رواية ماء مغلي الفصل الخامس والستون 65 - بقلم Zoka 🌷

📌تمنع الردود في التعليقات 📌
.........

..♣️🩸   ماء مغلي  🩸♣️..
* adzzon *

كعد يمي ويريد ينزع قميصه مايكدر ايده توجعه
كعدت اني وصرت افتحله قميصه وهو كالي ....

- جنت اتظاهر

- عزاااا بعينك شعندك رايح تخبلت !!!
تريد تموتني حيدااار عايزني قهر

- رايح ادور وطن

كالهه و ذب جسمه عليه .. ضليت اصيح للممرضه تجي تشوف شبي ...

اجتي واني لازمه وجهه اضرب عليه وهو يفتح عينه شويه ويغمض ..
قاست ضغطه هابط فد مره .. خلتله مغذي ونومته يمي وطلعت ...

اباوعله وجهه ماتبين ملامحه من السواد
هذا قميصه مو نفسه الي طلع بي للدوام الصبح .. ايده مضمده وعليهه طكع الدم بعده ناشف على ايده ...

ريتا جابتلي طاسه مي وخاولي وصابون وضليت افرك وجهه بالصابون وانكع الخاولي وامسح وجهه ...
نزعته قميصه المشكوكه ايده ومتروس دم
وهم نظفت جسمه
وهو يحرك راسه ويصيح ..

' خمسه تصاوبو خمسه '
' اخذو حمودي مختتتتتتنك اخذووه '

لطمت على صدري وضليت اصيح ..
عزاااا بعينيي عزاا بعينييي لك وين رررحت انته وين ذبيت نفسك ...

امسح بجسمه وهو كل شويه صايح
بأسم ' حمودي '
لبسته ملابس نظيفه واخذت بنطرونه
دورت بجيوبه ...

لكيت عنده ..
ورقه بيهه جدول احصائيات تشرين ١،٢/
٢٠١٩ ... والجدول عباره عن تسلسل اسماء ولد وكدامها حقول مأشره برموز كل كم اسم الهم رمز واحد ...

طبكتها وخليتهه على جهه ودورت بمحفظته
مالكيت الباج مال دوامه .. وماعنده بمحفظته بس ٥٠ الف !!!!! ...
اني ادري عنده فلوس مبقي هنا بس هم شايل وياه مبلغ زين وين صرفهن !

لكيت مخلي جكاره عليهه اثر دم لافها بكلينس
ومخليهه بالجيب الصغيرون الي فوك من الجيب الجبير ...

فرغت جيوبه ودزيت البنطرون بيد ريتا كلتلهه .. اشمريه بالحاويه ...

اعصابي والخوف عليه رجعلي شويه من حيلي وخلاني اعوف النوم واضل كاعده
يمه اداريه ...

كعدته وصرت اريد اوكله وهو مايقبل ياكل
دفع الصينيه وطشر الاكل بالكاع وضل يصيح ....
- ماااااا اريد اكل كلشششي مااريد

- شبيك حبيبي لا هيج اعصابك شويه تهدا

- لج ريري جاااااي يخونون بيهم
راح يذبحوهم بالليل .. ولدنا راح يتذبحون

سكتت وضليت لازمه رجله واباوعله وهو يدك على راسه ويكول ..

- راااااح يذبحووووهم ياااربي دخيلك بغداد راح تصير دم
ددددم وحك علييي دم راح نصبح نمشي على دم

- مو كالو سلميه وبس يقمعون بالدخانيه مايرفعون سلاح !

- جذذذب كله جذذذذذب
كلشي جذبه ااااحنه عايشين بجذبه ريري
انه. انه
انه بايدي حولت بريد مفتوح الشفره بأمر تصفيه ١٥٪؜ من المتظاهرين كل ليله بغداد خاصه والمحافظات اذا ساءت السيطره عليهم يرفعون النسبه ل ٣٠٪؜ خلال اليوم الواحد وبغداد ترفع لحد ٢٥٪؜ باقصى حاله خلال اليوم الواحد
.
بغداد راح يكلبوهه دم .. ساحه الطيران والخلاني والسنك هدف عدهم جاي يشتغلونه تصفيه من كل جهه
.
اااانه فكيت البريد و الاااامر بايدي ورسلته للمكتب الخاص بس يطبعوه ويوقعوه يرفعوه امر اداري بحاله طوارىء ويتنفذ
وتتكتل الشباب والله اذا ما ذبحوهم وخلو الشارع دم راح يفتحولهم سجون خاصه
انه كل يوم اقرا بعيني اقتراحات تشيب الراس

- عزااا عزااا يمه عزاا راح نرجع لنفس الحرب !
شيرررردون منهم ميعوفوهم مكافي الضيم منهم
هسه شباب خليهه تصيح وتكعد بالشوارع شعليكم بيهم

- ريرررري راااح انجلط وعلييي الي شفته بعيني ماكدر اسكت عليييييه
دخييييييلك رببيييييي ولدنا شبعو ضييييم

حضنته وهو بجى ويصيح ...
- حمودي ابو الجاي مات مخنوك
ماكدرو يسعفوه خافو من القناص
راح حمودي راح بعده جاهل مات على الرصيف مخنوك محد شاله

بجيت وانه حاضنته وهو يشهك ويبجي عليهم
وخرت منه ومسحت وجهه وضليت اهدي بي
وهو يكولي...

- راح يذبحوهم ريري شسووووي شسوي
شسوووي كليلي

- حاجيهم للولد بالخلاني خلي ينسحبون
خلي يتجمعون كلهم بالمطعم هناك أمن مكان الهم

- مااااكدرت والله ماااااكدرت
رحت انه كل يوم اغير ملابسي واتلثم واروح
اريدلي واحد قائد بيهم احاجي مالكيت
كلهه ملتهيه لو تتقدم لو تنسحب من الجسر
لو يركضون مسعفين

- ماكو يعني ولا واحد ثقه تحاجيه حتى ينبههم

- مااكو ثقه ريري انه امشي بينهم واخاف منهم هذوله ماتدرين شزارعين بينهم
انه ضليت حاير المن احجي !
.
الجيش نصه مجمد ماعنده سلطه بعد يتحرك حمايه مواطن وكفتهم هاي بس شكل وساعه الساعه ينكلبون ضدهم على التلفون يتحركون
.
الثوار محتارين يركضون من مكان لمكان
وماتعرفين الزين من الموزين بيهم
انه لكيتلي واحد هذا يكتب الخطاب للثوار بالمخيمات
رحت اريد احاجيه
اكله خويه رايد الامان وانطيك حجايه امان الكم
يكلي ماريد تدخلات من اطراف واحزاب
احنه ثوار احرار
لااا اكدر اكله انه مكان شغلي هذا وانه هيج اعرف هذا كبل راح يشهرني بالتحرير كلهه
وانه لو بس انسمع اسمي خاطي خطوه وحده للتحرير وعلي ياخذوني اعدام بساعتهه

تدرين انه اجي للبيت واضل كاعد فوك الساعه يلا اطلع وهم اروح لغير مكان ومناك افتر ساعه يلا اصعدلي بتكتك وابدل قميصي بالطريق واتلثم حتى اكدر اوصل للتحرير
ومأمن محد يلحكني ويدري بيه طالع مظاهرات

- اووووف يااايمه اوووف شلون بينه
حيدااار متروح هناااك بعد لا تشيب كلبي هو خلصان من القهر اكعد هنا واستر علينه

- لججججج شكعععععد الولد راح يتذبحون
انه اضل هنا اناطر خبرهم !

- لعد روحتك تغير شي ! هاي رحت ورجعتلي متصوب مره الثانيه الحك اشم بيك نفس !

