رواية ماء مغلي الفصل الرابع والعشرون 24 - بقلم Zoka 🌷

..♣️🩸 ماء مغلي 🩸♣️..
* adzzon *

فتحت الكلكسي بس ماكلبت بشي مالي خلك
بعده بايدي واجتي رساله من وحده اسمها
' مولاتي فاطمه '

- منو هاي رور ! ام البصره؟

- لا
هاي صديقتي مثل اختي
شبيهه شدزت

- تكول مشتاقتلج ومحتاجتج وياي وين مختفيه

- هااا
دزلها .. وكت الصدك اجيج هسه مشغوله بحياتي الخاصه

- حتى هاي ماتعرف حياتج الخاصه !

- كل غريب ذيب وكل قريب عقرب
بس نفسك امينه سرك

احفظهن هذني ماضل كلساع اعيد

- چا انه امنت بيج يالغريبه هم تصيرين عليه ذيبه ؟

- اذا ندكيت بيه اندك بيك وجه لوجه بس ماغدرك

اليغدر بس الضعيف اني عندي شجاعه احط الطلقه بنص كصتك  ومايرفلي جفن

- صراحه كلبي متطمن منج

-اي زين

ذبيت التلفون على جهه ونزلت مخدتي تمددت وهي طفت الضوا واجتي تكلي ..
- حنزل جوه اذا تريد شي دزلي رساله
افتح فيسك وراسلني اووكي

- لاااا لترحين
بعدني مارتاحيت كلش

جريت ايدهه وخليتهه تكعد .. كلتلهه..

-عوفي كل شي خليج بس وياي اليوم
لا طبخ لا اهل لا شي بس ضلي خلي اريح بالي

- وملوكه عيدميلادها وتنتظرنا خطيه

- ريري تعبان والله بحال عيد ميلاد !!

جريتهه نومتهه وضليت حاضنهه ومخلي راسي بركبتهه ...

ضلت ساكته وانه هيج مرتاح نمت
جان تكعدني وهي تبوس بوجهي
وتكلي...

- صلاتك هم تعبان متريدهه كوم صار المغرب

كرصت خدهه وكلتلها..
- صايره حنينه وتكعدين برومانسيه
وين جنتي تجفليني كل مااخذلي غفوه

- ههههههه كلت خطيه حويدر تعبان خلي ادللـه

تريد ارجع مثل قبل عادي هسه انكلب جبار مو صعبه تره

-لااااا برووح ابوج ضلي هيج وعلي فد مرتاااح

- ديلااا لعد مادامك ارتاحيت امشي نروح ل امليكه المكروده ولك خطيه مو تنتظرني
شبيك فد مره شلت الحساس هسه هيج كالوهه

- مو صار الليل بعد خليهه باجر

- شنووه باجر هو غير اليوم يومها
شلون باجر شبيك انته بابه شبيك

باوع اذا متكوم اخذ امك وابوك واروح
تريد تجي متجي بعد يطبك مرض

- هاااااااااا شجااااج
شبيييج هم رجعتي للخبال !

- اييي انته تحجي الاخرس
تكوم لو لا

- كمت كمت من نعلى على هاليوم الاكشر

- شبيييك شكو تحجي هيج
مو يوم ميلادها خطيه

- وانتي شكو هامتج هي اكثر مني
يعني انه التعبان ومتدمره نفسيتي وانتي حايرتلي بالحفلات والجهال
طايره هي وميلادها طايره !

اخذت ملابس من الكنتور وهي اجتي
عضتني من ظهري ...

- شبييييج يااالله شبييج ويااي
شكو تخبلتي عليه بهالليل عايز انه خبال !

- ولك حويدر
تره كلشي داسوي علمودك

اعوفك هنا تضل تقهر بروحك وتنسل من الهموم

امشي هناك نغير جو وتشوف امك وابوك شلون مرتاحين ويه بنت اختك مو هيج تريدهم يرجعون حبايب شكو بعد ضايج !

- اييي اريدهم بس مالي خلك احد

- ميخالف بس ساعتين تحملهه لخاطر اهلك
خطيه امك تلوب هم عليك سمعتك تصيح
وضل بالهه

وهم على الروحه هناك كلبهه يرفرف على هالبنيه ديلا لتكسر بخاطرهه خطيه

- من هسه اكلج ماكو ضله هناك
مو تكعدين تتمسكنيلي هناك زيين !!

- اييي اييي
يلاا راح انزل اكول لامك تحضر نفسهه

سبحت وصليت ولكيتهم متحضرين ..
اباوع امي لابسه الاسود الملمع ومتعطره بالمسك

وابويه لابس الدشداشه البيضه والغتره الخضره ومحلق وجهه

وريري حايره بالجنط والعلاليك وتلفونها بايدهه تراسل ..

اخذت ابويه كعدته بالصدر طبكت السكملي وخليته بالصندوك وخليت الغراض واجتي ريري انطتني تلفونها الايفون ..

