رواية ماء مغلي الفصل الثامن والستون 68 - بقلم Zoka 🌷

..♣️🩸 ماء مغلي 🩸♣️..
* adzzon *

صعدت لغرفتي ونزعت كل ملابسي ونمت
مافكرت بشي ابد .. جان جسمي مصفر طاقه
تعبانه لدرجه ماتحمل افكر بشي .. نمت رأساً

كعدت بالليل وتذكرت هاي الليله امي نايمه
جوه التراب ... من فتحت عينها هناك
هي صارت زينه ؟ رجعلها عقلها ؟
لو بقت حتى هناك ماتدري بشي ولا تذكر شي من عمرها ؟

كمت لبست الروب الفرو ورحت سبحت
من طلعت نزلت ادور على حيدار ..
شفته كاعد بالحديقه يدخن ويمه كلاصات جاي تارسه الميز ..

رحت وكفت يمه وهو يباوعلي بعيونه حمره
كلتله..
- يعني اني هسه امي ميته اليوم شسوي ؟ يعني الميت شيسوله هيج وكت اكو شي يسووه لو لااا

أشرلي اكعد .. وكعدت صار يكولي ..
- يصلون صلاة الوحشه للميت باول ليله
بالقبر
تصلين ركعتين بالاولى الحمد وايه الكرسي
والثانيه الحمد و القدر عشر مرات او سوره التكاثر عشر مرات
بعدين .. تسلمين وتكولين
' اللهم صل على محمد وال محمد وابعث ثوابها الى قبر امي وتذكرين اسمها الكامل '
واذا بيج حيل اقريلها سوره يس وره الصلاه
او سوره الكهف وادعيلها بعد انتي بنتها وهي مريضه أن شاء لله ماعليهه من ذنب ولا حرج

-اوووكي

- انه صليتها الها وهديت ثواب سور القران
لكل اهلج
اذا تتعبين انه سويتها بدالج لاتهتمين مانسيتهم

-اووكي شكرًا

عفته ورحت صعدت لغرفتي صليت
ومن ارفع راسي من السجود كل الدوخه تجيني ...
ماكدرت أقرا قران بس كملت الصلاه ورحت تمددت بفراشي ...

شويه واندكت الباب ودخل حيدار جايبلي
صينيه بيها بطل مي وكاسه شوربه وعلاكه الدوا ..
خلاهه يمي وكالي ..
- احس بيج رور
لتنسين انه حبيبج ويمج
لتبقين وحدج متفيد الوحده بهيج يوم

- شكرًا
مااريد احد راح اكل وانام

جريت الصينية وضليت اكل وهو واكف
وره شويه دنك لزم راسي وباسني بشعري
وكال ..
-البقيه بحياتج حبيبي
.
هنا صارت اللكمه ماتنبلع وهي بس شوربه
وصعبت عليه بعد ..
طلع هو واني ذبيت الخاشوكه وصرت امسح عيوني واحاول ماابجي ..
.
مادري شنو الي بجاني هيج
يمكن صوته بعده مؤثر بيه
يمكن مواساته لان هو الاقرب الي ..
يمكن اني تعبت اعتبر الموضوع عادي

مادري شنو الصار بس تعودت ..
مو جديد عليه هيج شعور متضارب ...
رجعت اكل وامسح بدموعي ..
واخذت ادويتي ونمت...
كلشي باقي بالي موجود بس اني اعرف اتصرف ويه كل هذا بشكل عادي ...

ثاني يوم الوضع عادي .. اثنينهم طالعين بالنهار .. واني لبست وطلعت ويه ريتا
نتسوك من محلات على الشارع ..

سويت مواعين سفري بيها بقلاوه وزلابيه
وجرك وكتبت بورقه
' الفاتحه على روح زنار هانىء '
وخليتهه داخل الماعون وسديته ودزيت ريتا توزعهن لنفس فرعنا ...
والي بقى وصيتها من يرجعون الولد
تنطيهم ياكلوه ...

كملت باقي يومي بغرفتي وباقي ايامي
هم .. همه متجنبيني بالنهار واني بالليل
وتمر الايام احنه عايشين سوه بس ماشوفهم ولا يشوفوني ...

عبرت ايام وانذاعت اخبار
' انتشار فايروس كورونا بالعراق '

صارو كاعدين بالبيت .. وهنا يلا رجعت اكعد وياهم .. والحجي قليل بس ويه عمي
وهو كولش قلق من الفايروس
وناصب لحيدار سيطرة تعقيم باب الشارع
بس يرجع من دوامه يتعقم وينزع ملابسه بره
ويتغرغر ويدخل يسبح يلا ينزل يكعد ويانه وياكل ..

سمع عمي راح يبدآ الحضر .. وراح تسوك
كلشي مال مؤونه ...
مااابقى شي مااشتراه حتى ادويتي اشترى من كل نوع باكيتين واني عندي اصلا بعده شريط جديد ...
واشترى الابر الاميركية مره ثانيه دكتور كتبها اله واشترى باكيتات جفوف وكمامات
وسرنجات ومغذيات وبلاستر وشاش وحتى
' جل ليلي ' يدهن على صدر يفتح النفس
هم اشتراه .. وفيتامينات وادويه الكحه
واقراص النعناع المص ...
والغذائيه كلها والمنظفات .. اشترى كارتونه مال وصل مسح للارضيه وكال هاي كل يوم تمسحون بوحده وتشمروهه بالحاويه
خاف تبقى بيها جراثيم لو فايروس ماندري بي .. وكل يوم وصله مسح جديده للارضيه وللاخشاب ... وحتى غاز ترس .. وبانزين
دبات ترسهن حتى اذا يريد يطلع مايمر على المحطه ...

شبابيك ما نفتح بس الصبح من الخمسه للسبعه
واذا طلعت بره يضل يحوم ورايه والا يخليني ارجع جوه يلا يرتاح ويسدد البوب والشبابيك
وفلاتر السبلت كل اسبوع ينظفها ويعقمها ..
ويفتر وره ريتا يدقق على تنظيفها
وما يخليها تطبخ الا تكمل تنظيف كلشي بتعقيم وتسبح يلا تجي للمطبخ ..

وحيدار قللو دوامه باليوم الي يرجع بي من الدوام عمي كل ما يروح ويجي من يمه
يكوله ' افتح ايدك ' ويرشله معقم وهو يفرك ايده .. ويرش على شعره وينطيها قرص نعناع مص والصبح يسوي كلاص عصير ليمون وثوم وزنجبيل وغصباً عليه يشربه
يلا يطلع لدوامه لو يروح يتريك ويبقى ويانه

اني وحيدار ما حجينا بعد بسبب ضوابط السلامه المشدده من عمي ...
لان حيدار يطلع مايخليه يتقرب مني
وعلى القنفه الي انام عليهه هو مالازم يكعد
ويضل كاعد على كرسي كدام الميز الجبير بالصاله ..
وخاف اني اصعد انام وهو يلحكني لغرفتي
عمي بقاني انام جوه وهو يصعد فوك
والصبح بس يحس عليه نزل
يكعد ويضل وراه وراه لحد ما يطلع للدوام
يلا يرجع ينام ...

مرات من كد ما يوهس يخليني اضحك على تصرفاته واشاقيه
اكوله ..
' راح يموتك الخوف شبيك تطكطك هيج من فايروس '

هو يكولي
' اني حرصاً عليج انتي حاله خاصه ماعندج مناعه اي شي يأثر قوي عليج
لان خايف عليج هيج منتبه ومهتم زياده '

صار حيدار يراسلني ..
يدزلي اعتذار ورسايل اشتياق وفيديوات
واني بس ادزله ' okkk'
غير هالرساله ما عندي ...

دزلي مره..
' أعتذر على ماقد تراه منّي، لم أُعطَ من شرف النبوّة غير حُزن الأنبياء، وليس عندي صَبرهم '

طبعت بالي هاي الرساله وفكرت لو ادزله شي عليهه .. بس بعدين كلت لا السكوت احسن حل لوضعنا ...

عفته وهو بعد ما راسل .. بس هذاك الحساب
مال هذيج الكحبه رجع راسلني ...
صبحت على رسالتها ...
' بزون انتي بسبع ارواح ماتموتين وتخلصينه الي مثلج اكلهم الدود وحتى عظم ماضللهم '

كتبتلهه ..
' لااا والله اني الغشيمه الودعت بزون شحمه '

جان تدزلي صوره حيدار وهو كاعد يحجي بيتهم وكدامه استكان جاي وكتبتلي..
' رجلج عاجبه الوضع يمنا انتي شبيج متحسين الرجال بزعت روحه منج
ويريدله مره تدلل وتداري وتهتم مو مثلج رجلج بالكبر وراسج ملفلف
شكو مجلبه بي
روحي انكبري خلصينا
كاطعه عيشتنا
مااشبعت منه ديجيني كل اسبوع مره من وره عينج المفتحتهه عليه وراه وراه تلحكين شبيج مابزعتي
رجال ميريدج لعبانه نفسه من شكلج
عبالك كاعدله ويه عجوز
وجهج متروس شعر وكلج ريحه ادويه تلعبين نفس اليوصلج من عينج المصوفره وحلكج الميبس
تكفرينه بدينه من يكابلج
كاضيهه يضحك عليج يقنع بيج منا لحد متموتين
شويه حسي وطلعي من حياته روحي ولي انكبري موت الكرفج وخلصنه من همج '

شااااغت رووحي هنا من شفته راجعلهم
كلت اليوم اكضي بي التوبه ...

ضليت صافنه على المحادثه واحرك بروحي
بعدين كتبتلهه..
' الف عافيه على كلبه فديته الحب منور
مااوصيج بعد ضلي هيج صوري ودزيلي تعرفيني بس نايمه ومريضه وحتى مااالحك اشوف رجلي فدوه لعينه طالع كيكه
يلا اذا هو يمج سلمي عليه '

بس قرتها اني حضرتها وخابرت حيدار
توقعته مغلق جهازه بس حصلته وجاوبني
يحجي بصوت ناصي ...
- ها عيني كولي

-اااااانتتتتتته ويييييين

- بالكيه رايح بشغله

- هااااا هم شغل كحاااب وممرضات وادبسزيات

- عيني بعدين من اوصل افهمج

- ارجع هناااا وشوف الحجي شلونه

سديته وضليت افشر مااخليت حجايه ماحجيتهه وعمي نزل يصيح شكو شبيج
وهم رفعت صوتي عليه مادري ماضل بيه شعور
بس بعدين اعتذرتله ورحت صعدت لغرفتي بقيت الووووب

احس دمي يجوي بيه .. من قهري بدكته الناقصه ومن غيرتي هذا رجلي الي جبته بدم كلبي .. تعبت عليه وسهرت ودللت وداريت وكله يروح ع الحاضر لثانيه ماتسوى فلسين !

احييير شسوي واكضي الوكت بين ما يرجع
تعبت من الفره بالاعصاب هيج
رحت صعدت للسطح وبجيت
شكد يأذيني واني شكد احبه
يدوووس بنص كلبي ولااا يهتم هااي مره وتحس عندي شعور اني مو حجاره وكلشي اتقبل منه واسكت

اجاني عمي متخبل ليش تبجين وكاعده هنا
والسطح مامعقم ...
هم صيحت عليه وعفته اريد انزل وهو لزمني بايده نزلني وقفل السطح
وضلينه واكفين يم الدرج ...

