رواية ماء مغلي الفصل الرابع والستون 64 - بقلم Zoka 🌷

..♣️🩸 ماء مغلي 🩸♣️..
* adzzon *

جريت نفس قوي وشهكت وصوت عياطي براسي كمت من فراشي وعيوني مغوشه وحاره من البجي طلعت من غرفتي ورحت
اتلمس بالحايط لحد ماوصلت غرفته وفتحت الباب ..

كعدت بالكاع على ركبي وصحت ....
- رضاااااااااااا

كعد كدامي ولزم وجهي ويحاجيني واني من الاعصاب صرت اصك بسنوني حيل وابجي وهو عصر فكي
وخلاني افتح حلكي وحط ايده بين سنوني ويكولي ..
- عضيهه حيل يلا بكل حيلج عضي

عضيتهه حيل بكل قوتي واعصابي وهو مقلصهه لايده بين سنوني .. لحد ماتعبت وخرت وجهي منه وهو
حضني ..
ضل يمسح بوجهي واني تعب بيه تعب بكل شبر مني

لم شعري بيده وكالي ..
- شذكرج  بابه شذكرج ! مو عايشين ومرتاحين ليش تجيبين التعب لنفسج وتعبيني وياج

- تعبت انسى

- بابه راح كلشي انتي احسن واحلى البنات
جمال وذكاء وشجاعه و روحج الحلوه كلهن موجودات بعدهن
ليش تفكرين وتعبين نفسج ؟
شبيج صار وياج شي ! خاف هذاك حجالج شي جرحج بي !

- لااا بس اني اريد احجيله
وجنت افكر منين ابدأ احجي وتعبت من تذكرت

- ماااكو حجي بهيج مواضيع بابه هذا امر منتهي
الحجي بي ميفيد يجيبلكم بس التعب
انسي شلون مانسيتي قبل هسه هم متغير شي
الحجي يخرب حياتج بابه وانتي حياتج مرتبه ومرتاحه بيهه
لتفتحين لنفسج باب سده الزمن

باوعت لوجهه وكلتله..
- اني شلون عشت ! شسويتلي انته وخليتني اعيش !

رفع شعره وخشن صوته و وكف .. جر ايدي وكومني
كالي..
- بابه تنامين هنا لو اخذج لغرفتج ؟

- غرفتي بس اكعد وياي

اخذني للغرفه و شال مخدتي من مكانهه وخلالي مخده ثانيه واني تمددت وتغطيت وهو كعد يم رجلي
اباوعله وهو صافن على روحه بالمرايه ..
وره شويه دنك و كالي...

- اني اسف

رأساً كلتله..
- مسامحتك

- بس ما نسيتي
لو تسامحيني وتنسين لو تعاتبيني
لاتضلين شابعه بجي بين اربع حيطان

- صدكني ناسيه بس تعبت
لا تلوم روحك هو هذا حظي مو غلطك

فرك راسه باثنين ايديه وكال ...
- شينفع الرجال وحيله وشواربه ونفخته والمره الي بعصمته ضيم الدنيا عليهه !
بعدج ما فهمتيني
افهمج اني من لمحه وحده اقراج قرايه بس انتي بعدج تطيعين ومتفهمين

حجاهه وطلع ..ضليت الوم بنفسي ..
' شعندي رحتله هسه هو عايزه قهر !'

راسي يوجعني وكمت اريد اخذ الدوا على الميز
وصلت الميز وغوشت عيوني صارت كلهه سواد
ورجليه رخت .. كعدت بالكاع ولازمه رجل الكرسي
وشريط الدوا ومغمضه ..
دوخه صارتلي احس راسي ديفتر ..
بقيت هيج انتظر تروح وارجع اتوازن واكوم ..

دخل عمي ولزمني من جتفي . . اباوعله اشوفه بس راسي احسه يفتر منا ومنا ..
راد يشيلني وماخليته ..
وحدي كمت الزم بالميز وكمت كعدت على الكرسي واخذت الحبايه من الشريط بلعتهه وهو انطاني مي
شربت وضليت لازمه راسي ومغمضه..

هو واكف يمي يفرك فوك حواجبي وجوانب راسي
لزم خشمي وكالي اخذي نفس قوي ..
اخذت وكال..
-خشمج مسدود .. ارتاحي ونظفيه وراح اسويلج قطرات البابونك يفيدج هسه
راح انزل اسوي لتتحركين منا ضلي كاعده

طلع منا واني باوعت للساعه .. ٣ الا ربع بالليل
فكرت بحيدر .. نام ؟ مرتاح لو ضابج مني بعده ؟

بقيت على كعدتي لحد مارجع عمي .. انطاني كلينس
وكالي نظفي خشمج وصيحيني ..
طلع هو واني نظفت خشمي ومسحت كل وجهي
وصحته ..
فتح الباب ودخل ....

لزم راسي ونزله لوره الكرسي وصار بالسرنجه
يخلي بخشمي بابونك ومي بصل .. احتركت حرك
وهو لازم راسي مثبته ويكولي ...

- لج تعبت وسويتهن اصبري شويه هسه ينزلن بخشمج وتخلص السالفه

بقيت عاصره عيوني ومغمضه لحد ما خفت حرورتهن
ورفعت راسي .. ضليت اخذ نفس قوي وهو يكولي ..
- ها احسن ؟

- اي شويه احسن

- يلا هسه هم بعد كم دقيقة ويشتغل مفعولهن اكثر
تعالي نامي

اخذت كلينسي ورحت تمددت وامسح بخشمي
وهو شال الكرسي وخلاه يم راسي وكعد
ضل متجتف وساكت ...

مر الوكت هيج ساكتين جان يكولي ...
- تدرين د اباوع  دراكون بول
هههه مادري شلون طخت بالي اغنيته 
اطلع بالسياره وادندن
' رأيت الحقيقه خلف البصر .. رسمت الحروف بعمق الحجر '
بس هذني ترليون مره عدتهن وعبالج ابزع !
ولا بزعت منهه اعيد بيهه  ولا مليت

ضحكت وكلتله ..
- اني داباوع ايميلي

- هاا حلوه
نشوف فلم ؟ هوم آلون ..
احب سوالفه هذا الصغيرون ابو البله
يعجبج ؟

-اوكي

راح جاب تلفونه وكعد يمي على الفراش وفتح الفلم
وعلى الصوت كل علوه .. وضليت اني منداره اباوع وهو مرتجي على المخده ومخلي ايده وره راسه والثانيه
لازم بيهه التلفون..

حافظينه الفلم هواي شايفي بس رجعنه نضحك عليه
ومن خلص باوعنه كم حلقه  '  لمستر بن ' وصار الصبح
هو طفى تلفونه وكال ..

- خرب نظامي اليوم لا ريوك ولا طلعه ولا رياضه
راح انام للظهر لحد يكعدني

راح وهو يفرك عيونه وسد الباب ..
اني هم نمت وطولت بنومتي ... صارت كعدتي العصر
غسلت ونزلت لكيت حيدر جوه كاعد يشرب كهوه
ويه عمي ..
سلمت عليه وكعدت يمه وعمي طلع من البيت ..

