رواية ماء مغلي الفصل الرابع عشر 14 - بقلم Zoka 🌷

..♣️🩸 ماء مغلي 🩸♣️..
* adzzon *

اخذتهه جوه بالكليدور وكفنه جان تكلي ..
- ولك حويدر ليش محاجيلي على سهاد

نبتت حجايتهه مثل سلايه بنص بلعومي
وضليت صافن بوجهه ...

- هااا مبين الحجي عليهه صدك
شجاااك اصفريت

- شعرفج بيهه ريرييي

- ههههه ولك هو اني شغلتي اعرف المضموم ..تصعب عليه هاااي !

- شحجولج عليهه !منو جاب طاريهه !

- نسوان خوالك عيوني

- استغفررر الله روحي جوه بعدين نحجيي
طبي بعد لتطلعين هيج وحدج

راحت جوه وانه طلعت اتوضى بس كملت وضوء طلعت بالشارع ..

ضليت واكف واخذ نفس براحتي هنا
احس جوه كلهه بالهه هالسالفه تدور

كلهم يذكروهه بعيونهم ..
رجعت طبيت وصليت وضليت كاعد ويه خوالي وولدهم وخالي الصغير اخذنا نتعشى بيته ...

بس تعشينه كلتلهم يلا نرجع ..
وكبل اخذتهم ورجعت للبيت ...
كل الطريق وانه مخنوك .. جانت جيتي غلط بهالوكت ...

وصلنه للبيت وكعدنا ويه ابويه تطمنت على صحته وعفت ريري يمه وصعدت سبحت وضليت متمدد بس مانايم ...

اجتي ريري تبدل وانه مغمض اريد انام بس ماكدر ....
نزلت ورجعت اجتي وبس تخابر بناتها
وجلبهه وتالي يلا كعدت يمي وشالت الغطى من وجهي ...

- كوم احاجيك ادري بيك منايم
- بس اريد انام
- بعدييين خليي نحجييي

انداريت عليهه وكلتلهه..
- احجي شعندج

- خلي اكولك شحجيت شسويت لو متريد تعرف

- احجي يلا شسويتي

- تره اني كعدت عاقله حبابه شفت خوالك هيج نمطهم وصرت مثلهم
وها سفطت شويه جذبات على اهلي المادري وينهم لان همه يريدون يعزموهم ويتعرفون عليهم كلتلهم مسافرين بايران اووكييي
خاف يصير حجي جذب مثلي هيج

- زين زين

- وهااا سألوني شعجب ماحبلتي لهسه
عبالك الحباله بجيبي ضامتهه وممطلعتهه الهم
ياحضي

كلتلهم حدورتي ميريد طفل هسه يكول بعد وكت خلي نستقر

- شنستقر ولج !

- شمدريني هيج طلعت وياي

- ايي وبعد

- لك ماكتلني وشعلن ابو ابووويه الا بهالسهادو عزااااا بعينهن شكد نباشات دفاتر عتك

- عوفي سالفتهه انسيهه
خلي نام

- ويييين نايم من هسه جنك دجاج المصلحه
دوكف دنحجي

- سديهه لسالفه سهاد ونحجي بعد

-لاااا هو شعدنا غير سالفتهه
ليش ولك ماحجيتلي عليهه غير تنطيني خبر لو تخليني مثل الثوله بينهن يتمضحكن عليه بسالفتهه واني ماعرف شلزك حجي واطمطمهه

- نسيت

- لاااااا مو نسيت كول اخاف احجي بيهه

-ريررررري

- اييي شكو مجذبه !! بس تسمع بطاريهه تنخلس مدري شبينك وبينهه

- كاااافي عوفيهه

- حيدااار شكو هيج خايف شبيك دفهمننني
يااااا دحجي ولك

- مخايف شبييييج لزكتي

- لعد متحجييي
زين ليش يكولن عليك متتزوج بعمرك ومتفاجئين من زواجنه !!!

وفوكاهه يستهزأن يكوللي ..
عجيبه شلون اخذج وجان حيدر قافل ميتزوج خلاااص

- عوفيهن حجي نسوان هذا ميهم

- لاااا يهم ونصصص بلكي طلعت سهاد اله ايد بسالفتكم ! غير افتهم !!!

