رواية ماء مغلي الفصل الخامس والخمسون 55 - بقلم Zoka 🌷

..♣️🩸   ماء مغلي  🩸♣️..
* adzzon *

- سبحان الله ايده عليك معجزه

-انته شبيييك شتقصد  !!!

- قصدي فتح عينك خويه فتح عينك لا تاخذك مشاعر الابوه وتصدك نفسك كبل هيج وانته علاجك ماكملته بعد

- لاااا تجفص بحجيك حسنين جاي تشكك بمرتي ومااارضاهه انه المره اعرفهه شنو ومأمن بيهه ماتخون

- كيفك خويه امن بكيفك مرتك وانته حُر وياهه بس انه العليه احجي وابري ذمتي منك
واذا هم تاخذ بخاطرك مني بعد لو اشوف شوف عيني هم اسكت كلشي ماحجيلك

- مرتي مستحيل تخوني هاااي انه اثق بيهه
من الدنيا كلهه انه اثق بس بيهه
ديربالك تجيب طاريهه بعد
انه المره معاشرهه وعيني عليهه وهي بكل صغيره وجبيره بحياتهه تحجيلي

انته ماتعرفهه مثلي .. كف عنا خويه دخيل جدك انه الي بيه  كافيني

عفته ومشيت وانه ايدي ترجف .. دورت بجيب البجامه مالكيت شريط الدوا
مشيت اسرع وطبيت البيت ...
كبل صعدت للغرفه .. فتحت الباب وطبيت
كبل اخذت الشريط و بلعت الحبايه وضليت مخلي ايدي على باب الثلاجه اريد افتحهه وايدي ترجف ...
ريري خلت ايدهه على ايدي وانه دفعتهه
وجريت باب الثلاجه حييل فتحته واخذت الماي وكعدت بالكاع اشرب واباوعلهه
وهي كامشه بطنهه وتباوعلي ساكته ....

اجتي كعدت يمي وخلت ايدهه على جتفي
- شبيك عومري ؟

عصرت وجهه بايدي وضليت صاك سنوني
وهي مغمضه .. صحت بيهه ...
- باووووعيلييييي
خلي عينج بعيني ريرررري

ضلت تباوعلي وتجر بايدي وانه لويت ايدهه
وضال عاصر وجهه ..
- مجذبه عليه ؟؟ احجججي هسه كلشي مسويته وانه مادري بي
كلشي احجيلي هسه اسامحج وانساه بس لا تضميه عليه
احججججي جاااي اكلج اخر فرصه انطيج هسه احجيلي كلشي مسويته وره ظهري
ماااارحمج والله لووو عرفتج مجذبه عليه بحرف واحد

ضليت انفخ النفس بوجهه وهي بس دموع ماحجت شي ..
ضربتهه بنص عظم جتفهه  وجريت وجهه حيل وهي جرت ايدي ...
- ماجذبت عليك حيداار شجاك ويه الجذب هسه!!!

- واذا طلعتي ضامه شي عليه !!
اسكطج وحك لا اله الا الله

- ماامجذبه شبيك !!! اني مو كل شي احجيلك
شعندي داجذب !!! شتقصد انته الي بالك شنو!

- انتتتي تجذبين عليييه هم تغدريني
ريري وعلي امووت اذا خنتيني وغدرتي بيه
احجي لا تضمين عليه احجي اي شي مسويته احجي خلي ارتاح خلي اصدك نفسي انه حتى من نفسي جاي اخاف
افهميني دخيييل ربج

حضنتني وضلت مخليه اصابعهه بشعري
وتكلي..
- شلون اخونك ! بس انته عندي بهالدنيا
اسويلك  كلشي حتى مااخسرك
اني ماكدر اغدرك ولا اجذب عليك اني احبك
واليحب ميغدر

- تضلين تحبيني عمرج كله ماتغدريني
كليلي احجيلي اي شي ريري راسي
جاي يتعبني
انه اذيتج .. ضربتج والله مادري بروحي شجاي اسوي

- ميخالف حبيبي ميخالف ماصار شي
عادي اصلا حلو هيج شويه نرجع نتعارك
لو ما بطني جان هسه سويتهه وياك دفرات
بس غير حامل واصير كيوت

- ريري ابني زين ؟

- اي زين كولش زين
بعده يتحرك مادري شعنده جوه ! مادري احد كايله ببطن امك مصارعه حره
يجيب ويدفر باقي عليه بس يطلع يرزلني ويرجع يضم راسه

خليت راسي على بطنهه وضليت احضن بيهه
وهي تتلمس بوجهي .. وتكلي..
- حبيبي أجرلنه بيت بغداد نكعد سوه هالفتره
ماريد اعوفك وحدك وهم هاي الاشهر اريدك يمي

- اي اخذج احسن انه اريدج بس يمي
جاي اتعب وحدي
اريد ارجع لطبيعتي ريري وعلي جاي اتعب من نفسي

- كلشي صعب بالبدايه بس انته قوي
والقوي لازم يضل يصبر شويه
يوم يومين وانته تسيطر بعد

- لتعوفيني حتى لو اذيج وتزعلين مني بس ضلي وياي انه احبج وعلي كل حياتي عليج
انه بس ارجع اهدأ اراضيج والله حبيبي والله اراضيج

- وداعتك هالمره ابد مازعل منك واني اجي اراضيك هم تدلل
بكلشي حويدر يدلل بس خلي يضل مرتاح وبكيفه شيسوي يسوي

عدلت كعدتي وضليت اباوعلهه بتعب
وهي خلت اصابعهه على طرف حلكي وسوتلي ضحكه ..

