رواية ماء مغلي الفصل الحادي والعشرون 21 - بقلم Zoka 🌷

..♣️🩸   ماء مغلي  🩸♣️..
* adzzon *

- زييين حقج انتيي ششايفه مشايفه مادري بعد
كلشي صاير بحياتج بعد الله اعلم شصار وخلاج هيج تكرهينا

بس اذا انه غيرتلج نظرتج وشوفتج الزين منهم تسلمين وتخلين دينج الاسلام وتمشين بتعاليمه ؟؟

- ههههههههههييي
من كل عقلك اكولك اي ويلا تعال سويني مسلمه !!!

ههههه حيداار شوف اني هذا حجيك يضحكني تره مايصحي ضميري عليكم
انتو بالنسبه الي ورقه محروكه

انته تشوفني زين منك ومن اهلك بس اني شايفه نجوم الظهر من البره

مااصدك بيكم لو بخيط وشعرايتين هالكد اني ماصدك ولا اجرعكم

حتى انته احجيهه الك طك بطك
انته اليوم وياي زين عندك مصلحتك باجر تخلصهه وتكوم تمشي وياي باستشراف واطكطك بسبحتك فوك راسي وتنزلي اياتكم الحنيفه تضبط عليه بيهن

وتاليتك هم تصير مثلهم بالوجه مرايه وبالكفه سلايه

- مااغدرج هيج مو طبعي

- هذا رس عيوني انتو رسكم هيج مو بيدك غصبا عليك تسويهه

- ريري انه اريدج تهتدين لنفسج ماعليه بيج زينه مو زينه بس ليش يعني تتعذبين بعدين وتتعبين باخرتج والدنيا بعدهه بايدج ليش تضيعيهه !!

انتي مو ذكيه وقويه وفاهمه ليش برجلج تروحين للنار

هذا دين شرعه الله النه نعيش بي ليش حاطته وره ظهرج وماشيه بالعواج وموجود عندج صراط مستقيم موضحلج بكتاب الله واهل بيت نبيه

- حيداار اضحك على روحي لو اضحك على الرب والانبياء !

اني من طولي شبرين تارستني الذنوب اجي هسه استشرف واصير علويه !

هيج برمشه عين انكلب من كواده لعلويه !!!

ياهو اليقبلني ؟! حتى الجماعه فوك هم يكعدون يضحكون عليه ويكلولي شجابج هنا !

- والله عادي شكد ناااس تابت ورجعت لربهه
وانغفرلهه كل الذنوب حتى لو جانو كفار
بس يسلمون ويتوبون بعد يعتبرون من المؤمنين وماعليهم ذنب الله غفور رحيم

- مو الي هاي السوالف
اني ادري بنفسي شنو من بشر
اني وحدي ادري بعيشتي شلون مصخمه

هي مو بس عرك وكواده هاي سنين بالشارع عشتهه اشكال سويت

هسه تريدني اروح للرب واكوله تعال اغفرلي يلا اريد اصير مؤمنه واكعد بالجنه !

شنو هي مضحكه !!!

اصلا محلو هالقانون واحد يتعب ويكضي عمره بالشرف ويجد بلكمه الحلال وفوك راسه ضيم يدك وهو يتعبد ويصلي ويصوم
وما يزل منا ولا منا

واجي اانييي ع الحاااضر بس اكول يلا غفرولي اريد اصير منكم حضرولي قصر بالجنه وياكم وراح اصير حبابه شريفه مؤمنه مثلكم يلا اخذوني وياكم سووني علويه وديروبالكم عليه وكبل ياخذوني يكعدوني وياه !

شهالمضرطه هاااي !! 

