رواية ماء مغلي الفصل الخامس والعشرون 25 - بقلم Zoka 🌷

..♣️🩸 ماء مغلي 🩸♣️..
* adzzon *

رجع الدكتور مره ثانيه وشاف الفحوصات
وكال ..
-لااا هاي تشخيصهم غلط

اخويه عزيز كامش جتفي
والدكتور رجع اخذ غير اشعه وكال ..

- لييش هيج لييش بابه حالتك كومه رادلهه شغل

عظم الفخذ عندك مفصول من مكانه ماعندك دعامه دهنيه تحفظه
زين الحوض عندك سليم بس هذااا رادله شغل

نجي للساق عظم سليم من فوك متاذي من الاسفل بملتقى القدم

هنا بالقدم عندك هوسه صايره
الرصغيات متاذيه والاربطه
عظم الكاحل والشظيه بينهن انفكاك وتمزق اربطه اعتيادي ..

بقت الركبه خلي اسويلك ناظور وافهم الاذى بالضبط وين

كبل اخذوني لغير غرفه و صار يفتح شك بالركبه وانه بس يطخها اعيط وعزيز ضال يمي مثبت جسمي وانه روحي تشووغ منين مايطخها . .

رجعوني لغرفتي وانه بس اون .. ودايخ حتى عيوني غوشت بعد ..

وره وين سمعت الدكتور رجع وضل يصحي بيه ويكلي ..
- شد حيلك بابه رادلك صبر اذا متصبر وتتحمل الوجع هالشهور ماترجع تمشي بزودك بعد

خلي ابشرك
ماكو كسر بالركبه هذا تمزق حاد بالاربطه مثل القطع
عندك هاي الرضفه او تسموها صابونه هاي فوكها وتر متمزق و رباط جانبي للرضفه هم متمزق والرباط الصليبي الامامي كذلك
الرباط الداخلي الي بين عظم الفخذ والقصبه هذني الي بالركبه مو كسر واطلع كبل لا بابه هاي ادق من الكسر

رادلهه جراحه لان هاي من الدرجه الثالثه تنهي حركة رجلك اذا ضلت لان التائمها وحده صعب جسمك ضعيف يطول ويجوز ميرجعها مثل اول

- دكتور ظهري فد نوووب وجعه ميبسني

- اعتيادي بابه هذا وجع العضل هسه
بعدك بدون اكل ؟

-ايي

- زين .. الشباب راح يحضروك للعمليه ويكملون فحوصات والاهل يمشون وياي نتفاهم بالاجور

طلع عزيز وضل عادل يمي واحمد وريري من البدايه هي بره ..

اخذو دم وتخطيط قلب وضغط وضليت انه اغفي واكعد من وجع راسي ..

حسيت على ريري تكعدني .. ضليت اباوعلهه وهي تكلي ..

- دكتور هنا يشوف خشمك هذا اختصاص دزه هذاك الجراح

اريد ادير راسي بالكوه يلا .. وجهي ثكيل راسي يون والوجع احسه ينخر بكصتي
ونفسي كله من حلكي .. خشمي انتهى ماحس بي بس ثكل ..

ضل ينظفه من الدم ويفحص وتالي كلي ..
- كسر يتعالج بس كمل عمليتك واشتغله الك
من يصير بيك حيل شويه

- ماكدر اتنفس منه بعد ؟

- رادله شغل شغل انطي صبر بس يسكن جسمك اعالجه الك

- سويه هسه راسي حينفجررر خلصني منه لخاطر الله

- لاا متتحمله هسه تفقد مابيك حيله
سكن وجع جسمك وهذا بعدين تفرغله

طلع وانه صحت لريري .. دنكت يم راسي
كلتلهه..
- دخيلج رور بس انتي جاي تفهميني
دبريلي شي اريد راسي يصفى
جاي احس وجهي كله مخنوك ومعصور عصر

- ادبرهه ادبرهه بس هسه اصبر شويه
خلي نضبط رجلك وبالمسكنات راح يخف وجع راسك وتنام مرتاح

- يلااااا عاااد وينهم خلي يخلصوني شبيكم من بارحه لليوم تفرون بيه
ماضل بيه حيييييل ياااابوووووووووويه
دخيييلك

-هسه ماضل شي
ماضل شي صبر شويه ويخلص هالوجع

حيدااار شد حيلك وليضل بالك اني كلشي ضبطتلك بس فوت العمليه بزودك لا تخاف منها ماشي

- ماااخايف بس اريد اخلص
اييي شي هسه لو تموتوني بس خلصوني لتخلوني متعلعل هيييييج

- دكافي شبيك بس هدي نفسك شويه هسه ديحضرون لعمليتك بس انطي صبر

- فركي راسي خلصيني منه جاي اتعذب هيج وعليييي ماينحمل ماضل بيه شي صاحي كلها تصل عليه

