفج تشربين كدامي وانه ساكت واتفرج عليج

- ديلاااا اعوفك لتجيب بس ضل ساكت لاتنط كل شويه بمحاضراتك العفيفه عوفني اتمرغل بالحرام وحدي اووكييي

- استغفررر الله
اساعدج تركينه بس طاوعيني

- بالاحلام عووومرري
لتتخيل فد يوم اكدر اجي وياك لدرب العفه والشرف والساده
انيييي طينتي غير عن طينتك
لتجيب هاي على هاي
مترهم ومحلوه تصير تلزك تلزك

- ماكو احسن واحلى من العفه والشرف

- هذني ناسيتهن اني شلونهن
من طولي شبرين اني سويتلهن بيبااااي

- بس لو تريدين جان رجعتيهن

- اييي من ط...ي ارجعهن
عايشه بنص المگوده ويريدني ادور عفه وشرف
لك بابه انييي وييييين مطمسه روووحي
وانته ويييين

بيني وبينك شعره وحده مااااكو ربط ولا تفاهم بالعيشه
كل واحد منا من دنيا شكل
اني لو احجيلك على عيشتي ساااعه وحده بعد ماخليك تضل بالعراق

وانته راح تنشفه لدمي فد يوم بعجايب بيتكم

- واااالله شلون  راااح تصفى ويانه مادري !؟

- اكولك باجر تاخذني لمليكه خلي اشوفهه اشتاقيتلهه تره

- شعجب هيج تفكديهه

- احبهه هاي فقيره وشو كلبي ينكسر عليهه

- اييي ادري بيج تحبيهه وكلبج عليهه يلوب

- وصيتلهه على ايباد فد كم يوم ارجع لبغداد واجيبه الهه

- شنوو شنووو !!!
ليش ترجعين ! ليش توصين ومادري !؟؟

- شكوو هم اذا ردت اشتريلي شغله اخذ رايك !

- مادام عايشين سوه متضمين شي عليه
مثل ماكلشي احجيلج وتدرين انه هم لازم كلشي ادري وكلشي تحجيلي من تسويه

- ديلاااااا اوكيي بالجايات عود تدلل
هسه لتضبط براسي بعدين بعدين

- ااااافففف
ريري .. شعندج موصيتلهه ايباد !

- غير تتلهى بي خطيه ضاله بهالتلفزيون كلشي مابي يونسهه
خلي تكلب بالنت .. تنزل كم لعبه تكضي وكت بيهه
الجهال يكيفون بهيج شغلات

- بس ابوهه ميقبل
لو يريد جان هو انطاهه تلفون مايقصرلهه بشي وميبخل عليهه بي
بس هو ماااينطييي تلفون لبنيييييه سمعتيي!

- اووووويييييي عاد هوو شلونه بعد ط..ي
ينكط شرف ينكططط

- لساااانج وووولج لساااانج

- زفررر زفرر مامنه چاره
وبعدين شكو هيج يستشرف بالتلفونات
واذا صار بيد بنته شكو بيهه !

- يخاف عليهه

- بعبع هو ويخاف عليهه منه ؟
تره ايبااد هذا مال العاب مال صخام للجهال
شكو شبي يخوف !

- ريري ميقبل واالله معاشره واعرفه زين

- وووويطببببه مرررض فوووك مرض
عساااه لاااقبل
شكو اني شعليه بي
جايبته للبنيه بي خير خلي يجي ياخذه منهه واني كاعده

- لتدووورررين مشاااكل

- اسمع ولك حويدر
عقليه ابن عمك انته حير بيهه

البنييييه صارت بعد  بنيتييي واااني كيفيي اجيبلهه وانطيهه

مو تريدون اغير مزاجهه واعيشهه مرتاحه
لتدخلون بشغلي
بس تحطون خشموكم وياااي اعوفلكم كلشيي
بعددد وضلو انتو حيرو بيهه وتلاطمو وتعالو توسلو عود ماوصيكم