- شبيج متخبله اليوم !! شكو تبجين وشكو الصياح هذا !!! هالكه نفسج على شنو !!

- عوووفني اليوم اني مخبله اووووكييي
لتحاجيني ولتجي يمي خليني بخبالي ماااموت
اني اذا ضليت ساكته وكاعده بعد ساعه ماطول بالعيشه
عووووفنيييي اووووكي عوووفني

عفته ونزلت لغرفتي كعدت وقفلت بابي
وضليت اخابر عليه وهو يرفضني
واني الح واخابر جان يجاوبني ويكولي كبل ..
-كااااعد ويه الولد انطي صبر مااطير ارجعلج ونحجي

-ياااااولد هذووووله اني محرروكه اعصابي هنا وانته مدري وين مولي ويه جماعتك تعااال ارجع دنحجي ماااصبر بعد عليك
ارجع لاتموتني بحركان الكلب

- اي ايييي ايييي جاااي جااااي

سد الخط واني كعدت انتظر بي وساعه جرت ساعه لحد ما اندكت باب غرفتي ..
رحت فتحتهه وشفته باقي بس بالفانيله نص ردان والبنطرون ...
.
دخل بدل ملابسه ومنطيني ظهره واني كلتله....
- ماااااتجوووز منهن حيدااار عاجبتك
هيج كاااتل نفسك عليهه وكل يوم رايح راجع على بيتهاااا

- ياابيت شبيج !

- بيت القندرره الخنتني وياهه هسه صرت غشيم ماتعرف يابيت !!!
ليييييش هيج انته نفسك دنيه
لييييش تضل تخووون بيه لك شسووويتلك ااااني واستاهل هيج منك شسووووويتلك

شلت صينيه العطور من على الميز وركعتها بالكاع وتحفيه بشكل قلبين سوه هم شلتهه
وركعتها بمرايه الكنتور

هو يصيح ويحلف ما رايح لبيتهم الا ديحجي ويه امها و وياه ولد مو وحده بس اني مااصدكه بعد حجيه كله مابي فايده

كعدت يم الميز ولازمه راسي وابجي
وهو يمي يبوس بيه واني ادفعه وابجي وهو صار يصيح عليه ويضرب على راسه
..
- لتبجييييين لتبجين ابوس ايدج حبيبي لتبجين عليه انه ماااستاهل دموعج مااستاهلج لا تحركين كلبج هيج
ياروحي رور فدوه رحتلج لاتبجين لاتعبين نفسج والله ماااااااستاهل انه دمعه من عينج

باوعتله يبجي ويبوس بايدي ..جريتها منه
وصارت عيني بعينه ..
- دتشوفني منو اني ! حيدااار تذكرني اني منو وشلون عشت وياك !!
اني ريري حبيبتك
اول مره بحياتك لك اني الجنت متكدر بدون صوتي
نسيت شلون جنت تتخبل اذا مااحاجيك حتى مشاكلي جنت تحبها حتى صوتي العالي تشتاقله
هذيج الايااام والاحضان كلها نسيتها !!
هيجي حيدار كلشي نسيت مني وكمت تشوفني بس مريضه ومافيدك بعد وخنتني !!

اني تخوني وتلوع كلبي عليك !
اني استاهل انخان !
لك منطيتك حب لو تكضي عمرك تحسبه ما يخلص
كلشي انطيتك خليت رووووحي كلها بايدك
ماااستحيت مني !!! تغدرني وتخوني هيج
واني بنص كلبي مخليتك
ماااااستحيييييت
من تخااابرني وترجعلي وانته خايني ماااستحيت !! شلووون تخلي عينك بعيني وانته تخون بيه
ليييييييييش هيج صررررت ليييش تغيرت عليه

ضل يلزم بوجهي وايده ترجف يباوعلي بنظره مكسوره وشفايفه ترجف يريد يحجي ويسكت يضل مغمض شويه ويرجع يباوعلي
كلتله..

- ليش تخسرني ! لك اني ربحك بهالدنيا
يا حضن امنك غيري
ياكلب حبك و وفالك مثلي
ليش ضيعتني من ايدك وضيعتنننني من نفسي
عااااايفني عايشه بفراااااغ كل يوم افتح عيني واشوفك وجروح كلبي كلهه تفز
لك حبيبي اااااانته مااااحبيت غيرك بعمري كله ماااااحبيت بشر بس انته حبيتك
واشوفك كدامي ومااكدر بعد اوصلك
واشتاقلك واكول ماااايسوى ماااايسوووى اشتاقله هذااا يخوووووون
تحس بيها شكبرهه بكلبي من اطفي اشتياقي بكلمه يخون !!!
دااااخذل نفسي بنفسي
هييييج بايدي اجوووي كلبي من يحن عليك
لييييييش عفتنننتنني هيج
ليش خليتني اريدك وماكدر اوصلك
لك تخليننننني اكول حسااااافه حسااااافه على يوم العرفتك واقتنعت بيك وامنتلك

حضني ومخلي راسه بركبتي ويبجي ..
بنص وجع كلبي واذيتي منه احن اله
حضنه احس كلبه يدك بيه ... وركبته
اشتاق اشمهه ..
عيطت وضربته على ظهره ...
- لييييييش تكررررهني نفسسسي
لك ردت اموووت بحضنك حيدااااار شبيك
ماااصبرت ويااااي
لك والله حبيتك وماكدر اتخيل عمري مو وياك
ليييييش حيدااار ليييييش مو تعرفني اغااار شلون تعوفني هيج اتحمل غيري وصلتك
شلوووووووون تعوفني امووووت بغيرتي وماتسوووووي شيييييي

هدمت كلشششي حلوه بنيته وياك كل تعبي ضيعته ماااااااابقيتلي شي اعيش علموده
لييييييش من ردتهه ليش عفتني اسوي عمليه واتعب من جديد جااااان عفتني بفراشي هنا اموت مرتاحه ليييييش تعبني وتاملني وانته
عندددددك غيرررري مرتااااح وياههه

معااااااشرني المن المن !!! ليييييش بقيت ويااااااااي من تريدها لييييييش مكابلني
لييييش باقي يمي وانته بنفسسسسك النسوان
رووووووحلهن بعد لااااا ترجعلي ولا تشوفني وجهك
روووووح نعلى عليييييييك يااا بششششر ماااابيك بس الاذيه

عصر ضلوعي بحضنته ويبجي ...
ضليت ادفع بي لحد ما كدرت اوخر من يمه
كمت مشيت ومامنتبهه على الكسرته ومتطشر بالكاع ودست عليهن ..
بعدني اريد الزم شي استند بي وهو لزم ايدي رأساً خلاهه وره ركبته وشالني للجربايه
نومني وضل لازم رجلي ينظفها

احس بايده ترجف وهو يمسح برجلي ويجر قطع مكسره منها ..
مسحت عيوني زين وضليت اباوعله
لازم رجلي ويمسحها ودموعه تنزل ما وكفت
ابد. ولا رجفه ايده استقرت ...

عفته واخذت المخده خليتها فوك راسي
وهو بعده لازم رجلي ...

وجعني راسي وكمل عليه كل الوجع
ورجعني لنفس الفراغ الي اصير بي وكت ما يهيج عليه كل وجع جسمي ..
جريت رجلي منه وقربتهن لصدري وخليت المخده بالطول غطيت بيهه وجهي وحضنتها

هو غطاني ونام ورايه حضني وضل مخلي وجهه بركبتي ..
مانطيت اي رد فعل بعد ماعندي حيل
اني حيلي وكت معدود من يخلص بعد
اصير بس نفس ...

صار يتلمس بايدي ويكولي..
- اذيتج كلها مني
والله مانسيت من حبج شي انه لو انساه ماعيش
اضل فارغ مابيه روح
انتي روحي بس بيج انه عشت وصارتلي حياه
كلشي وياج مانساه
انتي امي والله احسج امي شكد ماتزعلين عليه اريدج
انه ماكدر بلياج رور الجهال يكدرون بلايه امهم وانه ماكدر بلياج
والله ماقلت شعره من حبج ولا معزتج عندي
من كبل ماتزعلين عليه انه متعذب
ماكل الندم روحي
ماعبرت عليه دقيقه اذا ماعاتبت نفسي بيها
والله مستحي من نفسي شلون سويت هيج سوايه
مو بس خنتج انه خنت كلشي بيه
انه مو هيج والله مااااجنت هيج والله ما جايس حرام ولااا عجبتني مره غيرج
بس وكعت بغلط ما يصلحه حتى موتي
..
اخذتني شهوه لحظه مااخذني كلبي ولا عقلي
مايفيد حجيي ادري والله ادري مااايفيد انه دمرت كلشي حلو بينا
كلشي كسرته من غلطت
ادري انه متت وادري انتي متي من وراي
انه ادري لو ما موتت كلبج وشبعتج اذيه ووجع جان ما موتي امج

هنا طلعت مني شهكه قويه ينسمع صوتها
وهو يخلي ايده على وجهي يمسح دموعي
ويجرني لجسمه يحضني اقوى واني اجر بايده من بطني وهو ما يفلتها ...
يشهك ويبجي ويكولي...

- انه ماصنتج حبيبي وجع كلبج بيه
شايله على جتوفي
شايلج مكسوره كلب مني اااانه الحبيتج ماعرفت اداريج
ماكدرت افرح كلبج ولا جبتلج راحه
انه مرضتج واشوفج كدام عيني توكعين واعيش ! انه شلون حاي اعيش !!!
ليش اعيش وانتي مريضه وبيج كل التعب مني
حرام اعيش والله حراااام اعيش
مااستاهل اعيش ولا ساعه وحده
ماستاهل دموعج انه حقير ماااوفيتلج
ماعندي غيره ولا بيه خير ولااا رجال
واتحكم بنفسي
انه مثل الجهال كلشي بيه هوسه كلشي مادبر
ماعرف اسوي شي بدونج حتى نفسي ماعرف احكمها
اااانه ضعيييف بكلشي ضعيف ماعندي
قوه بشي انه كلي غلط كلي موزين
ماانحمل انه من اغلاطي ماااانحمل
لا تبجين عليه انه ماستاهل دموعج حبيبي فدوه لتبجين
لتسكتين وتعوفيني
عاقبيني سويلي شي اذيني انه اذيتج انتي رديها الاذيه الي رديهااا لاتعوفيني هيييج
ريررري

صار يبجي بعلو صوته وكل جسمه يرجف
وحاضني ...
ضليت مكابره مااندار عليه ولا اهتمله
بس من يتحرك صدره هيج من يجر نفس ويبجي .. كلبي يوجعني عليه
احس عبالك روحي دتنمرد ..