- دكافي ياعيني كاافي لتضل تعب نفسك هيج

ضلت تفرك راسي وتكلي ..
- هسه بالبنج بعد متحس بشي ومن تطلع هم تضل مسكن هوااي

وتنام على راحتك
وراح اترسلك الثلاجه هنا بس اكل وعصاير
واعوضك جوع هاليومين

اجيبلك شوربات من مطاعم مضبوطه
وحتى طلي اذبحلك وهالمره كله اخليه الك اضل اشبعك مشاوي

يمكن اشتري مجمده بس النه واقفل على لحماتك خاف طنطول تريد تبحوش اكسر ايدهه واذلهه بعد لا خليهه تحصل كلب ولا جلاوي

بس هسه تحمل شويه ومن تطلع من العمليه
كلشي يتغير ويصير احسن

- لا تشترين شي حتى طلي مااريد بس
لا تسوين مشاكل ويه احد

- لاااااا ويه اخوتك بعد ماتعارك
شبيك غير فلت لساني بوكت اعصاب
هسه رجعت حبابه

- ضلي هيج لخاطر الله لا تخليني اشيط باعصابي بعدين تره والله مابيه حيل

- ديلاااااا مو كلت ماسوي شي كافي تحلف
انته اسكت ونام ومعليك بعد

طبو اخوتي وهي وخرت مني ..
اجوي يقووني وطلعو وياي
وانه لحد ما طبيت العمليات اون من راسي
جاي ينعصر ويتمدد ويرجع ينعصر

شفتهم هنا كلهم يضحكون بوجهي وبعد ماحسيت بشي ..

حسيت على اذاني واحد يتلمس بيهه
وصوت ضحك .. مابيه حيل افتح عيوني
بس احس بواحد يمي قريب كلش عليه

حسيت بعدين على صوت اخويه عادل
يحاجيني ويضرب بوجهي ..

ضليت افتح واغمض واكله هاا
وهو يكلي ..
- شلونك احجيلنه شتحس
- مادري

- اكعد صحصح يلا صحصح واكل

- وين ريري

- فتح زين وتشوفهه

حسيت على ايدهه تفرك عيوني وتمسح وجهي بالخاولي المبلل ..
باوعت زين واشوفهه كاعده يمي وراسي صاير على جسمهه ..

ضليت اباوعلهه وهي تكلي ..
- عطشان ؟

- شجابج هنا ولج

ضحكت واندارت شالت البطل وضلت تشربني ..
وخرت منها وضليت اباوع لاخوتي واحمد خربانين ضحك

اجاني احمد بوسني وشاورني ..
- عمي حقك شابع عسل انته حقك شمتسوي حقك

- شبييييك ولك وكت خبال

راح كعد واخوتي اجوي يتحمدون بالسلامه وعادل يكلي ..
- احضنك لو متريد

- شبيك خويه هسه انه صادك

- هههه تعاال بعد اخوك ماعندك الا العافيه
وتعبرها ان شاء الله وتصير سوالف

- ان شاء الله

كعدت ريري يمي وبايدهه شوربه شاورتهه
- انطيهه لاحمد يوكلني اذا يدبرها

صاحت لاحمد وهو كبل ضحك وكال ..
- عمي اكِل اكِل هسه ضلت على هاي
اكل منشوف احنه منشوف يلا اشبع دلال اشبع

- ولك احمد مابيه حيلك ضم شقاك بعدين

- يلا هسه اكِل شعليك بيه اكِل يلا
ااانه وعمامي لا نشوف ولا نسمع

باوعت لاخوتي مدنكين ويضحكون..
كلتلهم..
- شبيكم ؟

عادل كالي ..
- هسه انته زين مصحصح فول

- ايي

- جا ماتاكل ضال تصفن بالوجوه اكل
خلصنه ياخويه اكلك لكمه مو صار الليل
وانته على غدا البارحه شضل بيك ياخويه
اكل من ايد مرتك يلا لا تستحي

وكلتني ريري وانه اتلمس خشمي ملزك بمدري شنو بس صاير حجاره ..

باوعتلهه وهي وجهه خابط لونه احمر وصفار بشرتهه ..عبالك جانت تخبز بالشمس

كلتلهه..
- متنزلين بوشيتج

- حويدر بعدك هسه صحيت وشغلت عينك عشره عشره دنطي مفكه لنفسك

- ولج احمد عينه زايغه يضوجني

- ماابيه شي الوليد فقير انته المتكعد راحه

ضلت توكلني وانه عيني على احمد يكلب بتلفونه ويباوعلي يغمزلي ويضحك ويرجع يدنك ..

اخذت الكلينس اريد امسح حلكي واحس وجهي مورم حتى شفتي توجعني . .

شويه غمضت وصرت احس وجهي ينفض نفض بالوجع وعيوني تدمع .. شفايفي صارت حجاره وبالسن احس يدك من وجعهه ..

صرت اون من هالوجع واعصر براسي وعادل يجر بايدي وانه اعيط من وجع راسي
جان احمد يصيح ..

- احضنيه احضنيه يمعوده خلي يسكت هسه يلم علينه الوادم

- احمممممممممدددد انجببببب

ضل يرزله عزيز وطلعو يصيحون الدكتور
وانه عاصر راسي واريد بس افكه نصين واخلص ..

