رواية ماء مغلي الفصل الثالث عشر 13 - بقلم Zoka 🌷

..♣️🩸 ماء مغلي 🩸♣️..

*Adzzon*
جريت منها التلفون وهي تجره من ايدي وانه احس جسمي يلهب اعصاب .. جان الشاشه مسدوده وصوت ولد يصيح
الوو اسده لو لا ...
كمشت ايدهه حيل عصرتهه وانه اكللهه
- افتحييي
- شجاااك انته تخبلتت !!!
- افتحييييي عاد
- جيب افتحه هسه خايفه اني لو مستحيه جيب

فتحت البصمه وجريته منهه شفت ولد كاعد ينركل وضل يباوعلي وكال
- ها شكو تباوع منو انته

صاحت هي عليه وكالت ...
- حبزبز روح هسه بعدين اخابرك ديربالك على كوني واذا تعوفه بالحر اسمط اهلك ولك عوفه جوه يم البروده

- صار ست تامرين امر

شمرت التفون على الفراش وضليت افرك بوجهي وايدي ترجف اعصاب .. ضليت افتر باغرفه واكللهه..

- منووو هذاااا

- حبزبز هذا الطلي مالتي

- لجج تضحكييين عليه انتيييي !!

- اييي شبيك داكولك طلييي طليي هذاا

- ياااطلي ولج رجال شكبره شكده كاعده تكهكين وياه بنص الليل ومصلخه وبغرفتتتي !!!

- حيدااار لتسوييهه سالفه بابه شبيك يارجال تحجي عليه لك هذا طلي اني ساحلته حرام تحسبه من الرياجيل

- استغفررر اللله ربييي واتوب اليييه

- هسه شكو ضايج شسويت اني !

- يالله ياااالله .. تكلييي شسويييت لج صاااحيه انتييييي ريريييي صاحييه كليلييي اذا عقلج شطح بالشرب فهميننننيي

- لااا وروح ابويه صاحيه اصلا ماشربت شي اليوم لان مخلصه ماعندي بعد شي اشربه وجنت محضرتلك عركه من تجي علمود هالشي بس انته سبقتي حرامات

- ريري ياغضب شوكت تكومين تحترمين زواجنه وتفهميييين هسه انتتتي متزوووووجه وعلى ذمه رجااال مو مثل كبل تخيطين وتخربطين بكيفج .. يعني اعوفح ساعتين وارجع الكاج مصلخه وعينك عينك تحجين ويه ولد ولاتنكسر عينج ولج شنووووووووو انتي من بشششششر

- هيييييييي لاتصيييح ولك لاتاخذلك خاوه عليه هسه .. انييي ماكاعده اكووود وياااه اوكييي دا احجي ويه جلوبي كووووني
كانيووور يعني متعرفه شكد احبببه

- وتتصلخين حتى تحاجين جلبج !

- ايييي متصلخه ماخذه راحتي وانته ماكوو
ومسموطه بالحر الغرفه مبوخه تسمط سمط
واتصلخ بكيفييي عركت واريد انام براحتي بعد شكووو تصيح

- سدي الكاميرا وتصلخيييي بكيفج مو كاعده تورين جسمج اله وبحجه اشوف جلبييي

لفت الجرجف على صدرها زين وتربعت بكعدتها وصارت تكلي ..

- اسمع ولك حويدر
اني لاااا خايفه منك ولا مستحيه

لو اريد اخابر واگووود متمنعني انته
ولا توكف بعيني فهمتتت

انيي من اسوي الشي اسووويه بمزاااجي
اوووووكييييييييي

مليون مره كلتلك مزاااجي هو اليحكمني
مو قوانينك

وهذا واحد طلي ودثو اني ساحلته صار سنين
حتى ماحسبه رجال لك هذا واحد مغنث
لتشوف لحيته وعبالك زلمه واووو تره بالقندره دايسته وساحلته سحله الطليان اكفخ بي

وبعدين واذا هسه طالعه زنودي وركبتي شكو بيهه ؟ شنو اول مره يشوفني هيج !

- هااااااا يعني مكضيه عمرج مصلخه يمه والله شنو هذا طلي !

- لااااا ولك انته كل ماتشوفني لو بنطرون لو  بجامه
شايفني انته من اسهر ؟!
جاي وياي لحفله !
ماشايفني هناك فلتكعد تسفط حجي بكيفك
اوووكييي

اني هناك متعوده اروح مشلحه من فوك
فيعني مو جديده عليه يشوف زنودي

- اذا انتي مرخصه نفسج هيج انه اتعب نفسي بالحجي وياج ليش !

عفتهه ونزلت للحمام غسلت وبعده منظرهه بعيني ملعب نفسي منهه ..
مادري شلون كمشت اعصابي ويااااهه
وماتوليتهه دك ضرب

ماتحملت اشوفهه بعد نزلت جوه بالهول
تمددت على القنفه وضليت مغمض
راسي مسطور من بلاوي اليوم وهاي تجي تكملهه عليه ..
معاشرلي كواده شتوقع منها يعني !!

ضليت اضحك على نفسي شكو احاسبهه على شغلات الشرف وهي بايعته بفلسين !

ضلت تخابرني ع الفيس ومارد عليهه
صارت تراسلني..

- شنو وين رحت شبيك
متصعد بعد ؟.
ولك حويدر شو كلبت خلقتك عليه هسه شسويت انيي ياااا
شكو تشوف ومتجاوب تبيع ثكل عليه ولك
حويدر شبيك
تره طكت روحي تحجي لو لا

دزيتلهه ..