- هاك الولد يريد عنوان مضبوط
دليه واطلع تلكاه

- موصيه شنو ومنين طالبه ؟

- كيك شنو نحتفل بالتمن

خابر معليك هسه دخابر
والفلوس بالحافظه تلكاهن

صعدت هي وامي وانه ضليت اخابر الولد ودليته البيت .. نزلت ابويه والسيد واكف ساعدني واخذه جوه وانه نزلت الغراض
وضلينه كاعدين انه وامي وابويه ويه السيد وامه .. وريري جوه يم ملوكه ..

من خابر الولد طلعت اخذت الكيكه منه
وجان وياها ظرف فلوس وايباد بكارتونته ..

اخذتهن وصحتهه من باب المطبخ ..
اجتني وتضحك ..
- ها اخيرااا
- منين هالولد ؟
- دزه حبزبز ،الايباد موجود ؟
-ايي
- زين يلا خلي اروح اكمل وانته بقي الفلوس بجيبك

اخذت الكيكه خلتهه بالثلاجه وراحت وانه رجعت يمهم ..

راحت مرت عمي جوه وضلت امي عينها على الباب ..

صاحونه نروحلهم .. واخذت ابويه جوه وامي ايدهه بايد ريري ...

طبينا للهول جوه مرتبيه نشرات ونفاخ
والميز بالنص بيه الكيكه طابقين ابيض ووردي والشموع طوال بالشمعدان صايرات

و ملوكه لابسه فستانها السمائي المذهب
وشعرها مفتوح ومسرح ولابسه تاج ذهبي
واكفه وكامشهه اخوهه من جوه جتافها

ابويه والسيد كبل صلو على محمد وال محمد من شافوها هيج متغيره ..

وامي تبجي .. رحت يم ريري وهي كلتلي ..

- كول لامك خلي تنزع عبايتهه هاي خوافه بالكوه قنعتهه

شاورت امي وقنعتهه نزعت عباتهه وانطتهه لمرت عمي ..

ريري اخذت امي لملوكه .. وضلت مدنكه يم ملوكه وتشاورها وتعدل بشعرها ..

امي دنكت وبوست راسهه وملوكه بس تباوعلها وتباوع لريري ..

خلتهه ريري تبوسها بخدهه وامي حضنتهه وتبجي وتبوس بيهه وتكللهه ..

- يااايمه والله احبج بنيتي انتي كل صبح ومسيه ادعيلج

ريري جرت امي ومسحت دموعها وانه اخذتها وكفتها وملوكه بس تباوعلها

مشاها اخوها وريري حتى توكف يم الميز
و ضليت انه موكفها بدل اخوها .. وهو ضل يمهه يغني ويه ريري ويصفك و هو وياها
كصو الكيكه وكلهه تصفك لملوكه ..

كعدتها واجتي امي كعدت يمهه ولبستهه تراجي الذهب وتبوس بيها .. وملوكه
بس كلتلها .. شكرا ..

امي تحضن بيهه كل شويه وتعدل ملابسها وشعرها ..

حسيت على كرصه بايدي باوعت هاي ريري تأشرلي روح وتكرص ..

اخذت بيت الالعاب وانطيته الهه وهي حضنتني وتبوس بيه ..

واجتي ريري اخذت مني التلفون وصارت تصورنا وضلينه ناخذ صور وبعدين كعدنا ناكل الكيك واجتي ريري شايله كارتونه الايباد و بوست ملوكه وخلته بايدها وكالت ..

- ملوكتي تدلل وكل غالي الها رخيص
بعد هذا ايبادج اشبعي كارتون بي

ضلت ملوكه تضحك بسنونها المكسره
وتبوس بريري .. باوعت للسيد كلب خلقته

اباوع لريري كاعده تفتح الايباد وتعلمهه هي واخوهه عليه ..

كعدت يم السيد وكلتله ..
- ديربالك تاخذه منها تره ملوكه جاي تتغير وتتحسن نفسيتهه لا تكلبها علينه

- انته غشيم بيه حيدر ! ليش جبتلهه هالجهاز
ماعرف اشتريله انه منتظرهه منكم !

- هديه خويه هديه هسه شصار

- تفهم كلش زين شصار مو انه الاعلمك
بناتنا وحدودهن

- خويه هاذي صغيره ومريضه شتريد تسوي يعني !! لا تكبرهه .. خليهه هي تلعب بي تشوف كارتون تتلهى شويه فكها ياخويه

البنت هم بنتنا خوما رايد اذيتهه انه !!

ضل ساكت بس مدلغم ..

كامت ريري اخذت ملوكه شالتهه وراحت يم ابويه ..
اخذها كعدها بحضنه .. وضل يبوسها ويحاجيها وهي تضحك وتحاجيه وبعدين خله راسها على صدره وضل يمسح على وجهه ومغمض ورافع ايده يدعيلها ...

بعدين طلع فلوس وخلاهن بايدهه وانطه لاخوهه هم .. وهي حضنت ريري
وشالتها ريري رجعت كعدتها يم امي

وضلت ترتب شعرها وتحاجيها هي وامي
وهي متجاوبه وياهن .. تضحك وتسولف

صارت بالعشره ونص عاد كلتلهم يلا نرجع
وضليت انتظر ريري بره لحد مالمت غراضها واجتي ورجعنا لبيتنه ..