ضل دكتور يفحص بخشمي وبعدين خلالي عليه عصاره وطلع ..
كمت اصيح عليهم ..

- شبيكم انتو ماتكلوله ينطيني مسكن ترحون تجيبون وين الاثول وتخلوه فوك راسي

ريري تفرك راسي وتكلي ..
- انطوك قبل مو كل شويه هي ميصير

- شوكت من طلعت ؟

- ايي متشوف رجلك مسكنه

تلمست رجلي واحمد يكلي ..
- ماكصوهه بعده لتخاف ماكصوهه

- اي ادري ميكصوهه

- ههههههه لا الله عليك صدك تدري !

-هاي شبيك !

- عمي انته الي شبيك
سودنتنا بعلي ماندري نضحك عليك نشوف شبيك مابيك

باوعت لريري وهي تضحك ..
- شكو هذا شجاي يمسلت ؟

-ماكو شي هيج متعرفه يعني

باوعت لعادل وعزيز يتشاورون ويضحكون
كلتلهم ..
-انه شوكت طلعت !

عزيز كالي ..
- من المغرب طلعوك

باوعت لريري وكلتلهه..
- انه بنجوني عام مو ! خوما حجيت شي

- لااا لاا كلشي محجيت

كبل احمد صاح ..
-هي شننني ماتحجون وتفضوهه
عمي انه اكلك حجيت حجيت

صاحت عليه ريري وتكله اسكت وهو وكف ويكول..
- ليش اسكت هسه كلنه ندري بعد شكو
عمي انتو مو سمعتو لو ماتدرون !
مو كلكم دريتو بعد شكو مانحجيله ونضحك عليه هسه شني والله طكت روحي

عادل جره وكعده وهو يحوص .. تالي عزيز
كال ..
- عمي احجي احجي ضحكه لعمك
هي خربانه خربانه

- ههههههههه وكعت بايدي ولك عمي شيخلصك بعددد

ولك ابو الاحضان شبيك مشايف مشابع لما مكابلتك المره ليل نهار ماتشبع انته

- انجججججب لك انجججب لتضل تمسلت
جم مره كايلك لتجيب طاري مرتي شبيك انته ماتوب

-ااانه شعليه
عمي انتو شاهدين انه احجي لو هو !
كولو كولوو منو الحجى !!

كلهه تضحك وانه جريت ايد ريري كلتلهه..
- شبيه هذا شصاير. !متحجين شبيج

وخرت ايدي وضلت تباوع لاحمد وهو يكلي ..
- لك فضحتنا شبيك صغيرون
مو الشيب حيطك براسك شبيك مخبل نسوان

- اننجبب
جلب انته ماتنعدل مايفيد بيك حجي الا اسكطك يلا تجوز مني

- ايييي شبليتني
انته تصيح ريرررري احضنيني ريرري

شكوو جايب الحجي من جيبي !!

- جذااااب ماحجي هيج لو اموت ماحجيهه

- تهي بهي
لك كشفناااك بعد عمممي لاتضبط بروسنا
بعد احتركت ورقتك ابو الحب

عزيز كام يكح من كد مايضحك وريري
دايره وجهه وحاصرتها الضحكه ..
كلتلهه..
-هذا صدك يحجي لو يلعب باعصابي
ولج ريري كليلي حجيت هيج لو لا

احمد وكف يمي ويصيح ..
- عمي والله حجيت والله حجيييت
جا هسه انه ماخايف من اجذب عينك عينك
جا غير كلهه تدري صدك وساكته

-عليك علي !

-وعلييي خزيتنا

-شحجيت ولك كلي

- طلعوك جنت ساكت احنه كلنه هذا مات
جان تكوم تون وتصيح

ولج ريري كصوهه لرجلي كصووهه

المره تكلك لاا بعدهه رجلك مابيهه شي
وانته تصيح كصوهه الجلااااب

الدكتور يعدل رجلك وانته تصيح

الكواد الجبتيه كص رجليييييي نعلى عليج

-لااا يالله
ولك هاي شمسوين بيه نعلى عليهم

- ههههه مطفيي انته بس لسانك يرطن
جلبت للمره ليش تجيبين هالكواويد عليه
ليش تسكطينيييي شمسويلج ريررري

وهي تكلك هذا دكتور يمعود اسكت وانته فصلت فدنوب

نزلت دك مسبه على عمامك شجابهم بالنص مادري

النوب ترجع على هالمكروده تصيحلهه كله منج متعرفين تشتغلين زين كسرتيني
ومانطيج فلس واحد

- لك لااااااا
لايروح بالك بعيد غير سالفه بينا

- سالفه سالفتين انته بعد جفصتهه
هسه هاي كلهه عاديه بس من جلبت احضنيني هاااي فدنوووب فاول لهيبتك عمي

- لاااا يااالله
وانتي شبيييج حاطج هنا تضحكين عليه
متسكتيني ..الله ذب عليج الثكل بس هسه

- هسه انته شبيك تروح تروووح وترجع عليهه
خاب عوفهه من يمي بزعت

- معليييك انته لتدخل

- هههههه خرررب بعرضك عمي شلون خوااف يبووووويييي فضحتنااا ولك فضحتنا

- انجببب عااااد كااافي لتلح كااافي

- بس كلي شغله هي شبيهه مزاعلتك ؟
ليش تسبهه لييش

- لاا ممتزاعلين

-جا شبيك تصيح متحبيني مصلحجيه
ام الفلووس

- اييييي هيج هاي مسلته حجي هسه قابل صدك

-صدك جا ليش مو صدك
بس بيك بختتتت عدلت حجيك ومزعلت منك

هي كلبت خلقتهه بالاول بس من ضليت تبجي

-انه ابجي !! ليش ابجي ولك. !

