رواية ماء مغلي الفصل السابع والأربعون 47 - بقلم Zoka 🌷

..♣️🩸 ماء مغلي 🩸♣️..
* adzzon *

يوم التاسع من محرم ٢٠١٦ ...
اخذت امي وابويه وريري وسيف بسيارتي
رحنا من الظهر لأمير المؤمنين علي (ع)

سيف متكفل بابويه وانه ايدي مسانده ريري
اخذتلها عربانه وكعدتها وضليت يمها بره كاعدين واهلي راحىو يحاولون يزورون

كلتلهه اضل وياج نزور من بعيد والمحيى هالليله يصيرلنا ويه المواكب نعيش الحزن ويه جوهم ...

ضلينه نقرا زياره ونصلي بنفس مكانه واهلي يرحون ويرجعولنه ..

خلصت صلاه العشه وبدا جنون المواكب
كل سنه انه فوك يم الرافعات هناك صاعد
واشوف براحتي .. هالسنه ضليت وياهه
من بعيد نسمع  الدمام والقصايد ونخطف
شويه من شوفتهم ...

احجيلها على الاعرفه منهم واحجيلها على معاني جمل بالقصايد يقروها وهي تسألني شنو الحدث المقصود بيها ؟؟

من بينهم جان سؤالها على ' سبع الكنطره '
فحجيتلها ...

- بزمن حكم الامام علي (ع) جان اكو الخوارج
هذوله وره معركه صفين والمحاكمه الصارت بيها
خرجو عن امر الامام علي (ع)
وهمه ناس جهله حرفو الحق وكلبو الدنيا على شغلات ماعدهم بيها علم ولافهم

- شنو المحاكمه ؟ شلون صارت هاي !

- هاا اسمعي..
هاي وره مانقتل عثمان بن عفان صارو يطالبون بقصاص من قتلة عثمان
الخلافه هنا صارت للامام علي (ع)
كاللهم اني اخذ بقصاص  قتلة عثمان اني الخليفه الامر هذا عندي لحد يتدخل بس
اثنين من زوجات  النبي تدخلن بالموضوع
اخذن قميص عثمان كصنه بالنص و
نص اخذوه رايه وطلعو بي بمعركه الجمل
ونص دزوه لمعاويه بالشام

معركه الجمل وصفين اثنينهن مسنودات بسبب انهم يريدون قصاص قتله عثمان
وع اساس الامام علي ماكدر ياخذه وهمه مايسكتون عنه
وهمه الطرفين مالهم دخل بالموضوع
لان الخلافه بيد الامام هو الي يحكم

المهم وره ماخلصت معركه الجمل طلع جيش معاويه للحرب ..هو معاويه يريدها فرصه حتى يشعل حرب جديده على الحكم
ومناك جماعه دازين عليه منتخين بي
فالجيش الطلع وياه كلهم مسلمين ومصلين وحفظة قرآن ... ناس عبادتهم ماكو مثلها
يعني مو كفره من طلعو مسلمين

فصارت المعركه مسلمين ضد مسلمين
الامام علي (ع) اول مايبدا باي معركه
يحجي وياهم ..بلكت يهتدون ويفهمون الحق وين وينسحبون

فجماعه منهم ماقاتلو شاركو بالمعركه حاضرين بس مارفعو سيفهم  على احد
المعركه كلها قاده كبار واقوياء غالبين الروم والفرس ومو هينين من الطرفين احجيلج
يعني اثنينهم قوه

فكل ما يتقدم قائد بفرقه من الجيش ويصير القتال بين فرقه وفرقه محد منهم ينسحب او يتعب من القتال كل يوم من الصبح قائد جديد يطلع بفرقه ثانيه ويقاتل
لحد ما تقاتلو الجيشين وجه لوجه مره وحده
هنا شصار جيش الامام علي غلب
وصل ان يغلبهم وماضل بس على الميمنه
مالك الاشتر حاصر باقي الجيش

هذولاك شافو نفسهم تحاصرو والهزيمه صارت بعد شعره عليهم شسوو
طلبو من عمر بن العاص يلكالهم حل سريع
هذا ابن العاص يسموه ' داهيه العرب '
من حيلته وعقله ..

كال للجيش ارفعو المصاحف على الرماح
كلمن عنده مصحف قران خلي يرفعه
كل الجيش رفعو مصاحفهم
ومالك الاشتر محاصرهم بالقتال

جماعه من جيش الامام علي (ع) اعترضو
على القتال .. كالوله وكف الحرب
شلون نحارب الرافعين القران ميصير
وكف الحرب

كاللهم الامام .. اني اول من امن بالله وقرا كتابه ..كاللهم اني القران احنه اهل بيت النبوه احنه اهل القران هذوله بدعه

مارضو عليه وحاصرو الامام بسيوفهم
نص جيشه نقلب عليه محاصرينه بالسيوف
والا تدز على مالك وتخلي يوكف القتال

- يعني هيج همه فد مره الديانه عدهم !
شلون يحاصرون امامهم وقائدهم !
ويفزعون للعدو !! شنو السبب من صدك احجيلي

- مو حبا بالدين بس همه امويين
بني اميه نفسهم جانو مقسومين نص بجيش معاويه ونص بجيش الامام
يقاتلون بس كلوبهم على ربعهم

ولعلمج قتله الامام الحسين جانو نفسهم نفسهم
بجيش الامام علي وهمه الي حاصروه
بالسيوف وصارو خوارج ونص منهم رجعو ويه معاويه

- والامام يدري بيهم هذوله منافقين اكيد !

- اكيد يدري
ويدري همه الي يقتلون ذريته يعرفهم واحد واحد شنو دوره بالطف

-وساكت عليهم !

-اي ساكت .. جان هو يصلي الجماعه
ويطلع يمشي من يمه الشمر ويكول لاصحابه هذا قاتل ولدي الحسين

- ما كتلهم وخلصنه لعد

- هذا امر الله مكتوب الحدث هذا يصير
والامام يعلم لازم يضحي باهل بيته حتى يضل ذكرهم لهاي سنينا
لان لو ما ظليمه ابو عبدالله جان تحرف الدين كله و ثبتت على ان اهل بيت النبي غايتهم الحكم والاماره مو الدين والاصلاح
بس قتلهم والظليمه الصارت هي ثبتت العكس
ولا جان اكبر مفتي وعقل بزمنهم ماكدر يفهم الناس ان اهل البيت مو غايتهم الإماره

- صح
هو دائمًا بفعله بليغ

- اي .. فكتلج من صار رفع المصاحف
والامام شاف بعد مامنهه مجال الجيش كله حاصره وراح يخونوه على دينه بهالفعل
لان مايفهمون منو اهل الدين ومنو الماخذينه حمايه لطمعهم

دز على مالك الاشتر ومالك ماقبل ينسحب
كاله ... ماهي الا سويعه   وافتك بهم
يعني باقي بس ساعه وننتصر عليهم
كاله ساعه بس امهلني ساعه وهذولاك مارضو وشددو بسيوفهم على الامام
ومالك مايرضى ينسحب
صار هنا اتفاق على ان يوكفون الحرب ويختارون واحد من الجيشين يسوون مجلس محاكمه ويفضون السالفه بالسلم

عاد وكف القتال ورجع مالك بالجيش
وصارو يريدون يختارون الحكم
الامام اختار مالك الاشتر والجيش كله اعترض عليه
كاللهم ...
' مالك لي مثل ماكنت انا لرسول الله '

ومحد وافق عليه لان يدرون بي مو بصالحهم
والجماعه مناك اختارو الحكم عمرو بن العاص 

كاللهم الامام محد يكدر على عمر غير مالك
ورفضوه ماخلوه يصير الحكم بينهم
فرشحو قاضي جبير بالعمر اسمه
( ابو موسى الأشعري )

اخذولهم فتره سوه يتشاورون بالحكم
وهذاك داهيه .. شسوا ..