امي وابويه من صعدنا السياره لحد ماوصلنه البيت همه بس يتشكرون من ريري لان مداريتها ومفرحتها وهي يتيمه ام ومريضه
وريري بس تكول عادي ماسويت شي

ضلينه يم اهلي لما اخذو دواهم ورتبنا نومتهم
يلا صعدنا ..

عفتهه تنزع حجابهه وجواريبهه وبدلت وتعطرت ورحت حضنتها من وره ودرتها عليه ..

بوست خدها اليمنه .. كلتلها ..
- هاي لفرحه ابويه

وبوست خدها الثاني وكلتها ..
- هاي لفرحه امي

وبوستها من بين عيونها وكلتها ...
- هاي لفرحه المرحومه امل
اكيد فرحت هسه لبنتها من تشوف هالمداره والاهتمام الها

- ديلا اوووكي

دنكت عليهه وحضنتهه حيل وكلتلها..
- وانه فرحتي بفرحتهم
والله كفيتي ووفيتي سويتي الي ماكدرنا احنه اهلهه نسويه الها بيوم

- هسه مو كلنا اووكي

-ههههه لج رور لج انتي كارثه

- ادري

- شبيج ضايجه ؟

-لاااا بس لتضلون تلحون بالشكر وهالسوالف مره وحده وكافي تخلوني ماعرف شحجي
اني بهيج سوالف اضوج من الملحه

- غير نعبرلج عن فرحتنا بانجازج

- اييي كولو عفيه عليج وكافي
ماريد بعد تمدحون بيه

راحت تدخن يم الشباك وانه طلعت الفلوس شمرته ع الفراش وكلتلهه..
- هذني مال شنو الفلوس؟

-  تكدر تكول دخل مال هذا الشهر
حبزبز حوله ورق وكلتله دزهن الي استفاد منهن هنا احسن من البطاقه

- هااا والله عمي الرزق بس الكم عبالك

- شغل عقلك يجيك رزقك محد يجيه ع الحاضر كلشي بتعب

فتحت الحاسبه وضلت اقدم بالتسجيل
وتالي شفت ام فاطمه تحاول تفتح باب غرفتنا
واحنه قافليه .. ضلت تروح وتجي للغرفه

وكمشهه سيف .. جرهه من حجابهه وهي تضرب بي وهو اخذه سحل ع الدرج

من صدمتي حتى ماصحت ريري تشوف
ضليت فاك عيني ع الشاشه ...

ياهو الزين منهم ياهو الشين !!!

ام سيف وين ؟؟ ليش مالكاهه بشي ؟؟

ام فاطمه شتريد من غرفتنا ؟

سيف شلون مسيطر عليهه هيج ؟؟

كلهه تجمعت براسي هالاسئله وما حسيت الا على ريري تجر الحاسبه مني وترجع التسجيل وتشوف الي شفته ..

جان تضحك ...
- لك هذوله عصابه لتحتار بيهم
هذوله واحد لازم خيسه الثاني

- منو راس البله بيهم !

- بعد قيد البحث
بس خوش لقطه هاي حييييل انسحلت
اوووف اووف تمنيتهه بيدي لاسحلهه الدرجين

- لازم ناخذ حذرنا بعد اكثر
هاي ناويه نيه النه مبينه تريد شي من غراضج

- زيييين شتكول انطيهه انييي غراضي
واوفر عليهه تعب

- خبله انتي شبيج !!

- انطيهه شي مو الي ودانشوف وين تشتغل سحري

شتكول نجرب ؟؟

- منين تجيبين !

- انته تشتريلي شي جديد واني انطيهه

- خاف ياثر عليج يمعوده مادري اذا ينحسب الج لا لتورطيني

- بابه شبيك هسه حتى لو يسولي سحر
اسمي كله غلط بغلط مايوصلني

- مو اكيد شدراج شنو عدهن من انواع سحوره

- هسه دخلي نجازف هي موته الوحده
شيصير خلي يصير

- ماجازف بيج انه رايدج تعينيني عليهن مو توكعين براسي هم

- معليك معليك ميصيرلي شي صدكني احساسي فول راحه خلي اضحك عليهن
شويه

- هي صح خطره بس على كولتج نشوف وين يشتغلنه

-اييي مو لازم نتاكد هناا شغلهن لو بره يسلمنه لوحده ؟؟؟
دنعرف شنتصرف

- ايي والله لازم نعرف هالشي
شوفي حتى لو لا سامح الله وصار عليج شي
انه اعالجج بساعتهه لتخافين

- متعالج نفسك لعد شكو ضام شطارتك الي

- جربتهه والله بس ماتجي كامله

-هي شنو ؟؟

- سالفه طويله مالي خلكهه هسه بس اتذكرهه تلعب نفسي

عوفيهه بعدين شوكت مارتاح احجيلج

-ديلاا اوكيي

- تعاي خلي انام ولتضلين تخابرين ولا تحوصين

- متنام وحدك شنو حلالك الحضن !

- اييي حلالي تعاي مابيه حيل حجي

جريتهه ونومتهه وضليت ارفع شعرهه من جهه ركبتهه وهي قفلت تلفوناتها وكلتلي .