- مااحجي شتسوين يعني ؟

- ليش يمه متحجي

- كارهج عوفيني

- وشكو تكرهني شسوووويت

-لاااا معصومه انتي متسوين شي غلط

- تره جنت احجي ويه كوووني حبيبي هوووو بسسسس اوووكيييي

- يلا ماشي

- لتضل كالب خلقتك هيج

- 👍🏼

- حويدر اصعد دافتهم شصار مصار وياك

- اريد انام

- شوووو بعدك مطنكر
داكولك حجيت ويه كانيووووريييي حبيبي
هووو
يعني مو تعرفني اشتاقله شلووون غير احاجيه واشوفه فدوه لوجهه اروح شكد مشتاقتله
متقدر فراكنااااا اني وحبيبي صعععب ومأذي كلبيي

- مانعج تشوفيه !

- لاا بس اطنكر

- ريري شوكت تفهميني وتريحين بالي وعلي تعبت من سوالفج

- ديلااا هسه بعد ماتصلخ اووكيييي

- يعني تضلين تحجين ويه هالطلي

- لعد شلون احجي ويه جلبي ! غير هو بتلفونه شبيك بابه شغل عقلك القافل
شو هم صفنت !!!
تصعد لو لاااا فضني عاد

- راح انام

- 🙌🙌🙌🙌

سديت التلفون وضليت مغمض اريد انام
جان سمعت صوت رساله ع الفيس
باوعت دازه فيديو ..
فتحته جان تطلع هي مشغله اغنيه وتغني وياهه بحركه كلب تكول ...

* ناااامت عليج سليمه شلون تنااامين
وانااا استناج ع الموعد للساعه اثنييين
مابعددد اريدج يووولي ولولا تموتين
لا لا تحلفييين بالمصحف مااالج غفران

سليمه كون نامت عليك ياحويدر يابن خضير
هههههيييييي ولك جو يفوتك تعال اصعد

خررررب اكعد فهمني شصخمت هناك وولي نام تره طكت مرارتي من وره طنكرتك

تعال بداعه الطليان لااا لا شويه يضوجوك طلياني تعال بداعت الخوه يلاااا مابينه خوه ولك اصعد لا اجي اخذك سحل تعااال احسنلك يلااا انتظرك *

ضليت اضحك والله هالمره ماينعرف مزاجها ولا ينفهم ...
ااانه هنا مخنوك منهه وهي كاعده تغني وتركص وحدهه فوك !! نياااالي على هالمره اي والله نيااالي ...

ضليت اريد انام ماكدرت بس احوص وافكر شدتسوي فوك وحدهه ؟ هم رجعت تخابر ؟
اكيد جاي تخابر لان مراسلتني بعد
اروحلهه خاف هم بس احرك باعصابي ؟؟
اضل هنا مانام ادري بنفسي !!!

كمت صعدتلهه .. وشفتهه مفردشه شكو غرض الهه بالميز وكاعده تعزل ..
ماحجيت وياهه شي وكبل رحت تمددت
جان تجي تكعد يمي وتكرص برجلي وتكول..

- حرااام كرصه مابيك اووي عظااام عظااام شبييك ياحضي كووني اسمن منك

- لتلحين مالي خلكج

- ديلاااا ع أساس اني شلوون ميته ع الحجي وياك

- جا شكو تحجين متروحين منا

- ايييي هسه اروح متشوف عندي شغل
بس كولي صخيم شكالك شسويتو

- باجر ريري تعبان مابيه حيل احجي

- شنووو باجر !! هم تكعد مطنكر واضل اجر الحجايه من حلكك جر احجي هسه ونام يلا

- كلتلج مابيه

- اووووف اووووف
نااام من نامت عليك سليمه وعفونتها

انطيتهه ظهري وضلت هي تعزل بغراضها
شويه وجان تكلي..
- تره هذا طلي تعود عليه وياي
لا كل يوميه تنطكر من تشوفني اخابره
ماكدر اعوفه هذا كل شغلي هو يسويه

- شمنطيته من شغل ؟

- يشمشم اخبار ويدير باله على كانيور
و الخدامه مالتي هو
اي شغله اريدهه للبيت او مسواك تصليح
سياره او تعزيل هو يسويهه كلشي يسوي حتى المجاري اخابره يجي يفتحهه
هذا هو حارس بيت البنات واكو وياه واحد ثاني بس هذاك مو مثله اعتمد عليه
هذا خوش شاغول ونغل يعرف سوالفهن
اليوم كله اني وياه نتراسل تره

-هاااا بيهه الخير ان شاءالله

- انته شكو دتضوج يعني ؟ لو لان مالك خلك هيج طنكرت

- ريري اليضوجني انتي متفهميه ولاتكدرين عليه

-ادرييييي انته تدور شرفيات وتريدني زوجه مصون وعفيفه الك بعد عيني
بس هذا شغلي ومن البدايه حجيتلك يابه تره اني هيج وهيييج عيشتي

ماجذبت عليك وهسه كمت اطلع خيستي
وتتفاجىء بيه

اني من اول حجايتين وياك خرطتلك الاكو والماكو.