باسني بخدي وكالي..
- تعبانه حبيبي ؟ مطوله بالنوم شعجب

- سهرت البارحه ويه عمي باوعنه فلم وتأخرت نومتي

- هااا وين سهرتو ؟

- بغرفتي .. جنت دايخه وخشمي مسدود وهو ضل وياي سوالي قطرات فتحت الخشم وشافني كالبه خلقتي
كالي خلي نشوف فلم وضلينه نباوع للصبح هو راح يلا نمت

باسني بايدي وضحك .. كالي..
- لتبجين بعد ياروحي ماحب اشوفج تبجين مايسوى شي للبجي

جريت ايدي من ايده ورجف كلبي .. كلتله..
- شمدريك بجيت !

- عمج كالي جانت تبجي مزاجهه متغير
جاي تشوف نفسهه مو حلوه صايره ومقهوره

-لاااا ما بيه شي اوووكي كافي لاتضلون ترجعون كل شويه مقهوره ومحلوه مابيه شي
واحد ضايج وبجى شويه شكو شصار هسه
تضلون بكل. شي تدققون
عوفوني فدوه لتلحون وياي

عفته ورحت للمطبخ كلت لريتا تسويلي اي شي اشربه
وحيدر اجاني حضني من وره وباسني بشعري..
- مشتااااك ياروووح روحي انتي

- جان خابرت لو صدك هيج مشتاق

- وعلي ذبيت روحي ونمت فد نومه للتسعه صبح يلا كعدت
اكلت وسلمت على اهلي ورجعتلج
شكد رادو مني اضل بعد شجم يوم بس بالي يمج
ماكدرت اضل  بعد هناك

- اي زين

اخذت عصير وكعدت اشرب وهو دنك شاورني ..
- اشتريتلج شي اريدج تلبسي بالليل الي
شفته بالانستا وطبع بالي بعد اريد اشوفه عليج

ضحكت وكلتله..
-اوووكيي بس مبين الشي هذا ناار حركك حرك من شفته
وصرفت فليساتك عليه

- يابووويه من شفته كبل صرتي بعيني تخيلتج بي
اكل كلبي اكل بحلاته
البسي خلي نغير المزاج ووولج طكت روووحي

- هسه مو كلنه اوووكيييي

عضني بخدي وكالي ..
- راح أطلع للصيدليه تريدين شي من بره ؟

- لا بس لتتأخر وياخذك الواهس بالفرفره

ضحك وطلع .. واني تغديت وكعدت بالحديقه
شويه واخذت ريتا وصعدنا للحمام خليتهه تنظفلي جسمي
وسبحت وطلعت كعدت بغرفتي ارطب جسمي وحيدر دخل وشايل جنطته ...

كالي ..
- عمج كال يتعشى بره متواعد ويتاخر ميرجع اليوم
يمكن

-متواعد ويه بنيه ؟

- مبينه هي جا يتواعد ويه جدي يبات يمه !

اني اعرف طبع عمي لو البنيه رب الجمال والانوثه
هو ما يبات يمهه ... يتواعدله ساعتين بالزايد وياهه
ويعوفهه .... مستحيل ينام لثاني يوم ويه بنيه
يخلص شغلته ويطلع ..
ادري بي راح يسهر بفد مكان يسكر وينام الصبح من يكعد العصر يصحصح يلا يرجع للبيت ..

حيدر صلى المغرب وانتظرته نزل يلا صليت
ونزلت هو تعشى واني مااكلت بس عصاير اشرب
كعدنه بالحديقه شويه وكالي يلا نصعد ...

صعدنا وانطاني العلاكه وطلع من الغرفه ..
شفته قميص نوم  كصير ويه حد الورك .. نازل ردانه على الزند وبي دكم وهو قماشه نايلون لزك بالجسم
لونه ماروني دموي ..

لبسته ودكمته وخليت شعري مرفوع وفتحت الباب
شفته يتمشى يم الدرج ..
باوعلي وعض اصبعه واجاني ...

ضل يتلمس بالخصر ويبوس بركبتي ويكولي
- اويليي يابويه من اشتمج عبالك جاي امشي بنص بستان
كله قداح و عطور حامض ورمان

ضحكت وميلت راسي عليه .. وهو صار يفتح بالدكم ويتلمس وتغير وجهه .. كلتله ..
- حيداار شويه ريلاكس

- مره وحده حبيبي ماتعبج

- شلون هيج والعدوى

- عااادي سألت صيدلاني وكالي عادي بس استخدم واقي
واشتريته
كافي لتخربين واااهسي فدوه لكلبج
محتاجج صارلج هواي هاملتني
رجعي دلليني شويه

مارديته وبقيت وياه على مزاجه لما اكتفى ونام ..
من كعدنا الصبح  هم  صار بنفسه واشوف بي تغيير
بي طاقه ما يكتفي بشي خفيف ..

نام على ايدي واني كلتله ..
- متغير هواي .. ماجنت هيج قبل مو لهالدرجه
صاير تعب

- اييي ادري بروحي متغير
من الدوا من يوم الاخذته هو خبلني
بي هواي منشطات
تسوي الواحد حدييييد

- خاف مو زين تضل هيج ! اكطعه للدوا

- شكو كاطعه ! كلش زين صرت عليه
انتي بس لا تضوجيني انه اضل بخير وسلامة

حبيبي اذا تعبين متكدرين بعد كليلي كافي
انه انسى روحي وياج  انتي وكفيني كليلي تعبت واعوفج
ماضغط عليج انه بس صدك احتاجج متتخيلين شلوون
لو تمنعيني يوم واحد شيصير بيه

- عومري اني وياك تدلل بس علمود لا تضل هيج متأذي اكطع العلاج هذا روح للدكتور خلي يقلله او يبدله

- اي هسه على المراجعه الثانيه الله كريم

راح يسبح وانه كمت على راحتي عزلت الغرفه
ورحت سبحت وراه ونزلنه نتريك  ..
كملنه اكل وكالي نطلع نفتر شويه بالمنطقه ..
وطلعنه نتمشى ... كلتله ..

- اطلبلك سياره من عمي ؟

- وعلي اموتج اذا تسويهه ابببد الغيهه للفكره من بالج

- لعد تضل بدون سياره ! شلون تداوم !!

-هذا شارع متروس سيارات اركب واروح
كروه مال اسبوع ارخص من البانزين مال يومين

-بس اريدلك سياره تكمل كشختك

- خلي افك ديني واخذلي قرض واشتري بي سياره على راحتي اسدد فلوسهه من راتبي

- اسحب قرض هسه واني انطيك الراتب ادفعه للدين

- لااااااااا مامتوازي عليهه
براحتي اشتريهه احسن
اكلج .. كلت لاهلي رجعنه سوه واجرنا بيت وكاعدين

-هاا وشكالو ؟

- فرحو وامي كالت عرفتك من صوتك اول ماسلمت كلت هاي راجعتله ومطيبه خاطره

ابويه كال ما تجيبهه هنا ليش باقيه وحدهه بالبيت كاعده
كلتله هناك نعيش احسن اريدهه يمي مااضل رايح جاي حتى اشوفهه

كلتلهم مرتاحين بكعدتنا بس هي مريضة اندعولهه تصير زينه واذا صارت زينه اجيبهه هنا واخذكم كلكم زياره
و نسوي ذبيحه شكر لوجه الله على سلامتهه
ابويه كال ذبيحتهه عليه وبالدعاء ما نسيتهه

- عود صدك يدعيلي لو هيج حجايه التنكال !