كمت وياهه للفراش تمدده وهي طفت الضوا واجتي ضلت كامشه ايدي وتبوس باصابعي

نمت وثاني يوم كعدت مالكيتهه .. باوعت ساعه اثنعش الظهر ..
نزلت غسلت ورحت للهول سلمت على امي
وهي اجتي جابتلي كلاص حليب بارد
شربته وهي كاعده يمي ..

اباوع لوجهه وابتسم انتبهت بعيونهه خطوط حمر .. سألتهه وكلتلي من حرارة المطبخ

راحت وشويه وجابتلي ماعون بي شياف برتقال و تفاح احمر ..
وكعدت يمي تنطيني وحده وحده اكلهه
وفجأه جرت ايدي خلتهه على بطنهه
وحسيت بحركة ابني .. كل مااحسهه هيج
اضحك ..
ضليت اضحك واتلمس بطنهه بكل جهه
خاف يضرب مره ثانيه هنا ..

انه اتلمس بطنهه وهي توكلني .. شويه وكامت .. وصارو يخلون الغدا وانه اصلي
فاتتني الصلاتين ...

كملت واجيت كعدت يمهه اكلت شويه
و ابن عزيز غص باللكمه اختنك فد مره
..  كمت عليه بساع وضليت اسحب ليفوك من جوه صدره و امي تضرب على ظهره
لحد ما رجع زين ...

عفت الاكل بعد ورحت اخذته غسلتله ورجعته خليته ياكل وانه طلعت بره
افتر بالشمس مادري شأريد !!
شويه ورجعت كبل صعدت لغرفتي وضليت متمدد ..

تلفون ريري هنا اخذته .. كلبت بكل شي بي
وهي اجتي .. ضليت اباوع بوجهه وانه كامش تلفونهه وهي بس تمسح بوجهه صاير احمر وبدلت ملابسهه وضلت واكفه كدام السبلت تتبرد ...

سديت تلفونهه وخليته بالمجر وصحتهه
اجتي بحضني ..
- باجر ارجع لبغداد

-ليييش !! بعد وكت شبيك مستعجل ع الروحه

- اريد اروح للدكتور موعد ملتزم بي ماريد يتخربط علاجي

- اروح وياك !؟ حيداااار ماشبعت منك
بس ٣ ايام اشوفك وانته فوك الشهر عايفني
تره ميصير هيج

- رور تحمليني فدوه بس هالايام
جاي تشوفين ضغط الشغل ومنا مواعيد ملتزم بيهه

- ادررري مشغوول بس ااني اريدك تره حقي عليك اشوفك هسه ماريد منك شي بس ابقى يمي كم يوم عوضني هاي روحتك
كلبي ناار عليك شوفلي جاره ماتحمل اضل هيج

- هالمره اروح أجر بيت قريب على دوامي
وارتبه واجي اخذج زين هيج !!!

- وبيتي ؟ تبيعه ؟ تبقي !

- ابيعه هو انه عارضه للبيع من شوكت بس مارهمت بلكت الله هالايام ينباع

- اووووكي بس عفيه استعجل واذا مالكيت عادي خلي نكعد بهذا بيتي ونخلص

- لا لا ماكو رجعه بعد هناك
اصبري هالايام اشوفلي بيت وأجر واجي اخذج

-زين اووكي حتى من نكعد هناك نطلع سوه نكمل تجهيز الطفل واشتري هم كم شغله الي احتاجهن ضروري

- ماشي اخذج وبكيفج اشتري بس اعصابج وياي هالايام طولي خلك

- ههههههه اوووكييي حيااتشيي اوووكييي

وكت العصريه ابويه رجع من السوك وجايب وياه كيلوات صدر دجاج ومعلاك وكال خلي نشوي للعشه ..

خلينه المنقله بالحديقه ووكفنه انه وسيف نشوي ..
كملناهن وكعدنا جوه ناكل ..

فضه مااكلت منهن تكول تعبانه من الوحام ولعبانه نفسهه من الريحه

ريري يمي كاعده انطيهه مثل خضورات او طرشي واخلي بلفتهه و من اكل اضل اباوعلهه وجهه حيل متفح هالمره وخدودها دم صايره ..
شاورتهه ..

- اريد اشم الركبه شلون بيه ولج

- اصبر هسه نصعد وشمشم

- لااا هناك الشم غير شي ينكلب اريد هسه هيج راحه ويه اللكمه

- ههههه دشم يلا هو انته وصلت وصلت
طلعهه من نفسك

ضحكت واباوع للاهل كلمن ملتهي بأكله
وانه هيج بساع خليت وجهي جوه اذنهه واخذت نفس قوي ووخرت وانه اضحك واباوعلهه ورجعت اكل ....

حجيت لاهلي اريد اجر بيت بغداد واخذ ريري وياي هناك لحد ماتمكن واشتري بيت
امي قبلت بس ابويه عارض ..
ميريدني اضل بعيد عنهم ...
فهمته منا لحد ماحصل نقل للنجف وارجع

ضل كل شويه برأي لحد ما كملنه شرب الجاي اندكت الباب ..
فتحها سيف وصاحلي..
- عمي هذا مؤمل يريدك

طلعتله وهو كالي .. النت عدهم مكطوع من الظهر ويخابرون على ابو النت يكللهم من عدكم المشكله ويريدني اشوف شبي..

رحت وياه لبيتهم.. حسنين عنده خطار بالهول
ماطبيت عليه كبل من باب المطبخ طبيت
يم ساحه الدرج مخلين الراوتر .. كعدت اشوف شبي مابي ..

دزيته يروح لبيتنه يجيب حاسبتي وانه صعدت للسطح اشوف النانو ....
ولكيت واير مفصول منه ..

اخذتلي بلوكه صعدت عليهه ورجعت اشكل الواير وبعدين قفلت باب السطح ونزلت صار بوجهي حسنين...