كلتلك هذاا شغلي ويه ولد مااااكووود وياهم انييييي اووووكيييي داشوف شغلي

اخبار وعلوم وفلوس هي هاي كل الي نحجيه
اووووكيييي

- لااااا موو اوووكييييي ريري
اسمعي ولج لاتضغطين عليه اكثر تره روحي طافره من عيشتي لا تزيدين عليه بسوالفج

- يعني شترررريددددد فضني كول

- تحترمين وجودج وياااي مو مكرن كاعدلج هنااا افهممممي هالشي

انه رجال مو مثل التعرفيهم هذول الطليان التسحليهم

انتي متزوجه رجاااال مو كررررن وتريدين اشوفج مصلخه وتخابرين واكعد اصفكلج

عندج حجي وياهم راسلي وافهمي منهم شغلج
تريدين تشوفين جلبج تخابررررين لوو كدامي لوووو تتحشمين من تخاااابرين

كعده السخافه هاااي الكاعدتهه مره الثانيه اذا شفتهه والله وقسم بالله اكسر التلفون على راسج

كلشي انطيتج حريتج لتستغلين هالشي واحترمي وجودي وياااج مثل مامحترمج احترمي لاتضلين معلكمه ريكي كل يوميه
تره البيه كافيني

ضلت تعض بشفتهه وتباوعلي تالي كالت ..
- اييي ديلا فهمت
بس تره
- اشششش عاد كافي لتلحين
فهمتي كلامي وخلص بعد سدي الموضوع
كملي شغلج يلا خلي نام لتضلين اطركعين

ضليت مغطي وجهي وهي تعزل ..
تالي عاد طفت الضوا واجتي تمددت
انطيتهه ظهري ونمت ...

كعدت الصبح ومالكيتهه يمي .. نزلت غسلت وتوضيت صعدت اريد اصلي واخذت السجاده فرشته وجان اشوف ايد انمدت بالكاع
جفلت جفله يابويه .. نسيت حتى الصلاه
ورحت يم جهه المبرده واشوف ريري منبطحه بالكاع وفاتحه رجليها ١٨٠
وخاولي مبلل مخليته على وجهه
ومشمره ايدهه كل وحده بجهه ..

ضليت واكف بس اضحك عليهه وكفت اريد اصلي والضحكه متفاركني اريد اكمل السوره عدل مارهمت .. رجعت عدت الصلاه من جديد وضليت كاعد اسبح واباوع لايدهه الطالعه شويه من طرف الجربايه

صارت ساعه سته ونص رحت كعدتهه
جان ترفع راسهه وتباوعلي وكالت ..
- من انسمطت عشيرتك ياحويدر مثل ماسمطتني بهالغرفه

- وااااحد يصبح يكول يالله انتي تبدين بالفشار

- اااااخ ااخ شجااابني للضيم مو جنت مدللـه

كامت اخذت ملابسهه وجرت العبايه حطتهه على جتوفهه ونزلت تسبح وانه كاعد انتظر بيهه حتى ننزل سويه ...

من اجتي كبل كالتلي ..
- ماتجيبلنه سبلت ولك اكو واحد يحط مبرده بالطابق الثالث وبعز الصييييف

- خلي يصير عندي شجم فلس واجيب

- شووووكت يمه تهل عليك الفلوووس
من نصير دجاج مهلس ومصلوخ
ولك حويدر اآب هذاااا آآب اللهاب نكضيه بمبرده تكفخنا كفخ بالهوا الحااار من السطح

- رريييييررررري كتلج صبررر

- مااااصبرر ولك امووووت امووووت يمه
عزاااا انصلخت هالايام غير اني ساكته مالحك اتعارك وياك عليهه

بس البارحه انته نايم واني شبعتك مسبه حركت ساس عشيرتك

ولك الووووب والدور طلع الصبح وطفففففت الكهرباااء انحممممسسست وينن اروح وين انطي وجهههيييي ولك

- ياااابووووويه ولج همزين انتي مو مرتي صدك جان انتحرت وعلييي ماتحملج

- ولك حويدر تتحملني لحد مااولي لبيتي
وتجيبلي سببببللللللتتتتت كنتووورررري
اريد ابربرع هوا باااارد ولك اذا اضل هيج بعد جسمي يطكك من الحرر

- وعليييي لو مالسلفه اجيبلج من باجر
بس انطيني صبررر رحمه لاهلج

- ااانييي انطيك شكد ماتريد بس روح جيب

- ماااريد تنطيني اريد تصبريلي

-ماااصبر ولك حااره شينومني بعد بهالحرر
انطيك هسه بطاقتي روح اسحب ٣ ملايين
وسويلنه خط ذهبي وجيب سبلت كنتوري
كون يثلج ثلج اريده واذا بقى منهن خليهن بجيبك ماريدهن واذا عوزت اسحبلك بعد شكد متريد بس خلصني

ضليت صافن عليهه وهي تمشط
كلتلهه..
-من كل عقلج اخذ منج فلوس حرام واتلفس بيهه

- ديلااااا ياالسيييد انطيك غير بطاقه مال حلال يلاا بس فضنننييي

- منينلج ثانيه؟

-كووولشششي عندي عيوووني
تريد مال حلال عندي
مال حرام هم عندددي
تريد كاااش هم عندي بكيفك بس كول شتريد
وانطيك

- يعني منين تجيبين فلوس الحلال

-عندي راتب ابويه مال حلال

- تضحكين عليه انتتتي ولج

-يااااا داكولك مال ابويه تقاعد شبيك مو حلال التقاعد لو عندكم حرام يالساده

- وشيشتغل ابوج ؟

-معليك بي .. هسه تريد لو لااا فضني عاد

- لاا خليهن الج كلشي ماريد منج
وامشي خلي ننزل نتريك

عفتهه تأفف وتلبس حجابهه ونزلت قبلهه
سمعتهه قفلت الباب ونزلت وراي ..

