رواية ماء مغلي الفصل السادس والأربعون 46 - بقلم Zoka 🌷

..♣️🩸   ماء مغلي  🩸♣️..
* adzzon *

' صاحب الجذع كتله حلال
اللهم اني بلغت اللهم فاشهد '

راجع للبيت وعلى طول الدرب هالحجايه تدك براسي ....

ماعندي سبيل غير الكتل. !
لازم اجرم بناسي !
الهي فوضتلك امري وانته الحكيم العليم ..

صعدت الجامات وجاوبت اتصال ريري ...
- وينك حيداار غير تكولي شصار مصار وياك لو الا اني اخابر !!

- حبيبي سويت حادث والسياره تفلشت

- عزاااا بعينييي
ولك شلوون هيج !!

- مادري نضربت بعد
الكدام كله تفلش
انه اسف والله شلون نضربت مادري هيج كلشي صار خطف ماحسيت الا ذاك المطي صار وجه بوجه وياي وفلشهه

- ديلاااااا هسه فدوه الك
انته زين ؟ لو تاذيت بالضربه !

- لاا زين الحمدلله مابيه شي

- لعد شبي صوتك رايح خاوي
خاف مضروب ومتكول ولك احجي الصدك

- حبيبي مابيه شي جاي اكلج زين والله
بس هذا ابو سعد حجيه دوخني
والسيارة منا نقهرت عليهه والله ماردت بيوم اضربها وافلشها الج هيج جنت كلش حريص عليها
والله ضربتها دكت بكلبي شاطت روحي عليها

- ديلاا ياعومري هسه هي حديده متكولي شنو قيمتها
فدوه الك المهم انته طلعت منها سلامات
تروح سياره واجيبلك عشره شنو قيمتها كدامك ! فلسين متسوه وداعتك

- بعد روحي انتي

- يلا لتضل تقهر بروحك عادي اصلا هي موديلها صار قديم

-لاا والله حلوه ونظيفه
اصلحها ان شاء الله بس ارجع لبغداد

- لاااا عوفها شكو متعب نفسك عليها
متسوى بعد

شنو اااني رجلي حبيبي ابو الحيادر يصعد سياره مسكربه !
يمه غير اطك بقهري عليك

هذيج السيارات مكومه بالمعارض ويصعدها فلان وعلان وهمه مايسوون تراب رجلك
وانته تصعد بهاي موديلها قديم ومضروبه!

- حبيبي انتي رحت فدوه لحلكج
الله يحفظج لعمري والله بدونج اضيع
راح اوصل البيت فد خمس دقايق

- اووكي أنتظرك

سديته وزفرت النفس قوي .. وعلي جنت شايل هم السياره كلت بس تشوفهه تنجلط
وتاكلني بكشوري ...

وصلت البيت وطبكت سياره بره بالشارع
وطبيت ..
كعدت ويه ابويه والحجي وحجيتلهم
راح يتكفل بي وكال سهله وترخصت
منهم ...

رحت لريري لكيتهه جاي تمشط شعرها
دنكت بوستها وكعدت يمهه ..
حضنتها وشميت ركبتها .. كلتلهه..

- اخذج وياي لبغداد كلبي ماينطيني اعوفج وحدج

- ويضل البيت لام طيره هنا
لا عيني لا خليني اكمل شغلي
سالفتنه حاميه هالمره

- هههههه تصكريهم !

- العن والديهم
بس خلي شويه اصير زينه الا اسحلهن من عثوكهن امهات العرابيد والجيافه

- اااااخ ربييي
شبليتنا بيهن!
لج رور هذا يكلي صاحب الجذع كتله حلال
واذا ماتكتله تضل متعثر بعيشتك

- اي لعد شعبالك
دنتشاقى احنه ! هاي مابيها عيني واغاتي
حط واذبح ماكو تفاهم

- يابويه واصير مجرم !

- يبووو حيداار لترجعلي نانسي

- اكلج سدي الموضوع سدي
تعبت نفسيتي وعلي كرهت العيشه كلها
حضنيني خلي انام شويه اريح بالي

ضحكت وضلت تبوس وجهي وانه نايم على ايدهه ..
نمت والعصر كعدت تغديت ورحت اشوف سيف شلون صار ..

لكيته زين بس امي يمه تدهن بايده وتفركله
لليل خابرني ابو سعد وكالي ..

' خلصتك من اكبر اذيه .. ضل بعد انتو رجعو حيلكم بنفسكم والي وصيتك عليه لا تنساه '

استبشرت خير بهاليوم وكلت وره كل عسر يسر والحمدلله خلصنه من الجبيره
وما ضل شي ونرجع مرتاحين بعيشتنا ..

سولفت للحجي وابويه وهمه من ثاني يوم
استلمونه جلسات تعزيم ..