ضل لازم راسه ومدنك واني لزمت وجهه
كلتله....
- سويلك حساب وهمي وراسلهم للولد خلي ياخذون حذرهم
حيدار روحتك خطره

- مايصدكون بيه ونصهم جواسيس انه طلع حظي الولد هذا جاسوس شسوي !!!
اعم عليهم النوب

- جواسيس لمنو ؟

- للحكوووومه غضب الله عليهم
لج بوووويه انتي مااااتفهمين انه ششوف هناااااك بالدوااام
الحكووومه خايطتهم للمتظاهرين خوووط

لج كل عشر متظاهرين بينهم ٣ جواسيس
واحد مايدري بالثاني وكل واحد تابع لطرف
والاطراف كلها تابعه لمجاميع توصل كلشي لواحد بالحكومه
هذوله احصائيات تتحول كل يوم ملفات ملفات تنقل باسمائهم وارقامهم وعنوانهم

- راااااحو الولد لعددددد والله مايسلمون منها

-جااااا شجاااااي احجييييييييي
اكلهه خااااانوهم الولد راح الينكتل منهم ينكتل واليسلم يعتقل

- اويليي يمه
زين هذوله منو ؟ صدك السرايا !

- يااااسرايا انتي شبيج بوووويه ماتسمعين جاااي اكلج حكوووومه حكوووومه
وزير ورئيس وجيش عراقي حكومي
هذوله على صفحه شعليهم
همه شضل منهم السرايا كلهه صارت بالخط الاول الهجوم وتطشرت روسهه بالقنابل
والبقى منهم لاحكه السره للموت
هذوله يكرهونهم كره ابليس وفرصه صارت وراح يكلبون مناطقهم فواتح

- اييي تره ماحجيت عليهم بس داتاكد
من الخبر لان الفيس والانستا مكلوب عليهم
واني صار هواي ممتابعه اخبار داشوف خاف صدك صاير شي

- وحك ربج هذوله الناشطين بالفيس ويرفعون شعارات على السرايا هذوله ٦٠٪؜ منهم اتباع للحكومه المدسوسين بين العشره متظاهرين
ااانه شايل ورقه وينهه جانت بجيبي امشي جيبيهه

- هاي موجوده مال احصائيات مو ؟

-ايييي هاي انه سويتهه بحاسبتي
اشتغلتهه بتعب وتأكدت من كل اسم بيهه
مرات أستلم ملف بيانات الاسماء للجدد
وبين ما احوله للمكتب الخاص انه الكطلي وين السهل رقمه احفظه وارجع اخزنه بملفات حاسبتي بالبيت وجمعتهم هذوله
دورتهم بالفيس والي طلعلي حسابه لكيتهم ناشطين
وعلييي منشوراتهم كبل ساعه و كبل دقايق
بالتحرير
وهمه مندسين واسمهم يصعد يتثبت ويه البقيه
بقوائم عبرت الالف

- وانته شعندك ماخذهه وياااك وهي هيج ورقه خطره

- شسوووي ريري جاااا اضمهه بكلبي واسكت
ردتلي وااااحد بس واحد يوكف وياي ويطلع ثقه واسلمه كل شي عرفته جان وعليي
خليتهم يجرون الولد كلهم يكتلوهم ويخلصون
بس مااااااكدرت
ماكدر. أمن اخاف هذا اسمه هم وياهم وانه ماشايفه
ريري احنه حاسبتين بمكتبنا تستلم ملفاتهم
تتخيليييين شكد مصعدين اسماء لحد هسه
جااااي تستوعبين هذووووله شيكدرون يسوون بنصهم !!!

- راح يغدروهم اكيد وكت الهجوم كلهه تنسحب ويبقى ابن الخايبه يستشهد

- شلوون ااااانه اضل ساكت وأدري بيهم راح ينغدرون !!!!
والله امشي بينهم هناك مادري امشي ويه اليسعفون مادري امشي ادورلي واحد ثقه
واتفاهم وياه مادري اروح وارجع الغمط بوجهي من صخام التايرات بالكاع
البجي عليهم والله شك صدري
ريري اليحاجيني ويجيبلي بطل ببسي وكمامه وره شويه اشوف الولد شايليه يركضون بي للمخيم

راح يخلصون عليهم وماااااينطوهم وطن وحك عليييي مصيبتهم مصيبه كربلا ماضل بيهه بس النسوان والايتام فوك الكبور

- النه الله
ياعيني ارتاح وفكر زين هيج كلشي متكدر تسوي بس تقهر بروحك

عفته يتمدد ويتغطى وكمت فتحت الباب وطلعت كعدت على الدرج وصحت ريتا
راحت نظفت الغرفه من الاكل الي تطشر
وضليت اني كاعده وافكر بكلامه ....

العراق وين تاليته يصفى ؟
ياايد هاي التوكفله حمايه ؟

ليش البلد هذا دومه ينخان وكلمن يوكف يشدله الظهر بالوفى يروحله شهيد !

طلعت ريتا واني رجعت للغرفه وبطني توجعني ... يمي حبوب مسكنه اخذت وحده
وتمددت ...

غمضت وخليت ايدي على عيني وحيدار
شال ايدي الثانيه وخلاهه جوه راسه وتدنى يمي حضني ويكولي..
- دنيا ليل صارت راح يغدروهم

- قسمتنه هاي حيدار قسمتنه ننغدر وكل يوم نزف فيلق شهداء

- اريد اسوي شي ريري اريد احجيلهم
بس بيمن أمن !!
كلهه تخوف ما يتأمن بس اليوكع شهيد

- حاجي الفريق الطبي همه اكيد اكو اطباء كبار وياهم ومخلصين للثوار

رفع راسه من صدري وصار يدور على تلفونه.. اخذه وشويه وكالي اريد تلفونج
وانطيته اله ...
راسل من حسابي واحد يوتيوبر
كال هذا دائماً يكعد ويه المسعفين
دزله رساله كتبله بيهه تنبيه على الهجوم المخطط يصير بساحات التظاهر وكتبله الاوقات المتوقع بيهه وكتبله اكو بينهم ولد اعمارهم من عشرين الى اربعين هذوله خطر نصهم مضحوك عليهم ومستغليهم يسحبون منهم اخبار الثوار ... ووصاه يوصل الحجي لواحد من الدكاتره خلي يشوف حل وياخذون احتياطهم بالليل ..

وره ما الولد قرا الرساله وراد يتاكد وضل يسأل المصدر منين لهالكلام هو ماجاوبه
بعد وعطل الحساب ...

باوعلي وكال ...
- جازفت و حجيت بس بعدني خايف عليهم
وخايف مايصدكون بالحجي

- مابايدك شي حبيبي هذا كل التكدر تسوي

رجع نام بحضني وضليت افرك براسه وهو مغمض وعيونه تدمع وانه امسحهن وادعي نعديها على خير وبدون دم ..

غفيت شويه وياه وحسيت عليه كعد يدخن
باوعتله واني تعبانه ولزمت ايده ... هو يكلب بالتلفون واني كلتله ...

- حيدااار لاتغافلني وتروح للتحرير اني احتاجك اكثر منهم

نفخ دخان جكارته وحط ايده على شعري وكالي ..
- لو مو انتي جان انه هسه ملازم الجسر واصبح شهيد واخلص

-لتموووووتنيييي حيداار

- كلت لوووو لووووو
ماروح نامي وعلي مااروح واعوفج

لزكت بجسمه وغطيت راسي وضليت اغفى واكعد اتأكد هو بعده هنا .. وصار الصبح
ودك منبه التلفون ...
كعدت اباوعله يريد يبدل ويطلع للدوام
ضليت خايفه عليه ينكشف من صواب ايده
كلتله...

-متكدر تاخذ اجازه ايدك بعدهه متصوبه خاف تبين ويخلون عينهم عليك

- مااكو اجايز حاله طوارىء وانذار كلهه لازم تداوم وشفتين مسوينه
راح البس ستره والله الحافظ

كمت دانطيه فلوس وكلتله ..
- فلوسك وين صرفتهن ؟

- تبرعات اشترو بيهن فراش وملابس للولد

- عفيه عليك زين سويت
وهاي جكاره المن ضامهه!

اخذهه من ايدي وباسهه وخلاهه بجيبه
كالي ..
- هاي جكاره الشايب جان هستوه يريد يدخن واخذهه مني وصار هجوم وركضنا من مكانه وهو وياي ايده بايدي ويركض تصوب بجتفه ونزل الدم على ايده الشايل بيهه الجكاره
خلاهه بايدي رجعهه ووكع

- يعني جكاره شهيد صارت لو جريح !