كاله ..هسه احنه ليش مدوخين نفسنا
ومحتارين بالامر .. خلي ننزعهم من الخلافه
والمسلمين يختارون من جديد ونفض النزاع

القاضي صدك بي لان هذاك ملعب عرف شلون يقنعه ...
اجتمعت الناس وصار لازم يحجون الحكم
فالقاضي كآل لعمر اصعد انته اول
هذا كاله لااااا انته الشيبه اولا وانا من بعدك

صعد القاضي وكمش خاتمه باصبعه وكال
' انا انزع علي من الخلافه كما انزع الخاتم من اصبعي '

صعد هذا الداهيه وكال ..
'وانا اثبت معاويه بالخلافه كما اثبت الخاتم باصبعي '

- اياااا طايح الحظ
لك ثول هذاك القاضي شنو !!! عقل وين العقل !!

- مو اكلج داهيه
عاد هنا صارت المشكله اكبر
ومااخذو بالحكم وصارت الخوارج الي همه نص الجيش الي نسحب من معركة صفين وصار ضد الامام

هذوله الخوارج ضلو يكطعون الطرق
والرايح والجاي يوكفوه  يسألوه عن الامام علي .. يشوفون شيحجي عليه اذا زين ويحبه كبل يذبحوه واذا لا يعوفوه

فا اكو عائله بالنهروان وكفوهم الخوارج
جان رجال جبير وياه زوجته حامل وبناته
تلاثه .. هذوله سألوه عن الامام وهو مدح بي
عاد كمشوه ذبحوه وذبحو النسوان وبطشو بجورهم هواي

وصل خبرهم للامام .. كال ثارهم اني بايدي اخذه ...
طلع وياه جيش قليل واولاده الحسن والحسين والعباس (عليهم السلام)
ومالك الاشتر وياهم طبعا

من وصلو للنهروان حاجهم الامام كاللهم يطلعلي بس قتله العائله وكلهه تصيح احنه كلنه قتلناهم
جهله وكلشي عدهم بالصياح والسيوف
فصار الامام يهديهم بالكلام ويوعيهم
لحد ما نصهم انسحبو وصارو ويه جيش الامام ونص راحو لا ويه هذا ولا ذاك
وضلو نص ثابتين على قرارهم يريدون قتل الامام ...

فالامام وزع على الابواب اولاده الحسن والحسين وهو على باب ومالك على باب
ضلت الكنطره فارغه
العباس (ع) كال للامام ..
' القنطره لي وانا لها '
هنا العباس بعده صغير يطلع ١٣،١٥ .١٤ سنه هيج هالحوالي عمره

فمالك الاشتر هنا من سمعه يريد الكنطره
كال للامام .. اخاف عليه وهو فتى
يعني صغير
كبل العباس باوعله بنظره وصفها مالك بمقوله ...
' والله ماكنت اعلم ان لي قلب 
حتى رمقني العباس بعينيه '

- يعني خاف منه !! من نظره !

-اي خاف من نظرته وسكت بعد ماعترض ولا دخل بشي
صار العباس على الكنطره يحمي ظهورهم
وهمه موزعين على الابواب
من خلصو قتالهم وراحو على الكنطره
لكو العباس مخلي سيفه بالكاع مثبته وكاعد على ركبه ويباوعلهم .. وهذوله الناس مذبحه  يمه مطشره وهو كاعد مثل الاسد بهدوء ورزانه وغالبهم كلهم وحده وهو بهالعمر
فعاد سموه ' سبع الكنطره '

- كل يوم يزيد اعجابي بيهم
جانو جواهر حرامات انكتل العقل كله بايد الجهل كله
هذا الجهل مصيبه بالبشريه بعده موجود

- اكو ناس عالمه بس تجهل نفسها حسب الغايه

- اسألك شي فكر وجاوبني بصراحه

- اي كولي

- انته بشنو عندك جهل ؟
هسه اني شكد ما عقلي يجدح ويدقق
بكل شي وعندي معرفه جبيره بالحياه بس عندي مقابله جهل حبيييير بالديانه واهلها من اول نبي لاخر امام كل واحد عندي بي جهل جبير
اعرف عنهم شغلات سامعتهه منكم بس شخصيه كل فرد منهم اني جاهله بيهه

انته وين جهلك ؟

ضليت اباوع للناس وافكر واعيد السوال على نفسي .. وين جهلي ؟؟

طولت يلا كلتلهه..
- بنفسي عندي جهل بيها
احس انه مرات واكف واباوع لنفسي وين جاي امشي ؟ وشجاي اسوي بعيشتي !
احس حتى ماعرف انه منو صرت

عندي جهل بيج
اعرفج وماعرفج
احبج شلون ماانتي تحبين اهل البيت وماتعرفيهم وتنتظرين وكت فراغ يصيرلج
وتكعدين تبحثين بحياتهم انه هم هيج
انتظر وكت اشوف حياتج وافهمج بس
شوكت !!! مادري ..
ولوكتها انه جاهل بيج

- انتظرك مثل مالجماعه ينتظروني

ابتسمتلها ووكفت يمهه اباوع للمكان
وللساعه ...  شفت رايتهم بينت من بعيد
دنكت عليها وكلتلها ...

- راح يوصل اكثر موكب احبه

- منين هذوله ؟

- نجفيين بس الرادود هذا اختصاص قصيده وحده ما يدبرها احد مثله
قصيده ( احنه غير حسين ماعدنا وسيله )
بس هذا الرادود جابها ضبط وره صاحبها
المرحوم حمزه الصغير ..

شوفي الهدوء الراح يصير هنا بين الناس
كلها تنصت لهاي القصيده بيها روحيه وهيبه
تسكت اكبر واحد وتصفنه ويه نفسه
ماراح يضل صوت غير صوته واليرددون وياه

-  انطيني ايدك خلي اوكف اشوفهم حتى لو شويه

- اوكفج بس همه مايبين منهم بس الرايات

اخذت بايدهه وضليت ساندهه واكفين وصار المكان محاوط بس الهم ...
هنا كلمن يحترم دور غيره ويكطع بعد
فضل الجو بس الهم ...