ماتحملت اعوفه هيج وانداريت عليه
لزمت وجهه وهو وخر من ايدي
وكام ..
اخذ جكايره ونزع فانيلته وجابلي الجكاره
وكعد كدامي ..
خلاهه بايدي واني بس فاكه حلكي واباوع لجسمه ...
كله مجرح ومجوى ... بطنه من جوه كلهه حروك وخاصرته بيهه شخوط جروح متيبسه
وحتى صدره هم كله حروك بالنص ومن اليسره كله مكرمش من الحرك
خليت ايدي على صدره اتلمسهن وهو مدنك

كعدت اريد احضنه وهو وخر ايدي ويكولي..
- لا لااا انه بس اذيه الج لا تحبيني
لا تحضنيني حتى انه اسف ااا اسف
حضنتج هواي بعد مااحضنج ماذيج
ادري كلبج يوجعج مني حتى من احضنج انتي مقهوره

- شبيك حيدااار شمسوي بروحك ليييش هيج ابويه انته شبيييك ليش تاذي نفسك

- لازم اذي نفسي استاهل
انه كسرت كلبج وكلبي انه عدمت حياتي بايدي شلون اعوفج تعيشين وتموتين وانتي زعلانه مني !
انه هواي زادت ذنوبي
كلشي يصير حيل بيه انه ماعرف اتصرف

- عوف زعلي انساه كافي لتأذي نفسك هيج

- انه مثل الزاني وعليه عقاب انه مو غشيم ادري بروحي غلطان ومذنب وكومه ذنوب بركبتي
اذيني اخذي حكج مني انه بكلشي مأذيج
هاااي انه كدامج طلعي حيفج وضيمج بيه
لااااااا تصفين بوجهي ريرررري
سووووي شي سوووي اي شي بردي كلبج
كييييفج سوي بيه شييي اذيني انه ارتااح من اتاذى والله ارتااااح

اخذ الجكاره وجر منها نفس وبجمرتهه خلاهه على صدره واني جريت ايده وعيطت عليه وهو يكولي ...
- تبردني والله تبردني هيج
هاج حبيبي اذا تردين راحتي الزميها
وريحيني بيها
فدووه رحتلج والله متعذب ضميري موتني
ريري سوي شي بيه اي شي بس ريحي ضميري هو جاااي يحركني والله والله
ماحس بحرك بجسمي والله بروووحي احسه
ريري والله احبج احبج ماردت اخونج والله كلبي مكسور عليج من اشوفج تبجين والله مايضل بيه عقل
بس انه حيوان حيوااان
انه همجي انه ماسوى تراب رجلج
كلشي جبتلج وجع الكلب والمرض وعفتج تبجين وحدج لج ااااانه حبيبج شلون اعوفج وحدج !!!
والله ميييييت ميت ندماااان ياروووحي
والله ماعبر عليه يوم ماعاقبت نفسي بي
ماشوفج تبجين الا اطلع كل قهرج بيه
ولااا نسيتج انه والله حتى من اطلع افكر بيج
والوم بروحي شلون هيج انتي بعيده عليه صرتي

ايدي كامت ترجف وهو مجلب الا أذيه
ويحجي ودموعه تنزل ...
يخلي ايدي على صدره ويدوس بيها حيل على مكان الحرك ويكولي ..
- وين مايوجعج يوجعني
لتبجين بعد لتنقهرين
انتي مو تحبين تاذين اليأذيج
هاي انه اذيته الج والله شكد ماتردين أذي نفسي بعد واذا تردين انتي اذيني لينكسر كلبج عليه حبيبي ماستاهل انه لتخافين عليه
اجيبلج بعد جكاره هاي طفت عوفيهه هسه اشعلج ثانيه

راد يكوم واني جريته حيل من ايده وكعدته
ردت اضربه على وجهه وماكدرت هو يباوعلي مكسور ... عينه هاي ماخلتني اذيه
وهو لزم ايدي وقربهه على وجهه يضرب بيهه على خده واني اسد اصابعي واخر شي جريت راسه حضنته وهو يبجي ...

كلتله..
- ولك اني ماحب المرضى النفسيين
اذا تضل هيج اطلكك خلع اخلعك

- ريرررري انه تغيرت اااانه بعد مارجع زين بعد اذنبت ماااانصلح عوفينني اتعذب لما امووت

- اييي بله متت واني بعدني مميته شلووون منو يدفني ؟؟ هم تعوفني للغربه
انته عندك اهل يحيرون بيك اني ماعندي غيرك

- عمج هو زين واحسن مني يحبج ويداريج هو يدفنج هو احسن مني لا تخليني انه كلشي عندج هو كلشي يستاهل الزين مو اااانه

- عمي لو اريده من البدايه واكوله هيج اريد منك بس اني ردتك انته وغصبا عليك تبقى عايش علمودي ومو تروح تاذي نفسك وتكسرهه وتجيني بهذاك اليوم مابيك حيل تحير بيه
صير قوي لعد اني المن رايدتك هو غير لموتي هم هناك تعوفني متحير بيه !!
شلوووون يعني هم اطلع اني اغسل نفسي وادفنها ترررره ماصايره هاي
حيداااار

- انتي بطرانه على ربج
انه وين يبقى بيه حيل بذاك اليوم انه اريد واحد يدفني

- ديلااااا دبرلك واحد من هسه وصيه من وره ماتدفني خلي يدفنك ونخلص عاااد من عيشه الكشره
حيدااار اذاااا بعد شفتك مسوي شي بجسمك لوووو شخط هالكداته الاااا اضل حاقده عليك حتى بيوم القيامه ماااتسلم من حقدي
اااااني اكرررره الناااس الضعيفه

- بس انه ضعيف ريررري ضعيف

- لااااااا مو ضعيف انته تعبان بس تعبان
ترتاح وكلشي ما بيك بعد

- لااااااااا ضعيف ومابيه خير حتى لنفسي
ااااانه ادري بروحي جاااهل مابيه كل شخصيه كل رجوله مااااعندي وهمجي وكلشي ماعرف ادبر

- ااااني شداااااكول لك لتعبني هي بطاريتي مصفره
لك حيدااار اني مايكدر عليه واحد ضعيف
اااني مااكدرلي بشر غيرك بس انته كدرت عليه..
انته قوي ومثقف عقلك وتفكيرك يخبل
انته كلشي بيك حلو
حويدر بعد وين اكو مثله ابو كلب الطيب

رفع راسه يباوعلي وشفايفه ترجف وعيونه حمر مدمعات .. كالي..
- والله ماعيدها واذيج
ريري مااحب اخون والله مو طبعي اخون ماريد اصير خاين
بس انه صرت كلشي اكرهه

- حيدااار كافي سد الموضوع
ديوجعك جسمك مو !

-عوفيني لتسويلي شي
عوفيني انه هيج مرتاح

-كاااافي حيدااار فدووه كااافي
لتمرد كلبي اكعد واسكت لتعبني لك مابيه حيل بالكوه كاعده واحاجيك
اسكت ونام هنا لتضل تخوفني بسوالفك

اندار ونام وضل مكرفص نفسه بدون غطى
عفته هيج وكمت اريد اخذ تلفوني ورجلي تحركني .. تحملتها ومشيت اخذت تلفوني
وخابرت عمي .. كلتله يدزلي بايد ريتا
عصاره مال حروق ...

بقيت واكفه على كعب رجلي وانتظرها تجي
ومن دكت الباب كبل فتحتلهه واخذت العصاره منهه .. وبقيت فاتحه الباب وهي اجتي كنست المكسر بالكاع طلعت يلا سديت الباب ورحت يمه ...

درت جسمه عليه وهو ضل مخلي ايده على عيونه ... صرت اخلي من الدهن شويه شويه انقطهن على الحرك وافركهن اله وردت اغطي رجليه وحسيت لازم اشوفهن اتاكد ما مأذي نفسه هنا ...

هو لابس بجامه خليت ايدي دانزعها اله وهو ماخلاني كالي ..
- عوفيها كافي هيج

وخرت ايده واصريت اشوف واتأكد
واحساسي طلع بمكانه ...
اثار الحرك هنا حتى صايره مبقبقه
حييييل مأذي نفسه حيل قاسي بروحه
مثانته عباره عن دوائر مكرمشه وجوزيه
من الحرك ... ونص منهن منفوخات مادري شلون مسوي بنفسه هيج !!! شلون كدر يحرك روحه هيج مكان يشوغ الروح شلون تحمل !!!

احاجيه اسأله شلون تحملت الوجع لهسه وهو يسكت مايردلي ...
كعدت ادهنه وعفته ينشف هيج واباوعله
مو حيدار العرفته هذا حيل متغير ..
شباقي منه ! وينه حبيبي حيدار !

مسحت ايدي وكعدت يم راسه ..
خليت ايدي على وجهه وهو لزمهه وخلاهه على حلكه يبوسهه ويرجعهه على وجهه
ضليت اتلمس بعيونه وهو مخلي ايده على ايدي ..
باوعت لجسمه شويه نشف الدهن جريت الغطى وغطيته وضليت افرك راسه وهو
ساكت ..

كلتله..
- نام ناام لتكره نفسك انته مابيك عيب بس طيب زياده وكلبك مو الك
الناس تعرف تستغلك لان كلبك فطير بكل شي تصدك
ناام يا يمه نام

غطى وجهه وانطاني ظهره ونام ..
عفته وضليت متمدده وتعبانه هو هالكني
ماخذ من حيلي حيل .. وهسه اشوف وضعه
احتاريت شتصرف ...

شويه ارتاحيت وطلعت غسلت ونزلت جوه
اخذت دوايه وكعدت لازمه راسي وعمي
وكف كبالي ويكولي...

- خااانج ! هم طلع ملوت وابو بنات وانتي مسويته نبي كدامي لا عين ترف ولا كلب يميل

فركت راسي ورفعت عيني باوعتله
وضليت ساكته ..

- شعندج مبقيته هنا ! شكوووو هالكه نفسج عليه
شبي وهيج ذبحتي روحج عليه
اطرديه منا خلي يولي لاهله يلفوه
شكول زواج هذا المهتلف !!
عووووفيه خااانج بعد شتترجين منه
عووفيه

- انته عوفه رجاءً حيدار خط احمر لحد يوصله

شال السراحيه من الطبله وركعها بالكاع ونكلب فدمره صار اعصاب ..

- شببببي هووو شبيييي ومنزهته هيج
واحد جبان وخنيث لج حجي ميعرف يحجي
ومجلبه بي !!!!
على شنوووووو ضااااله وياه
ماتشوفين روحج شلون صايره من قهره !
هذاااا رجال هذاااا
هذا الشاده بي ظهرج !!!
بعدج بس وكعتي دار وجهه وراح شاف غيرج
وبعدددددج تريدي !!! بعدج تدارين بي
شيسووووى هو. شيسوى فلسين مايسوى انتي السويتيه وكبرتي راسه وخااااانج وغدر بيج
اطرررررديه منااااا تطلكي عووووفي

- عووووفوه انتتووو عووفوه حيدااار عوفوه زين وشينه علييييه اني
اااااني اتصرف وياه
خااااني حيل بيه استاهل لان اني ثوله

- لااااااا تضلين تبرررين وتدااااافعين
جوووووزي منه عااد جوووزي منه
مااابيه خير هذاااا يشبعج قهر
ششفتي وياااه راحه من عرفتيه لليوم !
شجابلج بس الاذيه
كاااااتله روحج عليه هوووو شبي شببببي

- كلت اني اتصرف وياه هاااي حياتي
وهذا رجلي اني اقررر شتصرف وياه

- رجلج سرسري وخنيث ويخونج بعد يخوووونج

-لتحجييي عليه عمممي كااافي
عوووفه حيدار مريض تعبان
لتحجي عليه وتزرررف كلبي كااااااافي مابيه حيل صياح

- هااااي صيحتي عليه وتمرض !
ههههه
لج منين جبتيه هذاااااا منييييييين
ورطتينا بي
لج هذا العفتيني علموده ! هذا بكلمتين يبيعج
بس تغمضين عينج يخونج وبعدج تريدي!!!