- لا والله صدك يدعيلج حتى من جاي ارجع كالي سلم عليهه وكللهه بشارتج متحضره وقريبه

- شيقصد؟ !

- ما وضحلي بس يمكن يقصد تتشافين بأذن الله

- هااا زين واذا صارت صدك
تاخذني ؟

- اخذج حبيبي جا نجوز من اهلي مانوصلهم !
صح هنا بيتج وبراحتج شتطلبين بس ماريد تكطعين ويه اهلي تعرفيهم يحبوج وملوكه هناك روحهه مفرفحه عليج يااامن يجيبج الهه

- ادري يحبوني واحبهم بس هذاك المكان بعد جزت روحي منه
وملوكه جيبهه فد يوم الي هنا شكو بيهه

- مانكدر نكطع باهلنه فرد كطعه رور
هسه جاي عرس عزيز وهو  زفته هنا بغداد
يعني اهلي راح يجون هنا
ما تحضرين العرس ؟

- لاااا ماريد مابيه حيل هوسه

- زين عوفي العرس
ترضين اهلي يوصلون يم بيتنا ويسألون عليج وماجيبهم !
ترضين يمشون منا وما يتعشون ولا يرتاحون وانه عندي مره وبيت هنا ومااستقبلهم !!

- يعني تجيبهم للبيت كلهم !
لعد شحجينه هذيج المره !!!

- مو كلهم بس اهلي
ابويه وامي وسيف واحمد وعادل
هذوله يعني

- والجهال ومرت عادل تنبص وياهم وخوش لمه تصير

- شبيج بويه جبت طاريهه انه تلعب روحي منهه
بيتنا هناك ماتوصل ترديهه تجي هنا لبيتي !!!
جاي اكلج اهلي اهلييي

- اييي ديلااا اوووكيي
هسه خلي يجون هلا بيهم
على كولتك شلون نكطع وياهم همه اهلك شتسوي يعني تضل ضامني منهم لو هم نكضيهه جذب !

-اي هذااا خوش حجي هسه صرتي تفهميني
ماكدر انه اخليج بعيده عنهم عبالك مموجوده
لازم ترجعون تتواصلون يجي عيد يجي رمضان
لازم تحاجيهم
عيب همه ماعادوج طبيتي بيتهم وطلعتي منه وهمه ماغثوج بكلمه هم حلوه بحكهم من تشيلين تلفون وتسألين عليهم
وتعزميهم على غدا فديوم وجاينه رمضان لمة الفطور حلوه بين الاهل

اخذت نفس وتذكرت العلويه وسوالفهه الحلوه هذيج الايام وكعدتي بينهم صدك جانو اهلي ومداريني ومداريتهم
ومواقف وكعدات حلوه صارت بينا ..
حسبي الله على الفرقنا ...

- اووكي لعد خليهم يتعشون يمنه بيوم العرس وخلي يباتون والصبح يطلعون براحتهم

- هاذ هوه ياروحي
وعلي هسه تشوفين شلون يفرحون بشوفتج
صدكي حتى سيف يسأل عليج يم امي
يكللهه قفلت ماترجع علينه بعد ؟ ماتعرفون تقنعوهه ؟

-هههههه سووويف اووف شو اشتاقيتلهم كلهم

- هسه اجيبهم بعد فد اسبوعين للعرس
عزيز راح يعيش هنا مأجر مشتمل  يكول ٧٥  متر
اخذه قريب على بيت اهلهه
والجهال يبقون يم اهلي كل جمعه يجي يشوفهم
علمود ثنينهم دوام والبيت يضل فارغ مينعافون الجهال هنا وحدهم
وشكد راد من اهلي يشيلون لبغداد ما قبلو

- هااا زين مرته يحجبهه !

- اييي محجبهه ولبسهه كله جبب بس شارطه عليه
ما تطلع من بغداد كل عمرهه مياخذهه للنجف
على كد زياره للاهل ويرجعون

- خوش تسوي  هاي تعرف بنفسهه ماترهم هناك
بس اهلك شبيهم ما شبعو من النجف !

- قافلييين وعلي ماتصيرلهم جاره
ابويه كل قوته يريد يبيع البيت وياخذ غيره بمنطقه
ثانيه بس لازم بالنحف
يكول ماكدر اعيش وحدي هنا معارفي والجار  والصديق
والشغل كله هنا

- هو كلمن متعلم على بيئته بعد ..

- هسه بس يتزوج عزيز راح يبيعون البيت امي تريد ترجع بنات هادي يعيشن وياهم حتى يضلن وياهه يساعدنهه بالبيت وهم بعد البيت فرغ وصارلهن مكان وتأمن عليهن

- هم زييين اخيرا راح يرجعن لاجدادهن
بابه زوجو احمد زوجوه كبر بعد وهو مفلفل ع الزواج
رتبوله غرفه وزوجوه

- ههههههههههههه لج هذا وعلي اذا تزوج  كل خمس سنين يبدله مره
يضل كل مايكبر  شويه يدورله مره جديده
خلي هيج لا يشيب كلوبنه

ضحكت وضلينه نتمشى شويه وتذكرت ايامنا هناك
وهوسه السحوره .. كلتله..

- حيداار ماعرفنا منو هذا الي طلع بالكاميرا الشافته اختك هم

- مادري هو اختفى بعد

- بس هو اعتقد انسان مو جن لان حركاته ومشيته مال انسان هو بس طوله شويه يخوف

- وين اختفى ؟ جا احنه شكد ضلينه ننتظر ينزل ومانزل !
ولا تكولين السطح بي ختله ويختل هناك
وحتى لو ختل هم لازم يجي وكت ويطلع ونشوفه

- هو هنا دوختنه .... من ولت طنطول راحت الصخايم هاي كلهن وياهه
تره حتى سيف نفسيته تغيرت صار يتآلف ويه العائله اكثر

- يمكن جان يدري بامه ومهضوم من سوايتهه

- اي هو كلشي جان يدري بي بس ميكدر يحجي
حتى هاي الشغلات الي بغرفته يمكن جان يلملمهن من عدهن وميخليهن يشتغلن بيهن
اني هيج حسيته يساعد ويكسر بشغلهن على اليكدرله

- صحيح الحمدلله خلصنه منهن
ياابويه من اتذكر عيشتنه كبل واشوف عيشتنه هسه
اتعجب اكول هاي احنه شلون عشنه !
والله هيج بقدره قاادر عشنه بنصهن

- يلااا راحت بعد

ضل يستغفر ويفرك براسه ولازم ايدي ..
كدامنه فرن عارض اشكال المعجنات والريحه تجوع
كولش اشتهيتهن وصار بالي طعم العجينه الهشه الحلوه
ويه الجبن والكرفس ورشه الزعتر ..