- هااا اليوم يمنه والله زين من طبيت بيتنا
تعال تعال خلي نشرب جاي

- لاا خويه مشكور شربت هسه كبل مااجيكم
جاي انتظر مؤمل يجيب الحاسبه
اشوف النت شبي

- ياابووويه اكله لراسي بالنت
سويه وخلصنه رحمه لاهلك
عمي بلوه ابتلينه بي ماايسكت هاي رايح راد يطفي الراوتر ويكعد يصيح

-ههههه كلهه هيج

-امشي هسه اكعد جا تضل واكف
شبيك مستحي منا !!!

مشيت وياه كعدنه بالهول وجابولي الحاسبه
شافهه حسنين وكالي..
- هاي مغيرهه !! هاي مثل الايفون ؟

-اي ماك بوك برو اسمهه
من شركه ابل

-ااانه اخوووك بيش هاي !

-بفلوووس

- طكيت بعد اخوك صارت فلوسك حتى ماتنحجي
هههههه الله يزيدك خويه الله يزيدك

ضليت اشتغل بيهه ومؤمل مخلي راسه بالنص كلساع يخلي اصبعه ع اللمس واصيح بي لما خلصت ورجعتله النت زهكت روحي

كبل سديتهه وخليتهه بجنطتهه وردت اكوم
حسنين مارضى .. ضل مجلب بيه ...

- اكلك بعد اخوك تروح وياي باجر ناخذ ملوكه للدكتور عدهه تحليل وتخاف تسويه صارلهه شكد معانده عليه
كلت بلكت وياك تقتنع

- لا وين انه باجر ارجع عندي شغل هناك

- هااه ! چا بعدهه اجازتك ماخلصت
عليمن راجع !

- شغل عندي لازم اروح ارتب اموري كبل الدوام

- شعندك ! صدك اكلك هاي انته ماتبزع روحك من الروحه والجيه كل شهر
وضال هناك وحدك
شلون جارعهه للعيشه هيج

- اي والله بهذله بس بلكت احصل بيت هالايام واكعد بعد هناك استقر بين مايطلع النقل للسنه الجايه

- ااانه اخووك تشيل منا !! بس انته ومرتك !

-اي

- عليك علي ! تروح بعد مانشوفك ! واهلك شلون !!

- اهلي ماعليهم شي انه الوحيد المتبهذل
هنا عدهم بالبيت جنه تداريهم واخوتي وياهم وابويه صار زين بعد خلي ارتب حياتي
كلهه شجم شهر وارجع اذا حصلت نقل

- زين هااي شلون تعيش انته ومرتك وحدكم هناك ! انته تطلع من الصبح للعصر يلا ترجع وهي تضل وحدهه !! ومنطقه غربه !

- شكو عليهه تسد بابهه وتكعد

- بالعباس زحمه هيج تضل مره وحيدهه بالبيت وانته تطلع ماتدري بيهه تروح تجي !!
والوكت مو امان

- لاا ان شاء الله اخذ بمكان زين امان ومنطقه راقيه وناسهه كلمن بحاله

- جاي تعب نفسك هيج وتبهذلهه وتصرف فلوسك بالخالي بلاش

- لييش !!! جا منريد نعيش سوه !

- لاا خويه مو هيج بس لو تاخذ اهلك وياك
احد يضل عينه على البيت على المره
احنه هسه مانكول هي تخوف ومابيهه ثقه بعد انته واثق بيهه ومغسول عقلك غسل وياهه

- شبييييك حسنين مغسول عقلي شني!
كل مره اسكت وانساهه الك بس لا تضل تدوس بالمصارين وترجع تتعذر اوزن كلامك كبل ماتحجيه

- استغفر الله
بويه اتعذر اتعذذذر انه قصدي انته وياهه متفاهمين حيل واحدكم يثق بالثاني يعني مانحجي بسوالف الموه تخون لو تسوي الموزينه لااااااا ابد مو هنا القصد

بس اكول خاف يصير عليهه شي وانته تطلع من الصبح تقفل تلفونك للعصر رين مافكرت صار عليهه شي ورادت تخابرك وماتحصلك
شتسوي المره ؟

زين هسه جايكم طفل وتضل هي وابنهه وحيدهم بالبيت صار لاسامح الله قدر عليهم
ورادت رجال اليساعدهه شلووون ؟؟؟
ابنهه تمرض ورادت تاخذه دكتور وانته ماكو وهي لازم تاخذه شلون تطلع وحيدهه ومتكلك ! لو تضل تنتظر بيك لماتغرب الدنيا يلا ترجعلهه وتكعد تحجيلك ابنك مريض !

شويه هم واحد يفكر للبعيد هاي الدنيا كلشي بيهه ساعه الساعه الواحد يحتاج شي يصيرله فد قدر ويحتاج احد من الاهل وياه
انته تاخذهه هناك بالمنكطعه تكعدون ياهو اليدري بيكم تعيشون تموتون ياهو اليعرف احوالكم !!!!

- هم صدك والله هي تخوف العيشه وحدك بس اذا مضطر شتسوي ؟

- لاا شكو مضطر ! هاي مو عندك بيت واهل
وناسك كلهه هنا وعايش مرتاح

- چا غير اريد استقر .. چا اضل رايح راد هم اريد عايلتي يمي
اهلي مايرضون يطلعون منا شسوي اضل متبهذل !
اخذ مرتي واعيش چا بس انه طلعت بيت وحدي من امه محمد كلهه !!

- لاااا خويه لا تستعجل هم تتبهذل ايجارات
وهسه مصاريف تزيد منا عندك ولادتهه ومصرف الولد والبيت وحد مصرفه يختلف مو مثل ماكاعد ويه اهلك وهذا وذاك يشيلون من المصرف

هناك كلهه براسك شتلحك تلم شجم فلس من راتبك لو تكضيه كله سد بسد مصرف الشهر
وتاليهه من تحصل نقل وترجع هنا ماتريدلك بيت وحدك تكعد تاخذ راحتك چا تضل معلك بثالث طابق !!

