رواية ماء مغلي الفصل الستون 60 - بقلم Zoka 🌷

..♣️🩸   ماء مغلي  🩸♣️..
* adzzon *

دخلنه سنه ٢٠١٨ ... شهر الواحد ..
نايم يوم الجمعه بالقسم من العصر نمت وتالي كعدت ب ٣ بالليل ...
باوعت لتلفوني ولكيت منهه رساله على الفيس ...

فتحتهه ولكيتهه دازتلي ..

- لـيش يـا اول و تـــالي الـحـبايـب

حزت الرساله بكلبي لجمته ...
صارت بعيني هذيج وكفتنه بيوم المطر
وهذيج همستهه باذني
وكت صرت انه اول وتالي الحبايب ..
اليوم العتاب ثكيل من اول حجايه نخر كلبي

لبست ملابسي وطلعت للشارع امشي وادور تكسي لحد ما حصلت تكسي وطلعت لبيتهه
نزلني براس الشارع وكملت مشي لحد بيتهه ..

ساعه راح تصير اربعه الفجر والجو ضباب
وبارد الهوا يجرح الوجه ..
مديت ايدي لجهه الباب من جوه وفتحته
وطبيت دكيت باب الهول ...

خابرتهه ومتجاوب .. دزيتلهه رساله ..
' انه بالباب افتحي بساع '

ضليت ادك بالباب لحد ما فتحتلي
شفتهه متلفلفه بالجاكيت الفرو وتباوعلي ورافعه الحاجب ..
خليت ايدي على وجهه وهي دارت وجهه وراحت جوه ...

جانت مخليه صوبه يم القنفه ورحت كعدت هناك وادفي ايدي عليهه وهي ضلت بغرفتهه
شويه واجتي ..
كعدت على الكرسي الي يم التلفزيون
كلتلهه..

- تعالي هنا ادفي يمي ليش كاعده بعيد

- معليك بيه
شعندك اجيت !

- كعدت وشفت رسالتج
فز كلبي ماكدرت اضل انتظر بعد

ضلت متجتفه وتهز برجلهه وانه عدلت كعدتي وكلتلهه..
- باقي ٣٣ يوم  على تاريخ رسالتج بدون ليش

- اتمنى ما اعيش ليومهه

- ليش تندمتي عليه !

- مو بس ندمااانه اني فشلانه من نفسي على ذاك اليوم

ضلت دايره وجهه وعاضه شفتهه وشويه ونزلت دموعهه .. باوعتلي و تحجيلي ويه دموعهه وهذيج الغصه مبينه بكل حرف منهه ..

- فشلانه من نفسي شكد رخصتهه
شكد صرت غبيه وطرت بالحب وياك طير
وصدكت نفسي وتالي طلعت ورطه بحياتك

- لاا لااااا انتي روووحي والله احبج رور تشكين بمعزتج عندي ! ماتعرفيني شكد احبج

- متحبني انتتتته متحبني
لو تحبني جان حجيت الحجايه الي تبرد كلبييي .. جان رحت وكسرت وجهه ساعه الي يحجي عليه
بس انته عجبك الحجي كلششششي من سوالفه عجبتك

- مااااعجبني شييي ريري انه يايوم سمعتج حجايه تغثج !

- لو باقي بعد كم يوم جان سمعتني اشكال الحجي
مو زينيه منك انته ماسمعتني حجايه بس لان مالحكت تحجيهااا

كلشي بكلبك موجود من هالحجي عليه
لو ما عندك تفكير بي جان مانصاعيت لحجيه
بس انته باقي وياي بين وبين
ساعه تريدني وساعه تستنكف مني

- ولج انه اجيت وكلتلج نتزوج ااانه الكلتلج انسى كلشي وضلي وياي انه ردتج بكلشي بيج ليش استنكف منج هسه !
شبيج انتي !!! لاتفكرين بيه هيج وعلي تظلمين نفسج هيج وياي

- لعد ليش قبلت لحجيه ! ليييييش وانته مو تكول ردتج بكل شي بيج
ليش تكوله هاي صارت بعد !
وتكوله اي هي مو زينه بس محسوبه عليه مره !!!! 
لييييييش تحجيييييهن وانته تكول موووهيج تفكر بيه

- صدكي جنت بس اريد اسد الموضوع
هذا ياكل راسي بالحجي وانه اريد اخلص منه

-جذاااااااااااب انته ترتاحله بهالسوالف

- ريري والله جنت تعبان
وافكاري مادري بيهه تروح وتجي ماسيطر على تفكيري والله ياخذني الروج ويرجعني وانه مالي حيل على روحي
مااجنتي تدرين بيه شلون تعبان ! مو كدامج اجيج منهار وساعه لخ اصحى
ليش ماتحسبيها هاي !!

