رواية ماء مغلي الفصل الخمسون 50 - بقلم Zoka 🌷

..♣️🩸 ماء مغلي 🩸♣️..
* adzzon *

- بووويه والحسين والحسسين انه مامسوي شي ياذيج
شايفتني حاجي ويه بنيه ! طالع ويه وحده!
متزوج عليج ! شمسوي كليلي
انه افتح عيني واغمضها على صوتج بعد شوكت انه مسوي شي ماترضيه !

- غششششم روحك غشمهاااا
بعدد وبعدددد
بسسس الاااا اطلعها من عيووونك
اااني تسووي بيه هيج اااني !!! واسكتلك !!
امدااايه اذا سكتت وعفتك مرتاح

روح يلا بعد ديييربالك تخابر واذا اجيت للبيت لاتجي يمي شوف اهلك وارجع
حجي بينا بعد ماكووو واذا توصلني ماتخلص من لساني اطلع نااار كلبببيي بيك
ماريد اغير الاحترام البينه فعوفني بعد لتوصلني حتى ماجفص وياك
باي

سدت الخط وانه رجعت خابرتهه مغلق ..
ضليت كل ساعه اخابر ومغلق خطهه ..
كلت اعوفهه تهدي اعصابهه ونحجي ..

صار نص الليل وهم خابرتهه مغلق
للصبح هم نفس الشي ...
خابرت على اهلي حجيت ويه ابويه وكلتله ينطي التلفون لريري وضليت انتظرهه ..

شويه وسمعت صوتهه..
- هلاااو شكووو شتريد

- شبيج بويه شبيج ويااااي لا تسودنيني
افتحي تلفونج وبطلي سرالف الزعاطيط

- مااااا افتح اووكييي
يلا شكو تحاجيني مو عندك شغلك المهم
روحله يلا شكو متاخر !

- ولج ياهو الكال شغلي اهم منج انه بس كلتلج ماكدر انزل الولد بعده مارجع

-اي وشسويلك هسه تنزل متنزل اااني شعليه بيك بابه شتسوي سوي
يلا عيني يلا چاووو

هم سدت الخط وانه طلعت للدوام اعصاب
والف حلفان بالي عليهه بس ارجع ..

خلصت دوام والعصر استلمت تلفوني
وطلعت ايدي على رقمها واكول ماخابر
واتراجع وضليت لحد ما وصلت السياره
بعد ماكدرت خابرتهه ...

خطهه مفتوح بس متجاوب .. ضليت ادزلهه رسايل وتالي جاوبت ..

- هااااا

- وعلااا شبييييج !! شغيرج عليه !!

- اسأل نفسسسك

- ريري وعلييي طالعه رووحي لا تزيديها عليه
احجي شبيييج تره وعلي بعد اعوووفج وضلي بطنكرتج يطبج مرض بعد ولا احير بيج
احجي هسه احسن

- وشنوو انته تهددني ! متروح هسه اني لازمتك
اصلاااا ماريدك يمي بعد كارهتتتتك اوووكيييي

- هااااا !!! تكرهيني ! انه ولج تكرهيني
ليش ولج شمسويلج ! هاي فوك التعب وشدهه البال عليج تكليلي اكرهك!

- اييييي بكيفييي مزاجي وشعوري وبكييفيي
الي مايصون حبي ينكره اووكيييي

- هيج صارت ولج !

- اكووولك تره بزعتني شتريد حارك التلفون !
صلح وتفاهم ماكووو اووكييي
اكطع نفسسك
ضل هناك بعد لا تجي

- خاااب ولييي وليييي
اااانه الطايح الحظ الخابرتج ولي يطبج مرض ازعلي صخمي معليه بيج
هاي ضل عليه بس خبالج
روحي معايزني حركان اعصاب

سديت الخط وشمرت تلفون ع الكشن
وكملت طريقي ...

سبحت واكلت وضليت اريد انام ماكدر
مشتاقلها وبالي على تغييرها ؟. شبيها وياي !

كابرت عليها ومخابرتهه بعد ... ثاني يوم
عيني على التلفون وماكو ماخابرت ..
لليل خابرت الولد المناوب عني واستعجلته يرجع ...

وثاني يوم كبل مانخلص دوام هو رجع وطب يمنه سلم وكعد ... تفاهمنه انه وياه بشغلنه
وكبل طلعت اخذت غراضي وبوجهي للبيت..

