رواية ماء مغلي الفصل التاسع والأربعون 49 - بقلم Zoka 🌷

..♣️🩸   ماء مغلي  🩸♣️..
* adzzon *

شمرت تلفونهه ع الفراش وضحكت كلتلي ..
- نلحكهم بطنطول ونسويلهم
كششش ملك حياااتشييي

- شلون ؟؟ شلون يخطفوهم كلهم !
ولج هاي وراهه تحقيق ريري
اهلنه عجب يسكتون !!!

- ويطبهم مرض
خلي يحققون ويشيلون روحهم ويدكوها بالكاع
اظفر من الكتلهم مايحصلون
عبالك هذوله فطّر !!!

- هاذ صخر مسلبجي وخاطف !!
عنده عصابه !

- حبيبي
همه الجماعه عايشين بين العصابجيه
وتره همه مو فد شي واوو ومحد يكدر يوصله
مزبلين .. ويشمشمون المشاكل شم
وخو اذا واحد طلبهم بشغله
كُبببببل يجرون سلاحهم ويطلعون

- عليج علييي!!
هاي لا شرطه لا جيش يدرون بيهم !!
وين كاعدين هذوله !

- داكولك عاادي كاعدين بالمناطق بهالبيوت حالهم حال الناس
عادي بيت ناس واصل وفصل وعشيييره
وعدهم نسوان وجهال وهمه عصابجيه

يعني اني اعرف بيت نسوان وزلم يشتغلون خطف وعايشين بالفديه
النسوان يطلعن يجرجرن الجهال من السواكه
والمدارس والزلم يتلكوهن بالسيارات

اخذ هيج نفوس قابليه عدهه تشغل نسوانهه بالخطف وبالبيت يحطون الجهال بيدهن
هنه يستلمنهم تعذيب
تكفخ وتجوي بالخواشيك وزيان الشعر
يلغمطوهم بالصبغ الاسود والاحمر يصبغون جسمهم بي ويعوفوهم مصاليخ وزلمهم كاعدين حاطين تلفونات ويصورون
ويدزون للاهل

- لا اله الا الله استغفر الله العظيم
هاي احنه هم ربنا يرحمنا وبينا هالشكولات !!!

- بعد بكيفه هو ابو الانه

- وهذوله شلون محد كدر بكمشهم وياخذهم كبل اعدام !

- يا اعدام بابه !
ماكو شي اسمه اعدام بعد
الينكمش ياخذوه سجن اربعين خمسين سنه
بس شكلياً فد عشر سنين طلعوله قانون وافرجو عليه لو ياخذوه تهريب اذا صماخه جبير
واذا كولش كولش يبقى معزز مكرم بالسجن
يندك بالناس والناس متندك بي

- هو چا شعم علينا غير هالقوانين
وتمسلت الدوله

- ايي بعد شكو خايف
همه هذوله الي يجون يصكون اهل السحوره
تره كل شكم شهر يروحون تسياره للسجن
ويطلعون فالشغله كووولش عاااادي
اوووكي لتخاف

- ااانه خايف علينه احنه هذوله اذا نكمشو وتحقيق كبل يجرونا وياهم
ترديني امشي للحبوس من وره السحوره!

- شوف عيوني
ترتيب وعقل عدنا
حيله عدنا
دروب ملعبه وسلاح عدنا
فلوس عدنا
والحق ويانه
نمشي بزودنا الي يريد يخاف هذاك الاثول اليطلع كبل بسلاحه بوجه عدوه

احنه عدنا تكتيك
عقلي موجود هو قائد  الحرب وداعتك
اسحلهم واذبحهم وادفنهم ومحد يجي باله حرف من حروف اسمنا

- ادري بيج ذكيه وتكدرين بس هاي جريمه
ريري جريييمه هذوله سته  لا واحد ولا اثنين
وكل واحد بيهم عنده عايله
شلون راح ندفن ست نفوس !!!

- بالتدريج عومري
نصك ثنين ثنين وتصير سهله عليك

- هااه چا سهله عليج هسه!!!

- سهله ليش لا !
نسوان امهات سحوره سحاقيات جايفات
عبادات شيطان وهجامات بيوت وكتلهن حلال ومأذياتنه ليش ماتصير سهله كتلهن!!!!

ضليت اعصر براسي واخذ نفس وانه محتار
اخاف الذنب يركب متوني .. اخاف انكشف
وانسحل للحبوس ..
مادري وين انطي وجهي !!!

عافتني وراحت وانه ضليت بحيرة افكاري ساعه اكول حجيهه صح لازم هيج يصير
وساعه اكول حرام هاي نفس كتلهه صعب

ضليت هاي الليله وحدي نايم ماحاجيهه
وبالي الف سالفه وسالفه ..