- غلطك تكوم واحد فوك الثاني
انته تشك بيه وهو يحجي عليه كدامك
ومارديته رد يشفي الكلب
هاي لو اني و واحد يجيب طاريك
جان مرعدته بسنوني واخلي يخاف بعد يجيب اسمك حتى ويه نفسه

بس انته خليته يتشمت بيه ويأذيني بكل شي
اذاني بيك وكسر كلبي واذاني بصحتي وبابني
وكلهههن منه هوو الي جنت تعوفني وتكضي الليل وياه ماعدكم سالفه غيري

- والله هو استغل تعبي هالفتره وضل يراوغ بالحجي وانه ماركز تفكيري طلع من ايدي بعد

- مووو عذر هذااا انته لا مره ولا مرتين
عدت نفس السالفه

- والقرااااان كل ذاك الحجي ماقصده بس اخذني بالحجي ومانتبهت والله
رور انتي لو صدك غلطه وورطه بحياتي جان عفتج
شجم مره انتي كلتيلي عوفني ودستي بكلبي
وعفتيني ماهتميتيلي وانه اجي اتوسل بيج على حجايه تردين بيهه عليه
اتوسل بيج على كعده دقايق وياج وماتقبلين
هاي انه لو صدك متورط بيج جان ماستغليتهه فرصه واعوفج واخلص من صدك ! !!

ليش ماتحسبينهه هيج !! ليش ضاله بس تشوفين غلطي هذاك !
ماتشوفين شكد صار على فراكنه وانه متمسك بيج !! لو ماريدج وشايفج مو زينه اجيج هسه بنص البرد اطلع والدنيا ظلمه وضباب بس حتى اشوفج حسيت بحجايتج شكبرهه وتجرح الكلب كلت اضل يمهه ماعوفهه هيج يوجعهه كلبهه مني

ضاله تفكرين بس تعاقبيني على حجايتي
وانه كايلج عمري كله بين ايدج وجاي اموت بلياج والله ماعايش ماكفاج هذا كله ماااكفاج !

شتردين تشوفيني ميت كدامج ويبرد كلبج مني
هيج ساعتهه يلا تكتفين بالزعل والعناد !

كليلي خلي افهم وين تردين توصلين
احجي ليش تبجين ! لاتبجين انه يمج شتردين حاضر بس لتضلين شالعه كلبي هيج

ضلت تمسح حيل بعيونهه وتحجي ...
- ماريد ابجي ماااا اريد
شكد كلت لنفسي ماابجي من تجي يمي ماابجي من نحجي هيج بس
كلبي يووووجعني مااااكدر

رحت يمهه حضنت راسهه وهي تضرب بيه
لحد ما وخرت ..
ضلت تحجي بصوت عالي..

- شسوووي بيك هسه صحيت وشفت الزين من الموزين
شسوووووي بييييك

لك اني فتحتلك كلبي بس انته بحياتي خليتك توصل كلبي
لك ابويه وهو ابويه مالحكت افتحله كلبي

بس انته خليتك بكلب خاام ريحه بشر ما واصله .. كلتلك ضل هنا الكلب بس الك
عيش مرتاح بس ضل مرتاح واجيبلك الدنيا كلهه اخليهه بايدك بس ضل كاعد هنا بكلبي مرتاح ماحبيت غيرك ولا قتنعت بشر مثلك

وانته بنص كلبي كاعد وعصرت لحم كلبي
لليوم مانفك من ايدك

ليش حيداار شردت منك اني ! كلتلك بس لا تغدرني وانته غدرتني من حجيييييت عليه غدرتني

ليييش تجي تنام يمي وبالك حجي عليه
واني الغبيه الكاعده اداريك ومن تطلع انتظر بيك واتلكاك بكل فرحه وانته هنااااك تكعد تحجي عليه

ليييش ماخجلت من عشرتي ! ماكلت شلون اكعد وياهه وانام بحضنهه واني هناك حاجي عليهه !!!!

