رواية ماء مغلي الفصل الحادي والستون 61 - بقلم Zoka 🌷

..♣️🩸   ماء مغلي  🩸♣️..
* adzzon *

عمهه كالي راح يرجع هالايام وندورهه سوه .. وضليت انتظره ..
لشهر الرابع يلا رجع هو لبغداد ...
وانه متواعد وياه بالمطار انتظرته ..

شفته بعده شاب و حلو حنطاوي والشعر ثخين
مسفط شعره شعره بالسبريه
ولابس جينز وتيشرت رصاصي فاتح  وفوكاه ستره   رصاصي على سواد طابكه على عضلاته  رافع الردان  لحد شويه من العكس
وحذاء رياضي رصاصي
و محدد لحيه خفيفه
وعنده وشم على ايده بمكان الوريد
بشكل راس  ' ذيب ' ...

سلمت عليه وهو رد سلام سريع وجاوب تلفونه وضحك هو ويحجي ..

سنونه قالب واحد ابيض وحلكه وردي
نزع مناظره وضل يباوعلي وعاكد حواجبه

كالي..
- يلا سيارتك وين ؟

- ناخذ تكسي السياره سلمتهه الهه

رفع حاجبه وسكت ومشى كدامي ..
اجرت تكسي وطلعنه حسب طلبه  لفندق
بابل ..
هناك حجز غرفه وصعدنه كعدنه بيهه

انه متغير حالي .. متعوب .. وجهي ضعفان
ولحيتي عاليه ممرتبه .. شعري طولان
وصاير شكبره منفوش ماعتني بي ..
لابس شفقه ولامه بيهه .. وجهي من الضعف والشعر صاير اسمر فدنوب ..
هو غير شكل .. الراحه والعنايه مبينه بكل شبر منه ...

نزع سترته شمرهه على الكرسي وراح للتلفون مبين حافظ كلشي هنا
كبل دك رقم وسلم على ولد و وصاه على غدا
خفيف ...

كعد يباوعلي وضحك ..
كال..
- يهدن الحيل النسوان مو بله!

سكتت ودرت وجهي عنه .. ضل هو يصوفر ويلحن بالتصفير ويكلب بتلفونه..
شويه وكالي...

- شلونه الدوام وياك  ؟

-عادي زين

- ايي ما خابرتك ابد

-لا

- هسه ترجع من كيفهه لدوخ نفسك بيهه

- صدك تحجي!
ما خايف عليهه!!!

- لا والله ماخايف
شكو عليهه واخاف !
عدهه عقل وتعرف تتصرف وعدهه فلوس
وسياره معايشه بفكر هي حتى اخاف عليهه

- لك المره وحدهه ومريضه
وكعت صار عليهه شي.  ! راحت لمستشفى ومحد وياهه!! 
رادتلهه لكمه ومحد اكو يمهه يسويلهه شلووون تضل وحدهه تعين نفسهه !!!
جا شعدنا احنه صرنا بحياتهه !!

- باشا هاي عقل وعشر ايدين لنفسهه
كلشي تدبر لتخاف عليهه

- دخيييييل الله جاااا ليش اجيت وهيج روحك بارده عليهه !!!!

- شعليك انته   ! انطيك اسباب !!!!
الزم حدك وياي اعرف ويامن تحجي
صوتك تنصي من تحاجيني و نبرة الاحترام ماتنزل من صوتك  وياي
خليني محترمك
تره الزله وياي بحساب

وكفت وكلتله..
- اودعك احسن من الحجي

طلعت وعفته ..
رحت اتمشى بالشارع وكل شويه التفت واباوع العالم وراي شلونه ..
انه مو هنا مكاني .. هاي الناس انه ماارهم وياهم .. بس كلبي ذلني وشالني لبعييييد
وداني ونساني طريق الرجعه منين ....

لليل هو خابرني .. جاوبته..
- نعم

- تعشيت بعدك ؟

- ليش ؟

- عاجبني اكعد بالعطيفيه واتعشى بره على الهوا
تجي وياي ؟

-مشكور  تعبان 
انته اخذ راحتك بالهوا والعشى

- افيدك بالحجي تعال يلا اضل انتظرك
يلا شلون نسيب انته كل خير ما بيك
حرك نفسك لاتضل متكأب
تعال اطلع شوف الدنيا غير جو
يلا انتظرك لتبيع ثكل براسي

سديت الخط ومشيت بتعب .. بدلت وخليت الشفقه على راسي وطلعت ..

لاكيته على الشط كعدت يمه جان يدخن نركيله ..
نفخ الدخان من خشمه وحلكه وبعدين
ضربني على ظهري قوي ..
صحت بي ..

-شبييييك !!!

- دااصحيك انته الي شبيك ميت !
لك بابه ادفرهه للهموم وعيش هي تصفى

- المفاركهه مرتي هاي مرتي
مادري بيا كاع هي وانته تكلي هي تصفى !

- شكو عليهه مرتك
عوفهه دتغير جو
خليهه تعدل مزاجهه وترجع

- هو هذا الغريب يضل العرض مو عرضه ويحترك عليه دمه

باوعلي صفح وجر نفس من النركيله بعدين كال ...
- والله حجيك صحيح

عدلت شعري بالشفقه وكلتله ..
- مو تكول ما عندك غيرهه وكل اهلك هي
جا ليش هيج تهاونت بيهه !!!
حجيك بس نفخه كدامهه !!!