ثاني يوم الصبح كاعد بالهول كملت ريوك
ودك تلفوني ..
باوعت ( سيد حسنين ) جاوبت ..

- هلا خويه

- صباح الخير خويه وييينك وين الغيبه هااي
عمي شدعواك خاطرك ثاكل علينه
هاي شجم نوبه تنزل من دوامك وتروح وماشوفك ليش هيج بعد اخوك ليييش

- مالحك والله الايام تركض ركض
وانه اجي هنا تعبان اضل بس ارتاح ماطلع

- عمي همزين انطيناكم مره وصرنا نعرف اخباركم كلش كطعتو بينا

تعال اليوم تغدا وياي خلي نشوفك نسمع اخبارك شني چا عشرتنا هيج ترخصت عندك

- لاا مشكور بعد اخوك مانزحم عليكم

- لااا والله الا تتغدا عندي واذا ماجيت ااانه اجيب الحجيه والغدا واجي اتغدا يمكم

- هلا بيكم تعالو وغداكم علينه

- چا يعني حالف ماتعتب بيتي !
صاير تشيل بكلبك عليه ولا ذاك الاولي
النكعد ونتفاهم بكل حجايتين ونتعلل سويه
شغيرررك علينا شغيررك !!!

- مابينا شي ان شاء الله
تعالو للغدا ونتفاهم

- يلا زين اجيكم على الغدا

سديت الخط ورحت غسلت وكلت لامي على جيتهم وعفتهن بالمطبخ وصعدت ضليت فاتح لابتوب لحد مااجتي ريري تكلي ..

- هذا ابن عمك جوه وهرج البيت يسأل عليك

سديته ونزلت وياهه ورحت سلمت عليه
وضلينه كاعدين نسولف بالشغل وبالجهال
لوكت ماصار الغدا واكلنه جان يكلي ...

- هاي سيارتك بيش اخذتهه ؟

- بالاقساط بعت هذيج وانطيتهن دفعه
والباقي بالاقساط كل شهر

-هااا بس حديثه كلش هاي اخذتها لووك!

- ايي

- بالعافية عليك
حافظ عليها لا مثل هذيج وتضربها

-الله كريم الله الحافظ

- والنعم بالله
اكلك اخبار ابو سعد وين ما وين ؟
هم تخابره .. يخابرك
شوصلتو شسويتو

كعدت احجيله على اخر مخابراتي ويه ابو سعد ... وحجيتله خلصنا من العمل نهائي
بس ضل اصحابه ..

جبناهه بالحجي على شلون حلهه وياهم
وهو يسألني منو هذني واذا عرفتهن
وانه اكله بعد مو كلش بس اشك بشجم وحده
اخر شي كلتله..

- شتكول كتلهم حلال  ! حرام !

- انه ماكدر افتي بالحلال والحرام بكيفي
بس هو الحلال بالكتل اما دفاع نفس او دفاع عن دين او عرض او اموال
غيرهن بعد مايصح الكتل
والله اعلم

- انته شتكول بهاي سالفتنه والعشناه
شنسوي من نكشف المستور عليهم
نكتلهم ؟ نسلمهم شرطه ؟ شنسوي ؟

- لاا خويه شرطه شني تريد تفضحنا بين اهلنه ! كلمن بينا عنده مكانه بين الناس
والسمعه والوجه الطيب هااي تعب سنين
تجي تبصمها بصمه عار بجية الشرطه على
نسوانا !!!

- چا شسوي فهمني ! شور عليه بشي !! 

- شور مرتك هاي شغلتها مو شغلتي
انه مادخل بخطيه احد والدرب هاذ انته بديته وجنت تكلي اااانه اعرف شسوي
هسه طلع معرفتك خلي نستفاد منها

- هاااه هيج صارت !!

- بعد اخوك لا تضل تتزعل مثل النسوان
بكل حجايه احاجيك
انه ماجذب عليك من الاول كايلك
ادري بيها مليوصه وراح نمشي بدرب اعوج
وانه رجال حافظ نفسي من الحرام صار سنين ... مو باخر عمري اخرب تعبي
باهل السحوره

- بس احنه شركه بكلشي !
نسيت احنه ضيمنا واحد وظهرنا واحد !