حتى عيب لا مو عيب اقصد مو حق

خلي هو كل واحد يعرف دربه وين وكلمن يتحمل نفسه وهاهيه لا اني اكدر اتوب واروح وياكم ولاا انتو تكدرون تتقبلوني حتى لو تبت وصرتلكم علويه ثوبي يسحل وراي وانام واكعد على السجاده

متتقبلوني اضل اني بنت شارع ودعاره وتضلون انتو ساده مزكيكم امامكم ونبيكم

هالشي الكم خصصوه عيوني مو النه احنه من يومنا منبوذين ولا دنيا ولا اخره النه مكان غير الشارع

- بس الله رب الكل ما يخصص مغفرته لناس اي وناس لا .. الكل مشموله بيهه
لا تضيعين نفسج بهالفكر
الله رحمته واسعه

- حيداار كافي فدوه
اني حتى لو اريد اصير ماكدر
ماكدر اتوب حتى لو اني تبت حياتي متخليني
جذووور عندي مثبته بيهه

عيشتنه مو قصص وافلام هووليود وبووليود

اني هاااي مغضوب عليه من ساعه مانحطيت ببطن امي الرب غاضب عليه من جنت هنااك

لو يريدني اصير زينه مثلكممم يالمسلمين
جان ما عافني ٢٣ سنه بنص الحرام

هو ميريدني اصير منكم عادي شكو بيهه
هو مصنف الناس واني صنفي بالكحاب
والنار عاادي كولش عادي هو ابو القوانين بعد احد يعترض !؟

فلا نكعد نخبط شيش بيش وكوه نلزكهه
هي مترهم بعد شكو ذابحين روحنا

- حجيج صراحه يقهرني

- دنجب شكو يقهرك تره مدكيتلك اليتيمه
دااحجي واقع حال

- مادري احسج حتى الله عندج وياه عتاب

- متشوفني اكولك يلا ادعيلنه خلي نموت
دانروح نحجي ويه الرب براحتنا

اني مااخاف اموت ولا اخاف انشمر بالنار
اني مااخاف من شي
لان عندي غايه اتمنى اخذها لو جان حسابها
نار وشرار على جلدي ينصب ميهمني عادي
هو اني شحصلت بالدنيا حتى اتوقع بالاخره زين !؟

- ريري اساعدج بكلشي والله بس لا تضلين هيج
عندج وكت بعد تطلعين من كل هذا

- اني مااريدك تساعدني شكو انته ذابح روحك عليه !!

عوفني اموت اتعذب انشوي اتكطع يطبني مرض وعساني بنار ماتخمد معليك بيه اووكيي

ضل انته زين وعوفني اني عميه مافتهم
واريد اضل مو زينه تماااام

بعد لا تفتح هالموضوع حويدر
هالمره حجينا بي وتناقشنا مره الثانيه اعوفك وامشي وحجايه متحصل مني

وتره ضجت بعد ماريد اسوي ريوك راح اصعد انام انته سوي الك ولاهلك

راحت كبل وانه ضليت بالحديقه شويه وبعدين طبيت اسوي ريوك .. واخذت ابويه غسلتله وكعدته بره وامي هم ويسالون على ريري كلتلهم منامت زين وفد ساعه تنزل

تريكنه وبعدين سويتلهه لفه جبن وكلاص حليب واخذتهن وصعدتلهه ..

لكيتهه نايمه ومخليه مخده فوك راسهه
كعدت من جهتهه وخليت الصينيه يمهه على الميز وشلت المخده من راسهه وهي غطت وجهه بايدهه وتكلي ..

- شكوو تره ملحكت انام بعدني

- ايي كومي اكلي اليوم انه مداريج
جايبلج ريوك وحباب وياج شتردين بعد

- اي كول شعندك من مصلحه

-ههههه واالله ماعندي شي بس ادري بيج تجوعين ومانطاني كلبي اكل وانتي لا

-نهجم بيتك يالحنين

- عايز بعد ينهجم

- ماريد اكل نعسانه  عوفني وروح

- يلا انام سوه انه هم نعسااان فدنووب

ذبيت التشيرت ونمت بمكاني وهي دايره ظهرهه عليه ..

ضليت اباوعلهه وافكر بسالفتهه .. تالي كلتلهه  ..
- مادري ليش احسس شي يريدني اضل اسولف وياج
جاي تحسين هيج ؟

-لا

- بس من صدك اريد نضل نسولف ماحب اطنكرين وتسوين نفسج نايمه بدالهه ضلي سولفي وياي ضايج والله شبيج

اندارت عليه وضلت تباوعلي ..
-  هسه عرفت صوتك وين سامعته

- صوتي !!