- كااااافي دااااكولك ماااابيه حيل افهمني تعبااانه شبيكم وياااي
حالفين موتي على مصايبكم

كمت اريد اصعد وهو لزم ايدي وضل يباوع بعيني وكالي ...
- اذا يضل هنا بعد مااضل وياج

- شبييييك رضا شبيييك

- ولج بابه افهمي اااااني مداريج بمي عيني وهذاااا اذيه الج اذييييييه ماااسكتله
اني ماااطيق هيج بشر خنايث
واليأذيج مااارحمه ولو مااذاك الوعد جان هسه مخليج ترشين مي ورد على كبره
اكسررري الشر وطلعيه منا
واني ارجعج زينه
انتي وياي ماعليج شي بس هذا يموتج بالقهر ميفيدج كاااااااافي طلعتيه من نفسج كااافي
شغلي عقلج وكافي طيحان حظ
لتسامحين وتنسين يرررررجع يخووونج
اااااني رجال وافهم المرته مريضه ماااا ينصبر عليهه تنخاااان تنخاااان

الحجي يخنك بصدري ... ادري كل شي يكوله صح .. ادري بي بقيته وياي اذيه ..
دمعت عيني وضليت ساده عيوني بايدي وهو يمي يكولي ...

- عنده سكن بدوامه خلي يروح هناك لو يرجع لاهله
عوفي اني انسيج كلشي
علاجج ماشي زين واني اداريج وهذا بعد سدي باب عشرته كافي قهر
اني سكتت عليه لان وعدج مااخونه
بس بعد بينت طينته شمستفاده منه هنااااا اطرديه لتجبريني اذيه كدام عينج

- هو مريض عوفه كم يوم يصير زين ونحجي اني وياه
ونخلي حد للصار
عوفني اني اتصرف ااااني اعرف شلون اتصرف ويه حيدار

- شتصرفين تصرفي
بس اذا ضل هو هنا اني اطلع
تختارين لو اني لو هو

- شبيييك انته شعندك وياه هيج من حقد
هو شمسويلك !!
مشاكله وياي اني
انته ليش تحقد عليه مااذاك بشي

- احقد عليه هذا ديكسر كلشي بنيته من سنين
ربيتج بتعب وبنيت بيج اقوى شخصيه
سويتلج احسن عيشه وهو كلشي هدمه
اااااني من مرضج ووكعتج هذيج قفلت حاقد عليه بس ردتج انتي تصحين وتقررين بنفسسسسج هذااا بعد ميفيد بحياتج
افهمممممي لاااا اخر عمرج تطفين عقلج وتكعدين مطفيه يمه وهو يدمغ عليج بكل طيحان الحظ الجابه واجاج بي
كااااااافي اكطعي عشرته

- ااااني تعبانه مريضه ليش متحسون
تعبانه عوفوني ارتاااح واني اتصرف
اشغل عقلي ليش اني يايوم طفيته !
بس اريد ارتاح

- روحي ارتاحي وشوفيني شلون يشتغل عقلج
هالمره اريد اشوف عقلج شلون يوزن
يصعدني لو ينزلني بحياتج
روحي كابلي واكعدي ابجي ودكيها مناحه
وبعدين فكرررري
شوفي لو رضا النايم هناك راح يبجيج !

درت وجهي وغصه بكلبي ...
ليش يا كلبي ترخصني هيج !!!

صعدت لغرفتي شفت حيدار على نومته
اخذت مخده وخليتهه بالكاع وتمددت
وضل كلام رضا يدك براسي ..

تعبت وانسد خشمي من البجي .. كمت اخذت تلفوني وسماعات وشغلت اغاني الاجنبيه
الصاخبه وعليتهه ...
بقيت اركز بكلمات الاغنيه واتخيل بالي شكل الكلمه بالانكليزي مثل ماجنت قبل اول ماتعلمت اللغه هيج...
وشغلت تفكيري عنهم ....

مادري شوكت غفيت بس من كعدت لكيت تلفوني طافي والسماعات يم ايدي ومتغطيه
شو يمي ورده بيضه على المخده بعدها بغصنها ..

اخذتهه وخليتهه على وجهي ورجعت غمضت... وره شويه كمت باوعت للجربايه
حيدار مو هنا ...
شفت الساعه ثمانيه ونص الصبح ...
اني من عصر البارحه نايمه ..

خليت تلفوني على الشحن ورحت غسلت ونزلت شفت عمي كاعد بالحديقه
مخلي الايباد على الميز وشايل كوب الكهوه
وكاعد هاي كعدته الي رجل على الثانيه بشكل عرضي ... ولابس شبشب الرصاصي

باوعلي واني ردت افوت جوه وهو صاحني
وكفت اباوعله وهو اشرلي اجيه ..
رحتله ولزم معصم ايدي على النبض
ضل مغمض شويه وكالي ..
- اكعدي هنا

كعدت وهو صار يفتح عيني وراح جابلي جهاز الضغط والسكر والمحرار وصار يقيسلي ...
عنده دفتر صغير مخليه بكارتونه جهاز الضغط هذا كل يوميه يكتب بي شكد القياس اليوم واذا شاف شي تغير بالقياسات ..عنده
رقم الدكتور ويخابره يحجيله هيج تغير
واذا خطر او لا ..

بقيت كاعده يمه بس مانحجي ...
جابتلي ريتا ريوكي وعصير الخضروات
صرت اكل وهو ملتهي بالايباد
شويه وخلاه بحضني وكالي ...

- اختاري من هاي الصور خمسه اريد اشتريهن
.
باوعت هذني صور سيارات ... كعدت اكلب بالصور هنه البوم كامل بي اربعين صوره
اشرتله عليهن بالمفضله وانطيته اله ..

كالي ..
- اختاريتي الي بنفسي واعرف سوكهن يمشي
ياهي عجبتج اكثر شي منهن ؟ اسجلهه لاسمج؟

- كلهن حلوات تشوف الخير عليهن
ماريد سياره شسوي بيهه

- بقيها ذخر الج

- انتو ذخري

كملت اكلي وهو كالي ...
- هو كلشي عندي الج ماطول بيه نفس انتي ملكه زمانج
معارضي كلهن كدامج من ترجعين لعافيتج
روحي شغلي اي سياره تعجبج وامشي
زين بابه

حتى لتاخذين رأيي انتي التعجبج اخذيها
ورجعي اطلعي وعيشي حياتج
تره كعده الغرفه والنوم الزايد مو الج
انتي حره من يومج لاااا تخلين رجال يقيدج
ويحرمج حياتج

ارجعي مثل ماردتلج تعيشين اني لو اريد
احكمج واقفل عليج باب البيت واجبرج على عيشه وحده جان سويتها ماتصعب عليه
بس عفتج حره حتى تعيشين كل لحظه من عمرج متفوتيها
لااااا تضيعين تعبي بيج
مااسامحج اذا تنهين حياتج بين غرفتين
وانتي كل شي تملكين وكل شي تكدرين تسوين

بابه هااااي مو حياه هناا انتي ماعشتي
اني مااكرهج بعيشتج واختيارج
بس انتي بايدج الاحسن
تكدرين توصلين لارقى عيشه
وين احلامج !!! ليش اشوفج اليوم فارغه عينج !
وين راح هذاك الطموح !
نسيتي قبل تكوليلي
' بس اكبر اصير احلى صوره لحياتي '
كبرتي بابه وينها حياتج !!!
وينج ماااشوفج مثل ما ردتي تصيرين

ضليت صافنه على ثيل الحديقه بعدين كلتله ..
- نسيت يا صوره حلوه جنت اريدها

- اني ماانسى
اني عقلج ..

انتي ردتي تصيرين قويه وصاحبه عائله
و احسن زوجه وام وتبقين كل ما تكبرين تزيدين جمال واناقه

ضحكت بتعب ولميت شعري وره اذني ..
وكلتله..
- هسه لو اخلق الصحه لنفسي هم ماكدر اصير مثل ماردت

- لااا انتي اصلاً صرتي

-لااا ماصرت
كلشي جان جذبه عشتهه وضحكت على نفسي بيها
هيج ساعات احلام وصحيت منها
هاي اني هيج شكلي الحقيقي بدون
مكابره ولا مبالغه بالترتيب والاناقه ولا هذيج صوره السعاده الجنت عايشتهه
اني هيج مثل مادتشوفوني اني هيج حقيقتي
متهالكه
وكلشي اسويه هو بس قناع
وكرهت لبس الاقنعه

رفعت رجلي للكرسي لميتهن لحضني
وباوعتله ...
- بس ماتوقعتك هيج تدري باحلامي البايخه
وحافظها

ضحك وضل يتلمس بلحيته وكالي ..
- عقلنه واحد واحلامنه نفسها
اني هم حلمي بايخ مثل حلمج
بس اني محظوظ وانتي ثوله
هذا الفرق الوحيد بيناتنا

اخذ ايباده وراح جوه .. بقيت اني افرك براسي وهو رجع انطاني حبايه الدوا
وكالي ...
- وره ساعه اسبحي وانزلي هنا انتظريني
انطيج الابره
العبي رياضه هسه لتضلين خامله
نشطي جسمج

راح يخابر واني كمت اريد اتمرن شويه
بس احرك ظهري وادوخ ..
جسمي ينحل واريد بس اتمدد . .
كعدت توازنت شويه ورحت جوه
تمددت على القنفه وهو اجاني يقيس ضغطي
مره ثانيه وضل كاعد يمي يخابر جماعته
واني اشرب عصير ...

انطاني الابره بالوريد وعافني انام
اني وقتت تلفوني قبل نص ساعه من رجعه حيدار وخليته جوه راسي ونمت ..

كعدت على صوت المنبه وكمت غسلت و رحت للمطبخ .. اخذت جيس خليت بي مكعبات ثلج .. و عندي سله خوص
خليت بيهه بطلين مي وكلاص وبطل عصير برتقال و كيك و شريط بنادول و وصيت ريتا تحضر الغدا لحيدار وتصعده فوك
ورحت لغرفتي خليت السله و مشطت شعري صاير كوشه ..
كعدت اكلب بالفيس على دكتور جلديه
وهو دخل ...

دنك راسه وسلم عليه وراح للكنتور
اني ذبيت التلفون ورحت لزمت ايده
واخذته كعدته على الجربايه ..
نزعته فانيلته وجبت الثلج خليته على صدره
وهو جر نفس قوي وكالي ...