ابويه كتبلي رُقيه وكالي شيلهه وياك بجيبك وين ماتروح .. وامي ذبحت وسوت غدا فجران دم لوجه الله واشراف النبي ..

اخذت ريري وسيف للدكتور ..
كتبلهم مقويات وحبوب مفاصل وعلم ريري تمارين تسويهه لرجلهه ..

صارت كل يوم لازم كل اربع ساعات تسوي تحفيز لاعصاب الرجل ..
اجيبلهه نجانتين ماي وحده حاره وحده بارده ثلج ..
تخلي رجلهه خمس دقايق بالحار وبعدين تخليهن بالبارد وترجع مره ثانيه تعيدهن
لمده نص ساعه ...

صار لازم ارجع لدوامي ..
عفتهه وكلبي يمهه .. لا حظيت براحه وياهه
ولا شبعت منها .. كضيتهه هبطات بهبطات ..

داومت اول يوم والثاني .. العصريه انه نايم
وكعدت على صوت تلفون ..

قريت ( راحتي & عافيتي)
كبل صحصحت وجاوبتهه ...

- هله يابعد روحي

- هلو عومري هلو
اكولك كوم بسرعه غسل والبس واطلع اكو هديه جايتك بالطريق

- عليج علي !
هديه شنو ؟

- ياعومري هسه دكوم مو وكت سوالف
يلا بسرعه وانتظر من تستلمها تخابرني
موااح چاااو

ذبيت التلفون وحفزت بساع كمت لبست
تراكسود وغسلت وجهي واخذت تلفون وطلعت افتر بالشارع ..

اتصل عليه رقم غريب كبل فتحت خط
كالي ..
وين واكف ؟ دليته المكان ..
شويه واشوف سياره اجتي وترمش عليه
طبك ونزل الولد ...

سلم وكال ..
- يلا تراوس ؟

- سيارتي !

- اي نراوس اذا عجبتك هاي
روح اخذلك فره بيهه شوف تعجبك لا

رحت يم السياره فتحت باب السايق
وخابرت ريري ..

- لج رور هاي منين السياره !
بطاقتج عندي منينلج فلوس !!

- حبيبي يافلوس شبيك مادفعت درهم واحد

- چا شلون دازتلي سياره بلاش !!!

- عومري مراوس هاي ويه سوناتا

- ريري تضحكين عليه !
لج هاي رنج سبورت تراوسيها بلاش ويه سوناتا مضروبه ! شايفتني غشيم !!

- ههه ولك عومري انته
المعرض مال عمي وعمي ماعنده غيري من اهل يعني بكيفي اراوس سايبه ويه مونيكا هم عادي بكيفي هنه مكومات منو بحالهن !

- لا بربج ! عمج قبل تراوسين بلاش وانه اخذهه !
خاف حاجيتلج جذبه مادري بيهه !!

- لاااا بس كلتله سيارتي نضربت وتفلشت اريد غيرها شنو عندك هنا شي كشخه

- يعني مايعرف هي الي !

-لا يعرف شلون ميعرف
كلتله اريدهه لحيدر
كالي اكو سوناتا لوك اذا تعجبج فيرجن جديد بعدها بس عرض

كلتله لا خلي نغير
كال اكو رنج تعجبج ؟ كلتله دزلي صور
دزلي اربع انواع واني عجبتني هاي
اذا عجبتك اخذهه واذا معجبتك اطلع ويه الولد للمعرض واختار بذوقك

- بويه هي حلوه بس غاليه
انه ماريد عمج يفضل عليه بشي
ماريد استغل احد

- حبيبي تره خاف متدري عمي مسويلي وكاله لكل شي يملكه
خاف يموت اني يتحول كلشي لاسمي
داكولك ماعنده غيري
يعني هذا كوله مُلكي

اني جنت اكدر كل اسبوع ابدل سياره بس مالي خلك لان مكضيتهه مشاكل مسدوده نفسي من كل شي

بس هسه صار وكتهن
بعدين اني مو كايلتلك كل شي الي هو الك صار .. اخذ واسكت اوووكييي

- والله مصدوم
هههه ولج انتي شنو !
عليج الحسين بس فهميني شدعواكم هيج
زينين وياي !

- اني احبك وعمي يحبني
اني موصله صوره حلوه عليك
يم عمي وشافك رجال زين واني واثقه بي
بعد اكيد يدللك

- يا بعد روحي
الولد شتلته وبعدني ماجربتهه
شويه واخابرج

سديت الخط وصعدت اخذت فره بيها بالمنطقه ...
الكشنات جلد جوزي .. عاليه بس مريحه
لونها اسود يلمع .. دعفستها منا ومنا ورجعت طبكت يم الولد شفته كاعد على الرصيف ويخابر ...