- ايي من اول ايام وياك واني اكول وين سامعه صوتك ووييين ؟؟
عبالي ملتقيه بيك فد مكان وناسيه بس هسه تذكرت وين اسمعه

-اي وين

- تعرف محمد خضر ؟
اكيد متعرفه بعد انته سيد تستحرم من الاغاني

- هههه بربج عوفي سالفه السيد كرهتيني بنفسي والله

- ديلاااا
بس هذا تعرف شنو اعشق صوته
اغانيه النشيد الوطني مالتي مااا اخلي يمر يوم اذا ماسمعله اغنيه

صوووته شجيي وانته صوتك نفسسه طبق الاصل

بالاخص عندك حرف السين من تلفظه نفسه هم هيج تخلي عبالك يبرز كولش تاكد عليه من تلفظه

وحرف الصاد هم عندك كولش واضح باللفظ
وهاي البحه الي عبالك تطلع من نص هاي التفاحه العندك هناا

ونفس كسره الكلمه من تكول صِدك

وكلمه الهسه هههه نفسسسهههه
بس السين وال اا تبين الهاء ممبلوعه

- ههههه خوش مركزه بيه

- مركزه بمحمد وانته تشبهه فماتعبت نفسي وياك

-هااااااا

- باوع اكو مقطع يكول بي

وين الصبح ما بينت من علمك هذا الصد
تنساني وانه الجنت اطك سن على سن من تبرد

هذاا عبالك انته الكاعد تحجي

اسمعك الاغنيه. ؟ لو تضوج !

- لا سمعيني بله خلي اشوف صدك حجيج

- تره هو يعزف عود يعني مو اغاني طربكه
بس مقاطع اشعار وهو يدمجهه ويغنيهه بالعود

- اي بعد احسن

جرت تلفونهه واجتي ادنت يمي وشغلت الاغنيه .. خلت سماعه باذني وسماعه باذنهه
وشغلتهه بكل علو الصوت ..

وكالت ..
- انتبه شلون يلفظ السين وركز بس ويه الاغنيه استرخي وياهه اووكييي تره تكعد البال وزززن

- شسمهه هاي ؟

- يامذبل جفونك خجل
هاي القناة افتح اليوتيوب بس علمودهه
يلا اسمع وركز بيهه

ضليت اباوع للصوره ابيض واسود والاغنيه حلوه من اول مقطعين ضحكت وهي وكفتهه
- هااا شبيك
- هذا انه صدِك والله خوش لاكطتني
- ههههه مو كلتلك نفسك
بس بقى بعد اسمعك تجر موال مثله
- لااااا لهنا وكافي
- ديلااااا اسمع لتكطعهه بعد
- يلا شغلي

ضلينه نسمعهه ومن خلصت كلتلهه ..
- شايفته لهالمطرب شو ماكو صورته هنا ؟

- لاا هو ولد هيج عادي لا مطرب ولا شي
بس هو عنده قناة ويغني بس تسجيل حسب الطلب يسوي جلسات طرب

هذا موده يجي فيت النه احنه النشرب
هو هم مثلنه سكير تره بس خوش يسوي اجواء فددد شيي صوته يسوي واهس للشرب

- هاااا وهسه صوتي هم يسويلج واهس تشربين

- جر موال واصير اسكر على صوتك

- هههه مو شغلتي اعذريني

- امممم  ديلااا اووكي

- متاكلين ؟

- لا راح اكل طيرت النومه من عيني

- انتي اصلا ماجنتي نايمه بعد شكو

بوزت ودارت وجهه اخذت اللفه والحليب
وصارت تاكل وانه اباوعلهه ..

- نروح نتغدا بيت السيد ؟

- لااا نتغدا هنا ونروح ماضل على مانيه احد اضوج هيج

- وشغلي ؟

- ايي شويه اكعد وياهم وروح مطاير محلك
- يلا جا نزلي كفي البيت وسويلنه غدا من وكت حتى ماتاخر على الولد

- حيدااار التنظيف يتعب
شنو كل يوميه تعالي كنسي ومسحي من فوك لجوه
انكسر ظهري واظافري شووف شوووف شصارت بيهه سواد شكد نظفتهن بس لونهن تغير
اصلا هذا الصغير نكسر وكلبي مينطيني اكصه وضال يدك بكلبي

- هلااااا اجتتتي فرررصه بعد
كصيهن كلهههن رحمه لاهلج اتخبل منهن

- لاااااا عينننييي خاف ميعجبك !!
اكصهن كلهن !! ولك هو واحد ويدك بكلبي

- ريرري اضوج منهن كصيهن فدوه
شلون تطبخين وهذني بيهن وصخ متلعب نفسج !