- جكاره جريح راحت لجريح

اخذ نفس واستغفر الله واني لزمت وجهه
وكلتله..
- حبيبي ادري تعبان وهمك بكلبك ضامه بس صير قوي اووكي هذا الوكت يحتاج كل الناس توكف سوه بقوه

باسني براسي وضل مخلي ايده على ايدي بوجهه .. كلتله..
- خلص دوامك وارجعلي انتظرك لتعوفني وحدي
مااسامحك والله اذا طلعت للتحرير
.
- ارجعلج حبيبي... ديربالج على نفسج محتاجج وياي ارجعي لحيلج يابعد حيلي انتي

حضنته وشميته من ركبته وهو اخذ محفظته
وطلع ... نزلت وراه اشوفه يطلع من البيت
وهو عاند مايريد ياكل وضليت اليوم كله كلبي عليه خاف يتخربط ويدرون بي متصاوب

صار العصر وما رجع واني لازمه التلفون واخابر عليه مغلق بعده .. وظلمت الدنيا
يلا خابرني ...

- حيدااار وينك وييينننك صار الليل ماخلص الدوام

- حبيبي بعدني بالدوام والله ماكدرت ارجع اليوم كلنه خفر

- لتخبلنننننييي انته موظف مو عسكري شيسون بيك خفر ! خلص وكت دوامك شيردون منك بعد

- جايه لجنه ولازم نضل متواجدين لحد ما يرجعون يلا نبدل شفت
لان الشفت الثاني ماعدهم نفس الصلاحيه الي عدنا
ماكدر افهمج حبيبي شويه قدري وضعي

- يبوووو يبووو من شلاع الكلب هذااا
حيدااار اكلت ؟

-اي اكلت وهسه هم طلعت اتعشى وخابرتج
لتضلين تنتظريني مارجع اليوم

- زين بس كولي كولشي امان وتمام ! لو صاير شي

- ياروحي انه مادام داخل البنايه بامان
خوفج من الشارع صاير خطر علينه
ويه جماعتنه امان شعدنه محد يكدر يوصلنه

اشتاقيتلج رايتي ماشبعت من حضنج صاير بسرعه يخلص الليل كلشي منفتهم منه

فهمته اكو الي مراقبه عاد كلتله..
- حبيبييي بس ترجعلي ادللك بعد من العصر لحد العشى مااعوفك تنام وحدك بعد كووله حضن وحضن تره داشتاق وانته مكضيهه نوم والليل هم ينكسر كلبي عليك
وانته تكولي ماااشبع ! هو شكد تكعد وياي انته بس نايم

- ههههههههههههه زين زين بعدج صابره عليه

- اطلكك بعد بس تعوفني وتنام العصر
اني اليوم كله انتظر يخلص دوامك وترجعلي وانته كبل وجهك للمخده ادري دكول خلي اشوف المره شبيهه مابيهه عايفني مكابله الخادمه والحايط

- عممممي صاار بعد ما ناام صااار
بس انتي سويلي واهس للكعده مو تستلميني تحقيق وكال وكلت .. اذا تتلكيني هيج شسوي ! اشرد منج وانام

-ديلااااا هسه شحاجين حيداااااار

-هااااا عينييي

- شو طخ بالي خاف دتروح على بنات وترجعلي نعسان ؟ ليش كل مره تخلص دوام نعسان واليوم مصحصح وتحجي وياي

-ههههههههه ولج بوووويه يابنااات هسه ابتليت طولت مكالمه وياج

-لااااااا دتروح على بنات ايييي شمدريني يجوز من هناك تطلع متواعد ويه بنيه وخوووش تعبك ترجعك الي مطفي وادور بس المخده وينهااااا عوفيني انااام

- لا اله الا الله هاااااي شبيج انتي بويه واحد يكعد من الفجر عنده دواااام جااي يشتغل غير يصير العصر هو مطفي بعد يضل صاحي !
يعني الااا رايح لبنات وانعس ! مووو حاله هاي

- زييييين لعد هسه انته شلون راح تسهر وانته كاعد من الفجر !؟؟ تعااال فهمني ليش هناك متنعس بس يمي تنعس ! لييش بدوااامك تصحصح عشره عشره من الصببببح لليل
ويمي اتوسل بيك تكعد تتعشى وياي

- شلووون بلوه هاااي دخيلك ربي
تعال لاتنعس بالبيت شلون شسوي ولج
هسه انه هنا مجبور اضل مصحصح شبيج بويه افهمي لاتعبيني
تره بس تضلين تنكين هيج بعد ماارجع للبيت اضل بالقسم اشبع نوم وراسي بارد وضلي انتي حيري بروحج

-هسسسه ديلا شحجيت
حيدااار اكوولك

-هااااااا

- احبك عووومري شبيك متتحمل شقه
من حبيبتك مريتك شويه هم اضوج ويامن اتعارك لعد

-ههههههه عمي احبج احبج شتسوين احبج
يلا راح اسد الخط هسه وره العشره اخابرج
ديربالج على نفسج

سد الخط واني ضحكت .. تذكرت ايام جذبنا
جان احلى من مشاعرنا الصدك ..

بقيت خايفه عليه .. ليش ديحجي وياي هيج
الا صاير شي وياه ...

كعدت اتعشى وحدي والممرضه وريتا ياكلن وحدهن .. من كملت اكل صار عندي لعبان نفس ..
تعبت من التقيء ماريد بعد اتقيء
حجيت ويه الممرضه وانطتني حبايه مال لعبان نفس وضلت كاعده يمي ...
تكولي
' رجلج ماعنده اخوان اهل ليش محد يجيكم '

اني منا طافره روحي وهاي صارت بوجهي كبل نترت  بيهه ..
' شعلييييج انتي عنده اهل ماعنده شكو حاطه بالج يمه ! '

عوجت حلكهه وكامت .. ضليت كاعده على نار ولازمه تلفوني ... خابرت عمي وهو يكولي راح يرجع ويه سواق الشاحنات بس يصيرلهم طريق ..
بعده بالبصره ماكدر يطلع لكركوك واجل شغله ....

خابرني حيدار بالعشره وهم نفس الحجي يضحك ويسولف على اهله ويتشاقى وكالي الصبح يرجع وسد الخط ..

نومتي صارت بالصاله والصبح كعدت اباوع ساعه سبعه .. خابرته مغلق خطه ...
انتظرت للتسعه هم خابرته جاوبني ..
كالي اكو مسيره طلابيه وهوسه صايره بالشارع وعندي شغله اكملهه بين مالوضع يستقر واطلع ..

غسلت وكعدت الممرضه تسويلي الفحوصات الصباحيه .. ضغط وقياس سكر .. وراهه اشرب عصير واكل شويه شوربه شوفان
خفيفه وتجي تضربني ابر بالوريد ..
وتضل كل ساعتين ابره لحد ما تصير ٤ العصر بعد مااخذ ابر ويبقى بس حبوب التقيء اخذهه بالليل اذا احتاجيتها ...

رجع حيدار ب٣ .. واول مادخل اجاني حضني ويشم بوجهي وركبتي ويكول الحمدلله
اني بعدني متمدده هنا والابره بايدي
وهو مدنك عليه حاضني ...

كعدت شويه ولزمت وجهه ..
- ليش تأخرت !

- دمروني بالدوام دمروووني

نزع سترته وفتح القميص وصار يشوف جرح ايده بي جراحه وصاير ازرك المكان
كالي ..