وصلت بالليل لا متغدي ولا متعشي
وراسي يوجعني طريق ودوام وكلها ازدحامات ...

من طبيت البيت وسلمت على الاهل هي جانت كاعده يمهم تدرس بملوكه وكامت
باوعتلي صفح واخذت جنطتي وراحت
حتى سلام ماسلمت ....

شويه وصعدت لغرفتي لكيتهه محضرتلي ملابس ودتعزل بالجنطه ..

وكفت ارفع بشعري واباوعلهه وهي دايره ظهرهه .. كلتلهه..
- كارهتني بعدج؟

بدون ماتدير وجهه عليه كلتلي...
- ويهمك يعني ؟؟

- شبيج حبيبي والله عليتي كلبي وياج
احجي هسه انه مو يمج احجي يلا طلعي الي بكلبج

وكفت يم الميز ونزعت قراصتهه وسواراتهه
واجتي دفعتني بصدري وتكلي..
-  عقلك ويييين هاااا وييين ويين

كمشت ايدهه و هي عتتهه مني
جريت نفس قوي وهي تضرب بجتفي ..

- صاير بكل شي ماتهتم ماتركز وياي
تركض لفلان وعلان وأني نمسحت بالك
على كد هلو طالع راجع وراح انام

- انه هاملج ! ولج كل حجيي وياج

-بس حجي عقل ماكوو بالك مو وياااي
شوف وين مجنكله افكارك وتغشم بروحك وياي

- هاي شبيج انتي صدك تحجين!
لج شعندي انه !
بويه حتى افكاري احجيلج هو انتي مخليتني اصفن صفنه اذا مو خشمج بالنص

- ايييي كل هذااا ومكدرتلك
شكد دققت وياااك وهم فلتت من ايدددي

- هسه الموضوع وينه !!!

- هااا ماعاجبك مووو !!! تريد بس تخلص مني وتلف راسك وتنام
تعلمت بعد تعلمت صارتلك عادي

- لا لا اله الا الله
هسه شسوي ! انه فهمت شبيج وعفتج ! جاي اكلج احجي سالفتج وينها ! زعلج ليش ! احجي انه بيمن كصرتلج !

- عقققلك مووو ويااااااااااي
وين افكارك !! هااااا وينها بيمن صارلك اسبوع تفكر وممركز ويايه !

- والحسين مافكر بشي

-لااااا جذاب لو صدك جان حجيت وسألت
جان بقيت مثل كل مره تحسبلي يوم يوم
وتدقق وياي بس انته عقلك شطح بعد ياااريري يا صخام

- بووويه ياايام هاااي شبيج ريري وعلي تعبان ماتحسين انتي !
انه من صبح طالع للدوام وكبل مناك اجيت للبيت من الصبح لهسه حركان اعصاب وتعب
جايه تحجيلي ايام وعقلك وهاملني !
شبيج انتي كبري عقلج كبرييييه

- جبييير عقلييي اوووكييي
انته الي مادري شلونك صاير

- اكلها تعبااان بويه رجال جايج من دوام من السته الصبح كاعد وهسه راح يصير نص الليل انه بعدني وجهي ممغسله ولا ماكل ولا شارب
وانتي متلكيتني بخبال !!! هاااي انه صار فوك الشهر مفاركج هيج تيبسين ريكي اول ماشوفج !!!!

- ايييييي تستاااااهل اوووكييي تستاااهل

- لييييش ولج استاهل شبيه ذابح ابوج ومادري !

جرت علاكه من الميز وضربتهه بصدري
كمشتهه وهي تصيح بالحجي....
- لان مطففففي ويااااي مطفييي
انتظرتك بس تسال شكم يوم فات للموعد شكم يوم صااار فاتج بهالشهر
وانته مااااكو عقلك شططططح ونساني ونسى كلشي متعودين عليه
ضال بس شغل شغغغغل خلي يفيدك شغلك
خلييي هو يجيبلك الولد وروح حط عقلك بس وياه

عصرت ايدهه وانه اركز بحجيهه وهي تحجي سريع سريع ووجهها احمر دم صار
رجعت ضربتني بالعلاكه بجتفي ودفعتني
وانه جريت راسهه حصرتهه بايدي واخذت العلاكه منهه ...