صار الصوت يملي المكان بنبره وحده
و انه عيني على مكانهم واردد وياهم القصيده
احبهه مطبوعه بكلبي ابياتها ..
وانتبهت على ريري دايره وجهه عليه
كمشت وجهه ودرته لكدام ...

من دخلو الضريح كعدتها وهي شاورتني ..
- اضربين من محمد خضر طلعت ولك

- لافلش سنونج ولج صخيم شكو مخليته بالج لهسه ! وتقارنيني بي !!!

- الصوت عومري الصوووت يرن بالكلب

- صوته بكلبج ولج  !!

-  صوتك حبيبي ذاك بعد راح اخذت النسخه الاصليه وعفتلهم التقليد

- وعلي لو بيتنا جان عضيتج عضه الا اندمج على اسمه الي بالج حاطته

- يبووو ابتلينا

-اسكتييي

ضلينه كل شويه نتناكر بنفس السالفه
لحد ما رجعو اهلي وكلتلهم يلا نطلع لكربلاء حتى الصبح نطبر هناك ..

وصلنه هناك بالثنتين بالليل .. اكلنه من المواكب وشفنالنه مكان نكعد بي كلنه
سوه وهاي السالفه طولت لوره تلاثه
يلا حصلنه مكان زين ....

عاد سوينا  وجبات الزياره ... ننتظرهم ضلينه بين مارجعو صارت صلاه الفجر
صلينه وعفت اهلي كاعدين واخذت ريري
تمشينا بهداوه .. وهي كلساع تتعثر بعباتهه
وتريد تنجفي على وجهه وانه شاد على ايدهه
ومدافع ويه الناس والبعد اخوك طريق
مانزلت من لساني . .
اسويلهه مجال تمشي وماتطخطخ باحد وتنداس رجلهه ...

جان الامام الحسين سادينه للباب مايخلون احد يدخل جوه بس المواكب ...

وكفنا بسد الحايط وهي مجلبه بملابسي
وتكلي ..
- تعبت حيداار اريد اكعد

- رور بس نتوجه بالدعاء منا واخذج ترتاحين بعد مانتحرك من مكانه

- ديلا اووكي شقرا شكول ؟

- انه الي احجيه انتي ردديه وياي

رفعت ايدي اليمنى للدعاء واليسره مخليها على جانب  راسها ..
وهي ايد مجلبه بملابسي والثانيه على الحايط

قريت الزياره و عزيت امام العصر والزمان
و شلت غترتي بايدي وناجيت ...

- يا مولاي يااباعبدالله ... ياااا حبيبي ياحسين
يا باب الرجاء .. يا وراث محمدًا وعليا
يا ابا الاكبر والعليل
اسألك بحق الا اله الا الله وبحق
المذبوح على صدرك في كربلاء
ان تطلب لي من الله المشافاه من كل داء
انت وسيلتي الى من بأمره  يكون المرض والشفاء

من اهلك   بهذه الغربه  يتيم و عليل
وانه عندي يتيم عليل  .. مثل ما عينك على ايتامك وانته راسك على الرمح مرفوع
خلي عينك على يتيمتي
ومثل ما لاسمك ومعزتك تشافى عليلك
خلي عليلتي تتشافى
وانه ماطالبك غير وانه متيقن الاجابه

خليت الغتره على وجهي ورددت الصلاه على محمد وال محمد وفتحتهه وخليتهه على ظهر رايتي وشديتهه الهه من يم ركبتهه

- بعون الله مايضل عندج تعب

ضلت مدنكه وبعدين كلتلي بس ..
- شُكراً

اخذت بايدها ورجعنا نمشي لمكانه
بالف ياعلي وصلنه .. ولكيناهم مخلين ريوك
شوربه عدس وهريسه ..
كلتلهه..
- شتاكلين حتى اكل وياج

- اضوك الشوربه واكمل اكل بالهريسه

- يلا وياج انه

اكلنه شويه من الشوربه وعفناهه كملنه اكل بالهريسه ..

نزعت واحد من جفوفها ولفت العباية على ايدها وصارت تتلمس ايدي ..
تدنيت يمهه كلش وضلت ايدي جوه طرف عبايتها .. كامشه اصابعي شويه تتلمسهن وشويه تضغط عليهن ..
شاورتني وانه مدنكلها ...

- تدري اني صرت كولش زينه بس انته دعيتلي

-ههه لتقشمرين عليه ولج مو مشيج بايدي

- لا قصدي نفسياً
جان عندي شكد تعب نفسي و جروح محفوره براسي من زمان احسها كلها بعد تلاشت

-والله ؟؟

-ايي والله
هو مو قدره خارقه منك بس اني ارتاحيت
لان اكو عندي رجال كل همه راحتي وقربي
حسيت انته بعد طيبت كلشي بيه بس مجرد احسك وياي اني اطيب من نفسي

رفعت راسي باوعت لسيف عينه علينه
ميلت راسي عليهه وكلتلهه..
- كايلج  بكلشي انه اعالجج
والله كلبي كله بس الج مهتم

- يمه ياكلبك يمممه وين جان من قبل متكولي وين جنت

- ههه جنت مو شكول حب
بس هسه لااا صرت مليان حب لراسي
بنفسي احضنج هسه احبج من تصيرين شاعريه وهيج كيوت كِلش

- ولك مو تغيرت ومن الصبح لليل وياك كيوت طالبني بطلابه بعد ؟!!

- يااابويه وعلييي ماشبع
هسه غير بشر يشبع ويعوف المره ويسكت
انه لاا كل شويه اريد تحبيني شلوون بيا طريقه ميهمني المهم اشوف الحب منج

- واذا فد يوم طنكرت عليك وخليتك جفاف لا حجايه ولا حضنه ولا شوفه  .. شتسوي؟؟

- ياابويه انجن
وعلي مابالغ واجذب عليج بس صدك ماتحمل
ماتضلين يمي وتحاجيني !! يابويه اعيش ذاك اليوم تايه بين الناس  چا انه شعندي غيرج بحياتي ! اصبح وامسي على صوتج وتردين تحرميني منه !!!

- اييييي داشوفك شتسوي !!

- احطج واكتلج لا اكو عيني ولا حبيبتي
اكتلج بس تسويهه وعلي انه ادري بروحي
اتسودن ف جفي الشر بلا طباكات وياي خلينه عايشين مرتاحين

- ههههه ذكرني من نرجع ابوسك صايره حجاياتك حلوه شكر شكككر على حاله

جريت بطل الماي واشرب وانه الضحكه بوجهي .. وامي صاحت عليه ..