هذني هينااات عندك ومافكرت بيهن !
لك هذني حرمني عيشتتتتتي
نومتك يمي وحجيك علييييه هيج انته بسجين عميه تحزززز وتكص بلحم كلببببي

جااان كلتلي ماريدج بعد
جان كلت اطلعي من حياتي كول روحي اني تورطت بيج وهسه صحيت على نفسي انتي متناسبيني
ليش عفتي هيج تضحك عليه انته وابن عمك
ليش حيداار ليشش ماخليتني اروح ويضل بينا كلشي بصراحه ليش تنافق وتكعد وياي بوجهين !!!

رفعت ايدهه وبنص بجيهه كالت ...
- والله والله لو كايلي ندمان على زواجنه
والله ما يصبح عليك صبح بعد وتشوفني يمك
والله ماعاتبك ولا احجيلك حرف واحد
جان رحت وبقيت بكلبي اعيش حبك وحدي واني مرتاحه

والله جان حتى الولد لو ردته  وما ردتني جان ولدته هنا وادزه الك انته تربيه ومااحرمك منه

والله حتى لو حاجيتني وجه بوجه وتكولي هذا مو ابني واني اشك بيج تخونيني وماريدج بعد
والله جان ما عاتبتك واروح واكول حقه
اني شما اسوي زين اضل مو زينه

تمنيتك كلهن هذني تحجيهن بوجهي
كون هاي حجايه حجااايه تنطيهه بوجهي
والله جان عذرتك وحتى لو بعد فتره حسيت نفسك وحيد وتريدني جان رجعتلك
جان اجيتك بنفسي واني الي ارجع كل حياتنه للاحسن

والله جان وكفت على حيلي واعوضلك الولد
جان ماحرمتك من شي

بس انته غدرتني ومالك عذر بغدري
لان اني منطيتك صلاحيه الحجي بوجهي
ومن شروط عيشتنه سوه كلتلك من تشوف نفسك بعد ماتطيقني ومتريد عيشتنه سوه تجي تحجيلي واعوفك

هذني انته الغلطت بيهن ونهيت كلبي كوله نهيته مابقيت بيه كلب
من الوجع الي بي عدمته بعد ما يحن عليك

كعدت يم رجليهه ومدنك وهي كلتلي ..
- اني صح حجيت عليك وصيحت بالبدايه من جنت بالمستشفى بس جنت منهاره من خسرت ابني وخسرتك

بس هسه لا  رجعت اركز وماريد اظلمك
واخلي كل الذنب عليك

الولد الراح فدوه الك انته هم ضحيه صرت مثلنه .. الصوج مو منك
همه الي عرفو يلعبوهه عدل ويكطعون الي بينا يهدمون حياتنه لان هي مرتبطه بهالولد
فدوه الك يروح ابني وكل حركه كلبي عليه

بس ذنبك انته هذيج الحجايه الحجيتهه عليه
ومحد ضغط عليك انته بايدك كتبتهه
اني هنا مااسامحك على حجيك وذمك الي
وانته تدري بيه عفت كلشي وبديت وياك خام
على كلمتك امشي

ليش ذميتني وانته بيدك بقيتني وسويتني
من جديد خليت الي عيشه ثانيه وبعدين نبذتني !!!

ليش جان عفتني بعمى عيوني من البدايه
ليش فتحت عيني لدنيا حلوه وحياه واهل وبيت ورجال وحب وبعدين تكسر بيه !

كمشت ايدهه وهي جرتهه .. كلتلهه..
- سامحيني ياروحي انتي
وجلال الله ما ردت اكسر كلبج
احبج وحك لا اله الا الله
بس انتي حبيتج وامنت بيج بس ساعه شيطان وانه متدمر والله جنت تعبان من نفسي تعبان

- مااسامحك اني حلفت مااسامحك
لان غدرتني وعفتني الوم بروحي
واني مااذيتك بشي ولا سويت الي مترضاه
كل شي اسويه جنت احجيلك عليه وانته
نبذتني

خليتني اضل كل يووووم كل يوووم اسأل نفسي بيمن تعبتك وثكلت عليك حتى تغيرت عليه !
اني شسويت وهيج بزعت مني !
شبيه هملتك ! ما دللتك ! قصرت وياك بشنو ! هم تخليت عنك فد يوم وكمت تشوفني مانفعك وعندي مصلحه وياك !!
هاي الشهور كلهه اني اغمض عيني وافتحهه واسأل روحي شسويتلك وهيج تغيرت عليه !

جاوبني هسه انته احجي ريح كلبي كولي شسويتلك اني ! ليش رجعت تشوفني بنت الشارع ليش مو انته سويتني بايدك مو خليتني رايتك ليش برمشه عين رجعتني لا شيء كدامك ! !