صبحنا على اهلي واخذت ابويه يغسل واحاجيه بعده يرد بثكل وياي وميباوعلي

سويت الريوك وياهه وكعدنا ناكل وبعدين خابرني واحد من جماعتي طهور ابنه اليوم
وعازمنه على الغدا ...

عفت ريري تنظف وكعدت بغرفتي اكمل شغل البارحه  بالحاسبه وبالاحدعش ونص
كمت بدلت ونزلت صحتهه وهي كبل كالت ..

- وييبن طالع

- صاحبي طهور ابنه اليوم وعازمني ع الغدا وجماعتي ينتظرون بالباب

- وين هذا بيته صاحبك

- وين يعني اذا دليتج تعرفين؟ شمعرفج بمناطق النجف انتي

-ايييي ع الاقل اعرف اسم المكان بعيد قريب

- معليج بجماعتي عيني اجيت اكلج دبري نفسج بالغدا ويه اهلي زييين

- يااااا صدددك ولك شلون شسوي

- دبريهه معليه بعد داريتج هواي
يلا راح اطلع

-ولك حويدر اوكف ولك ماعرف اسوي غدا

- طلعي من النت وتعلمي

- ولللك مادبررررهه حيداااار لاتروح اووكف ماااعرف اطبخ ولك لاتفشلننني

عفتهه وانه اضحك وهي نكلبت حمره
شغلت السياره وطلعت لراس الشارع
اخذت الولد ورحنا للعزيمه ..

مناك كبل رحت للمحل وللساعه سته جان تخابرني ريري ..

- هااا رجلي المحترم شلووونك

- هلووو

- لاتسأل لاتكوول بذاات

- هنه ساعتين عفتج بيهن شكو اسال عليج

- ههههههيييييي مووو انته لووو مخابر وتسال عليه جان عرفت شسووويت ماسويت

- هاا مصيبه ثانيه عندج !

- اييي اكووولك عيووني
انطيت رقمك لسميعان

-سميعان منو ولج!

- هذا هم واحد من طلياني وجاي بالطريق
جايبلي السبلت

- شنووووووه

- يمكن بعده هسه راح يفوت للنجف
راح ادزلك رقمه هم وخابره شو هو مديحصلك عود دليه زين

-ريررري شصخمتتتي ولج لييش هيج
مو كتلج اصبري اجيبلج

-ماااصبر عيوني حرر هذا حررر انصلخ منا لما تجيبلي لييش يعني
اني عندي فلوس واشتري لنفسي
وهاااا لتكولي حرام وحلال اوووكييي
تره مدافع شي من جيبك اني دفعت واني جبت والحرام عليه مو عليك اوووكييي
انته بس دليه العنوان بالضبط وهو وياه واحد يشده يعني كولشي مضبطه لتحير ابببد

- فلللك فلللك انتي ولج عفتج نص نهار
اشتريتي وجبتي وضبطتي ولج لو اعوفج يومين شتسووووييين

- اهجم بيت الخلفك حبيييي مالي امان ااانييي
وبعدين هو بس ورقت واجاني السبلت يركض يامسهلها عندييي
يلااا راح ادلك رقم اسميع خابره

- راح اكله يرجعه ماريده
يمعوده لتورطيني هيج

- اورطك شنووو ولك هسه جايبتلك
كحبه هو سبلت

- هههه ريري بعلي ماترهم خلي يرجعه انه اجيب والله

- عيوني هسه شكو ضايج
عود من ارجع لبيتي اخذه وياي حتى فلوس ماريد منك بس عوفني خلي اتبرررد مو انسمطت سمممط

- يلااا يلااااا هاذ هوووه ماشي دزي الرقم دزي

-اي عفيه بحدورررتييي عفيه اليوم نتختخ بالبروده هههههخخخخخخ

- بلكت الله ويتعدل مزاجج وتكعدين بهداوه وياي

- هسه تشوفني شلون اصيرلك وررررد
يلا دزيتلك الرقم روح خابره

سديت منهه وخابرت الولد ودليته العنوان مضبوط ورجعت للمحل كملت شغلي
ومن خابرني الولد راح يوصل ترخصت من الولد وطلعت للبيت انتظره ..

شفتهه شلون تضحك وتباوعلي وانه كلتلهم يسون طريق حتى يصعدون الولد يشدوه

و ضليت وياهم فوك كملو شده ونزلنه
دزتلي رساله كاتبه..
- لا تنطيهم فلس واحد تره كلشي واصل حسابه

كبل سلمو وراحو وطبيت انه لغرفه ابويه
سلمت على اهلي وكعدت يم ريري ..
شاورتهه..
- هااا سويتيهه وسويتيهه ولا عبالك احجي وياج

- بمزاااجي عيوني اسمع كلامك بمزاجي
والمايعجبني اتصرف بكيفي اووكييي

- شكد لوتيه انتي
رحتي ضبطتي كلشي وخليتيني كدام الامر الواقع من وصلو يلا تكليلي

- هاي مو لواته عيوني هاي تكتيك اووكيي
اللواته بعدك ماشايفهه عندي

- هههههه كومي سويلنه عشه يلااا

- اتخليني احجي حجايه هسه افزز اهلك بيهه

- ههههههههه ريري حتى لو بيضه بس كومي

- ماااكوم مو كلتلي  يومين عشاج عليه يلاا اطلبك يوم واني سوووووووييييت الغداااا
عليك العشه

- اهوووووووو رجعنننننه

- دصبر هسه خلي اشحت طنطول وافرغلك المطبخ

- ماااريد اكعدي لا تسويلي مصيبه الثاني
وعلي حجيج البارحه كل ماذكره اخجل من روحي

-اوووي وشحجيت اني هي سوالف متزوجين قابل شكلت

- اوف اووف
راح اجيب فلافل من راس الشارع احسن

- اييييي ديلاااا كووووم شمنتظر

- اوكفي اكلج
شسويتي غدا !