-لا مانسيت بس انته كلتلي عوفهه بركبتي
واطلع منها وااانه من ذاك اليوم لليوم
عايفهه بركبتك
شفتني تدخلت بشغلك !
حاجيتك على شي !
تروووح تشرق تغرب مادري بيك ولا اكلك ليش وعليش
كيفك انته بديتها وانته انهيها

انه لو اريد اتدخل جان من زمان وكفت وياك حد بحد وجان ماخليتك تاخذ مرتك وتمم زواجك وتاكل من مالها الحرام وتروح وتجي
على بيتها وتعاشر ناسها
هاي انه لهساعني مارضيتلك عليهه

بس شسوي بعد انته كلتلي لاتدخل هاي انه سحبت نفسي وضليت وياك بس خوييك
غير شي بعد ماتدخل احسن مانتخارب

- هاذ هوه ضل بعيد احسن

صديت وجهي عنه وهو شويه ورجع لبيتهم
صعدت لغرفتي و ريري جانت واكفه تعزل
كبل عافت الي بيدهه واجتي حضنتني

- حبيبي شبي ضايج

- هذا ماجاي افهمه
ساعه يسال ويعرف اخبار شغلنه وساعه يكلي ماعليه بيكم ومادخل بخطيه احد

- ديلااا عايزين عليه خلي يولي
اصلا غلط منك تحجيله

- شمدريني بي هيج شايل ايده منا
عبالي محروك كلبه علينه وباله ويانه
شو هاذ يكلي كيفك شتسوي بيهم سوي

- اي بعد احسن خلي بعيد
مانستفاد منه بس المغثه

كعدت وصافن بحجيه على انواع الكتل الحلال واكول هسه احنه ننحسب دفاع نفس ؟
شكوك بالي ماتصفى ..

اجتي كعدت على رجلي وحضنت راسي
- راح نخلص ماضل شي
ابدأ دورلنا على بيت بغداد واعرض بيتي للبيع .. هم يلا بين ماتلكى شراي

- بيتج بفلوسمن اشتريتيه؟

ضلت ساكته وانه رفعت راسي اباوعلهه
وهي تدير بعيونهه عني ..

- بفلوس عمج ؟ بفلوس شغلج ؟

- هيج ورث

- لتجذبين منين يجيج الورث.!
احجي الصدك بيا فلوس اشتريتيه

ضلت عاضه طرف شفتهه وانه ضغطت على ايدهه وضليت اباوع بعيونهه واكللهه لتجذبين
احجي ولحيت عليهه يلا كلتلي ..

- عمي سجله باسمي تعويض

- تعويض لشنو ؟.

- جان اكو مشكله واني تاذيت منها وهو اخذ حقي وجابلي البيت تعويض

هذا البيت جانو اهلي كاعدين بي ايجار
جان بس غرفتين واني بنيت الحمام بهيج ترتيب والمطبخ ورممت السطح وغيرت الكاشي وصار هيج مرتب وملموم

- ادري بس المشكله شلون صارت !
منين اخذه الج ؟ هذا نفسه المؤجر الطردج وره وفاتهم ؟

-اي هو تعاركت وياه وعمي تدخل ومنا ومنا صار البيت الي
هسه لتدوخ نفسك اني مشاكلي ماخلص وكل وحده رادلها حجي اسبوع دتنفهم
اعتبره شلون الفصل هيج يعني اووكيي
اخذه وبيعه و خلي فوك فلوسه واشتريلنه غيره

ضحكت وباستني وضلت كامشه ايدي ومخليتهه على بطنها وتكلي..
- امك اليوم تكولي بعد نلتزم اني وياك
بالصلاة على محمد وال محمد ١٤ الف مره
على تسلسل الائمه نهديها الهم بنية طلب الذريه

- إن شاء الله ربي يرزقنا بعد هالتعب بولد ينسينا ضيم الدنيا كِله

- لعد خلي نلتزم اني وياك كالت نتقاسمهه
الك سبعه والي سبعه ونعيدها كل يوم

- بأذن الله نلتزم بيها
والعلاج نضبطي بي الله يخليج

- حيداار كرهت الابر كرهتهاااا
صار شكد ضربت مكافي !!
من ترجع روح للعياده وكوللهم يبدلونها بحبوب تره بزعت روحي

- ادري هسه مو شفتي عليهن فرق !
ياحبيبي غير هذا علاجج شسوي بعد هسه انه هم مثلج شابع ادويه

- اييي بس لشوكت هيج مليت صار شهرين
كل خمس ايام ابرتين وهاي مال المقويات
والحبوب ادري مكافي هالكد

- ما ضل شي بس كملي العندج ونرجعلهم
وبعد ماناخذ ابر
زين هيج !

-اوووكييي

- اكلج انه باجر لازم ارجع شلون  بسالفتهم؟

- احنه منتدخل عومري همه كلشي يدبرون
احنه بس ندليهم المكان وهم مو اني اتواصل وياهم
هذاك صاحب حنفيش هو راح ياخذهم يفهمهم كولشي واحنه النه الصافي

- بيمن راح يبدون ؟

- انته شتريد ؟

- اريد هذيج العار تنكتل ونخلص من عارها وشرها
اريد اخويه يرجعلنه وعلي طاك كلبي عليه

-اووكيي لعد الضربه الاولى لحنفيش
بعدين لاهلها

- هاي صدك كتلها حلال
كتلها غسل عار عساها لا تهنت بدنيا ولا اخره بحق الحُسين

حضنتني قوي وضليت اشم بيها وكضيت العصريه بمزاج بس وياهه ..

