رواية ماء مغلي الفصل الرابع والخمسون 54 - بقلم Zoka 🌷

..♣️🩸   ماء مغلي  🩸♣️..
* adzzon *

بغداد / شهر السابع / ٢٠١٧ ..

طلعت من الدوام ساعه خمسه ونص العصر
طبكت بالطريق اخذت ( كهوه بارده )
شربتها وكملت طريقي ...

طبكت السياره بالكراج ونزلت اتمشى
للعياده موعدي ثابت .. ساعه سبعه بالليل..

وكفت انتظر باب العياده .. مابقى غير مراجع واحد ..
اتمشى واحجي ويه ريري بالتلفون ..

- باقي مراجع واحد كدامي وبعد فوك النص ساعه للسبعه

- زين لعد لا تتوتر مثل هذيج المره
احجيله كل شي وخفف عن نفسك

- اي ان شاء الله

- ليش مااكلت لحد هسه باقي ع الجرك مال صبح !! شبيك يا حبيبي

- مااشتهي

- كول للدكتور خلي يكتبلك مشهي
شلون تضل هيج متاكل وروحك خاويه

- ماشي
بعدين نحجي خلي اكعد جوه ارتاح

سديت الخط ورحت جوه كعدت واباوع للساعه .. اذني ركزت على دكة الميل
راقبته خمس دقايق ورجعلي التوتر ..

حسيت بخنكه هنا .. كمت طلعت بره اتمشى
وشفت ابو كشك يبيع جاي ونسكافيه
رحت اخذت نسكافيه.. شربته واخذت ثاني هم
ورجعت صعدت للعياده ...

طلع المراجع الاخير والسكرتيره طلعت
وبقينا بس انه والدكتور ...

سلمت عليه وكعدت .. كالي ..
- تشرب كهوه  سريعه ؟

- اي اشرب

انطاني الكوب واخذت اول شربه منه
وهو كالي ..
- كم كوب صارن ويه هذا ؟

- تسعه  كهوه و سته  نسكافيه

- تجوع ؟

- لا

- من الصبح لحد هسه صار الليل شأكلت ؟

- جرك وجاي الصبح

- شوكت ناوي بعد تاكل !

- يمكن من اطلع منا

كعد على كرسيه وضل يشرب كهوته
وانه كملت الكوب وخليته على الطبله
ضليت افتح دكم القميص من الركبه
ومددت رجلي وضليت افتح بكفه القميص وارجع اعدلهه واكفهه ...

باوعتله وهو كالي ..
- صار كم يوم على الجريمه ؟

- ويه اليوم عشره ايام صارلهه

- الوضع هناك شلونه.  ؟ متواصل ويه احد ؟

- اي .. اعرف هناك الشرطه بعدهه تبحث بالقضيه

- واهلهم ؟! شكوكهم حول منو ؟

- ماعدهم شكوك لان الولد الي وصفوهم الجيران ، غربه مو من العائله
يعني همه يعرفون القاتل غريب
وكالو هاي يجوز حراميه مثل ماصار بيت اخويه
وهيج مشت السالفه كدام العالم

- يعني بقى القاتل مجهول

- اي لحد هسه مجهول
بس هو انه القاتل
كل الي الي ماتو سببهم أمر مني

-  زين .. بارحه ماجاوبتني
سبب اعترافك الي بالجريمه هو بدافع عذاب الضمير او حاله مرضيه واجهتك يرجع سببها لوقت الحادثه !

- الصراحه دكتور
انه من يومها انهارت نفسيتي .. ماكدرت اتقبل نفسي بعد الصار
الجثث بعيني صورتها وين ماروح
احس بعد ماكدر اباوع لنفسي بالمرايه
شي بداخلي دمرني

وماكدرت اعيش هيج انه مجرم وبين اهلي كاعد ورجع كلشي كدام عيني
نسوان اخوتي صح هنه دمرن عيشتنه وكل الموزينات بيهن بس انه المسؤل بموتهن
وهذوله كلهم دمهم بركبتي صار
اكثر من جريمه .. ٧ دمهم انهدر وااانه السبب

انه مو هيج اصلي ولا هاي اطباعي
انه رجال فقير من اهل الله جنت كلشي ماعرف بهاي الدروب
عيشتي كلهه لاهلي اخاف عليهم وباذللهم عمري

بس هسه تغيرت
صرت مجرم .. ماكدر اكعد وانسى الصار والسويته بايدي لهالناس ..
قررت اروح اسلم نفسي واعترف بكل شي

بس ترددت لان خفت على مرتي حامل
وهي شريكتي بكل شي .. هنا وكفت بعد لا اكدر اعيش واتقبل الموضوع ولا اكدر
اروح اخذ جزائي بالقانون
ضليت محتار بأمري وين اروح !! شسوي !
ومالكيت غير استشير دكتور نفسي لان وصلت حدها عندي بعد ماكدر ارفع عيني بعين بشر ولا اكدر اعيش انه جاي اموت
بكل دقيقه .. القلق كاتلني والخوف من رب العالمين ومن اهلي شلون اذا عرفو
وخايف على مرتي على ابني على كل شي خايف

جريت بطل الماي شربت وضليت اهز برجلي وارجع اشرب الى ان خلصت البطل
وخليته على الطبله .. وضليت افرك بعيوني
وهو كالي ...

- قرارك من البدايه صح
بلجوئك لدكتور نفسي
هاي الحالات ماتتعالج بالنسيان
القتل دائمآ مرحله تغيير بحياه الانسان
يااما راح تنهي حياتك الاولى وتوكفك على حطامها
او تصنعلك حياه ثانيه بعيده كل البعد عن
الاولى..