- ياااربي دخيلك
يعنييي شلووون ماتعدلين مزاجهه الا بالتلفونات

- وشبيهه التلفونات !!!
تره عيب عليك تحجي هيج
انتو موو خابصينه علوياتنه وشرفنا
واخلاقنا وتربيتنا
يلاا وينهه لعد !
غير من واثقين بعلويااااتكم المصون وتربيتكم الجباره الماكو منهه
تخلوهه براحتهه غير مأمنين انتو بيهه لو
بس حجي لسان

- واثقين ومربين عدل بس حفاظاً عليهن
احنه ماننطيهن تلفونات
من هنه صغار بس اليتزوجن ياخذن تلفون
وهسه هاي اخته مو ارمله ماعدهه تلفون
وامه عدهه هذا الصرصور ماتعرف غير تفتح من الخضره وتسد بالحمره
وبنتهه لا توصل تلفون ولا تدري شكو ماكو بي

- هذا سجن مو شرف

- الوكت مايتأمن ريري
وولد الحرام هواااي وبناتنا نخاف عليهن

- بس حتى لو راح اجيبلهه الايباد
وهو مابي سيمكارت ولا برامج تواصل
بس العاب اخليلهه ويوتيوب
تره جهااال سنتين وتلاثه عمرهم ويلعبون بالتلفونات ويكسرون وياخذون جديد
متخوف تره عاااديييي صارت

- انتييي عنااااد وراس يااابس
وتهلكيني من احاجيج

- اووكيييي لعدد خلي اكولك اخر شغله
واسكت

- شكو بعد

- يوم عشرين باقيله اربع ايام حسب حسابك تاخذني لبغداد عندي شغل

- شغليش هذا ؟

- شعليك بابه
شغل خاص لتدخل بشغلي مو متفقين معليك بي

- بس لازم اعرف وين تروحين وشتسوين هناك

- شغغغل خاص مانطول لليل نرجع اذا تريد
او نبقى ثاني يوم كيفك بعد
المهم الصبح اني هناك
اوووكييي حدورررتييي

- انجببيييي ريررريييي لتتموعين بااسميي مااحب هييييج افهمممي افهمممي

- اووكي حووبيي اووكيي اعصابك

- استغفر الله وتاااالي وياج !

- راح اخذلي غفوه شويه بين ماتبرد القواطي
واكعد اتمزمز من تنام اخذ راحتي

احط السماعات واحلق بالجووو بعد طز بيك وبسحوره اهلك

سمطتو ابو ابويه بالطبخ والنفخ
وجهيي خاااس صار كله دهن
مساماتي تفتحت واحس خشمي راح يبدا بي الرؤوس السوده واتصخمت وتعزيت من وراكم

باااجر عينيييي اكعدله كعددده اله ارجعه شحمه على حالهه

طاااح حظكم خليتو دهن الطباخ يلزك بوجهي المرايه وييين اولي بي هسسسسه كارهه روحي هالوصخ الي بيه مدااتحمله

-ههههههه ولج وينه الوصخ شوفينياه
بويه والله عليتي كلبي بهالجلف التجلفيه شبيج انتي بيج مرض نظافه !

- يااااا دشوف وجهي شووووف شلون مدهن
غسلته مرتين بس مساماتي تفتحت من الحر والدهن عيننني مداعتني بي من اجيت هنا ابببد ماعتنيت  بنفسي كله الكم ذابحه روحي وناسيه بشرتي

- هههههه بربج علميهن خلي يعتنن بنفسهن مثلج لج خطيه اخوتي مثلهم رياجيل مظلومه مشايف

- ايييي هذني يفيد بيهن حجي
هنه عيننني مكيفات ع الوصخ والجيفه
وحدتهن ريحتهه كابه للستار ويهرولن جنهن عتاريس

لك هااااي طنطول وييييييع وييييع رجلهه
خايسسسسه مليانه فطووور وصخااام

-يييييي كااافي لعبتي نفسسي كافيي سكتي

- ويييع كل ماتذكرهه توصل الزوعه لهنا
خلي انام وانسى احسن

تعودنا اثنينه من نام شورت وفانيله بس محد اله دخل بالثاني

هي تتعطر وتدهن رجلهه وايدهه يلا تجي تنام
وانه بس ع الحاسبه اتفقد الامور واسدهه وانام ...