- جا شتفرق ! هنا لو هناك ؟

- لااا تفرق خويه شلون متفرق
هنا تكدر تقنع اهلك وتخليهم يكعدون وياك
امك تكعد تدير بالهه على الولد ومرتك تحضر الاكل تنظف تدير بالهه ع البيت
ابوك يجيب المسواك الزايده الناقصه للبيت
وانته مأمن على عايلتك بين اهلك ماتضل توهس

هناك حتى العيشه غاليه ماتنجرع وهم وحيدك
هنا كلشي تحتاج تدك تلفون على اخوتك يرحون للبيت ، يمك ولد عمك وخوالك
ساعه التحتاج شي اكو خويك يمك مأمن
هاي لازم تحسبلهه خويه

- اييي ..الله كريم اشوف شلون تصفى
من رخصتك اروح انام ورايه طلعه من الصبح

طلعت ورجعت اتمشى لبيتي والكر بحجيه
صدك لازم أمن عليهم وانه دوامي يتاخر
وعندي مناوبات مرات شلون يضلون وحدهم بالبيت ؟؟

صعدت لغرفتي وشفت ريري لابسه شورت وفانيله بس لحد الصدر والبطن طالعه
وهي كاتبه عليهه  بلون اسود ( H+R=S)

ضحكت ودنكت بوستهه وهي ضلت مخليه راسهه على صدري وتكلي..
- مو هواي دتتاخر يم ابن عمك هالايام

- هو مايصدك اروحله يضل يسولف وياخذنه الوكت

- زين شيسولف ؟

-هيج على الشغل و جهاله وسوالف منا ومنا

وخرت منها ورحت اخذت شريط الدوا
وهي جرته من ايدي ..
- عوفه حيداار متحتاجه هسه انته زين وهادىء شكو دتاخذه !!

- ميخالف حتى اضل مرتاح البال

-ماكو تضل مرتاح البال هذا مهدء بس يخلص مفعوله يعني ترجع متوتر !! شويه انته عين نفسك لا كلشي بالدوا
هيج عمرك ماتطيب

- انتي شلون تكدرين تضلين هيج مسيطره وزينه !!

- اني متعوده على المصايب بحياتي فعادي يعني تجي وحده تروح وحده ينكتلون خمسه عشره عادي كله صار هين
الجبيره الي تهد الحيل عبرتهه هذني ضلن كرزات  بحياتي اكرزهن واشمر كشورهن

- زين وكت الجبيره شلون عبرتيها ؟

- صبرت والعيشه تجبرك ترجع توكف على حيلك
صدكني اذا تضل واكف بمكانك حتى لو بأمان بقوقعتك راح تنداس .. لان كل شي بهالدنيا يتحرك مستحيل يعبرك الا ما يدوسك
فلازم تتحرك من مكانك لا تنداس وتنتهي

باستني بشفتي وضحكت ..
- انته احلى شي كملت طريقي علموده

بوستهه وكلتلي ناخذ صور جانت تنتظرني ارجع ونسوي اللقطه ..

كملنه اخذ صور وهي مسحت الكتابه من بطنهه وشغلت اغنيه واجتي خلت ايدهه وره ركبتي وضلت تغني ...
' السااااعه الي بعيشها بقربك ستين دقيقه حياه
والوقت الضايع طول بعدك من عمري انا مش حاسباه '

ضليت اضحك وهي تكمل ويه الاغنيه
وبتعابير وجهه تضحكني وخلتني انسى هوسه افكاري والادويه وكلشي ..

ضليت مرتاح وياهه هالليله وثاني يوم طلعت من الصبح لبغداد ...

مر اسبوع وهي تسألني اذا لكيت بيت ايجار
وانه اجل بالسالفه ...  ترددت اكللهه
ماريد نكعد ايجار هنا .. وكل مره نحجي
بهالموضوع اطلع عذر شكل واسد السالفه

وصلت شهرها الثامن مضبط تاريخ وكت مراجعتها بالتلفون .. وكلتلها اخلي عزيز يجيبج ماقبلت ...
كلتلي تعبانه ومابيه حيل طريق خلي اروح هنا لاي دكتوره هو بس فحص عادي
واتفقت تروح هي وفضه لنفس دكتوره الي تراجعهه فضه ...

اشتريت كل نواقص الهه ولابني كلشي اخذت
وكت نزولي الهم كعدت انه وياهه نرتب الغرفه وغراض جوه حولت بغرفه امي
الي تحتاجهن بولادتهه
وكلشي جهزناه سوه ... حتى فلوس للولاده خليت جوه ايدهه خاف انه بالدوام وتصير ولادتهه ..

شهر التاسع /٢٠١٧ ... باقي اسبوع على محرم ... ريري عبرت  ١٥ يوم بشهرها الثامن ... وانه باقيلي ٣ ايام وارجع لدوامي ..

بيت سيد حسنين سوو زياره جماعيه لكربلاء
كوستر كامل حجزوها والتمو ولد عمنا ونسوانهم والجهال واهلي هم اخذو جهال
اخوتي و ملتمين من الصبح يريدون يطلعون
وخابروني  ...

انه بعدني نايم بغرفتي ويه ريري وهناك فضه راحت وياهم والجهال كلهه .. فضلينه بس احنه بالبيت .. وخابرني ابويه هنا ..
كالي ..

لازم اروح وياهم الجهال صارت هوسه عليهم وبعدهم واكفين راس شارع ينتظروني
ردت حجيت ويه ابويه ماقبل خبصني منتظرين و واكفين متعطلين ولازم هسه تجي
ويانه ...

كمت بساع بدلت وحجيت لريري وحتى ماسمعت منهه شي كبل وصيتهه تقفل الباب
وطلعت ...