ضليت افرك براسي والدمعه بعيني
وماكو حجي احجيه ويبررلي شسويت
انه نفسي مادري ليش هيج سويت !!!

كلتلي..
- تتخيل شلون فشله اني احس بيهه
من اني مريضه واتوسل بيك ٣ ايام تاخذني دكتور وانته تطلع اشكال الاعذار واني بوجع ذابحني وما موتني
باقيه انتظر بيك ومن تجيني بالليل تلكاني زعلانه منك تعوفني وتنزل واني انتظر بيك هسه ترجعلي وتاخذني للمستشفى بدون مابعد ارجع اذكرك واتوسل بيك
وانته مترجع ...
تكعد جوه تكلب بتلفونك واني فوك انازع من الوجع وحدي
وافتح تلفون واشوفك تراسل ابن عمك
وتحجي عليه بكل بروده كلب
تتخيل فشلتي من نفسي شكبرهه !!!!

اني انتظر بيك واجي اشوفك تحجي عليه
شيضل بيه شعور بعد!

اني فوووك جرح هذيج الحجايه عندي فشلتي من نفسي فلشتي من كلبي شكد سكط وشكد حنين كاعد ينتظر بيك وقابل باعذارك بس كون تجي
هاي الفشله خلتني اكره روحي واحير شسوي بنفسي واطم فشلتي من نفسي

غمضت عيوني وعصرتهن والوجع بكلبي يدك من حجيهه والدمع حار ينزل بسكته ..

- هاا وشايف بعد شلون غصه كلب تصير
من يخابرني عمي ويكولي
' هاا كسر كلبج ! هااا رجعج لاصلج ما رادج ! '

هنا لا اكدر اكول .. اي .. اي كسر كلبي هذا العاندتك عليه
ولا اكدر اجذب واكول .. لا.. ما سواهه
لان كلشي بيه ذااااك وينه يصيح سواهه حيدر وكسر كلبج
حتى النفس الي يسمعه بالتلفون مبين عليه مكسوره كلب منك وراجعه خسرانه
واني الراهنت عليك وخليتك الرجااال الي جان عمي يحلم اكو رجال يكدر ياخذ كلبي
ويرضيني

هاي الشماته تيزاب بروحي صارت
من هذاك ابن عمك واهله ومن عمي
ومن كل واحد وراي يكول عافهه لو
خانهه لو غدرهه
حتى امك وابوك من بيناتهم يكولون اذاهه
هااااي هم تحرك بروحي

ليش ينحجي علينه ليش ! مو هاي علاقتنه
خليت الناس تتحسر عليهه .. تعبت بعشرتك اني ماجبتهه وياك بالهين
وتالي متالي ينحجي عليهه !!!

ماااتحمل احد يحجي عليك ويكول حيداار سوه بمرته هيج
ويكولون حراااامات تفاركو وحرامات كسر كلبهه
لو يكولون شوفو شصاير بحاله
مااااكدر اتحمل الحجايه علييييك والله
حتى هاي حجايتهم الي ع اساس تواسيني وهمه عود واكفين وياي
ماااريدهه ولا ارضى على اليحجيهه عليك

لان اني ما ردتك هيج .. مخليتك كدام ناسك ملك محد يوصل مستواك ولحد مااموت وانته تموت مااخلي اليوصل مستواك ويقلل من قيمتك

هالكلمه من اسمعهه عليك تحرك روووحي
لان اني جنت قبل احلم تصير عندي صديقه تحبني مو تحتاجني هيج بس صديقه جنت احلم تصير عندي وماصارت
ومن صرت انته حبيبي وكلشي بحياتي
انطيتك حب ما تعرفوه انتو الحياتكم مليانه ناس واحباب

اني جنت بنيه عندي كلب ويحب بس مااكدر احب بشر لان كل الي وياي تريد اذيتي
اريد احب بس ماااكدر الااا اعيش واني اكره

بس انته امنت بيك وحبيتك
انطيتك حتى حب الاصدقاء الي ماعشته
وحتى حب الآهل الخسرتهم
كلششي حتى حب الدنيا الجنت اكرهه

لو شكد مااحجيلك شلون حبيتك متكدر تفهمني
لان انته ماعشت وحيد ولا تفهم شنو معنى انسان يعيش وحيد