باوعت لحيدار وهو ضحك كالي ...
- يلاا اكسري النظام مره وحده
اكليهه هسه راح تموتج اللكمه !!

ضحكت ورحت وياه للفرن وكفنه نختار واخذنه تشكيله
هو يختار الحلوه وغريب شكلهه لعمي يكول لابو الاتكيت
واني عجبتني بس ام الجبن وجرك السمسم ...

اخذناهن ورجعنه للبيت كعدت بالحديقه آكل
وهو واكف وياكل جرك .. كال ...
- ينراد سستم كاميرات هنا غلط يبقى البيت بدون كاميرات

- اي ياريت تسويلنه

- خلي اقيس

هو راح واني كمت اغسل وبدت معدتي توجعني
رحت تمددت على القنفه وصرت احس الاكلته كله صعد على صدري .. كمت بسرعه للمغسله تقيأت كلشي
وهو نزل من الدرج وشافني هيج .. اجاني غسلت وهو حضني واخذني للقنفه ...

ضل يعتذر لان سوالي واهس للاكل واني عديتهه
ماتسوى اعتذار ..
غفيت شويه وكعدت على صوت عمي هنا يم راسي
فتحت وباوعتله ... جانت عيونه حمر ..
كالي..

- اكعدي بابه خلي نتغدا سوه

كعدت وسألت على حيدر كال ديسوي شوربه
بالمطبخ ...

عمي انطاني كارتونه بيهه لعابه إنمي ضحكت وفتحتهه
وهو كالي..
- ماتشبه ايميلي بس من جماعتهه

- عمو ايميلي مو إنمي هاي كارتون عادي

-هااا عبالي كلهم نفس الجماعه يعني ابدلهه ؟

-لاااا حلوووه عاشت ايدك

تشكرته ولزمتهه احرك بايدهه ورجلهه .. بيهه مفصل يتحرك وكعدتهه على الطبله كدامي ..

حيدار جاب بس صينيه اكلي وخلاهه على الميز
وريتا جابت باقي الاكل ... ورحنه ناكل
الطعم اطيب هالمره واني جوعانه خلصتهه كلهه
هو ياكل وعينه على اكلي يضحك كل مايشوفني اكل اكثر

ارتاحيت وياهم اثنينهم مداريني .. وصارو يتناوبون بطلعتهم .. من حيدار بالدوام عمي مايطلع لحد ما هو يرجع وبالجمعه والسبت عمي يطلع الصبح وحيدار اذا عنده شغله يطلع العصر ..
وماكعد وحدي .. الغرفه مااشوفهه بس بالليل و من اسبح
كل كعدتي بالصاله لو الحديقه ...

حيدار صاير عنده .. اليوم كله الج اخذي راحتج بس بالليل انتي الي ..
مابيهه نقاش ...

صار يوم العرس .. اني رتبتله ملابسه وشياكته كلهه
ومن طلع اني بدلت ورتبت شعري ومكيجت 
وكعدت جوه احجي لعمي على جيتهم وهو راد يطلع ويعوفونا براحتنه بس ماخليته ...
كلتله تعرف عليهم انته اهلي كلهم لازم تضل وياي ..

وصارت جيتهم بالليل .. محضريلهم عشه وفراش
وصينيه حلويات مشكل ..

تلكيتهم باب الصاله سلمت على العلويه وهي حضنتني وتبجي .. اخذهه حيدار جوه واني سلمت على ابوه
وهو لزم وجهي يباوع بعيوني وهنه صفر
باسني براسي وكالي ..
- الج نصيب بشاره مامثله نصيب

ضحكت وهو دخل وبقى سيف مخلي ايديه بجيوبه
ويكولي ..
- ها شلونج

كرصته من خده وخليت ايدي وره ركبته وهو يجرهه
كلتله..
- كالو مشتاقليييي ولك لعد ماجنت تحبني عاااابت هالخشم وبله
جنك عمك من اطير من ايدك يلا تحن عليه

- وخري شبيج لتحضنين شبيج انتي مو صغير انه وخري عمي وخري

- ديلااااا روووح
اني صاحبي واكف ينتظرني نتبادل الاحضان
لك حياااتششي احمممد

ضحك بعلو صوته وفتح ايده ويكولي ..
- هلااا بالصووووت
كل حضني الج صدك جذب
خااااادم صغيرون للطيبين

ضربته على وجهه وباوعت وراي حيدار ملتهي يخلي طبلات .. كلتله ..
- حضن سريع ولك يلا راح يداهمونا

حضنته وهو يكهكه وخرت واشوفه حمر وجهه وضل يدنك وخجل ..
ضربته على ظهره وكلتله..
- ديلااااا ولك شو خنست
يستحي ابو الوصخ
امشي فوت يلا هسه عرست عليك هو حضن ياحظي شلون راح نزوجك

- لج خليلي مره بالغرفه ونعلى على ابيه اليستحي

-هههه بوووخه انته كلشي ماتدبر

ضاج هو وراد ينفخ بنفسه بعد واني عفته ودخلت .. كعدنا وياهم جوه .. و نسولف وتعرفو على عمي
على اساس هو خالي ...

اني كاعده يم العلويه واصيح لريتا هي اجتي ضيفتهم
والعلويه سألتني عليهه ... كلتلهه تساعدني بالبيت
خوش بنيه ..

خلصنه العشه وكعدنه سوالف واحمد مستلم حيدار
خبله لحد ماضربه يلا سكت شويه .. بس رجع يتحارش بي
مايثبت بمكانه .. يكوم يسويله فد شغله ويروح يطخ بحيدار يتموع كدامه ويرجع لمكانه يكعد ..

عمي ماعاجبه الوضع يحجي مجاملات لحد ماصارت بال ١١ كال راح اطلع خلي الولد ياخذون غرفتي

صعدت ويه العلويه محضريلهم غرفه بس هاي مابيها اخشاب .. غيرت رأيي ماردتهم ينامون هنا
اخذتهه لغرفه عمي مرتبه من كل شي ..
خليتهه ترتاح وتنام هنا ونزلت شفت حيدار وابوه يسولفون واحمد بره محضر النركيله ويدخن ويكلب بالتلفون ...
سيف جان ياكل بقلاوه وكاعد هادىء كدام ميز الصاله

رحت كرصت خدوده عجين بالايد عجييين
كلتله ..
-ولك انته بقلااااوه
شلونك سويف شمسوي ممسوي

-زين

- نزوجك قبل احمد شويه انته اعقل منه

- اكره النسوان ماريد اتزوج

-يبووووووو طنكوره عمك
خليك عيني ماترهملك كل جاره
اكل وكثر عوافي على كلبك

عفته ورحت يم حيدار وهو كالي ..
- اكعدي يم ابويه يريد يقرالج

ضحكت مشتاقه لهالسوالف .. رحت كعدت بصفه
وهو لزم راسي وضل يمسح عليه ويقرا ..
من كمل كالي ..