كبل مانزل خابرت ريري ..
- اكلج حبيبي
لا تزعلين من سؤالي بس عليج علي هاي انه اذا اخذتها فلوسها مو حرام !

- اني مشتريه السوناتا بفلوس حلال تره
وهاي مراوس يعني تضل نفس السعر
فحلال

- شلون مشتريتها ؟ مو كلتي تاخذين براحتج !

- اي اذا اريد ابدل براحتي بس هاي اني جنت ساحبه سلفه على راتب ابويه وعندي الي اجمعهن من دار الازياء وردت اشتري بيهن لنفسي شي بفلوسي

تره صح اني عمي يطشر بالفلوس وكلشي عنده بس مااخذ منه الا ادفع مقابيلهن
مااحب احد يفضل عليه حتى لو عمي
فاشتريتها بتعبي ..

- هسه ارتاح كلبي وعلييي

- عجبتك ؟

- اييي كلش مريحه وكشخه

- عمي كال اكو وجبه ال ١٧ من توصله بيها
رانج إيفوك بس اثنين راح يجيب منها
اذا تريد احجزلك وحده

- لاااا ياابعد روحي
كافي هاي كلش كافيه
مالحك امل منها والله

- اووكي كيفك بعد
شوكت ميعجبك وتطخ بالك الإيفوك كول وتلكاهه عندك

- ماتقصرين يالحبيبه
بروحي افديج وقليله بحقج والله

- اهم شي عندي اشوفك مرتاح وما ناقصك شي كون ارقى املاك الدنيا عندك تصير
اذا مااشوفك بالقمه وناس تتحسر على ربع الي عندك مارتاح

- ههه اووويل كلبيييي
وعلي احبج والحسيييين احبج احبببج

-ههههه اوووكي اني هم احبك
يلا صور ودزلي اشوفك اشتاقيتلك

سديت الخط ونزلت اخذت صوره ويه السياره ودزيتلهه ورحت تفاهمت ويه الولد
حولت غراضي من السوناتا للرنج و انطاني كارت المعرض مالهم واتفقت وياه بس اتفرغ من الشغل اروحلهم نكمل معامله ...

برمشه عين صارت ملكي رنج روفر سبورت V6 ..

كملت باقي يومي على التلفون ويه ريري
والاهل ... وثاني يوم طلعت لدوامي بسيارتي الجديده ..

صرت افهم حجايه ريري وكت تكلي
' هنا الناس تتنافس بالاملاك .. تتنافس بكثرة الصرف '

جنت هذا العالم بعيد كل البعد عنه
هسه صرت منهم وبيهم ...

من منظوري كبل السوناتا شي حلم احصله
ومن ملكته جنت احس مكتفي محصل الارقى
بس هنا كلشي يختلف ..
حتى الرنج روفر لا شيء بهذا الكراج
وهو مو كراج عادي
معرض سيارات بحد ذاته
كلمن مسويله سقيفه خاصه لسيارته

تصعد الرنج او اللكزس تلكه كدامك
طابكه المرسيدس والكرايزلر
شي منافسه .. منصب .. رتب .. سيارات
ايفادات ..
عالم شكد ما تصعد بي تحتاج بعد تعلى بس توكف تنغلب ..

وانه بديت اتماشى ويه نظامه .. حتى اللبس
لازم يضل متجدد وراقي مو بس الاجهزه
وهنا محد يسأل الثاني منينلك هذا ؟ او شكد سعره ؟
بس من بعيد لبعيد واحد يبحث على عيشه الثاني شلون تمشي ومنو وره فلوسه ..

مشت الايام .. وبدأ دوام المدارس ..
وملوكه هالسنه اول ابتدائي سجلت ..
بالنه يمهه .. وهي صارت عايشه بيتنا
ريري تدرسهه ومهتمه بيهه وفضه مهتمه بالبيت ..

اسألهه شلون كدرت ملوكه تتأقلم ويه الطلاب وهوسه المدرسه ومتخاف ؟
تكلي .. زرعت عقلي بيها بعد ماعليها خوف
شلون وشسويتي متحجي ...

نهايه الشهر كبل وكت نزلتي بجم يوم .. وريري
بشرتني بملوكه درجاتها كلهه عشرات
بدفاتر الاملاء ...
طرت من الفرح بيها
شكرت ربي لحد ما تعب لساني

جنت مستلم راتبي ..رحت لصايغ وصيته يصوغلي كلاده ذهب .. ردتها هديه لريري

بيوم نزلتي العصر مريت عليه لكيتها حاضره
دفعت فلوسها وطلعت كبل للنجف ...

تلكوني الاهل و ولد عادل و مؤمل وملوكه
كلهه صارت بوجهي من طبيت وسلمت
بس الحبيبه هالمره مو بينهم ...

رحتلهه بغرفه ابويه نايمه بالكاع وجانت غافيه .. ماكعدتها .. قفلت الباب واجيت تمددت يمهه حضنتهه وضليت اشم بوجهها
وهي كعدت ...