- انه اريد اسيطر واوكف كلشي بديته
خايف الموضوع بعده ما خلص لهنا
خايف بعد يجرني لجرايم اكبر

- لا إن شاءالله مايتكرر الصار
اخذت المهدئات الوصفتهه الك ؟

- اي اخذتهن .. جاي اكدر انام بس من اكعد
ويبدأ يومي على كل سالفه تلكاني قلق

- زين كل شي بسيط لحد هسه
الامور زينه
بس خلي نتفاهم على نقطه معينه
انته اول مافكرت تبدأ تتخلص من اعمال البيت والعائله ودخلت بهذا الطريق
جنت  مفكر للنهايه ؟ راسم بافكارك النقطه الي من توصلها راح تشوف انتهى شغلك هنا بعد
ونجحت بطريقك ..

- لا .. بالضبط كفكره ونقطة نهايه مامحدد
بس طريق البدايه
وهذا غلطي المتندم عليه بكد شعر راسي

- فعلاً هو اكبر غلط صار
لان .. الحال الي انته بي هسه هو خط النهايه المفروض تتوقع وصولك اله بدايه افكارك

- ااانه ماردت اكتل احد دكتور
انه جنت عايش مسموم بيت مسكون جن وشياطين وعايلتي كلهه مرضى والموت كل سنه يدك بابنه وياخذ واحد من اهل بيتي

انه جنت خايف على ابويه وامي لا يوصلون نفس ماوصلو اخوتي وهم اخسرهم
خفت عليهم كلهم .. اخوتي هم خفت عليهم
بنت اختي خفت عليهه كلهم  جانو مدمرين
بالسحر
انه الوحيد الجانت حالتي احسن منهم واكدر افكر واحسب حساب لهذا وذاك

- اي بس نتيجة راحتهم قتل الاذى

-بس صرت مجرم هسه انه مجرم
كاتل سبعه شلون اعيش بعد!

- تعيش من تعالج افكارك
شوف اني مقدر صراحتك وياي وثقتك بيه
على سرك
وراح اوكف وياك للاخير
صح كلمة ( مجرم ) جبيره وعليها الف حد بالقانون
بس اساس الي وصل للاجرام اكبر من الاجرام نفسه

- يعني بديت تفهمني ليش كتلتهم

- فهمتك وواضحه الصوره للموضوع كلش واضحه

هو لو أنسان عادي وتكدر تحاجيه وتوعيه وتتفاهم وياه على الغلط والصح وتاخذه لطريق توبه .. ممكن جان  صار الحل اسهل
وياه
بس هو مثل ماوصفته متشبع بالشياطين
هيج نفس ماتعرف معنى التفاهم وتفكير عقلاني وتكدر تتواصل وياهه

- اي همه فوك هذا كله
نسوان !! انه شلون اكدر اخذهن واكعد اتفاهم وياهن !!

- اي صعبه

- ودكتور انه كلشي بديت بيه جان سري
لان الي اذونه منه وبينه
انه ردت اخلص من السحر الي بالبيت
ردت اعرف منو هي الحاقدة و وصلتنه لهالمواصيل واتجنبهه .. اخذ حذري منهه
بس ماردت اكتلهه والله وحك الله ماردت
اصير قاتل هارب من القانون

- صح خطيت خطوه صعبه بس هي بكل الاحوال ضروريه

اني هسه لو بدالك وصاير وياي كل الي حجيته الي جان تصرفت نفس تصرفك

- الله يخليك لا تحجي هيج وتقنعني
تره روحي جازه من روحي

- لا اخي هي مو بضيك الخلك
بس واقع حال
اني هسه اعرف فلان يأذيني وبكذا نوع من الاعمال
وكل مااخلص منه يرجع يأذيني بالاكثر
وهو عينه بعيني
ماعندي مهرب منه
و صار وكشفني ادري بي
شنو الحل ؟ لازم ادافع عن نفسي
شتقترح عليه حل ؟
اريد احمي نفسي وعائلتي والاذيه كاعده ومكابلتني
شسوي برأيك ؟

- تنجبر تفضحه وتسلمه شرطه او تكتله

- وانته هنا غطيت على الفضيحه بالقتل
وطلعتهم مظلومين ومغدورين

- وصرت بالوجه مجرم وهمه الوصلوني للاجرام

- إذًا الجريمه حدثت لدفاع عن النفس

شوف اني عالجت ولد بعمرك تقريباً
هذا قتل امه لانها خانت ابوه

- شلووون عاش وهو كاتل امه !!

- عاش تعبان بس هسه هو زين
هو هم محد عرف بي القاتل بس هو
جان متأذي منها يكول دكتور شكد ماحاولت وياهه تبطل وتوب من خيانة ابويه ماتابت

جانت تطلع تتواعد كل مره بمكان شكل
ويروح وراهه يشوفهه تصعد بسياره فلان وفلان وبالبيت يعرفهه تخابر وتاخذ فلوس من ابوه وتصرفهن على جماعتهه
وابوه موظف محترم وهمه عائله محترمه
وناس طيبه وعدهم بنات
خااف على خواته من امه لا تجرهن نفس الطريق وخاف من الفضيحه بين المنطقه والناس وصدمة ابوه بامه وهو يكول يحبهه ومأمن بيهه حتى البيت مسجل نصه باسمهه

بس هي بالنتيجه تخونه وخيانه مو بس تلفونات يعني مواعيد تطلع وابنهه يدري بيهه
وساكت ميكدر يحجي لاحد ..امه هاي بعد مجتمعنا يخلي عار امه لازك باسمه واسم خواته كل العمر