- هاا ولك يمه شو تضحك ! جا مالهه الليله بكلبك وجع مصاب. !
كود الزهره تشوفك تضحك بليله ذبح ولدها
جا مشت ودارتلنه ظهرها محزوز خاطرها منا

- والله هيج سهيت مو بالقصد
على راسنا الزهره وعيالها علويه على راسنا

سكتنا بعد ضلينه بس نباوع للناس ..
انه وسيف شدينا الجفن وكعدنا نمسح القامه
وخدرنا الراس ...
صارت سته ونص الصبح .. شاورت ريري..

- حبيبي راح نمشي انه وسيف نوكف ويه موكب نطبر ونزور وره الركضه اجيج

- لااا شنو قبل متطلع للركضه تجيني اشوفك يلا تروح
هي خمس دقايق اشوفك بيهن وروح بعد بكيفك

- زين زين
انتي لاتتحركين من مكانج تره حتصير الشوارع دم على حاله لا ترحين تخترعين
اكعدي وسكتي

- ماامشي بدونك

كلتلهه احبج وطلعت لسيف .. صفينا ويه موكب وللساعه سبعه كبل طبرنا ومشينا وياهم للضريح ...

سيف يريد يضل وانه اريد ارجعلها
ضل يكلي
-عمي وكت نسوان هسه امشي عوفها فاركها لمرتك هسه فاركها ماطايرين

- انتظرني هنا انه انطيت كلمه بعد
هسه عشر دقايق وتلكاني يمك

رجعت اهرول لمكانهم .. وامي كبل وكفت
تلكتني وشالت قطعه حلقوم خلتهه بحلكي
كعدت يم ريري كلتلهه...
- عفت سيف واجيتج .. شفتي وجهي يخوف
هذا بس طبرني كبل الدم صار بالجواريب

- رهيب شكلك
حيداار شنو ماتطبرني هالمره ؟

-هاااا ترديني اطبرج بدمي
وعلي مابالي عجبتج
شلون اطبرج انتي ملفلفه راسج !

- مااا اريد يلا انته دبرهه

-زين بس نزلي البوشي من حجابج شويه

نزلتهه شويه من كصتهه وانه سحبت حجابهه
شويه بس بينت منبت شعرهه وخليت راسي عليهه وبساع وخرت وبالقامه خفيف هيج طخيت راسهه وكلتلهه...

- هاي طبرتج بدم السيد خلي يرتاح كلبج

- رحت فدوه للسيد حويدر المطبرجي

- يفدا عينج ..عدلي بوشيتج انه راح ارجع
اجيج العصر

رجعت اهرول ولكيت سيف شايط اعصاب
ضلينه نمشي وهو يدردم وانه اغسل بوجهي
لحد ما وصلنه طويريج ...

كعدنا على الرصيف والولد يشمرون علينه بالعصاير والكيك ومواعين التمر
اكلنه ورحنه ضمدنا الجرح ..

صار وكت الركضه كلتله..
-سيف ضل كدام عيني واذا تيهتني كمل دربك ونتلاكى يم اهلنا

دك صدره وكالي ..
- محروسين عمي توكل

ورحنه ركض ويه الحشود ...
تيهت سيف وضليت وحدي اتدافع بالضريح
زرت وطلعت بره شربت ماي وارتاحيت
وضليت اتمشى على راحتي لحد ما وصلت مكان اهلي ...

ضليت متمدد وسيف بعده مارجع .. ضليت اخابره وهو ما يرد .. تالي شفته جاي وشايل وياه مواعين سفري بيض .. كعد يمنه وكال ..
- رحت اجيبلكم قيمه ماحصلت بس اثنين

كعدنا ناكل وبعدين اخذتهم ورجعنا للبيت
ضلينه بغرفتنا اليوم كله بس نايمين لنص الليل كعدت وشفتهه كاعده تخابر ...
من حست عليه كعدت فتحت سبيكر وكملت مكالمتهه ويه عمها ...

سدته وباستني كلتلي..
- عمي يكول عنده وجبه سيارات نهاية الشهر يريد يحولهن لكركوك
يريدك تاخذهن من معارضه لكركوك تروح؟

- انه اخذهن!

-اي  يريد واحد يأمن بي هو اكو سايق
بس يريد واحد يستلم الفلوس ويوصلهن بامان
لان طريق شويه خطر و راد واحد ثقه

- والله مادري
ودوامي شلون ؟

- دبرهه عومري

- الله كريم منا لنهايه الشهر نشوف شيصير
حضريلي غراضي العصر اطلع لبغداد

- اافففف دروح قدم على نقل سوي شي تره بزعت روحي

- ماينطون الا سنه تكميل يلا
حبيبي انه مو عسكري وكل يوم شامريني بمكان .. انه وظيفتي ماكدر افاركهه اذا مو يلكون بديل
وبعد انه وحظي بالنقل شوف وين يطلعلي

-ديلااااا نصبر شنسوي
اكولك جوعانه كووولش  انزل سويلنه اكل

- الله عليج !!!

- مريضه وتعبانه ومرتك حبيبتك انييي
فدووه من ايدك الطيبه سويلنه اي شي

ضلت حاضنه راسي وتتلوك وانه هم جوعان
نزلت عاد للمطبخ سويت اسباكيتي ولملمت شغلات من الثلاجه وصعدت ..

خليت صينيه يمهه وكعدت جان تكلي..
- هااا حويدر شو عايفه بالطاوه

- عجبني هيج شفته اطيب

-لعد من اني اعوفه تكعد تغردلي
والاتكيت مالتك يطلع بس براسي

- اكِلج. . تاكلين لووو لاا

عوجت حلكهه وجرت الصينيه يمهه
واكلت .. ضحكت على شكلهه
منا تكلب بعيونهه منا تاكل ...

ضلينه سهرانين للفجر صليت ونمت
والنهار كضى بساع بساع لحد ما ودعت الاهل وطلعت لبغداد ...

أول اسبوع كلشي هدوء ثاني اسبوع
جنت حاجز يم دكتور بالمنصور رحت
راجعت يمه و بديت علاج جديد

هناك هم جنت حاجز لابويه وريري وسيف يم دكتور جان الحجز كبل اسبوعين يلا يوصلنه سره ...

اخذهم عادل وانه انتظر خبر على التلفون
وهنا بشروني باابويه حالته تنجح ميه بالميه
على العلاج بس جان كل ابره بميه يضربها بالظهر و وصاهم يعوف السكملي هذا وياخذ العكاز ابو اربع رجول ويمشي بي يكدر ما يكدر لازم يمشي ..

سيف بس تمارين راد منه يدخل قاعه حديد ويضل يمرن ايده بالاثقال ...

وريري كله ابر مقويه وتضل لابسه المشدات
برجلها وكل اسبوع تراجعه هي وابويه ..

استبشرت خير بهالاخبار و خابرت السيد
وصيته يحجز لملوكه ويضل يتابع علاجها يم نفس الدكتور ...