- شبييييج هسه شكو الصياح !
استجلي بويه شجاج

- درووووح تبط الكلب

- انجبببي لتضلين تمسلتين كافي تحملتج هواي رجعي لعقلج

-عفت العقل الك يابو عقل لو بيه خير عقلك جان تذكر وركز وياي بس مطفي

- راح اكسر فجج وعلي انجبي عاد

راحت كعدت وتهز برجلهه بعصبيه
وانه فتحت العلاكه شفت بيهه بس باكيتات
جريت واحد فتحته وطلع اختبار حمل
كبل وكعت العلاكه من ايدي ورحت عليهه

- هاي شنو ولج ! شوكت جايبته !

- شعلييك

-احجي ولج هاي من شوكت

- عشره ايام

- اي والنتيجه !!!

دارت وجهه عني وانه كعدت نثرت العلاكه وفتحتهن باكيت باكيت .... جانن سبعه
كلهن شفتهن نفس النتيجه.. كبل رحت كمشت وجهه وخليت عيني بعينهه ...

- حبيبي كليلي نتيجه فدوه لعينج

- حامل

كبل دمعت عيني وخليت وجهي على وجهه
- كليلي بعد

- حامل عدته سبع مرات كل يوم اول ماكعد الصبح اسوي الاختبار وادزه للدكتوره وتكولي حامل
وسألت البنات بالفيس هم كلولي حامل
ودزيته بكروب مال نسائيه هم كلولي حامل

- دخيييييل اسمك الهـــــييي

بوست وجهه كله وحضنتهه حيل
- تضمينها عليه ولج لييش!!!!
فركستي كلبي لما رجعت وحجيتي

- احسسسن شكو لعد تنسى موعد الشهريه وتغلس عليه غير احنه دناخذ علاج وكل يوم بحساب عدنه

- يااابعد رووووحي
وعلي مو شغله نسيت بس مامتوقع هسه تصير كلت بعدنه بعلاج سالفتنه مطوله

- حتى لو المفروض تسال وانته حتى تنبيه لليوم مسوي وحاسبهن ويايه
لعد منو الي جان يكولي هسه علاجج زين
وضبط موعدها صار كم شهر حسبتهن الج

- مادري وعلي شلون عبرت علي هالشهر مادري وانتي شدهتي بالي
انه منا مشغول وعندي مناوبه ومشايفكم صار شكد وانتي تتزعلين براسي شيضل عندي فكر !

- ايييي اتزعل وررره نسيانك مو قبله اوووكيييي

- وعلييي متخيلت هيج بساع بساع يصير حمل

- ليش عيني ميصير !!! اشو انته تكعد وياي اسبوع اتدكني دك .. وين يروحن هذني لعد يتبخرن خوما يتبخرن بنصي !!!
غصباً ماعلى البيضه تلكطلهه وحده

ضحكت وعضيت جتفها وهي دفعتني  ...
- تره زعلانه اوووكيييي

- حبيبيبي هسه وكتها !!!
مشيها  بداعتي عليج
ولج خلييييني فرحااان ياااااابويه
صدك صارت ياريري!!!!
صارت ورجعت كل عافيتي !

بوست شفتهه وضحكت ...وهي تكلي ..
- صارت عومري .. تعافينا والطفل صار نصيبنا

- ياااربييييييي يااااربيييي
دخيلك اسمك يالكرررريم

على نفس الحضنه ضليت وياهه اشمها وابوسها بكل وجهه وركبتهه...
شويه وكمت وكفت واخذ نفس وجريت ايدهه وكفتهه ..
كلتلهه..

- وينه هسه بالضبط مكانه وين اشريلي وين تحسيه

- هههههه ولك عومري مااحس بي بعده ماصاير لحمه

-ميخالف بس وينه بالضبط
بطنج بالنص فوك جوه وين كليلي

- بعده بالرحم هنا

خلت ايدي على مكانه وانه كعدت على ركبي
واتلمس بي ... ابوسه وارجع اتلمسه واكله..
-يااابويه رويحتي الولد

خلت ايدهه على وجهي وتمسح دمعتي عليه
وكعدت بمستواي ..
- شفت حبييي كلتلك ماخلي شي بنفسك 
كلشي تعبتله وصبرتله حتى اشوفك تفرح

- رور احبج والحسين اعشكج
هاي انه رجعت عافيتي وتعديت كلشي
بفضل الله وكرمه علينه وبفضل وكفتج وياي
لو وحدي بدونج جان وعلي متت مهضوم
ومتحسر على ريحه الجاهل