- انييي اعرفهه شنو
ادري بيهه هسه كاعده وعايشه احسن من عيشتك
هاي تحب نفسهه
هي تمشي وحدهه ترتب حياتهه على مزاااج مزاجهه وبعديييين من تشوف نفسهه رجعت للقمه راح تخابر حتى نروحلهه ونشوف هي شسوت ما سوت هاي الفتره
تريدنا نتفاجىء بيهه

هي هيج هاااي تركيبتهه هيج
تعلمت الطريق ترسمه بنفسهه
بس والله تدبر عيشه احسن مني ومنك

- عرفت هذا طبعهاا دريت بي
بس هاااااذ شي وحد هسه هي متزوجه
غير بذمه رجاال وتخلي اعتبار واحترام اله !
تضل كل عمرهه عايشه وحدهه مايهمها فلان وعلان

- هاي سوالف بينكم بعدين تحاسبو عليهه
عوفهه هسه هي دتبني حياتهه هسه هي دتلكط وين الزين الزين
بعدين انته روحلهه ع الجاهز

- شاااروحلهه ع الجاهز شبييييك انته لخاطر الاسلام شبيييك !!!! صدك تحجي!!! 
هسه انه رايد منهه شي !! رايد منهه عيشه وفلوس وبيت. !!!!
شبيكم انتو كلشي عدكم بالفلوس

- لعد شتريد منهه !!
من صدك احجي شتريد ! انته غير اخذتهه على فلوسهه وعنايتهه بيك !
هسه شهر شهرين وترجعلك كلشي

- لاااا اله الا الله
اااانه من شوكت جبت طاااري الفلووس
انه حبيتهه اختاريتهه الي مره اكمل عمري وياهه
احتاجهه بحياتي وياااي تفهمني ونعيش كلب على كلب
مااااردت اعيش براسهه و لااا فلس ولا دينار ردت منهه

ضل يهز براسه ويجر نفس من النركيله
كلتله...
- اخاف انته تعودت عليهه بعيده وتعيش على حل شعرهه ماهمتك مو عرضك هي
بس اااانه ميت الف موووته وهي ماااكو
هااااي مره بذمتي محسوبه عليه بكل خطوه تمشيهه

لااااتضل مستهين بروحتهه هيج
مووو باوربا احنه وبناتنا وكت العجبهن
لمن جوالاتهن ومشن يعدلن مزاجهن ويرجعن
مررره هاي صاحبه بيت ورجال غصبااا عليهه تشووور وتحترم
والمره التطلع من شور رجلهه هيج
حسابهه ثكيل وماينسكت عليه

- صحيح صحيح
احنه انطيناهه مجال هواي
هو صوجي اني هواي دللتهه وخليتهه بعد حتى كلمتي تعصيهه

- اييي انته دللت وانه دللت وشفناهه
بكل شي اعصاب جرينا خلك واسلوب وياهه
وتاليهه حسبتنا ضعاااف كدامهه وبس عدهه القوه والعقل
غللللط كلشي سويناه غللللط

اذا انته تسكت وتنتظرهه انه ماااسكت
هاي مرتي مو غريبه واسكت عليهه
توكف وياااي وتعاوني نلكاهه كِلي حتى
اضل وياك
ما لك خلكهه هم كِلي حتى ماادوخ راسك بعد واعوفك واحير بروحي

- وياك وياااك

اشر للولد واجه شال النركيله ووصاه على عشه .. انه شربت ماي وهو كالي..

- والله طلعت خوش رجال
ذكرتني بسوالف ناسيهه من اول ما طكت لحيتي

ضل يضحك وانه اباوعله وساكت
ضلينه ساكتين لحد ما جابو العشه
مشاوي ..
انه مااكلت شي بس هو ياكل ب أتكيت
و اصابعه ما طخن الاكل كله بالجطل
وياكل بس المشاوي والزلاطه الخبز ما ادنى عليه ..
وحاير بالكلينس يمسح سنونه كل شويه وحلكه

وانه اباوعله واستغفر الله.. جاي يفور باعصابي بهاي سوالفه ..
احنه وين مصيبتنه وهو ويين ..

سااااعه يلا خلص اكل وشرب الجاي
كلتله..
- هسه تفيدني بشي لو امشي !!

- اي يلا خلي نتمشى
هم اهضم الاكل ونسولف
شعندك انته مستعجل وراك شي ؟؟

- لا امشي يلا

طلعنه من هالمكان وتمشينا على الرصيف
على طول الشارع هذا نمشي وهو كالي ...

- الليل وهوا بغداد يسكر

- انه عندي يخنك والهوا بهالليل يلجم جروح

- ايييي والله يلجم
صار كم سنه مفارك بغداد وعايش ويه العجم
والله عيشتهم ما تنراد

- جا ما رجعت من زمان !

- جنت هارب عليه حكم عشرين سنه سجن

-عليييك علي!!!

- والله دخلت سجن خمس شهور وهربوني
وبوجهي من باب السجن لباب المطار
طلعت من العراق وهي الروحه روحه

- ليييش انحكمت !! شمسوي !

- اني اشكال مسوي
بس هاي علمود كتلت اثنين وصادف بوكت كتلتهم جانو اربعه من الشرطه جايين
لبيت صاحباتهم وبيتهم نفس الفرع الي بي بيت الكتلتهم
ومن واحد لواحد طشت على جريمه صارت هنا والشرطه لاحكوني وانسجنت

سكتت وتخيلت نفسي لو بهذاك اليوم لازميني شرطه وهم ساجنيني !! الخوف كله رجع بكلبي .. وهو يضحك شويه ويرجع يسولف ..

- لزموني عبالهم سوو فد انجاز
مايدرون اني استراحيت بالسجن
جان عندي مشاكل شكد خلصت منهه
ههههههه يكولك رب ضاره نافعه

طلعت تهريب على راااحتي رحت بايران كلشي جاهز .. سكن وفلوس وجواز وهويه جديده وعشت اترف عيشه الواحد ممكن يعيشها . .