-والله اسأل نفسك شدراني بيك
انته تبجي وتصيح كصووووهه لرجلي
رااحت رجلي رااحت

نجيب ايدك نخليهه على رجلك يمعود هاي رجلك ماطارت هاي بعدهه وانته تبجي
تصيح سكطوني ريررررري سكطوني

هي تكلك مابيك شي هسه تصير زين عمليتك زينه نظيفه وانته تصيح ريرري ميخلوني الا يسكطوني ويموتوني
لا ترجعيني للبيت خلي نبقى بغداد

تكلك ميخالف نبقى تكللهه احضنيني ريررري رجلي توجعني راسي يوجعني خشمي ماكو خشمي ماتنفس ريرررري نعلى عليج وين جبتينيي

حارت المره وياك تحضنك تغلط عليهه
تعوفك تصيح
وين تعوووفيني وييين ولج تعبااااان ريررري
حسي بيه ضلييي ويااااي نعلى على ابوووج الكواد خلفج وانه ابتليت

باوعت لريري وهي تضحك كلتلهه..
-ولج لاتزعلين احب ابوج انه مالي شغله بي

-ديلاا اووكيي

احمد كعد يمي ويكلي ..
- هسه انه كاعدلك هنا اريد اعاتبك
اريد اشوف ياهو الاعز ااانه لو مرتك
ليييش انه اكلك عمي انه احضنك تكلي ولي كلكم ولو منا شيااااطين ولو جيبولي ريري

ليش مو اانه صويحبك ومثل وليدك ليش هيج عمي ليش

- ايييي هسه شلحيت كلتلك مادري مو بوعيي

- هااا وحتى اخوتك ياهو اليحاجيك تسبه
خو عمي عادل شبع مسبه
طلعته من الكلجيه
لاخليت شرف لا هيبه للزلمه نزلت دددك
مسبه شجاك هيج محمل كلبك علينه

- ياااابويه والله مااادري
هسه متعذرون واحد تعبان ومتكسر ومنعول يومه
شبيكم وكفتولي ع الكلمه

- نعذرك بكل شي بس مااال نحضنك وتصيح وخرو شياطين ماانعذرك بيهه

شني هيج حضنه يبزز وحضن المره بلسم يصيرلك
خبصتنه احضنيني ريررررري ولج رييررري عذبوني حيموتونييي ريررري
الحكيلي ريرري

- هههههه نعلى على هاليوووم الاكشر
ولج انتي شبيييج الله ثولج بساعته ماسديتي حلكي هسه ماتسمعيني شحجي

- عمممي هو انته تسكت
المره تحضن بيك وانته تصيح احضنيني
شتسويلك بعد !!

-ايييي مااادري مااادري

- بس خطيه عمي عادل يركضلك هنا وهنا وانته دكيته وعايلته مسبه

مانعجبك بعددد عيني مانعجبك
بس ريري صارت الكل بالكل هنيالج عمييي
لك ساحرتك هاي

- لاااا ولك لااااااا انجب ريري متسحر
كااافي سكتتلك هواي بس هنااا اطيح حظك
لتحجي بالعاطل عليهه لا وعلي احط ضيمي كله بييييك

- هسه شحجيت يااعمي سبينه العنب هي ريري

- تسووووى رااااسك ولك كوووم منا كوووم
مابيك خييير حرااام عمرك ماتفلح بشي
حجي متعرف تحجي ولييي منا ولي شعندك مكابلني عاتب عليك انه

رووح خلصني منك بس حركان اعصاب
مامنك فايده

هو خربان ضحك ويحضن بيه وانه ادفع بي
تالي جره عزيز وكعده يمه

وانه ضليت اتعذر من عادل وهو تفهمني
ومازعل ...

انطتني ريري عصير شربته وكلتلهه..
- هسه شوكت اطلع منا

- هو باجر تكدر تطلع بس اني حجزتلك هنا خمس ايام

- لييش ولج شعندي باقي بعد
خلي ارجع للبيت هسه امي اطك وتموت اذا متشوفني

- اييي غير نصلحك ونوديك لامك
دنطي صبر بعد خشمك رادله تصليح
بس تطلع منا بعد شيرجعك يضل خشمك اعوج ومتسوي

- وشدعوه خمس ايام خلي باجر يسوه

- غير ترتاح بيك حيل عمليه الثانيه
هو انته هسه يلا صحيت افوتك باجر عمليه ثانيه وتضل تلوب ! ياوجع ووجع تتحمل

خلي شويه يصيرلك حيل تسكن رجلك وهنا خوش دكاتره يضلون يداروك اخذتك هناك وضليت تون وين اروح بيك ! رجلك لازم تضل ممدوده .. شيحركك كل شويه لمكان !