يمكن انته من تسمع هذا وحيد كبل تحس
بالشفقه عليه لو تشوفه ضعيف و وحده
بس هي مو هيج

اني عشت وحيده لان شابعه خذلان من الناس
ومن اعيش وحدي اني مجبوره
الوحده ماتنراد

هذا البرود والهدوء بكل ركن بالبيت وانته وحدك كاعد تره يشك الكلب
من يمر العيد وانته ماكو بتلفونك رقم واحد من اهلك تعايده ولا عندك احد يدك بابك ويكعد وياك ويسلم عليك
هاي الوحده هيييج افهمها مو بس شفقه

ناس تروح لبيت جدهه بيت عمهه وخالهه
بنات عدهم خالات وعمات وبنات خاله
ويرحون عزايم بيناتهم وسوالف وضحك
واني ما فد يوووم شفت احد من اهلي
هاي الكعدات من كلمن يلم ناسه ويسد بابه
اني اموت بحسرتي عليهه

وحصلتهه بيك شووووف شكد انته اثرت بيه
وشكد اني طرت من عقلي وياك
و ويييييين شمرتني بيا نار عفتني الوم بروووحي واكووول حييييل استاهل وبعد ازيد كووون انحرك واتعذب بعد ازيد
استاهل اني الحطيت نفسي بنص ناس
مو من ثوبي .. اجيت وورطت الرجال وياي
وما حكمت عقلي هذاااا صوج اليمشي وره كلبه عمررره مايعيش مرتاح يضل ياكله الندم
لحد مايعوفه عظااام يمشي عليهن الدود جوه الكاع

سكتت  وشويه خلت ايدهه على وجهي ودارته عليهه .. 
- شبيك تبجي على شنو !!!

- ندمان وحك عينج

- ديلا كافي تره ماتحمل اشوفك تبجي
اووكييي كافي يلا عوف الحجي روح غسل

خليت راسي على رجليها وبجيت من كل كلبي ... وهي ضلت تصيح ..

- هسه شبيييك هو كلبي الممرود لو كلبك
ماتسكت عاد
يطبني مرض هسه على شنو حارك نفسك عليه
خلي اولي وروح انته عيش حياتك شبيك موتت نفسك هيج

- مااعيش بلياج والله احبج وندمااان وعيونج ندمان
شيحملهه كسره كلبج بعمري ! والله ماعندي حيل بعد اتحمل قهر وعلييي تعبت
كلشي جان يهون من انتي وياي هسه
بعد انتهيت والله انتهيييييييت

- ديلااااا هسه كافي
كوووم غسل وروح ماعندك دوام ! صار الصبح تره

رفعت راسي ومسحت وجهي وكلتلهه..
- دوامي مسائي اليوم سبت

- زين ديلا لعد روح نام تره الحجي ميخلص
وانته مابيك حيله
عوفه احسن

رادت تكوم وكمشت ايدهه ...
- تسامحيني ؟ ونرجع نعيش سوه وين مايعجبج

ضلت تباوعلي وجرت ايدهه بهدوء من ايدي
وكالت...
- ما نرهم سوه والغلط بعد مااعيده
هو ثوب الما رهم مو شرط يتخصر

راحت وعافتني بحركه اعصابي ..
سمعت صوت الخلاط شغلته وانداريت اباوعلهه ..
مطبخهه مفتوح على الهول ..

صبت العصير بكلاصين بلاستك
واجتي خلت يم رجلي واحد وراحت كعدت
على القنفه ...

باوعت على الكلاص وشفته عصير اخضر
كلتلهه...
- هذا ماليش ؟

- معدنوس وكرفس ونعناع
ينشرب على الريك ينظف الكبد ويزيد الدم
ويفتح الشرايين ويروي الجسم بالمي
اشربه مبين عليك الجفاف والتعب

شربته وكلتلهه..
- ريري انطيج وكت تضلين بي براحتج
بس انطيني كلمه نرجع سوه

- ماكو رجعه النه سوه
احنه غلط رهمنا من البدايه سوه
حيداار انته تبقى ابن ساده واني ابقى بنت شوارع وليل وكواده
كلمن طمخته براسه ما يغطيهه بس الجفن

- بس احنه عشنه مرتاحين
كدرنا نرهم سوه والصار غلطه
نكدر نتجاوزهه ونعيش
ريري اليحب يضحي وانه بكلشي ضحيتلج من عيشتي
ليش انتي ضاله تشوفين الفرق بينا !!!
ماتشوفين روحي شكد تريدج !