شكد ردت من هاي ام راس يابس
تجي هناك واغيرلهه عيشتهه كلهه
وما قبلت .. عنااااااد وكبرياء ماا موجود بشر
كلتلهه.. اجيبلج شغل واشتغلي وعيشي بفلوسج لاتحسبيني امن عليج بفلوسي بعدين
وما قبلت

تكولي اني هاي عيشتي هنا بغداد اعيش واموت والفلس هنا اجيبه ممحتاجه الا اكعد يمك يلا اعرف اعيش وادبر فلوسي

وفعلا سوتهه وكونت نفسهه وحدهه
اني طلعت وعفتهه مأمن زارع بيهه عقل
ماينكدرله ..

حتى فلوسي صرت أمنها بايدهه
هي سباعيه تعرف تستثمر وعقلهه تجاري
امنتها بكلشي عندي
حتى مرات ادزهه لمعارض السيارات
اخليهه تكعد تقرا اوراق اني اشك بيهه ما مدبريهه زين  وتصور وتدزلي وتحجيلي الكلمه ثقه بحيث من تكلي شي رأساً استند على حجايتهه ماادور وراهه

اني حسبتها رجال وياي مااخاف عليهه
واستحي من طلعتهه وطبتهه
خليت بيهه الثقه والقوه وعلمتهه تمشي راسهه مرفوع ماكو احد احسن منهه بالدنيا

كلتلهه كلشي بايدج بس تواصليني بكل تصرف بالج ناويتله ... وهي صارت تتصرف بصغار الامور بس الكبار تشورني بيهن

- زين اسألك شي
هذا البيت مالتهه شلون حصلته؟

- اني اخذته الهه

- زين ما حجتلك بالبدايه ليش قبلت تتزوجني!

- هي حجتلي سالفتك وكالت تريد تساعدك
وتاخذ فلوس تفتح فرع ازياء جديد بالربيعي

حتى اذكر وكتها كلتلهه شكو مدوخه نفسج ومخاطره وياه اني ادزلج شكد ماتردين
اصبريلي اربع شهور وادزلج فلوس تجيبلج المحل والبضاعه سوه
بس ماقبلت ....
كالت اريد اتونس ضايجه خلي اسويلي شي بعمري يسوى
كلتلي خلي استفيد من عرامتي وعقلي يم ناس
تعبانه خطيه

ضلت تلح تريد تروح وياك واني جان بالي غير شي لحياتنه نرتبهه بره بس هي عاندت
الا تكمل شغلتهه وياكم

- يعني نقهرت علينه ورادت مثل مانكول تكسب اجر او هيج شي؟

-اي على الاغلب ظاهر الموضوع هيج
بس اني اول اسبوعين الهه  وياكم عرفتهه
غيرت نيتهه كلهه
وشنو صار بالهه مادريت بعد

- هي نيتهه تغيرت على الزواج مو غير شي

- جائز

عبرنا الشارع وتمشينا على السايد الثاني
كلتله..
- شكد عمرك ؟

- ههه ثلاثيني

- انه هم ثلاثيني يعني شكد الفرق بينا !

- اني عبرت ال ٣٤
انته هسه يلا ٣٠ ؟

- اي يعني فرق اربع سنين زين
ما تحجيلي شلون عرفتهه ؟.

-  لا مااحجيلك شويه هاي الشغله خاصه

- بويه هسه الخاص بيهه شنو؟
ما تحجي ! 

- اجذب عليك اذا احجيلك
خلي نغير الموضوع احسن

- جا خلي نكعد انه مااكدر امشي هواي
كلبي تعبان

عبرنا الفلكه وكعدنه على رصيف كدام محلات معزله .. 
كالي..
- نصيحه اخذهه وماتندم
اذا صار شي وعاندت وياك بعد
عوفهه .. عوفلهه العيشه كلهه وروح
رجع حياتك من جديد
صدكني النسوان مرض
لاتضل بايدك تمرض نفسك

- لاااا والله مو مرض
هو انه من فاركتهه اجاني المرض
عشرتهه راحه والله

- هسه مو داانصحك
خليهه بالك بعدين تفيدك نصيحتي

شوف احجيلك من خبرتي هيج نسوان عدهن هاي محبه النفس و ال انا الشايخات بيهه على الدنيا ..
بالبدايه تعاملك مثل ما تتمنى تعاملها
ثم  ستعاملك مثل ما تعاملها
ثم لن تعاملك ابداً

وانته وصلت للمرحله الثالثه هنا يصيرن مرض وتكوم تكول رضاة الله على ذاك العناد والتعامل الثكيل

- والله هي جنها صدك هيج تاليهه!
هسه خلي ترجع ونتفاهم
بس كونها سالمه

انته ليش ماتزوجت ؟ ما عندك حبيبه ؟

عدل شعره وضل ساكت ويباوع للشارع
وره وين يلا كال ..

- جنت متزوج اول ما صار عمري ١٨ سنه
بنت جيرانه خطبوهايالي اهلي
بيتنا جان بالكاظميه قريب سوك الذهب
اهلي واهلهه صواغ ذهب

- جاا وينهم اهلك ! وينها مرتك !

- اهلي مادري وين شالو يا منطقه همه
والمره ماتت
اني كتلتهه

- كتلت مرررتك !!!!!! صدك تحجي!

- البنيه ما جنت اعرفهه ابويه واخويه الجبير يشتغلون صواغ ذهب وابو البنيه صاحب ابويه
على معرفته بيهم وناس زينين واهل خير
ومن مستوانا واطباعنه اهلي رادو بنتهم
الي ..

جنت بالاعداديه عايد سنة السادس
واهلي بعطله نص السنه سوو الخطوبه
شفتهه بالخطوبه
ناعمه بعدهه صف رابع اعدادي هستوهه
شبت ..