المغربيه نزلت واشوف ابويه بالباب واكف يتمشى  بعكازه ويتاني الاذان ..
بعده حاله يتحسن شويه ظهره مايكدر كلش يرفعه الا يضل محني الظهر يلا يمشي

ثاني يوم ماخليت ريري تنزل الا للظهر
ردت اشبع شوف وسوالف وياهه
سبحنا ونزلنه ..

كاعد يم اهلي واجتي ريري شاورتني..
- حيداار هاي فضه كلشي ماطابخه للغدا
تكول هو عليج واني نظفت البيت غير انتي تنزلين تسوين الغدا !

- اييي ردينا لسوالف الجناين

- اهوو هاي هم مثلهن مسمومه
هسه هو هاليوم ضليت بي وياك الصبح مانزلت شصار نهجمت الدنيا !

- حبيبي خلي تولي عوفيها
هسه اطلع اجيب غدا ادللكم كبل لاروح

- اموووت عليييييك
يلا روح واني اكعد احط رجل على رجل هههههيييي خلي تطك بحسرتها وقهرها

عود مكلفه نفسها ومنظفه ام الوصخ
هو اني كارفه البيت كرف وامشي والملم
ماسحته قبل مانام عايفته يلمع
هاي بس غمضنا وفتحنا صار وصخ وكعدت تجلف !!

- معدله انتي رور وين اكو مثل نظافتج

- حيااتشي طلع البوس هم يعدل النفوس

- هههههه وعلييي يبرد الكلب
واذا الكلب برد بعد المزاج فوول راحه

- اووف اووف مزاجك هذا شكد اتعب يلا احصله
بس حويدر يستاااهل التعب

كرصت رجلهه وكمت رحت اشغل السياره
وجان اتذكر هذيج الكعدت يمي ..
كبل درت وجهي على مكانها وضليت اباوع
واكول ...
- الله الحافظ

توكلت على الله وشغلت سياره وطلعت
جبت دجاجتين شوي ومحشيه واهلي شويتلهم سمجه صغيره فاهيه
ورجعتلهم ...
تغدينا ووصيتهم يقرون الفاتحه لاخوتي

صعدت انام شويه واجتي ريري ضلت مخليه راسه على ظهري وحاضنتني ..
- حيداار شايف اذا صرت حامل ورحت وعفتني الا اطلكك خلع اخلعك

- هههههه وعلي ماعوفج چا غير كل يوم اسلم على ابني وين اعوفج واروح
الا تسودنت

- لعد دبرلنا بيت بسرعه
حاجي اهلك شوفهم يشيلون لبغداد يبقون ؟

- اهلي ما يطلعون منا ادري بيهم
خليهم شكو عليهم وياهم عادل وعزيز بلكت هم يرجع هنا وانه وياج وحدنه نكعد هناك
واذا حصلت نقل ذاك الوكت عود نشيل

- اووكييي

غفيت شويه وهي كعدتني ... بدلت واخذت
جنطتي ونزلت وياهه ..
انزل الدرج وايدي بايدهه احاجيهه وابوس ايدهه كل شويه و شفت فضه واكفه تغسل
جوه وتباوعلنه ...

وكفت يم غرفه اهلي ودنكت شاورت ريري..
- حبيبي خلي عينج بس على اهلي وتلافي المشاكل وياهه .. خليجن حبايب

رفعت نفسهه شويه وباستني بخدي وتكلي..
- وعيونك فد حبابه انييي ابد ابد مايطلعلي صوت

ضحكت وانه اعرف بيها شنو ..
طبيت للغرفه وبوست اهلي ودعتهم وطلعت
شغلت السياره وتوكلت على الله وطلعت لبغداد...

رجعت الايام عاديه بين الدوام والتلفون
بس هالمرة صرنا نخصص وكت وره كل مكالمه عشر دقايق تسبيح ولليل اخر مكالمه كبل مانام نختمهه سبع ائمه نهديلهم الصلاه على النبي الف مره ..

يوم ١٨/١٢/٢٠١٦  ..

صبحت على صوت تلفون يدك ساعه خمسه ونص الصبح .. باوعت هذا رقم اخويه عزيز ..