- بعد مااكو مانذكر شي قبل صار وتعبنه بي
هسه كوله نفكر بحياتنه الجديده نرتبها لابنه

- ايي ان شاء الله اخليه اول مايفتح عينه للدنيا يلكى كلشي حاضر عنده
واطلعه من هالجو اخذكم باحلى بيت وماخلي عدكم لا هم ولا غم
كلشي نعوف ونطلع نعيش براحتنه

عايلتنه الصغيرة نضل نعيش حياتنه بسيطه
وبس ندللـه كلشي يريد ننطيه كلشي اجيبله
بس ديربالج عليه

دمعت عينها وهزت راسهه وحضنتني
بوست خدها وضلينه نضحك ونمسح بالدموع

كلتلي..
- حنزل اسويلك اكل

- زين حبيبي اسبح واجيج خلي جوه اكل

- اووكييي

وكفت تلبس حجابهه وانه انفخ نفس قوي
احس انمليت طاقه جاي تخلي صدري حار بس مرتاح ...

سبحت ونزلت يمهه بالمطبخ كعدت اكل
واوكلهه شويه ... وهي مخليه راسهه على جتفي وحاضنه ايدي ...

كملت اكل وكفت تغسل مواعين وانه اشرب جاي وكلتلهه...
-رور هسه شنسوي؟ نرجع للدكتوره ؟
نروح نسوي تحليل ؟

- نراجع دكتوره عومري وهي بعد تنظم الحمل كوله

- زين اخذج وياي من ارجع ونضل هناك
بعد ماعوفج وحدج

- جهال امتحانات خطيه منو يضل وياهم
هاي فضه بالكوه جارعه ولد عادل

- هاااه ليش !!! شجاهه ! بدت الاحقاد !

- تبقى مرت ابو شمتسويلهه ماتحن على الجهال

هسه اني صايره بس انظف الصبح واضل ويه الجهال وهي طبخ والمواعين كله عليهه

- بعد تنتبهين بشغلج وماكو تكمز وركض بالدرج تره بالف ياعلي حصلنه هالجاهل لا تمردين كلبي عليه

- لاااا ماااكو شي شبييك لتوهس
يلا روح اصعد انتظرني بس اشوف البنيات
شديسون نامن بعدهن واجيك

صعدت وكعدت انتظرهه ..اجتي مثل كل مره تشوفني وتضحك وكبل تذب روحهه عليه وتحضني ...

-لك حويدر مشتاقتتتتتلك

- بعد رووووحي وعلي طاك كلبي عليج
ولج شلون متخابريني شلون كلبج انطاج عليه

- اييي ردت احرك كلبك لعد بس اني هنا محروك كلبي والووووب اريدك يمي

- وحق الله مره الثانيه سويهه وطنكري هيج
الااا احلف بعد تلفون مابقي عندج

- ديلاااا اووكي اووكي كافي

- وعلي سوالفج مال مخابيل زعلانه ومطنكره وعايفتني مشدوه بالي وحامل ومتكليلي والله شني نسيت اليوم !!
والثوووول اي والله عقل جهال عقلج

- ديلاااااااااا هسه مو كلنه اووكي كااافي لتلح
اووكي كافي ملحاااا

- يلا يلا كافي
اكلج الراتب بعده بالظرف اخذي قسمي
شوفي خاف امي تريد شي للبيت حسبي حسابهه

- اووكيي بس اني هم اريد

- انتي كيفج اخذي هو بيدج بعد

باستني وراحت اخذت الفلوس قسمتهه
وطفت الضوا واجتي بحضني ..

نمت وانه على لساني الحمدلله.. حصلت كل احلامي وياهه ..

ثاني يوم بشرنا اهلي سوه بالحمل وامي كالت نسوي غدا لوجه الله... ورحت تسوكت
واخذت دجاج ذبح وسوينه غدا شكر لله ..

ضليت هنا ٣ ايام واخذتهه ورجعت لبغداد
من الصبح وطلعنه بوجهنه للدكتورة
تأكدنا من الحمل وطلعنه منها كل راحه الدنيا عدنا ...

من هاليوم وره وصية الدكتوره ..
خلي هذا الشهر راحه وبدون درج ضلت هي هنا وياي ...
ارجع من الدوام الكاهه بس محضره الغدا
واكو بنيه هي تجي تنظف كل يوم الصبح وره مااطلع ..