كعدت على صوت الأذان بالتلفون وطفيته
انداريت اباوعلهه كاعده
وبايدهه جكاره وقوطيه  تفرهه بايدهه شويه وتشرب
ومخليه السماعات باذانهه وصافنه

جريت السماعه من اذنهه وهي كبل صاحت..

-شبيييييك
- وكت اذااان سدي الاغاني وذبي الي بيدج
- معليييك بيه
-ريررررري معايزنه ضيم وشياطين
كافي الفوك روسنا يطربكون استري علينه وسديهن
- ديلااااااا سديييت
شكعدك انته متكولي شكعدددك
حظظظي
شلون جنت متسلطنه وماخذه راحتي

- اييي كافي ماشبعتي طلع الفجر

- يبووووو دروووح عاد كووم رووح صلي وعوفني معليك بيه اغاني وسديتهه شكو بعد شتريد مني

-ذببببي هالتيزاب التشربيه

-هسسسه مأثره علييك
داشرب وحدي وساكته شعليك بيه

- يعني انه اصلي منا وانتي تشربين منا !!!
مصايره هاي وحق لا اله الا الله مصايره

- هسه شتريد تكمل صلاتك واني وراك اكمل شربي !؟
هيج ترتاح نفسك الطاهره العفيفه

- اييي اييي هيج ارتاح
ولو تذبيه وتخلصيني منه بعد احسن

- يلاااا هاي خليته على جهه دانتظرك تكمل طقوسك الدينيه يامسلم يامتقي يالسيد ابن السيد

- شووو تستهزأين
معاجبيج الساده والاسلام ؟

- كره اكرههم كررره ابليس لادم وربعه

- استغفررر الله
ريري انتي مو مسلمه شلج بهالحجي
مو دين هذااا كفر هيج تسوين

- ماااكفرت كلت اكرهكم ماجبت طاري الرب وكفرت بي اني ماتدخل بهالسوالف

بس انتوووو ماحبككككم لو وجه لوجه نتلاكى يم العرش هم اضل اكرهكم

- ليش هالحقد ولج
لييييش شمسوين احنه !
ناس اطيب منا ماكووو بيمن مأذيج وحاقده حقد المجوس هيج شجاااج انتي تخبلتي

مووو اسلااام هذا دين البشريه
انخلقت السماوات والارض حتى نعيش بهالدين ونعبد الله ونعرفه

ليش هالكفر والحقد والعقليه هااااي شبيج انتي

- اااني احب الرب بس اكره الاسلام والمسلمين

- يعني انتي شنو صنفج فهميني !
ملحده ! يهوديه ! مسيحيه ! صبيه ! شنو انتي

- ولا شي
ماااتبع اي دين اني تريد تصدك متصدك بكيفك بعد

- واااااااالله !!!

- اي داجذب عليك !
داحجيلك الصراحه حتى تغسل ايدك مني
وهم شو داشوفك هالايام تريد تحنن كلبي على دينكم الحنيف وعبالك اني مسلمه بس لا صلي ولا اصوم وشويه زاله من الطريق
وضجت كولش الصراحه

ماحب اصير كدامك ام وجهين واضل استشرف براسك

اني اي شي بالدين امثل بي تلعب نفسي من نفسي  ..

فلاا اريده ولا اوصله ولا تحاول وياي اني بعد كلتلك ااااي دييين ماتبع
لا مال محمد ولا مال عيسى

- يعني ملحده !