جاوبته وهو يصيح ويكلي ...
- خووويه الحكلي بيتي حراميه كسرو ماخلو شي والمره تصاوبت وانه حاير بالجهال

- سترك يارررب
خويه انه بالدوام خابر عادل خابر عمامنا

- عادل جهازه طافي والولد ياهو ادك عليه مايفتح خط وانه ضال بالشارع وحدي واهل المره هسه اجوي خذوهه وطلعو للمستشفى
وانه ضال وحيدي ويه الجهال لاكدر اتحرك ولا اكدر اخذهم وياي

- خويه سد سد انه هسه اخابرلك الاهل

سديته ووكفت على حيلي ايدي ترجف والنفس ضاك بصدري ...
خابرت ريري وساعه يلا ردت ...

- ريري هاي انتي دازتهم !
بيت عزيز

- هااا اي يمكن راحولهم شبيهم !

- يكول حراميه ومصاوبه المره
امشي كعدي عادل خلي يروحله
بساع انزلي بعدين نحجي

سديته وخابرت حسنين هم كعدته وراح لعزيز وانه ضليت أريد أتصرف بعد ماعرف شسوي ....

رجعت خابرت عزيز وهو كالي
كاعد ويه الجهال بالشارع ويسكت بيهم
ينتظر احد يجيه حتى يلحكهم للمستشفى..

خابرتني ريري ..
- حيداار هاي خابرت صخر كالي همه رايحين وكاتليها

- ماتت لو بس تصاوبت!

- لا ميته كال متأكدين منهه قبل ما يطلعون
ضاربيهه بصدرهه بالكاتم طلقتين

- ريرررري عزييييز كسر كلببي

- هيج احسن صدكني
خلي وجع ساعه ولا كل ساعه

- استغفر الله
ربي انته اعلم بحالنه ربي لا تحسبه علينه ذنب

- ديلا هسه بعد بدينا بالصك ذنب مو ذنب
هذا حل وحرب مابيها مجال

اكوولك شو بعدك كاعد متطلع مو دوام عندك

- يااادوام انتي لج جسمي يرجف
مصيبه صارت بيت اخويه واحنه سببها

- هسه بعدين اخوك يكوم يترحم للحرامي لان فات لبيته وكتل مرته
صدكني راح يرجع عايش مرتاح ويخلص من هذيج المِله النكسه

بعدين نسيت مرت اخوك شمسويه بي !
هم مشبعته سحوره وهم خاينته  ومسربته جهالهه ..

- هو انه شخلاني ارضى بكتلهه غير عارهه هذا
استغفر الله ربي يعلم بالحال وهو يحكم

- اووكييي
هسه روح بدل واطلع لدوامك
واني من ترجع انطيك كل الاخبار

- كليلهم خلي يطلعون من النجف خلي يختفون بعد لا يصلون المنطقه ابد

-اووكيييي يلا چاوو

سديته ورحت بدلت وطلعت لدوامي وهناك اشتغل وافكر شصار وياهم ؟
وافكر بالجهال وافكر بحالنه شلون بي ...

لحد ما خلص وكت دوامي وطلعت استلمت تلفوني وفتحته كبل وصلتني رسايل من ريري ..

' اخوتك يريدوك تاخذ اجازه وتجي علمود الفاتحه
كوللهم ماكدرت ولاتجي '

كبل خابرتهه .. وطلعت للسياره ..
- ها حبيبي

- لج شلون ماترديني اروح ويه اخوتي
تسودنتني شلون اعوفهم !

- لعد تجي هنا بنص الهوسه غير تخرب وتوكع من خوفك وتوتر يبين عليك

وهذا حسنين حاط عينه ورانه ورانه
راح يكعدلك ركبه ونص الا يجر منك الحجي يلا يرتاح
ابقى بعيد احسن خلي تخلص الفاتحه وتعال

- ماااكدر ولج شيكولون عليه عايف اخوه وحاير بدوامه !!!
انه اصلا انطيت خبر وطلبت اجازه وباجر الصبح يكملوهه استلمهه واخذهه توقيع واحد اخلصه واطلع للنجف

- اوووكي لعد تجي عليك بالفاتحه بسس
حسنين لا توصل يمه
يحاجيك معليك بي مو تخلي يجر لسانك
كايلتلك بس يصير بينا ثالث يعرف بسالفتنه ننفضح

- اي اي ادررري
بس كليلي هسه الجهال يمكم !

-اي يمنه كاعد وياهم سيف ومؤمل وملتهين بالتلفون
مايدرون بشي

- شلون ما شافو امهم !

- لا عزيز يكول 
هي مضروبه بالغرفه والجهال بغرفتهم
كبل مطلعهم للشارع وساد عليهه الباب
بس همه من الهوسه والصوت خايفين

- وعليي ممروده روحي عليهم
ريري هاي جهال اخوتي كلهم انه يتمتهم
وين اروح من ربي

- حيداارمتبطرين احنه !! لو مطيوح حظنا بيهن !!
هسه لو اني مثل سوايتهن اسوي
هم تعرف بيه مكبله واروح واجي ويه ابو التكسي بالليل وانهار كله حاطه تلفون واخابر
واجيب واودي سحوره وشامره الجهال مادري بيهم ياكلون يشربون
تسكتلي!!! 