- صيري سباعية بويه رجعي بيتج بايدج لاتخلين شي يضل ناكص شدي حيلج و العمر بعده طويل كدامج
رجعي بي الضاع

نغزني كلبي بكلمه ضاع ' تاخذني لابني الصغيرون
تمرد كلبي عليه ...
حيدار كال ..

- هسه تصير زينه وترتاح وتجيبلنه سند
مااجوز منج الا نخلف سند

ضحكت وابوه لزم ايدي وكالي..
- بويه ضاملج حجايه تبرد كلبج لباقي العمر

- ياحجايه هاي يابه هو ما يبرده الا الضنى

- لا مقسوملج نصيب يبرد الكلب
انه شفت بيج رؤيا
فسرتها وسألت بيهه اكثر من واحد وكلهه تبشر بخير جبير

- عفيه لعد دحجيلي ششفت !!

- انه احجيلج بس اريدج تحجيلي
انتي شتدعين ربج ؟ اش بينج وبينه من كلام !

ثلج وجهي بس سألني .. ضليت ساكته وهو كالي..
- احجيلي وانه اكلج الرؤيا شبيهه الج

-ااا هيج يعني دعاء عادي اصلا اني ماعرف اصفط مثلكم بالادعيه وهيج تجي ارتجاليه عندي ماعرف
اني بس اقرا بهاي الكتب وهيج يعني احجي سوالف عاديه

- لا هاي كلنه نسويهه
اكو عندج غير شي مسويته

-لا ماعندي

-لاا بويه تذكري زين
اذا مو دعاء يجوز عمل صالح مسويته وناسيه
تذكريه احجيلي انه متعجب عليه اريد اعرفه

ضليت اباوع لحيدار وهو كالي ..
- فكري انتي تعرفين نفسج

صفنت شويه وكلشي بحياتي كمت اذكره
شنو الزين بي !
كلشي مامسويه زين ... هو اني بس من شفت حيدار صرت شويه زينه
وكمت اسوي شي بحياتي مفيد
قبل الدنيا تلطخ بيه واني مكضيتهه صياح وعراك وبجي

كلتله...
- يابه اني ماعندي فد عمل صالح مسويته
بس منتظمه بالصلاه وهم مااصلي مثلكم هواي
بس على كد الخمسه مال اليوم
ومره وحده انطيت صدقه بس مره
وهاهيه بعد كلشي مامسويه
كاعده وحدي وساكته كافه خيري وشري عن الناس

- انه هم اصلي وهم انطي صدقه وكاف االاذى عن الناس
وخاتم القران بالميه مره وحاج بيت الله
ومزكي ومخمس
بس مابشروني مثلج بويه .. انتي عندج شي ملتزمه بي
فد تسبيح او فد شكر .. دعيتي مره بحركه كلب
تذكري خلي نعرف الطريق الصح والغنى وينه ؟

- ماعندي تسبيح خرافي متعرفوه هي تسبيحه الزهراء وره الصلاه
وقبل سوينا اني وحيدار صلاه على النبي للائمه نهديها
فتره وكطعناهه من تعاركنه

حيدار كال ..
- انتي كطعتيها بويه انه ماكطعت ضليت مستمر بيهه

-ايي عفيه عليك

باوعت لابوه وهو صافن جان يكولي ..
- بعد غيرهن ماعندج
هذني هم كلهن مسويهن

باوعتلهم واجتني الضحكه .. كلتلهم ..
- هسه متكلولي اني شعندي وحي وضامته عليكم
هنه صلاه وايه الكرسي وتسبيح اسويهن بخمس دقايق واكو..

اجيت اكول اكوم وتذكرت .. ضليت فاكه حلكي وايدي بعدهه مأشره بيهه وحيدار ادنى يمنه كولش
وابوه خله سبحته بايده  ويباوعولي ...

كلتلهم ..
- قبل ماكوم من الصلاه احجي شغله هي شويه يعني متناسبكم بس مادري اذا هي هيج مؤثره اني من وحدي اخترعتهه

ضليت احك بخدي ومدنكه شويه نصيت صوتي وكلت..
- اني من اخلص تسبيح اسجد تعلمتهه من حيدار
اشوفه يسجد مره كالي سجده شكر
اني هم اسويهه بس شنو يعني اكول بيهه
' احبك يارب لا تنبذني مااعصيك احترمك من يوم عرفتك '

رفعت راسي وضحكت شويه ...
- شويه حجي مو الكم ميفيدكم هههه
انتو شتسون بهالسوالف متحتاجوهه

يلاااا يابه دحجيلي تره شلعت كلبي اني بهيج سوالف ماصبر .. احجي هسه شعندي وضامته عليكم ديلا عفيه برد كلبي واحجيلي

رجع ظهره على الكوشه وحيدار هم وكالي ..

- جنت مكمل صلاه الليل وضلت ثلث ساعه على صلاه الفجر
ركبتي تعبت من دنك على الكتاب .. رجيت راسي على القنفه وهي غفوه صارت ..
جان هذا ثاني يوم بطلعتج من المستشفى يعني نصبح يصير ثالث يوم الج طالعه لبغداد ..

شفت نفسي بمكان كله بلور .. شلون عبالك جليد مصقول صقل ويلمع بالوجه .. هيج امشي الكاع بلور اشوف
الجواي نثر مثل رمل ملون سمائي ووردي مموج ويتحرك عبالك مي ويمشي بنهر .. هالشكل جوه رجلي اشوفه بس ماادوس عليه فوكاه هاي طبقه بلور شفافه امشي عليهه
ومن حلاه المنظر وهالشكل تتموج الالوان وتلمع جوه رجلي مارفعت عيني وشفت شكو هنا
.
جان اسمع صوت ضحك  يلا رفعت راسي وباوعت
شفتج انتي كاعده على مثل الغزال بس عنده جناح
وسبحان السوى جناحه خيوط ذهب يحركهه وتنثر بالكاع لمع وانتي كاعده عليه ومجلبه بكرونه وتضحكين وتباوعيلي .. صحت عليج بويه رايه شجابج هنا. !
كلتي انه عايشه هنا انطوني مكاني وتعال وياي اشوفك بيتي
.
مشيت وكفت يم هذا الغزال الصاعده عليه انتي تكليلي اصعد يمي وانه ماكدر اصعد من اخلي ايدي عليه هو يميل بجسمه مايرضى اصعد .. وطار بيج وانه اركض وعيني للسمه عليج لحد ما نزلج كدام بيت
بويه شنو من بيت .. ارفع براسي وابااااوع وگبته للبيت ماخلصت غاطه بين الغيوم هيج بي علو
وكل طابق من بره مرصع بلمع شلون شكل الجواهر هيج مخططه مضلعه بس صايرات سره واحد ويلمع يضوي ضوي وكله الوان مدرجه كل طابق لون شكل بس كلهه صايره سوه شلون لوحه ..
انه اباوع متعجب شنو من بيت هذا ! وين هذا المكان الكاع كلهه تلمع والبيت يلمع وانتي اخذتيني جوه
للبيت تلكنج بنات كلهن صغار بس هواي بنات
كلهن يسلمن عليج وانتي تردين سلام وانه امشي بس اباوع للمكان تكولين ياسبحان الله عبالك واحد كامش جبل جليدي وناحته نحت ومسوي بي البيت
هالشكل هو شكل طابوكه مابي
وبنص البيت صايره عين ماي انتي كعدتي يمهه ومديتي ايدج غرفتي بجف ايدج ماي وشربتي وكلتيلي
' اشرب منه الماي هذا خلوه هنا يبرد كلبي '
انه مديت ايدي للماي وكبيت عاد ..