- يدك  بكلبي خياطهه ولازم اضل احركهه وماخليهم ينتبهون و كلساع اكول هسه تنزف ايدي واروح بيهه

- يممممه الله ستر
بعد ماااكو روحه لو يحترك الشارع متطلع
ممتوازي هيج تجيب البلوه لروحك

- هو انه بالحالتين مكتول مكتول بس اطلع
اذا عرفو بيه المتظاهرين انه هيج شغلي
يلمون الساحات عليه واذا عرفو بيه جماعتي
يحولوني اعدام

- لععععد شودااااك حظي الوداااك
اوووف ياااايمه ااوووف
صيح لهاي خلي تجي تداوي ايدك

صاحلهه وهي اجتي محمره ومكحله
ودت ارزلهه وحيدار اشرلي اعوفهه
وضليت مخوزرتهه لحد ما كملت ضماده وتنظيف جرحه وراحت ..

كلتله..
-شبيهه هاي عرس ابوهه هنا ! اني ام البيت ماتحمر واتكحل مثلهه هي شعدهه غير تحترم ناس مرضى تجي ضاربه المكياج على شنوووو
ليش تسكتني متعوفني افشلهه

- بويه شعليج بيهه هو ياهوه بحالهه
تعبان ريري ماريد صوت وهوسه حجي

- اووووف
ديلا روح بدل بين مايسوولك اكل

راح صعد واني عيني صارت على الممرضه بعد كلبي لعب منهه ... اجتي كلتلي
' بعد ساعه للابره راح اصعد ارتاح شويه واخابر امي وانزل بالاربعه '

ماخليتهه تصعد .. كلتلهه دااحس نفسي دايخه وممرتاحه ابقي هنا خاف احتاجج واطلعي خابري بره اذا تريدين لو تاجليهه...

بقت تكولي شمس وهوا بره وهسه ماتاخر ماخليتهه تصعد ...
نزل حيدار وكعد يمي واني كلتلهه...
' يلا من رخصتج '

راحت صعدت واني كلتله..
- هاي رادلهه طرده

- ريرررري بدون منكه لخاطر ربج عوفيلي سوالف النسوان

-يلا اووكي اووكي
شصار وياك البارحه !

- همه من بدات المظاهرات لليوم الجماعه خايفين من الانقلاب .. واتصالاتنه بعد صارت مراقبه ... همه ما حجوهه بس احنه فهمناهه ..
اكو واحد عقليه هذا كل ما يجي للدائره معناهه صار تغيير و صار نظام جديد للاقسام نفتح ...

من يجي كلنه ناخذ حذرنا بعد ... وهو وياه لجنه بقونا كلنه للصبح موجودين حتى يسحبون التلفونات من الاستعلامات براحتهم يشتغلوهن من وره ١٢ بالليل ولا تلفون ضل كلهه صارت بايدهم ...

همه بالبدايه فتحو الحاسبات نخلوهه نخل
فد شفرات عدهم بقرص يدخلوهه هاي لو ضامه كلمه بالف ملف مقفول هم تجيبهه
لو رقم او اي شي خافيته ومشتغله عليه بفلوس حمايه وتأمين اخفاء هم يلكطوه
ويسحبوه يمهم بهاي الشفره
احنه من شفناهم بدوهه هيج عرفنا بعد تراقبنا على رمشه العين

- لعددد شعبالك عومري بعد وبعد
صراحه داتندم على مكان شغلك

- تورطت بي صراحه بعد ماكو طلعه مناك
لا استقاله ولا سفر ولا اجايز ولا خطوه غير اليعجبهم لازم اخطيها
ينطون خوش راتب بس ساجنين الموظف

- دوله بعد ما بيها على حل الشعر لازم ضوابط

صار ياكل ويكولي ..
- ايدي حسيتهه ورمت وراح تنزف بعد مابيهه مجال وكلت بس خلي اعبر الدائره وكلشي خلي يصير بيهه
نخيت ابو الحسنين بس يعبرني من عينهم
والله وجان اطلع واصعد بتكسي وبنص الطريق يلا نزفت
شكد فرحت والله كلت هاي انكتبلي عمر جديد

- الحمدلله حبيبي لازم تعالجهه لا تلتهب وتأذيك

- هسه باجر جمعه وارتاح شويه اعوفهه تنشف ومااحركهه هواي

-انته شلون تصاوبت ؟

- ويه الشايب الضربه اجتي بجتفه واني سحبته وطبيت بين المحلات ونشكت ايدي بحدايد رفيعه ومكسره راجينهه على البوب   ومن المدافع وانه اسحل بالرجال وكعت عليهه وشكت ايدي
هيج نبتت بزندي وجريتهه صارلج الدم مطافر

كزبر جسمي من حجالي واني روحي صايره ممروده من سوالف الوجع والخياط والعمليات
حسيتها بيه عبالك اني كصت ايدي حديده
وكشت روحي ...

كمل اكله وشرب جاي واني كاعده يمه مخليه راسي على جتفه واجتي الممرضه ..
انطتني الابره الاخيره وصعدنا ..

عفته هاليومين بس ينام يرتاح وهو عينه على التلفون بكل بث مباشر يحضره خاف ديصير عليهم هجوم ... والاخبار مفتوحه طول اليوم
حتى لو ينام يبقي تلفزيون مفتوح ..

وصار القتل للمتظاهرين هواي بالنهار
وهو مكابل تلفزيون ويحسب العدد بالنهار شكد وبالليل شكد
ويكولي ...
' شفتي كلتلج من ١٥٪؜ بالنهار وهسه الليل يصير اباده '
' المحافظات ماتسلم امر هذا ااامر ٣٠٪؜ يخلصون عليهم '

شكد مااحاول اخلي يهدا ماكدرت ..
يراسل بيجات بالانستا ويريد يحجي ويه جماعه البصره والناصريه ومن واحد لواحد
انطوه حساب ولد بالخط الاول للهجوم ..
وهم حجاله نفس هذاك الحجي وكاله خبر موثوق من دوائر دوله ..

صار هجوم الناصريه وهو جان بالدوام
من شفت الخبر .. كلت ..
' انتهى العراق '

صار العصر وهو رجع .. من شفته
وجهه اصفر والدموع تارسه وجهه
وايده ترجف بعد كلمه ماكدرت احجيله ولا اسلم عليه ..
.
كعد بالكاع يبجي ويضرب على راسه
كعدت يمه ولزمت ايده ماخليه يضرب بنفسه وهو يشهك ويبجي ..

توسلت بي بس يكوم يغسل وجريته بالكوه كومته غسلتله وجهه وصعدت وياه فوك
ضل يدك على صدره ويكولي ..

- موووو كتلج يذبحوووووهم راحو الولد راااحو خلصت شبابنه كلهه راحت وانه كاعد اتفرج عليهم بالحاسبه خبر وره الثااااني
يتصحح تم تنفيذ
لج يذبحوووون ويدزون تممممم تممممم

- ماااابيدك شيييي حيدار لتضل تلوم نفسك
متكدر توكفهم هذوله جيوش مو واحد واثنين وتلزمهم
كاااافي هلكت روحك كاافي الله يخليك
مابيه حيل وكعتك

ضل يبجي عليهم واني اخذت تلفونه قفلته
وضميته .. تعارك وياي يريد ياخذ ويشوف شيسون وين التشييع وما خليته
ضلينه نتعارك لحد ما تعبت اني ودخت
شافني مابيه حيل حجي بعد عافني
وسكت ...

بالليل يكولي ..
- ريري ماكدر اداوم بعد نفسي ماتتحمل اكعد ويه كل مجرم يوقع عليهم حصاد اعداد موتى
وهم اصير منهم

- حيدااار ملتزم بوظيفة انته وهاي الدوله كلشي بيهه قابل انته اول موظف تشوف خيستهم ! كلهه تدري وتعرف مدراء وضباء وعماده مجرمين عينك عينك
بس كلمن يداري لكمته ويسكت

- مااااااريدهه هاللكمه من ايدهم ماريدهه

- متكدر تعوف الشغل لتنسى انته ممنوع عندك الاستقاله واذا تلاعبت بقوانين الوظيفه ميعوفوك بحااالك راح يخلوك تترحم على الدوام وياهم

- استغفر الله مااااااجنت ادري هيج راح اصعد لهذا المكتب وتصير اوراقهم مكشوفه بايدي
والله لو ادري هيج فلاااا اتعب نفسي واترقى
جان ضليت على اول حاسبه كلشي مادري واروح وارجع بالي صافي

- ياعيوني لعد الي بالعسكريه شيكولون هذولاك وجه بوجه وياهم انته كلمتين راح تنجلط من قريتهن لهسه
شبيك عاد ياحيدار متقوي كلبك
حيخلص عمري وبعدني ماشفته قوي وارتاحيت

ضل يتكلب بفراشه وساعه يطلع للبلكون يدخن ويرجع يضل كاعد يريد تلفون واني ضميتهن اثنينهن وجبرته ينام والصبح
هم ضليت احاجيه اقوي كلبه شويه لحد ما طلع للدوام ..اني خابرت عمي ...