- لااوعليي احركج

- بعد شكو !
هذني كتلهن صار من ايدهن ما علنه باحد احنه دنرجع لكل طرف حقه

- استغفر الله
والله جنت ماعليه بيهن حتى وانه ادريهن كارهات اهلي واحس بيهن ماذياتنه بس ساكت مادخلت بشي
بس وصلت حدهه بعد ماينجرعن
هجمن حياتنه هجم
والله اخوتي مايستاهلون هيج نسوان والله حرام بيهم هيج نسوان غبره

- اييي يلا خلصنه منهن
هسسسه بدا الشغل الزين
ماعدي السنه اذا مو تارسه بيهم المكبره
يلا بعدين نحجي چاوو

رجعت ارتاحيت وسبحت وضليت على التلفون ويه الاهل ...
وثاني يوم رحتلهم وحضرت الفاتحه
ورحت شفت البيت مكسرين الجام والساعه والتلفزيون ..

نظفنه البيت وحولنه الغراض لبيتنا
ورجع عزيز وجهاله ويانه بالبيت ..

قدمو تحقيق بقسم الشرطه  وانفتح محضر واجوي تفتيش للبيت و كالو بس يكشفوهم يدزون علينه ..

كل هذا الوكت وانه اتجنب الكل .. اشتغل
ورايح جاي مسواك وغراض اجيب بالسياره
وماكعدت ويه احد على كد السلام ..

صرت اسمع يحجون عليه انه متغير ومتكبر على اهلي لان متعين بمكان جبير وصاحب فلوس وسياره بعد مادخل باحد خاف لا يردون اشوفلهم واسطه واعينهم مثلي

وانه اضحك من اسمع الحجي ..
اكول انه حالي بالضيم والناس عبالهه متبطر وشايخ عليهم !

ريري تكلي ضل احسن
سيط الغنى ولا سيط الفكر ..

رجعت لدوامي وريري كلتلي انه اتكفل بالجهال واداريهم وصدك رجعو مسؤوليتهه

وصلنه اخر اربع ايام بسنه ٢٠١٦
وانه جنت مقرر اخذ ريري ونطلع لسليمانيه
نكضي راس السنه هناك ونرجع فد يومين من الواحد بالسنه الجديده ..

متفق وياهه تحضر نفسهه يوم ٣١ /١٢
يجيبها الي لبغداد احمد وخاله بسيارته
وكبل نطلع طيران ... لان طريق طويل وانه اتعب من السياقه ورايد ارتاح ...

محضر جنطتي وكاعد انتظرهه بالمطار
وعلى التلفون ضال وياهم لحد ما وصلو
سلمت عليهم و ضليت كاعد انه وياهه
نسولف شويه بين ماصار موعدنا وطلعنه
للطياره..

وصلنه مرتاحين لا تعب طريق ولا سيطرات
ولا ازدحام ...

انه حاجز بفندق ومحسب حساب هوسه راس السنه .. فكلشي مشى براحه ...

قفلت تلفون وضليت وياهه بغير جو
غيرتلي كل مزاجي ..
نطلع نفتر وناكل بره نشبع صور وشقى وضحك بعلو صوتنا بالشوارع..

اشترينا للجهال كلهه العاب وملابس وهي عفتهه براحتهه اليعجبهه تاخذه ..
انه ماعندي غيرهه كل راتبي يروح 
دكتورنا و مصرف بيت انطي لامي
والي يبقى هاي الهه ...

انه من اول ما وصلنه وانطيت لاهلي خبر
وصلنه بالسلامه قفلت تلفوناتنه ولحد ما ردنا نرجع يلا فتحتهن ..

نزلنه بمطار بغداد وخابرت اهلي كلتلهم هسه راح نطلع للنجف ...
واخذت سيارتي من الكراج وطلعنه كبل للنجف ..

وصلنه هناك احنه بوجهنه الفرحه ومشتاقين للكل ونسلم بحراره عليهم وهمه وجوهم مكلوبه ..
عمي شبيكم ! مايحجون ..

كعدنا اكلنه وانطينه هدايا الجهال وانه عفت ريري وياهم ورحت لابويه ..
سألته خيركم ماتحجون الصاير ؟
كالي ...

-مرت عمك امهه لام سيف لكوهه مذبوحه
وشامريهه باب البيت بنص الليل
الفجر اهلها كاعدين فاكديها ويدورون عليها مالكوها وبس طالعين شايفيهه باب البيت سابحه بدمها ...

هنا بعد نشف الدم بيه وضليت بس صافن بوجه ابويه وحرف واحد ماحجيت ..