- حيدااار لو باجر ارتاحت نفسيتك وصرت زين هم بعد ادور حضني لو ترجع مثل قبل ؟

- انتي مرتاحه وياي هيج ؟

- انته احجي اني سألت بالاول

- خلي اشوفج اذا مرتاحه وياي ابقى واذا لا لا

- يعني بس وكت تتعب ادور حضني مو !

- اي من اتعب صدك اريد حضنج
جاي احب هالشي الي يخصني وحدي
مكان امان ودلال شوكت مايضيك خلكي الكاه موجود لراحتي

انتي حبابه وياي حيل اشوفج عكس حجيج
وطبعج اول ماعرفتج

احسج صدك تخافين عليه

- ايي ديلاا ابو الاحاسيس نام نام

- شبيج رور

- شبيه نعسانه شبيه يعني

- لاا نكلب مزاجج

خليت ايدي على وجهه بس تلمسته شويه هي وخرت ايدي وكلتلي ..
- تنام لو لا !!

- شبيييج

- طكن فيوزاتي

كرصت خدهه وهي تتافف .. رجعت حضنتهه ونمت ..

ثاني يوم ريري غير شكل ..
لا صبح وياي ولا تحاجيني الا كد كلمتين
على الغدا تاكل وممهتمه الي جانت عينهه ويه كل لكمه اكلهه هي تباوعلي هسه ولا كأن يمهه

طلعت للمحل ولليل وهي لا تخابر ولا تراسل
رجعت عاتبتهه تكلي ماعندي شي احجيه شكو اصرف رصيد !

اجيت اريد انام وانتظرهه تجي يمي
وهي طلعت قوطيتين وجبس وكعدت بالكاع وفتحت تلفونها وخلت سماعات ..

ضليت اتكلب وارجع اباوعلهه تالي رحت يمهه  جريت سماعاتها..

- شبيج وياي احجيلي يلا

- شكو شبيك فاز من نومك عليه !

- مانمت اصلا
احجيلي شنو بالج ! ليش هبج تغيرتي وياي !

- هو شنو تغيرت وياك شسويت ! مو كل يوميه اني هيج اكعد واسهر جديدة عليك!

- تغشمين روحج انتي !
البارحه جنتي وين واليوم وين !!
ليش تسوين هيج مو تدريني بعدني اريدج يمي شكو تتشردين مني ؟؟

-  انته صرت زين
التعب يوم مو كل يوميه

ماضل حاضنتك اني كل العمر وادلل بيك

مو حبيبتك اني اوووكيي لتخربط وتعيش بالاحلام تذكر اني منو وشنو كعدتي وياك

من بعد حجايتهه هاي صدك صحيت
وشفت انه وييين راايح وهي وييين !!

فركت راسي وكلتلهه..
- صح صح انتي مو حبيبتي

هو حتى اهتمامج تمثيل لمصلحه

بس انه الظاهر رحت زايد .. نفسيتي تعبت ولكيتج راحه بس يلا مشكوره وماتعبج بعد

- ديلا اووكييي

رجعت تمددت وضلت غصه بلعومي حجايتها
وهي شويه وطفت الضوا واجتي نامت ومنطيتني ظهرها ..

ثاني يوم اخذتلها من السوك دشداشه كصيره
ومن رجعت بالليل انطيتهه الهه وهي نفس برودها وياي بس شكرا واوكيي هاي الاحصلهه منه ...

بالمحل الظهر ودزتلي رساله
' انطيتهه لحنفيش وكيفت عليهه شد حيلك وجيب الكاميرات عاد بطيت كلبي '

دزيتلهه ..' باجر العصر اشتريهن '

بعد ماردت .. رجعت بالليل متاخر ولكيتهه حتى عشه ممحضرتلي.. ماكله هي واهلي ولا حتى انتظرتني ولا خابرت سألت ليش تاخرت !

ماعاتبتهه ورحت كبل صعدت سبحت ونمت
ثاني يوم العصر طلعت اشتريت زوجين كاميرا وضميتهن بالسياره وكلت بس ادبرلي مجال بالبيت اشدهن ...

ريري جرت الاسبوع كله هيج وياي
حتى حجي الشقى بيناتنه راح ..

حجيهه وياي بس تريد اكل لو فلانه سوت هيج وجيب جكاير بس هذني تحجيهن كل يوم

الصبح كعدت وريري ماكو نزلت للحمام والباب مقفوله دكيتهه وطلعت ريري هنا
شويه وطلعت وجهه اصفر وتكمش بالحايط وتمشي .. راحت صعدت وانه غسلت ورحت وراهه ..

شفتهه رجعت نامت .. صليت ورحت وكفت يم راسهه .. بعدني اريد احاجيهه وهي
كبل حفزت من الفراش وراحت اخذت سله الزباله وضلت تتقيء..

غسلتلهه وجهه وكمشت ايدهه ترجف
كلتلهه..
- شبيج  شجاج مستبرده؟
-لا
- جا شبيج احجيلي شيوجعج
- مايوجعني شي بس اريد انام

رجعت للفراش وضلت متلفلفه وانه كاعد يمهه .. شويه ونزلت شفت اهلي وخليتلهم الريوك وسألو على ريري كلتلهم مريضه بطنها توجعها ونايمه ..