كعدت وضليت افرك براسي وهي تدخن ..
-شبيهه شمسويتلك وهيج تفز بطاريهه
خاف تحبهه وعافتك ؟

- ياااحب انتييي والله بطرانه

- لعددد شنو دحجي مو بطيت كلبي فضني عاد

- ماريد احجي عوفيهه كتلج طاريهه انسي
انتي كلتيهه دفاتر عتك شكو هم تنبشين بيهه

- وشدعواااك هيج يمه
متحجي وتفضهه غير اعرف كلشي

عفتهه ونزلت جوه بالهول ضليت متمدد
واتذكر هذيج الايام ويرجع بيه الحقد والوجع نفسه ...

ماكدرت اغفى بس افكر وجان اسمع باب المطبخ تنفتح .. كمت رحت اباوع من شباك الهول واشوف سيف واكف يم السياره ويتلفت

كبل سديت البرده وضليت واكف شويه وفتحتهه واشوفه يفتح بسركي الباب مال شارع .. وطلع وعافهه مفتوحه ..

رحت للمطبخ وكبل طلعت وراه ..
اشوفه يمشي علكيفه بالشارع وحده بنص هالليل وراح من فرع لفرع وانه بيني وبينه مسافه بعيده بس اباوعله من بعيد وامشي نفس طريقه ..

وصل يم بيت ابو الحصه وضل خاتل يم سياجهم .. وانه واكف بعيد وعقلي راح يوكف عليه شجابه هنااا !!!!

ضليت بحدود ربع ساعه انا واكف بس انتظر بي يتحرك يروح لمكان وهو على نفس كعدته يم السياج ..

جان تطلع مره مبوشه من بيت بنفس الفرع هذا .. وتمشي سريع راحت على الفرع الثاني
وسيف لحكهه ...

ركضت وراهم اريد الحك بيهم وبين ماوصلت الفرع همه اختفو اثنينهم

ضليت افتر بالفرع وادور على سيف وماكو لا هو ولا المره هاي ...

رجعت يم بيت ابو الحصه واتذكر يابيت طلعت منه هالمره ؟؟.
اتمشى واتلفت على البيوت وتالي فرزنته
وحفظته ..

ضليت واكف براس هذا الفرع وانتظر رجعتهه ...

اروح واجي بالشارع وانتظر وماكو هي
وتلفوني مااخذته حتى اشوف ساعه شكد صارت !

اخابر على ريري تشوفلي سيف رجع لا !؟

ضليت مشتول بالشارع الى ان صار صوت الحسينيه يعلى بالقران ... هي هنا رجعت
لبيتهه ...

وسيف ماكو !!!

ضليت افتر بالفروع وادور سيف وين ؟؟
وصارت الصلاه وطلع الضوا ومالكيته !!

رجعت للبيت متسوووودن من الشفته
وركض اركض حتى امشي اصيح اخوتي وندوره ...

وصلت البيت واشوف الباب مسدوده ومسركايه ..

عرفته رجع بس منين رجع ! ووين راااح !
وشطلعه بهالليل؟؟؟

تشلبخت على السياج وعبرت للبيت
والبوب مقفله ضليت كاعد بالحديقه
وافور اعصاب ...

انه بدون شي شايطه اعصابي والنوب هذااا
صرت ناار .. وبس انتظر واحد يكعد يفتح الباب حتى اروح اسحله من فراشه وافهم شسالفته ..

انفتحت باب الهول واجتني ريري
شايله دشداشتهه واجتني هداده ..
- وييينك ولك الليل كله ادور عليك وين طلعت !!!
شوكت اجيت
من شوكت تسوي شي من ورايه ولك حويدر

- رييرررررري

- هااااااااااا

- سيف شفتي ؟

- سيف ! لاا وين اشوفه !
شبي !

- امشي وياي

- ولك شكووو دفهمني

طبيت جوه وكبل صعدت لغرفته فتحت الباب
و رحت على جربايته شفته نايم ومتلفلف بالغطى ..

ريري تجر بايدي واانه اكعد بي ..
وهو ميقبل يباوعلي بكلي نعسان ويصيح عوفني نعسان ..

اجتي امه وضلت تسال

-  شكو خيركم .. شعدكم ويه ابني   من الصبح
- بعد اخوج لا تدخلين
- ياا خويه على بختك غير افهم شبيك ويه الولد
شمسوي ولك سيف اكعد حاجي عمك

كعد سيف وضل يباوعلنه وعادل هم وكف يسأل شكو ..

انه عيني بعين سيف مخنزر عليه وهو وجهه اصفر ..

كلتله ..
- سيف وين

كبل جر ايدي ويكلي ..
- اي عمي اي ادري نسيت

جريت نفس وكعدت يمه .. عادل ضل يسال شكو كلتله ..
- ضميت يمه شغله وهسه محتاجهه اريدهه
موصي من بارحه عليهه وناسي يجيبهه
روحو شكو صافنين علينه شبيكم !!