- هههههخخخخخخخ متصدددددك اذا اكولك

- شكلج مضبطتلح سالفه مامتفشله

- انيييي اتفشل مو بالحيييف
رحت ضبطت ويه ابن اخوك كرفش
وانطيته فلوس وراح على مؤمل ابن السيد المصخم وكاله عمتي ريري تريد سمج شوي
ودزتلك خمسه كروه

- هههههههه خرررب بعرضججج

- ههههه راحو جابولي سمجه مالحه وسمجه فاهيه واكلت المالحه اني وبنات اخوك
والفاهيه لاهلك وكعدت وسكتتتتت

- ذييييييبه وعلي

- دمشي جيبلنه الفلافل وجيب حب وياك نكرز تعلوله

اخذت الدوا مال اهلي اجيبلهم عليه ورحت جبت الفلافل والدوا واجيت .. اهلي عشاهم فواكه .. وانه وريري ناكل لفات ..

صعدنا فوك هي نظفت الغرفه وانه اطلع الكراتين بالسطح .. رتبنا الغرفه وكعدنا
ضليت احجيلهه على البارحه الحجيناه بيت ابو سعد .. ضلت صافنه وبايدهه جكارتهه
جان تكلي ..

- دافكر افوت لغرفهن اشوف هم اكو مثل هالعظام جوه جربايتهن

- شيوديج عليههههننن بويييه لاتورطينه

- لك مو اني بحثت عن عظام الهدهد
طلع اكو يستخدموهه للسيطره على رجال
خلي اشوفهن مسوياتهه لااا
حتى اذا لكينه منهن هناك بعد تثبت تهمه عليهن واضل كل فرصه افوت ادعفس بغراضهن ماحب اضل كاعده وساكته
اريد انبش هنا وهنا

- ادرري خوش خطوه هاي بس شلوون
خاف يشوفونا يمعوده

- اني افوت وانته راقبلي
باجر الصبح من ينزلن يسون ريوك كبل نجفت لغرفهم
اوووكييي

- الله كريم

ضليت اشتغل بحاسبتي وهي تراسل
وجان ادغني برجلهه وكبل دفرتهه وجضيت بيهه ..
- احجييي بلسانج لدغين ولج
-ههههههه ولك داكولك راح اخابر حبزبز
ديكول كووني مدياكول ضايج
- تعالي يمي هنا وخابري
- يلا خلي اشوفك كووني حبيبي

كعدت يمي وخابرت .. ضليت اباوع وياهه بالتلفون وهي تحجي ويه جلبهه وهذاك بس يعوي ويطخ وجهه بالشاشه ... وهي تكله ..

- شبيييي جلوووبييي
ليش مياكووول الحلووو
ولك يامصخم خاف مضوجه لكانيور
كوووول شمسويله ولك

- ست اكثر من هيج دلال بعد شسويله
حتى فراشي منطي اله شتردين مني بعد

- لااا خاف مضوجه ادري بيك اثول
اكيد عايفه بالحر مايعه روحه

- موو كلساع ادزلج صورته كاعد هنا بالبروده ماطلعته الظهريه كلهه هو هنا
للعصر يلا اخذته يتمشى شويه ورجعنه

- لعد خاف مو خوش نوعيه لحم جايبله
خاف وصخ تره هو مياكول الا نظيف ومغسول

- هااا ماغسلته كبل حطيتله بالماعون

- دنعععل شرفك غير تغسسسله
وكفت كلبي عليييه وطلعت انته الاثول المطفي اكو واحد يحط لحم ميغسله
امشي كوم اغسله زييييين وغير الماعون وحطله ياااااكوول يلااااا لتضل مصفن بوجهي

- يلا ست صار

- اسمع ولك صخيم حطله عظمه وحده وهبره لحم لا تكثر تره مياكول هيج يضوج يضل بس يلعب بيهن ويعوفهن

- صار ست تأمرين امر

- يلااا چاااو

سدته وضلت تباوعلي ..
- شفت هالطلي شلون اثول ميعرف يداري كوووني ومتعبه سوووده عليه حبيبي كلبي موجررر نار علييييه

- ههههه جلبج مدلل حيييل نازوكي

- هذا ربيته من هو لحمه هالكداته
ومتعلم على نظام بس يتغير يضل مطنكر
اكولك راح انزل اسبح شو ممرتاحه اريد انام على البروده واني جسمي نظييييف واشبع راااحه

- روحي بس انتبهي على نفسج دنيا ليل
لا تفزين

- يمممه صدددك تعال ويااااي

-ابتليييت وحجيت عمي روحي جذب اضحك عليج

- ماااااا عوفك الاا تنزل توكفلي بالباب صار عليه شي طلعلي جني منا منا وين اولي ولك
امشي ويااي يلا

نزلت وياهه وضليت كاعد انتظرهه تسبح
وافكر بخطه باجر .. لحد واطلعت وصعدنا
كبل نشفت شعرهه وضلت تتعطر واجتي نامت ...

انه ضليت سهران اكمل شغل بالحاسبه
وبعدين نمت ... كعدتني هي من الصبح
بين ماصليت ونزلنه تريكنا همه نزلو ..
اخواني كلمن طلع لشغله وضلن هنه بالمطبخ

بسكوت صعدنا فوك وضلينه نراقب
منو يصعد ومنو ينزل لحد ماشفنه الجهال كلهه نزلت بس سيف ماطلع من الغرفه
ضليت واكف يم غرفه سيف وهي راحت لغرفه عزيز ...