-لاا .. انته تلعب نفسك

-اييي حييل اتخبل منهن مكان شياطين هذا ووصاخه وانتي نظيفه ومرتبه معدله شكو مبقيتهن

- حلوااات ماكدر اكصهن ايدي تصير صغيرونه

- ميخالف كصيهن ويطولن هنه بعد ضلي رتبيهن لاتخليهن يطولن هيج فد نوب

- ماريد عوفني

- لاااا تريدين ااانه اريد تكصيهن يعني تكصيهن جاي اكلج تلعب نفسي منهن شكو بعد مبقيتهن

- واااني شعليه بيك شنو اشكل نفسي وشكلي على مزاجك ولك !

- ولج ريري استري علينه وكصيهن بدون مشاكل

- ماااا اكصصص اوووكييي

-اريد اشوف مرره الي تطول اظافر بعد
اصبريلي

- دررررووووح عبالك هو بكيفك وتتامر !!

رحت اخذت المقراضه من المجر واجيت عليهه وهي كبل شمرت المخده عليه وانه كعدت وجريت ايدهه وهي تضرب بجتفي

- اكعدي راحه احسن مااجرحج
- لك حوووبدددر بطل هالسوااف عوف ايددي شبيك تخبلت داكولك ماريد اكصهن
- ااانه اريد تكصيهن ويعني تكصيهن
- حيداااار ولك لتلح اعضضضك هسه اشوغ روحك
- عضي شتسوين سوي
اكصهن يعني اكصهن تلعب نفسي منهن

ثبتت ايدهه زين وكصيت الاظفر الصغير وهي تخبلت ضلت تعض بجتفي وانه اكص بالثاني وهي حتى بشعري تجرجر

نتعارك وهي تغلط وانه اغلط .. تعض وانه اضرب راسي براسهه .. واكص اظافرهه
تالي خلصت ايدهه اليسره وذبيت المقراضه

-ههه يلاااا هسه كملي اليمنى عفتج تك وتك

- شكددد حقيييير ونذذذل تننكط خباااثه انته مجلوووب وبيك البله مو فويهي

- بعد عاشرتج شترديني اصير !

- ننننناااا متضحك

-ههه كايلج ضحكي ! قرضي يلا شلون تضلين هيج تك وتك

- اوووف اوووووف الااا احرك كلبك مثل ماحركت كلبي يااحويدر يابن خضير اصبرلي

- يلااا انتظرج تسويلنه اكشن شويه
شو عبالك ضوجه هالايام لا سحوره لا مشاكل لا نتناكر بدا عندي الملل ماوصيج غيريلي جو شويه

- الاا اكرهك بعيشتتتك
تعااال كمل يلا بس تعرف اشوه ايدي وتولي كمل يلا

- كمليي انتي كافي دلال

- كلبي مينطيني تقرضهن لوو لاااا
تره اعوفهن هيج عادي عندي

- لااا جيبي ايدج وبعد كل ماشوفج تطوليهن هيج اكصهن الج واكصهن عووج هم حتى تكرهين روحج بيهن

-اوووف اووووف شجاااني وعااشرتك يالعكره

- قسمتج بعد شلون ماقسمتي مصخمه انتي هم

-انته مصخم اني شكوو

- شالعه باااب كلبي شمبقيه بيه انتي
شايفه لو مزوجج كبل سنه جان هسه انه حارك روحي وخلصااان من منكتج

- ديلااااا ع اساس انته شلونك
هنااا موغف على كلبببي انته خاف متدري
تره بالكوه جارعتك
ابو المغثه انته مدري شلون متحملتك لهسه ماعفتك وشردت

- هااا ابو المغثه ! وانتي شلونج عاد
كل الراحه عندج

- ووولك حويدر ولك ياهو هذا القبل شويه يكولي اكعدي سولفي وياي ضايج!
هسه طلعت اني مافيد ولك

- ايي اضحك عليج غير شفتج مطنكره
بس شهاده لله انتي تشلعين الكلب
عنادج ييبس ريكي
وصوتج بالعصبيه ياااابويه يسطر راسي