-لااا مو ملحده أُؤمن بوجود الرب الخالق
البشريه والكون واعرف الامر والوجود كله بيده وادري يشوفنا ويعرف شنسوي منسوي
وأومن بيوم الحساب والانبياء والائمه
اعرف الهم قدر جبير ومااشكك بيهم

- چاااا مدامج تعرفيهه شكو تحرفيهه !!

- هاي حدي وياهم بس اعرفهم بالي
بس لااا اوصللهم ولا اندك بيهم

تره اني حتى هيج هاي مسبه وكفر بالرب
ماسويهه لان اعرف هو شأنه عظيم بعد خالق الكون كلشي يكدر يسوي

بس كلتلك اني احب الله واؤمن بي بس اكره الاسلام اكرررهه كل الدياااانات اكرهه
ماشفتلي دين براسه خير حتى اروحله
كلهه عوجه مصخمه

يحللون اليعجبهم ويحرمون الي ميعجبهم 
وين الصدك ماتدري

ف ليش ادوخ نفسي بهالمعمعه المتخلص
ضربتهم كلهم عرض الحايط وعشت وراسي بارد

ضليت فاك حلكي واباوعلهه
مصدوووم
بعد راسي احسه صففففر

انتبهت عليهه تكلي ..
-يلا تصلي لو اكمل القوطيه ؟؟

- انتي اصلج شنو ؟

- طين مثلك

- ديييينج الاصلللي شنووو
من يااامله انتتتي

- شعليك بابه شكو تدخل بخصوصايتي
اني الاريدك تعرفه احجيه الك غيره لتسأل بعد

- يعني مو مسلمه اصلا
مبين اهلج مو مسلمين من حجايتج
الرب الخالق
هاي مو حجايتنا

- ذككككي بعد ط...ي خوش تفكر وتحلل

- يعني مسيحيه ؟

-لا
ولتحاول وياي كوم روح صلي يلااا فضني عاد

- لووو محاجيه احسن
فريتي راسي فررر نسيتيني حتى الصلاه

- هههههههه مو اكولك سيد مال لنكه تزعل

- انجبي عاد انجبي تاج راسج الساده

- بسس ابوك تاج راسي لان بي روح الساده
انتو البقيه كلكم فيطي وتاج لط...ي متصيرون

- ريرررررري
احتتتتترررررمي نفسسسج لاااابالله اطلع ضيييم كلبي كله بيج بهالصبحيه
ضبي لسانج وانجبي عاد لتضلين تجاوزين

- هههيييي زعل السيد المحترم
ديلاااا تعااال صلي بلكي اتعلم منك ويررف كلبي عليكم يالمسلمين المتقين

- ضليي انتي ضليي استهزئي بهذا وذاك
ونشوف تاليهه بالاخره منو يربح
تشوفين المسلمين مكانهم وين واااانتي الكافره وين

- ايييييي من فدوا لحكلك
مااحجيت الاا الي بكلبي

اااني دااريد بعدين اشوف هالمسلمين المتقين
وبالااااخص اهل العماميم مثلكم شيسسسوون بيهم بالاااخره ويين مااوين ياخذوهم ؟؟!!!
على طبق فضه لو ذهب يكعدوهم ؟!

اوووووف كووون نموت باجر داشوف شيصير ميصير مو طكت روحي من الانتظار

ادعي ادعي يلا انتو مو دعائكم شاااره بالايد تحصلوه يالساده المسلمين ادعي بلكت يخبنوهه لهالعيشه الزفره بساع عاد ونروح نشوف هناك شكووو ماكو

نحاسب ونتحاااسب

عود اسلم عليك من النار اااني لتخااف عبالك احسدك من تروح للجنه المجهزززه بسسس الكم انتو الساده !