- عوفيني زين مايحركني شي
ارتاحي لتعبين نفسج وياي

خليت الجيس بايده ورحت صبيتله كلاص عصير واجيت انطيته .. هو ياخذ مني ويشربه بس عيونه مايخليهن بعيني

ضليت ابرد جسمه وبعدين نشفته وخليتله دهن
وريتا دكت الباب .. فتحتلهه واخذت منهه الصينيه خليتهه كدامه ...
ورحت غسلت ورجعتله لكيته ياكل
بسرعه وابد مارفع راسه ...
شبع وراح شال الصينيه خلاهه على الميز
و كالي ..

- شلون صرتي ؟ هم دختي اليوم ؟

-لا زينه

ضل مخلي ايده على الميز ومدنك وساكت
كلتله..
- اخذ البنادول اشربه ..
رأساً اخذ الشريط وبلع الحبايه ..

كلتله..
- تعال اكعد احجيلي شسويت على سالفتك

كعد على طرف الجربايه وكالي..
- خلصتهه
اكو ولد اربعه واحد منهم ضابط وبقيه جنود
راحو فضوهه وياهن
حاجيت الضابط هو اسمه معروف هناك عدنه
وهو تكفل بالسالفة
بس كلتله ابتزاز الكتروني اخذ الولد وتصرف وياهن
هسه هنه بالسجن اثنينهن وكلشي بيتهن تكسر
ماعدهن عشيره محد تدخل بيهن
حسب حجيه راح ياخذن اقل شي سنه بالسجن

- اي زين سويت
و الضابط عرف الابتزاز عليك
وهنه عرفن انته دازهم!

- اي الطرفين عرفو
عادي هو الضابط شغله سري وهواي يرحوله
وهنه طبعا يعرفن انه كلتلهن نهايتجن سجن
استرن على روحجن وسلمني تلفونات واكسرن الشر
وهنه يدورن مزامط براسي
انه حجيتلهن اخر مره كتنبيه وماسمعن مني بعد شسويلهن رحت بلغت الضابط ونفس الليله اعتقلوهن

باوعلي واني بس ساكته واسمعله .. كالي..
- ضوجتج بحجيي وياهن ؟ انه حاضرهن من كل برامج والسيمكارت
لا عبالج احجي وياهن بتلفون
هذاك تلفوني اخذي وتاكدي كلشي ماامسح تعرفيني اخر همي التلفون
بس هنه عدهن ستين الف حساب بالفيس
كل مره يدخلن من واحد جديد ويدزن تهديد
واشكال الحجي روحي اقريهن كل محادثات بعدهن مامسحتهن
انه علمود هالشي رحت لبيتهم وردت اصفي كلشي و وياي ولد صدكي ما رحت وحدي ولا شربت جاي ولا قطره ماي منهن

رور معليج بحجيهه لتصدكيهه انه لا مواعدهه على شي ولا واصلهه كل اسبوع
وحك عينج
وانتي احلى شي بعمري تضلين ورده مفتحه بعيني وشكد ما تكبرين وتتعبين اشوفج حلوه
معليج بحجيهه هاي تريد تحرك كلبج
وانه غلطت وخليت الماتسوى نعالج تجي تسمعج حجايه
انه اسف كل عمري اضل اعتذرلج وادري متسامحين بس ندمان وماكدر اضم الحجي بعد بكلبي واسكت واعوفج
لتهتمين بيه بس رجعي لحيلج انه مو مهم اعيش بأي شي انه ماجاي احس بشي كلشي بارد بعيني بس انتي من اشوفج نار الله كلهه تصير بيه

صفنت بوجهه وكلتله..
- مو ندمه الغزاله تطيح صيده بشبجه الصايود
لچن يالعزيز الحيف على الصايد يكع مصيود

اني انصاديت ياحيدار
الشكولات هذني جانن جوه نعالي يصيرن
بس يطلعلهن صوت
وتاليتي اتسمع حجي من انكس وحده بيهن

اني لو بحيلي الاولي جان حركتهه هي وامهه وبيتهه وابن ابوه اليفك حلكه وياي
جان حتى انته دقيقة ما خليك تكابلني بعد
بس حظكم هذا الجابكم وكت مرضي وطلعلكم صوت
حظكم الرحمكم مني

دنك راسه وضل مخلي ايده على شعره
كلتله...
- ضيعتني ورهمتلك كل اشعار عريان

ماااريد اعذبك بعتاب واحرك بروحك
بس صدكني اهنيك
انته اقوى مني
اني دنيا بحيلها ما هدمتني وانته بدقيقتين محيتني
جبااااره قوتك ياحيدار جبااره
الي يدري بيك انته الكدرتلي صدك يوكفلك متعجب
هذولاك الجانو من خزره العين يبلعون لسانهم
هسه لو يعرفون حالي الا جكليت يطشون يمك
انته كدرت على الماااااكدر فراك اهلي يسويه بيه

وكفت وخليت ايدي على وجهه وباوعت لعيونه ... كلتله...
- لتبجي ولا تعاتب نفسك بعد
اني اريدك زين وبحيلك

- ماتعوفيني ؟

- اني يمك امك بس لتدورني بغير شي

خله ايده على راسه وضل يعصر بي ..
وخرتهن وكلتله..
- اني ماجذب عليك كلبي يحبك
بس انطيك كلبي بعد لا
هذا انته تعبته واني ماعندي حيل بعد اكمل وياك بنفس التعب

حيدار اني تعبانه مرضي هد حيلي اني امشي كدامكم بس اشوف الكدامي اسود
عايشه عليك يالله
مابيه حيل بعد انطيك فرص وارجع ادور وياك احلام ورديه
اني اكتفيت بيك لهالحد بعد مااطمع بشي غير اشوفك بصحتك وحيلك

دنكت على راسه بوسته وهو حضني
ونفسه ويه جسمه يرجف ... كلتله..

- انته ما الك طلعه من البيت
هذا بيتك باسمك واحنه ضيوفك
اكعد ويه نفسك وهديها وكافي تأذي نفسك
هذا حظنا وهذا حدنا
خلينه على الايام الحلوه عايشين ولااا نخرب كلشي عشناه بالعتاب والملامه
اني مااا يحز بكلبي شي اكثر من معاتبك

وكلنه بالحب والمشاعر ضعاف
لتحس نفسك وحدك ضعيف اني اضعف الف مره منك
انته قوي اني اعترفلك انته قوي اني قست قوتك شلونهه
مو بس على هذا الصار
بس انته كدرتلي من جنت بعز حيلي
بحجايتين جنت تسيطر عليه
وقنعتني اتغير وغيرتني وحققتلي أحلامي
و عالجتني كم مره وكفتلي وداريتني
اهم شي انته خليت عندي دين اني جنت تايهه وناقصني شي بدون ماعرف ديني

هذني ماانساهن الك
اني مانكر العشره وياك
بس اريد ابقى ارتاح وانته هالمره صير بدالي وديربالك على نفسك اني تعبت بعد مابيه حيل اداريك واصير مرتك بكل مزاجك وياك
بس انته كلتلي
.
انتي امي ... واجب الام سويه وياي اعتبرني بكبرتي صرت واحتاج ارتاح ومحد يتعبني بطلباته

تلمست وجهه ومسحت دموعه .. كلتله..
- رتب لحيتك وشعرك طولان هواي
روح حلق وسوي تنظيف بشره
ولا تخلي يسويلك بالخيط انته بشرتك تتحسس بسرعه
خلي يسويلك بالشمع وهاي من يم ركبتك
من ترجع رطبها حتى لتتحسس من الحلاقه
احفظهن هذني مو الا كل مره اوصيك عليهن

حرك راسه بمعنى اي .. واني رحت اخذتله الكيكه من السله واخذتله المي
وانطيته يشرب واني افتحله الكيكه
وكلته وكلتله ..
- جنت مشتهيه اكلهه وجبتها الك بدالي اكلهه
احب اشوفك تاكل
وهاي الثلاجه متروسه اشكال الاكل
ليش متاكلك شي
متبطل طبعك الا واحد يجيبلك يلا تخلي بحلكك

ضل ساكت وياكل الكيكه... رحت فتحت القاصه بكنتوري وطلعت جيس قماش
مخيطته بي جيوب رفاع مخليه بي الذهب مقسمته حتى ميخرب ..

اخذته وفرغته كله على الفراش وهو يباوعلي
صرت اعزل كم قطعه والباقي جمعتهن سوه وكلتله...

-هذني المجموعة تاخذهن لابو صماخ
ابن عمك
هذني يطلعن بكد فلوسه الاخذتهن منه

- شمدريج هو محاجيني عليهن !!
احنه ماحجينه بتلفون لا رساله ولا صوت
شني جنتي واكفه ويانه !!!

-هاا ليش انته توكف وتحجي وياه من تروح لاهلك !!

- هو رجع يريد ياخذ بنته وضال بيت عادل كاعد شجم يوم وانه رحت لاهلي نفس الظهريه اجاني بس عرفني هناك

-هااا وشحجيتو

- هو يكلي ' خويك وخربتنا النسوان واحنه ولد دم واحد وانته العم والخال وانه لو صارلي شي منو يوكفلي غيركم وعليمن امون بس عليكم '

كلتله' انته سممتني وياهم ودم الي بيني وبينك تسمم وحرااام بعد ارجعك خيال توكف ويه خيالي '

صار عصبي ويكلي ' لااا انته شلون تصدك بيهن انه شجابني بهيج سوالف انه طالع وياك شمدريني بيهن شيسون ونسوانه ماعرفن يتصرفن وهاي سوالف النسوانً الحقد والغيره واحنه زلم شعلينه بيهن '

- اوووي خطيه فقيييير كلشي ميعرف

- حيااال كلهه علمود يكلي
' خلي نرجع نلم شملنه وانه العيشه ماطابتلي بره اريد ارجع ارتب بيت لاهلي هنا
والفات مات بعد خلي نفتح صفحه جديده
مثل ماانته رجعت ويه مرتك وسويتلك احسن بيت واستقريت انه هم اريد استقر
وخلي نتصالح ونتساعد واحنه اخوه
ويكلي
خويه لا يغرنك بحجيهن انه اريد مصلحتك وياي واهلنه سند يضلون لكبرنا سوه لازم مانتكاطع
حتى ولدنا يكبرون سوه كلب على كلب
لا تخلي فلان وعلان يخرب بينا '

عاد انه خصمتهه وياه لان لعبت نفسي من سوالفه ...كلتله..

' انته اكبر شيطان انه غفلت عنه '

وعفته وطبيت للبيت .. وثاني يوم عادل يحاجيني على فلوس حسنين يكلي
حاجاني يكول عندي فلوس يم حيدر داينته واستحي اكله يرجعهن انته حاجيه

كلت والله مانطيه فلس على شنو دافعله فلوسي على هجمان بيتي !!!

- حيدااار هذااا شيطان انته كلتها شيطان
مايسكت ويعوفك
اذا متسد حلكه يضل عينه وراك وراك
ويأذيك لو بحجايه يطلعها عليك يم اخوتك لو يسويلك دكه ناقصه مثل شكوله

- مااااعليه بي ريري انه حتى النجف صار شجم شهر ماوصلتهه من وراه لان ادري بي هناك مااروح
لزك كعدته هنا ويه كورونا بعد شيطلعه من البيت حظي حتى مطارات سدوهه وخلوه يكابلني

- هسه ديلااااا خلي يولي
هذني دزهن اله لتروح تشوفه هو فايروس بحد ذاته
دزهن اله وكوله هذني سلام من ريري
اوووكييي

- شعجب هيج انتي !
ذهبج هذا شلون تنطيه اله !!!