المغرب تكعدني وتكلي ...
- حيداار كووم جيبلنه عشه حااامل اني ومالي خلك اگلي

-ماشي ماشي

اروح اجيب عشه واجي نتعشى و تضل
كل شويه ..
- حيداار جيبلي فدشي اشتمه نفسي تلعب

- ياشي يعني !

- هيج فدشي اشتمه واصير زينه مادري مو هنه الحوامل كلهن يشتمن جيبلي خلي اشتم

- هسه انه الحامل لو انتي ! شدراني شتشتمن !

- مااااااعليييييه لتعبني حاامل اني
يلا جيبلي شي اشتمه اكووووله نفسي تلعب

رحت للثلاجه فتحتها واكللهه..
- اجيبلج برتقاله !

- لاااااا

-ركيه ؟ انطيج كشر موز ؟

-لااااااا هذني ينشمن شبييك انته

- چااا شتردين فهميني

- جيبلي صابونه ريحتها طيبه وبعدهه ممستخدمه

- هااي ياهي التشتم صابون !

- وحده شفتها بفلم هندي اذا ماشتمت الصابونه تتقيء بقبعه الطبخ مال زوجها

ديربالك تتاخر من اكولك اريد اشتم تره اجي اكعد بحضنك اتقيء

- لخاطر الله بس فكيني شتردين اجيبلج
صابون اجيبلج بالجمله وضلي شمي واسكتي

خليت صابونه بايدهه وكعدت مددت رجلي ع الطبله وكلبت بالتلفون وهي خلت رجلهه بحضني ..
- الزم رجلي ناعمه لو خشنه !

- ناعمه حلوه

- اكولك هاي وحده حامل تكول رجلهه مورمه من الحمل
زين بله اني رجلي ورمت لان حاامل شلون امشي ؟

- حبيبي هسه كلجن نفس الشي تورمن ! انطي صبر إن شاء الله ماتورم رجلج

- اييي بلكت
زين اكولك وهاي وحده قريتهه بالتعليقات تكول خشمهه ورم .. اني خاف خشمي يورم اصير العب النفس شلون بيه ! شوفلي حل من هسه

- عادي هسه خلي يورم بعدين يفش

- زين واني مسويه فلر بشفتي خاف هم تورم شفتي وتصير دبل .. اطلع اخوف
شلون بيه ولك شوفلي حل

- استغفر الله
ريري كلشي ميصير بس ديربالج عليه وهذني عادي نشوفلهن حل بوكتهه بعد الله كريم  هسه كملي شهرج الثاني بعدج يومين بي انطي صبر

- ديلاااااا اووكي
مو اني غير اخاف على نفسي لان حامل لازم اعرف كلشي اتصرف عوومري

هزيت براسي وانه اضحك ...
وره شويه كلتلي..
- اكووولك هاي اني هم لازم اخيط بالبيت ملابس عريضه لان  حااامل

- دخيل ربج ريري هسه هو حمل لو استعداد عسكري

- اييييي غير ارتب اموري لان حامل

ذبيت تلفون وضليت بس اضحك على نعوصتها من تكلي حاامِل ...

من اطلع للدوام تكلي لتخلي عطر تلعب نفسي
وماخلي عطر اطلع كبل هيج ... وراهه
من ارجع بالطريق تخابرني ...

- حياتششي تعرفني حامل واتدلل هواي وانته فديتك كوولش تحبني وكيوت وياي

- ادللي حبيبي كولي

- اريد تروح لفد محل يسوي عصاير فريش تجنن اريدهه نص شكر وتجيني بارده كون هيج بيهه ثلج مجروش
وكوون بيهه حموضه وبيهه هاي الكراميل بالتزيين فوكاهه ومن هذا الكريم الابيض وصوص الفراوله

-ادري عصير شنو هسه انه شكله للولد عصير ماليش

-كووولشي عومري بس كون نفس المواصفات

- زين بويه صار

سديته و رحت جبتلهه من هاي العصاير
اخذتلهه سفري من كل نوع ...

رجعت نطيتهه العصاير وهي مخليتلي الغدا كبل غسلت وكعدت اكل وهي يمي تشرب وتكلي ...

- شكرًا عومري تدري بيه حامل مااشتهي اكل هوااي بس كوووله كلبي يدور بروده

- بردي كلبج واشبعي بيهن بس هم اكلي

- اييي اكوولك شو اني ماتخربط مثل هذني الحوامل
مو كلهن يدوخن ويوكعن وبالمستشفى يدرون بيهن حامل لو هاي بس قبل مايعرفون بالحمل بعدين ميصير وحده تتخربط لو شنو ؟.