كبل حضنتني وانه بهالحضنه خليتهه فوكاي وضليت ابوس وجهها ..
- دخيل ربح شكد مشتااااقلج ولج شلون بيه شلووون روور اريدج يمي وعلي ماشبعت منج

- حبيبي اصير زينه واخذني يمك

- اخذج انه اداريج

-لا انته عندك شغل ماتعبك وياي
هسه خلي نتعارك ولك شو متخابر من تطلع
ليش متكول راجع !!

-هههه شسوي دكيت مره وانتي مارديتي
كلت نامت خطيه ماكعدها

-اي جان كعدت عدلت الكفشه شويه هسه حتى وجهي مكلوب
هاي صارلك شهر مشايفني تجي هسه تشوفني بالوصخ !

- ووولج لاتسودنيني وينه الوصخ !!
عمي انه الوصخ انه اسبح باليوم مره
انتي كل ساعتين طابه مغسله ومبدله
ولج انه وصخ وصخ بعدني مسابح من البارحه لحد هسه شوفيني شلون ملابس الدوام بعدني وصخ

-هههههه احبك يالوصخ
اشتاااااااقييييت حيل حييييل

-اااااخ ولج اااخ منج لو بس تمشين وياي هناك والله نعيش احلى عيشه

كطعت حجيي ببوسه وانه كملتها بالاقوى
وره شويه اندكت الباب ..
نامت بمكانها وانه كمت فتحت الباب وشفت مؤمل يكلي تريد عشه ..

كلتله اي وطلعت للسياره .. طببتهه وقفلت الباب ونزلت غراضي ..
ورجعت كعدت يم ريري ..

انتظرت الجهال طلعو واخذت الهديه خليتها بحضنها ...

ضحكت وفتحتها .. كبل شهكت وجلبت بركبتي وتصيح ...
- حبيبييييييي يمه يمه تجنن تجننننن

- تلوكلج والله

خلتها بايدي وانه لبستها الكلاده
صغت الها بالذهب
' رايــة حـيـدره '
زنجيلها طويل لبستها الها ووصلت بنص صدرها ..

دمعت عيونها من الفرحه وضلت حاضنه ايدي وكاعده تتلمس بالكلاده ..
وانه اتعشى ..

اخذت الصينيه للمطبخ وغسلت ورجعت للغرفه لكيت امي جاي تطلع فراش
وكالت تنام هي وابويه بالهول ..

من شفت الكل نامت بفراشها اجيت قفلت الباب و اخذت راحتي ويه الحبيبه ..

احب بيها هذا اشتياقها الي .. احب نفسي عدها
احب شكد مهم يمها .. اشوف روحي دنيا بحالها عدها .. ولا يوم حسيت انه انسان مهم بهالدنيا بس وياها ...

كعدت الصبح على صوتها تريدني اكوم افتح الباب وانه اتعاجز مابيه حيل البس واعوف النومه .. عفتهم يدكون الباب ورجعت نمت

تعرف هي بيه طبع بس تتلمس رجلي افز واكعد بعد فد كعده ...
وسوتهه وكعدتني ..

لبست الفانيله ويه البجامه وطلعت للحمام سبحت وبعدني امشط كدام المرايه وامي
اجتي تحجي ومخبوصه مدري شعدها

رحت يم ريري كعدت اتريك وامي اتفردش بوفيتها ..
- علويه خيرج ! فردشتي الدنيا شعندج !

- يمه اسكت رحمه لجدك
انه مشدوه حالي وانته طاير بسماك شتدري شبينا مابينه

- هااه هاذ انه ! چا ياهو المجنكل وياكم بالتلفون الليل كله

- ولك يمه عدنا قرايه ولا محضرين مفارش لا اختك وصلت لهساع وكومه شغل فوك راسي وماندل دربي وين

- مسوين قرايه اليوم !! عجب !
من شوكت صارت بيتنا قرايات !

- صااارت بعد صاارت انه اريدها تصير
اعرضلي مثل اخوك وخلي الزهره تعاتبني على رباتي

- دخيلك ربي
هسه انه عرضت حجيت
علويه كيفج انتي ام البيت انه شعليه شتسوين سوي

- اي چا كووم اخذلك واحد من الوليدات واطلعو اغسلو الشارع والحديقه عزلوهه
وطلعو القنفات
احفز لا تماطل المره ماطايره

ضليت اضحك وهي طلعت ..
كلت لريري..
- لج شبيهه امي شو حاميه علينه فدنوب !