لكيتهم راس الشارع واكفين كبل صعدت
وحركو الكوستر ... كعدت هنا افهم منهم
وحسنين كالي ..
- همزين صارت عركه الجهال وخلتك تجي ويانه
جا كلنه منجمعين وزياره ابو عبدالله ليش ماتجي!!

- سلام الله عليه جا غير البيت ضل فارغ
والله دكتكم  متتسولف
ضلت هسه المره وحدهه

- ماعليهه شي هسه تسد بابهه وتكعد
زياره بعد دكت بابك لازم تلبيهه خويه

عفته وفتحت نت راسلت ريري ..
- رور حبيبي اعذريني عفتج وحدج بس ابويه شده بالي والله

دزتلي ..
- ديلا عادي اووكي
روح زور وغير جو وادعيلي

- اكيد ادعيلج ياروحي
بس خاف يصير شي احد يجي يدك الباب لا تفتحين وكبل خابريني اي شي يصير وياج

-اووكييي
راح ارجع انام

سديت النت والتهيت ويه جهال عزيز مكافش صايرين ويه جهال عادل ... وامي خليه جهال عادل يمهه وهذوله خليتهم يمي كعدتهم
وعيني عليهم كل الطريق ..

صارت زياره حلوه بس الجهال شلاع كلب
رجعنه بالليل .. نزلونه كدام بيتنه ..
خابرت ريري حتى تفتحلي الباب ..
واجتي فتحته ...

كعدت وياهه اسألهه شسوت اليوم ..
كلتلي بس نمت واكلت وضليت ع التلفون
سألتهه على عادل اذا رجع وكلتلي لا من الصبح لهسه هو ماكو ...
وعزيز بغداد رايح يضبط امور السكن
كبل مايبدا دوام الجامعات ...

تعبان وكبل نمت وثاني يوم كعدت سبحت وتريكت وخابرني حسنين...
- اكلك خويه تعال لبيتي هسه اكو شغله اريد اسألك عليهه ..

-خير ؟؟

-تعال ونحجي مو مال تلفون

سديته ورحتله .. كعدت وياه جان يكلي..
- شوف خويه انه من احجي لمصلحتك
انته تعرف معزتك عندي وعشرتنا مو مال يومين هاي صارلنه سنين بالحلوه والمره سوه
تعرفني زين واعرفك

-اي ؟؟؟

- اي .. من احاجيك بسالفه دخيل جدك
لا تجذبني اسمع مني اول وانته بعد بكيفك

- احجي شعندك

- خابرتني اختي كبل نص ساعه وتكلي
من جاي يطلع عادل للشغل جايه مره ورايده ادك  عليكم الباب .. وعادل فاتحلهه وصايح لمرته حتى تشوف شبيهه  ..

تكول رايده تحجي ويه العلويه وهي مجاريتهه بالحجي بين ماتطلعلهه العلويه ..
فكايلتلهه ...
احنه نعرفج بنت بيت السيد ابو مؤمل
واخلاق وتعرفين بالاصول وعندي فرد حجايه صارت وانتي احكمي بيهه

- شني حجايتهه ؟؟؟

- كلتلهه .. ولدنه شباب وتعرفين الشباب
يكعدون بالباب يلتمون والبارحه شايفين
بيتكم  العصريه مره طالعه لا بوشيه لا عباه
بطرك الحجاب وثوبهه ملون وفاتحه الباب
لولد غريب من المنطقه وهو طابك بسياره اخر موديل ونازل منطيهه علاليك وراد صاعد سيارته وماشي

هي جاي تكللهه مو عيب نسوانكم تطلع والشارع متروس شباب و تفتحن باب لولد غريب ماعدكم هنا زلمه بالبيت يفتح الباب
وصارت حجايه كدام الولد ينتقدون نسوانكم
وانتن علويات وعليجن الحجايه تنخط بكتاب وحساب

فاختي رادتهه وكالتلهه احنه كلنه طالعين البارحه وهي رجعت تعيدلهه السالفه
وكايلتلهه اريد احاجي العلويه خلي تحط عينهه على البيت وتوصي النسوان بعد لا يفتحن الباب المنطقه كلهه ولد ومايفوتهم شي
وهي مامخليتهه .. مسكتتهه وكايلتلهه انه اوصل حجيج للعلويه وهي راجعه من زياره تعبانه وبعدهه نايمه
وتكول بالف ياعلي مطلعتهه من البيت
وضاله خايفه شتحجي شتكول !!!
لان ماكو احد بالبيت البارحه بس مرتك ضلت وهي الفتحت الباب واخذت غراض من الولد

كالت خفت عمتي تسمع وتصير مشاكل
وهي المره يجوز مو بقصدها وماتعرف اطباعنه زين ويجوز موصيه غراض من النت وجاي ابو التوصيل ينطيهه ومن تطلع السالفه ياخذوهه بغير قصد
فسكتت وضميتهه عليهم احسن

بس هي خابرتني تكلي صحيح السويته لو لا ؟؟
وانه كلتلهه اسكتي والستر واجب
وكلت احجيلك بعد انته لازم تعرف واحنه بيناتنه ميانه بهالحجي ومو غربه وافهمك وتفهم عليه

ضليت ساكت واحس نار صارت بعيوني
كلتله ..
- خلي اروح افتهم منهه

- لا خويه لاا وين تروح تحاجيهه هاي اختي خوافه كبل هسه تحط جاهلهه من الخوف والمشاكل ماتعرفهه انته

- ماااعليه باختك اروح اشوف مرتي

- ومرتك هم وكت ولادتهه شبيك نسيت
خويه دخيل جدك اكعد وناخذهه بالتفاهم
جا تروح تعلكهه صايح وعايط عليهه
شبيك خويه هذني حبلات ساعه الساعه يصيرلهن شي