- صدك اكلج شو هاي مامجبريهه

- غير عمليه يااا شبيك حيداار

- زين هاي شنو ابر ! شياش شنو فهميني

- هاي مؤقته كالو تثبت الركبه

- متوجع بعدين مو ! شكلهه يخوف

- لا متوجع شبيك هسه هي مو متوجعك !

- اي بس خاف بعدين تبين عليه

-لا لا لتضل توهس مابيك شي

- اكلج اريد انام بس احس راسي راح يوكع
صاير عبالك طابوكه

عدلتلي مخاد وضلت تدير راسي بهداوه
وغطتني واخوتي طلعو ضل بس احمد
طفى الضوا وتمدد وهي اجتي  كعدت يمي
ضلت تشاورني ..

- معبالي هيج تحب الحضن ولك جان انطيتك
ماخليك بحسرته

- فد نوب انتي مشرمتهه وياي

-هههه شبيييك لي ضايج مني هيج

- ليش مسكتيني مو عيب الحجيته كدام اخوتي والله فشلان منهم

- ديلاا عااادي بعد ابو البنج معروف يخربط حجي
هسه اكو شي يوجعك ؟ اجيبلك شي ؟

- لاا كلشي ماريد

- لا حضن لا بوسه هم متريد

- اي ماريد

غمضت وحسيت عليهه تبوسني بخدي
وضلت تحجي يم اذاني ..
- اول مره بعمري  اخاف على احد
مابقيت شي مسويته الك حتى تصير زين
بقى بس تعين نفسك وترخي اعصابك لاتضل متنرفز اووكي

- شعجب خفتي عليه ؟

- والثول غير رجلي ليش ماخاف عليك

- هههه ماصدكج

- ديلااا لتصدك شسويلك

وخرت مني وانه كلتلهه..
-وين تنامين !

- مانام حسهر ع التلفون

- متعبانه ! وكت تلفون. !

- نام نام معليك بيه

- بارحه وين نمتي ؟

- هيج نفس مكاني

- وليش تضلين متكسره هيج كومي طردي هالدثو هذا ونامي بمكانه

- دعوفه فايدني عوفه خلي ينام باجر هواي نكرب عليه

- ريري تعاي ادني

ادنت يمي وشاورتهه..
- هم حجيت على هذنيج الصخايم

- لا بس سبيتهن عادي هو انته نزلت العشيره مسبه فماكو شبهه عليك

- زين اكلج منو دفع الفلوس وشكد ؟؟

-اني دفعت

-واخوتي !!

- تكفلو بالعلاج والاكل

-شكد دفعتي ؟ ومنينلج ! بس لا خابرتي واحد من الولد واجه هنا

-لااااا رحت سحبت فلوس واني جنت جايبه وياي وكفن وعندي زايد بعد

- زين شكد دفعتي كليلي

- مو هواي لتخاف

- شكككد احجي عاد

- لحد هسه اربعه ونص مليون

- كلهن منج ! ليش هيج !

- اني ماطلبت من اخوتك
بين ماكللهم ويروحون يتناقشون ويه هذا وذاك اني دافعه ومخلصه

-بس هواي على يوم واحد

- تره مستشفى اهلي هذا كت فلوس
واني ادفعلهم زياده حتى يداروك
الدكتور بس طلبت حجز يمه ع التلفون
خمسين الف اول ماوصلنه ورقتهن يلا شفته

وحسبها الك عمليتين بس الركبه والفخذ القدم كال عدلتها بس رادلها وكت تلتئم
هذني هم لكل وحده حسابها
من عدا حجز الغرفه مال يومين

- شكرا رور صرت اخذ منج بدل مانطيج

- عادي بس صير زين ضجت وحدي اتصفن بوجهم المبوم

- ههه احتاج تعب يلا اصير زين
تضلين تتعبيلي ؟

- هو تورطت بيك بعد غصبا عليه اتعبلك

- ولج رووور

-هااا سكنوك واشتغلت دوده المشاكل عندك

- ههههه انجبببي جاي اكلج اشتاقيتلج بس متستاهلين

-ديلااا معايزه على حجايتك

ورت وضلت تكلب بتلفونها وانه اباوعلهه
وافكر شلون اردلها هالفلوس وانه بعد لاكدر اشتغل ولا اسوي شي ..

كل ماكول مو وكتهه تنكسر رجلي افكر لو واكع هالوكعه وهي ماكو جان شصار بحالي؟

نمت بعد ماحسيت عليهم الا الصبح
اخوتي يكعدوني .. تطمنو عليه وعادل كال ..
- راح نرجع للبيت نطمن الاهل ونجيبلك ملابس والوالده تريد تجي تشوفك هم نجيبهه ونرجعلك

- روحو خويه الله وياكم

- مفتاح الغرفه انطينه حتى اجيبلك غراضك

كبل ريري كالتله..
- مشكور خويه هنا اني مدبره غراضه
ممحتاجين شي من البيت لا يضل بالك

- هااا ملابس شي

- دابرات خويه دايرات لتخاف عليه ماخلي ينقصه شي روحو توكلو

طلعو اخوتي وهي اجتي كلتلي ..