- تحملننني مو عندك مصلحه وياي اجرعني بصوتي اليطرشك

- اثنينه اهل مصلحه ومتحملين وجارعين هالعشره

- اييي همزززين طلعت تفتهم

- اكلج عمج شو متخابري هالايام شعجب ؟

- نتراسل دائما معايفته
شكو تسأل ؟

- هيج اجه بالي
يلا امشي انزلي غسلي وشوفي شغلج حبابه

- وانته حتنام؟

- ايي يمكن انام ماعندي شي

- شنوووه !! فوك مامطير نومتي وتريدني انزل انظف واطبخ واشمشم اخبار وانته هنا نايم متختخ !!

- جا شسوي ! هو انه جبتج تشتغلين حتى اناام هنا واتختخ

- ماااكو هيج
مو ماعندك شي اكعد عزل الغرفه امسح اخشاب سويلك شغله لتضل تصفن

- لااا عليج الله !!

-حووويدر هي عشره لو نعل
تساعدني لعد كلشي تذبه فوك رااسي
هم خطيه اني

- ماااعليه هذاا شغلج التنظيف وانه شغلتي اجيبلج فلوس وبسس

- زييين عزل الكنتووور صاير هوسه وماعندي وكت اله
عززل شنو مووهم ملابسك هنا لو هم تذبهه براسي اني اعزل ملابسك !

- ولج هنه هدمتين كلبتي الدنيا عليهن
مو مخليلج الكنتور من الطول للطول الج وهالخانه الوحيده الي ومثكل عليج !

- ايي مثكل عليه
هو انته بالكوه جارعتك النوب شغل بيتك وملابسك وغراضك الملم وراك !
مااااعليييه بعد انطيتك عين زايده ودللتك هواي
حنزل امسح وانته عزل الكنتور

- اعزل بس خانتي معليه بغراضج

- لييش يمه !! شو اني اهورف ليل ونهار لخاطر خشمك الاعوج وانته ملابسي تتعاجز منهن !!

- رييرري وتاااالي وياج

- انته حباب ادري بيك راح تعزلهن
يلااا چاااوووو

طلعت وانه اضحك عليهه ..
كمت فتحت الكنتور .. مو هذيج الهوسه
بس يرادله شويه ترتيب

عزلت غراضي بالبدايه وانه احب اسفط ملابسي مثل المحلات ارتب التشيرت
والبجايم .. ومخلي ملابس الشغل وحد وملابس الطلعه وحد ..

ماعندي هواي ملابس لان انه من احب لبسه ارتاحلهه بعد اجلب بيهه .. الي اشتريه ومارتاحله كبل انطيه ..

سديت خانتي وفتحت خانتهه مال بيت
عدهه هواي ملابس مشلحه هنا .. كلهه شورت برموده وصلوخ ..

شفت دشداشه ناعمه ستن اخذتهه فتحتهه
وشفتهه عريضه وشويه بيهه طول لونهه فستقي فاتح وبيهه شرايط كصار بيض

ضحكت من شفتهه تخيلتهه تلبسهه تطلع صدك حلوه وتضحك ..

سفطتهه الهه بالبدايه خليتهه .. وضليت اشوف شعدهه ماعدهه ملابس ..

شفت علبتهه مال الذهب كله ثكيل ومتين
ضميتهه الهه .. وكاعد اعزل بخانه ملابس الطلعه وشفت جنطه بيضه صغيره معلكه بالتعلاكه .. والبقيه مرتبات فوك بالرف

فتحتهه وشفت بيهه فلوس ضبات اثنين
ام الخمسه وعشرين وضبه بس خمسات

وبطاقة الكي كارد اثنين عدهه ..
قريت اسم الاولى ..
روان عفيف
الثانيه ..
سرى قيس

ضليت صافن عليهن .. هاي منو وهاي منو !
ياهي منهن الصدكيه ! انه حتى باسمهه اشك !

دورت بعد بالجنطه وفتحت سحابه صغيره
وطلعت هويتهه .. باسم روان عفيف

مالكيت الهه هويه باسم سرى قيس..

انتبهت على تفاصيل هويتهه .. واول جذبه لكيتهه بيهه مواليدها ..