اضطر بيوم من الايام وهو يعرف بيهه
متواعده وتتحضر دتطلع .. مانعهه من الطلعه
ومهددها وهي كسرت الشر وكعدت بس ثاني يوم مغافلته وطالعه وهو لاحكهه وماخذهه من نص الولد و طالع بيهه مكان بعيد منزلهه
وساحكهه بالسياره

-لااا اله الا الله

- هذا اخذها بايده للمستشفى وضال حاضر الجنازه كلهه ومن وراهه وكع مريض

المشكله هنا هو صار زين هسه تعدى المرض واسس حياته بس تبقى كل ماينذكر طاري امه
هو يتضارب الشعور

هاي ام صعبه انها تطلع خاينه ومنحطه لهيج درجه وهم صعبه هي ماتت على ايد ابنهه
هاي الحالات تبقى بخانة الخذلان بعد ماتتعالج صدمة  القتل ..

بس انته تختلف هنا ماعندك خانة خذلان تعيش بيها بمرور الزمن ..
انته التفت لحياتك .. السجن والحكم مايغير بيك شي انته من ذاتك محاكم نفسك

السجن وجدوه لتوقيف الاجرام والحد من الفساد . . محاكمة النفس وتهذيبها وتغييرها
حتى المجرم يتوب عن فعلته وياخذ جزاة
فعله
وانته كلهن مسويهن لنفسك

اولاً معترف بذنبك .. و مسيطر على نفسك وخليت حد لهذا الفعل بعد مايتكرر
ومحاكم نفسك كل دقيقه وكاف اذيتك عن الناس ومسجون بنفسك .. مسجون بعقلك وضميرك

صدكني هذا السجن اكبر من الزنزانة
هناك راح يخلوك تتآلف عالم الاجرام
بس هنا راح تعالج الخطأ وتبقى انسان مسالم

- يعني هسه انه ما عليه حرج ؟

- لا هو الفعل مو عادي بس اجباري
ونصيحتي الك
عيش على اساس انته نفعت غيرك
شوف الجانب الثاني الصار اكثر امان
بعد موتهم
حقيقةً هيج ناس احنه كأطباء نعاني من وجودهم
وناشدنا اكثر من مره ذوي السلطه
ان يفتحون تحقيق عليهم ويطبقون قانون صارم على كل بيوت الدجل والشعوذه
لكن مامن أُذن تصغي لنا

- الساكت مستفاد
وانه شايف وعارف كلش زين شلون مستفادين منهم
واحدهم مايمشي خطوتين بالدوله اذا ما دك تلفون عليهم

- نعرفها اخي نعرفها
المشكله احنه كلشي نعرف بس مابيدنا شي

هسه مستعد تبدأ علاج ايجابي وتخلي حد لتفكير القصاص من نفسك !

- يعني جاي تكلي انسى الجريمه وعيش
ولا عبالك صار شي !!

- اي يااخي عيش ليش متعيش!!!
انته مو خطر على المجتمع اكثر من الموجودين حتى تعدم حياتك

الجريمه جبيره وصعبه وثكيله على النفس
وتتعب الضمير بس اني اريدك تتعالج بايجابية حتى تبقى انسان مسالم لان كل مجرم
يبقى دافن ذنبه بين جنبه هذا راح يعتاد الاجرام

اليوم هو قتل واحد او اثنين وعاش فتره خوف ورهبه باجر راح يقتل ثالث و يكول اني
اصلا متلطخ بالدم بقت على هذا !
وهيج شي يجر شي بسبب عذاب نفسي
هذا تعذيب نفسي .. الانسان يعذب نفسه بكثرة الذنوب والاخطاء .. يعاقبهه على اول خطأ
بتكرار الخطأ بكثره الى ان يصير معدوم الشعور هذا الي نكول عليه
| كلبه ميت |

التداريج هاي هي تخليه كلبه ميت معدوم الاحساس .. واني ماريدك تصير مثلهم
النفس اماره بالسوء ... ماريدك توصل مرحله
تصير تقتل حتى تأذي نفسك لانك شخص مجرم ومو زين بنظرك

- والله صدكت
هسه انه امشي بين الناس واحسهه كلهه تباوع عليه وتشوف بيه شي يخوف
احس حتى السلاح الي ماشايله همه جاي يشوفوه بايدي ويشوفون حتى الكتلتهم
واصير اريد بس اعبر من يمهم خايف يكشفوني

- اي هاي البدايه اذا انتركت توصل للوضحته الك
واني احجي عن تجربة حالات بالاف مرت عليه ودرستهه

- زين هسه انه شلون اعالج بايجابيه ؟
ماريد اضل هيج انه مااريد اعدم نفسي واعدم حياتي .. بركبتي مره تنتظرني و ابني ماضل شي ويجي للدنيا اريد اتهنى بي
والله تعبت لحد ما نرزقت بي وادعي كل يوم
ينولد بسلامه واخذه اشمه واداريه

- إن شاء الله يجي بسلامه ويكبر بعزك
وهاي لخاطر ابنك انته لازم تراجع افكارك
وترتبهه مثل ماوضحتلك وتلتزم بالادويه
واعبر هاي المرحله
انته رجل واعي ومدرك لقيمة نفسك ومسؤوليتك راح تكدر تتعدى الموضوع
لان انته غايتك الاصلاح وحفظ ماتبقى من العائله
والتوبه خليهه وياك  وابعد عن تأنيب الضمير اكثر من اللازم