اثنينه صغار وخطوبه وهوسه الكل فرحان
والكل تحسد قسمتنا لان اثنين اهلنه زناكيل
بشكل
تخيل ابويه ماخذلهه نيشان
' سبيكه ذهب دائريه '
اخذلهه اثنين  بدال الكلاده و باقي ذهب كامل انطاهه
واني ساعه ذهب ابوهه هداهايالي ويه الحلقه
ذهب

عرفتهه بفتره الخطوبه نروح ونرجع للمدرسه سوه .. اوصلهه واطلع لمدرستي
وارجع اخذهه من مدرستهه للبيت

- يعني حبيتهه هالفتره لو لا؟

- مادري اذا حبيتهه لو لا
مااكدر اجزم لان فتره كلش قليله لحد عطله اخير السنه تزوجنا
بس هي بنيه حبابه وخجوله وتستحي حتى من ابوهه اذا يشوفنه سوه نكعد لو نوكف نسولف
لو حتى مرات تصادف بالطريق راجعين ونشوفه نسلم عليه وهي رأسا تروح للبيت تفوت متبقى وياي

سوينه حنه رنانه والعرس بقاعه
الغرفه بوكتها جانت من هذا الخشب المصري
فخمه وكلهه ابيض وذهبي وغرفتي جبيره
صارت تحفه

ليله العرس دخلت عليهه هي تستحي مني
حاولت وياهه كم مره وهي شويه وتكوم
متبقى وياي بالفراش
خلتني اتخبل وامي كل ساعه داكه الباب
علينه واطلعلهه عذر ..

جبرتهه تبقى بالفراش وياي ودخلت بيهه
ما طلع دم منهه .. حاولت مرتين واكثر
وهي تبجي تتأذى مني ادري بروحي
مأذيهه
جنت متخبل شلون هي هيج والشيطان تربع براسي
صرت افكر هاي مستحاهه وخجلهه كله حتى تضم على كسرتهه

اخذتهه ضربتهه وسبيتهه لعبت بيهه لعب
وهي تكلي
' والله ما مسويه شي  لا تظلمني و روح امي
ما مسويه شي '

التمو اهلي على الهوسه والصياح وامي هم ضربتهه وابويه يسألني كل شويه يعيدلي نفس السؤال ..
' حاولت وياهه مره ثانيه ؟ هاي صغيره ويجوز خايفه ومتشنجه '

واني اكله حاولت وهو صدك اني حاولت وياهه هواي مو مره ومرتين و اذيتهه تعمدت اذيهه حتى تنفتح ومااضل بشك لو مسوي وهيج ولو مسوي هيج
ابويه كالي حاول اخر مره اذا ما صارت نرجعهه لاهلهه من الصبح

طلعو كلهم واني كلتلهه احجيلي اذا صاير بيج شي احجيلي واستر عليج
وهي تحلف ما مسويه شي وما لازمهه اي بشر
كلتلهه احاول وياج اخر مره وانتي عيني نفسج لا تضلين خايفه

وتقربتلهه وهي تعيط من الوجع وماكو اي دم
طلعت رأسا بره وامي وابويه يم الباب كاعدين .. شافو وجهي وفهمو السالفه
ابويه كام وسد الباب عليهه وكالي للصبح ناخذهه لاهلهه ونشوف شنتصرف

هي الليل كله من وره الباب تتوسل بيه
اصدكهه مامسويه شي ولا واصلهه رجال قبلي
واني ما صدكتهه .. صدكت حجي اهلي
كالولي ..
ماكو بنيه هيج هاي كل بناتنه تزوجن كلهن باول مره ينجرحن مو عاد انته كم مره حاولت وياهه وحتى جرح مانجرحت
ونزفت قطره دم
هاي الا مفتوحه من زمان ومتعوده

صار الصبح وامي نزلتهه بمذله وهي عينهه عليه واني ابويه يمي مخلي ايده على جتفي ويهدأ بيه ويكلي اعوضك اغاتهه

اخذناهه لاهلهه وهناك واحد يسكت بالثاني لا يطلع صوتنا بالمنطقه وننفضح
وخليناهه بالغرفه الجوه وبس ابوهه واخوهه واني وابويه وامي هنا كلنه واكفين بس هي بالكاع تبجي وتحلف مامسويه شي

اخوهه ضربهه واني اتفرج عليهه وهي تتوسل بيه اصدكهه وتذكرني بايام خطوبتنه شلون طلعتهه ورجعتهه كلهه وياي

ابوهه هم من شعرهه جرهه وركعهه بالحايط
ويسألهه منو المتعدي على عرضه وشرفه
وهي راضيتله وساكته
وتحلف وتبوس برجل ابوهه يصدكهه
مامسويه شي وما صدكهه

محد من عدنا صدكهه وهي تفتر علينه واحد واحد تتوسل وتريدنا نصدكهه
تكول لاخوهه ..
' اني اختك تشك بيه وروح امي ماخنتكم وما لمسني بشر '

ولابوهه تكله ..
' شلون تعوفني بابه بنتك صغيرتك اني ليش متصدكني شوكت كبرت اني وصرت امشي بالموزين واضيع الشرف '

واهلهه يباوعون وساكتين .. تجي عليه تتوسل وتصيح وتكلي لا تظلمني هيج ماخنتك ولا خنت اهلي
لا تخلي كسره عمري على ايدك

واني كسرت عمرها وكسرت عمري وياهه
ضلو يومين مخليهه بعذاب ويريدوهه تحجي
وتعترف ويامن غلطانه ومن ضلت ثابته على كلامهه وتدعي علينه لان مانصدكهه
ابوهه ماخذ الكرك ومطشر راسهه بي
كتلهه بمكانهه واني جنت واكف اتفرج عليهه

جنت مركز بملامحه جامده ما بيهه اي تعبير
طولت صفنته وبعدين كال ..

- اخذوهه للطب العدلي هناك الاطباء من سمعو هاي بقضيه شرف رايحين فاحصيهه
وطالعه بعدهه بنيه بس غشائها مطاطي
ماينفتح بسرعه وكايللهم اكو نسوان
وره الولاده يلا ينفتح عدهم الغشاء بشكل كامل وهاي من اول يوم كتلتوهه!!

- شصار باهلهه من سمعو !