هي تكلي عمري ٢٣ يعني مواليدهه مفروض ٩٢ وهنا مكتوب مواليدهه ٩٠ ! يعني عمرها مفروض حسب الهويه ٢٥ !

زين ياهو الصدك بيهن ؟!

انتبهت هنا مكتوب مسلمه .. و سنيه ..
وهي تكول اكره الاسلام ومو مسلمه !؟

نفوسها تقرا الاعظميه !!

كلشي غير شي عن الاعرفه منها .. و وين الصدك مادري !!

رجعتهن وسديت الكنتور ونزلت ادورهه
لكيتهه بالحمام مكمبصه وتغسل الوصله
كلتلهه ..

- اكلج
-شكو كول
- تره عزلت غراضنه وشفت شعندج ماعندج

- ايي عفيه بالسبع

- ماضجتي ؟ تره شفت جنطتج البيضه وكلشي بيهه

-ايي همزين خاف تعتاز فلوس وتستحي تكول بعد انته اندليتهن واخذ براحتك ماضوج تره عليهن

- موو عليهن قصدي الهويه والبطاقتين

- اي شبيهن ؟

- انتي ياهي منهن ؟ سرى لو روان ؟ دوختيني بعلي

- اني شمنطيتك ياهويه بالعقد

- مال روان

- اي بعد شكو تسأل

- وسرى منو ؟

-هم اني .. لتدوخ نفسك بهالسالفه
تره عندي يمكن اربع جناسي حتى اتيه بيهن
صدك اكولك اني منطيتك السنيه لو الكورديه ؟

- السنيه

- ايي زين مو عندي اثنين روان وهواي اتيه بينهن صراحه نسيت اني شمنطيتك ياهويه منهن همزين ذكرتني

- وشدعوا هالكد عندج ومنين تجيبيهن !

- اجيبهن فد معضله هنه
لك بابه ابسسط من الجناسي ماكو

- هسه انه دخت وعلي
انتي منو بالصدك !

عصرت الوصله وخلتهه بالسطل واجتي يمي
كلتلي ..
- ريري وبس

- ريري اصلها منين ! اسمها الصدكي شنو !

- ريري مالها اصل بكيفها تسطر اصلها وين ميعجبهه

- والله من الاول عرفت اسمج جذب
كلتلج ملايك عليج روان
احجيلي شسمج مااكلج تره هو اسم

- شوف اني ادري راح تضل تلح بس هاي شغلات خاصه بيه لتدخل اووكيي
كافي عرفت عندي جناسي مزوره الباقي لتعرفه احسن صدكني كل ما متعرف عني شي هو الاحسن

خلينه حبايب هيج لتفوت بالعميق مو زين على شغلنه

- لججج لااااتسودنيننني ريري شلون اعيش وياج وماعرف انتي منو !

- مو عشت صارلك شكد بعد شكو!
بس شيل هالسالفه من بالك وتكدر تعيش

- مااقتنع هيج
الا اعرفج

- تعب نفسك حتى لو تدعفس بكل شبر بيتي وغراضي متلكى شي يعرفك عليه
اقتنع بالي بديته وياك احسن
وتره هو مو فدشي هو اسم لايقدم ولا ياخر بحياتنا فطنشه اوووكيي

مشت شويه ورحت وراهه كلتلهه
- المهم انه مامغشوش بيج اعرفج انتي غير وحده .. تبقين بعقلي مبهمه بس اتعايش وياج ك. ريري مو روان هاي من الاول انه كارهه بيج ومتلوكلج

- كيفك المهم نكمل العيشه والشغل شتريد تسميني تفكر بيه كيفك ماهتم لهالشغلات ابد

راحت لغرفه اهلي وانه طلعت كعدت يمهم بالحديقه ..
متمدد وراسي بحضن امي وافكر بشخصيه ريري الضامتهه عني ؟ واكول هم يجي يوم
وتثق بيه وتحجيلي عنها؟

اجتني بعدين تشاورني ..
- اكولك حويدر هذا الشيسمونه البرياني شيخلوله ويصير جوزي

- هااه حتسويلنه برياني !

- اييي شعبالك لعد دابدع ادري بنفسي

- عشتتي والله خوش مدللتنه
هذا يخلون دارسين

- وشلون شكله هذا !