- اي حقها لعد مسويه قرايه ونسوان وخبصه وكومه شغل ينراد وماكو وحده تعاونهه

- شعجب سوت قرايه ؟ هاي شجم محرم مر علينه ماسوت قرايات ابد وهي بذاك حيلها

- هي ناذره لملوكه
تكول ردتها من الزهره توكفلها وهي يتيمه
كون تردلها عافيتها وتعيش حالها حال هالبنيات

-هههه وانتي شكو تقلدينها

- هههه اخذني الواهس مو هي امشي وتعيد بهالحجايه
من اول ما فتنا بمحرم هي تصيح
' نذري يالزهره اوفيه و مصاب ولدج بيتي احييه '

لان شافت ملوكه رجعت تآلفت ويه الناس
وهي وياها وياها .. كلمه البيبي متنزل من حلكها وتشوفها تقرا وشاطره بعد تخبلت عليها

- هاا الحمدلله
بفضل الله وتعبج وياها
والله انتي صرتي سبب لفرحتنا كلنا
امي وابويه وملوكه وحتى امل هسه اكيد كلبها ارتاح على بنيتها

- اي شأريد اني غير راحتكم

- اكلج حبيبي احسج متغيره ؟
مادري صايره مو مثل كبل روحج نشطه
وحيويه
شبيج !

ضلت تباوع بعيوني شويه ودارت وجهها
كلتلي..
- الي بيه طويل شرحه
بس البشر يحن لاهله
گلب انسان هذا مو حجاره

بوست راسهه وعيونهه .. كلتلها..
- احنه كلنا اهلج
بنيتنا كلنا نحبج

- شكراً
روح سوي الوصتك امك عليه قبل لا تجيك هداده
لاحكين نكعد ونحجي

- اخذج تسبحين ؟

- هسه تجي فضه وتساعدني

- لا حبيبج يمج شتسوين بفضه

اخذتهه للحمام وضليت وياهه جوه
تغسل جسمهه وانه شويه اتحارش بيهه شويه اضل بعيد اباوعلها ..

طلعنه وعفتهه بفراشهه ورحت ويه امي
وسيف ورتبنا المكان للقرايه ...

كضيت اليوم هذا بيت السيد كاعد بين ما تخلص القرايه ... وكل ماخابر تكلي بعد
اكو نسوان ...

ولليل يلا رجعت ..
كاعدين كلنه بغرفه ابويه وامي تجيب وتسولف على نواقص الصارت اليوم بالتوزيع ولازم شنجيب باجر
انه حسبت باقي ٥ ايام لعاشر محرم
ضلت الافكار براسي وهمه يسولفون
وجنها امي ناويه تنام هنا وملوكه هم
عاد رحت شاورت ريري ...

- رور مشتاق لغرفتنا امشي اخذج ونصعد براحتنا نكعد نام نسولف

- عومري شيصعدني مابيه حيل

- اشيلج حبيبي

- بيك شيله ! تفطس بنص الدرج غير

- ولج چا ياهو النزلج تلث طوابق !
صح ضعيف بس اعصاب ايدي قويه
امشي افهمج هالسوالف فوك اشرحلج على ايدي ومنا ومنا صار هواي مشارحلج عليهن

ضلت تضحك بسكوت بس تهزهز بطنها
هي تلبس مشدات بالرجل ..
من جوه الركبه لنص الفخذ تنشد هاي تخليها توكف واحد يسندها بالمشي ..

انه اخذتها مشيتها شويه بره الغرفه
وسديت الباب .. غمزتلهه ودنكت شلتها من رجلها وصار جسمهه على جتفي ..

صعدت بيهه ركض ركض جان تصير بوجهي فضه ضحكنه بوجهه وهي هم ضحكت وكملت الدرج لغرفتنا ..

فتحت الباب هي عدها المفتاح وطبينا
كبل جريتهه شمرتهه على الفراش

- ولج هسه هيج راااحه
بووويه جوه مخنوك عبالك كاعد بمحضر
يرحون يرحون ويردون عليه
على النظره لاحكيني
وانه شابع صوم وعلي تعبت خلي افطر

- مستهتر صاير حويدر خربتك الدوله

- شعلت شيب الخلفوني
لج عدنا ٦ ايام اجازه
من اليوم محسوبه عليه وجايج التاسع والعاشر محرم هذني طايرات مني
وراهه لازم ارجع يعني مطيوح حظي رسمي
ف لو تداريني لو تداريني ماعندج حل ثالث

طفيت الاضويه واخذت راحتي وهالمره صدك صارت راحه ...
رجعتلي عافيتي بقدره الله خلصت من اكبر هم بحياتي ...