- هههههههههههههههه اووويلي يااابويه
هسه انتي تدورين امراض ! كولي الحمدلله
وضعج وصحتج زينه

- اييي ادري بس يعني داسال
هسه انته شكو تضوج مني

-مضايج بس جاي اكلج لا تفكرين زايد احسن

-لاا لا دتضوج مني ادري بيك لان حامل ونفسيتي  تعبانه دتضوج ومتطيقني

- لا اله الا الله هسه انه فكيت حلكي وحجيت عليج ! شبيج بويه

- اي شوووف عصبي متصدك تريدني احجي وتطلع اعصابك عليه
متكول حامل خطيه متتحمل اعصاب
متغير صاير متحبني

- ولج شلون بيج ! هسه انه شوكت تغيرت
لج كبل دقيقتين حضنتج وكلتلج احبج ومشتاقتلج شتردين مني بعد

- اييي تقشمر عليه بس تسكتني
بس صاير متحبني مثل قبل ملتهي بشغلك

- دخيييل الله شبييييج !

- لتصييييح علييييه حاااامل ماحب الصوت العااالي اضىوج

- وحك الحسين ادري بيج حامل وااانه ساكت مو يمج ساااكت
ارحميني لخاطر الله ماجاي افهم شبيج احجيلي طك بطك

- يعني الا اكوو شي هيج اني ضايجه منك بكيفي  لوو تعاي الا تكولين ليش
تريد تعبني و

- اتعبج وانتي حامل ادري ادري
انه مو خوش رجال ومتعبج وانتي حااامل
ومافاهمج وانتي حامل ومادللج وانتي حاااامل
ادرررري انه طايح حظ زيييين ارتاحي اسكتي لتعبين نفسج وتحجين انه كلشي ادري

- شوف حتى متطيق تحجي وياي من صرت حامل لهسه عايفني وحدي

- دخيلك ربي
رور هسه شتردين مني ؟ اسكت احاجيج شسوي ! كليلي

- مااادري غير انته رجلي ومراجع وياي بكل شي لازم تضل تبحث وتفهم مزاجي لان حامل اتغير اصير مدري شلوني

- حبيبي راح ابحث والله
بس انام ساعتين واكعد ابحث واقرا ع الحمل وكلشي افهم زييين هيج رضيتي

- اييي يلا اوووكييي
بس مو تنام هوااي وتعوفني لان حامل اضوج وحدي لازم تكعد تسولف وياي

جريت نفس وكمت شلت الصينيه وخليتهه بالمطبخ ورحت غسلت وكبل رحت للغرفه
تمددت ...
اجتي هي هم نامت يمي ...
وهاي من وره ما كعدت بالليل انه اكلب بالكوكل وهي يمي نقرا عن ..
نفسية الحامل ، عنايه الحوامل ، اكلات مفيده بفتره الحمل ، نصائح عامه ، ملابس الحامل
نوم الحامل ، تحذيرات اثناء الحمل ....

وضليت بعد اغلس عليها كل تناقضاتها عادي
تحجي شيش بيش عادي .. بكل مزاج تصير بي انه وياهه ...

اخذتهه مراجعه اول ماكملت شهرها الثاني
وبعدين رجعتها لبيتنا بالنجف ...

صرت ادور على بيت للبيع بغير مناطق
واحصل خوش بيوت بس البيت هذاك ما ينباع وموكفني من الشرايه  ..

شهر الخامس بدايته ريري تمرضت
وهي داخله بشهرها الرابع اول ايام الها بي
اخذت اجازه اسبوعين وانحسبت الي قطع من الراتب ...

رحت يمهه وشفتهه حيل ذبلانه روحها
وجهه  كله مطكع احمر ومنفوخه عيونهه
جانت نايمه بغرفه اهلي ...
كعدت يمهه بوستهه وهي كعدت كبل كامت تبجي وحضنتني ....

- حيداار راح اموت من الحر جسمي ديحركني كوله

بوست وجهه وهديتهه وضليت اشوف ايدهه
وبطنهه كلهه طكع حمر وبطنهه كبرانه شويه
وملضومه لضم بالحساسيه ..
ركبتها ورجلها وظهرها كله مصبوغ احمر وحصف ماكله اكل ...