كلتله .. ضروري ترجع بأي طريقه وتخلي حيدار كدام عينك لان اني بعد مااكدر اسيطر على اعصابه راح تنهار واني تعبانه ماكدر اضل وياه لحظه بلحظه ...

وعدني يرجع ثاني يوم ... وصار العصر رجع حيدار نفس الحال منهاره اعصابه ويريد يطلع للنجف يزور المقبره مال شهداء
وخلاني افقد بالصياح عليه ..
وهو معاند حتى لو يفصلوه يسجنوه بعد مايداوم ويروح يشوف جماعته بالنجف ديتظاهرون ويزور شهداء الناصريه
وتعاركنه ... هو يصيح واني اصيح
اخر شي كعدت ابجي وهو عافني وطلع ..

خابرت عمي حجيتله واني ابجي ..كلتله ..
' حيدار راح يضيع من ايدي خابره خلي يحط عقله براسه ويكعد بيته '

وهم مخابره ومتعاركين وعمي طالع بالطريق
حيدار مقرر الصبح يطلع للنجف عنده واحد من جماعته هناك مستشهد وهو متخبل عليه
وعلى البقيه يكول كلهم راح يموتون اريد اشوفهم وازور شهداء الناصرية روحي يمهم ماكدر اضل هنا ..

توسلت بي وهو ولا مخلي باله يمي
الليل كله احنه نتعارك وطلع الصبح
هو بدل واخذ وياه سلاحه وفلوسه ويريد يطلع
كمت اعيط عليه واضرب بظهره وهو يكولي

' اذااا اضل هنا اموووت انه اكتل نفسي عوفيني اشوفهم وارجعلج بس يومين وارجع والحسسييين ارجع '

طلع من الغرفه واني روحي فرفحت
هذا اذا ماعدموه الدوله ينكتل بالشارع ويه البقيه وبالحالتين اخسره ...

تخربطت ماتحملت بعد تعب واعصاب
وكعت باب الغرفه واخر شي اذكر شفته هو بايات الدرج ....

من كعدت وجه عمي اول شي شفته .. واول ما سألته على حيدار ...
' كالي بعده هنا موجود يمج '

ضليت مغمضه واسمع حجي عمي ويه الممرضه.. وره شويه حسيت بايده بارده على وجهي .. اعرفهه لايده من اصابعه رفيعه
شاورني...

' يمج عمج انه راح اطلع اجيج فد اسبوع '

كبل ضربته على رجله بايدي وصحت ..
' حيدااااااار'

ضحك وكالي..
' اتشاقى حبيبي ماروح بس اريدج تصحصحين '

جنت ضايجه منه وروحي ممروده
جريت البطانيه خليتهه على راسي وانداريت
شويه وعمي كعدني ...
هو مسويلي شوربه وجايبهه حتى اكل ..

كعدت واباوع لحيداار بعده بملابسه الي يريد يطلع بيهن للنجف كلتله..
- بعدك تريد تروح موووو عايز عمري بس مصيبه الارمله تعوفني بيهه

-لااا بطلت ماروح والله كاعد هنا ماروح

عمي كعد يمه وكال ..
-روح بدل ملابسك هاي تخليهه تضل باعصابهه بدل خليهه ترتاح وتاكل

راح هو صعد يبدل وعمي كعد يوكلني
كلتله..
-شوكت وصلت ؟

- قبل ساعه .. خابرني حيدر بالطريق كالي طلعت واي شي يصيرلي مرتي بامانتك
تعاركت وياه وكلتله عليمن ذابح روحك !
الراحو قبلك شستفادو !

كلتله ارجع مرتك مريضه اولى بيك من الولد
هذولاك وياهم الاف يسعفون ويدافعون وهي حرب شوارع لعد الطلع يتظاهر شبي غشيم مايدري راح ينكتل !
حرب هاي مو جديده على شعبنا وانته روحتك متفيدهم بشي بس تأذي نفسك وتأذيهه وتحرك كلب اهلك

هو جان يريد يصعد بسياره ويطلع كلتله
اني هسه بالطريق اذا وصلت البيت وشفتهه تبجي لو صاير بيهه شي من مشاكلك
الا احرمهه عليك بعد لو تعيش الف سنه ماخليك تشوفهه
واذا صحتهه تدهورت مره ثانيه فخطيتها بركبتك

عاد هو الظاهر خاف عليج وشاف روحه
غلط طلعته ومتسرع بقراره ورجع للبيت
لاكيج متخربطه والبنات حايرات بيج
جايبج هنا وخابرني كال اخذه للمستشفى ؟
كلتله لا هو وين باقي مجال بالمستشفى كلهه للجرحى ...

- همزين خابرك وصحيته على نفسه
راح يموتني عمووو شلون بي كل يوم طالعلي بسالفه هسه شلون بدوامه !!!
راح عليه اليوم شيكول شيحجي

- بابه اكلي هسه اكلي ومن ينزل احاجيه
اكلي خلي بيج حيل هذا مصايبه متخلص

وكلني واني لازمه راسي والرجفه بعدهه بيه
نزل هو سابح ومبدل ملابسه و صاح لريتا تسويله كهوه بكوب جبير ..

واني اباوع لعمي وهو يهديني ويكولي اصبري شويه .. وكلني الكاسه كلهه
وشرب كهوه ويه حيدار وبعدين صاح لريتا والممرضه يصعدن فوك وممنوع ينزلن بعد ..

هنه صعدن وراح وراهن تاكد الغرف مسدوده ورجع كعد ... وكال ..

- حيدر الهوسه السويتهه على شنو ! تريد تزور شهداء همه طايرين ! متشوف الوضع شلونه ومحد بالبيت شلون تطلع هيج طلعه!

حيدار فرك راسه وكال ...
- اريد اشوف جماعتي واحد وره الثاني جاي يستشهدون
وهذوله الراحو خبرهم ماخله بيه عقل
لتلوموني بس انه مواطن حالي حالهم
هم شاب وعايش الضيم مثلهم كبل واحس بتعب الشاب بالعراق شلونه حتى يحصله فلسين يعيش بيهن
واشوفهم حالهم يبجي الكافر تردوني اسكت واكعد ماتدخل ولا اتظاهر وياهم !!!!

انه مواطن وهاي ثوره مواطنين انه ما انتمي للدوله انه عراقي احس بالضيم البيهم

- نعرف باشا نعرف هالحجي
كلنه عراقيين وكلوبنه محروكه عليهم
بس هذا الوضع مو ناتج يوم وليله واليصبر اكثر بالشارع هو يفوز
هذا شي من سنيييين هو موجود وباكثر من صوره ينعرض علينه لحد ما وصلت وحده من صوره الي هي التظاهر والقمع

متكدر تغير شي لااا تكدر تحميهم لان هاي حرب والحرب تساوي شهداء .
ولا تكدر توكف وياهم وتحصلون تغيير بلد لان التغيير خرافه ومستحيل يصير لو يدفع العراق شهداء من شماله لجنوبه ميتغير شي

- لااااا ليش ميتغير
يتغير اذا الناس رادت تتغير وتصلح الوضع تكدر
والشباب هواي وعت بهاي الثوره
انه طلعت وياهم وشفتهم شلون كلهم ايد بايد
سنه وشيعه ومسيح كلهم سوه يركضون واحد يداوي الثاني ويتقاسمون المخده سوه ينامون عليهه