- اريد اروح لبيتي ساعتين وارجعلك ماطول

- وين رايييحه ريري منو يضل يمي

- احمد هنا ماتاخر شبيك بس اجيب ملابسي
واشتريلك كم شغله وارجع

- دزي احمد لتروحين انتي

- شمعرفه هذا
كلتلك ماتاخر .. اشرب عصير هسه واني اجيبلك ريوك من ارجع

خلت بايدي بطل العصير ولبست عباته وطلعت ..
ضليت اباوع لاحمد وهو بسابع نومه

كضيتهه بس اتصفن على رجلي واغفى شويه واكعد .. لحد ما رجعت ريري ..

وياهه عامل نظافه شايل العلاليك .. خلاهن بالكاع وانطته فلوسه وراح ...

طبت سبحت وطلعت لابسه بنطرون وقميص طويل اسود .. وتنشف شعرهه وانه ارزلهه
حتى تلبس حجابهه كبل مايكعد احمد ..

لبسته وراحت بللت خاولي واجتي نزعتني الفانيله وضلت تمسح جسمي ولبستني تشيرت
وشورت ضلت تمشي علكيفهه برجلي المتاذيه ورتبت ملابسي وكعدت تمشط شعري وتكلي ..

-هسه رجعت حويدر النجر ابو كرفش

- شكرا

- عفوا
باوع راح الزكه لاحمد بكفخه واكعده
جايبته حتى ينام !! لو مااهله ميتين جان سبيته مسبه هسه اووف اووف واكفه على لساني واستخطيه

ضليت اضحك وهي راحت مفخته على ركبته
وضلت تتعارك وياه .. وهو كعده مدلغم وراح يغسل ويصيح ..
- انتو مخابيل ااانه شكو مورطيني بيكم
عمي لا ريدك ولاعرفك بعد ولانعل ابو اليسويلكم زين

طلع من الحمام وانه كلتله..
- واك صخيم لو تكعد وتسكت هنا لو تولي لاهلك
مابيه حيل صياح فهمت

- اي خلي اكلك رايح الا تشهرني بالعشيره
وكلهه تتكاون عليه بعد عايف عمك ورايح
ميدرون انه مطرود وكاعد ومنجب

ريري خلت كدامه ماعون كاهي وكيمر وخلتله كلاص جاي وهو ياكل وساكت

كعدت يمي توكلني شويه وهي تاكل وهو يباوعلنه وكال ..
- انتو شدعوه هيج متفاهمين !

اثنينه ضحكنا بعلو صوتنا .. وهو يكول ..
- عمي علكيفكم وياي تره محدق للنخاع
شجم وحده صاحبت بوسه ماينطن عاد انتو شابعين كل عمركم معشكه ومحاضن

خووو عمي ملك مللللك لك صرفت عليك صرف المهابيل عمي مبخت
انه صاحباتي بعيد الحب يعوفني حتى ماينطن هديه خيرتهم جابتلي ساعه ام خمسه الاف

- ههههههه ولك محد فكرني غيرك والله
عينك هاي ماتوكعلي

- غصبااا عليه احسدك جا هي مره لو ضربه حظ
هله هله لك هاي انه لو مرتي عدها سياره وهالكد فلوس وتدللني هيج وحلوه ومعدله
بوووويه الا كل يوم انكسر واتمدد بحضنهه
حتى لو محد يوكعني ويضربني انه اكسر اصابعي واجيهه اتبجبج

لك عمي من يمي مرتاح من اشوفك مدلل عاد انته شلون حالك ماتكلي

- خااااب اسكت ولك عييينك لا تطير مني المره وجوالاتها
اسكت هي هالمره كعد حظي خليني اتهنى
لاتضل عينك وراي وراي

ريري وكلتني وتكلي ..
-عوفه حبيبي الولد يغااار
اكل واشبع وضل تدلل على كلبي شعندي غيررك

- شوف ولك شوف هيج اختارلك مره لو تحجي عسل لو لتاخذ وتورط روحك

- بالجنه اذا مقسوملي عمي

عافنه وطلع وريري خربت ضحك عليه
وعلى غيرته ...

ضلت متمدده وغفت وانه هم اخذتلي غفوه
وكعدنا احمد جاي الدكتور ..
فحص وضربني ابر وطلع وريري هم اخذت جنطتهه وطلعت ..

من رجعت خلت الجنطه بالمجر وقفلته
وخلت مفتاح بجيبهه ..

ضلت كل اليوم مداريتني واحمد خايبه نضحك عليه .. وانه بس وجع وجهي
متعبني رجلي مااحس بيهه لا بوجع ولا باي شي ...

اجوي اخوتي وامي واختي ورجلهه و ولد عمي .. وصارت الغرفه خنكه وريري قايمه بواجبهم هي واحمد ..