لحد ما رجع كالي ..
- اليوم ثالث الفاتحه هاي احنه كبل من خابرت كلت راجعين ترخصنه منهم ورجعنه للبيت ماردنا نهبطكم ونخرب فرحتكم

- زين حجي هاي شطلعهه بالليل شلون ذبحووهه وهي مره جبيره !

- ماندري بعد كلمن يحجي شكل
عمك يكول كاعده يم جارتهه تتعلل
وابنهه يكول ماندري بيهه طالعه
حتى الشرطه داخت باقوالهم كلمن يحجي شكل
النسوان يكولن عفناهه نايمه
وشطلعهه وشجاب الكاتل عليهه بعد ماندري

- الله اليستر
انه باجر امرلهم اسلم عليهم واطلع لدوامي
من رخصتك حجي

كمت رحت كبل صحت ريري واخذنا الغراض وصعدنا ..
بس طبينا الغرفه كلتلهه..

- لج هاي ماتت اليوم ثالث الفاتحه !

- اي امك كالتلي هسه
تصدك تفاجأت
ماعبالي الجماعه حاميين هيج عليهم

-لج ريري هاي شيخلصهه بعد !
ادخلت شرطه وصارن قضيتين!!

- اي بس الاولى منتهيى مال حراميه
والثانيه مبين هي المره عدها عداوه لان طالعه ومحد يدري بيها ومذبوحه يعني شخص الوكفت وياه يعرفها مو غشيمه من طلعت بنص الليل وحدهه

- استغفر الله
ريري بعد كافي خلي يوكفون كتل لا كل يوم مصيبه وعلي نشف الدم بيه

- تره بعد اربعه لتنسى اووكييي
كلهم ساس بالسحوره

- ميخالف كافي هذني اكثر اذيه بينا وخلصنه منهن بعد البقيه مالهن دخل بينا
جنتها وبنت اخوهه وهذولاك الولد بعيدين علينه مانهمهم احنه
ولا يديرولنه بال بس هذني جانن
الجناين هنه رايدات الاذيه ومشغلات هاي البله الجبيره علينه

هسه بعد راحن كلهن خلصنه
هنه هذني اكببر حيايه بعايلتنه واكبر شياطين
راحن بعد كاااافي

- شوف هو حجيك صح
بس يبقون اذيه لغيرنا مو بس النه
خلي نخلص هي حرب الوحده نكطع روسهم كلهم ونخلص الدنيا من شرهم

- ماعلينه بغيرنا ريري هذا كتل مو لعب
كافي بهذوله سلمنه والله ستر علينه
يجوز بعد ننفضح

خلي نعيش مستورين ومرتاحين وهذني راحن بجزاه اعمالهن بعد مالنه دخل بالبقيه مو يمنا سالفتهم

- ديلااااا اوكييي
يعني كااافي خلصت المهمه

تلمست بوجهي وانه بوست اصابعهه
وكلتلهه...
- خلصت حبيبي
نجحنا وخلصنه من اكبر شر بحياتنه

ضحكت وباستني .. نمنا والصبح طلعت
لبيت عمي سلمت عليهم وانطيتهم واجب
وطلعت لبغداد ...

رجع الدوام وامتحانات الجهال نص السنه
وريري تدزلي الماده اكتبلهه شرح بالورقه
واصور وادزلهه تشرحلهم ...

ملوكه مقيمه بيتنا ..  ريري تطلع وياهه بالخط تروح لمدرستهه تضل تنتظر يمتحنوهه وتحاجي المعلمات لازم يخلوهه اول وحده تمتحن .. وتجيبها وترجع للبيت

كل يومها ويه جهال عزيز الي كلش منتحسين
ومايعجبهم العجب ... و ويه ملوكه تدرسها وتوكل بيها وتلزم البنات وحده وحده تسبحهن وتمشطلهن بالليل وتنومهن بغرفه وحده
خلتهم يعزلون الولد كلهم بغرفه والبنات بغرفه

انه صارت نزلتي ويه عطلة نص السنه
اشتريتلهم بلي ستيشن جديد خاص بس لجهال عزيز حتى يلتهون بي وشويه تتغير نفسيتهم

يومين ضليت بيتنا وبعدين اخذت ريري وياي لبغداد راجعنه الدكتور وجددنا العلاج وضلت وياي اسبوع مرتاح بعيشتي  وياهه  ...

رجعتهه العصر لبيتنا وكعدت ويه اهلي ساعتين ورجعت لبغداد ..

جنت عارض بيتها للبيع وما حصلت شراي
زين والبيت الموصي عليه  بشارع المحيط
ماجاي احصله بسعر مناسب  ..

شهر الثالث ٢٠١٧ ...
نزلت للبيت صادف سنوية وفاه اختي امل
واهلي محضرين ذبيحه وسوو غدا وعازمين الكل ...