كعدت لا الماي ولا انتي ولا البيت رحت اشوف الساعه
والكاهه عشر دقايق عابره من نومتي يعني انه غفيت بس عشر دقايق وشفت كل هذا وكعدت
وشلون غفيت وشلون كعدت مادري

اني دمعت عيني وحيدار صار يصلي على النبي
وكال ..
- بويه تفسيره ؟

- تفسيره ... الهه نصيب عجيب وعظيم ينتظرهه
بالدنيا بالاخره بعد الله اعلم بس الهه نصيب يبرد الكلب

البيت رنااااان رناان من سولفته ووصفته لواحد من الساده اعرفهم شايب هو اكبر مني كالي خاف انته قاري سوره الرحمن وطابعه بالك اوصافهه وتخيلتهه
ببيوتهه وزينتهه بالاخره

كلتله لا والله ماقريتهه هذيج الليله ولا قريتهه الشهر كله ماقاريهه
انه جنت اقرا للامام السجاد (ع) مناجاة عنده وانه كاعد اقرالي وحده منهن وره صلاة الليل
ضليت شكثر متعجب واكول ياسبحان الله من يخلق يبدع

ضليت مخليه ايدي على حلكي وصافنه ..
معقوله اني ينطوني هيج نصيب !
كلتله..
- يابه ليش ينطوني هيج !!
هو اني شمنطيتهم حتى هيج يجازوني !

- ربج عليم وحكيم
قسملج نصيب انه من ردت اشاركج بي ماخلوني
الله اعلم بيمن كلبج محترك ودزلج نبع ماي بارد بس الج يبرد كلبج بي

- يعني يحبني !

ضحك وباوع لحيدار وهو هم ضحك بس اني خفت
رجف كل جسمي ونشف ريكي والنبض صرت احسه براسي يدك ..
كمت عفتهم وطلعت بره للطرمه امشي ولازمه كلبي
واباوع للسمه ...
' اني يقسمولي هيج نصيب !
اني وصخه ومنبوذه من الدنيا كلهه
عشت زينه بس بجذبه وطلعت من جذبتي مريضه وخسرانه
عمري كله ماسويت شي زين
اني مو مثلهم .. شلون ينطوني هيج بيت وعين مي !!!
.
منو يحبني اني الله يحبني ! يعني ردلي بنصيب جبير لان يحبني !
.
سمعني بهذاك اليوم من بجيت وحدي وحاجيته
شجان ينفهم من حجيي ! اني ماذكر شحجيت من حركتي بالبجي مادري بروحي شحجيتله !!
'

فزيت من حسيت بواحد لزمني .. شفته حيدار ديكولي
' شبيج تبجين .. شبيج خايفه! '
واني ساكته ولازمه ايده بايدي الترجف
خفت حيل خفت ... ومابيه بعد امشي ...
كعدت على طارف الحديقه وهو يمي يفرك بايدي
ويهديني
بس اني دخت من الرهبه بعد نشف بيه الدم
خليت راسي عليه وغمضت ...

بقى هو كاعد وحاضني هيج على صدره واني بحالة فراغ ... مادري شصار بيه بس صدمه اكبر من استوعبهه
' اني يخافون عليه وينطوني نصيب يبرد الكلب ! هو اني شنو وهيج ينطوني وماينطون للاحسن مني بديانتهم!'

احمد جابلي مي شربته وهو صار يصب بايده ويشمر على وجهي ويشاقى .. وحيدار وكف واخذ بايدي ورحنه جوه ...
لكيت ابوه صاعد نايم واحنه هم صعدنه بغرفتنه ..

كعدت احجي لحيداار..
- شلون هيج يصيرلي حيدار خاف ابوك متوهم
تره هو عباله اني زينه بس اني مو هيج

- ليش بويه شبيج مو زينه !

-شنووو شبيه نسيت حياتي شلونهه وشمصخمه بيهه
شلون هسه ينطوني بيت وعين مي وغزال ومدري شنو بعد هاي الشغلات كلهه مو الي
لهذني الزينات اني ماصارلي سنتين ..ثلاثة من عرفت الدين

- بويه هو بالوكت لو بالمضمون
انتي جان ناقصج تعرفين الطريق لله وعرفتيه بعد انتي عنتي نفسج وغيرتيهه ورضيتي ربج
ليش تتعجبين من الرؤيا !
هذا قليل مقارنة باليقسمه الله لليدخل الجنه
جا هناك شيصير بيج ! تموتين نوبه الثانيه !

- عزااااااا اني يخلوني بالجنه يمممممه حتى اليسمعك هسه  يطك اصبع باصبع ويشبع ضحك عليه

- هاي شبيج رور
جا انتي مو تغيرتي ! جا بعدج بالج ترحين للنار !!

- مادري لا مفكره بجنه ولا نار وين ميشمروني عادي
فاجأني ابوك فااااجأني .. كلبي راد يوكف الا شويه

- حبيبي  تستاهلين نصيبج من الراحه هذا
انتي كلبج طيب وخوش مره معدله
عيالج راضين عليج وااانه رجلج راضي الف مره عليج هاي كلهه زينه الج وتخففلج حساب
وانتي كلتي تحبين ربج وتحترميه وماتعصيه بعد
هاي كلهه تستاهل نصيب زين

والله هسه انه لو عندي ابن وابني تعبني بصغره وعصاني وراح كبر ورجعلي ندمان ويكلي
احبك بويه واحترمك وماتعبك بعد والله والله ارضى عليه وانساله كلشي واخليه بنص عيني
جا شلون وربج هو الي خلق وكل خلقه عليه عزيز
اكثر من معزه الضنى للبني ادم

بجيت وخليت راسي بنص المخده وهو كعد يمي يلعب بشعري ويبوسني ...
رفعت راسي وباوعتله ...
- حيداار هسه اني شسوي.  ؟.
يعني شلون ارد شكر ؟ شسوي كووووول يلاا

-هههههه كيفج حبييي انتي بعد شلون يعجبج كلشي مقبول منج

- اهوووو ماتنطي كلمه تشفي الكلب

كمت نزعت ملابسي ومسحت المكياج واجيت تمددت
وهو يتحارش قفلت عليه ماكو اليوم ...

كعدت الصبح ولكيته مموجود .. لبست وغسلت ونزلت شفتهم كاعدين ملتمين ديتريكون ..
كعدت اني وريتا جابتلي اكلي اكلت وهي لمت المواعين
وجابتلهم بعد جاي ..