لليل رجعو وضل بس عزيز هنا واحمد
طلعو هالمره ثنينهم باتو بره وضلت بس ريري يمي ..

كلتلهه ..
- تعبتي مو
- نعست فد مره

وكفت يم الشباك تدخن جكاره وره الثانيه
وبعدين غسلت واجتي اخذت علج وضلت كاعده يمي ..

انطتني تلفونهه وكلتلي..
- هاك تلهى بي

- ماريد راسي  يوجعني

- لعد نام يلا ارتاح

- اكلج.. هسه انه جاي انام هواي بس ممرتاح

- ههه تريد حضن

- هههه وعلي ارتاح من صدك هسه تحمليني بس هالايام

- يلا تعال تعال

فتحت ايدهه وحضنتني وتكلي ..
- باجر راح احجزلك لعمليه خشمك
حتى بين مايجي الدكتور وتسويها وتاخذلك يوم راحه وفحوصات تخلص الخمس ايام

- ريري تدرين خشمي يخوفني من ينذكر طاري عمليته
والله كبل احس بوجع

-هههههه سوده علييييه
اوصيه يداريك لتخاف هي وجع يومين ويخف

مو زين راح اسويلك خشم حلو بعد شتريد مني

كول مرتي مدللني

- لااا والله شبعتيني دلال
صدك مره ينشد بيها الظهر انتي والله ماتصدكين شكد مرتاح ومطمن لان انتي وياي

احس كلشي ميحتاج افكر ولا اهتم
انتي مكفيه وموفيه

- شعبالك لعد انته متزوج مره ربتها الدنيا
ومصايبها
صارت تلوي الخوف والمشاكل والمرض لوي

- انه كلبي من اول ماشفتج كالي هااي التحتاجهه واخذني ركض ركض لبيتج
خوش عرف يختار

- همزين عرفك عليه
شوف حويدر شكد تريدني اوكفلك واسندك تدلل بس كون تقدر
لا وكت تشبع تعض ايدي

- لااا وعلي انه مو هيج
وانتي وكفتج هاي مانساهه لاخر عمري
والله اهلي واخوتي ماكدرو يسون ربع من السويتي وحدج

- اهلك مو ميهتمون بيك بس ميعرفون يتصرفون بسرعه

اني اعرف معدن الناس وشلون استفاد منهم
عندي فلوس كلشي اجيبلك بلمح البصر

هسه الاسعاف همه لو ضاله عليهم ميفكرون بيهه يحسوها شكبرهاااا

بس اني رحت كلتلهم يابه السلام عليكم
عليكم سلام
كروه ميه الف تاخذون مريض لبغداد
كالو لاا وموافقه ومو بكيفنا كلتلهم
ميه وخمسين وانتظركم جوه

خليتهه بايدهم واجيتك وهمه وراي كبل اجوي اخذوك وهمه الممنوين

- والله عشتي هاي اكثر شي خلاني ارتاح
لو ماخذيني بسياره عاديه جان متت بالطريق من وجع رجلي ماتنثني تموتني

- اي مو ادري بيك مو مال واحد يحركك
بس همه اسيتعاب بطيء لو يمكن مخبوصين ومشدوهين البال

بس اني متعوده على هالسوالف كلتلك اني عقلي بكل شي يجدح جدح بس بالطبخ انثول

- ههههه مصدكج والله

- حيدااار تدري صار يومين منايمه
بس غفوه الظهر

- عرفتج والله
كومي نامي مدام احمد نزل

- اريد ارجع لغرفتنا اشتاقيت لجربايتي

راحت تمددت على القنفه وتكلي..
- بس تريد شي كعدني راح يضل بالي يمك بسرعه اكعد

نامت وانه هم غفيت بس كلساع اكعد اريد اندار ضجت من هالنومه .. وماكدر ..

ضليت للصبح الوب وهي كعدت واجتني
كلتلهه ..
- ظهري نمل اريد اندار انام صفح رهميهه الي
- شرهمهه ! ميصير تتحرك رجلك
- نعلى علييييييهم وين ماانكبرو وناااامو ريرررري تعبان هيج شوفلي حل ماضل هيج وعلي ماتحمممل مجاي اكدر انام

ضلت تفتر بالغرفه وتتافف تالي اجتي
كعدت كبالي وخلت ايديهه وره جتوفي وسحبتني الهه .. ضلت حاضنتني هيج
وتفرك بظهري ...

صدك ارتاحيت هيج من حركت جسمي
وضليت حاضنهه لحد ما ارتاحيت كلش
وخرت منها شويه وبوست راسهه ..

رجعت نومتني وضلت تعدل شعري وتكلي..
- بعد من تريد تتعب هيج كولي ونرجع نسويهه هاي الحل الوحيد تره

- شكرا رور

-اووكي العفو

كدرت انام مرتاح هيج .. وضليت بعد مسلم امري كله بايدهه ..

بس انام واكعد الكاهه كلشي محضره
العلاج والاكل وتبديل ملابسي ونومتي
وعلى فلس واحد ما حاجتني حتى شكد تصرف باليوم مادري بيهه واذا اسالهه تكلي ماصرفنا بس علاج وانه ادري هي ماتوكف صرف ..