- فد شي هيج مطحون ولونه جوزي

-هاا زين وشلون اسوي الشعريه شو هاي كلتلي گليهه وخلي التمن والمي وياهه ونكطع النت عدهه بعد مافهمت زين

- ههههه ريري عيني عوفي هالطبخات جبيره عليج

- لعددد شسوووي كلتلي سهل وبسرعه يصير

- سويلنه كشري

- شلون يسووه ؟

- امشي نحجي جوه
رادله شرح

طبينه بالهول .. وضلينه واكفين يم الشباك
ونتشاور ..
- تطلعين شويه عدس وشويه تمن
تنكعين التمن وتفورين العدس اول فورتين تشوفين طلع الكشور مادري شنو هذا وغف ليفوك

- اي

- اي تشيليه

- شلون اشيله ؟

- عمي لا تشيليه اخذي الجدر صفيه واغسليه وخلي التمن والمي والعدس وخبطي بيهن
وهي تصفى

- هااا بس هيج ! شو سهل

- اي هو صراحه انه ماطابخه كبل بس هيج يمكن يصير حسب معلوماتي بعد مادري شراح يطلع وياج

- هااا هم اثول مثلي

-انجبي لجج

- ديلاا اكولك شوكت اخلي ملح

- من طلعين لاهلي رشي ملح من الناعم مو تاخذين هذاك الخشن وتخلين تمنات تكرط ملح مثل كل مره

-اييي فهمت

- وخلي دهن فركعي ورشي فوكه تمنج دومه ميبس

- ايي انسه اخلي

- يلا روحي اضبطيه بروح الاعزاز

- ايي اووكييي

راحت للمطبخ وانه رحت طببت ابويه صار الجو حار فد نوب بره ..

وكعدنا بالهول ويمنه الجهال ..

وساعه تجر ساعه صارت فوك الاحدعش
وريري مالهه صوت ..

رحتلهه للمطبخ والكاهه تكلب بالجدر
باوعت وكبل جفلت ..
جريت منهه الجفجير وكمشت التمنات وكلتلهه ..
-ولج هاي شمصخمه ريرري

- شكووو شسويت فوك ماصار ساعتين انتظر هالعدس يفور وبعده قوي حجاره مو عدسات

- هذااا عدس هذااا هذا عددددس !!!
ادري ماتعرفين تطبخين هم ماتعرفين شتاكلين !

- هسه عذا مو عدس ! لعد شنو ولك اني شطابخه !

- حمص مجروش ياثوله ماتعرفين العدس من الحمص المجروش !

- ياااااا وانيي اكول شبيي مديستوي بساع
هههههه طلع حمص خخخخخخخ امداني شكد ثوله

- استغفررر الله
ما جان اجيتي وكلتي تعال شوفلي جاره
هسه شناكل بله فهميني !

- ناكل تمن حمص مجروش ههههههه
اييي شبيك تغيير هسه مو زين اغيرلك وانوعلك بالاكل ميعجبك !

- ولج هسه امي شتكول عليج
ابويه شياكل ! غير يشمر الصينيه بوجهج
وفوكاهه معجن غادي مريده
ولج تمن الكبه مو هيج ممرود شجااج ياثوله تمنات مدبرتيهه

- اييييي غير كله منك مكلتلي شلون شكله العدس من الحمص
ماعرف اني اجيت لكيتهن كلهن صفر جريت هذا وفورته
يعني متعرفني مطفيه بهالسوالف غير تحجيلي وتعلمني زين

- اووويلي ربببي ارحمني ولج وتالي وياج
شلون بس فهميني شلون
اكتبهن الج واحطلج صورهن وتحفظيهن!
هيج تريدين !!!

- اي هيج داندل دربي مو اجي هنا افتح السطوله واشمشم مادري شنو هذا همزين اعرف بس التمن واللوبيه الحمره ها والباكله اليابسه هم اعرفهه والفاصوليا

- لتذكرينيييي دخيل الله تلعب نفسي كل ماتنذكر الفاصوليا من ذاك اليوم ولهاليوم ماحطيتهه بحلكي بعد

- اووووي ديلااا ع اساس شلون طبخك انته ماكو  هيج مشبعني اكلات

- والله اوكف اطبخ بدالج واتفشل كدام اخوتي ولا شلعان الكلب هذا اضل جوعان ومحتار شاكل واوكل اهلي من وره ابداعج