طلعو ابوه وامه وطلعت ريري هم وضليت وياه ..

اباوعله وهو مدنك راسه ..
كلتله ..
- كووم امشي وياي فوك يلا تحررك

جريت ايده وكومته واخذته وياي فوك
سديت الباب وضليت واكف وياه ..

- سيف وين جنت !!
لاااااتجذب  بحرررف واحد ترره شفت كلششي
وييين وليت بنص الليل جنك حرامي تتختل بالدرابين !!

ضل يفتر بالغرفه وساكت ..
جريته ولويت ايده ...
-اسسسسمع ولك وروح اخوتييي اذا ماااحجيت هسه انززل اكول لابوك وانه ويياه انجنزك تنجز
وجذذذبننني لووو تكدر وكتهه

- عميي ماسويت شي والله

- شنوووو ماسوووويت شي وووولك وييين وليت انه كتلللك سويت شي !!! جاااي اكلك شطلعك بالليل شوداااك لهذاك البيت
انته تدري كلش زين ااانه جنت وراك وراااك
بعددد تغشم نفسسسك لييييش !!!

- ماعندي شي عمي صدكننني

حصرته على الحايط وضربت راسه بي
وضليت عاصر راسه هيج واكله ..
- سيييف لاااااتخليننني اذيك احجججي شعنددك من فاينه تسويهه وراااانه
ولك مااابينه حييل هبطااات احجيييي

متورطلك بشي كوووول اساعدك بس لتضل تتختل هيج وتطلع بنص الليل تهبط كلوبنا

لك انتتته تدري خليتني اتسودن وااانه ادورك بكل فررررع ومالكاك !!!
اجيت اركض للبيت حتى اخذ ابوووك وادورك ولك كلت شو شصاير وياااه وهذا ولد يجوز. مرافكله ولد حرام ومتورط بشي

ولك لاااتسووودني احجيييي شعندك تتختل وطالع بهااااليل

- عمممي عوووفني مااعيدها بعد والله ماطلع

- احجييييي ولك لاااا تخلينيي الم عليك البيت وافضحك احجججيييي شطلعععععك

ضل يبجي وانه عاصر راسه على الحايط
استخطيته .. وعفته ..

طلعت بطل ماي وانطيته يشرب ماقبل
عاد فتحت البطل ودرته على راسه
وكلتله ..

- يلااا اصحى زيييين واكعد سولفلي شعنددك

كعد على الجربايه ويمسح بوجهه وكالي ..
- عمي  انته تصدك بيه ؟

- اصدك بيك جا غير ابنه انته شلون اجذبك

- يعني تثق بيه ؟ لو هم تحسبني مخبل !

كعدت يمه وضلت عيني بعينه .. كلتله ..
- ااانه احسبك اعقل واحد باخوتك وبكل ولدنا
ماتشوفني تسودنت بطلعتك لان ادري بيك عاقل مو طايش استغربت سالفتك وخفت عليك بعد عمك انه غير من خوفي عليك احجي واصيح جا هينه عليه لساعني ارجف اعصاب خايف عليك لا صارلك شي وماتلاحكتلك

ضل يبجي ويمسح بعيونه .. جريت راسه حضنته واسكت بي .. والنوب تندمت
هيج تصرفت وياه .. هبطته من الصبح

بوست راسه وكلتله ..
- ولك سيوف لا تكسر كلبي هيج ولك
انه عمك حزام ظهرك وصاحبك كلي احجيلي شنو مشكلتك خلي افتهم سالفتك
وقسم بالله ماحجيهه لا لابوك ولا امك ولا اجيب طاريهه ابد
بس خلي افهم شبيك

- عمي اانه والله ماجذب عليك بس انه
عندي سر

- اي شنو سرك !

- انه هم مثل عمتي الله يرحمها اشوف هاي المريه بالبيت

- صددددك تحجي !!!

- اي والله اشوفهه كم مررره

-وين تشوفه وشوكت !!

- اشوفهه بالليل تصعد على الدرج وتجي هنا وتطلع للسطح

- هنااااا يم غرفتتتيييي تجي !

-اييي بس متسوي شي بس تمشي وتروح للسطح

- ايييي وهاي شوكت اخر مره شفتها!

- كبل ماتتزوج باسبوع

- زين هي هم شافتك ! هم صرتو وجه بوجه !