بسرعه طلعت وراحت لغرفه عادل
واجتني جان يطلع سيف وانه وياهه واحد يباوع للثاني جفلنه ...

هو محجى شي بس ضل مخنزر علينه وراح للحمام .. واحنه كبل طفرنا لغرفتنا ...
كلتلهه
-هاا بشري
- ولك كلشي ماكو.
- هاااه متاكده
- ايييي مالحكت ادور منا ومنااا بس جوه الجرابي وكلشي ماكوو لا خيط ولا عظمه

ولك حتى تفاجأت غرفهم نظيفه شو
اني جنت متحضره حتى اسد خشمي بس طلعت زينه الريحه مو خايسه

- يجوز ظلمناهن بس هنه هيج طبعهن وصخات وماعدهن شي

- مادري بعد شو اني هم دخت
جنت عبالي راح الكه حتى جمجمه بغرفهن بس شو كلشششي ماكووو

- مادري والله
مادام هيج السالفه صار لازم نحول على باقي العشيره

- وين نروح بعد ؟

- راح نبدا من باجر اذا الله راد
اخذج واخذ امي ونروح لبيت خوالي نسلم عليهم وانتي اسحبي ارقام النسوان كلهن
وبعد ابدي بشغلتج

- اووكييي زين راح انزل اشوف شكو ماكو جوه

راحت وضليت انه اشتغل شويه وره ساعه خابرتني ريري ..
- ولك تعااال انزل ابوك مريض
- شبيييي
- تعال شوفه ماله خلك

نزلت ركض وشفته بالغرفه وريري تريد تكومه اجيت انه كومته من السكملي ونومته
بفراشه .. ضليت واكف يم راسه واتلمس بايده وكصته حارات ويون...

- شبيك حجي خيرر شجاك
احجيلي

مايحجي بس يأشرلي على راسه
ضليت افرك راسه واسمي عليه
وهو صار يتقيء وريري كاعده يمه تغسله
وامي كاعده ويه نسوان بالهول ماتدري بابويه
تعبان ...

انطيته دوا وضليت اسمي عليه ومكابله وكاعد .. وريري تحوص ..
اجتي شاورتني ..
- ولك شصااار شبي وكع كلبي
- مادررري هو هيج فجاه يصير ويرجع يتحسن
- زين حروح اغسل الكراج واجي يمه

راحت وضليت وياه .. لحد مااجتي وامي هم اجتي وشافته ضلت تلوم بينا لان ماصحناهه

اخذت ريري بره وكلتلهه...
- سويله شوربه ريري
- علمننننييييييي واسوي من وحدي كلشي مادبر بالطبخ
- زين امشي شوفيلنه منو بالمطبخ
- طنطول منو غيرهه شتعرفهه تفارك المطبخ بالنهار !
- چااا شوووون
- مادري دبرهه

رحت للهول كعدت واجتي يمي كعدت وطلعت باليوتيوب
طريقه عمل شوربه العدس ..

وخليتهه تباوع وياي واكللهه ..
- تاخذين الجدريه الوسط حتى كلنه نتغدا شوربه لان جنابج ماتسويلنه غدا
-اييي ديلاا لتعيرني بالطبخ اوووكييي
-اووكييي ههه
- هههه ديلا شكد اخلي النه
- كاستين صغار بسسس
-ماشي
- اي شوفي شلون يغسلوه هم انتي تغسلي وتخلي يفور بعدين من تشوفي صار اصفر
ومايع يلا تخلين شعريه وشويه خلي لا تكثرين
- وين الكاهن هذني
- دورري هسه انه شمدريني وييين استغفر الله
-اييي ديلا كمل
- تثرمين بصل تعرفين مو ؟
-ايي سهله هاي
- وتحمسيه بشويه زيت وبس يشكر شويه تخلي فوك الشوربه سههههلل ؟؟
-ايي شيرادله
- اييي بس شنووو تطلعين لاهلي فاهي وبعدين تخلين النه ملح وهااا خلي كركم شويه خاشوكه مال جاي لا تكثرين
- شوكت من اصب النه
-لاااااا من تخلين البصل
- اوووكييي وبعد شلون اعرفهه استوت
- من تثخن وتضوكيهه طيبه صبي وجيبي
- زين خلي اكمل الفيديو واروح اسوي

جرت التلفون مني وضلت تباوع كمل الفيديو وراحت ..
رجعت كعدت يم ابويه اشوفه شلونه
وهو شويه خاويه روحه ...

اجتني رسايل الماسنجر واعرف بس هي تراسلني هنا .. كاتبه ..
- شكد اخلي مي نسيت
- شويه فوك الحد مال عدس
- حدزلك صوره وشوف زين لو بعد
-دزي

ضلت كل شويه ادزلي صوره هيج صار وبعد شسوي واكتبلهه وتسوي ...
لحد ماصارت الشوربه اانه ردت انفجررر
محادثه شطولهه بس شوربه عدس

جابت الصينيه وتباوعلي وتحرك بحواجبهه وتضحك ...

ضلت كاعده هي توكل ابويه وانه وامي كاعدين ناكل .. اجتي يمي كعدت حتى تاكل من كاستهه وشاورتني ..
-هاااا طيبه لاا
- طيبه عاشت ايديييي
- ايدك شنو اني سويت وانحمست بالحر
-وااانه موساعتين صار اعلم بيج
- ديلاا اوكييي انته هم عاشت ايدك

ضلت تاكل وكلساع تكلي طيبه بعد علمني بعد اريد اطبخ ...