- اني اريد اخلص منه هذا الذهب بفلوس حرام
واني نظفت حياتي من كل شي ماريد يبقى عندي شي يبهذلني بيتي
اريد اخلص منه وخلي هو يستاهلهن
مبين من كرشه شابع حرام
اني اعرف من الوجه هذا تارس بطنه بحلال لو حرام

- هاااا
زين وانه شطبع بالج عليه اول ماشفتيني ؟

- كلت هذا ابن الماما
شجابه عليه !!

عرفتك فطير بس هم دزيت ناس وراك جابولي حياتك جرد من اول ماتصبح وتطلع تجيب الروبه لحد ماترجع من من المحل ويه صاحبك وتضل بيتك متطلع بعد
نسلك الكامل جابوه الي

- علييييج علي
يعني جنتي كلشي تعرفين عليه وبهذلتي حالي ! جا ماصدكتي بيه من احجيلج

- اي غير ضوابط الامان
همه جابولي عيشتك وعشيرتك بس ماجابولي شكو براسك
غير اعرفه منك لازم اخذ احتياطي

لفيت الذهب بوصله وشديته وخليتهه يمه
والباقي كعدت اعدل بي وهو كالي ...

- جنتي حلوه حيل اول ماشفتج
بس بيتي صرتي ايه من الجمال
انه جنت من اباوعلج يوكف تفكيري بس اركز بيج شتسوين لنفسج وهيج تصيرين احلى

ابتسمت شويه وكلتله...
- جنت احبك

اخذت نفس قوي وشلت الذهب الي بقى وخليته بايده وكلتله..
- هذني الك اني اشتريتهن من فلوسك جنت تنطيني مصرف واني اجمع لان عندي فلوس اصرفهن بس فلوسك استعز بيهن من تنطيني
اخذهن اني بعد مالبسهن
بيعهن واستفاد من فلوسهن

كمت قفلت القاصه وسديت الكنتور
وضليت لازمه الباب لان عيوني غوشت وكلشي انكلب اسود اشوفه
بقيت هادئه ومفتحه عيني بس كلشي ماركز واشوف
حسيت بايده على وجهي ..
وصار يفرك بين عيوني واني دفعته ورحت
ذبيت نفسي على الفراش ...

كعدني وانطاني عصير يشربني بايده
وبعدين تمددت ورأساً نمت ...
من اتعب هيج فجأه النوم ياخذني بس اغمض عيني ...

كعدت بالليل وشفته نايم يمي .. شفته ملبسني كل الذهب الي كلتله اخذه بيعه ...
الكلادتين الكبار والمحابس وسوار دبل
صب ..

ضحكت على شكلي .. اكعد من النوم مطنطشه ذهب ...

باوعت لنفسي بالمرايه شكلي ابد مالايك وياهن ... هذني للكاشخه الي بوجهه روح
ودم اني من دون شي صفره
وهنه مخرباتني اكثر ...

نزعتهن بس عجبني موقفه ...
حيدار مايعرف يعبر بالحجي بس تعابير وجهه ونظرته سوالفه البسيطة اليسويهن
مثل هذني
هنه محبته ...

اني من يوم حبيته اعرفه شنو طبعه
اني حبيت فطاريته بس ماظنيتهه تأذيني بيوم..
ولا بعد اعاتبه وازعل عليه ولا انتظر منه شي ... لاني صوجي اني الراهنت عليه و هذا الرهان اغلبه خساره ..

نزلت تعشيت و شفت عمي ينزل بجنطه
ويطلع يخليهن بالسياره ..
رحتله متفاجأه .. كلتله...

- وين رايح !! دتسافر ! تره كورونا وين تطلع متخاف معقول !

اخذ دبات البانزين وخلاهن بالسياره واجاني
جر ايدي بعصبيه وكالي ..

- هم فضلتيه عليه
اني التعبتلج مو هووو وهم رضيتي بي بكل خيسته بكل صلافته وياج وبكل مكسراته السواهن
واني تحاسبيني على اللاشيء

- شبيك رضا شسويت اني
ما صالحته جنت دايخه ونايمه هسه كعدت شبيك هيج هايج اعصاب هو شكوو

- شكلت اني !! مو كلتلج تختارين
اذا يبقى هو اني اطلع وانتي بقيتيه
انتي لوووو متريديه تطرديه ماااتكعدين تدارين بي هووو مو مريض ومشلول ميداري نفسه يطبه الف مرض خلي يوووولي ليش هيج لااازكه بي
لييييش تفضليه عليه

- صدك تحجي !
تره رجلي هذا دتغار منه وتعاندني بي !

اندار يباوع وراه ورجع تقرب عليه ولزم وجهي باثنين ايديه ...
- مايهمني رجلج شنو رجلج شنووو هو شنوو كدامي اااني شنووو
اني اولى منه بكل شي
لتنسين اني حبيتج قبله ودللتج قبله اني هاااااي الحجايه الي تصير الييييي
اني المفروض اصير رجلج انتي غلطتي من حلمتي بمثله
لج اني جنت بايدج كلشي اوفرلج
بيمن قصرتلج وشفتيني مو كفو اصير ابو بيتج

- رضااااا انته اهلي بس هذا نصيبي شبيك هسه صحيت ودريت بيه متزوجه ماحجيتها لعد من قبل مو كلشي احجيلك اني ليش هسه يلا بديت تغار وتضوج

- لااااا تذبيها براسي
اني حجيتلج .. ليش جديده عليج احلامي شلونهه !!!
متعرفين بيه بيتي اريده يكمل وياج
هااااي انتي مشاركتني كلشي غشيمه بيه ماتعرفيني شلون اتمناج !!!!

- بس هذا موضوع مسدود من قبل ماعرف حيدر ليش هسه ترجعنه اله

- لج اااااااني ماسديته مااسديته ماكو واحد يسد احلامه
اني تأملت بيج انتي تكبرين على ايدي وتختاريني من ذاتج ماااجبرج عليه
ليش مو اني بوكتها كلتلج
' انتي البيت والاهل انتي عيشتيني خليني أسس وياج عائله تكمل حياتنه وتحليهه '
وانتي تكليلي ' ممستعده '

عفتج براحتج كلت تكبرين وتفهمين اني انيب رجال الج
بس كسرتي كلبي من اجيتي تكليلي
' اريد اتزوج حيدر اختاريته وحبيته '
شسوي بعد افشل نفسي وياج وافتحلج الموضوع !!!!

ضليت ساكته واباوعله وهو مخنزر وكل صوت نفسه اسمعه ...
كالي...

- لج اني عقلج افهمج ميحتاج تحجيلي شي
اني ادري بيج ما قبلتي ولا فكرتي بيه
كزوج لان بنفسج تاخذين واحد عنده
عائله جبيره وتصير عندج عمه وحماة وحموين وعم وتروحين لبيت خالهم وعمهم وتعاشرين ناس يصيرولج اهل
واني كلشي اكدر اوفرلج بسسس هااااي
ماااكدرت عليهه
لان ردت الاهل منج وبيج ..
بس انتي جان بنفسج تعيشين جو العائله
وماااااا حرمتج منهه عفتج من اختاريتي
عفتج تعيشين وياهم
كلت انتي تريدين شي اني بالمليارات ماكدر اجيبه بيوم الج
وماااوكف عثره بطريقج انتي هيج تنسعدين رووحي عيشي مرتاحه وياهم

بس من غدرووووج وشفتيهم مايرهمولج ليش مافكرتي بيه !!!!!..
اني عشت وياج عمج وابوج واهلج وكلشي تحتاجي وقنعت نفسي مو كوه هي تحبك يارضا انته عمها متشوفك غير شي
بس صااااااار رجلج خاااين ومأذيج واني بمي عيني اداريج وهم مااا فكرتي بيه
واني رجعت اتأمل تحطين حد لمهزله عيشتج
واااااااااني كلت انييي اجي احاجيج مانتظرها منج
اني اكلج تطلكي واخذج اعيشج احسن من عيشته واحبج اكثر منه ومااااذيج بيوم
لااااان انتي بنتتتتي ربيتج على ايدي شلووون اذيج !!!!

ولتكليلي انته تخون وشابع بنات
اني عايش وحدي ماعليج امر عليه
صيري مرتي وخلي احس عندي بيت وعائله بركبتي ومسؤول عليهه وشوفي ياااكواد يخونج
ااااااني اقدر اقدرررر العاااائله اقدر المره الي بركبتي ااااني محروم منهه اعرف نعمتهه
ماااااخون

اني مو شهوااااني مثله
لج انتي شبيتي على ايدي تنامين بظهري
واندار اغطيج وماامد ايدي على جسمج
لج مو تتمرضين واني اسهر وياج وابدلج ملابسج وبس اني وياج بالبيت
ومااااادنت نفسي عليج وخليت شهوتي بيج
وهذااااا عاااافج مريضه وراح خااانج
لان شهواني

بس ااااني جنت اتمناج تشوفيني رجااال زيييين وتختاريني
ردتج من تكبرين وتصيرين بعمر زواج
تدورين بيتج ويااااي
عبالي تحسييين وتعوضيني

مو بس انتي تدورين اهل اااني هم محروم من كل الاهل وردتج اهلي صيريلي مره انتي اهلي لااااا كلشي تعوفيه عليه
افهمييييني مره بعمرج لا تضلين تطيعيني
لوووو مره وحده مبادرتني بكلمه جان الكلمه هاي ابنيها واسوي منها احلى بيت وزواج

بس شسووووي بيج شسوووي
ماااااتحسيييين

ضل يكح ومدنك على ركبه واني واكفه مصدومه احس جسمي ثلج
خااايفه داخسر عمي اني
اريد احجي بس ماعرف ضاع الحجي
شحجي كدام هذا كله !!

رجع وكف واخذ نفس قوي وكالي ...
- شوفي اني اسأل واجاوب نفسي لان عقلج بعقلي وافهم شدورين اجوبه

اذا تكولين ليش هسه حجيت ؟!
لان طك كلبي
كاره حيدر لدرجه اذا تغفلين عنه اموته
وكارهج هم
انتي صرتي غبيه باكثر وكت ردتج ذكيه بي

اني رايدج من قبل من اخذتج بعدج بس نايمه واراضيج بلعابات وبجايم وحلويات
من ذاك الوكت اختاريتج بعقلي
كلت هي ماعدها غيري واني وحيد
خلي تكبر واتزوجها واثنينه نسد فراغ العدنه
وكبرتي وجنت اكول هالسنه احاجيهه واكول لا بعد بلكت هالسنه هي تفكر بيه
شكد حلو لو تجي هي تكولي ااي شي يفهمني هي دتحس اني وحدي وماامن اتزوج بياهي الجان لان شايف شكو جايفه كدامي تطلع
ماكدر احب وامن بيهه بيتي
بس الي ربيتهه وبنيتي هاي تستاهل ضام كلبي بس الهه

فله اني رجلج ماشوفه الا حجاره على كلبي
من يوم ماطلع راسه بحياتنه بس تحملته
لخاطرج
كلت انتي اختاريتي ماجبرج عليه
اعوفج تمشين لنصيبج
وكلت انسسسى احلااام هي مو شرط كلشي نحلم بي نجيبه

بس هسه رجعت اتأمل بيج
عبالي تطلكين واخذج
انسيج اني انسيج كلشي عشتيه وياه
اني عقلج اعرف اوصلج
لج هذاااا نتفه كدام النسيتج اياه

لج هو عنده اهل يلفوه يكدر يعوفج ويتزوج عشره وراج عنده احتياج مره بس اني احتاجج اهل اريد استقر لج عمري جاي يمشي هيييج فارغ
هو عنده ذكريات ويه اهله عنده اخوان وام واب وخوات واني ماعندي غيرج
لج ذكرياتي كلهه وياااااج وضحيت بيهه علمودج مره
ماتكدرين تضحيلي بالثانيه !!!