- لااا انه ماخليهه تحس عليه

- دخيلك ياالله
زين هاي شدخلهه بطلعتك بالليل

- مو هاي انه
ااا عمي عليك علي لا تحجي لاحد من اهلي

-والله ماحجيلهم بس فهمني

- انه بالليل مانام اخاف هاي تجي وماحس عليهه ..
اضل كااااعد مانام ابد
ومره سمعت باب المطبخ انفتحت انته تعرف صوت سركيها عالي وينسمع بالليل وانه سمعته وكبل نزلت بس ما شفت احد
بس شفت باب الشارع هم مفتوحه 

- اييي ماعرفت منو الطلع !

- لااا لحد هسه ماعرفت منو يطلع بس
هاي المره الشفتهه بالليل هاي تجي لبيتنه
هيج وكت بالليل وتذب علاليك بالحاويه مالتنه بالباب وتروح

- زين انته شعرفك تذب علاليك هنا !

- مو انه مراقبها جانت تجي وياهه وحده ثانيه
هو انه ليش رحت عليهه بالليل اريد اندل هاي الثانيه وين بيتهه !؟

لان كل مره تجي وياهه وبس اطلع وراهن تختفي ماندلها وين

-استغفففر الله ربيييي واتوووب اليييه
اييي ليش ماتكول من البدايه واحد يحط عينه على هالنااااس وبلاويهم ليش تخاطر بروحك

- عمي احجيلك شي بس مو تزعل مني

- ايي شنوو كول

- انه ماامن باحد منكم
كلللللكم ماامن بيكم

- ليييش ولك شمسويلك احنه !

- عمي انه كل يوميه اشوفلي واحد عنده اسرار
وكلكم تخوفون

- حتى ااانه !

- اييي انته هم مو جنت ادور بالبيت كل يوميه من يطلع ابويه وعمي عزيز وهم تتختل

-ههههههههههههه ولك اااانه الخايف من البيت مااخوف ولك

- هااا عمي
هم مثلي انته !

- اييي ايييي
سالفتنه وحده ولك سيوف

- صدددك عمي !!! يعني هم شايف هاي المره وتدورهه !

-ااانه ماشايفهه بس من سالفه اختي ضلت بالي هي
اكلك فهمني هاااي المره التجي للبيت
كل شكد تجي هنا ويا ساعه ؟

- مو سوه مرات كل يومين مرات كل اسبوع او عشرين يوم

- شلون تعرفها اجتي ؟؟

- انه اضل اراقب من الشباك واشوفهه تجي
بالليل كل شويه اباوع من الشباك مانام

- سيوف هااي شغله تخوف بعد عمك
وانته بعدك صغير عوفهه لا تتاذه
لا تضل تطلع وتخاطر هيج بعد اذا شفتك طالع يصير وياك غير حجيي فهمممت

- لاا عمي ماطلع بعد والله

- اييي عندك شي تجي تكلي واانه اتصرف
من تشوف شي او تسمع حجايه منا منا تعال كلي لا تضل ساكت

- بس عمي هذا يضل بيناتنه سر مو تكول لابويه

- لاااوالله ماكووول ولك مو حلفت بعد ماكول

- زين عمي اكلك شي بعد

-اي شنو

- هااي المره تجينه خطار العصريه ووياهه نسوان

- شمدريك هي نفسهه هاي هنه كلهن مبوشات شلون تعرفها !

- اعرفها عمي حافظهه ماغلط بيهه

- زين زين اانه اتصرف بهالموضوع انته روح نام وشيل هالسالفه من بالك بعد لتضل تفكر بيهه وتخاف زين !

راح وانه خابرت ريري تصعدلي ..
اجتي وكعدت احجيله الصار كله جان تكلي ..

- ومنو كال هذا يحجي صدك ؟
- شنو شبيج يعني هذا مو كله ندري بي احنه
- اييي حتى لوو
بس اني من خبرتي تعلمت ماثق بهيج شكولات تكت الاول والتالي باول عيطه
- يعني شنو !!
- يعني ضل عينك عليه هذا وراه ضميمه
مو مسكين مثل ماحجالك
يجوز هو هيج سوه حتى يكسبك ويغطي على سالفته ؟؟
او حتى لو حجى الصدك اكو بعد شي مضموم لااان هو من كااالك هاي المره تجي لبيتنه ماكالك ويااامن تكعد !!!

ماذكر امه وحنفيش بأااااي شييي
ولا كالك هاي العلاليك شنو بيهه
لان ممعقول مافتحهن وشاف شبيهن مابيهن !