- كلهه سكتت محد فتح حلكه وكال كلمه وحده
اخذهه ابوهه واخوهه دفنوهه وحدهم
و وصو اهلي يسترون على السالفه وتضل البنيه على اساس عايشه ويانه
ابويه طلعني من البيت دزني بيت عمتي
كاعده هي ورجلهه وحدهم بالسعدون ..
صارت كدام الناس اني ماخذ مرتي ومسافر شهر عسل ويه بيت عمتي

والبنيه ماتت واني من يومهه ضعت
وصار الذنب عاده

- لا اله الا الله
لا اله الا الله

- خطيتها بركبتي ضلت
والله اني كتلتهه بسكوتي وهي كتلتني بشرفها

جان يوم العرس جحيم .. راحت البنيه ماعدهه ذنب
احنه ماعدنه فهم وعلم
اهلي واهلهه كطعو شرفهه بالشكوك
ماكالو يابه اخذوهه دكتوره تفحصهه
ماكالو انطوهه مجال البنيه تربيتنا شلون
نشك بيهه احنه الربيناهه غير يثقون بنتهم !
اني صغير امشي على حجي اهلي
اسأل ابويه هذا الشي عادي يصير لكل مره متزوجه ! يكلي لااا الشرف بهاي اللحظه لازم على الدم تعرف شرف البنيه

قنعني ابويه وهوست اهلهه وضليت ساكت واباوعلهه تتووووسل بيهه والله مدنكه على رجلي تتوسل اصدكهه وصوتهه مبحوح من البجي وتتلفت علينه كلنه تريدلهه وجه
يباوع لحالهه ويصدكهه ومالكت من عدنا بس الظلم

والله ظلمناهه كلنه ظلمناهه عشت من ذاك اليوم  بجحيم ويه نفسي
اهلهه سدو سيرتهه ولا كأن بنتهم وبايدهم طشرو راسهه ودمهه هيج غسلو من كراجهم
ونسوهه
ابوهه كمل بعيشته وشغله  و وره فتره اتزوج
لان مرته ميته من جانو ولده بعدهم جهال
واخوهه اخذ مرته وسافر
واهلي سدو السالفه ونسوهه والي يسألهم علينه  وره سنه سنتين يكولون راحو ويه اخوهه هناك استقرو
والحياه بره احسن من هنا وعايشين مرتاحين

كلهم عاشو ونسوهه بس اني اتوسل بابويه
دليني وين دفنوهه حاجي ابوهه خلي يدليني وين دفنهه وطلعت الاربعين مالتهه ومايقبلون يدلوني وين دفنوهه الا رحتلهم للبيت سكران
ولميت عليهم امه محمد يلا حجولي مكان كبرهه وبعد ما وصلتهم من هذاك اليوم

ضليت بين المكبره وبين الشارع
انكلبت حياتي صرت اتعس من المجادي
بالشوارع والله اتعسس من حالهم

ابجي و اصييييح ويااا نار الماتطفى بروحي
كلشي سويت بنفسي .. شكوو عقاب واحد يعاقب بي روحه سويته بنفسي
هاي كم سننننه اني هيج ضليت افتر بالشوارع سكران الناس تلعب روحهه من شوفتي
ياخذوني من سجن لسجن .. ابويه يسمع بيه مسجون يجي يدفع كفاله ويطلعني وارجع اصيع بالشوارع
وين ماكو مشكله اذب روحي بيهه

اكعد يم كبرهه احير شحجي واعتذر
انتحرت كم مره و رجل عمتي يحير بيه بالمستشفى لحد ما يجي ابويه يضل يحجي وياي لما يمل واني بس اطلع منا اصيع بالشارع يضلون يدورون عليه بمراكز الشرطه لو ويه السكارى لو بالليل يدوروني
بالملاهي

تمنيت ابوهه يجي يوكف يعاتبني يضربني
يرفع عليه دعوه وانسجن فد اربعين سنه
يكتلني مثل كتلهه
بس هو طلع من المنطقه وراح سكتاوي
من اسال عليه يكلولي تزوج لو سافر
يكلولي عيش حياتك همه اهلهه ماهتمو انته شكو مهتم !

بس اني جنت رجلهه لازم احميهه اصدكهه
اسندهه استر عليهه
وكلهن ما سويتهن
توسلت بيه واني ادير وجهي عنهه واعوفهه يموتوهه
كتلو مرتي كدام عيني واني ساكت
هذا عرضي ومثل بنتي جانت بعدهه صغيره
واشتريلهه الصبح حلويات المدرسه اتقاسمهن وياهه قبل ما تفوت مدرستهه
كتلوهه واني هم كتلتهه
كتلت عرضي وبنتي ومرتي وكتلت نفسي
وما سترت عليهه وشفتلهه صوره حل

اني جنت عار مو رجال الي ما يدافع عن عرضه ويمسح دمعه نسوانه ابد والله مو رجال وعار على البشر الي يأذيله مره

اني اكبر عااار صار بالبشريه
شلون سكتت واشوفهه تبجي ومكطعه روحهه من القهر ومحد يصدكهه واسكت واصير وياهم!

شكد ضليت اسأل ابويه ..  ليش ما علمتونا البنيه من بيهه شي تروح للدكتوره ليش حكمنا عليهه احنه ! احنه منين عدنا فهم وعلم وحكمنا على البنيه وكتلناهه !

يكلي ماعدنا بنات تفوت دكتوره وتكشف عليهه عيب هالشي لازم البنيه تصون نفسهه
بنفسهه

جهل جهههههههههههل ضيعو حياااااتي بجهل

ضل يضرب برجله وبعدين وكف وكال ..
- انته تشرب لو بعدك سيد تستحرم !