كبل خليتها تلبس واخذتها لدكتور ..
وهي بس تبجي .. جسمهه يحركها ورجليها تحكها من تمشي .. وعيونها مورمه الجفن بالكوه تفتح شويه ...

دكتور تخبل على حالها وهي حامل ضل حاير شيكتبلهه ادويه ... انطاهه عصارات وكتبلها ابره للحساسيه ومن طلعنه خابرت سكرتيره دكتورتها وحجيتلهه الموضوع كله
رجعتلي خبر الابره عادي الها يلا خليتهه تضربهه ...

ضليت كل اليوم انه بس يمهه .. امسحلهه عيونهه بالدهن واخليلهه جيس ثلج على ركبتهه وجف رجلهه ووجهه ..

اربع ايام و خف ورم عيونهه بقى جسمهه موروم ومطكع و طالعه روحهه من التحسس ولعبان النفس كل شويه .. وكاطعه الاكل بس
عصاير و مرات شوربه ...

صادف اختي طهرت ابنهه واهلي راحو للكوفه لبيتهم ...

انه كلبي عليهه مكابلهه وكاعد .. خايف عليهه وعلى حملهه وكلشي مالي خلكه بس اريدهه تصير زينه وهي من شنو تحسست ماتدري

نايم يمهه بالليل وحسيت عليهه تكعدني
- حبيبي كووم فدوه اكعد شوف الصوت هذا منين

- يا صوت !

- صوت هيج مال حشرات مادري مال بزون تنفخ هيج يعني اني داسمعه

كعدت وضليت مركز شويه وسمعت نفس الصوت ...
رحت فتحت باب الغرفه شويه وضليت اتصنت ..
الصوت يجي من يم الحمام ..
ميزته هذا صوت حيه .. فحيح والبيت هدوء نص الليل واسمعه واضح والحمام قريب يم الغرفه ..

صاحتني وتسألني شكو بره وانه اكلهه اسكتي
ضليت اتصنت وشفت لايت ضواه قريب
كبل صرت وره الباب وشويه ورجعت باوعت وماكو شي جوه بس ضوا من فوك
مال لايت ...

رجعت كعدت يم ريري ..
- هاي حيه ولج ميزت صوتهه

-عزااا يمه شجابهه هناا !!
لك البيت فاره مابي منين تجي الحيايه !!

- مادري بس هاي حيه جبيره اكيد لان صوتها مو مال هذني الصغار
بس اكيد وياهه احد لان هاي ماطلع صوتها هيج الا احد يندك بيهه

- عزاااا يعني منوو جابهه هنااا !!
ولك امشي اطلع شوف منو

- صعد فوك

-ومكابلني وكاعد!!! دروح شوف منو روووح

- ماريد اشوف شي يرجعني لنقطه الصفر
عوفيني مادري احسن

-حيداار بقى هذا عليك اني كلشي سويت وكلشي جازفت بعد ماعندي حيل صدكني

- رور ماريد انصدم اكثر خليني هيج
خلي يبقى عندي عقل
خلي يبقى عندي حيل واداريج

- ماعليه شي اني زينه بس روح فرصتك هاي روح خلي منو هذا
روح واخذ سيف وياك بس لا تضيعهه عليك هالمره

-تغيرت ريري مو هذاك الاولي الي اطب بزودي ومايهمني شي .. تعبت بعد صدمه الثانيه تنهيني
خليني بحيلي الج انتي منو الج هنا غيري!

- روح حيدااار عوفني هو اذا ردت اموت ماتطول عمري انته روح هاي فرصه متتعوض
اخذ سيف وياك واي شي خابرني
خلي تلفونك بايدك

ضليت محتار ومتردد .. واكف يم الباب واريد اطلع واكول خاف يطلع واحد اعرفه وانصدم صدمه عمري ..

وصلت مرحله خلي يسوون كلشي من وراي بس لا اعرفهم ولا اكابلهم وجه بوجه ..

ضلت تلح وياي اروح .. وتوكلت على الله وطلعت ..
صعدت الدرج وانه اتلفت وصلت لغرفه
سيف وفتحت الباب بهدوء .. ورحت كعدته
وضليت ساد حلكه وهو كبل وكف على حيله
شاورته ..