- إن شاء الله

- وبالنسبة لمرتك بعد الولاده ضروري
تجيبها هنا

- ليش دكتور ! هي زينه ماتعبت بتفكيرهه مثلي
هي الي مخليتني باقي صاحي لحد هسه

- الثبات الدائم خطر على النفس
هاي قوه مصطنعه و اخرتها تعب مضاعف

- لااا ان شاء الله ماعليها شي
واجيبها ميخالف حتى هم نطمئن عليها

- حاول تخليها تحجيلك عن افكارها
لا تخلي كل تعبك عليهه وتنسى انها شريكه بكل شي يعني قاسمتك التعب نفسه والضمير نفسه

- ماشي

- تكدر توقف التسجيل هسه
و بعد ماتضبط اساس فكرك الجديد
نكمل جلسه ثانيه

اخذت تلفوني ووكفت تسجيل الصوت
انه متفق وياه اسجل الجلسه كلهه لان افكاري دايماً تغلبني وانه ادقق واعيد وازيد بالتفكير
اريد كل ما افكر لبعيد ارجع اسمع الحجي واسيطر على افكاري ..

وبنفس الوكت انه ادزه لريري لان مابيه حيل احجي كلشي ..

طلعنه من العيادة سوه وكلمن صعد سيارته
وراح بدربه ...
انه كبل فتحت نت ودزيتلهه التسجيل
وهي خابرتني بالطريق ..

- حبيبي صرت هسه احسن ؟ اكلت ؟

- اي زين
انتي شلونج احجيلي

- زينه اخبل
ومن اسمع صوتك اصير حيييل مرتاحه

- يابعد روحي

- متدري غير عزيز محصل قبول على التعيين بالجامعه العراقية بغداد

- يالله اخيرا حصل القبول
والله حرامات شهادته تضيع هيج كضه شجم سنه يشتغل بمحل مثل فيترجي

- ايي خطيه فد فرحااان
جايبلنه زنود الست وزعلنه ومتشوف بس الضحكه بوجهه ويبوس بجهاله يبووو خطيه
طاير من الفرح

- الله يهنيه يتساهل والله الفرحه

- تره هو خابرك بس يكول ماحصلته

- اي منطي طيران من طبيت العيادة
هسه اخابره

-ديلاا اووكي خابره
اني راح انام مدري شبيه بس انعس
من تضوج خابرني عادي اووكيي

- ماشي ماشي

سديته وخابرت اخويه عزيز .. باركتله وهو كالي راح يجي لبغداد باجر و واعدته
اخذه من الجامعه الظهر ونتغدا سوه

طبيت  غرفتي  .. سبحت واخذت المهدئات اثنين و نمت ..

ثاني يوم طلعت للدوام وانه اعيد تفكيري
احجي لنفسي كل شي لازم اسويه لخاطر ابني
لازم انساهم حتى لو انه غلطت لازم ادبر عيشه زينه لعايلتي
ماخليهم هم بموتهم يعدمون حياتي

ضليت طول فتره الدوام انه ارتب بافكاري
لحد ما اخذت اجازه زمنيه وطلعت
اخذت عزيز ورحنه تغدينه سوه ..

صار هواي ناسي شي اسمه غدا وحتى هسه اكل ومااستطعم الاكل بس هيج مجرد اكل

بقى يمي هذا اليوم وكمل معاملته ثاني يوم
ورجع للبيت ...

رجعت تابعت الجلسات ويه الدكتور
مجرد افهم انه وين راح امشي بعد بحياتي
واسيطر على القلق وكثره التفكير
بس اي تغيير بنفسي ما صار ...

بعدني عايش على وجبه وحده باليوم
واشرب الكهوه كل ساعه وبنفسي التدخين
وامنع نفسي عنه ..

بعدني شايل شريط المهدئ بجيبي وين مااروح .. وماانام اذا مو حبايتين من الشيشه
المهدئه للاعصاب ..
ومااختلط باحد واتجنب الرجعه لاهلي
واسمع التسجيل كل مااكعد وحدي ..

صار شهر الثامن وريري وكت مراجعتهه
للدكتوره .. هذا شهرها السابع ..

وصيت عزيز يجيبها الي .. واخذتهه كبل للدكتوره ..
واكف يمهه واسمع نبض الطفل واشوف حركته والدكتوره تبشرنه بكل الوضع زين

طلعنه نحمدالله ونشكره تيسر الحمل والولد
زين وماكو اي خطر عليه ..

هي تمشي محتره وتزخ عرك وانه كامش ايدهه .. عزيز جان واكف يم السياره
صحتله وانطيته الراجيته وكلتله ياخذهه للصيدليه بين مااتصعد ريري واغير مكان السياره لان عليهه شمس ...

اخذت باقي الفلوس منها لان راتبي كله يمها مخليه  .. ونزلت من السياره ورحت للصيدليه...

شفت عزيز بعده واكف يم جهه الباب وطابك الراجيته ومخليهه على خده وصافن ..

جريتهه من ايده وهو فز وباوعلي ..
- شبيك خويه ! مانطيتهم الراجيته شمصفنك!

- لك خويه هاي مره لو طركاعه

كبل عيني راحت على البنات هنا اثنين
وحده محجبه وناعمه ووحده سافره وضخمه
جسمهه طويل وشايله سمنهه بطولهه
والوجه خدود وعيون مكحله شكبرهه
وشعور مشسور ومكلوب صفح ..