مو صح حجي لو لااا

- اييي صحيح

- اييي وانته ابو كلب الرهيف كبل صدكته
ولك انته شكول واحد يستوجب

جااان انطيته الي وانخله الك نخلللل

- مادري جان حجيه مقنع ونسيت كل هالتفاصيل بعد
مادري شلون راحت من بالي اسأله ويامن تكعد وشلون رجعت للبيت !!!
وشوكت جان يطلع وراهه !!

- وشلووووووون ماااخااااف من شاف هذيج المره الطنطل الكالت عليهه اختك الجنيه
مدري شنو
مو هو بعده ولد هالكداته شلون ميخاف !

هسه اني لو تطلع كدامي انخرط خرط مو عاد جويهل هالكده يفرفر وراهه ينتظرهه !!!
شبيييك بابه وين جااان عقلك !!
شلون تصدك بيييي ولك حويدر خربت الاول والتالي بهاي سوايتك

ضليت اعصر براسي واستغفر ربي
كلتلهه..
- لج مادري شلون نسيت والله مااادري

- من اكولك شكووو. ليش ماحجي ؟؟
جايبني اتصفن على طولك غير هاي شغلتي
غير تحجيلي ششفت وين جنت !!!
من اعصابك شووف ضيعناه من ايدينه
بعد راح يضل يسفط جذب عليك وياخذ حذره حتى متلكطه

اووووف ياكلبييي اوووووف
ولك ليييش هيييييج حركت دمييي ولك حويدر امداااك على هالدكه الطايح حظهه

- ايييييي كاااافي ريري مابيه حيلللج وعلي راسي مسطوووور وكاره روووحي من بارحه لليوم
عوفيني انااام امشي انزلي

- راااح انزل بس دخلي اسألك بعد متحجي بساعتهه الا اعوفك وامشي وضل حير بروحك

نزلت وضليت انه متمدد وافكر شجاني نسيت ؟ انه جنت اريد اسأله شنساني ؟
زين هسه انه شفتهمت من طلعته شسوه ؟
شلون عفته يروح هيج ومافتهم كلشي ؟

ضليت الوم بروحي لان تسرعت وياه
وهذا مراهق وخياله واسع شمدريني شنو الصدك من حجيه وشنو الجذب !!!

انفتحت الباب واجتي ريري شايله صينيه
وكلتلي ..
- لااانوم لااا اكل شبيك تخبلت هاليومين
تريدني ابتلي بيك غير تشد حيلك ورانه شغل
لو تكضيهه متمدد وخاويه روحك ياحويدر
كوم اكل يلاا اكو واحد يضل لهسه على عشه البارحه !!!
ويكول ضعيف من القهر هو انته حاط لكمه بحلكك رايح مصوي صوي وتجي بعدين امك تحجي عليه مدارين ابنيييي ممملوووووص كاتتتتله الضيم والجووووع مايلحك على العيشه

تحجي تحجي  و تخوط بكلاص الحليب
وتسوي لفه كيمر ومربى وتخليهه بايدي وانه بس اباوعلهه واضحك على تعابير وجهه
وحلكهه هذا الي كل كلمتين لايفته بجهه

ضليت اكل وهي تكلي ..
- اسمع حويدر سكته ماااسكتلك اوووكييي
ترجع تصحصح وشيل كل هالسوالف مال يومين هذني من بالك اوووكييي دتفهمنيي

اريدك مركز وياااي ماضل حايره بمشاعرك الجياشه

اوووكييييييي حويدرررر

-اوووكي عيني اوووكييي

- زين يلا كولي شسوي غدا علمني يلا

- اوووف ياقسمتي اووف

- ديلااااا احجيييي لتعبني

- سويلنه مركه ريري مشتهي مركه ولج ماحس نفسي ماكل بدون مركه

- اييي شمعرفني شلون تصير هاي
شسوي احط معجون وشنو

- ياااامعجوون ووولج

- اييي لعد شلون تصير حمررره

- حطي وجهج ههههههههه

- شكد سفييييه ياااحظظظييي
دحجيي عاااد

- سويلنه فاصوليا وخلي امي توكف وياج ريري اشرحهه الج شغله تعبج وتعبني

- وتريدني افشل نفسي كدام امك ماعرف اطبخ فاصوليا!!
دحجي هسه هي شنو نتكولي هي مركه
اجيبهن واخبطهن ويفورن واصبهن وفضت وراحت

- اذا بيج خير وهيج نجره كومي سويهه
يلا

-اوووكييييي دصبر وشوف شلوون اطبخهه الاا اعجبببك

راحت وانه كملت اكل وخليت صينيه بالكاع ونمت ..