امي دزتلها دوا اخذته الهه وهم لكيتهه تتقيء
بس اكعد يمهه واكمش ايده او وجهه كبل توخر وتغسل وترجع تنام ..

انطيتهه الحبايه ماخذتهه عافتهه ع الميز
ضليت يمهه احاجيهه مترد عليه

جان يدك تلفونهه اخذته باوعت هذا اشعار مذكره .. مكتوب ' ٢٨..٢٨..٢٨'

كلتلهه..
- شنو هاي ثمانية وعشرين ؟

- هيج شخابيط

- لتجذبين شنو هاي ! شكو مسويته تذكير

- شعليك تلفوني وبكيفي
متنزل شعندك يمي تره ممحتاجتك

- ادري بس انه بالي يمج

- مااموت لتخاف

- بس كليلي شبيج خاف هذني اشتغلنج يمعوده لتهبطيني فهميني شسالفتج

- لاااااااا ماعليهن هنه
مريضه اني وحدي مو سحوره

- شبيج مريضه ؟

- حيدااار مطايقتك لاتضل تلح

- اعوفج يعني وحدج ترتاحين؟

- اي كلش ارتاح بس عوفني

- زين يلا ضلي ارتاحي

عفتهه ونزلت ضليت بالهول كاعد وام سيف تسأل عليهه تريدها تنظف وكلتلهه مريضه متنزل عوفوهه ..

ورادت هي تصعد تشوفهه كبل رحت كدامهه
صعدت للغرفه وكلتلهه..
- راح تجي ام سيف هنا تشوفج
- اي شسويلهه خلي تجي
- راح اضل كاعد يمج هاي تخوف متتامن
- شتسوي سوي مالي خلكم

ضليت فاتح الحاسبه وكاعد واندكت الباب وطبت ام سيف ضلت تحاجي ريري وانه عيني على ايدهه .. تتلمس بالكنتور وتحرك اصابعهه بالطول .. كبل كلتلهه..

- تعاي كعدي شكو واكفه اكعدي هنا

وكفت يمهه واشرتلهه تكعد .. وضلت عيني عليهه لحد مانزلت ..

كبل اخذت وصله نكعتها ومسحت مكان ايدهه ع الكنتور .. ريري تباوعلي ومتحجي شي

ضليت يمهه وهي نايمه وطلعت للمحل وهي نفس نومتهه ..
خابرتهه العصر جاوبتني وبس تثاوب ..
- هم رجعتي نمتي

-لاا هسه كعدت من نوم

-بعدج !! كلشي مماكله لهسه !

- اييي ماشتهي راح انزل يم اهلك هسه
تريد شي ؟

-لا بس جاي اشوفج شلون صرتي

-زينه يلا چااااو

سدته وانه ضليت اعصاب اليوم كله
بتفسي اريد اعاركهه واعاتبهه ليش تغيرت وياي ؟؟؟

واكول هي شيهمهه ! انه شغل وفلوس عدها الحجايه منها الي تحسبهه فلوس تجمعهن لبعدين شكو اذل روحي وياهه

عفتهه بس باعصابي كاعد وياهه
هالايام .. وهي بس نايمه الصبحيه كلها والعصريه والليل من الاحدعش تنام
يعني انه اشوفهه ويمهه بس هي بعالم نومها وانه بعالم اعصابي ..

صعدت للسطح الظهريه وشديت زوج كاميرا
وضل عندي زوج اريد اشدهن كدام غرفهم
وبعدين اشتري للجوه ..

اول يوم راقبت بي السطح كلشي مابيه
ثاني يوم نفس شي ثالث يوم لكيتهن مشفرات
رحت صعدت عليهن لكيتهن ملطخات بجير اسود ومطعجات !!!

ضليت كامشهن واباوع للمكان منين عرفوهن
شلون وصلولهن !!!

انه كل شغلي بترتيب ماينلكف شلون شافوهن!!!

شافتهن ريري وتخبلت .. كلتلي ارجع شد الزوج الثاني هسه بس انه كلتلهه..

- عرفونا نراقبهم خلي نرجع كلشي لمكانه ونخليهم يأمنون ونلكى غير مكان

رجعتهن بمكانهن ومتعجب شوصل الجير هنا عليهن !! وانه ماشفت احد صعد ولا وصل السطح !! منو اللكفهن هيج وعطلهن !

منو الي شاك بيه ومراقبني هيج !!

ضليت اليوم كله افكر بيهن وثاني يوم وره الغدا ريري رادت تروح لملوكه وكلتلها اوصلج واطلع للمحل ..

صعدنا هي تأخرت بالغرفه ضلت تخابر وتاخرت يلا لبست وانه كلت خلي انزل اشغل السياره بين متكمل ..

نزلت وصلت الدرج الاول جان يدك تلفونها الي بجيبي شايله .. طلعته جاي اشوف  منو
وشفته حبزبز ..