- شيصييير شيصييير !! انه اريد افهم
هاي حجايتهه للمره صدك جذب !
مرتي ماكلتلي هي موصيه شي من بره
ولوو موصيه تكلي هي ماتضمهه عليه
تحجيلي تكلي بويه اريد فلان شغله اوصيهه ؟
اكللهه اي يلا تطلبهه

- يجوز نست تكلك ..لو شغلتهه سريه موصيتهه وماتريدك تعرفهه
لوووو يجوز مو توصيل بس غراض تهمها لو فلوس منشغلهه جابوهه الهه
كلشي يصير

- جاااان حجتلي هي ماتجذب عليه كلشي تحجيلي وانه سألتهه احد اجانه ! كلتلي لا
لو جاي احد جان كلتلي

- يعني هسه هاي المره تجذب ؟.
تجي بنص بيتكم تحجي زور !! متوازيه !

-استغفر الله استغفر الله

- وحتى اختي لو تريد مشاكل جان صاحت العلويه وخلتهه تسمع كل الحجي وتروح تواجه مرتك بعد وتصير مواجتهه كدام عينك وتكب العركه بينكم
بس هي سكتت وتلافت السالفه كلهه
وكول الحمد لله وكعت بايد اختي وسكتتهه وطلعتهه

ضليت اطك باصابعي واعصابي تفور
وهو كلي ...
- خويه انه انصحك لوجه الله وهاي انه كل مره احجيهه الك وانته متاخذ بحجيي
بس انه اشوف لو تسكت على السالفه وتحط عينك على بيتك احسن

انته فتح عينك عليهه وخليهه هي بكيفهه شتسوي تسوي هي مأمنه بيك ماتدور وراهه
وانته هالمره جرب وشوف
اذا لكيت شي عليهه بعد هاي الله يحبك وكشفها الك
واذا شفت نفسك ظلمتهه بالشك بعد الله والعاذرين
المهم انته تكطع الشك باليقين وكلشي بينك وبين نفسك ومحد يدري ولا تصير هوسه وتطلع حجايه مو زينه عليكم
انته الرجال وعينك على اهلك وانته شوف بنفسك شسالفتهه؟؟

- الله كريم
سد الموضوع بعد اخوك ماريده ينسمع بعد

- سديناه خويه ولايضل بالك

رجعت للبيت وصعدت للغرفه .. هي جوه وانه قفلت الباب وضليت ادور بكل شبر بيهه
دورت شكد ردت بس الكى الغراض او اي علاكه جديده مالكيت شي ..

ضليت كاعد وافكر هسه هاي وين ضمتهن ؟
وليش تضمهن عليه؟ خاف هذني فلوس صدك ؟ ويجوز دازيهن الهه بعلاكه ومغطيهن بشي ؟؟

كمت فتحت الكنتور مره ثانيه وطلعت جنطهه
ادور بيهن واندكت الباب ..
كبل ضميت الجنط وفتحتلهه الباب ..

باوعتلي ورافعه حاجبهه..
-شعندك قافل الباب؟

- هيج ردت ارتاح وحدي

تمددت وهي اخذت دواهه تشربه وبعدين كلتلي..
- تدري شكد داتعب من الصعده والنزله
لو مدبرلنه بيت هسه مو جان ارتاحيت بغرفه جوه

- هسه اكعدي بغرفه اهلي هنه ضلن شجم يوم

- بابه زحمه كل يوميه فوك راسهم ابتلو بيه  اهلك !!!
بعدين يعني ماريد اخذ راحتي وياك
ماريد البس براحتي احجي اتمدد
وجوه البيت كله كاعد بهالغرفه
دينكطع نفسي لحد ماصعد تلث طوابق
واشوفك

- خابريني وكليلي انزل اريدك شكو متعبه نفسج بالصعده

- شفتك مبين ممرتاح كلت احاجيك اشوف خاف تعبان من شي

- لا زين مابيه كلشي
امشي ننزل سوه يلا

اخذتهه ونزلنه .. تغدينه وضلينه جوه كاعدين
و انه اكلب بتلفونهه.. كلشي مالكيت غير المتعود عليهن ..

راحت نامت وانه ضليت كاعد اكلتني الافكار
ومراقبهه لليل بكل خطوه ..

ثاني يوم الصبح خابرني عادل كالي ..
اكو كعدة عشاير بيت واحد من عمامنه
وحده من بنات عمنه اللح  متعاركه ويه رجلهه و مأذيهه بالضرب ومسوين كعده اليوم ودازين على الكل و انه ماكدر اروح عندي شغل وعزيز راجع بالطريق بعده ..   انته روح بدالنه وياهم ..

لبست وتحضرت وطلعت متفق اروح ويه حسنين .. مريتله للبيت اخذته وطلعنه ..

اليوم كله هوسه بيتهم وحجي يسطر الراس
مارجعنه لحد الليل ... غدانه وعشانه صار يمهم ..

رجعت كبل سبحت واخذت دوا واجتني ريري ..
- حيداار بطني دتأذيني حيييل

- رور تعبان والله اخذي مسكن هسه تصير زينه غير تقلصات مثل كل مره

-اييي بس معدتي وياهه موتتني ناار بيهه ناار
العصريه كلهه الوب منهه وهاي لويات دتصيرلي بطني

- تمشي ضلي تمشي واخذي علج مي من امي
هذا زين للمعده وهسه تصيرين احسن ان شاء الله

راحت اخذت العلج من امي وعفتهه يم الدرج تتمشى وصعدت كبل تمددت ونمت ..

الصبح هم خابروني رايدين يذبحون واليوم عازمين شيوخ بقيه عشيرتنه ولازم نروح
هم بس تريكت بالتسعه طلعت من البيت ..