كعدتني على الغدا نزلت بغرفه اهلي كعدت واباوع للصينيه وين الفاصوليا؟؟؟

اباوع لريري وهي تكلي...
- خليت لمستي بيهه شوف صارت احلى

- لج هاي مركه ورديه لج شخليتي بيهه

- مخليت شي هو بس خبطتهن

- شخبطتي ولج !

- هسه دككككل شكد تنكنك مو زين طبختلك

- ماريد شبعان

- اككككل احسن مااهلهل هسه اكل يلا لعد المن سويت

- ماااريدددد

-للاااااا تررريد غصبا عليك تاكلهه
ولك لاتفشلني فوك متعلمني وهم تفشلني اكعد احسنلك حويدر

كعدت وامي هم كعدت تباوع للصينيه
وتباوعلي ..
المركه عباره عن فتافيت فاصوليا طايفه بمي  وردي ... كلتلهه ..

- بس فهميني شلون صارت ورديه المركه !

- شمدريني هي صارت

- شلون طبختيهه فهميني

- جبت الفاصوليا غسلتهه وخليتهه بالجدر تفور لمده ٢٠ دقيقه مثل ماشفت بالفيديو
وبعدين اخذتهه هرستهه بكل حيلي حتى تصير ثخينه زين عيننيي

-اييي عيني والوردي منين اجه !!

- دسمع
مو اني مطلعتهه من الجدر كله فوكه فوكه
هرستهه وجبت المعجون كالو لتكثرون
وماكثرت بطرررف الخاشوكه خليت
وهااا خليت سماك كلت خطيه عمتتي وعمي شلون ياكلوهه فاهيه لا حموضه لا شي
وكلت يلا سماك ميأثر على ابو ضغط
وخليت وفارت فاااارت ضجت اني وطفيتهه

- سمااك ريري
بالفاصوليا سماك!! ولج ليش هيج

- هاااا وخليت بصل اخضر ثرمته نااااعم

- بس احنه نخلي ثوم
واذا ردنا بصل مو اخضضضضر العادي نثرم ريررري

- ايييي هسه شمدريني اني بعد سويت

باوعت لامي تاكل خضورات وتضحك
وابويه كام يسألهه ..
- بعد عمج شطابختلنه اليوم
شو هاي حامضه سماكي الاكله

رادت تحجي وانه سبقتهه وكلتله ..
- حجي هاي اكله جديده مال ضغط اكل اكل على مسؤليتي

ضلن هي وامي يضحكن وانه كلت خلي اضوك بله ..
بس ضكتهه للمركه كبل جريت وراهه كلاص ماي ..

- ووولج حااااامضه شبيييييج يمعوووده
لخاطر الله انتبهييي

- اييي معرفت شكد اخلي
شو اضوك وبعدهه فاهيه جبت القوطيه باقي بيه ربع وذبيتهه كلهه
غير دتصير نكهه لعد شناكل

- غضب الله عليج يا ريري
شنتغدا هسه فهميني !!!

- اكل تمن شسويلك اووي كلشي ميعجبك
- وهذا منو سواه انتي !

- اييي بمساعده عمتووو فدوه لقلبببهه اموواح حبيبتي انتتتيييي

باوعت لامي بس تضحك وساكته ..
كلتلهه...
- يمممه مادامج سويتي التمن ماعلمتيهه بالمركه

- ماسويت هي طبخته انه بس علمتهه
ولو ادري هيج معرفتهه داجه بالطبخ الا اوكف يم ايدها واعلمهه جيله جيله تحط

باوعت لريري ..
- هاذ تمنج ! شو مبين زين !

-اييي غير امشي حسب تعليمات

- ماصدك مضبوط

- اكل وشوف

اكلت بطرف الخاشوكه وهذا مااالح والملح بعده يكرط بي وهو عجيين على حاله بالحلك يصير ..
جريت كلاص ثاني مااي وكلتلهه..

- ريري رحمه لذاك العزيز لا تطبخين بعد
خاف انه الي نفس اكل كبل انتي هسه لعبتي نفسسي
ولج الملح شمسويه بي هيج يكرط

- اوووي يعني شسوووي غير طلعت فاااهي
وبعدين رشيت ملح فوك التمن وجبته شسوي يعني تره دوختني

- ولج هووو هييييييج ريررررري

- ماااطبخ بعددد احسسسن متسوي واااهس
وبعدين انته تعرفني داتعلم شكو تعتب عليه

حسيتهه راح تنفجر من وجهه الحومر
وسكتت لاتروح تجفص بحجايه كدام اهلي

تالي كلتلهه ..