- اهووووووو
ديلاااااا بعد ماطبخ اني صوجيي واكفه وشابعه حر ودهن ووجهي راح انصلخ بالحر هنا وانته كلشي ميعجبك ومتقدر

- هووو شنوو السويتيه يسوه واقدره !
لج تمن حمص توكليني ! ريري ماريدج تسمنيني بس خلي اكلي لكمه مثل الاوادم

- ديلاااا اوكف سوي لنفسك راكل اني بعد معليه كلششي ماسوي لو تطلع نخله براسك بعد ماطبخ

- اااحسسن وخري منا خلي اذب هالجدريه لا تفضحينا بيهه

وكفت يم المجمده ومتجتفه وكالبه خلقتهه
وانه فرغت التمن بالعلاكه وذبيته بسطل الزبل ..

كلتلهه..
- تعااي غسلي الجدر
-مااا انته اغسل وانته اطبخ معليه بعد
- استغفررر الله
زين هذني المصخمات وين ولن !
- ديغسلن الفوك
- هاا شعجب  !
-اني تعاجزت امسحه وكلت غرف جهالن وصخه خلي اخليهن ينظفن
عاد ذبيت زيت الشعر مالتي بغرفه جهال عزيز وبالممر
وكلتلهن صعدن خاف جهالجن يتزحلكون
وهنه فد طفره طفرن

- يااااا ملعبه لج انتي داهيه
هاي بس تعاجزتي تمسحين رحتي ضحيتي بزيت شعرج !

- اي بله شفت خسرت الزيت
يلاا المهم مامسحت وانكسر ظهري بالدرج

- مصيبه انتي وعلي
تعااي هنا اوكفي وتعلمي شلون نطبخ الكشري

- ماااريد

-تعاااااي هي براسج براسج

جريت ايدهه ووكفتهه يمي .. ضليت اعلمهه شلون كلشي تسوي بالصحيح مو بس تلزك
ومن شفت نزلت ام سيف عاد سحبت نفسي
وضلت هي واكفه تهدر التمن ..

واجتني بعدين جايبه شويه بالخاشوكه وتكلي استوى اطفي ؟ كلتلهه اي وراحت طفت وصبتنله ويه اللبن وتغدينا الحمدلله ..

اخذتهه ورحنه لبيت السيد .. شفت ملوكه
شلون فرحت بجيتنه وضلينه نسولف وياهه لحد ماصارت بالثنتين طلعت للمحل وعفتهه هناك ..

رجعتلهه بثمانيه اخذتهه وكبل للبيت
انتظرت الجناين صعدن ووكفنه انه وياهه نسوي عشه النه ..

تعشينه وضلينه كاعدين ويه اهلي ناكل فواكه لحد نص الليل وصعدنا ..

ريري كبل طكت الجكاره وتشلحت وتمددت ع السبلت .. وانه فتحت الحاسبه ودخلت لتسجيلات كاميرة اليوم ..

شفت ماكو احد صعد هنا تطمنت ..
وعفتهه مشتغله وضلينه نسولف انه وياهه على ملوكه ..

تالي انه نعست وهي ضلت سهرانه بايدهه القوطيه والجكاره ومخليه الحاسبه بحضنها تكلب بالاغاني ..

نمت وهي ضلت كاعده ..

تالي جفلت وكعدت جانت هي تهز جتفي وتكرص بايدي .. باوعتلهه وهي شفايفهه ترجف ..

-  شكو شبيج شكو
- لك اجتي اجتتتي علينه حيدااار راح توصل

جريت الحاسبه منهه واشوف
شي ماكدر اوصفه بفد كلمه

شي طويل حيل ومربوع اسود والحيايه على ركبته ملتفه كل وحده راسهه من جهه
ولا مبين منه ايد ولا رجل ولا وجه ولا شي بس سواااد بشكل مربع وطويييل جاي يصعد ع الدرج ..

ضلت هي تكلي ..
- لك هاي الجنيه الكالت عليهه اختك هاي اجتي علينه ولك اجتتتي حيداار اجتي

سديت حلكهه كلش عصرتهه بايدي
وضال اباوع للشاشه وهي وصلت يم بابنه وكفت ..

.
.
.
يتبع