يوم الرابع العصر سويت عمليه الخشم
وهالمره من اول ماطلعوني بديت اصحى مركز لان الوجع يصحي الميت

هرجت الدنيا بالصياح و ريري يمي تحاجيني بس ماكدر اتحمل وجعه واسكت ..

مادري شلون وشوكت نمت بس ماحسيت الا صبح وامي مكابلتني وكاعده ..

لكيت ولد عمي كلهم هنا ويه اخوتي وانه
من الكل ادور على ريري وهي ماكو

صحت احمد ودزيته يشوفهه وين ..
تالي رجع وياهه وشاورتني تكلي ..
- جنت احاجي دكتور دافتهم شلون اداريك بالبيت

- لتضلين تروحين منا ابقي ودزيهم همه مو كومه ولد واكفه شكو متعبه نفسج

-متعوده مو بيدي

ضلت واكفه يم امي .. والاكل كله صار سوائل .. اذا احجي انسطر .. ارفع راسي شويه ادوخ واحس بثكل عبالك وجهي راح يوكع كدامي ..

تعذبت عذاب هاليوم .. وهم خلوني  يومين
بعد هنا ..

واخر يوم جبرو رجلي من الطول للطول
و ريري كعدت يمي وتخابر جان تكلي ..

- هذوله هم قفاصه قنادر بحلوككم كون

- شبييج منو هذوله

- اهل الاسعاف يردون ٤٠٠ الف كروه

- عوفيهم بويه نروح بسيارتنا

- شيحركك ابويه
هسه بس خلي ينزلوك من السديه ويشتغل عياطك ماعرف بيك يعني

- ريرري كافي لتدفعين شي
صيحي لعادل عنده فلوس خلي يدفع

- مانحتاج مانيه احد بديتهه بفلوسي وانهيهه بفلوسي
اني ماغلي الاربعميه عليك بس همه ميستاهلون ماحب اليستغلني
هسه ادبر غيرهم شنو خلصت السيارات!

ضليت اتلمس بايدهه وهي تخابر
وره ساعه كلتلي ..
- دبرتهه وتدلل حدورتي

- ههه تسلمين رور تسلمين
بشكد ؟

- ٢٧٠

طلعو الولد الغراض وضلينه بس انه وياهه بالغرفه .. لحد مااجوي الولد واخذوني للاسعاف ..

وصلت لبيتي مرتاح و لكيت هناك محضرين
سرير مال مستشفى ابيض وفراشه الازرك
ومخليه بالهول ...

نوموني الولد عليه .. واجه ابويه ضل حاضني ويبوس بيه ويدعيلي بالشفاء
وعمامي كلها هنا وخوالي ..

وامي اجتي وايدهه مدمايه وخلتهه على كصتي .. صحت ريري ومسحت الدم
وكلتلهه..

- هذا انتي جبتيه ؟

- اي ليش معجبك ؟

- لااا ياعيني بس هواي هيج والله

- دكتور كال راح تبقى على هالنومه اقل شي
٣ شهور وشلون تبقى ممرتاح بالكاع ؟

هو صرفنا صرفنا ضلت على هاي بسيطه

- منو وصله هنا !

- اني وصيت حبزبز يشتريه ودزيته للبيت
واستلموه اهلك عادي كلشي مضبطه ليضل بالك

راحت وعافتني بين كل اهلي بس انه بالي يمهه .. افكر شسوي واشكرهه .. !؟

تفرش هي وامي وينامن بالكاع يمي
وكل شويه وحده كاعده تسال خاف اريد شي

ثاني يوم الظهر ريري اخذت صينيه الغدا وراحت غسلتهه واجتي كعدت يمي وتضحك ضحكتهه ام السنون ..

كلتلهه..
- بيج شي ؟

- احسب للعشرين ويجيك خبر يبرد كلبك

- شكو شسويتي !

- واحد .. اثنين ..

- احجي ريري شمسويه احجي

- خمسه .. سته .. سبعه .. ثمانيه .. تسسسسعه
كول عشره

- شكووو

- عشره .. احدددعش .. اثنعششش
ههههه اسممممع الصيحه وتلذذ

- ريري منو بس فهميني

- داحسب اوكف .......

عشرررريييييين ... انتقمنا

-هاا ؟؟

ضلت اطك باصابعهه وتضحك وطب ابن عزيز يصيح ..
- عمممي خابر على ابويه امي تخربطت
وعمه هم

فكيت عيني عليها وهي تكول ..
-اوووي خطيييه شبيهن لاا لاا معقول يتخربطن !

- ولج شسويتي ريري عزا بعينج شسويتي

- شسويت يعني انتقمت منهن

شنو بس احنه نتلوع ! وانته مو انشك كلبك وانته تعيط من الوجع عبالك انساهه !

الا اطلع كل عيطه منك من نص عيونهن
بعد كل اسبوع اوكعهن هالوكعه وخلي يحيرون بيهن بالدكاتره وابن ابوه الي يلكالهن دوه

.
.
.
يتبع