هناك وكت الغدا والناس هوسه صايره مكلوبه امه الثقلين هنا وريري تخابر وارفضهه
وضلت تدك تدك لحد ما جاوبتهه ...

- بعدين بويه بعدين اخابرج هوسه يمي ماكدر احجي

- لك حيداار بطني دتموتني عوفهم تعال اخذني للدكتوره دااتكطع من الوجع

- استغفر الله وين اجيج هسه بويه بس اصبريلي ساعتين بس تفض الهوسه شويه واجيج

-لك ياااهوسه دااااكولك بطننني شبيك
وكت ناااس وعزايم تعاالي داكولك مريضه من البارحه ماشفتني الوب منهه

- اجيج اجيج بس انطي صبر
يلا بعدين اخابرج

سديته والتهيت ويه الولد .. وبس خلص الغدا
اجيت اريد اطلع وحسنين صاحني وكفنه على جهه نحجي...
- وين رايح ؟

- المره بطنهه ماذيتهه خلي اروح اخذهه احير بيهه

- ياامعوود هاي هم وصلك السره
لك بويه هاي وكت ولادتهه كل مره راح تضل انته تودي وتجيب للدكتوره وتكلك بعد وخليهه تتمشى

-هااه !!

- والله شبيك جا انه حفظتهه من المرحومه
هي نغزت بطنهه شويه وصاحت راح اجيب اخذوني وناخذهه وتطلع تقلصات عاديه بس نرجع للبيت تروح

- جا هاي فد مره صايره ومعدتهه كالبه

- كلهن هيج يحسن موتهن كرب بس خابرهه كللهه خلي تطول خلك ووصي امك عليهه
وهاذ هوه عليمن شالع كلبك بالدكاتره وهنا بعد الكعده هسه راح يبدي الحجي الزين
وين رايح يااخويه صدك تحجي !! 

- زين يلا بس اخابرهم وارجعلكم

خابرتهه وكلتلهه..
- عيني شلون صرتي

- داااموووت منها حيداار تعرف شنو داااموت بطني تلوينييي كطعتني ومعدتي
حاركتني كلشي مااكلت بس اتقيء من بارحه لحد هسه

-حبيبي بس هدي روحج وخليج يم امي
و هسه أن شاء الله يخف الوجع عندج
ضلي ويه امي خلي تقرالج عليهه وشوف هي شتنطيج تشربين تهدين معدتج
وانه بس اكمل هالكعده اجيج اذا بعدج نفس الشي اخذج للمستشفى

- فدوه لاتتااخر

-لا ياعيني اجيج ماتاخر بس يكملون حجي اطلع كبل للبيت
يلا ديربالج على نفسج

سديت الخط ورجعت كعدت وياهم
وطولت الكعده لحد المغربيه واحد رايح واحد جاي .. وتعشينه وطلعنه ...

وصلت للبيت رحت عليهه شفتهه نايمه
كلت صارت زينه وسألت امي عليهه كالت شويه احسن ولاتخاف مابيهه شي كل حامل هيج ..

عفتهه وصعدت نمت .. والصبح حسيت عليهه يمي ..
تكعدني وهي تبجي وتكلي ...
- حيداار كووووم فدوه كووم شوفلي جاره
لك بطني موتتني شبيك لخاااطر الله كوووم اخذني خلي يخلصوني اي شي ينطوني بس اريد يسكن الوجع

كعدت وضليت امسح بوجهه واتلمس بطنهه
كلتلهه..
- شبيج حبيبي فهميني شجاج هيج
مو بارحه صوتي زينه ونمتي !

- اي اخذت حبوب مال معده وتعبانه نمت بس بطني بقت تلويني وظهري يوجعني
من التعب نمت بس هي نفس الشي

- دخيلك ياربي عديهه بسلامه

- حيداار خاف هاي مال ولاده
الوجع كله حره ديصير

- لاا وين بعد وكت للولاده
خابري دكتورتج اسأليهه

- خابرتهه وتكولي انتظري اذا نزل عندج مي او دم يلا تطلعين لمستشفى

- جا اصبري ياعيني اصبري هي شدتهه بس هالايام اصبري وكولي يالله

- دااااكوله مااااتحملهه داااتكطع
معدتي دتوجعني صايره حجاره وظهري ماذيني حييييل
بالكوه صعدت حتى صفحتي متقصله

- تعالي نامي هنا ارتاحي وهسه انزل اجيبلج شويه لبن يريح معدتج ونصبر على وجع بطنج بأذن الله ماكو شي و بلكت الله وبدايه طلوك عندج وتجيبين الولد بساع بساع

-عفيييه روح جيبلي اي شي اي شييي بس خلصني

نزلت وطلعت للمحل جبتلهه لبن اكتيفيا
ورجعتلهه .. انطيتهه هي شربته ورأساً كامت تتقيء .. ضليت يمهه اغسللهه واصبر بيهه
وشفتهه فدنوب صارت نزلت اشغل السياره
حتى اخذهه ..
جان يخابرني حسنين ...
كالي ...
- وينك بعد اخوك تعال هذوله جاي يخابرون عليه ..