على وكفتي رفضته وبس نزلت رجلي على البايه  الجواهه جان تنسحب رجلي اليمنى
من وره دخلت كلهه بين البايتين وانه من شوغت روحي كبل صحت بعالي صوتي

- ريررررررري

ضلت رجلي مدندله بين البايتين وجسمي على البايات الجوه سانده بايدي بس الوجع يصل بعظامي من اصبع رجلي لحد عظم جتفي صله الوحده ينفض نفض بالوجع

وريري محتاره شلون تساعدني وضلت تصيح لسيف واجه وياهه سندني وهي طلعت رجلي وانه اعيط منين ماتكمشهه ..

امي تصيح خابرو عادل خابرو عزيز
وريري ضلت تعدل رجلي وتمدها بهداوه

سيف يصيح على امه حتى تخابر ابوه
والكل نخبص وانه بعظمي نار تلهب لحد جتوفي ...

اريد اكوم ماكدر رجلي من فوك من نص ظهري لاصابعي كلهه تصل صليل عليه
ضليت على كعدتي لحد ماجاني عادل
و تكابل هو وسيف وشالوني للسياره

وهناك ثنو رجلي واعيط عيطه من نص كلبي
طلعت

وصلنه المستشفى ويردون يجرون رجلي وهي تيبست على هالحطه .. كم زلمه تعاونو وكل واحد شالني من جهه لحد ماخلوني بالسديه ..

وراسي هنا افتر فر .. بعد عيوني غوشت
واذاني صفرت .. ما غميت بس ماركز وياهم بعد اسمعهم بس مادري شيحجون ..

حسيت على واحد يضرب بوجهي وركزت اباوع وشفته دكتور ويسالني وين الوجع

اشرتله على طول رجلي وظهري
وضلو ياخذولي اشعه وانه اعيط بس يحركوني ..

مادري شلون غفيت بس تالي حسيت على ايد دافيه تفرك بجتفي .. فتحت شويه وشفت مره لابسه سواد .. دنيت وجهي على ايدهه وعرفتهه ريري ..

صحت عليهه ..
-شجااابج هناا

دنكت يمي وتكلي ..
- شكو غير داشوف شبيك

- وين جايه بنص المستشفى شجابج انتي شطلعج وحدج

- جابني احمد بعد شكو

- امشي رجعي لتضلين هنا وتحركين اعصابي ماتشوفين الردهه كله زلم

- ويطبهم مرررض فوك مرضهم هذا
شعليه بيهم ااانيي جايه عليك

هسه اني شايفه شي كدامي غيرك اسكت خلي اركز لتضل تتعارك مو وكتهه

- ريرري مابيه حيلج وعلي لتعاندين
امشي رجعي اخوتي هنا كافين

- شدبرو اخوتك همزين اجيت جان هسه سكطوك

حبيبييي خاف متدري تره كسر عندك بالركبه
والرسخ و عظم الفخذ فاصل من مكانه
وهذوله يردون هنا يسوولك عمليه بهالمستشفى المصخم همزين تلاحكتلك

- ربييي عااايز قهر انه عااايز
استغفررر الله ربي واتوب اليه

- ديلا لتخاف دادورلك على جراح مضبوط بغداد بس انطيني صبر
شوكعك متكولي شوكعك حظي

- ريرري شايفتني جاهل واوكع من درج ماعرف محط رجلي وين !!!
انسحبت رجلي من وره والله انسحبت

-عزاااا يمممه عزاا شسحبهه ولك !!

- انه ادري !! ماتشوفين وكعتي صارت على وجهي مو على ظهري ماتفهمين انتي !!

رجلي نسحبت كلهه من وره ضلت حاشره بين البايتين .. يا مطي يوكع نفسه هيج وهو ينزل فهميننني !!!

- لااا حشاك
لعد هاي شلون ولك !! عزاا شجان وراك !

- قنادر لاحكتني من الله يبيلهم بامراض مانخلق علاجهه بجاه ابو الحسنين ما يلكون يوم راحه بدنياهم

ضلت تفرك بجتفي وتخابر وانه اون من رجلي .. اخوتي يمي اثنينهم واحمد
وامي كلساع تخابر على احمد تساله

واجه الدكتور جبس رجلي من الطول للطول

وانه بس يطخهه اعيط واضرب براسي من الوجع يدك بكل جسمي ..

من كمل انه انتهيت تعبت فد نوب
وريري اجتي تكول لاخوتي ..

- حجزتله بغداد والدكتور من الصبح  يجي للمستشفى يدخله عمليات
خلي نطلع من هسه وهناك يداروه احسن
بمستشفى اهلي

ضلو يتجادلون اخوتي وياهه ويكللوهه تعبان مو مال طريق وهي عاندت وياهم بالحجي
واخر شي كالت ..

- يضل هنا يسكط ومحد بحاله
متاخذوه اني اخذه كلشي رتبتله هناك شكو العجز والعناد هذا بعد داكللكم عمليته من الصبح يحتاجلهه نقاش هاااي

اليجي يجي والماله خلك خلي يضل
تره محتاجين حيلكم مو مالكم

بيكم خير بس وصلوه لبغداد وعوفوه الي ورجعو اذا مالكم خلك مستشفيات

جريت ايدهه وهي سكتت .. عاد عزيز
كبل كال ..
- لا نعوفه هسه ولا بعدين اخينه بركبتنا لا تزامطين حجي احنه اهل المزامط والفعل
ما نعز عليه روحنا بس ردناه يرتاح اليوم

- ميرتاح دتشوف وجعه بي راحه !