- اشوف وادري
بس غلط واول مره مشيت بحجيك وتاليتي خسرت كلشي
بعد ماارجع اعيد الغلط نفسه

كافي فشلتي من الصار بعد ماكدر ارجع مرتك وارجع هذيج الحنينه وياك لان كل مااذكرهه اكره روحي
شلون جنت هيج اسوي !!!
عقلي هسه صحى وفووك ما كلبي ممرود
هو يدوس عليه
ابد ماااايخليني امشي وياك بعلاقه بعد

- لااااااااااا تعاااانديييين ويااااي
ريررررري جااااي اموت هيييج لاتعوفيني اكضي العمر ندمان وبحسرتي عليج اعيش

ارجعيلي وااانه انسيج كلشي مااااتندمين وياي بعد والله ماااتندمين
لا تضيعين عمرنا هيج لخااااطر الله
اااااانه اريدج اريييييدج
لا تخسريني كلشي دخيل ربج لا تعاديني هيج

- انساني وعيش
صدك احسن شي هيج
لان اني منك شبعت قهر بعد لو تشبعني غزل وضحك من الصبح لليل ما ينسيني شي

وروح ما اريد بعد لا اعاتبك ولا اذيك بحجيي
ضل انته بعيشتك واني بعيشتي

-  لجججج لاااااتكطعين عمررري هيج
كلتلج انطيييج وكت ضلي ارتاحي ويبرد كلبج يلاا اجيج
شتردين اسويلج بس لا تحرميني عيشتي

ريري ماعندي غيرج يفهمني بالدنيا
هاي كلمن رجع لحياته وانه وحدي ضليت خسران
لا تعوفيني هيج .. انه حبيبج لج بس انه الي بحياتج انه اهلج وناسج ليييش تعوفيني !!!
جاا انه الاحبج وتطلعيني من حياتج !

ليييش بويه لييش !! المن تعوفيني !
منو يضل وياي !! انه ويامن عايش غير وياج ! اهلي ما عشت وياهم مثلج

وعلي من فاركتج لليوووم عايش غريب بين اهلي
اذا رحت للبيت ادورج بي
مااحسه بيتي والله من انتي مو هناك وتتلكيني
اريد بس ارجع لبغداد حتى اصيرقريب عليج

وترديني بعد انساج واعوفج !
زين ويامن اعيش !!!
ترديني اعيش وحيد وانتي موجوده واضل ميت بعيشتي وحدي !

ضلت مدنكه وتباوع للكلاص واخر شي رفعت راسهه وكلتلي ...

- اسامحك وعوف الندم وروح عيش حياتك

- ارييييييييدج ويااااااااي
انتي مرتي ماااعوفج اريييدج يمي

- اني هنا من تشتاقلي تعال شوفني
اووكي عادي

- ياااااااعناااادج
دخييييييل ربج انتتتتتي شنو من بشششر
جاااااي اكلج تضيعيني هييييج
لااااتحركين عمري كدامي كاااافي الصار بيه لخاااااطر الله كاااافي

- روح حيداار انته تعبان هسه
روح ارجع ارتاح وبعدين نحجي

رحت عليهه عصرت وجهه بايدي
وصيحت عليهه ..
- تخسسسررريني والله اذا تضلين بعنادج

جرت ايدي ودارت وجهه ..

- ريرررري  تعبت بالحسيييين تعبت
عنادج يهلكني

- عوفني حيداار وفر لنفسك الراحه
احسن
لان على فشلتي هاي بعد مااعرف ارجع احن

- نعللىىىىى على يووووم العشت بي
ضلييييي اخذي وكتج ضلي شكد ماتردين
وارجعلج اخذج ويااااي وتعيشين ويااااي
غصبا علييييييج تعيشين وياااي
انه مااادمر حياتي وحياتج من وره العناااد والكبرياء هذاااا
ااااانه رجلج  عيشتج تضل ويااااي غصبا عليج تضلين وياااااي
وطلاك ماااطلك لووووو تذبحين روحج
مااطلكج
ترجعيلي يعني ترجعيلي

-  ماااااااا ارجع لو تموووووت

- ارجعج  وعااااااندي ضلييييي عاااندي
بس تاليتج وياي

- حيدااااااار مااااتجبرني على شي
انييييي حره هاااي حياتي عايشتهه قبلك وحدي واريد اكملهه وحدددددي
جزعت من عشرتك ماجبتلي بس الضيم
رووووح مااااعاشرك بعد لووو اموووت