- منو ؟؟

- جماعه البارحه الرجال الي اتفقو وياه باجر يجيب الجهال لامهم يكول ابوهم مايرضى ينطيهم وهسه هناك بين ابوهم وعالكه بينهم

-دخيييل الله شنسويلهم بعد خلي اخوتهه يرحون

- شتعرفهم يسكتون هم راح تصير بيهه فصول لو حجي ماصخ بينهم يصير لو يتضاربون ورجلهه كلب ابن كلب مايناخذزمنه حق ولا باطل
تعال نروحلهم دزو عليه حتى بلكت يستحون منا وينطوهم
بدون مايتدخل احد وتكب الهوسه من جديد

- بووويه ماكدر اجي المره مريضه خلي اخذهه للمستشفى والحكك روح انته

- لك وكت نسواان هسه امشي خويه راح اطلع انتظرك يلا انه مجهز روحي بس تعال خلي نمشي

سد الخط وانه ضليت حاير .. رحت صعدتلهه وكلتلهه ...
- عيني بس شغله ساعه ساعتين وارجعلج
ارتاحي بس اجي اخذج وعد والله ماعوفج بعد بس اخلص من هالشغله واجيج

- رووووح وين متريد روووح معليه بيك راح اخذ امك واطلع وحدي

- لااا بويه لاا كولي يالله هسهماتخر شغله ساعه وانه يمج

كبل نزلت وشغلت سيارتي وطلعت لاكاني حسنين براس الفرع صعد وطلعنه الهم ..

وهناك جرت لا ساعه ولا ساعتين وهي تخابرني واكللهه بس هالساعه ..
وتريد تطلع هي ماخليتهه ..

لحد ماصار الغروب فضينه كلشي ورجعنه لبيوتنه ...

اجيت احجي وياهه زعلانه وحرف واحد ماردت عليه .. ضاله بمكانهه نايمه ومغطيه راسهه ...

عفتهه ونزلت اسبح ومن طلعت راسلني حسنين ..
كعدت جوه بالهول واراسله ...
دزلي ..
-  لك شني هاي مصيبه هالناس سطرو راسي

- بلوه هذوله انه ادري عليمن انطوهم مره

- عمي الوكت مايتأمن الناس كلهه ثعالبه طلعت

-اييي

- اكلك هم بعد صار وياك شي بسالفتك

-لا كلشي زين

- ديربالك الوجوه خداعه وشفت بعينك الناس شلون كلهه بلاوي ومصايب

- ايي والله محد هالوكت يتأمن

- همزين بديت تسمع مني وتاخذ برايي
شايف هسه بعد الله اليستر شتعرف ماتعرف عليهه

- لااا مو لهالدرجه هي

-لا كلشي توقع لتنسى بنت شارع هاي لو شكد ماعدلت بنفسهه تضل بنت شارع
وتخوف

- حتى لو هي محسوبه عليه مره بعد وعوف الحجي هذا سد السالفه

- اكلك انه ماحجي من جيبي
وكل شويه اسكت واسكت
لتنسى انه وياك شاهد على زواجك وشلون ترتب
خاف انته امنت بيهه بعدين
انه ماامن بيهه على هذيج دكتهه بيك من خلتك تكتب وتوقعلهه

- ادري هي سالفتهه هذيج عوجه
بس لغيناهه بعد

- ماتلغيهه هاي شوف ساعه الساعه تكلك يلا تعال نفذ وانته على عمى عينك كبل رحت وكتبتلهه شتردين حاضر
خلي تكشول الفوكك والجواك وتعوفك وتمشي
وضل انته خلي يفيدك كلبك الفطير

- لاا متسويهه

-لااا تسويهه وتسوي الاضربين منهه

- اعرف بيهه  مو زينه وشايف كل حياتهه شلونهه بس هي متريد شي مني
لا فلوس لا مصالح ماعدهه شي وياي

- هسه ماعدهه مصلحه بس بعد شجم يوم يصير بايدهه الولد والله لتلعب بيك طوبه
بهالولد تستغلك بي وتشوف بوكتهه

- لاا بووويه كلشي ولا الولد انه كايللهه
اجرم بيهه بس تندك بابني

- جا روح شوفلك ضبه الهه لاتضل فطير وتخليهه تتحايل عليك بسالفه الولد
انه عود وصيتك ارجع لدكتورك بس أنته الله يسلمك ماتاخذ بحجيي

- ليش ارجع لدكتور !

- جا نسيت شحجينه
غير تمشي تشوف وضعك صدك رجع زين بهيج مده قليله لو خاف صاير شي من وراك ماتدري بي ومغافليك الجماعه

- حسنين شبيك
كل يوم ضل نتعارك بهالسالفه
ابني هذا ابني منين يجي من الغريب !!!
انه ادري بيهه متخوني انته معليك بيهه لتدخل

- هو انه من احجي الصدك الي تخاف منه يصير وياك
كبل تزعل وتضل تسد الموضوع

- لا اله الا الله

- ديربالك ولتنسى الكدرت تجذب على اهلك تجذب عليك
خلي عينك عليهه مثل ماعلمتك

- متجذب عليه تريد تصدك لو متصدك ميفك بس هي متجذب عليه

- ليش يعني لان تكلك احبك

-جا الحب هين !

- على جماعتهه شربه ماي عدهم
انته مااخذتهه بنيه ومن هاي وقيس بعد

- ادري اخذتهه مو خوش بس راضي بيهه
وصارت ام الولد بعد

-هي هاي حاكمتك
بالولد لو مو هو جان تدري بيك تطلكهه
بس خوش جلبتلك بسالفه

- اي الولد ربطني بيهه بعد شفايده الحجي

-هم صدك شفايدته
هي تجيبه وتحطه بحضنك وتخليك بالامر الواقع هذا ابنك وحير بينه ياحيدر

- الحمدلله على كل حال

- حرامات والله هيج تاليتك انته ويه هيج مره
ابد مو من ثوبك

- كلمن وقسمته بعد

- قسمتك عوجه من يومهه
شوكت ترجع لدوامك

- باجر ارجع

- زين توصل بالسلامه ولاتنسى جيك وضعك
حتى نستغفر ذنبهه

- الله كريم

فتحت اليوتيوب وهي خابرتني ..
رفضتهه .. وكمت اريد اصعدلهه ودزتلي رسايل بالواتساب ..

- نعلى على صفحه عشيرتك والخلفوك
تعاااال اصعد

.
.
.
يتبع💕