- يلا بويه طالعين خلي ننطي خبر للاهل ونتوكل

عافت ايدي واخذت احمد وراحت وضل عزيز يخابر ابويه يفهمه على الحال
وشويه واجوي اثنين ممرضين واحمد وريري

دنكت شاورتني ..
- دبرتلك الاسعاف بس ماكدر اصعد وياك
لتخاف هناك اريحلك زين
اني وراك اجي بسيارتي حخلي عزيز يسوق
ليضل بالك زين حاجيني وين صوتك خلي اسمعك

- زين

طلعوني للاسعاف واخوتي مخبوصين يركضون كدامي ..

بهالطريق والوجع والقهر كله حمدت ربي وكعني بايد مره قويه مثل ريري

شوكت ما اوكع بشده الكاها تعرف شتسوي وتساعدني ..

طريق كله اغفى واكعد وراسي انسطر من الصوت وادعي ربي بس يسهلها ماريد تتسكط رجلي واخسرها ..

فتحت عيني وشفتهم يريدون ينزلوني
وضليت ادور بعيني على اخوتي
شفت احمد اول من ركض واجه يمي

وريري كدامنه طبت المستشفى..
دخت من الفره راسي يروح منا ويجي منا
ومادري شلون وصلت للغرفه واستقريت

اجوي اخوتي يمي يحاجوني وانطوني مي
اريد اكعد شويه اميل ظهري ماكدر
شربوني قطره قطره ..

عزيز طلع وره ريري وعادل يكلي ..
- مرتك عرمه يابويه كضت الطريق تتعارك حتى ويه روحها

ضحكت وكلتله ..
-وينها هسه
- ينفهم منها شي ! مادري وين تروح
ماخذه الدنيا مغالب

غمضت وانه مرتاح ادري بيهه جاي ترتب لراحتي هنا واثق بيهه تسوي الزين ..

تالي سمعت صوتهه وصوت دكاتره
يمي .. ضلو يضربون بايدي ابر ويشوفون الاشعه .. وواحد منهم كال ..

- بس اثنين يبقون هنا رجاءاً

جان تكله ..
- ديلااا اوووكيي رووح مشكوور تعبناك

طلع الرجال وهاي سدت الباب وراه وكالت ..

- العاجبه ينام هنا ينزل يدفع عشره الاف
والماعاجبه اكو حديقه انتظرو بيهه للصبح

ضلو كلهم صافنين عليها وهي كعدت يمي وتشرب مي .. وصاحت ..
- احمممد مطعم بعد شارعين منا روح جيبلنه عشه

- زين شجيب ؟ شتاكل عمي ؟

-عمك مياكل بعد صبح عمليته
جيب لعمامك شوف شيعجبهم

شالت خمسه وعشرين خلتهه بايده وهو يكللهم ويكلوله كيفك ..

طلعو اخوتي وهي دنكت بوست راسي
وتكلي ..
-ولك حويدر تصير قوي لا اشعل شيب الخلفك هبطتني اليوم حتى دمي نشف

ومن وراك صارو يسموني العرمه
عبالك مادري بعادل شيحجي عليه !!

- وانتي شدعواج تذبين حركتج  بيهم
مو كايلج ثكل كدام اخوتي اثكلي

-ياااثكل يابطيخ شبيك بابه
غير اخوتك يبطون الكلب
مو هيج حااارين ودمهم فاير فاهين مثلك
سمطو ابو ابويه احجيي وميفيد راس حجار
عبالهم داتبطر لو دالعب هنا

- هيييي لسااانج

-ديلااا يلاا هسه شحجيت
اكولك جوعان مو ادري بيك

- لعبانه نفسي فد مره

- اوووف شسويلك هسه والله حرت
كلتله لهالمصخم الدكتور يكولي عاادي اثر التعب
اثر بط...ك كون يا جايف

- هههههه ريرري

- دددضحك من خرااا بهالدنيا العوجه
عمرها مانصحت وياك يامكرود

هسه ما كسروني اني جان عشت الدلال براسك ماشايفه واحد يدللني تره

هيج جان وكعت وصحت ااااخ حيدااار
الحكليييي وتجي تشيلني وتضل حاير بيه
وكل ماريد اتحرك اصيح حيدااااار وتجيني تركض

اااخ اااخ فاتتني حراااامااات لو بس نازله قبلك جان هسه اني بقمه الدلال

-ههههه عاجبج تتكسرين ولج والله ضيم مينحمل ماسمعتي صوتي رج البيت
من الوجع

- لاااا مووو انته متعرف هالوجع شكد يجيب رومانسيه
باوع اني مال اكعد ابجي عليك واحضن بيك هاي ماسويهه

بس لووو واكعه اني جان انته سويتهه الي واصير مثل الافلام اتعلك بركبتك واباوع بعيونك وطممم الزكك بوسه

-هههههههههههه خرررب بعرضج
ولج كل هالصار بيه وماستاهل حضن

- اكولك تره شابعه حر ومستلك ابو ابويه
مو مال قنادر

باجر عود من تطلع من العمليه احضنك

- وعلييي ماااريد
واذا وصلتي افشلج

- بعد احسن خفه وراحه

شربت مي وتكلي ..
-تريد ؟ لا موزين عليك بعد منا لباجر
بس يلا غمض مو تباوعلي من اشرب تضل بنفسك خاف تعطش