- لاا ماشرب

- لعد روح اني سهرتي هسه بدات

راح يمشي ويعصر براسه .. وانه ضليت كاعد بمكاني وصافن ...
هذا شلون عاش ! شلون صار هيج وهو موت نفسه بنفسه ! شوكت لحك يسوي جاه وقوه وفلوس وهو عقل مابراسه !!!!!

تذكرت حجي الدكتور الي ...
من كال..
الذنب الاول اذا ما تعالج يجر كل الذنوب والاجرام وياه عقاب للنفس ...

صدك والله هذا هيج عاش مريض نفسي لحد ما تعود الذنب ...

صار بالي .. ريري هم هيج بدايتهه ؟؟
ظالمه لو مظلومه جانت ؟

طلعت تلفوني وشفت الساعه ثنتين بالليل صارت ...
كمت تمشيت وادور تكسي ما حصلت
الا بعد ما نهد حيلي بالمشي ...

وصلت لفراشي اريد انام ماكدرت
حجيه بعده براسي عبالك صوره هذاك اليوم تتخيل بالي ... شلون ذلوهه وشلون كتلوهه ودفنوهه وحدهم سكته .. كلهه صرت اتخيلهه
واكول ..
الله اكبر يا ظليمه ظليمتهه ...

طلعت للدوام ثاني يوم والعصر خابرته
جان هستوه كاعد من النوم
وصيته يشوف جماعتهم بالشغل اذا الولد يعرفون مكانهه وين خاف ذىدازتهم بشغله فد يوم وعدهم خبر او راس خيط نبدا  منه ..

لليل خابرني وكالي ..
ماخذه بس حبزبز وياهه وهو حتى اهله ما يدرون بي وين راح .. كايللهم اروح بشغل وميعرفون مكانه وين . .

التقينه هالمره تعشينه سوه وهو كالي ..
-اني البارحه سكران من الهوا
حتى البطل ماسكرني فد يوم هيج وكعدت احجي حالي للغير

- حقك والله الي بيك ماينحمل وينسكت
واذا حجيت عادي اني مااطلع سر احد

- تحجي ماتحجي عادي هو العار عار
بس انته استفاد من غلطتي ولا تغلطها ويه مرتك

-هسه هي خلي ترجع وبعدين عود اغلط وياهه

- تذكرت  شغله جنت من الصبح اريد احجيلك عليهه .. يمكن اكو حساب فيس
قديم عدهه مرات تستخدمه
باسم فله هي سوته مره وسدته يمكن هسه فاتحته

- ايييي شوفهه يلاا

فتح تلفونه وضل يكلب بالفيس ومالكاهه
كلتله ...
- هاي خاف حاضرتك !
انته متراسل وياهه

- اي بس بغير حساب هذاك لغيته من زمان

طلعت تلفوني ودورتهه بحسابي هم ما طلعتلي وهو منطيني الرقم الي مسويته عليه
وما يطلع حسابهه النه ...

فتحت فيسها وبحث من عنده جان يطلع حسابهه ...
مخليه صوره كانيور ويمه ورد ....

كبل راسلتهه من حسابهه.. وضلينه ننتظر ترد ..
كالي ...
-اكتبلهه اني  رضا
جاوبيني لازم اشوفج

دزيتلهه وضلينه ننتظر لنص الليل وما ردت
هو راح للفندق واني رحت اريد انام ماكدرت انتظر رسالتهه وغفيت شويه وكعدت ضليت انتظر بيهه و ما ردت ...

لثاني يوم من التقينه بالليل كاعدين وهي ردت
دزت ..
' هلو عمو
شعجب فتحت حسابي ؟ '

كالي خابرهه .. وخابرتهه وفتحت السبيكر ..
سمعت صوتهه وهي تكول ..

- شلونك عمو

ادنى يم التلفون وكال ..
-  ليش حاضرتني ! سوالف العناد هاي متبطليهه !!!
امشي افتحي الحضر من حسابي ورجعي خاااابريني هناك يلااا انتظرج دقيقة الج مجال وترجعين تخابرين

سدت الخط وهو فتح تلفونه وكالي ..
- تعرف تطلع الموقع ؟

- اي بس هي مغيره حسابهه الايفون
جربت قبل

- لا هاي تستخدم vpn  سوالفهه اعرفهن
اوكف هسه ارزلهه  واخليهه تفتح الحضر منك هم

شويه وخابرت على تلفونه وهو فتح السبيكر

- هلووو

- وين انتي ؟

- موجوده ومرتاحه

- وييييييين انتي

- بعدني بالعراق ما طلعت عمي اترجااك لا تحرجني لان ما راح ادليك وين

- زين شكو رحتي وبعتي البيت ! شطلعج مناك !

- اريد راحة بالي

- ورجلج ! اكو مره تمشي هيج وتعوف رجلهه ما تكله وين راحت !!!
تدرين بروحج خزيتيني كدامه
تدرين هاي سوالف مراهقات دتسويهه
واثنينه مانرضالج سوايتج
هسه من الرجال يعاتبني ويكلي وينهه وليش هيج تسوي وياي
شجاوب !
حاسبتني عمج وولي امرج وتطلعين ومادري بيج وين !!!
تضلين كل عمرج طايشه وراكبه راسج
وماتحترمين

- موو هيج بس مااريد اشوفه بعد

- شبييي شسوالج وهيج تخبلتي
حجايه ورجال اعتذر عليهه
هذا الزواج لعد شعبالج !
بس حب وغرام
بي مشاكل وهاي باول مشكله شردتي وعفتيه !
تشوفين نفسج مو كد الزواج ونفسج ماتتقبل احد يتامر عليج وتسامحين احد شكو ورطتي روحج ويه الرجال !
شكووووو دكيتي رجل الاااا اتزوجه
وهسه يدور خيالج ما يلكاه
شبييييج انتي تخبلتي كل ساعه برأي