-بس هو زين خوش تمن بس لو تقللين ملح يصير توب

- اي بعد انتبه

- والمركه هم شويه اكعدي ويه امي تعلمج زين عليهه
امي خوش نفسهه بالطبخ يخبل تعلمي منهه

-اووووكييييي

ضلينه ناكل بس خضورات وخبز وهي الاكل كله شالته وذبته .. شفتهه مطنكره ومقهوره
وهي تغسل مواعين ..

ضليت واكف يمهه واشاقيهه وهي قفلت بعد طنكرت ..
حتى متضحك ... بس خلصت مواعين كبل صعدت ..

رحت وراهه .. وشفتهه منبطحه كدام التبريد
كلتلهه..
- شبيج ولج شو طنكرتي

- ايي عوفني ضجت

- لااااه ليييش ليييش

- حيداااار تره دافشل نفسي بالطبخ متخلصني منه اني اكره افشل هيج كدام اهلك

- ريرررري غير انتي هسه چنه البيت لازم تعرفين تطبخين وشويه شويه تتعلمين

-اووووووف طكت روووحي ماااريد اتعلم

- يلاا كيفج ضلي هيج ونكضيهه دايت

- ايييي احسسسن

لفت راسهه ودارت ظهرها الي ..
انه بدلت واخذت حاسبتي وتلفوني جاي اطلع جان تصيح ...
- ووووييييييين
- اسم الله الستار شجااج
- وين رايح
- للمحل يعني ويييين !!!
- ديلااااا روح

طلعت وانه اضحك هاي سوويج حرام اذا صاحيه ...

هناك العصر خابرتني ..
- هاا عيني كولي

- ولك حويدر اريد تروح للسوك
- خيررر

-اريد بقدونوس

- شنوووه !!

- بقدووونوووس يلا جيبلي وتعال داسوي عشه

- شنو بقدونوس شنو عشه مو كلتي متطبخين

-اييي عجبني اطبخ شتعرف بمزاجي بالطخات

- وهذا شلونه احمر اصفر البقدونوس

- لك بابه مثل الهذا اليثرموه

- وهو شنوو هذا اليثرموه !!! فهميني عدل

- حيدداااار هسه لو اعرفه البقدونوس شنو
جان خابرتك !! جان اني دزيت منا
روح شوفه شنو وجيبلي وتعال يلاا

- لا اله الا الله
بويه احد كلج ااانه چنه البيت
ولج شعرفني شنو بقدونوووس عينييي

- هذا اليخلوه ويه اللحم من يسون حشوه
شبيك متعرفه

- اعرفه كرفسسسس

- لاااااا بقدونوس همه كالو هيج نوعه ديلاااا لتعبني فضني عااد يلا داسوي عجين ومالي خلكك يلا استعجل يلا چاااو

سدت الخط وضليت انه ادك على راسي
ربي شمسوي بحياتي وهيج قسمتي !!

فتحت الكوكل وكتبت بقدونوس جان يطلعلي اسمه بقدونسسس وهو المعدنوس
كبل خابرتهه ..

- هااا جبته

- من نعلى على دمااغج لج معدنوس هذا معدنوسس

- الدور معدنوس ؟ شنو هذا هم اخضر ؟

- ربييييي
لج ريري هو اسمه عدنا معدنوس افهمي خضورات هااي مثل كرفس

- هاا ديلااا اي صدك هو مو كتلك مثل الخضورات لو ماكتلك ؟

- بروح ابوج عوفي الطبخ عمي ااانه اعتذر لان خليتج تطبخين والحسين ماعيدهه بعد

- لااااا ولك غير داسويلك شكل اكله الاااا تعجببب

- ريرري ارحميني ممتغدي تره

- ايييي فوك ماتعبانه ومكسور ظهري واطبخلك بهالحر انسمط ابو ابويه
تاكل وتسكت فهمتتت
يلا روح جيب هذا معدونوس وتعال

- الفظي عدل ولج سودنتيني ريررري وتالي وياج

- اكووولك
جيب هذا شيسمونه

- شنوووو ياربييي

- صدر مال دجاج بس مثروم داسوي لاهلك هيج مثل الكباب وااني دزيت لحم جابولي يعني لتجيبلنه اووكييي

- اوكي عيني اوكي اجيب اجيب

- داكولك لتجيبلنه بس الهم

-اييييي مو كلت اووكيي يعني ااييي فهمت هاي كافي عوفيني روحي

سديت الخط وبوجهي طلعت للسوك
اخذت باكه المعدنوس واباوعلهه واكول
ولج شسويتي بيهه !!!