وهم بين ما وصله حجز واخذهه كايله
علاجها يطول بس تمشي اذا انضبطت
وتابعت وياي ...

صار وكت نزلتي ورحتلهم لكيتهم مفلسين
على كثره العلاج ..
اخذتهم مراجعه الاسبوع الثالث يم الدكتور
وابويه تحسن جبير صار عنده  كل اسبوع ٢٠٠ بس ابر اله و٢٠٠ لريري  و وياهن جلسات حراريه لابويه ...

جنت اشوف ابويه يمشي بعكازه ويردد يالله والحمدالله... وانه كل ماانزل واشوفه يمشي خطوتين ادنك ابوس راسه وعلي فرحان ودمعتي بعيني تصير كل ماشوفه يمشي

ريري هم رجعت تمشي بزودها بس مستمره بالابر كل اسبوع ..

وضلت بس ملوكه ننتظر الفرج بيها ..

صارت الاربعينيه وانه بالدوام مانطوني نزول كبل بوكت ... الا  ليله الاربعين لان عطله رسميه .. طلعت كبل لاهلنه
جان ابويه وعادل وسيف وملوكه وامي كلهم رايحين مشايه كبل وهالليله همه بكربلاء
وضاله بس ريري بالبيت هي وفضه..

وكت متأخر ودنيا ليل وانه اريد اطلع نفرات
ماكدرت اخذهه وياي .. كلتلهه اعوضج من تخف الزياره .. وطلعت وحدي بنص الليل
لكربلاء.. هناك صليت الفجر وجنت زاير
وضليت انتظر باهلي ورجعنه سويه ...

اخذتلي يوم راحه بس نوم وثاني يوم صبحت على صوت تلفوني  يدك من السته صبح ..
رقم غريب جاوبته وطلع عم ريري ..

انه واحجي وياه كعدتهه وفتحت سبيكر
وهو يكلي ..
- العندك والماعندك تعوفه وتطلعلي لبغداد
قبل الظهر انته هناك اريدك

- ان شاء الله

سديت الخط وكلتلهه..
- مبين عمج فلوسه هواي هالمره وحامي عليهن

- اي يمكن

- شبيج ؟؟

- حيداااار مو تزعل اووكي بس ضروري تروح ماعدنا غيرك نأمن بي

- شغله غير الفلوس !!  مو ؟ومتحجيلي !

- لا هي بيهه فلوس وبيهه سيارات صحيح هاي بس شنو اسمع

اكو معتقل نسوان مسيحيات وايزيديات
ماخذيهم داعش وهذوله وكت التحرير
الجيش مطلعيهن ودازيهن للمخيمات
بس شنو الاعداد هناك ماكفت الهن
و هنه طالعات على مسؤوليتهن ولازميهن
جماعة المتاجره هذوله جماعتنا يعرفوهم

ياخذون شكو بنيه شارده من اهلها او يتيمه بالشارع او حتى المجديات مرات هم ياخذوهن وعدهم سوك مثل مزاد هذا هناك يبيعوهن بي .. والشرايه بس اهل الدعاره واهل الاعضاء

- وانتي شررررجعج الهم
انتي شوعدتيني !!!

- مارجعت لشي وداعتك بس خلي افهمك
هذني عمي اشتراهن كلهن
هنه ١٧ بنيه الي طلعن من المخيمات وهسه معتقليهن هناك تعرف شنو يعني حاطيهن للبيع !!!

راح يندمرن هناك اذا محد اخذهن
اني موصيه عمي وموصيه جماعه قبل
اذا عرفو اكو بنات اسيرات عارضيهن للبيع
يكلولي واشتريهن اعتقهن

فعمي هو على تواصل وياهم لان اني كطعت بعد .. هو الظاهر واصل خبر بموعد تسليم
هسه انته اطلع وهو يفهمك

- استغفر الله
هسه هذا راح ياخذهن يشغلهن !!!
شستفادينا !

- اييي حيداار هسه روح وهو عمي مدبر كلشي

كمت لبست ودك تلفونها .. جاوبت وضلت تباوعلي .. وسدته ..
- حيداار عمي يريدني اروح وياك

-وييييين اخذج وييين !!!

- بس عوفني بالبيت حتى اشوفهن
انتظرك يعني بيتي
بين ما يدز سياره تاخذهن ومادري شكد وتوصل يمكن يوم يومين ماعرف

- كومي البسي كومي
بعد هنه بركابنا صارن

عفتهه تلبس ونزلت غسلت وطلعت اشغل السياره ورجعت حجيت لاهلي راح نطلع لبغداد ورتبتلي جذبه على عمامها
واخذتها وطلعت ....

هناك وصلتهه للبيت امنت عليهه بي
ورحت لمعرض السيارات لكيت الجماعه ينتظروني ... طلعت بسيارتي كدامهم
وهمه وراي ... شاحنه بيهه اربع سيارات دفع رباعي اخر موديل وسياره حمايه وسلاح ...

وكل شويه تلفون ويه ريري ويه عمها
لحد ما وصلنه كركوك وسلمنه السيارات
انه تفاهمت ويه صاحب المعرض واخذت جنطه فلوس ..

المبلغ جان هواي مو مال يتحول
فاخذته وهو خابرني ...
كلتله استلمت الفلوس وحسبتهن بالمضبوط
عاد كالي ابقى انتظر اكو كيه راح توصل
بيهه البنات تطلع ويه السايق توصلهن للبيت
بغداد ...

بين مانتظرت ووصلوني وطلعنه صار نص الليل ولثاني يوم الفجر احنه طبينا البتاويين

ايدي على كلبي الطريق كله .. منا طريق خطر وانه شايل كومه فلوس وبركبتي كومه بنات والطريق طويل وادعي الله بس يوصلنه بسلامه بدون مايعرضلنه احد ..

والحمدالله وصلنه للبيت .. طلعت ريري تلكت البنات وهنه جاي ينزلن من الكيه ووحده منهن شردت ركض السايق وراهه كمشهه من ايدهه ورجعهه وهي تصيح ..

- حااامل والله حامل
لخاطر الله حاامل حااامل

ريري عافتهن كلهن وراحت اخذتهه
بايدهه طببتهه للبيت وضلن كاعدا جوه وانه واكف وياهه يم الباب ..

- حبيبي تعبان هلكان اريد انام وبالي يم هذني شنسوي بيهن هسه!!

- منسوي شي عومري نداريهن لحد ما توصل السياره وتنقلهن لمخيمات بيهه مجال
وهناك نأمن عليهن

-يعني ماياخذهن عمج يشغلهن عنده !

- لااا هذني يتعبن صراحه ميفيدن بالشغل
فهو من البدايه كال اخذتهن حتى اعتقهن

- شعجب !!