كلتله ..
- لك هاي تجدح خويه

- شعلت اهل اهلي

- صيدلانية بعد اخوك وين تريد انته متكلي

عفته ورحت اخذ الدوا واباوعله بعده عينه عليهه ..
اخذت العلاكه ودفعت الفلوس ورحت جريت ايده وكلتله..
- امشي خويه امشي
لا توكع عيونك

مشى وياي وهو ساكت وصعدنا بالسياره وساكت ...
تغدينا وريري تشاورني ..
- اريد ابقى يمك مشتاقتلك

- لا مترهم اخويه هنا

- حيداار صار شهر مفاركتك شبيك انته ليش لا تجيني ولا تخليني يمك

- اجيج حبيبي بس اخذ اجازه واجيج اعوضج

ضلت ساكته بعد ماحجت وياي ..
اخذهه عزيز ورجعو للبيت وهي متحاجيني ..
راضيتهه ثاني يوم و تفاهمنه ..
وصتني على تجهيز للطفل اشتري كلشي
من يمي كبل ماارجع للبيت اخذلهه القائمه الدزتهه كلهه..

انه من استلمت الراتب خابرني حسنين..
وكالي محتاج ٥٠٠ دين  مستعجل ..
كلتله خيرك ؟
كالي مسوي سلفه وهالشهر متضايق على الفلوس وماكدرت ادفعهه ..
وعادل منطيه بس ٥٠٠ وهي الدفع مليون
كلتله ميخالف بس انزل للبيت انطيك الفلوس

اشتريت جهاز الطفل .. ملابس وحضاين وفراش وبقت المجرات والكريكوت وصتني عليهن هذني ماخذتهن كلت الشهر الجاي اخذهن اله ..
لان ورايه مصرف البيت والسياره لازم اخلي باقي يكفيني شهر ..

من وصلت البيت وانطيتها الغراض فرحت بيهن وماهتمت كلتلي اهم شي
ملابس سند حاضره ..

بنفس الليله انه اخذت الفلوس لحسنين
وضليت سهران وياه ..
حجالي سالفه ...

- تدري بيت اهل مرت عادل راح يشيلون من المنطقه

-هااا ليش

- خايفين يكولون هنا ناس مترصدتهم
وراح يكتلوهم واحد واحد
ويكولون ذابيلهم تهديد بالبيت
وهسه همه حتى طالعين من البيت عايفيه فارغ
مدري وين ولو

- الله اليستر

-  اكلك ماتخابر هذا صاحبك ابو سعد
تشوفلنه شي منا منا

- الرجال توفى

- لااااه صدك ! شوكت هاي!

- كبل شهرين
هو جان موات
الله يرحمه ويغفرله

- الله يرحمه
همزين استفادينه منه كبل مايموت
زين اكلك هسه بعد سالفة السحوره نسدت

- اي خويه جا كل يوميه هي اكلك نسدت
هاي الله لطف بينا ورحمنا وخلصنه منهه

- زين جا انه ماعرف شلون نسدت ؟
شلون انته هيج متاكد ماترجعلنه بعد ؟؟.

- نكول بلكت ماترجع

- حيدر مرتك الهه ايد بهاي الجرايم الصارت ؟. وانته تدري وساكت عليهه

-لاااا مرتي حامل وحايره بروحهه
وانه حاير بدوامي وينا وين الجرايم
شبيك خويه

- ان شاء الله مايطلعلكم ايد
زين هسه مرتك بعد متريد فلوس شغلهه
تنازلت بكل شي ؟

- تنازلت طبعاً جا غير مرتي !!

- انه خايف عليك صراحه خويه

-ليش من شنو؟

- انته رجال كلبك طيب وعلى نيتك
واهلك ناس فطيره ومن اهل الله
والي بيتكم بلاويهه مو اقل من الراحن
خاف لا توكعك بمصيبه وانته مأمن بيهه
على شنو مادري !!!

- لاا خويه تره هي كلش كلبهه طيب وتحبنا
كلنه مثل اهلهه والزين السوته مايتجازى
وماعدهه مصلحه ويانه

- شمدريك ماعدهه مصلحه ؟

- چا غير معاشرهه وافهمهه

- خويه المصلحه مو بس فلوس لو منصب
يمكن هي عدهه شي جبير هاربه منه ومصلحتهه بيك تبقى حاميهه !!
متذكر اول مره ليش قبلت بالزواج وحطت شروط وتأمرت شلون تغير كل هذا برمشه عين صارت تأمن بيك وحبتك !! 

- لااا هي حجتلي ليش قبلت تزوجني كالت عدهه مشكله ويه عمهه ورادت تسد بابهه
وتتزوج تخلص من هذيج سالفته

-اهااااا يعني هسه انه توقعي بمكانه !!
شفت مو كلتلك هاي وراهه شي
هيج نماذج متعودات على عيشه اخذ وانطيك
ماكو بس انطيك وكلشي ماستفاد منك

- لااا خويه لااا
المره بكل شي زينه وياي

-اييييه ادري بيهه زينه وياك وويه الاهل وخلف الله عليهه مداريتهم وشايلتهم بعينهه
بس جاي اكلك ديربالك منهه ضل مفتح عينك عليهه لا كلش تأمن وتروح تنغدر وتطلع بالتالي ماشيه الماي من جواك وانته مغمض

- لا إن شاءالله ماكو شي

-انه لان اخاف عليكم احجي واتدخل وانه كل مره اكول بعد اسكت مادخل نفسي شيصير بيهم خلي يصير بس من اشوفك كلبي يوجعني عليك وماكدر الا احجيلك عسى وان تفتح عينك على ناسك