- ماااريييد اسكتي عاد
ولتضلين تعلين صوتج كدام اخوتي بعد
عيب لا تفشليني هيج كدامهم

- ديلااااا فهمت
نام نام عفيه رجال ماتتعب دنام حاط عينك عليه شحجيت وشكلت وشسويت

- اي ويصفالج الجو بعد
حيدر تكسر ووكع وانتي الساحه الج صارت

- اييييي اجتي عدددله الا اكلب بيتكم ملهى
وبيك خير كوم وكفني

- ريرررري شبيج انتتتي شبيج متشوفيني بيا حاال
وكت هالصخااام مالج

- ديلاا سكتت

- متسكتين انتي لو يجي الحمزه امشي صيحي اخوتي وعدلي عباتج

-اووووي دعوفهم خلي ارتاح شويه
لك عيني استلكت اريد اسبح يمممه حموووت
عرك عرك مي صرت مييي

- وييين لترحين هسه يجون اكعدي هنا ولج لاتعبيني

-بس خلي اسبح بسرعه هسه شبيك انته متنام
لو حكرص بيك الا تنك فوك راسي

- يااااابوووويه وتالي وياج

ذبت العبايه وراحت للحمام  وانه كل شويه اصيحلها يلا اطلعي كبل مايجون ..

لحد ماطلعت واجتي مسحت وجهي بايدهه المبلله وعدلت شعري وتكلي ..

- ولك خاف بعد يكتلك الوصخ متسبح لان رجلك ملفوفه

- ريررري امششي روحي لبيتج لتضلين وياااي اليوم
انتي جايه تريحيني لو تزيدين نااري

- ديلا هسه قابل جذب غير اخاف على نظافتك شبيك
يلااا لتضوج اني اسبحك بعد شلنه المستحى هااا

- وليييييي وووولييي

- هههههههههههه
لك شبيككك حويدر داشاقه
تعال احضنك هسه على البروده

- ماااريد

- اني اريد انته اخد طالب رايك ! دانفذ اني اوووكيي

حضنت راسي وتكلي ..
- صير قوي لتخاف كلنه وياك ونداريك
شكد مايطول الكسر ابقى اداريك ماتعاحز منك تره

- جذابه تمليني يومين بعد تطلعين لسانج هالطول

- لك بابه بس حجي اني بالفعل غير شي
شوكت تتعلم طبعي مو فتيته لكلبي

- اطباااع عندج هنه واحد اثنين واتعلمهن

-ديلااااا بس عدل هالخشه هي بدون شي مورمه النوب مدلغمهه صاير فووول فاااول

- استغفررر الله

دفعتهه وهي راحت لبست عباتهه وكعدت وتتمضحك وتأشر على خشمهه ع اساس صاير هالكبر خشمي ..

رجعو اخوتي واحمد وكعدو يتعشون
بس ريري مااكلت غير مقبلات شويه
وبعدين شاورت احمد وطلعو صحت على احمد ومد راسه كالي ..
- هنا بس شويه نحجي

عزيز انطاني امي حجيت وياهه وهي بس تبجي وابويه يصيح عليهه وتالي حجى وياي وضل بس يدعيلي ويقوي بيه ..

السيد هم خابر على عزيز حجيت وياه وويه ولد عمي البقيه كل شويه واحد يدك ..

وكل هذا وريري واحمد مارجعو ..

ضل عزيز يخابر على احمد وهو يرفضه
وتالي اجوي .. كعدت ريري وهادئه شلوناتها

واحمد هم ساكت ويسمع رزايل عزيز وعادل
وانه هالاثنين مارتاح لسكوتهم ..

جريت ايدهه وهي اندارت باوعتلي كلتلهه
- وين رحتي ؟

ابتسمت وطلعت كل سنونهه ورجعت اندارت
وتلفلفت بالعبايه ...

شويه وكلتلي ..
- ماتعبت ! دنام يلا
لو اصيحهم ينطوك منوم مايصحيك منا لباجر العصر وكلشي تلكاه كامل مكمل مو احسن

- انجبببي وعوفيني

-اووكيي

شويه وكامو اخوتي وكالو حينامون بره
وضلو ريري واحمد مكابليني وكاعدين ساكتين ..

انه بعد تعبت فد نوب عفتهم ونمت ..

الصبح حسيت على اصوات يمي .. فتحت عيني واشوف دكاتره واخوتي كلهه فوك راسي ..

دكتور جبير مشيب دنك عليه وضل يفحص خشمي ودزوني فحوصات جديده ..

وضلو يفترون بيه ع الاشايع ..
ورجعوني للغرفه وانه دايخ فدنوب
كمت اتقيء وعيني بعد ماكدرت افتحهه

لا المخليني اكل ولا المخلصيني بالعمليه ضال مشتول وشابع وجع ...

رجع الدكتور مره ثانيه وشاف الفحوصات
وكال ..
-لااا هاي تشخيصهم غلط
.
.
يتبع