طلعنه وره الغدا للمقبره رحنه بس الكبار
ومااخذنا نسوان بس امي وام حسنين

انتظرت امي تنوح وتبجي براحتهه وابويه
هم وكلها راحت للسيارات وانه كعدت يم الكبر .. خليت راسي عليه وصرت اكللهه..

-  داريت بنتج يالعزيزه
وصنت بيتنا وخليت عيني على اهلي
وحفظت وصيتج كل عجايب الدنيا مشيتلهه لخاطر وصيتج
كون وفيت حكج ياخويه
كونج رضيتي وبرد كلبج على اهلج

وحك الله بنتج مانساهه وماعوفهه الا امشيهه على رجليهه من جديد واخليهه احسن دراسه تدرس
وابنج عيني عليه وبدم كلبي افديهم
رويحتج بيهم ورويحتج عزيزه عليه
وحك الله ماخلي يمسهم بني ادم بأذى

قريت الفاتحه وودعتها وكبر اخويه هادي وزوجته هم هنا .. ودعت اخوي ولحكتهم
وكلت هاي هنا ختمت وصية اختي ونفذتها
وشيطان اهلنه كتلته واخذت بثار اخوتي ...

ضليت اسبوع هنا ورجعت لدوامي ...
حصلت شراي زين للبيت واتفقت وياه
افرغله البيت خلال اسبوع وهو وره يومين دزلي خبر بطل يشتري البيت ..

جنت متأمل راح ابيعه واشتري باقرب وكت بيت ثاني ونكعد انه وريري ونستقر هنا
بس قدر الله هالبيت ماينباع ...

شهر الرابع ٢٠١٧ ...
باقي يومين لوكت نزولي والولد الي يناوب عني بالشغل اجاني وكال انه راح انزل لاهلي
من اليوم ومارجع الا عشره ايام ماخذ اجازه

فقبط هذا الشهر وانه ما شايف اهلي ..

يوم ٣  / ٥ /٢٠١٧
خابرتني ريري عصبيه ..

- حيداار تعوف كلشي وتجيني

-اجيج ليش بويه شعندج  احجي!

- شنووو شعندج
داااكولك تجيني اليوم اهجم البيت على راسك
ااااني تسوي بيه هيج  ياحيدااااار !!
ارجع هنا وخلي نتفاهم وجه بوجه

- بويه وووين ارجع دوام عندي دوام
ماكو مناوب واعوف شغلي واجيج
احجي هنا خلي افهم شمسويلج!

- غششيييم سووده عليه فدددد مره فقييير
داكووولك عوف الصخااام وتعاالي

- لج انتي خبله ! النجف براس الشارع واجيج !
احجي شبيج شسامعه عليه !
وعلي مامسوي شي

- يعني ماتجي مووو

- ريري افهمي حبيبي ماعندي مجال والحسسسسين عندي شغل
بس اربع ايام وارجع وشتريدين حاضر

- ضل يمك بعد لا ترجع واذا اجيت البيت
بعد تجرم بروحك

-هاي شبيييج !

- اسمع حيدااااار لااا تلفون بعد ادك عليه ولاااا اريد اشوف وجهك
وساعة الي اصير ااااني مهمه عندك يلا احاجيك بس من اليوم بعد تلفون ماااكووو
واكعد راجع نفسك وشوف شمصخم وياااي
لان سالفتك متتسولف لبشر

- لااا يالله
لج شبيج وعلي مامسوي شي جاي اكلج انه مامسوي شي
شبيج شسامعه عليه !

- رااااجع نفسسسك لا تغشم روحك
تره لا عبالك حبيتك ومرتك وصرت بيدك دجاجه لا اهش ولا انش
سببببع عيون مفتحه عليييك ولساني ماتخلص منه لووو مر رجلي لو تصير ابويه هم متخلص منه

- بووويه والحسين والحسسين انه مامسوي شي ياذيج
شايفتني حاجي ويه بنيه ! طالع ويه وحده!
متزوج عليج ! شمسوي كليلي
انه افتح عيني واغمضها على صوتج بعد شوكت انه مسوي شي ماترضيه !

- غششششم روحك غشمهاااا
بعدد وبعدددد
بسسس الاااا اطلعها من عيووونك
اااني تسووي بيه هيج اااني !!! واسكتلك !!
امدااايه اذا سكتت وعفتك مرتاح

روح يلا بعد ديييربالك تخابر واذا اجيت للبيت لاتجي يمي شوف اهلك وارجع
حجي بينا بعد ماكووو واذا توصلني ماتخلص من لساني اطلع نااار كلبببيي بيك
ماريد اغير الاحترام البينه فعوفني بعد لتوصلني حتى ماجفص وياك
باي

.
.
.
يتبع 💝