- موووو هيج عميي
اني ردته اختاريته وشفته زين لعيشتي وحبيته بس هو داس على كلبي شسويله يعني
يكولي اسويهه وياج كسره خشم
ااااني محد يكسر خشمي
هو وصلني هيج
كلتله عوفني  عوفني
وهو ضل يلح وياي خلاني ابيع البيت واهج
ماااتحمل اشوفه ومااعاتبه
ومن احجي ازرف نص كلبه
خليني بعيده احسن الي واله

باوعلي وانطاهه كتم ... كالي..
- تحجي وياهه انته لو شتريد بالضبط احجي فهمني

- لا كللهه تخابرني ونحجي بتفاهم وحدنه

شال الكتم وكاللهه..
- هذاااا مو حل تهجين وتعوفيه يصفك ايد بايد
شويه خلي عندج مسؤوليه انتي متزوجه مو بنيه بكيفج تصرفين
روحي خابريه واحجي وياه تفاهمو
كليله الي تريدي احجيه اله واسمعي منه وسدو السالفه

- ماااااريد احجي وياه
انتو شتريدون مني ! اني هسه ضارتكم بشي

- ريرررررري
شحجيييييييت

- عممممي ماااريد
ماتحمل احجي وياه
كلبي يوجعني واني تعبانه مااريد كل يوم ارجع اون وابجي عليه
ماااريد عوفني هيج انساه وهو شهر شهرين ينساني ماكو رجال يضل مجلب بوحده متريده

- هااااا يعني تريدي ينساج ويروح يشوف حياته !
تسكتين عليه يعني لو راح اتزوج !

- لااااااا مايتزووووج هو
عااايز فوك القهر كوله هذا يروح يزوج عليه
حتى احطه وادج سجين بكلبه

- لعد ما تحاجيه وتخلصينه
شنو يشتغل عندج هو وعايفته على مرامج بكيفج تحبيه وبكيفج تكرهي!!!

- احبه بس مااحجي وياه

- اسمعي ولج
عناااد عاندي
بس وره ما تحجين ويه الرجاااال وتخلين حد لمشاكلكم
ماااضل حاير بيكم كل يوم واحد جاي بمصيبه
هسسسسه تسدي منا وتخابريه واااني
اذا خابرته وسمعت منه بعدج معانده وحرف ماحجيتي وياه
الاااا  بايدي ازوجه ثانيه و اقنعه يعيش حياته ويعوفج لاااان صدك انتي زعطوطه
ومتستاهلين واااحد يحترمج ويحبج
تستاهلين تضلين وحدج محد يكلبج
بيج خير على حياتج روحي تفاهمي ويه رجلج واكسبي وحلي مشاكلكم لو تتطلكين منه ساعتهه ضلي وحدج
ونغل بعد اليخابرج ويسأل عليج
ضلي وحدج عيشي وموتي ومحد عليه بيج

- ايييييي
ديلاااا اووكي راح اخابره

سد الخط وكالي ..
- تفاهم وياهه اخر مره اذا عاندت عوفهه

ترخصت منه ومشيت .. وبايدي تلفوني
انتظرتهه وهي دزت رساله ..
' هلوووو '

دزيتلهه ..
' هلو '

كبل خابرتني ...
انه كعدت على رصيف وحاجيتهه...
- شلونج

- زينه وانته شلونك

- مو زين
ليش رحتي ! هيج ما بقى عندج احترام الي !

- لا حيداار لا هيج تحسبهه
بس روحتي لازم تصير حتى كل واحد يفكر بحياته شلون تصفى

-هاااا يعني قصدج كل واحد يكمل حياته وحده ويتعود هيج !
يعني ما بالج رجعه !

- لاا ماارجع بعد كلتلك الغلط مااعيده

-هسه انه صرت غلطه ! تالي محبتي وعشرتي غلطه !

- جمعتنه  غلطه ابويه انته
اني وياك مانرهم ومن كوه رهمناهه
شبعنه ضيم

حيدااار كلبي لهسه معصور عصر منك
شلون تريدني ارجع !!

- ليش هيج كلبج قسى وياي
ما كفاج كل السويتي بيه !
هيج هنت عليج !

- حيداار حبيبي

- تدرين وين وصل بيه التعب من عنادج
تدرين بيه مريض .. كلبي تعب والحيل راح
كافي ريري
انه خسرت كلشي
خسرت عايله باكملهه ليش تردين تعوفيني خسران
هيج كرهتيني من غلطه وحده. ! شوفي انتي شكد غلطتي وياي بطلعتج هاي وباسلوبج
وباقي مسامج ومنطيج العذر
وانه هديت حيل حيلي عليج وانتي باقيه بعنادج

- ابويه انته حبيبي والله ولا لحظه كرهتك
بس اروح حتى مااتعبك
اني بكل لحظه افكر بيك وبعدني اخطط بس لمستقبلك
وعيني وعقلي كله يمك

- جاااا لييييييش تعووووووفيني هييييج
ليش تحبيني وماترديني لييييش ضاله ذابحتني هيج شبييييج انتيييي فهميني مشكلتج وييييين

- اريدك مرتاح
اني مااخليك مرتاح لو ابقى يمك
شوف هسه اني احجي واكولك احبك وروووحي انته
بس لو اكعد يمك مااكدر احجيهه
اني اتعب صدكني اتعبك وخاف هسه بيك قطره حيل اني حتى القطره اخسرك اياهه

هيج مو بيدي بس مااكدر امشي بنفس الطريق الاذاني .. انته احبك ومااحب بشر غيرك
بس طريق عشرتنا تعب

اني مو بسهوله اثق وأمن بالناس ومره وحده وثقت بيك ورجعت فشلانه من نفسي
هاي الفشله دمرتني لحد هسه تاكل بروحي

وحتى لو اريد انسى كلشي وارجع
وين تريدني ارجع !
لاهلك هناك اشوف ابن فضه عايش واتذكر ابني الميت على ايدهه !!! 
لو اشوف امك وهي جانت كاعده وياي وتشوفني شلون متزوهره وساكته تغر بيه بحبوب الكرط مال معده وتشربني لبن
شبيهه هي ماعدهه فهم مو مره جبيره هي
متعرف الي شربناه مو زين علييييه
من شافت نفسهه معدتهه هم توجعهه
ليش ما كالت هذا تسمم وخافت عليه وعلى ابني ! ليش سكتت وتشوفني كدامهه ميته وجع !