فرحت فرحه العمر وياها هالليله
وكلتلهه...
- اخذج هالسنه نحج سوه يم الامام
ونندعي الله يرزقنا بولد يكمل فرحتنا

- ماكدر اروح حيداار تضل حاير بيه بنص الهوسه

- اي احير بيج اي
چا شعندي غيرج ! بيمن احير !
نروح نطلب مراد لعافيتج اول شي
ونطلب الذريه والله حلم احلم اصير اب
والله مانمت ليله اذا مانتخي ربي يجعلي نصيب بالذريه

- يعني نروح ؟
اني ماخلي شي بنفسك اذا تشوف دعاء يستجاب هناك اخذني اوكي

- طبعا يستجاب
اخذج اريد ترجعين رورتي ام البيت
والله ما يلوك البيت غير بايدج

تدرين فكرت مدام الحمدلله وضعنا صار يتحسن وآن شاء الله تطيب ملوكه وابويه ومايضل عدنا شي نخاف عليه هنا
كلت اشتري بيت صغير بغداد قريب من دوامي ونعيش سوه هناك وكل اسبوع نجي نشوف اهلنه ونرجع

- ياريت حبيبي
وداعتك تعبت من فراكك بس اسبوع اشوفك مو عيشه هاي هم مو مكبله وياك جان حضيت بشوفتك اكثر

ضحكت وعضيت خدها .. واخذت نفس براحه .. كلتلي ...
- حيداار ماريد اضوجك بس اكو شغلات لازم نحجيها
صار الفتره هاي كلهه متقيده ماكدر احجي براحتي جوه

- اي احجي خلي نفتهم

- على صخيمه مرت عزيز
هاي شكد ما اكول عليهه بربوك وام سحوره وجايفه قليل بحقها

- شمسويه صخيمه !

- لك تتواعد ويه الولد الصبح من كلها تطلع للدوام تريده يجيها للبيت وتلح عليه تلح
وهو يطلع اعذار وميروحلها

- والنععععم من نسوان الاخو
وين ماكو ساقطه كحبه ملفين خلي يرفعون راسهم اخووتي شلون نسوااان تبيض الوجه

- هههه صاير متضوج

- مزاجي زين مرتاح هسه
كملي كملي

- اي فالولد ديكولي لشوكت هاي تضل لازكتلي اريد اعوفهه واخلص كرهت روحي
واني اكوله بعد بس كم يوم واني اكولك عوفهه

- اي صدك لشوكت نضل هيج !

- غير اني اسكطيت وكعدت جان هسه
لازمتهم واحد واحد ومسويه دمهم بطولهم

- يلا ماضل شي وتتشافين الحمدلله هسه هواي احسن صرتي عن قبل

- اييي
تره هاي صخيمه تريد تسطره للولد بسحورتها كل فتره تسويله اكله وتتواعد وياه بالليل تطلع وتنطيه وهو ياخذه من ايدهه للزباله

بس كول شلون عين كويه عينها
رجلها منسطر ونايم وهي اديح بالشارع
براحتها تتسرسح

- ريري غيري السالفه ماريد اطلع هسه احركها بيتها خليتي متصبر

- زين اووكي ديلا
لعد اسمع هاي الاضربين
يكول الولد ... البيت الي يرحن اله الصخيمات كل فتره بحجه شكل
هذا بيت بي عايشين بس اثنين ولد
يكول مو كولش كبار يعني اربعينات يطلعون
وهذوله سأل عليهم بالمنطقه كايليله
هذا البيت مسكون وما بي احد وهذوله الي تشوفهم تخيلات
البيت فارغ محد كاعد بي

- عليج علي !!!
چا هذوله منين !!!

- مادري هو الولد هم محتار يكول اني شفتهم بعيني ومن يروح بالنهار للبيت يلكاه مقفول من بره بزنجيل قديم مزنجر والبيت كاتله الوصخ والتراب وحياطينه ماكلتهه الارضه
ويكول البيت ماينعاش بي من شكله يقبض الروح

- زين شكلهم شلونه ! مايذكرهم يوصفهم النه

- كال واحد ضخم وطويل وواحد كصير ومتروس واثنينهم يلبسون دشاديش سود

- زين خلي ينطيج عنوان البيت
ونشوف شوكت نتفرغ ونروحله

-عزا نروح شنسوي هناك ! بلكي طلع جني هذا مو انسان !!!

- جني شيطلعه بالنهار كدام العالم يتمشى !
هذوله اكيد هم الراس الجبير وعايشين هناك
بالختله
همه هيج نماذج يكتلون روحهم على هيج بيوت وزواغيل

نسويلنه فد جذبه مرتبه ونروح نفهم شكو هناك

- اوووكي
بس هم خلي اكولك

- بعد اخبار ؟

-ايي مال شهر جامعتهن الك
هاي اكو مريه ثالثه ويه ام صخيمه والمحروكه تذكر كايلتلك عليهه

-اي شبيها ؟

- هاي يكول منتبه عليهه تعرج
يعني انته تعرف او سامع اكو مره من عشيرتكم تعرج ؟

- لا شمعرفني بالنسوان ! چا انه ليش كلتلج ضلي بينهن واعرفيهن واعرفي اخبارهن غير كلشي مادري عليهن !