كبرت فله كبرت وداحتاج استقر
اذا تكولين تعبانه ومريضه اااني ماتعاجز منج
عفت بيتي وشغلي واجيت حتى اداريج
واكدر بس تكوليلي رضا انته عيشني
اخذج انفضج من المرض والتعب والقهر نفض
لج كلشي اكدر اوفرلج كلشي عندي بس مابي قيمه لاااان مااعندي عاااااائله افيدهم بي
اااااني شبعااان فلوس و ونسه واريد استقر بيت ومره وحياه محترمه وافكر بجهال ومسؤوليه اني هاي الشغلات احلم بيهن من
عففت اهلي اني مقرر اذا يصير عندي عائله اسسها احسن من اهلي اسوي عائله مابيها نقص
وردتج بس ويااااااي احلمي حلمج وياي

فله تعبت صدقاً تعبت
لاااا اكدر امشي الموضوع عادي بعد
ولا اكدر اتحملكم سوه

جنت ساد بابج بس تمنيييت لو هاي الفرصه فرصتي وتقررين هاي المره لصالحي

طلع تلفونه وضل يباوع للشاشه وكالي..
- انتي اكو احلى منج واكو الي ماتعبني
واكو الي تدللني وتخليني بعيونهه
واكو التحترمني مثلج واكثر هم
واكو ام البيت المعدله الي تلمني وتسويلي عائله متكامله
اكو النسوان ماخلصن والي يدك باب الزين يحصل الزينه

بس ولااااا وحده عدها ذكرياتي
اني ماتعبت الهن
تعبت الج حتى اعيش وياج
اني مو صغير وهسه ابدا افكر بالزواج
اني من عرفتج بعمر الزواج
بس تأملت بيج لان طبعي وعشرتي وياج احبهه
واحب اشوف بنيتي صارت مرتي واذكرهه جنا هيج وصرنا هيج
هاي شغلات اني احبها لان من جنت اسويلج حتى الظفيره اني افكر من تكبرين وتضلين بغرفتي هم اظفرلج واذكرج جنت اسويهه الج وشعرج ناعم اشكراني انقهر من اشوفه مخربط

لو شايفتني مره وحده بعين غير الابوه جان شفتي عندي كلشي تحلمين بي
بس اني حتى من احجيلج انتي تطنشين الموضوع

هسه اني ورايه طريق واريد اعبر السيطره قبل ماتصير ازدحام ناس
راح اطلع لزاخو

اذا مثل ماكلتي بعدج ماراجعه اله
ف اكعدي فكري بحجيي
وشوكت ما تقررين خابريني واجي اخذج
بس خلي بالج اذا رجعت اخذج وانتي متطلكه
مانتظرج تتطلكين لاااا
اجي اخذج متطلكه .. مابيج ريحه حيدر ولا تسمعيني اسمه بعد
ولتكولين شلون تتقبلني وانته شايفني وياه
عايشين سوه كدامك
اني نفسي حر بيها نفسي تكدر تتقبلج
بس تطلكي و ازين شاربي اذا حسستج
ممتقبلج وممرتاح وياج

اذا تكليلي رضا تعال اني تطلكت وتندمت على اختياري هذاك و اريدك
كليلي حتى لو اختاريتك بعقلي واجيج
اخذج واني الممنون منج لان قدرتي تعبي
ومتعوفيني اكمل حياتي وحدي

واذا قفلتي على طيحان حظج هذا
فلا تخابريني بعد
لان اني مو عديم احساس
وياج اني من تقدريني بس من تفضلين احد عليه بعد انتي متحتاجيني واني مااذل نفسي الج
هي قناعه اذا ماقتنعتي بيه اني عايفج حره
عيشي وياه وشسوين سوي

فتح باب الشارع شويه وصاحلي ..
- روحي جوه يلا راح اطلع

ردت اروح وكلشي بيه موكفني
رضا غالي عليه خاطره مكسور وديحز بكلبي

هو صعد سيارته واني رحت من يم الجامه
كلتله..

- رضا تعوفني !!! تعوفني وتروح !

لبس جفوفه وكالي ..
- انتي مفكره تعوفيني وماانتظرهه تطلع من حلكج يلا احس على نفسي
تريديني رتبيلي حياتج وتلكيني راجعلج
وجايبلج جنة الدنيا وياي

شغل سيارته وطلع وحتى مانزل وسد الباب
عافهه مفتوحه وبس صوت سيارته ينسمع من بعيد صار ...

مشيت تعبانه واحس روحي راح اوكع
بس سديت الباب كعدت بالكاع
ابجي ولازمه راسي
ماااريد اخسره هو كلشي بقالي ..

بقيت على كعدتي واتذكر ..
شلون اول ايامي وياه من كالي اسويلج بيت

كعدني بيت صغير مابيه بس غرفه وحده ومطبخ وحمام والبيت تعبان وكهرباء مابيه
نكعد بالليل على ضوا ' لاله ' نتعشى اي شي هو يدبره ويضل يسولفلي على مخططاته
وشلون بعدين يجيبلي بيت اكبر من هذا
ويصير عدنا كهرباء ويكولي بس ارتب
شغلي شويه اصفي بالي واكعد اعلمج كلشي بالدنيا
اعلمج احسن من المدرسه ...

يطلع الصبح ويقفل الباب عليه وينطيني ملابسه يكولي تعلمي اغسليهن وشريهن
واضل اني اغسل بيهن وامسح البيت
واكعد العب باللعابات واحاجيهن وحدي
بالبيت واشكال احجي

لحد مايرجع هو وجايب الغدا وياه
ناكل وهو ينام وهم يطلع العصر ومايرجع لليل ...
جان يشتغل ' بعلوه جميله ' حمال ...
يخليني بالليل ادوس على ظهره وافركله
لحد ماينام ...

وبيوم رجعلي كله دم وتراب واني شفته هيج ركضتله ابجي وهو هم كعد يبجي وحاضني
يكولي ' صار انفجار '
ويبجي على الناس الماتت كدام عينه
وبقى يومين هو ساكت بس يسويلي اكل ويضل يدخن جكاير وصافن ..

اني ماعرف اواسيه ولا افيده بشي
بس اضل افتح وياه سوالف هو يجاوبني من وره خشمه ويطلع يكعد بره

ومن وحده رجع زين وكالي ..
' راح نغير بيتنا '

فرحت كلت صارت عنده فلوس واشتغل
وراح نعيش مرتاحين ...
وهو اخذني بشقه وصار يطلع يوميه بالليل كاشخ ومتعطر ويقفل الباب عليه ويروح
من اكعد الصبح الكاه واكف يسوي ريوك
نتريك وهو يكولي راح انام كعديني من تضوجين وتريدين شي ..

واني ماكعده بس اضل اباوع تلفزيون
ونهاري كله على سبيستون ...

صرت اسأله وين تروح ليش متاخذني وياك ؟
يكولي بعدين تكبرين واخذج
وبقيت من الضوجه اكوله انطيني شي اتعلمه واسويه هنا
وهو صار يعلمني احسب رياضيات
كل يوم ينطيني درس احفظه واكتبه وبالليل هو يشوفه ويصححه
وصار يعلمني احسب فلوس
يخلي كدامي فلوس بعلاكه ويكولي
' رتبيهن وحسبيهن شكد يصيرن '

وصرت احسب واقسمهن وهو يكولي شكد تريدين اخذي منهن
ومااخذ ولا مره اخذت منهن الف واحد
اكوله
' اني ماتعب بيهن انته دتتعب هنه الك '

وكبرت طولت شويه وسمنت صار هو يكولي ..
' لازم تتعلمين الدنيا هسه بس لازم تشوفيني انتي قويه يلا اطلعج منا '
كلتله ' شلون هيج '
كالي ' ضحي بشي تحبيه واذا راح تبجين عليه حتى اشوفج قويه وتسكتين ماتهتمين من يروح '
واني هنا ضحيت ' بشعري '
' جان اشكر وكلش طويل يوصل جوه ركبتي وكصيته بايدي لحد الجتف ...
وهو اخذ المكص و كصره الي اكثر
سواه ' ولادي '

وصار يلبسني عريض .. بنطرون كابوي
وقميص عريض ومحلو فوكاه ..
وياخذني وره مانتريك الصبح نطلع للشارع
نفتر ويعلمني
' على الطرق ' كل شارع وين يودي ومنين اصعد اذا اريد اروح لهذا المكان
وشلون ارجع لشقتنه
وكل بغداد دلاني عليهه شارع شارع

صار ياخذني لبيت بي بنات هواي من اشوفهن اضوج واتذكر هذنيج واريد اطلع منا وهو ميقبل ... يصير عصبي عليه الا ابقى
كاعده هنا واسمعهن شيحجن واحفظ حجيهن

يعوفني يمهن ويطلع واضل اني بس كاعده اباوعلهن وهنه صوتهن عالي و وكحات
كل شويه متعاركات
ولبسهن محلو ... كله كصير وضيك وجسمهن سمين محلو
ويكعدن يخابرن بالتلفونات ويتمضحكن
وبالهن ابد مو وياي
حتى كلاص مي ماينطني

اضل كاعده هيج لحد ما رضا يرجع وياخذني
ويسألني بالطريق
شيحجن البنات ... واحجيله مرات ومرات اضوج ماريد احجي ولا ابقى هناك
وهو يصير عصبي ويرزلني ويزعل مني لان ماسمع كلامه

وخلاني اضل اتعلم كل حجيهن
وصار ياخذني يم ولد بعمري واصغر مني
بالشارع ملتمين ويسويله حرشه وياهم ويكولي ' روحي دافعيلي واتعاركي وياهم '
واروح اتعارك واضل اصيح واغلط مثل هذنيج البنات
وحتى ضرب اضربهم للجهال وهو يوكف يباوعلي ميتدخل حتى لو اني هم انضرب
ميتدخل الا بنفسي ادافع عن نفسي واكمل العركه واروحله يلا ياخذ ايدي ونرجع وهو يضحك واني ابجي ....