خويه شايف هاي النسوان كيدهن كيد
وانته شفت هذنيج شسون وشعملن من مصايب بالبيت وهاي مو  وحده فطيره
وفقيرونه وتكعد على كيف الرجال واهله تعيش وتسكت
هاي مامتعلمه هيج تعيش وتخدم ناس مالهم بيهه صله ولا مصلحه
لاازم اكو وراهه شي مخليهه ساكته وياك وطايعتك من ذاااااك اليوم لهاليوم
ولا تكلي حب وسوالف مدري شني
الناس عقول مو مشاعر

- اي خويه صح حجيك ناس كلهه مصالح
وتخوف عشرة الغريب بهالوكت
بس الشاهد الله هي زينه ومابدر منهه كل سوء

- اييي چا انه هسه كايلك مو زينه !
جاي اكلك هي ليش هيج زينه ؟؟ روح شوف شمستفاده منك ومن اهلك وضاله وياكم زينه

چا اكو مره هسه تنطي وتجيب وتنكل لبيت غربه عنهه وعايشه وياهم الضيم نفسه
وتكعد كلشي متحمله وهي تكدر تروح هسه تعيش احسن عيشه
تكدر تسافر وتروح لاحسن دوله تعيش وفلوسهه الذبتهه عليكم تروح تشبع بيهه
ونسه هناك بالخارج
بس ليش عافت كل هذا وجلبت بيكم ؟؟
اخذهه بالعقل خويه

- هي رادت توب وتنصلح وانه كلتلهه تعوف كلشي وتعيش من جديد

- وهي كبل كالتلك سمعًا و طاعه!!

- لاا بس اقتنعت بعدين وصدك انصلحت
بعد كلشي عافت وانه شاهد على كل زين بيهه
واحد يحجي حك الله

- ادرررري بس ماكو ثقه هالايام خويه
لتنسى احنه اكثثثر ناااس تأذينع من ثقتنا بالغير

شفت اخوتك شصار بيهم من ثقتهم بنسوانهم وهنه بنات عوايل ودين وحشمه وتالي كسرن وجوهنه

زين هاي شلون تطلع ؟؟؟ اذا هذنيج المتربيات على ايد عمامك طلعن الساتر الله منهن هاي شتطلع وهي مربيها غريب ماينعرف اصله من فصله والشارع طابع بصمته باخلاقهه شلون تأمن لزمانك وياهه!!!

صفنت بحجيه ودك تلفوني .. ريري تتصل
رفضتهه ودزيتلهه رساله ( هسه ارجع )
وسديته ..
حسنين حط ايده على جتفي وكالي...

- لا تصير مثل اخوتك مطفي وتضيع عمرك هيج .. عقول النسوان اكبر من حد تفكيرنه
ويودن الرجال بمصيبه يودنه

هسه انته لا تزعل وتاخذ بخاطرك من حجيي
بس روح جرب بنفسك اندك بيهه وشوف اصلهه وغايتهه وياك
واذا طلعت صدك تريد بس تعيش وياك عيشه زينه ومابيهه مصلحه لو ضامه فد مصيبه مسويتهه بهذاك وكتهه
بعد الله الغافر والله الساتر عليهه
والله يهنيكم

- الله كريم خويه الله كريم
من رخصتك ارجع لبيتي تأخر الوكت

- عود مرلنه بعد اخوك لا تكطع بينه

طلعت اتمشى لبيتي ورجعت اتذكر اول ايامي وياهه .. صدك نقطه التغيير بيهه صارت فجأه !! بس هي تحبني وزينه وياي بكل شي
ممعقوله تطلع ناويتلها نيه جايده وياي !!!!

طبيت للغرفه وشفتهه متمدده ومخليه ماعون
عنب احمر على بطنهه وتاكل وتباوع بالتلفون ...
كبل كلتلي ...

- هااا حويدر تعوفني وتكابل ابن عمك تسهر وياه !! ليش انته مشتاقلي لو مشتاقله ؟
منو مرتك اني لو هوه !!!

- بويه چا غير رجال صار هواي ماشايفه
وجلب بيه بعد اخذتنه السوالف

نزعت ملابسي ودورت على جنطتي مالكيتهه يم الكنتور جنت مخليهه.. كبل صحت عليهه..

- ويييين وديتي الجنطه ليش تلعبين بيهه بكيفج انه مخليهه هنااا وين شلتيهه

-شبييك حيداار يعني وين اوديهه غير فرغت غراضك وسفطتهه وخليتهه بالمجر

- وغراااضي وين !!!

- كل شي بمكانه .. ليش عصبي! كولي شتريد هسه اطلعلك

- كومي طلعيلي الدوا شكو تضميه
خليه هناااا ع الميز كدام عيني

كامت وطلعته من الثلاجه وخلته بايدي
صحت عليهه..
- جيبي الماي من يمج لو كل شي الا احجيه الج يلا تتحركين

انطتني البطل وانه اخذت الحبوب شربتهه
وباوعت عليهه تباوعلي وعينهه خلتني ارتبك
كبل طلعت فتحت باب السطح وكعدت على الدرج ....

شويه واجتي يمي ضلت مخليه ايدهه على شعري.. وخرتهه وكلتلهه..
- روحي نامي انه اعصابي تعبانه واريد اضل وحدي

- ليش تعب نفسك وحدك هيج حبيبي
امشي نام بحضني مو ترتاح بي ؟ ممشتاقله ؟

- بعدين ريري بعدين انه من وحدي اجيج
روحي هسه عوفيني

عافتني وراحت ... ضليت اريد اهدي اعصابي صاير بكل شي اتوتر وتتعب نفسيتي
ومااطيق احد بعد ..