- هاي مشاعر شباب اخويه مو تغيير

- لااا يصير تغيير مادام لغو الطائفية يكدرون بعد على كل شي يغيرون

- وين لغوهه ! الطائفيه تنلغي ! ههه
الطااائفيه عمرها مانلغت ولاااا تنلغي
هاي الاخويه بالشارع وقتيه ادنى فتنه تقتلها وتشوف الطائفيه باصولها هناك بالشوارع

- لااا والله انته ماكعدت وياهم وشفتهم
كلش كافي دم السني والشيعي نخبطن سوه بالشارع اثنينهم استشهدو خوان ودمهم ومذهبهم للوطن وحده

- الطائفيه اكبر من هذا الموقف واكبر من التظاهر والانقلاب والتآخي هذا كله

اسمعني عيني باشا حيدر ...
انته يجوز جديد على الدوله وحرب الشوارع وروحك الوطنيه جياشه وماخذك روج المشاعر والحزن والامل
.
بس اني قديم على كل هذا وشي مو غريب عليه اعرف الي ديصير واعرف الراح يصير والحل والمشكله كلهن اعرفهن وفاهمهن وحده وحده

- شنو الحل ؟

- لا المفروض تسال شنو المشكله حتى تلكى الحل لكل تفرع منهه باشا

اسمعني وثق بكلامي هذا اني دافع دمي عليه وموثقه بي ..
اني بال ٢٠٠٣ جنت بجيش المهدي
اول ما دخلو الامريكان وتشكل جيش المهدي للدفاع عن المناطق ورفض الاحتلال
اني جنت بي .. الجيش كله عباره عن ولد شباب منهم الصحفي والمهندس والمعلمين
ومجموعه من المناطق الشعبيه بعدهم
عمر ١٧،١٨ هم انضمو للجيش وهذوله الكبار بعمر الثلاثين والاربعين كلهم خريجين
واصحاب وظائف بزمن صدام بس وظائف متعبه وماتكفيهم مصرف خمسه ايام بالشهر
.
المهم صرنا مجاميع السلاح من العشاير دعمونا بي ومن مخازن الدوله هم اكو اثنين ضباط فتحوهن المخازن وتسلحنه ولزمنه المناطق ...
حرب شوارع صارت بينا احنه لاتدريب لا خبره قتال جايين روح وطنيه مانرضى بمحتل اجنبي يدخل على بيوتنا ..
عدنه  هذوله الخادمين بالجيش ويعرفون تخطيط الحرب همه قادو المجاميع ودافعنا على الكدرناله ..
الي راح الله يرحمه والي بقى اعتقلوه وراح من ذاك اليوم لليوم والي كدر يهرب
هرب وعاش مثلي اني هربت من صارو يعرفون اشكالنه ومناطقنه وين نتجمع ويسوون مداهمات ليليه علينه
فطلعنه من بغداد ..
.
من طلعنه بقو اكو جماعه فدائيين جانو يكولون ' دمي ولا محتل يعبر باب بيتي '
بقو هذوله يحامون مناطقهم بس ما يندكون بغير منطقه حتى يقللون شبهه عليهم ..
وهم حرب صارت بينهم من يوصلون مناطقهم تعلك نار ...
عوائل تتذبح ببيوتها من يدرون هذا بيت بي واحد من جيش المهدي الامريكان يقضون عليهم .. لو اكو منهم يعتقلون شكو رجال ويعوفون النسوان وهم نص من النسوان ماسلمن اخذوهن سجن الي هنه زوجات الهاربين ويدورون عليهم ومالكوهم يعتقلون نسوانهم ..وهناك بعد ينتهن لو يحرك نفسه الرجال ما يرجعهن ..
.
جانو يدزون تبليغات يومين اذا ما سلم نفسه فلان وفلان مرته وبناته يصيرن عشى للجلاب ..
اكو منهم ولد سلمو نفسهم وطلعو همه النسوان من اول يوم ماخذيهن اغتصاب ويعوفوهن بقفص ويه جلاب بوليسيه تاكل منهن نص وتعوف نص ويرجعوهن الهم جثث مكطعه ..
من طشت هيج السالفه البقيه ما سلمو نفسهم وضلو يربون ولدهم باطراف المحافظات وبالاهوار والي كدر يسافر سافر ..

المهم هذا كله ورجع وره فتره من تشكلت الحكومه رجع جيش المهدي واول فتره جر عدل باقي نفس العقيده فدائي بعدين من صارت بيهه سلطه وكذا تغيرو جماعه منهم
وسووهه سوده مصخمه علينه
اني من شفتهم هيج بعد انسحبت منهم
صارت بيهه فتنه ومصالح ..
ناس جانت كاتلهه الجوع والخوف والعدم
وانفتحت الهه سلطه وظهر وفلوس ومكاتب واسلحه .. غيرت نفوسهم وصارو صدك ناس خطرين بالاخص وره ما بدات سالفه الطااااائفيه ...
من يندكون بمناطق الشيعه يغرموهم عدالهم
واكو فصائل بيهم تتصرف بكيفهه مو بامر القائد وهذوله انفصلو عن الجيش بس بقو مكونين حزبهم خاص وغايتهم فلان وفلان لعداوه ذاتيه بينهم ..
.

هنا الربط وين ؟ ليش حجيتلكم عليهم ؟
حتى داشوفك اني ويامن مشيت وعاشرت
بلبه الطائفيه والحرب ... حتى من احجيلك تصدك اني مو عجمي وفارسي واهتف بكيفي ضد ناسي .. لاا اني هم عراقي مثلك بس اني عراقي ضايك تراب الشارع شايفه هذا تراااب الشارع الي تمشي الناس عليه اني ضايكه بالضيم واعرف الوجوه شلونهه

حيدار هز براسه وعمي شرب مي وكالي ..
- بس لا دوختج بابه تريدين ترتاحين تنامين ؟

- لاا عادي مرتاحه وياكم كملو حجيكم مرتاحه اني

- زين .. اكملك باشا ..
القضيه هنا شنو ؟ المشاكل والتنافس على العراق ليش. ؟ حرب ايران ..حرب الكويت حرب السقوط.. التفجيرات ..داعش كلهه سببها وين ؟
تدري وين !

- كل حرب الها اسبابهه ماكو شي جامع بيهن عدا النفط وطمع عليه يعني

- لا فاهم غلط
كل الحروب سببها واحد
السبب ( خليجي /امريكي )
بدوها من النفط قبل ما تصير اي عداوه بين البلدان كلهه ..
جان اكو اتفاق ويه ' شركه ارامكو ' هاي شركه عالميه لاستخراج النفط والغاز الشركه الاكبر على العالم مسيطره على الاقتصاد واسعار النفط والدولار وكلشي بيدها
ارامكو بعد منو مسامع بيهه