سيف يريد يرجع للبيت واحمد يريد يبقى يكول عجبني الدلال هنا بس أشر وكلشي يجيك .. وضل يحسد بحيدار
وهذا تخبل يكوله اني ما طيح حظي غير عينك ..

ماقبلو يبقون ع الغدا وحيدار اخذلهم سياره توصلهم لباب البيت بثمانين الف ... ودعناهم ورجعنه كعدنه بالصاله
وهو ضل يكرص بيه ويكولي ..

- خباثه بطليهه وياي ماخذ اجازه اليوم ماكضيهه تصفن

- غضب الله على الدوا

ضحك وعضني بزندي ويتحيلي حتى نصعد
وصعدنا لحد قبل صلاة الظهر بشويه يلا راح يسبح
واني ضليت منعسه ... رحت عليه للحمام وطلعته من جوه الدوش حتى اسبح بس ابقى بعد دقيقة النوب انام

صليت ونمت لا غدا ولا دوا اخذت .. نمت لحد صلاه المغرب هو كعدني وصليت ونزلت اتعشى
شفت عمي هنا تعشى ويانه  وصعد لغرفته بعد مانزل
وحيدار سوالنه كعده بالحديقه وصارت ساعه عشره
كالي ....

- نصعد تحضرين ملابسي هم انام من وكت باجر عندي دوام

صعدنا واني فاتحه الكنتور اختارله ملابس وهو
نزع ملابسه وسوى الضوا خفيف ..
كلتله ...
- اكعد راحه حويدر

- شسوووي متكليلي شسووي انتي متكعدين راحه
تحضنين بيه شترديني اصير وانه اشتم منا ومنا

- ههههه لا والله كل ماحضنك اخذلك واحد شنو هالمنطق هذا ابويه انته

- هسه هي مره حبيبي ثكيله عليج راحتي !

ضحكت وخليتله ملابسه بتعلاكه وعلكتهن باب الكنتور
وحضنته ..
- حيااااال انته حيااااال

ضحك واخذ راحته بعد وهو من تصير صدك ماكو شي اسمه مره .. الا اني اضوج واكوله كافي يلا يختمهه ويجي ينام على ايدي يرتاح شويه ونروح نسبح
واول ما يخلي راسه ويتغطى رأساً ينام ...

مشت الايام حلوه .. الكل مرتاح وصار رمضان
اني هديت العشره الاولى من رمضان فطور لمخيمات النازحين ...
كل يوميه اوصي عمي يجيب مسواك شكل واني وريتا بالبيت نرتبه .. بمواعين مسلفنه ونخليهن بعلاليك
كل علاكه بيهه الصمون والاكل والفواكه واللبن والتمر
ونخليهن بكراتين وياخذهن حيدار العصر ساعه اربعه هو يطلع يوديهن الهم ويفطر هناك ويرجع يتعشى هنا
عشر ايام اني خلصت الراتب مال ابويه كوله صرفته
الهم كله دزيتلهم مشاوي من الصبح عمي يخابر يوصيهم هالكد عدد يريد اليوم ويروح يجيبهن من يكملن ...

من يومهه حسيت بنشاط اكثر بحياتي وهمه اثنينهم ما يجادلون من يشوفوني عاجبني هالشي ومرتاحه بالصرف الهم يروحون يساعدوني ويفرحولي من افرح ...

رحت حللت ونازله نسبه الفايروس هواي كال الدكتور احتاج لقاح ويقضي عليه فد مره .. بس اللقاح احصله من مصر همه عدهم اللقاح وعلاج خاص بس بمستشفياتهم
مايصدروه لاي دوله الا واحد يروح يجيبه منهم ...
وكتبلي طلب وكبسه ويه التحاليل والفحوصات كلهه
وعمي كال اني اسافر اجيبه واجي ...

شهر وسافر عمي لمصر وبقينا اني وحيدار
هو هم فحص ومتحسنه حالته كلبه راجع قوي
وبقينا على اتصال ويه عمي لحد ما كال حصلته وراح ارجع باجر ...

فرحت وضلينه ننتظره ساعه ساعه .. تلكاه حيدار بالمطار وعمي جايب اللقاح وعلاج كامل هم وياه
بعلبه حافظه للبروده ...
شكد لحينه علينه يكوللنه سعرهن ما قبل ...

هناك معلمينه عليه شلون استخدمه وهو ضل متابع ويايه مده اسبوعين ورحت حللت الفايروس انقضى عليه

صار انتصار عدنا حتى ريتا فرحانه وتهوس
تشكرت من عمي هوااااي وهو يكولي
هذا واجبي لعد اعوفج تموتين !

جنت مرتاحه ونشطه وكعدت ويه ريتا نباوع باليوتيوب نسوي حلويات بس قليله دهن وشكر ... وقررنا نسوي قالب كيك ونستخدم عسل بدل الشكر ...
هي تكولي اكعدي اني اسويه واني مااريد اكعد
اريد اسويه بنفسي ...

سويته وهي تعرف بالتزيين صارت تكص الكيكه بالخيط وتحشيهه طبقات وتزينها بالكريم واني ارش عليهه فستق حلبي ومبروش ككو ....

كلتلهه نسويهه مفاجأه لعمي ونرتبله جو بالحديقه
واخذنه غراضنه وطلعنه للحديقه نرتب ونخلي شمعدان
طويل وسويناله كرسي خلينه عليه عدنا غطوه مال ديكور صغيره .. ورتبنه الكرسي بيهه وخلينه كوشه
وخلينه الكيكه طفينه ضوا الحديقه ودخلنه جوه نركض اني وياهه ....

حيدار جان راجع من الدوام و نايم عباله نكعده على العشى واحنه غلسنه على العشى التهينه بالكيك
وعمي طالع ضالين ننتظره ...
اني كاعده يم حيدار اراسل عمي واخبصه حتى يجي نتعشى سوه وريتا جوه تسبح  ...

سمعت صوت باب الشارع انفتحت وصوت السياره
واني كعدت حيدار خبصته خبص لحد ماكام ونزل
وياي ...
يكولي شمسويه بيج شي ! واني اكوله ابد حبابه ...

طلعنه للحديقه وشفت عمي واكف وعاقج وجهه
كالي ...
- شعدكم محتفلين

حيدار كال ..
- منو  محتفل ! المن نحتفل !

واني ضحكت وجريتهم من ايدهم اثنينهم
كلتلهم ...
-اااانييي عجبننني اسوي كيييك باااايدي اوووكي بايدي سويت كيكه ندلل بيهه عمو لان تعب وياي خطيه

حيدار كال ..
- يستاهل والله  شنسوي مانكفي حكى

ضحكت وباوعت لعمي كلتله ...
- يلااا متكعد مو محضريلك كرسي ملك ديلا اكعد ماعت الكيكه

ضل يضحك ويحك بلحيته .. كالي ..
- هذا كله انتي سويتي ! خبطتيهه بايدج الكيكه !

- ايييي وداعتك عمو سويتهه وسويتهه
وريتا ساعدتني شويه يعني بس كووووله انييي

كعد هو واخذ سجينه راد يكصها واني لزمت السجين وماخليته .. رحت جوه ركض وصحت ريتا اجتي تركض وجريتهه من ايدهه ضليت ارزلهه
دتحضر ويانه ليش تبقى وحدهه جوه ...