- تعااااشريني ومرجعج الي
مو اخوج الصغير انه وتعاندين وياي وتحطين راسج براسي
رجلج اااانه رجلج
ماااادام اااانه عاااايش واريددددج
يعني تبقيييين ويااي
تردين تزعلين ازعلي عسى ما سنين تضلين
بس يجي يووووووم وارجعج وحلكج متفكيه
وتطلعيلي بعنااد جديد

وحك السواج ياريري
اذا تضلين بعنادج هذا وياي اجي اخذج منا شحط واعيشج وياي غصباااا عليج

- لك حيداااااار
انته هييييج تكرهني بيييييك عوووفني اني بدون شي مجمر كلبي مننننك
عوفنييي وحدي ماريد اعيش ويه احد بعد
ماااااريد اكابل بشششر
عوفنننني وحدي اعييييش

- ماااااااا اعوفج وحددددج
انتي تردين تعيشين وحدج يطبج مرض بس انه مااانهي حياتي علمود والله انتي ضجتي
بعد ماتردين تعيشين ويه بشر

هاااااي انه جبت حيااااتي بالضيم وطلعااان الروح يلااا لكيت بشر اعاشره ويفهمني
وما اضيعج من ايدي لووووو مو تعاندين
لو تضلين مكابلتني وتلعلعين بصوتج
وتبومين الوجه
هم ارييييدج وياي

- شكووووو كاتل نفسك هيج على عشرتي
هو اني بيه نفس نفسين واموت شكوو بعد
ذابح روحك عليييييه
روووح عيش خلصت النسوااان
ضلت بس عليه !

- ااااانه اريدج انتيييييي
مرتي واررريدج
طز بالنسوان شايفهن انه !! هم شايف نسوان !! وادور وراج !!!

انتي اختاريتج بعقلي وكلبي وغلطه غلطتهه وجاريت صخيمان بالحجي
بس انه مااااااضيع عمري الباقي علمود غلطه
واانه اكدر اصلحهه بس راسي الكووووي
يلين ويااااي وتبطلين خبال

- اهووووووووووو
حيددااااااااار
مااااارجعلللللك والله

- ويطببببج مررررض لاترجعين بكيفج
ارجعج غصباااااا عليج
و علييييي اسويهه كسرررة  خشم الج

جزعت روحي من عنادج و التواسيل وياج
وجاي اكلج انه عمري معلك عليج
ارجعيلي ونعيش احسن عيشه

- يااااعيشه هاااي الزينه الي نعيشهاااا
شبيك انته متشوف حاااالي !!!!
وين تكدر تعيش ويه وحده ماتكدر توصلهه تنعدي وتتمرض وتموت !!!!

- تتعالجييييين ما بيج جرب انتي ومايصير اوصلج
هاي الدكاتره مكومين اخذج اعالجج
وارجعج لحضني
شبيهه صعب !!!!!!!

- ماااااريد ارجع لحضنننننك
مااااريد
اريد ابقى وحدددددي
احتتتترم رغبتي احترررمهاااا
اريد اعيش وحدي ماااريد احد ويااااي

- عفتج واحترمت رغبتج صااار شجم شهر عااايفج براحتج !!!
وهم اعوفج بعد براحتج
بس انتتتتي فكرررري وليني لراسج

بعد الصبر خلص وياااج
انه غلطت واجيت اعتذرتلج الف مره
وتوسلتج تسامحين ونعيش سوه من جديد
وماااتقبلين بااااقيه بعنادج
وانه عمرررري مااضيعه بالعناد

ماااااخسرج ريرررري ماااخسرج
كافي خسرت ابني وخسرتج لحد هسه
شبعت ضيييييم وحركان الاعصاب والتعب مااايدري بي بس ربج
انه سلمتج العمر بايدج بس ماااضل اتفرج عليج وانتي تحرررررركين عمرررري كدااامي

- هااااي حياااتي اني اريد اضل وحدي معليه بييييك انته اخذ عمرك واخذ كلبك واخذ كلشي الك ورووح دبر عيشتك معليييه بيك

- استغفر الله استغفر الله

كامت تريد تروح لغرفتهه وانه كمشت ايدهه عصرتهه وكلتلهه...