- يريد عمل زين ينفعه لاخرته هسه
تعال فوت للغرفه نام وارتاح واني اضل وياهن

-اكلج والفلوس ! شو عمج ادك عليه بعد قفل جهازه

- اي هو عنده وكت محدد يفتحه بي
هسه بعدين هو يخابرك ويفهمك

طبيت اباوعلهن نسوان كبار وبنات صغار بعدهن وشابات وكلهن التعب مبين عليهن
والضرب بوجهن مزورك ..

نمت وتالي كعدتني ريري حتى اتغده
كعدت اكل بفراشي وسألتهه..
- شصار ويه البنات ؟

- خليتهن يسبحن ويبدلن ملابسهن وينامن
ماعندي فراش هواي هنا بس دبرتهه شلون مجان
وهنه هم قبل شويه يلا كعدن
وصيت حبزبز على غدا ومن جابه كعدتهن حتى ياكلن

- عفيه حبيبي زين تسوين
خطيه يكسرن الكلب هذني اكيد ايتام وارامل
صارن

-ايي راح اطلع اشوفهن وانته خابر على عمي بلكت فتح تلفونه هسه

هي طلعت وانه خابرته لكيته فاتح تلفونه
وهو خطه دولي كبل كلتله ..
- خويه  الفلوس شنو فلمها ؟؟

- عندي حساب بالبنك روح اخذه من ريري واطلع  اودعهن  بي

سديته وصحتها .. اجتي وحجيتلها كبل انطتني دفتر وبطاقه .. قريت الاسم
' سرى'

- هاي البطاقه باسمج المزور !

- اي حساب عمي هذا باسم سرى الي مسويه على جنسيتي
بس هو كل فلوسه الخاصه بي

- ومأمنه عندج ! جا مايخليه عنده !!

- غير هو يثق بيه واني كل فتره اودعله بي مبلغ

-عمج مبين عنده اكثر من حساب وهمي

- اي طبعا الشغل هيج يطلب
هسه لدوخ نفسك روح للبنك يادوب تلحك
استعجل يلا تره بالوحده يعزلون بعد لازم تتنظر لباجر

كبل كمت اخذت الجنطه وطلعت البنك قريب على البيت .. نزلت وصارت بيهه معارضات وكت تأخر ودوخه حجي بس انطيتهم المبلغ شكد كبل غيرت الجوه ...
وصارو همه يجيبولي الاوراق بس وقع

اودعتهن وخلصت من همهن ورجعتلهه
شفتهه ضايجه .. وعصبيه ..
اخذتهه بالغرفه حضنتها وضليت اعض بوجهه وهي تكلي ..

-حيداار عوفني تره راح اكرهك مثل ما كرهت هالرياجيل

-شبييج هسه انه شكو ! همه حواوين انه شكو تذبين حركتج بيه

-اوووف اووف
ولك السمعته منهن شك كلبي نصين

هاي اكو خمسة ايزيديات ميتات بالاغتصاب بهذاك المعتقل ومحد جاب طاريهن ولا الهن مكان دفنه مدري وين راحو شمروهن عبالك جيس زباله مو بشر

-لاا اله الا الله
غضب من الله نزلو علينه هذول شنسوي شبيدنا عليهم

- كون واحدهم بالجرب ينصاب وياكل جلده الخايس اكل هذوله المخانيث الوهابيه
بس شوف شكد قنااادر همه
مو يسمعون هاي أيزيدية كبل يجروهه
ويتمتعون بيهه مثل الوحوش ويذبحوها
فرحانين كتلو كافره

مو بشر هااااي لو شنوووو
كافره هسه انتو ربها وتحاسبوها !!

واليكتلك محد يدري بيهن
واليسمع هذني مجموعه بنات متعرضات اغتصاب وتعذيب ومذبوحات ومشمرات بالحفر والمزابل
يكولك اييييي هذني اليزيديات
عبالك عااادي يلااا واذا صارلهن هيج هنه يزيديات

كواويد اهل الديانه والمذاهب مكدورهم بس على النسوان وين مشلوله الحال لاحكين عليها

- لااا بويه مو الكل
جا شبينا احنه ماينكسر كلبنه عليهن
والله انه نمرد كلبي عليهن من شفت الضرب بوجوهن وحالهن يبجي الصخر وهنه صغار وارامل

خطيه المره وين ماتصير ومنين ماتصير هي خطيه وعيب على الزلم التندك بهيج نسوان ضعيفات حال
بس جيب الزلمه منهم وينه ويفهم!!

-اووووف
حيدااار مخنووكه محنوووكه
بس امن عليهن اني ارتاااح هذني يضلن تايهات بالدنيا وحدهن

الأيزيديات والمسيحيات محد بحالهن
يحتركن ينذبحن يموتن من الجوع محد يباوعلهن ولا يفكر بيهن
هذني ضحيه الكل مضحيه بيهن حتى يضلون همه بامان .. نسوان المسلمين بامان ونسوان المسيحي والايزيدي دفعه بله الهم

- استغفر الله ربي واتوب اليه
ريري هدي اعصابج وامشي اكعدي وياهن
داريهن والباقيات الله يتكفل بحالهن

انتي متكدرين تنقذين شكو بنيه إيزيدية
هاي الكدرتي عليه سويتي والباقي على ربج

حضنتني وتكلي ..
- تحب الايزيديات لو لا ؟

-احبهن جا انه مو حبيتج وانتي ايزيديه
شكو بعد ليش ماحبهن

- اي عفيه صير مسالم حب كل البشر
اكره الناس العنصريه

بوستها وراحت طلعت يمهن وضليت انه اغسل بالسياره بالشارع واباوع لهالشكول المطوطحه وكلساع عركه براس الفرع

طبيت ابدل ملابسي وهي اجتي خبصتني حتى اطلع اجيب عشه واشتري غراض الهن
وفراش ..

شغلت سيارتي وطلعت بعدني هسه طلعت
وخابرتني ..
- حيداار عوف كلشي وارجع بساع

- خير شبيج مو خبصتيني اروح اجيب العشه
بعدني ماوصلت

- عووف العشه اكوله  تعال
لتعوفني وحدي هنا يمهن ارجع

- شبيج شكو !

- لك هاي بينهن داعشيه ارجع ما مأمنه وحدي
تعال ابقى يمي ونشوفلهه جاره

- علييييج علي !!! 
سدي سدي هسه اديور وارجع

كبل رجعت طبكت بالباب ونزلت لكيتهه واكفه يم باب الشارع وتخابر  كبل سدته ..

- احجي فهميني ياهي منهن وشعرفج بيها !!

- هاي ع اساس حامل
هي داعشيه

- شلون عرفتي !!!

- شكيت بيها اني من اول لحظه اول ما نزلت وضلت تصيح عرفتها مو أيزيدية

- شلوون !! خاف لان حجت عربي !