شربت الجاي وطلعت للمحل ..
وخابرني السيد ..
- هااا خويه وينك شو لا تسال لا تكول
- مشغول شويه الحجي تعبان وبالي يمه
- شبي خيره
- مثل كل مره
- الله يشافيه ويعافيه بجاه الحسين
- ان شاء الله
- تجي اليوم نتعشى سويه
- لا تسلم
- ليش ولك
- ماريد اتعشى بيتي ويه اهلي احسن
- حيدر جنك شايل بخاطرك عليه
- لااا
- خويه شجاك تزعل مني علمود مره !
- هاذ هوه خويه سد السالفه
شلونهه ملوكه
- زينه
- يلا سلملنه عليهه انه عندي شغل اكمل ونحجي بعدين
- براحتك

سد الخط وضليت مخنوك من سالفته
ماحب مكاطع الصحبان بس العتب ثكيل لو نحجي ...

رجعت للبيت ولكيت ريري مكابله ابويه وكاعده تغسل برجليه ..
عرفت ابويه بعده مصخن وضاله هي اداريه

تفاجات بيهه تكلي ..
-اكعد يمه راح اسوي عشه واجي
- شتسوين ولج !
- معليييييك ادبرهه ااانيي ريري ميصعب عليه شي

راحت وهي تتبختر بمشيتهه وانه عيني على التلفون ادري بيهه راح ادزلي شي ...
شو هاي لا حس ولا نفس

اجتي وجايبه الصينيه كامله مكمله ..
مسويه بركر وطماطه وزلاطه كلهه برش
وركي وبطيخ ..

كعدت وكلتلهه ..
- بوووويه سباعيه وعلي
- شعبااالك انييي ريري ادبرهه
- عفييييه هيج اريدج عفيييه بعد راح اشيل ايدي من العشى وضلي بدعي
- اييييي بس بالغدا اريدك وياي
رجليي الحبابببب موووواح
- امييييي تباوعلج ولج ثكككل
- مووووووواااح عمتتتتيييي فدوه لكلبج شكد احبج

ضليت اضحك واكل وهي كامت توكل ابويه ركي وبطيخ وتمسح حلكه وتشاوره وبعدين اجتي تاكل ..

صعدت انه ارتاح واسبح وضلت هي جوه
كل شويه انزللهه وتكلي روح بعدين اصعد
وضاله مكابله ابويه وكاعده ..

ردت انام يمهم ومقبلت تكلي الغرفه لتعوفهه
وصعدت نمت فوك ..
فزيت على صوت التلفون وهي تخابر ..
- هاا شبيج
- لك تعال ابوك مدري شبيي

نزلت ركض واشوف ابويه بس يكش بايديه ويصيح الله ااااكبببرر
الله اكبببير
الله اكبررررر

حضنته واسمي عليه وهو يعلي صوته بالتكبير وريري مجلبه بملابسي وتكلي شكو
وانه بس اقرا ايات يم راسه وحاضنه
تالي وييين يلا هدا ...

كلتله ...
- حجييي فهمني ششفت شصار
- مايكدرولي والله وياي
يردولي الاذيه يردون يسودنوني بس الله وياي وياي احسه مايخليني ضعيف حال

ضليت حاضنه وادعي ربي يشافيه ويحفظه من كل شر ..
عفته يتمدد وريري جابتله المي شربته ورجع نام ..
ضلينه انه وامي وريري كاعدين يمه الليل كله

امي تغفي شويه وتكعد وريري بس تسويله كمادات وانه اصلي الليل وادعي ربي بجاه امير المؤمنين يخلصنه من هالبلاء ..

ملتهي بالصلاه والدعاء اخذ وكتي وطولت بي ومن كملت صليت الفجر

وتالي يلا انتبهت على ريري نايمه على كعدتهه .. مرجعه راسهه على دوشك
وفاتحه حلكهه وغافيه ...

رحت كعدتهه وكلتلهه..
-اصعدي نامي راح اضل بدالج هنا
-شيصعدني ولك حنام هنا

كعدت بمكانهه جان تجي هي تنام على رجلي وتتغطى .. دفعت راسهه واشاورهه..
-كومي  ولج لتفضحيني
- عووووفنييييي خلي انام مابيه حيلك
تره منعول ابو ابويه اسكت
-ولج امي مناا عيب
- رجلي انته لوقندره شكو بعد
- خررررب بيج لتغلطين راح اكفخج
- اكفخ يلا حتى اصحصح واصخم يومك

ضلت تجر برجلي وانه اجر تالي جلبت بيهه بايدهه وغطت راسهه ونامت ...

ضليت انه كاعد واتلمس برجل ابويه خاف يصخن ..
وطلع الضوا وانه مانمت .. كعدت امي
وشافت ريري هيج نايمه وانه استحيت منهه
كلتلهه..
- اعذرينه علويه
-لاا يمه ماصار شي خطيه المره تعبت وسهرت خليهه ترتاح

ردت اكعدهه بس نومتهه تكسر الكلب مو مال واحد يكطعهه عليهه ..
عفته تنام وضال انه متربط بيهه ...