ضليت كاعد وحدي هيج الى ان اخذ الدوا مفعوله بيه وقفلت نعست يلا طبيت جوه
وكبل حطيت راسي ونمت ...

حسيت عليهه تكعدني الصبح ..
باوعت بوجهه وجريتهه حضنتهه...
- احبج ولج

ضحكت وضلت تبوس بوجهي ونزلنه تريكنا سوه واجاني عزيز شاورني...

- اكلك خويه شوكت ترجع لبغداد

- فد اسبوع ليش؟

- اريد اروح وياك عندي شغله شتكول اروح من هسه لو انتظر نروح سوه

- اذا شغلتك مستعجلة روح خويه هاي سياره كدامك اخذهه وروح كمل شغلتك ليش تتعطل وياي

ضل يحك بلحيته وبعدين كالي ..
- شتكول انته هذيج تقبل بيه لا ؟؟

-ياهي !

- الصيدلانية

-بعدك تفكر بيها!!!

- جدحت بكلبي وانه اخوك
هيج مره ماشايف لك بووووويه شلون ضحكه مخدخده عدهه

- ههههه خويه صدك تحجي !! هاي اذا طلعت متزوجه عدهه جهال تره مبينه جبيره مو مال بعدهه مامزوجه

- مالابسه حلقه بس كلت احاجيهه اشوف شنو وضعهه

- هااه !! يعني ناوي النيه عليهه ! رايدهه زواج !

-اييي والله
خويه چا هو العمر مره لو مرتين !!

- هااه هيج تقبل بيهه سافره وعدهه شغل ممعقول تعوف الصيدليه وتكعد وياك هنا !

- شتعوف خويه ليش تعوف ! خليهه تشتغل هسه هو ياهو الجاي ومحصل شغل صيدلاني !
واذا على الحجاب سهله مو فد مشكله عود احجبهه

- والله خويه تستاهل المره الحلوه والمعدله هيج مثلهه شهاده وجمال وترتيب بس كون
تطلع عيشتهه تناسبك
الله يوفقك خويه اخذ السياره وروح من هسه
تفاهم وياهه ليش تضل تفكر للبعيد وبعدين تنصدم بيهه .. من هسه فض السالفه

-ايي اروح احاجيهه احسن

كبل راح صعد وانه طلعت غسلتله السياره
واجتني ريري تسألني اذا اريد اطلع لمكان
وكعدت احجيلهه سالفه عزيز ..
كلتلي ...

- ولك حويدر وصي اخوك لا يصير فاهي وكبل يكوللهه خلي نتعرف مثل هذوله الزعاطيط
كوله خلي يحجي بثكل شويه يجمعله حجي مال عمو نزار مو يضل مصفن بوجهه

- هههه والله شلون يدبرهه مادري
الله يعينه

نزل هو متكشخ ومحدد لحيته و كعدت اوصي
يضبط حجي مال ثكال ويخابرني يحجيلي
ردهه ..
وهو شغل سياره وطلع ...

ضليت كل اليوم انتظر بي ..اخابره وهو يكلي بعد ماحجيت ماكو مجال ..
و لليل هو ضال هناك .. خابرني بالعشره ونص بالليل كالي ....

- خويه لك صيده صدتهه

-هااا بشر ! شكالت شكلتلهه ؟؟

- مطلقه هاي بعد اخوك وماعدهه جهال

- علييك علي !  ايييي شلون حجيت وياك

- هو انه ضليت مكابل الصيدليه من الظهر لليل اباوعلهه وتباوعلي .. وياهم ولد جوه استحيت اروح احجي كدامهم .. عاد ضليت انتظرهه بره والله طلعو وقفلو الصيدليه
وانه وكفت يمهه كلتلهه بس دقيقتين نحجي
وقبلت هي

عاد وكفنه على جهه وكلتلهه .. اذا مزوجه كليلي حتى مااعطلج ولا احرجج
كلتلي لا ممزوجه
عاد اخوك هنا انطلق بعد باب وانفتحلي
جبت كل الحجي المعدل مدري منين طلع وياي بس والله خوش بي فايده

-هههههههههه هم طلعت نجر
شكلتلهه الله عليك

- يعني .. عرفتهه على نفسي وكلتلهه صار فتره من شفتج ودخلتي عقلي وجنت حاير شلون احاجيج بس الله سهلهه وقنعج توكفين وياي تحجين

عاد هي كلتلي تره مطلقه كلتلهه ميخالف انه هم ارمل وعندي جهال بس هي من سمعت بيهه جهال شو عقجت الوجه
انطيتهه رقمي وكلتلهه رديلي خبر ونحجي براحتنه بالتلفون احسن

- خاف متقبل هسه تكلك انه عندي شغلي وعيشتي على شنو اكعد اربي جهال مو الي !

-ايي هم صدك .. مادري بعد يم الله
بس خويه تكتل كتل وعلي هذا اثول الطلكهه

- هههه ديربالك خويه الجمال خداع
اشتريلك نفس تصونك احسن

- ماكو احد يصون خويه كلنه بينه لوله
بس واحد خلي يعيش يكابل هيج وجوه تفتح نفس للعيشه وهو كلمن ونصيبه بالعشره

- اي الله كريم
يلا خويه ننتظرك توصل بالسلامه

سديته وكعدت اكل ويه ريري حب وكرزات
ودك تلفوني.. باوعت هذا حسنين ..
جاوبته وكالي انتظرك بالباب ...
نزلتله سلمت عليه وكالي خلي نتمشى
ضوجه ملينه من كعده البيت ..