وكفنه اني وحيدار وريتا وعمي كاعد على كرسيه
ويكص الكيكه واحنه نصفكله ...

اخذت القطعه الاولى بالماعون وكلته منهه وبعدين وكلت حيدار ووكلت ريتا .. واني ناسيه شي اسمه اكل
خليتلهم قطعهم بمواعين وانطيتهم وضليت كاعده يم حيدار ...
هو وكلني شويه منها بس ضكتهه طيبه وزينه لاول مره واحد يجرب يسوي كيك ...

عمي كلش فرح بيهه وكالي بقوهه الي وحدي اكلهه كل مايعجبني ..انتو سوو الكم غيرهه ..

احلى ايام صارت عايشين سوه مرتاحين ومتفاهمين
لحد ما دخلنه ٢٠١٩ ...

حيدار يريد ياخذني للنجف نزور ونشوف اهله ويسوون الذبيحه واني احس نفسي بيه تعب ماجازفت بالروحه ..

اني رجعت اكل وجان وزني ٤٩.. بديت العب رياضه
واكل على امل ارجع جسمي مشدود ومثل قبل مربرب وحلو ...

بس يوم عن يوم اواجه مشاكل بالمعده .. من سوء الهضم الى ان وصل للنزيف من الحلك ...

راجعت دكتور وعلى اثر الفحوصات صاير مرحله متقدمه بالتليف ميبسه جزء الكبد الي يستقبل الدم من الوريد البابي فيضل الدم محبوس بمكانه مايكدر يدخل للكبد الى ان يرجع ويسبب اذى بالمعده ونزف واذى بالامعاء ...

رجعت اكطع الاكل وبس على العصاير وهم نفس المعاناة..اذا انام احس على واحد منهم يمسح بوجهي مغرك بالدم .. حتى مرات اكعد الصبح لثتي تنزف وحلكي ريحته ماطيبه باقي الدم متكتل بطوارف الاسنان

ويصير عندي ارتفاع بالضغط راسي دائما يوجعني
وعانيت معاناة ماخلتني اتهنى لا بكعده ولا نومه
وزني قليل وجسمي ضعيف بس بطني جبيره عندي تضخم بالطحال والكبد واحتباس سوائل بالبطن
كله من تليف الكبد ...

نهايه شهر الثامن ٢٠١٩  ..
سويت عمليه يغيرون بيهه مسار الدم بالاورده الصغيره الي ديوكف بيهه الدم ومايدخل للكبد ومخلي يحتقن

رجعت تعبانه وعيوني صفره ورفعه اصبع مابيه حيلهه
ضليت حتى من فراشي مااتحرك على كد الحمام واحسه معضله اذا رحت واجيت ...

عمي صار عنده شغل بميناء البصره ديستلم وجبه سيارات جديده وعنده مشاكل بيهه  وكال يطول شهر يلا يرجع للبيت ..

حيدار دوامه ماكدر ياخذ هواي اجايز بعد كالي ...

- اجيبلج الممرضه هذيج نفسهه تداريج هنا مو احسن ؟
اني اطلع وريتا ماتضبط علاجج
خلي اجيبهه تنتبه عليج هذا الشهر لما تصيرين زينه
وتكومين على حيلج نحاسبهه ونرجعهه لبيتهه

- اووكي بس وين تلكاهه..

- عندي رقمهه بعده محفوظ اخابرهه واتفق وياهه

-اووكي جيبهه

وره ٣ ايام اجتي الممرضه .. أمن حيدار عليه ورجع لدوامه ...

اني تعبانه وبس نايمه بغرفتي كل يوم اكول هسه اموت مااصحى بعد .. وبقدره الله يصبح عليه الصبح ..

حيدار يبقى وياي بالليل يحاجيني واني كلمتين واسكت بعد مابيه حيل اجاوبه .. هو هم يعوفني ويشتغل على لابتوبه ...

الممرضه كاعده بغرفتي النهار كله بس من يجي حيدار تطلع ..
موصيه ريتا تنتبه عليهه اي شي مو طبيعي تسوي تجي تكولي ...

ذهبي وفلوسنا جنت ضامتهن بغرفه عمي وقافله عليهن
والمفتاح مضموم جوه الدوشك النايمه عليه ...

خلص شهر التاسع وصار هواي على العمليه بس بعدني حيلي مصفر ..

يجيني حيدار اعصاااااب صاير الهدم الي على جسمه ماطايقه ...
يدخن هوااااي ما تنزل الجكاره من ايده
مامرتاح بنومه ولا يشتهي ياكل مكضيهه بس جكاير ويطلع من البيت ... يجي تالي الليل يضل كاعد وياي شويه ويضل يحاول ينام ميكدر ينام .. يفتح حاسبته ويضل سهران للصبح عليهه ...

عمي خابرته اريده يرجع طول هناك وهو كالي
مسدوده طرق بسبب المظاهرات ....

الممرضه بقيتهه وياي شهر ثاني لان بعدني هسه يلا بديت شويه اتحسن ... ضغطت على نفسي ورجعت وكفت على حيلي ونزلت جوه بس على كد
كاعده و اكلي قليل واتابع تلفزيون...

اول ايام كدرت امشي شويه واكعد ويه حيدار جوه
احاجيه واحاول وياه يغير مزاجه بس هو متغير
مخنوك وبس يتأفف وحتى حجي مايعجبه يحجي

ما طولت اسبوع وانتكست حالتي .. صار عندي اغماء
ودخلت مستشفى خمس ايام ..
التليف وصل عندي بالمرحله الرابعه وصار اكو رأي بين الاطباء اسوي عمليه واشيل الطحال

حيدار محتار وياي وعمي مناك يخابر يكولي لا لتسعجلون بالعمليه بس ينفتح الطريق واكدر اجي لبغداد
نحاول نغير المستشفى اما باربيل او نحجز لتركيا

طلعت من المستشفى وبقيت بالبيت بغرفتي ماتحرك من فراشي ...

صار حيدار دوامه مكثف يطلع من الدوام لليل
ومرات يروح يومين ضبط يلا يرجع نص نهار ويطلع

وبيوم هو راجع للبيت واني فوك نايمه مادري بي
واجتني ريتا خايفه وتكولي ..
حيدار متصوب وجاي كله دم ...

دزيتهه تكوله يصعدلي ... وهو اجاني دايخ ومتصوب بايده مداويهه بس ملابسه كلهه دم  و ملطخه بالصخام
وجهه هم مترب وكله سواد ...

جفلت من شكله هيج وصحت عليه....
- وييييين جنت حيداااار وييين جنت

كعد يمي ويريد ينزع قميصه مايكدر ايده توجعه
كعدت اني وصرت افتحله قميصه وهو كالي ....

- جنت اتظاهر

- عزاااا بعينك شعندك رايح تخبلت !!!
تريد تموتني حيدااار عايزني قهر

- رايح ادور وطن

.
.
يتبع💕