زين بيتهم وين يجوز اعرفهم بيت منو

- بيتهم يكول بالفرع الي وره بيت طنطول

- علييييج عليييي !!!
لج هذا بيت ابنهم الجبير عازل مشتمل هناك وره فرعهم بالضبط

- يعني هاااي جنتهم الجبيره !!!

- ايييي وعلي هي هناك كاعده
بس خاف تطلع وحده من الجيران ! ليش نظن سوء بدون دليل !!

- لاا مو جيران كل يوميه رايحين جايين عليهه لو جيران شيطلعهه بالليل ماكو اهل يسألون عليهه !!!
هاي تطلع ويه عمتها رجلها مأمن بامه
يسفطن جذب براحتهن عليه ويطلعن

- استغفر الله شنييييي من مله هاااي دخيلك ربي
هسه مرت عمنا وبنتها وبنت اخوها وجنتها
كلهن سحارات !! واحنه ماندري !!!

- عصابه وحدهن ولك هذني
يطلعن من البيت لامات علاليك وياهن
ويكعدن بهذاك البيت ويه الرياجيل ساعه ساعتين ويرجعن
وحنفيش تستلم منهن ثاني يوم وتاخذه لهاي الي بالمنطقه ومتااااكده هاي توزعه للنسوان الطالبات شغل لو توصل لواحد يدفن

- عمي منظمه باكملها هذوله
والله لو ما العيبه والعار يضل لاحك اسمنا كل العمر جان رحت خبرت الشرطه عليهم وخلي يسحلوهم واحد واحد
بس عشيرتنا هذول وعمامنا وين ننطي وجوهنا لو صارت الفضيحه بالشارع !!

- لعد ماعدنا حل غير احنه نتصرف

- نتصرف طبعا بعد مابيها مجال نتراجع
اريد استقر عاد والحسين والحسسين ملت روحي

- ديلا هانت هانت
بس اصير زينه كلشي باسبوع واحد اخلصه
بعد عرفناهم كلهم ماضل شي صعب علينه
خلي نام عفيه

- وييين حبيبي يانوم بعدنا ششبعنا !
سولفيلي على الحب الاشتياق احجيلي الي بكلبج هذني عطشانهن

ضلت تضحك ونست النوم وكلبت نفس مزاجي ... احبها مطيعه الي بكلشي ما تمل مني ...

للصبح كعدتني تريد تنزل ...
- بروح ابوج وين نازله !
انه جاي اكابل الجهال والشارع لو اكابلج !!

- عدنا قرايه شبيك تنسى خلي انزل هسه امك توكف تعدلي وتصفلي
صايره عرمه لا عبالك

- ههههه ايي وعلي
هاي داويناها بعد رجعت حوك

تعالي هسه انتي حارمتني من اهم شغله
صار شكد محروم منها !! ماتحسين انتي شبيج !

- هههههههه طارت المياعه حوبي على باجر اعوضك

- لااا والله الا هسه
لج انه عندي اليوم حساب محسوب عليه
يلا حبابه لتخربين واهسي

ضحكت وغطت راسنا وضليت اسمع لسولفها
الي مامثلهه راحه على كلبي ......

نزلنه سبحنا سوه واخذتها جوه وطلعت بعد اتسوك للبيت ...

صار الظهر تغديت وهم طلعت بيت السيد
جان يحجيلي على ملوكه ويريدها ترجع لبيته
وهي متقبل لان عمتها هناك وبيبيتها وخوالها بعد ماتحلالهه الرجعه هنا

جاي اكله خليهه وياهم وروح شوفهه شوكت ميعجبك وهو سألني ..
- اكلك هاي مرتك لشوكت تضل هيج مريضه
شوفلهه جاره خلي تطيب وترجع بعد

- اداويهه ان شاء الله  وترجع زينه على راحتهه

- اي وشوكت ترجعهه !! مو فكيتو السحر شعدهه هنا بعد  !!

- هسه هي ضارتك بشي
شكو تسال عليهه !

- شبيك حيدر شو جنك نسيت الاصل والفصل منين !!

-مانسيت شي

- جا راضي بيها ! انه سمعت بيك عقدت محكمه وكلت يجوز كدام الاهل بس اشو مبين عليك مرتااح ومنشنش
وطاك طكه للستار

- بفضل الله رحم بحالي بيهه
ليش ماتريدلي الراحه !

-اريدلك خويه شلون جا غير اخوي
افرحلك انه بس هاااي مو من مستواك
انته السيد جدك رسول الله وهاي

-اكطع كلامك بعد اخوك
المره بذمتي والحجايه مارضاهه عليهه

انه سيد نسب مو امام معصوم
انه بشر وهي بشر والزين باعماله

- هااااا اثاري الحجي السمعته صدك ياحيدر
صدك وطلعت مصيود
صادتك النسوان !