ضلينه نتمشى وهو حجالي ..
- الحجيه تريدني اتزوج تريد مره تعاونهه بالبيت وتكلي مره تداري جهالك احسن مايضلون من بيت لبيت

-اي خويه تزوج جا احنه من زمان كايلين
اخذلك مره هذا العمر يمشي والعيشه تحتاج ماتوكف على احد

-ايي بس انه مالكى مثل اختك الله يرحمها
هذيج صدك نعم الزوجه جانت ومن راحت بعد ماشوف تجي مثلهه
بشرفهه وعفتهه ورزانتهه وين احصل هيج وحده ! ماكو هالوكت كلهن وجهين

- والله هي صح شغله بعد تخوف بس انته أسعى والله ييسرلك الي بي الخير

-لاااا ماريد خليني هيج مرتاح البال مااضل افكر عليهه واشك بكل شي تسوي
انه چا ليش لهسه ماتزوجت ؟. غير اخاف انغدر من النسوان لو يسولي بليه بيتي

- والله احس بيك وفاهمك كلش زين
انه مثلك هيج ماعندي ثقه بيهن وكلهن يخوفن صراحه كلهن ماينرادن

- هااا جنك اخذت بحجيي وصرت تفكر مو تمشي عمياوي

- لااا مرتي وحد هاي صريحه بكل شي
الزين والموزين تحجيه علمود هيج انه اختاريتهه مره الي

- انه اكول ضل مفتح عيونك عليهه
ولو انته كاضيهه بره البيت وعايش على حجي التلفون بس هم انتبه

- انته بالك شي خويه احجي فهمني
جاي احسك تريد تفهمني شي ومستحي تكوله

- والله هي مو شغله مستحى بس ماريد اخسرك
انته كلش حساس بسالفتهه وكبل تزعل مني
وانه ماريد اخسرك على سوالف النسوان
فاسكت احسن

- لااا كول شعندك كوول مازعل منك بس خلي افهم بالك عليه شنو!!

-اسمع خويه انه مو جاي اهجم بيتك واخرب راحتك بس اكو شغلات لازم واحد يفتح عينه عليهه مو صحيح !!

انته رجال خير واهلك كلهم ناس طيبه ومسالمه وقدر الله ووكعتو بايد مره مو من ثوبكم

- اييي خويييه هاي سالفه شجم مره حجينه بيهه هسه انه جاي اكلك اعرفهه ومقتنع بيهه
وهي زينه وياي بعد شكو

- ماعليه اشكال
زينه وياك ومداريتك ومداريه اهلك
ومواقفهه ع الراس نحطهه

بس انه شغله بالي محيرتني وادعي من الله تطلع جذب صدكني ادعي من الله بحك امير المؤمنين اطلع ااانه غلطان وماعندي فهم ولا علم .. كون من الله هيح واطلع انه اظن سوء بالناس واكسب اثم ولاااا تطلع سالفه الي بالي صحيحه

- شكو بالك !

- على الحمل انه اريد اسألك انته شعجب بساع هيج تشافيت !

— غير تعالجت !!! چا انه شجم شهر اروح دكاتره

- زين مو انه سامع كل دورة علاج بالعقم عند الرجال تاخذلهه سنه وتبدا ترجع طبيعي
الامور وبعدين يلااااا تبدا منشطات الانجاب ينطوهه للمريض
انته شجم شهر تعالجت ؟؟

- تره انه هم اكثر من سنه بس جان هذاك الدكتور علاجه مو شي مقارنة بهذا اخر واحد هو على علاجه صار عدها الحمل

- اي خوش يعني انته من رحتله جانت شويه حالتك احسن من كبل

- اي .. لا والله مادري بالضبط لان تحاليل نسبهه قليله وكل مره تطلع شكل مادري شكد جان تقييم الحاله بالمضبوط

- يعني هسه نفرض فرضاً انته من رحت لدكتورك الجديد جنت صفر وهو بدا يعالجك من الصفر شكد وبينت النتيجه وياك ؟

- يمكن تسع شهور او اقل ماتذكر بالضبط شويه هالايام تعبان مو كلش اركز

- سبحان الله ايده عليك معجزه

-انته شبيييك شتقصد  !!!

- قصدي فتح عينك خويه فتح عينك لا تاخذك مشاعر الابوه وتصدك نفسك كبل هيج وانته علاجك ماكملته بعد

- لاااا تجفص بحجيك حسنين جاي تشكك بمرتي ومااارضاهه انه المره اعرفهه شنو ومأمن بيهه ماتخون

- كيفك خويه امن بكيفك مرتك وانته حُر وياهه بس انه العليه احجي وابري ذمتي منك
واذا هم تاخذ بخاطرك مني بعد لو اشوف شوف عيني هم اسكت كلشي ماحجيلك

.
.
.
يتبع 💕

اتمنى منكم تحضرون بث يوم الجمعه
ويه حبيبة الكل (ام ايه )
بكروب ( قصص مريم السعدي )
الساعه الثامنه مساءً

اعرفو بي عني كل الي بالكم واسألو عن القصص كلهه بكيفكم بس لا تكلولي
( ماء مغلي نهايه سعيده لو لا )
رجااااااءاً والله ماعرف اجاوب هنا وماريد ادوخكم

خلوهه هي قريبه النهايه وافهموها
وراح اطلب منكم طلب بوكتهه بس ضروري اذا تحبون القصه تنفذوه
وهو طلب كلش بسيط

💕💕💕