- اي شلون منعرفهه ارامكو نعرفهه كلش زين

- اي هاي الشركه بصيتها وعظمتها صدام باكهه .. تصدك هذا الشي لو متصدكه ؟
.
- هو العيشنه بالضيم والفكر وذبح شكو شاب خير ما يبوك شركه ! اصدك جا شلون مااصدك
السفاح تصعب عليه بوكه !
.
- اي هو من استلم الحكم جانت هاي الشركه مقدمه على اتفاقيه ويه العراق والخليج
تسويلهم ابار النفط تجهزها وتدفع من ميزانيتهه بالمقابل ينطوهه ١٠٪؜ من واردات النفط على مدى السنين بعد ما تكمل الشركه انشاء الحقول كااامله واكو مخطط اتفاق لاستثمار اسهم للعراق من الوارد النفطي
بالبنك الدولي وعلاقه وديه بينهم تصير واقتراحات بناء مدارس وجامعات ومدن باكملهه بعد ما تخلص عمليه الانشاء كلهه ويثبتون الاسهم والحصص ..
صدام وافق واجتي الشركه نصبت مواقعهه واشتغلت ..
وبنفس الوكت الخليج جانو على نفس الاتفاقيه ويه ارامكو ...
الخليج التزمو بكل بنود الاتفاقيه اما العراق مالتزم ...
وقف العمل صدام وطردهم من العراق ولغى الاتفاقيه وهمه صارفين مليارات على نفط العراق تعرف شنو ملياااارات اجنبيه انصرفت هنا وبموجب اتفاقيه ومخططات ومشاريع ضخمه جانت كلهه تنتظر سراهه للتنفيذ ..
وصدام قطع الاتفاقيه وياهم والشركه جانت مو بهذيج القوه مثل هسه ..
اخذو جزء من فلوسهم وبقى الجزء الاكبر هنا
المليارات ماتعوضت الهم ..
نص منهه راحت بخازين صدام ونص صارت شغل فعلي باراضي النفط
.
الخليج لا .. كملو بالاتفاقيه واستثمرو بالبنك الدولي .. ولحد هسه يدفعون ١٠٪؜ من واردات النفط الهم ويشترون اسهم هناك وبناء دولتهم كله بمساعده وشركات اجنبيه
وضبطو امورهم وصارو من ارقى الدول واغناها ...
واحنه الزعيم مالنه باك الفليسات وحرمنا من النفطات وسواهن قصور وسلاح وجيش بس واحد يكله بز صاح حضرو الجيش وحضرو الحرب ..
.
مااافكر بمستقبل العراق ويه الدول
راد السياده وكل الرؤساء الي رادو السياده بالقوه على عدة بلدان نهايتهم الفشل الهم ولدولتهم .. لان ماااكو دوله تسكت على دمارهه لااابد يبقى الحقد والثار متوارث
وهذا الي صار بايران وصار بالخليج
وصاااار بامريكا..
هم تطلبنه ثار ... حق المليارات الي راحت وماستفادو منهه شي ...
.
جانو يريدون يشترون النفط بمي عينهم
وخسرهم صدام وتالي اجوي اخذوه غصبا على اليرضى والمايرضى .. النفط هذا النه حصه بي ... واخذوه واخذو البلد والخيرات والحروب والدنيا المهجومه هنا كلهه على هذيج المليارات الي انباكت وفشلتهم برجعتهم لدولتهم مطرودين ..
.
وهذا الحجي ضابط امريكي فسره النه
بالفتره الي بدات تصير مثل هدنه بين الامريكان والعراقيين بعد قللو حرب
صارت اكو لقاءات سريه على تشكيل الحكومه ..
من ضمن هذا اللقاء اكو واحد من جماعتنه رشحوه يروح يتفاهم ويه الضباط الامريكان على شنو تريدون منا وشنو سبب دخولكم للعراق الحقيقي مو المغلف على اساس اكو سلاح نووي وهالاشياء..
.
فكعدو لقاء سري مرتب ومترجمين
فباثناء الحجي ذكرو حقوقهم بالنفط
كالو .. امريكا الهه حق بالنفط بفلوسهه ولازم يرجع تعويض السنين والفائده الي اخذه صدام ..
هاي فلوس البنك الدولي رجعوهه اضعاف مضاعفه من ذاك اليوم لهذا اليوم اضعاف المليارات اخذوهه وبعده العراق مديون الهم بحسب حساباتهم مديون الهم على هذيج الاتفاقيه ..
.
هاي قضيه النفط الي العالم يصيح بيهه والدول طامعه بنفطنا ومستعمرين
همه مااجوي مستعمرين عبطاً بس الهم حق منهوب وثأر والاجنبي ماياخذ ثاره بالتيد والسلاح ياخذه بالتدمير البطيء والسيطره على الاقتصاد
لان الاجنبي تفكيره اسرائيلي واسرائيل تحب الي يغلط وياهه حتى تستغله وتضل مسيطره عليه الى يوم تصبح بي الارض معدومه الحياة ..