- ما مصيود انه مقتنع بيهه
المره شفتهه زينه وياي ومن يوم الطبت بيتي وصارت بذمتي لهاليوم ماشفت منهه الا كل خير
وكفاتها اخوتي من دمي ماسووهه الي

- بس هي بنت ليل واصلها مايشرف بيوتنا
انه سكتتلك لان محتاجيها ومشغليها عدنا

- اي هي بعدها بشغلها شتغير !

- تغير انته تريد تخليها معلكه بركابنا
مبين ذاك وينك مكمل زواجك وياها
وعايش بالعسل

- اي چا غير مرتي !
مرتي ما زاني وياها

- بس انته كلت ماتكربلها
كلت ماتفر عقلك وتكعد تحوش الاكو والماكو

- خويه جان كبل شي وهسه تغيرت الاحوال
البشر ماتعرفه اذا ماتعاشره
وانه عاشرتهه وشفتهه اشرف من كومه نسوان مكبعات

- لك لااااتسودني
تريد تبقيها ويانه ويصير نسلنه من دمها !!
ولك تريد تكلبها بينه حيدر !

- خويه كول يالله
المره شبيها وهيج تسودنت
انه من احجي اعرف اوادمي مو غشيم

-لااا والله اكبر غشيم
وغاسله عقلك هاي هاي الملعبه ام الملاهي

- سيييييد حجيك مااارضاه
جاي تحجي على مرتي مو هذيج الغريبه

- مرتك زانيه وكاضيتها شرب وعربده
هاي الرافع راسك بيها

- اااي هيي هااااااي ااانه رافع راسي بيها
ان رضيت وان زعلت
مرتي هي وابن ابوه الياخذها مني

وبعد كعده وياك مااكعد اذا مااشرفك صرتك
تحجي عليهه يعني تحجي عليه

مرتي زينه شينه تسكت انته مالك دخل بيها
انه ولي امرها وانه اعرف اتصرف .. زينها وشينها عليه
انته خويه لا تدخل بامر بيتي انه ادرى بي منك

عفته مكلوب الوجه وطلعت ضليت افتر بالسياره وتعشيت بره وتالي يلا رجعت للبيت

كعدت ويه ريري جنت ضايج من حجيه
ومبين على وجهي المغثه .. كبل حجيتلهه
الصار بينا وهي كلتلي ...

- حيداار هذا الغيره كاتلته
شافك منصب وفلوس وسيارات وسفر
ومرتك مرتاح وياها وهو بدون شي كارهني
واجيت انطيتك كل هذني هسه صار بعد الا شويه وينفجر

- شسويله متكليلي شسويله

- طنش وعوفه حتى بعد روحه لتروحله
يريدك يشيل تلفون ويخابرك اذا صدك يعزك
واذا لا راح تشوفه يعوفك بعد

وانته لتحجيله شي باخبارنا هذا يخوف شو ابد مارتاحله

- الله كريم
خلي بس اشوفج ترجعين لعافيتج
واخذج نعيش هناك براحتنا لا علينه
بهاذ ولا ذاك

- انطيك بيتي بيعه و جمل فوك فلوسه شويه
واشتريلنه بيت مريح نفه كون بي هواي ضوا
وحديقه جبيره

- عاجبني اخذ بيت على المحيط وعلي من امر من هناك مرات شكد اتمنى احصلي واحد من هذني البيوت
يااابويه راحه نفسيه هناك

-اييي نكعد براحتنا
لا نعرف احد ولا احد يعرفنا واله دخل بينا
حاول تدور بالعقاري بيت هناك حتى لو صغير بس كون مو مخنوك
لان هناك صعب تحصل بيت بسرعه

- اي ان شاء الله اوصي اكثر من مكتب
يحصلولي بيت هناك
واخذج واسد باب الدنيا والعشيره كلها وراي
وكون الله يرزقنا بولد هناك الا اعيشه امير
بينا اترسله البيت العاب واجمع لكبرته اذا الله مكني ومدني بعمر
اسويله حساب اجمعله بي من راتبي وأمن عيشتكم

- يااعومررري متفائله كولش
اذا صار عدنا طفل صدك صدددك ربي راضي عليه

- يرضى عليج ان شاء الله وانه هم راضي عليج وبروحي افديج

- حبيبييي
شيعجبك تسمي ؟ تصير ابو منو ؟ لو ممفكر

- شلون ماافكر انه تفكيري كله لو بيكم لو بالسحوره ههههههه
اريد اسمي ... سند .. كلش يعجبني هالاسم
بلكت الله ويصيرلي سند مثلج

انه ساندني بالدنيا بس الله وانتي واريد ابني هم يصيرلنا سند

.
.
يتبع 💕