- لاا بس ايزيد ما يحلفون   والله

وهاي عبالها تمشيها علينه وتتمسكن
حتى نتعاطف وياهه ونحجيلهه شنو غايتنا وياهن ووين ناخذهن ونخليهه تأمن بينت لان هي مرعوبه وحامل واحنه ع اساس راح نستخطيها ونحجيلها
فهي تاخذ المعلومات منا وترسلها لدواعش
فهمت !!
يعني هي سوت الفلم هذا كوله حتى احنه نخليها قريبه علينه ونداريهه ونأمن بيها
لان هي خايفه

- علييج علييي !!!
هاي مكر النسوان عمممي انتن شنيي

- ماتعبر السرالف على عقلي
فرزتهن وحده وحده
حفظتهن حركه حركه

ولعلمك هاي وياهه سجين ضامتهه برجلها
وعدها تلفون صغير شايلته بصدرها
واذا ما تطلع منطيه الاحداثيات كلها  الهم
فلا اطلع بنت ابويه

- دخيلك ربببييي
ريري هاي شورطتينا بيها !!
هسه انطت عنوان البيت اكيد

- خلي تنطي هو الداعشي يخاف يفوت هنا
غير ياخذوه يفلسوه تفليسه الدجاج

اني خفت على البنات لا تكعد تزن براسهن وتشردهن وياهه ..
مو انته متفهم هذني شلون شغلهن
فمجاي تستوعب الي براسي

- اي بويه شمعرفني بيهن !!
هي اصلا شوداهه ويه المعتقلين !

- هاي يزرعوهه بين الضحايا والاسرى
حتى تتبع مسيره تخريجهم وتنطي الاحداثيات الهم راح يعرفون ثغر الطريق المستغليهه الجيش ويحولن عليهه

وهم يعرفون الخاين المتنكر داعشي بينهم وهو بصالح الحشد او الجيش

فهي ليش تتمسكن وتبجي حتى نكوللهه احنه فلان وفلان وهيج وهيج عدنا ونأمنها
وهي توصل الخبر الهم وكبل اذا لكطو الخاين اخذوه ذبحوه والطريق راح يفترون عليه
حتى ميخلون عليهم ثغره

- شياطين قسم بالله

- وهابيه نكسين
اكولك هسه اني انطيت خبر للشرطه
ومادري شوكت عاد راح يجون

- هاااي هسه خبرتي !!!
ولج احنه نروح بيها هسه ماكليلي شنحجي على البنات !!!

- عادي اني اتصرف

- شتتصرفين !! ولج جريمه هاي
مشترين بنات وهنا المكان مشبوه
يعني بايعيهن لدعاره هسه تركب براسنا تهمه شيخلصنه ولج

- بابه عادي
هسه قابل شكو نروح وياهم للقسم
نكعد على كد استجاوبين حجايه منا ومنا ونرجع اووكيي

- هيج سهله عندج ندخل سجن !!

- ياسجن شبيك بس تحقيق وكلتلك اني اتصرف اوووكي عوفني اشتغل هسه
والك الصافي

ضليت افتر واستغفر الله والعرك يزخ من راسي .. وهي جوه يم البنات تسولف وتضحك ...

شويه وسمعت صوت الدوريه بالشارع
كبل طلعت فتحت الباب و تلكيتهم
وهمه كلهه جتفت للبيت ضل بس واحد وياي

يسألني منين اخذنه البنات وحجيتله المكان
وتفصيل عليهن ... وطبينا وراهم
لكيت البنات كلهن واكفات سره وهاي الداعشيه مجتفه وريري تحاجي الضابط

طلعو واخذوهه واحنه وكفنا وياهم بالباب
كالو باجر نريدكم تحقيق وراحو ..

كبل كمشت ريي من زندها ..
-شحجيتي وياااه !!

- كلتله مشتريتهن حتى اعتقهن وعندي اثنين يكفلوني عليهن واني معروف سوكي هنا مو للفطيرات ماريدهن بس كسرن خاطري
واشتريتهن

الداعشيه الكم والبقيه نسلمهن للمخيمات وانتو تمشون ويانه شهود

كالي نتفاهم بالمخفر كلتله اووكي باجر اجيكم
وهاهيه بس هيج

- ريررري
وحجيج هذا عااادي !!!

-عادي لعد شبي لاجذبت ولا شي
حجيت الصدك
وبعد احسن من عرفو حتى يرتبولهن مكان امان اكثر

يلا خلي اروح اشوفهن خطيه اخترعن
بيك حيل تروح تجيب عشه لو نوصي ؟

- خااااب رررووحي رووحي
ضل بيهه عشه هي ! 
ولج كلبي وكع برجلي وانتي تردين مني عشه

-ههههههههه عوومري سوده عليه
مشايف اكشن بحياته حدوري
يلا لعد روح ارتاح بغرفتنا واني اوصي عشه

ضليت كاعد بره اخذ نفس وارتاحيت شويه
وطبيت تمددت وتالي سمعت اندكت الباب
رحت فتحتها و اخذت العشه من ابو التوصيل

عفته يمها ورحت اريد انام وهي اجتي الا تاكل وياي ....
اكلت وياهه ونمت ..

ثاني يوم الصبح تريكنا وكاعدين عادي جان تكلي ..
-اريد اروح للصالون بشرتي فد مررره صايره خيسسسسه
ورجلي رايحه نعومتهه
خلي اروح هسه عومري

- بويه وكت صالون ! كومه بنات بركبتنا والتحقيق ينتظرنا شبيج انتي

-اي ارجع من الصالون ونطلع للتحقيق
حتى ناخذ البنات ويانه مناك كبل نطلع بيهن للمخيمات

- ريرري بربج !! تطلعين من الصالون يلا نكعد ويه الضابط !!!
لج منين جايبه هالگلب متكليلي
انه شايل هم بكد شعر راسي وانتي تدورين صالون !!!!

-ايييي ديلااااا هسه هو منو وداخاف منه
هو خلك ضابط حجايتين واكوله چاوو
شكو بعد

هسه اروح لو لااا
كول اي روحي يلا

- وعلي خبله

حضنتني وضلت تبوس بوجهي وتكلي ..
- فدددديت حبيبي انيييييي
يلا ماتاخر وعد بس انظف وجهي واظفري وارجعلك
شعري اخليه بعدين اووكيييي
امواااااااح حياااتششيييي فدوه فدووه

كامت طلعت من الكنتور ملابسها وانه كلتلها ..
- اذا احنه نطلع منو يضل يم هذني

- حبيبي انته تضل واني اروح

-تسوقين !

- اي هو هياته المركز مو بعيد وتره مشتاقه اسووق اوووف يمه شكد صار ماطالعه

- طالعه عينج فد نوب هالايام

- بس اليوم اووكييي عوفني حره
اجيك المع لمع واسويلك ليله حمره ماكو منها

-هااي اذا ماخذونا سجن وتيهونا بالمحاكم

ضلت تضحك ولفت شالهه وطلعت
انه قفلت الغرفه وكعدت بره بالهشتي
لبين مارجعت يلا طلعنه لقسم الشرطه

كبل ما ننزل كلتلي ..
- عمي كلشي مضبط تره هاي بس شكليات لتخاف اكو واحد هنا مدفوعله وراح يمشي كلشي احنه بس نسايرهم اوكييي

- بلكت الله ومحد يجلب بينه

نزلنه والكيه بقينا بيهه البنات واثنين ولد
دخلنه  تحقيق و ساعتين احنه نفهمهم
السالفه من البدايه لحد ما تدخل واحد من بره
اجه وكال سالفتهم يمي وطلعنه وياه
كبل وقعنا اقوالنه وكال ...