هذوله اهلك مااسامحهم لان خسرت صحتي على ايدهم

تدري اني شكد صرفت حتى اعالج روحي
ولحد هسه المرض يزيد ما ينقص عندي
شووووف شكد اتأذيت من عشرتكم
وتريدني ارجع !
على شنو على وجع الكلب والغدر  ارجع !

-كلناااا تأذينا ريري مو بس انتي وحدج تأذيتي كلنه خسرنا وتأذينا

- لااااا محد خسر مثلي
اني خسرت صحتي تعادل الف خساره من العدكم
هسه اني مسويه فحص ودانتظر النتيجه اذا طلع عندي تليف بالكبد
تسامحون نفسكم على دماري هذا !
لو تكلولي ارجعي احنه نعالجج خلي نكفر عن غلطنه وياج !

انتو هملتوني و ولد عمكم سمموني وهاي اني اجرع بالادويه وعايشه على شرب المي والعصير لكمه مثل الاوادم ماااكدر اكل
والقهر ماكل كلبي اليوم كله اني اتحسر عليك
وعلى ذاك الولد الي انام واكعد واحلم بي على ايدي
مااااكدر ارجع لاهلك كل دمااااري وكسره عمري منهم

وحتى انته ماااريدك تبقى هناك مثل مااذوني يأذوك ..

- ريرررري انه متأذي بكل كاااع الله متأذي
انتي عوفيهم ماارجعج هناك
نبقى بغداد ولا نشوف احد منهم
بس انه اضل وياج انه متسامحيني !

- انته اسامحك بس اهلك مااسامحهم

- جااا خلي نبدا من جديد

- اذا طلع عندي تليف بالكبد شتسوي بعد بيه
تكعد تتفرج عليه واني داموت !

- لااا سامح الله اذا طلع اخذج كبل نسافر واعالجج
ماعوفج تموتين كدام عيني

- مااريدك تعاااالجني
حيدااار تره اني مااحتاج احد يعالجني حتى لو بيه سرطان اووكيييي

لك اني جنت وياك مدمنه على التدخين والكحول وماخليتك تحس بيه دااعاني من الادمان
حسيت بيه فد يوم من كلتلي عوفيهن وعفتهن بعد حسيت عليه تعبانه بدونهن ! !

- لاا

- اي طبعا لاا
انته شمدريك بيه شجان صاير وياي
عبالك هي دكمه دوسهه وانساهن وادوسهه مره ثانيه وارجع اشتهيهن واخذهن
ادماااان هذا ادمااااان
جنت اني مدمنه وياك وانته متدري بيه
عبالك بس كلت عوفي هاهيه عفتهن يعني اني جنت منتظره بس واحد يكولي كلمه حتى اعوف
هيج هي سهله

- جااا شلون كدرتي ! رجعتيلهن ومادري !

- لااا مااا رجعت .. جنت مخليتك كدام عيني
اموووت باعصابي واضل احااجي نفسي مااارجعلهن وماااخون حيداار واكسر كلمته
وكل شويه اكول بس اليوم بعد ماحتاجهن باجر تصير احسن
واطول حجي وياك وانسى شويه
بس وجع بجسسسمي وجع
جنت اصبر عليه
ومن تجي يمي احضنك وابجي لان منهاااره مااكدر اسيطر على نفسي ولا اكدر اكسر كلمتك وضاله بوجع وادمااان وحدي
عااالجت نفسي وكطعت الادمان وحدي
انته نفسك الجنت انااام بحضنك ابجي من ادماني مااحسيت بيه

وعلمودك اني صبرت على نفسي حتى اضل بعينك حلوه
وكدرت اخلص منه وافتخرت بنفسي حتى لو انته متدري بتعبي بس ااااني بيني وبين نفسي ادري شكد تعبت علمودك
وتالي متاااالي اطلع بفشله تسوى عمري

هذني سوالف انته متدري بيهن بس اني تجرعتهن لماااا يبس كلبي
هذني المايخلني انسى وارجع
لان اني تعبت وجنت اريد شي زين يقابل تعبي ومالكيت بس طيحان الحظ

حتى لو كرامتي رخصتها الك بس جروحي ماتترخص وتنسي
هذني شوووويه حجيتهن من الي بيه عشتهن وانته متدري

كلشي متدري لان اني اشوفك حياتنه زينه
وعيشتنه راحه وحلوه
بس ااااني التعبانه بظهرك حتى اسويهه هيج كدامك راحه براحه

ماخليتك تتعب بيه حتى تغيرني جنت اني اغير نفسي بس انته تنطيني الكلمه

اااني المخليتك تشوف حياتنه حلوه بس هي عندي وجع دوووسه على وجع يلا صارت حلوه والمر الاجرعه علمود تبقى وياي
من نبذتني انته شكيت روووحي بالنص وحركت كل نص منهه
تعبي كله حركته كدام عيني
لتتعجب مني انيييي مو قاسيه كلب وياك اني والله احبك بس انتو ماترحمون

ضلت تبجي وماسمع بس شهكاتهه
وتالي سدت الخط ..

ضليت محتار يا رد ارد على حجيهه
واجتني رساله منهه ..

' ديربالك على نفسك اني مسامحتك
بس اكتفيت من عشره الناس
لتقهر روحك بعد عليه
وصير زين اووكييي تره بعدك مديون الي
لان احنه بعدنا مااطلكنا لاتنسى ديني اريده
صير زين حتى اخذه منك '

.
.
يتبع 💕