رجعت للبيت انطيتهه العلاكه ورحت للمحل اكمل شغلي ...
تالي رجعت بالليل ..
وجابت ريري العشه ..
واشوف فد شي مثلث جوزي
اباوعلهه تضحك وتكلي ..
-هااا شلونهه الاكله

- هي شني

- سمبوسه بالخضار واللحم
اكل يلا اكل

اكلت وجانت زينه يعني دبرتهه ..
كلتلهه ..
-طيبه عاشت ايدج

-اييي اخيررررراااااا ولك لعبت فلك انييييي اليوووم
دشوووف اهلك سويتلهم بيتزااااا

- انهجم بيتج وبيت البيتزاا اذا صدك

- ههههيييييييي لك استعنت بالكوينااات

- منو هذني !

- عزااا بعينك متعرفهن

- كرايبنه ؟

- هههيييييييي لك انته فد نووووب مطفييي وطابك على صفحححححه

- هسه منووو احجي

- لك هذني بنااات كروب كووووين شبييك
متعرفه بالفيس

- ماسامع بي

- امددددا حظييي لك انته من ياكوكب حويدر
لك ربيتلي عله
شلووون بيك شلوووون

- هسسه شعرفني بكروبات البنااات
مااادري

- ديلاااا بعد احسن
بس خوش سولي فزززعه
كله صوره وصوت ع الخاص وطبختلكم عيونييي بعد شتريدووون من ريرررريييي هديتو حيلهه

- هههههههه انعم الله عليج عينييي
ضلي فزعيهن كل يوميه وشبعينه اكلات

- ايييي اكو وحده تكفلتني خوش ام بيت حووك راح شتطبخ تدزلي فيديو واسوي مثلهه

- يالله يااالله فرجت

تعشينه وشربنا جاي .. ردت اصعد وكلتلهه يلا امشي ماقبلت تجي ..
عفتهه تسولف ويه امي وصعدت ..
نمت بعدني معوز نوم ..
وكعدت بنص الليل على صوت ضحكهه يم راسي وهي تخابر ..
تعاركنه وتكلي بنات بنااات سمعتني صوتهن وكملت حجي ..

مشت هالايام وريري مبدعه بالطبخ بس تنفش المطبخ وتضل تجلف وتدعي عليه لان ورطتهه بهالزواج ..

صارت الجمعه وجان عندي شغل بالكاميرات
وناوي فلوسهن اجمعهن واشتري لبيتنه بعد ماترهم لازم اراقب سيف ...

رحت كملت شغلي ورجعت للبيت شفت سيارات بابنه ..
طبيت للهول جان اشوف خالي الجبير هنا
وخالي الوسطاني وولدهم ..

تفاجات بجيتهم واحنه كبل كم يوم يمهم ..!

طبيت جوه ورحت اغسل واصيح لريري تجيبلي ملابس حتى اسبح فد نوب مدامني جوه ..

جان تجيني ريري تتبختر بمشيتهه
ولابسه دراعه سوده ومذهبه ..
ومطنطشه ذهب وخاطه الكحل والحمر
والرموووش شطولهه ..

ضليت صافن عليهه وكلتلهه ..
- احد عرس هنا !
- اييييي

- شنو ايييي شكو احجي شعندج

- احننه حبيبيي

- حبيبي شنو !

- اسمع ولك حويدر تصير حبيبي هسه لا اصخم يومك
تره مخططه خطه اني وابليس واذا فركشتهه اهجم البيت على راسك اوكيييي

- ريري بس علكيفج وياي تره مسموط بالحر الظهريه كلهه بس فهميني شعندج احجيلي وحده وحده

ضلت تلعب باصابعهه واساورهه وتكلي ..
- مو انته اكو ناس غاثتك

- منو !

- اكووو لو لااااا

-اي هواي همه

- اييي وانييي جبتهم لبيتك وراح اغثهههم
وتددللل رجليييي حياااتتتتشييييييي

- احججي عدل بلا نعوصه خلي افهم منو هنا

- ههههيييي سووووسه المنحوسه
سهوووود بنت خالك الدكتوره ام خشم اليابس الوصخه ام الكمل ام لسان الخيسه الطويله الجايفه الهجمت حياتك وحياه الخلفك جبتهه سححححل وراح ادمغ عليه هنااا وارجع هيبتتتك اوووكيييييي حوووووبيييييي 

.
.
يتبببع