- بس هاي قضيه محد ذاكرهه ! ليش يعني سكتو عليهه كل هذا الزمن ؟

- مو كلتلك همه ماسووهه حرب لان اسرائيل تريد نفوذ وسيطره على الدول العربيه
صار الحجي سياسي .. ابقيلك الفلوس واعوفك تشتغل براحتك بس تبقى الي عميل
.
صار صدام عميل امريكي حاله حال ابو مصر وسوريا بهذاك الوكت ..
.
واكو هسه صور دتطلع من زمن السبعينات مجموع بيهه الرؤساء العرب الي بفتره الثمانين كلهم بكعده وحده جانو من ذاك الوكت مقسمين كل واحد مكانه وين وامريكا وراهم تدرسلهم كل خطوه .. وكل مقتل لرئيس هو سااابق تخطيط حتى يشغل بداله هذا ... والحال نفسه بكل الدول العربيه
.
قبل جان صدام فارض حكم دامي على العراق محد يكدر يناقشه بمساؤه وقرارته الغلط الي عواقبهه لليوم ندفع ثمنهه ..
.
مثلا ايران والعراق قبل بال ٧٥ عدهم اتفاقيه الجزائر الي مضمونهه خط قعر شط العرب
حدود بين ايران والعراق ..
اتفاقيه حدوديه مابيهه شي .. ب ال ٨٠
صدام الغى الاتفاقيه
من مات الشاه بهلوي وصار الخميني ..
صدام جان كلشي عنده ولا يدخل البلد بوعي ديني .. عندك صلاه وشهر رمضان وقران بس هذني مسموح الك بيهن غيرهن الف حساب وكتاب يصير على اليسويهن ..
البلد جان شبه اجنبي ...
اللبس والاختلاط والمسابح والمقاهي كلهه ولد وبنات سوه وكلشي فري ..
هسه الي يشوفهه يكول حريه وبلد متحضر
بس هو عند الشيعه هذا غلط مو حريه هذا حرام .. لان اكو حدود ودين وحجاب وائمه الهم اثرهم القوي بنفوس الشيعه جانو اذا يزورون يخافون اذا لزمو كتاب بي الزياره او دعاء عن الائمه ..
.
الخميني جان يدرس قبل بالعراق بالحوزه نفسهه الي يدرس بيهه محمد الصدر
جانو اصدقاء وطلاب علم اثنينهم
الخميني طردوه من العراق اخذوه على الحدود العراقيه الايرانيه هناك شمروه
لا فلس ولا عانه وهو عالم ديني حاله حال البقيه ..
استقبلته ايران وقرته واعترفت بي ليش
لانها بلد شيعي يتقبله اما بلدنا رغم هو متعدد الطوائف بس متزمت الراي وعنصري
.
من استلم الخميني الحكم راد يسوي ثوره دينيه
يعني يخلي حريه للشيعه ويصير بلد اسلامي
بلدنا بهذاك الوكت مو اسلامي بحت
شكلياً ناسنه على الفطره متعلمه تصلي وتصوم بس الدين وتفاصيله مسدود الباب عليهه محد يعرفه .. والدين هو يأخذ من اهل الدين الاصل الي نزل عليهم يأخذ من
علي واولاده وهذا شي مرفوض رفض قطعي
بالعراق ممنوع تعمق بهيج مواضيع ..
الحجاب ضل بالكيف للنسوان يعني البلد مو اسلامي ...
السعوديه والخليج جانو بلد اسلامي بس العراق لا
متحرر ومكبوت بنفس الوكت ..
فإيران رادت ثوره دينيه والعراق انتفض
والغى اتفاقيه الجزائر ومن عدها صارت مشاداه الكلام لحد ماوصلت للحرب ..
وحقيقة الحرب هي ..
' امريكا متريد العراق بلد اسلامي شيعي وصدام كاره للشيعه العجم او العرب تأيد بالقوه من امريكا وبدات الحرب '
يعني اساس اول حرب هي دينيه بتغليف سياسي بحت ..
وهاي اول دليل للطائفيه بالعراق *
.
اجيك بثاني دليل للطائفيه ...
جان محمد صادق الصدر فيلسوف وعالم ديني قدير
رجل محترم عاش ومات مانطق بكلمه
تضر البشريه .. وعراقي مو عجمي واله مكانته بنفوس الجنوب كلهم وهو
مرررررجع ديني للعراق
و قتله صدام وليش قتله ؟؟؟ بااتفه الاسباب واتفه استهزاء استهزء عليه بالمحاكمه ..
هو الشائع سبب كرهه و قتله ..
لان واحد من الضباط تجاوز على الصدر
وهو دفعه بعوجيته و لزمه حده
صدام طلع بالتلفزيون يكول ..
' الولد الي يتجاوز علينه نلوي شاربو '
مرجع ديني ورجال شايب ومحترم يسميه ولد
ودزله ناس اغتالته ويه ولده ..
.
بس الحقيقة هي سبب بداية كره صدام للصدريين من وكت اعدامه لمحمد باقر الصدر واخته .. بشهر الرابع سنه ٨٠
جان اكو صحفي راح يسوي مثل لقاء وياه وسأله
' شنو موقفك من ايران والثوره '
الرجل جاوبه
' إيران الجاره ولانرضى لهم الاذى '
جواب راقي لان هو المعنى في الجوهر
كونه عالم ديني مو ممكن يحجي بالشماته
ويفرح ويثني على اذى الغير حتى وان كان الد عدو اله
احنه ناس عاديين نتشمت ماعلينه العين
بس الي يصير قدوه لازم يتزن باقواله
وهذا الشي مايعرفه صدام .. وهو انطى جواب وافي وكافي بأن يعارض الحرب والاذى ...
بس من طلع الصحفي هو الرجل انطى خبر لاخته انه راح يعتقل وينعدم .. جان متحضر لهذا الشي لانه معارض من البدايه لحزب البعث وكونه رجل مفكر وديني ماراد صدام يدخل بمعمعه وياه بس ثوره ايران اجتي فرصه .. وكلامه ويه الصحفي رجع عليه
بشبهه
' انك مؤيد للثوره ' والي يأيد الثوره ذاك الوكت مابي تفاهم اعدام كائن من يكون ..
عدمه واخته هم نقلت ....
وجملته الشهيره الختمها بيهم آل الصدر ..
' اذا جان واحد او الف او ثلاثه الاف يوكف بالوجه اكصص روسهم من دون ما ترجف شعره مني ومايرجف كلبي عليهم وعندي استعداد اذا نمله ادوسها بالخطأ تحس بالالم يدك بكلبي عليها بس هيج نوع من الناس لا
ماابدرلهم اي اهتمام '
.
- اي اذكرهه بس والله هو خسر من ساعه ما تعدى على هذوله العلماء والمراجع من وكتها خسر شعبه بكل شي جانو راضين بس بهاي بعد شيرضون ! اذا المفكر وعالم الدين والمرجع الاسلامي ينكتل بعد المواطن شنو قيمته !
.
- هو هنا ثبت طائفيته تجاه عموميه الشيعه
قبل الناس ماتكدر حتى تفكر تصرف صدام صح لو غلط ! هذا الي انكتل وانذبح وانعدم واحترك مسوي شي ! مذنب ! لو مظلوم !
محد يكدر يواجب هيج جواب حتى ويه نفسه
زرع بيهم رعب نفسي حتى يستقوي عليهم
استخدم الدكتاتوريه ..
فالي بقو من اتباعه وعشيرته والمنا ومنا
صارو مؤيدين اله بطائفيته هاي
ولليوم بعدهم يفتخرون بفعل صدام بقتل هذوله المراجع
وهمه لا علم ولا فهم واحدهم حجي مثل الاوادم ميعرف يحجي
بس يكولك ' على نهج ابائنا واجدادنا '
.
- ايييي هو حتى جواب للمحاكمه ماكدر ينطي
يكللوهم يا صدر يا رجل ! يستهزء بس القتل قتل وهذا مرجع ديني
هسه خلي واحد من الحكومه يروح يدز جماعته ويغتالون السيستاني منو اليسكت !!!
.
- تقوم القيامه هسه صارت الناس كلشي عدهه دين ومذهب ومرجع بس قبل هذوله للفايخين احجيهه بصراحه
اهل قبل اليدور ديانه ومراجع وكتب هذا فايخ وراح يسوي فتنه ويجيب الامن ويهجم الدنيا
بس هسه الي مااااعنده اتباع ديني هو قتله حلال
.
- كلشي انعكس بس هي توارثت الاراء والناس صنفين بقت اباً عن جد
الصراحه ماجنت اتخيلك هيج صدري قافل
ابد ماخليت السالفه هاي يمك
.
- اني اشوف الحقيقة والواقع الصح وينه واثبت رأيي عليه
قبل هذولاك آل الصدر قدوه لكل شيعي
ولازالو بكتبهم واحكامهم والفقه الخاص بيهم يدرس باكبر الحوزات لازالو ثقه وقدوه
همه كفكر وهيئه دينيه لا يعلى عليها
بس كاتباااع وجيوش ومكاتب صدريه
هاي الي اجتي بالتالي لاااا هاي اني اكولك بريء منهم
لان هذوله طلابين ثار وغاوين مشاكل
وماعليهم سيطره هوااي هوااي منهم طلعو عن امر القائد لحد ما بزعوه وجمدهم وارتاح من شرهم
هذوله همه من عشايرهم ورسهم بيهم المشاكل وشيله السلاح عاده
فمستحيل ينكدرلهم وينضبطون ...
هذوله اني من اول مااااصارو طلعت من الجيش وعفتهم لان مااابيهم روح الصدر وهذاك الفكر والعقيده
بقت بس بكتبهم هاي قناعتي بعد ماكو صدري
مثل الي استشهدو

.
اذكر واحد محرر صحفي جان انسان راقي بمعنى الكلمه .. ابد مايروح عن بالي
هذا استشهد جان يدافع عن بيت بي بس ايتام وارامل ويريد يطلعهم لسياراتنا وكتله قناص بركبته ..
هذا اول ايام السقوط جان بعدنا ماعدنا هذيج الفلوس والامدادات كلمن على كد حاله
نكعد كل خمسه سته ناكل بماعون فافون بي خبز وفاصوليه لو مركه بيتنجان ومثرود بيهه خبز هذا كل اكلنه واحنه نقاتل
فهو مره بالليل جوعان واحنه ناكل حسب المعركه شوكت نخلص يلا
وبعدنا بهالليله مارجعنه للبيت والتمينه ناكل بعدنا بالواجب يعني ..
فهو كال ...

ياربَّ الجوع، أفضِّ علينا شَبعاً
‏فالفقراء في حيَّنا لا يُجيدون مضغ الصلاة
..
‏أسنانهم تساقطت من نقص البركة
‏وبطونهم ملئتها شهقاتُ التضرعِ بالهواء
..
‏ياربَّ الدعاء..
‏التقية لا تُزرع والنوافلُ لا تصبح قمحاً
‏والخبز يأتي لبيوتِهم ضيفاً
..
‏ياربَّ الخُبز ..
‏ما حاجةُ الجائعِ للصيام؟

- الله اكبر .. هذا هو كتبها!

-مادري الصراحه بس هو هواي يرددها
هو محرر صحفي عيشته كلهه بالنصوص والكتابه

اني حفظتهه منه لان لامست واقعنه طخت بنص كلبي حجايه
' يارب الخبز .. ماحاجه الجائع للصيام!'
لان الفقر بهذاك الوكت يكسر الظهر
والناس تنام لحم بطنهه طابك على  ظهرهه
والماذان تكبر للصيام

- الحمدلله على كل حال
كله ابتلاء من ربنا

- اني الي اعرفه ..الرب يبعث الفقير حتى يقاسمه غني ويعم بينهم الكرم وتبين الحسنات وتفرح النفوس وياخذ كل طرف اجره
من الصبر والكرم والعطاء
بس ماادري الفقر ابتلاء ..
الفقر بعيني هو منع الغني وظلم السلطان
لان الفلوس والرزق موجود بكل الارض
بس الي يمنعها هو الي ديسبب فقر

حيدار ضحك وكال ...
- انته شنو سالفتك ؟ انتمائك وافكارك ماتشبهك ؟ ليش انته ضدين لنفسك !

عمي هم ضحك ورجع ايده وره راسه
وكال ...
.
.
يتبع بجزء اخر لبارت ٦١💕