انتو طالعين منها بس البنات لازم تتسلم للمخيمات بعد ...

انتظرنا تتحضر ويانه دوريه وطلعنه حسب ترتيبهم همه اختارو مكان الهن ...

هناك سلمنه البنات وضلينه نتفاهم ويه الشرطه يحبون طولة الحجي وبعدين كلمن طلع لدربه ...

من وصلنه البيت بالليل .. انه راسي مصدع
وهذا كانيور هارج الدنيا بره وهي جاي تسبح
رحت احاول افهم شبي وهو مشلوش

طلعت هي واجتي كالت هذا يريد يغسل
واخذته تغسله .. رجع هادىء وكعد بمكانه مفروشله يم السبلت واحنه الجو بارد زين مامشغليه بس هو ثابت مكانه وفراشه هنا
نام ...

وكفت كبالي و خلت راسها بركبتي وضلت تكلي ...
- فرحانه فرحااانه حيداار حيل حيييل فرحانه

- دمج الايزيدي يحن ووفه المحنه لاهله

-اييي ايييييي مو بس هاي
فرحانه سويت شي زين بحياتي
شكد فرحت من البنات  تشكرني لان حميتهن
وراحن بمخيم مرتاحات وعليهن امان

- الحمدلله عدت على خير
ولا هاي سالفه مو  هينه
سبحان الخلانا سبب خير الهن

- اييي صرنا خير
اثنينا خير مخفي

كمشت وجهه وهي تضحك .. بوستها
ونمنا مرتاحين بهدوووء تام بليلتنه هاي ..

خابرت اهلي وانطيتهم خبر ريري تبقى هنا بيت عمهه هالفتره وكت انزل ارجعهه للبيت ..

بقيت وياهه اداوم وارجعلهه ومرتاح بعيشتي وياهه .. حنينه عليه ومدللتني ومرتبه بكل شي ..

اخذتها راجعنه يم دكتوري بالمنصور
هو وزوجته عدهم عياده مشتركه خاصه بس للعقم واطفال الانابيب ..

هي فحوصاتهه زينه واخذت منشطات
وانه بعده علاجي ماجاب هذيج النتيجه
فروقات بسيطه بس متأمل بالله خير ..

خلصنه الشهر هنا ورجعنه للنجف
اول يومين واجتي ريري كعدتني من نومه الظهر ..

ركزت بوجهه زين  وهي واكفه تطك اصابعه
وتكلي ....
-حوووويدر كووم اليوم نصكهم

- نصكمن!

- نصك ابويه !!! صخايم اليوم صيدتهن
كوووم عاد
صخيمات طنطول راحن لهذاك البيت مدري شعجب طلعن العصريه

- اي واحنه نروح شنسوي !
نخطفهن !!!

- لك اووويلي يمه كلبي
لك كوووم دنشوف منو صخيم الي وياهن من الولد امشي يلا
دنلحكهن هسه على غفله ويطلعن يلااا تحرك عاد

كمت بساع بساع بدلت وهي لبست البوشي والعباه وطلعنه بحجه الدكتور ..

هذاك الولد حجيت وياه وصفلي المكان بالمضبوط ورحت وصلت طبكت وره سيارته
ضلينه نباوع للمنطقه هاي اعرفها جاي بيها على سحارين كبل اطلبهم يساعدوني واطلع كلشي ماحصل  ...

ريري رفعت البوشي شويه وكلتلي...

- راح انزل اسويلي فره عليهم
عود اريد واحد مضبوط يشتغلي هنا
واشوف شكو ماكو واجيك

-لااا بويه استري عليه اكعدي خطره

-بس احجي واجر لسانهم لعد نضل نتصفن
خلي اروح اووكي انته لتخاف مرتك عفريت لاتنسى

-حبيبي كلبي يضل عليج وانه بس انزل انعرف
اكعدي احسن

-لا لا فرصتنا هاي لانضيعها
يلا خلي تلفونك بايدك بس ادك عليك تجيني
خاف احتاجك اووكيي

- زين جا امشي واذكري الله وانه انتظرج

كبل نزلت وانه ضليت اباوعلهه لحد مامشت وكفت ادك باب كبل البيت هذا القاصدينه
وفتحولهه وهي طبت جوه عاد انه ماكدرت اكعد

كبل نزلت ومشيت بالفرع اتانيهه واريد اروحلهه كلبي يمهه ..

هي طلعت وضلت تأشرلي روح وانه
رحت لنهايه الفرع والدنيا غربت
وهي دكت بابهم ...

محد فتحلهه .. راحت على بيت بصفهم دكته فتحولهه وطبت جوه ..
شويه وطلعت ورجعت تدك هذا البيت
وهالمره فتحولهه ..

طبت جوه يمهم وانه بعد انتهت اعصابي وتندمت خليتهه وحدهه ..
اريد ادك واخاف انكشف بشي
وضليت حاير ..

دنيا ظلمت وجان باب البيت تنفتح ويطلعن النسوان وراحن باتجاه السياره ..

انه ضليت واكف انتظر هسه تطلع ريري وهسه تطلع وماكو ... عاد مشيت للسياره وشفتهه كاعده بالسياره ..

كلت هاي طالعه وياهن وانه ماميزتهه
رحت كبل صعدت بالسياره وكلتلهه..
- حبيبي صار ساعه انتظر غير تخابرين
تكليلي طلعت

ماردت عليه وانه دك تلفوني ابويه خابر
جاي احاجيه واكوله راجعين وحركت السياره
مشيت لراس الشارع واجتني مكالمه
باوعت
المتصل ( راحتي & عافيتي )

درت وجهي بساع عليهه وهي هنا كاعده
وهذا رقمهه يتصل !

جاوبت واجاني صوتهه ..
- لك حيدااار نعلى على غيرتك وينك
كمت اطكطك وحدي بالشارع لك تعال ارجع وين وليت وعفتني

هناااا عيني كبل راحت على رجلين المره الكاعده بسدي ... وشفتهه  ماكو بس سواد
انتبهت هاي مو عبايتهه ولا جسمهه
ولا كعدتهه ... كلبي من الرجفه مانطاني اباوع لوجهه ...

اسوق وانه كامش تلفون بايدي وكاطع الخط
والعرك يزخ من راسي والدرب نعميت بعد
ماشوف شكدامي ولا بيه احجي واسالهه
انتي منو !!!!!

.
.
.
يتبع 💕