صارت ساعه سبعه كعدتهه وتمددت نمت ...
وكعدتني هي بالاحدعش تكلي ..
-شسوي غدا علمني يلا

كعدت صحصحت وضليت صافن بوجهه
ضحكت وكلتلهه ..
-شو وجهج نوبه احمر نوبه ابيض
- هذاااك كريم كرريم
- وهسه ممخليه شي بوجهج
-اييي متشوفه احمر شكد اكرهه هيج
اطلع عبالك وحده مسويتلهه مكسوره ومحومره
- هههههه ليطكوج بعين روحي حطي كريمج احسن
- ياااا منو يحط عينه عليه بهالخيسه
- ليش خيسه شبيج
- ماسابحه لحد هسه وحجاب ودشداشه العب نفس منو يباوعلي
- هههه ااانه اباوعلج وحلوه مابيج شي
- هاا يعني ريحتي زينه تره نظفت وتوصخت
- شو تعاي

ادنت عليه شميتهه وضحكت ..
- والله اطيب مني ريحتج هخخخخخ
- عطوري اصليه بعد عينننييي
شعبالك لعد
- ايي ايي بس اذا اجانه خطار لتطلعين بهيج وجهج خلي كريم وخري الحمار
- ليش يعني
- بويه احنه اهلنه مابيهم وحده هيج مثلج بشرتهه اخاف يطكوج بعين وتوكعين براسي
- هاااا بس تره انته مبالغ بيه
يعني اني مو ذاااك الجمال الخاررق
بس انته مشايف وحده حلوه متعلم على المصخمات المجفنات
- ههههههه اييييي متشوفين اخاف عليج اهلنه هم ممتعودين مثلي
- ديلاا اوكييي
- بس صدك خلي اكلج شي بالي
- شنو كول
- هاي شفتج من الله هيج
- ههههههه هاا ولك حويدر عينك على شفايفي
-هههه تجذب
- ليش متجذب صارفه عليهه فلوس بكد خشمك
- ولج خشمي مو جبير
- جبير مادامك رجال عراقي خشمك جبير
- اييييي
بله شكد صارفه عليهه شمسويتلهه يعني
- مسويه فلرررر تعرف شنو فلر ؟
-لا
- هيج ابر مال نفخ تسوي مثل هاي

لمت شفايفهه وتشوفني هيج وهيج ..
وانه اضحك واباوعلهه ..
- صرفت عليهه يمكن حسب ماذكر
٩٥٠ هيج يمكن مادري صار هواي من مسويتهه
- من شوكت
- سويتهه العام باربيل مرتين عدت عليهه
وصارت توووب
- اييي
- ابوسك تجربهه شلونهه
-لاااااااا
- شبيك البوسه ماتحبل عادي تعال
-ولج ابويه هنااا خرب بييييج
-ههههييييي دكوووولييي شسوي غداا
- صوووتج نصي

كعدت عدل وضليت افكر بالغدا
كلتلهه ..
-انتي مايتامن بيج التمن وانه طاكني الجوع
- اييي شسوي
- راح اجيبلج افخاذ وانتي بس غسليهن واشويهن ويه بتيته وبصل وطماطه وكافي
-اووكييي يلا شغله ماتعب
انتظرك بالمطبخ

رحت جبت الافخاذ وضليت اشاورهه يم السنك شلون تنظفهن وتملحهن وتسلكهن  وشلون تشغل الفرن وتضل تراقبهن

و ضليت رايح جاي عليهه حتى اعرف استون لو لا ..

ضبطت السالفه الحمدلله وتغدينا شفت ابويه بعده تعبان .. اخذته للدكتور وسويتله تحاليل
وللمغرب يلا رجعنه ...

علمتهه على الدوا ووكته ورحت اصلي
جنت جايب عشى وياي اكلت ورحت نمت

وضلينه اربع ايام نسهر ويه ابويه للصبح دايرين بالنه عليه ..
وريري شايلته بالصلوات .. كلشي هي تسويله بايدهه توكله وتشربه واليوم كله كاعده يمه

تقرض اظافره وحتى شعره زينته اله ولحيته
وكل ماخابرهه تكلي يم ابوك كاعده ..

ارتاحيتلهه بهالسالفه وشفتهه شكد راعتهم
تطمنت عليهم بايدهه ..

يوم السبت اخذت امي وريري ورحنه لخوالي

بيت خوالي اربعتهم نفس الفرع رحنه على بيت الجبير اول شي ... تغدينا وياهم
وخوالي البقيه هم التمو هنا وصار وكت الغروب طلعت اتوضى جان تجيني ريري

كبل جضيت بيهه ..
- شطلعععج ولج طبي جوه
- اوووكف احاجيك
- امششي جوه نحجي زلم هنا ترديهم يتفرجون عليج لتفضحيني امشيي

اخذتهه جوه بالكليدور وكفنه جان تكلي ..
- ولك حويدر ليش محاجيلي على سهاد

نبتت حجايتهه مثل سلايه بنص بلعومي
وضليت صافن بوجهه ...
.
.
يتبع

💕💕

بنات كولش اعتذر منكم تاخرت هواي اليوم بموعدنا
بس الصار اني عود ردت اصير ذكيه 😂
وفتحت البرنامج بالابتوب كلت شاشه اكبر واكتب براحتي ماتعب عيوني

واني مكمله هاي بارتات بس داكتب بالاخيرات

جان تنكلب اللغه كلههه للفرنسي ورجعت على التلفون هم متغيره لغه البارت

وهاي اني كضيتهه بس ارجع بالكتابه
مره اترجم ومره اشوف الاعدادات

وبعد بقن هذنيج البارتات متغيرن راح اسهرلهن اليوم واعتذر مره ثانيه بس ان شاء الله باجر بنفس موعدنا ماتاخر ..

💓🌷