- راح اعوفج واخر مره اكلج
ارتاحي وارجعيلي بقناعتج
انه مااجوز عنج وماخليج تهدمين حياتنه

- واني قناعتي اعيش وحدي
مرتاحه هيج انته الممرتاح مشكلتك هاي مو مشكلتي

- اسويهه وياج شغله عناد والله
واخلي عشرتنا ترجع بالعناد وكسرة الخشم

- هو ضل بس خشمي ماكسرته
يلا انتظرك اوووكيي

طبت لغرفتهه وسدت الباب
وانه حجيت بصوت عالي ....

- ترجعييليييي لو يضل بعمري يوووم
ارجعج ارجعج

طلعت من البيت ... ومن بعد هاليوم عفتهه
لا راسلت ولا وصلتهه بس اخابر عمهه
اسأل عليهه يمه وهو يحجيلي على علاجهه
وحالتهه ...

يوم ٢/١٠ ... كلبي حن عليهه كلش
وخلص صبره خابرتهه مغلق رقمهه ..

المغرب طلعت من الدوام عذا يوم سبت اداوم مسائي ..
اشتريتلهه ورد واخذتلهه سوار فضه
ورحت لبيتهه...
هاليوم كلش ذكراه جبيره بحياتي
اليوم اول فرحتي وياهه ما ردت اضيعه ..

نزلت من التكسي وتمشيت بالفرع
وصلت بيتهه ... متعود امد ايدي وافتح باب الشارع واطب ادك باب الهول ...

هالمره فتحت باب الشارع وصار بوجهي رجال مكرش ولابس برموده وبايده الصونده يرش المنور ...

صيحت عليه وكلتله...
- منوووو انته شعندك هنااااا !!!

ذب الصونده واجاني كال ..
-انته المنو شعندك فايت لبيتي ! ماتعرف اتدك الباب !

-بيتمن ولك !!! بيتمممىن !!!

- بيتتتتي هذا بيتيييي

- المره الهنا وينهه!!

- اكولك اطلع منااااا اطلع عليه 
البيت اشتريته جديد وكعدت بي
لا اعرف مره ولا رجال هنا روووح
وجفينا شرك رووووح اطلع من بيتي يلاا اطلع

ضل يدفع بيه لما طلعت من البيت ..
وضليت وأكف اباوع للبيت وبايدي الورد
طلعت تلفوني واخابر عليهه مغلق بعده
والفيس هم غالقه الحساب وحتى حسابي ما فاتحته من زمان ...

شمرت الورد بالكاع ومشيت مهزوزه رووووحي مخنوووك
كل وجع الدنيا بيه صار ...

ضليت اليوم كله انه احترك بنار كلبي
وساكت كاتم القهر والصياح والوجع كله بكلبي
لثاني يوم بالدوام انه كاعد وعلى نفس القهر ياكل بروحي ..

طلعت العصر خلص دوامي ورحت استلم تلفوني و واكف يم البصمه والكاع افترت بيه
بعد ماحسيت الا على صوت الولد باذني وهوستهم ...

صحيت ولكيت نفسي بالمستشفى ويمي اخويه عزيز ...
عرفت هنا كلبي مصفر النبض ومسويلي
شحنات ...

الولد بالدوام رتبولي اجازه مرضيه
ورحت للبيت .. بس وضعي مو زين
كل يوم لازم ادوخ واوكع  فجاه

راجعت اكثر من دكتور وتالي طلع
عندي .. تهطل بعضله القلب
صار بيهه ضعف والاغماء كله بسببهه ..

شهر تكميل انه بالبيت ما طالع اقل حركه تضيق نفسي وادوخ و اوكع ...
ضال بس نايم ..
اذا اسبح وبخار يصير بالحمام من اطلع بعد مابيه امشي واوصل الغرفه ..

اجازتي خلصت ولازم ارجع للدوام ..
ورجعت ويه عزيز وهو بالطريق فاتحني بموضوعه ...

يريد يخطب الصيدلانية ومستحي مني
بس هي ضغطت عليه لان علاقتهم طولت وماوفى بكلمته وخطبهه ..
كلتله توكل واخطبهه ..

رجعت هنا بغداد اراجع دكتور وملتزم بعلاج
وهم اداوم ..
بس نفسيتي وصلت حد الصفر ...

اخابر عمهه يكلي ما يعرف هي وين ما وين
حتى رقمهه الجديد ماعنده وياهو اليسأله يكله مادري ما شايفهه ...

كالي راح يرجع هالايام وندورهه سوه ..
وضليت انتظره ..
لشهر الرابع يلا رجع هو لبغداد ...
وانه متواعد وياه بالمطار انتظرته ..

.
.
.
يتبع 💕