اااابد اصلا الم جماعتي الكفار واهلهلكم هناك
واكعد اسولفلهم على ابداعاتكم بالدنيا فدوا لكلبكم فددد حبابييين انتووو

ونفسكم طيبه .. خوو الديااانه عدكم يبووو
يبووو تنكطط هذاا وجهكم نووور نوور على حاااله

لوو العفه والاخلاااق والايد السخيه يبوووو ماينحجي بيههههن

اصلاااا العاااالم والفقرا خطييه لووو ماانتو
تزكون وتتصدقون عليهم جان لا عاشوو ولا شافو

اوووف كلبكككم شحمممه شحمه شتكولون انتو هذا الحديث الخابصينه بي شنوووه بله
شنووووه ؟؟؟.

هااا .. احب لنفسك ماتحب لاخيك مدري شلون اييي هذا فد مطبقينه انتووو اويليييي
خووووانكم شرق وغرررب ظهر بظهر شادين بعد ط..ي

- هااا خلصتي حجيتي واستهزأتي وطلعتي حقدج الدافنته علينه لو بعد تريديني اضل اسمعلج ؟

- كيفك اذا يعجبك بعد اضل احجي اني حقدي عليكم ميخلص واذا ضجت عادي روح احسن

خلي اكمل القوطيه جرتين اشربهه بين ماتغسل وتجي شكو اعوفهه تحتر تصير مطيبه ماحبهه حاره

-سممم وزقنبوت بطنج ان شاء الله ينزل

- مؤووومن يحب لاخيه مايحب لنفسسسه عيوووني وييين اكووو منكم وييين ياهل العمايم السود بزودكم احسسن عيشه عايشين
والحمد للرب الواحد الاحد

عفتهه ونزلت اغسل واكفخ بالماي على وجهي حيل ارشكه ..
والوم بروووحي شلوون رحت جبت كافره بالاسلام  وكلبهه مليان حقد وغل علينه !!!

ماتحملت اشوفهه ونزلت جوه بالهول صليت
وضليت كاعد استغفر ربي منهه واستغفره الهه

ادري بيهه كلبهه طيب للناس بس ليش هالحقد مطبع  بكلبهه علينه مااادري !!

استغفرتلهه بس لان كالت احب الله واؤمن بي
لو طلعت من الكافرين بي ساعه مابقيهه يمي بعد لو اموت بدونهه هم ماخليهه

بس هالحجايه شفعتلهه عندي وخليتلهه عذر على نوع عيشتهه الوصلتهه لهالحال ..

نزلت بعدين سابحه ومتعطره و اجتي عليه بالحديقه تكلي ..
- هااا يالسيد اسويلك ريوووك لاااا
خاف صار بعد ميعجبك تاكل من ايدي التشرب وتكره المعممين جماعتك

جريت ايدهه وضليت كامش اصابعهه ودنكت راسي يمهه شويه وكلتلهه ..

- اكرهيني واكرهي عشيرتي والاسلام كله بدينه وناسه وعقيدته
بس ضلي حبي الله لا تشركين بي

مدامج تحبين الله وبكلبج محبته طابعه ومؤمنه بي تضل ايدج هاي نظيفه وطيبه وخوش تسوي ريوك يشبع ومال دلال

ضحكت وكالتلي ..
- تره احبه بيني وبين نفسي ومرات احاجيه يعني بس اني بالديانه مالي دخل

اول شي مو دربي هذا تعرفني عيشتي شلونهه حمره وخضره متتراهم وياكم انتو الابيض واسود

وثاني شي انتو تجفصون بالمصارين وتكرهون الواحد بيكم غصبا عليه
فاني كرهتكم من اول ما عيني فتحت لهالدنيا وكمت اعرف شديصير ميصير

هسه شكد صار عمري ٢٣ سنه ماتذكر موقف واحد حببني بالاسلام دوووومه يلعب نفسسسسي منه

- زييين حقج انتيي شايفه مشايفه مادري بعد
كلشي صاير بحياتج بعد الله اعلم شصار وخلاج هيج تكرهينا

بس اذا انه غيرتلج نظرتج وشوفتج الزين منهم تسلمين  وتخلين دينج الاسلام وتمشين بتعاليمه ؟؟

.
.
يتبع