- امشي وياي فوك اكو احد بالبيت غريب

صعدنا وشفنا باب السطح مفتوح ..
وكفنه ودزيته يجيبلي عوده او شي ثكيل
وضليت واكف انتظره ...
جابلي خشبه عريضه .. خليتهه بايدي وصعدت وكلتله اوكف هنا انتظرني

صعدت بايه بايه على طرف اصابعي
وشفت الحيه على ركبه الرجال
وهو ظهره صاير على جهه الدرج
وكاعد متربع بالكاع ...

كبل رحت ركض عليه وهو دار وجهه ملثم وانه ضربته بالخشبه على راسه مرتين  وضربت الحيه الجانت على ركبته وهي صارت تنزل من جسمه وتجي عليه ....
و انه اتلافاهه .. واضرب بيهه بالخشبه
وضليت اصيح لسيف وهو اجاني يركض
كبل كمش ذيلهه وانه كعدت على نص جسمهه وطابك الخشبه على راسهه .. دفعلي كسر طابوكه واخذته اضرب على راسهه لحد ماكتلتهه وكمت منهه ...

جريت نفس واتذكرت الرجال انداريت
واشوفه مدد وكامش راسه ..

ركضت وكعدت يم راسه وجريت لثامه
واشوفه عادل ....
اخويه عادل !!!!!

كبل رجعت اللثام على وجهه وركضت جريت ايد سيف ونزلته غصبا عليه
ماخليته يشوف ابوه ...

نزلته وكلتله ...
- امشي روح خابر عمك حسنين خلي يجيني
لا تكعد اهلك بس خابر كله يجي بساع

- عمي منين هاذ ! شجابه بيتنا !

- مادري بعدين من يكعد نفتهم منه هسه انه ضربته وفقد بعد امشي روح ركض خابر ولا تصعد بعد فوك ضل هنا جوه خاف كلشي يصير

دفعته وخليته ينزل وانه ضليت كاعد على درج السطح وايدي ترجف .. عادل !!
عادل شعنده هيج يسوي !!!

طلعت تلفوني وخابرت حسنين ولكيته مشغول شويه ورجع خابرني ..
- خويه لخاطر الله تعال هنا بساع

- سيف كالي وهسه انه البس واطلعلكم

- اكلك دز عليه خلي يضل بيتك ماريده يشوف شي هنا ويضل يمنه

-زين زين

سديت الخط وشويه ورجعلي سيف كالي
حسنين يريده يروحله وكلتله روح ...

تأكدت هو طلع يلا رجعت صعدت لعادل
ضليت اكعد بي واريد اجره انزله ماكدر هو ثكيل حيل ... عفته بمكانه ونزلت على ريري
حجيتلهه وهي تخبلت  كلتلي...

- ديربالك عزيز يعرف لو مرت عادل تدري بيكم خلو كلشي سكته وطلعو جذبه لسيف
خطيه لا يعرف باابو احسن

-اي اي ادري

طلعت فتحت باب الشارع لحسنين واخذته كبل صعدنه سكتاوي للسطح ..

كابلنه عادل وكعدنه ...
- لك جانت وياه هاي الحيه على ركبته مدندله مثل لفاف حاطهه
هاذ شبي !!! شجاي يسوي هنا حتسودن ولك خويه

- انه ادري اخوك بيمن متورط
خلي نزله نكعده نشوفله جاره لا يروح يموت ولك ونبتلي بي

تكابلنه عليه ونزلناه لغرفتي خليناه بالكاع
وكعد هو يغسل وجهه وانه حاير شسوي
افتر ومادري شسوي !!!

ضليت كاعد وكامش راسي واباوعله
مدري شلابس هاي دشداشه وصخه
سوده وعليهه تراب وكصيره على رجله
وردانهه مكرطفه ..

حسنين كالي...
- شلون اذا كعد هذا شنحجي وياه !!!

- نحجي الصار جا سالفته ينسكت عليهه! !

- بلكت اهله فكدوه وهو بعده فاقد !
ولك شلون بينه !!

- شمدرييننني حير بي حير

صعدت للسطح مره ثانيه واسمع صوت المآذن .. راح تصير صلاه الفجر ..

ضوا هنا زين من بيت جيرانه عاكس على سطحنه واشوف كلشي ...
ضليت امشي على مكان كعدته وشفت تلفونه
هنا ..

اخذته وحاولت افتح رمز مانفتح
ضليت مخلي بايدي وكاعد صافن على المكان وجان يدك تلفون ....

المتصل ( ١١١٤)
فتحت خط  ..

.
.
.
يتبع 💕

# تطلبوني بارتين بعد 🌷