ويمشي ياخذني للسوك يكعدني يم ام بسطيه
تبيع مخضر ... ويكولي احسبي وياهه شلون تبيع وشلون تجمع فلوسهه وشكد سعر البسطه كلهه وشكد تستفاد من تبيع ..
ويروح ... وهاي ام البسطيه كل شويه
شايله التفاحه منطيتني والخياره والموزايه
واني اسألهه وهي تكولي
كل صندوك شكد سعره اليوم
واني اضل احسب واكوللهه ' صح هيج يطلعن كلهن ' اذا اي اركز وياهه بالباقي واذا لا ارجع اعيد واحسب ..
ومن يجي هو هم احجيله كل العرفته

صار يكولي ' ركزي باشكال الناس اريدج تكومين تعرفين يا هو اليجي يتسوك وشايل فلوس هواي وياهو العنده قليل وفقير ياخذ بس كيلو ويطلع '
.
وصرت اضل كاعده عيني مركزه بس على الناس اراقب كل حركتهم .. ايدهم على فلوسهم صرت افهم من حركه اصابعهم
شكد عدهم تقريبا ..
واحجي لام البسطه اكوللها هذا هيج اتوقعه
وهي تصححلي وتحجيلي شلون افهم من الشكول ياهو الغني والبخيل والي يبذر
وياهو الي مبين عنده عزيمه والي بس جاي يتسوك لغده والعامل والمعلم والي مستلم راتب هستوه وكلهم صارت واحد واحد
تصنفه الي ..
.
وكل ما رضا يشوفني اعرف الناس اكثر يفرح بيه اكثر ويجيبلي اشكال الالعاب والعطور والاحذيه واذا اختبرني فد مره على واحد يحدده هيج واحنه ماشين وكدرت اتوقعه
شنو صنفه .. ياخذني بمطعم ينزلي بس حلويات كل اليعجبني يطلبه الي واكل براحتي
لان ركزت صح ...

صار هذا الشي طبع بيه ماامشي من بين مجموعه ناس الا اركز حتى على رفعه الحاجب وحركه الايد والوكفه ونبره الصوت
اركزلهه ٣ دقايق من تتغير بالكلام نبره الصوت مرتين يعني ديجذب

صرت وكحه وصوتي عالي ومااحترم بالدنيا بس رضا و مااثق بس برضا ..
بس ماجنت ادري اني وين داامشي واتحضر عقليًا لاي عالم !!!
مادري هو ديرتب شخصيتي حتى اشاركه فكره شغل جان يجمع فلوس حتى يأسسهه
بنص عالم السكارى والبيع والشرى بالاجساد

من عرفته مشتري الملهى انهاريت باعصابي وياه ... اني اكره هذاك المكان وهذوله الناس
شلون هو يصير منهم وياخذني هناك !!!

وهو جان هااادىء وسيطر على عصبيتي
وحجالي ..
' العالم الزين الي تشوفيه هذا خيال ماكو بعد هيج عالم واخذج اعيشج بي
الغدر بكل مكان .. المكان الي بي سمعه حلوه وناس تشوفيهم زينين هذوله يغدروج
بس من تعاشرين الي سوالفه الموزينه كلهه واضحه كدام عينج هذا مايغدرج

هنا اني أمن عليج .. اكعدي يم سكير ولا تكعدين يم ابو عمامه
هناك اخاف عليج هذولاك ناس دغش
هذوله ناس واضحين معروفه غايتهم
وانتي عرفتيهم
تسيطرين ومحد يغلبج بس هذولاك يغلبوج
لان مغطين نفسهم باشكال لو اعلمج ستين سنه عليهم ماتكدرين تحفظيها

كالي ..
اني اليوم وياج بس ساعه الساعه اختفي
يجوز انقتل لو انسجن لو اضطر اسافر
وماكدر بكل شي اخذج وياي
اريدج تتعلمين تحمين نفسج بنفسج وتصنعين لنفسج سلطه وجاه وتتمكنين مادياً حتى تعيشين
..
بغير عالم السلطه و حقاره الناس الواضحه والمنافسه على المصالح ماتكدرين تبنين نفسج
..
الدنيا ملكج هنا بس بغير مكان انتي عبده الها والعبد مذلول
..
هنا ابقي وياي واني اوصلج لاعلى مستوى وشوكت ماتتمكنين وتخلين الدنيا محبس باصبعج
اطلعج منا وعيشي الي يعجبج '

اني اقتنع بكلامه مهما يكون لان هو اكبر وادرى مني بالدنيا شلونهه وهو ادرى بمصلحتي ...
ومشيت وياه على طريق خططه
صار يكعدني وياه بطاوله ويكولي
' انتي هنا المالكه وكل الي واكفين وكاعدين خدم عندج .. لا تخافين منهم هذوله مايوصلوج لان انتي اعلى منهم '

وكل يوم يعرفني على جماعه جديده وبنبره صوته صرت افهم هذا الي ديحجيلي ويعرفني عليه يعني يريدني اركز بي واحفظه بالي

ويوم عن يوم كبرت معرفتي بالناس وكثرت سفراتي وحفلاتي وصرت غنية بس بتعب وتركيز ...
سوالي البيت الوعدني بي واشترالي من كل شي احسنه
وخادمه خلالي وماتعبت ولا احتاريت بشغل البيت
كاعده بس ادلل نفسي وشغلي كله بس دلال وعنايه بنفسي وتشغيل عقل

وهو من وحده اجاني بيوم وكالي ...
' جان عدنا ثار واخذناه
انتقمتلج منهم واحد واحد
عيشي مرتاحه البال وسامحيني لان عفتج ومادورت عليج '

هو كتل رجل عمته وكتل البنيه صاحبته هذيج
وكتل الولد الجان وياهه والسبب الخلاه يكتلهم
' لان يحس بنفسه مادافعلي واني جنت بامانته وغدروني اهله وبنص بيته باعوني '
..
عرفت بي هنا هو جان يفكر ويخطط كل هاي الفتره حتى يحصل نفوذ ومعارف وفلوس
وينتقم منهم بدون مايأثر عليه بشي ..

وراهه اقتنع ياخذنيي واعرف خوالي
واخذلي امي من عيونهم وجابهه لبيتنه
وهو سعى وياي بعلاجهه
وعلمني شلون اسيطر على الناس بفلوسي
واجيب اي خدمه احتاجها من اي واحد

.. من انقهر واشوف اكو بنات يتزوجون ويطلعون ويه اهلهم سفرات واعياد يحتفلون سوه وعدهم جهال
اكول اني مستحيل اعيش هيج مثلهن
لان اني مو زينه بعد صرت
كلشي جان حلو بيه راح ..
هو دائمآ يكولي ...
' انتي احسن بنيه وداخلج زين انتي بعدج زينه بس شخصيتج ضامتهه لان انتي محافظه عليهه مو لان تغيرتي وهذيج راحت '

ومن اسأله ' ليش احنه نسوي شي مانحبه ونجذب احنه مو زينين '
يكولي ..
' الناس تحب تاخذ كلشي حلو
الشي الوصخ والمكشوف محد يوصله
هيج خلينه محد يندك بينه لان ميحبونه '

جان يخلني البس براحتي واحجي باسوء الالفاظ واصير همجيه و وكحه ويه اليحاجيني
حتى ... يضوجون مني ويشوفوني وحده بايعه ومخلصه وبس يريدون يوخون مني خاف اوكعهم بمشاكل ...
.
هيج حماني بهمجيتي وصلافتي ووصاخه لساني بين الناس
ابد ما وكف بسدي وغطاني من عيون الناس
عافني امشي بزودي بينهم بس شحده الي يطخ شعره مني اندمه ساعه الوكف بيهه كبالي
.

شاف بيتي القديم معروض للبيع واشتراه الي
كالي هذا تعويضج مني على الصارلج وتعبتج بي وغيرتج من وراه ..

انطاني بيت اهلي واني جنت زعلانه وياه
بس هو بقى يدور راحتي
زعلت عليه لان اذاني من طردني
اني مأساتي ارجع بالشارع وحدي
وهو بايده جرني وطلعني ونبذني بليله ظلمه
وعافني وحدي بشارع ارجع مادري شسوي وابقى بفراغ
هذا الشعور ما غفرتله عليه لان هو يعرف اكثر اذيتي بي

ويه الوكت سامحت بس اختاريت اعيش بدون ماحتاجه حتى لاا انكسر من جديد
وهم عافني براحتي

كلشي هو يعوفني براحتي بس المهم اني بامان ..
حتى اليوم عافني براحتي ابقى ويه رجلي الي كل اذيتي منه بس لان اني ردت ابقى ..

هذا رضا الي راح اخسره واخسر كل عمري الفات وياه ...

على هذا الخوف و وجع الكلب وكثره التفكير بي ... وكعت وسيطر عليه التعب ...
بقيت ايام اني بس نايمه وبايدي المغذي والابر
وحيدار عايف دوامه وباقي وياي

يريد يعرف شبيه ! شيوجعني !
ماعرف شحجيله ...
اني دتأذيني نفسي ... من صغيره جنت مدللـه عمها وهسه مدللته بقت وحدهه خسرانته ..

جان هو الي مقرره ابقى عايشه وياه وره ما خذلني حيدر وخسرت زواجي وهسه بين حدين عافني
لو تصيرلي مره لو ماتلكيني عندج ...

يعني ضليت لا حضيت بعمي وحضيت برجلي ...
رجعت وحدي بعمق روحي اني وحدي
وجود حيدر بعد مايفيدني بشي هو كسر نفسه بيه ..
هو حتى لنفسه مايكدر يوكف ويحسس نفسه هو مو وحيد شلون يكدر عليه بعد !!!

وره اسبوعين صرت شويه احسن بيه حيل اكوم وامشي ...
واني كل هاي الايام مااحجي بس نايمه واذا حيدر طلع اكعد الزم تلفوني والهي نفسي
وهو يرجع اني انام واعوفه ...

من رجعت لحيلي كمت رحت للحديقه
عجبني اسوي جو خاص لنفسي واعتزل بي
تعبت من الغرفه ..

حيدر جان جوه كاعد صحتله واجاني كالي..
- ها حبيبي كولي

- اريد تغيرلي الحديقه
تسويلي مظله مشبكه تخليني اشتم هوا بس تقللي شمس
واريد هنا تجيبلي نافوره جبيره كون اسمع صوت المي شلون ينزل بيها
وتدبرلي كرسي مريح اكدر اتمدد عليه كل اليوم
وسندانه جبيره ورد ابيض واحمر اريدهه اكبر حجم تخليهه يم النافورة مقابيل عيني اريد اشوفهه كل يوم

- صار بس ينفتح الحضر اغيرلج الحديقه كلهه

ضليت ساكته واتخيل شكلها شلون تطلع
وبعدين رجعت لمكاني تمددت وضليت مخليه سماعات باذاني ..

بنفس هاي الليله دخلت مستشفى لان حالتي انتكست ورجعت اتخربط ومااصحى الا وره يومين ...
اني بالمستشفى احاجيهم وافهم من الدكتور على حالتي بس يعوفوني انام بعد مااكعد الا وره يومين
او اقل شي اذا نمت مثلا الظهر اصحى ثاني يوم العصر او بالليل

مشت عليه اسابيع اني مادري شكد داعبر ايام بيها نايمه ...
ونومي مو من مسكن علاج همه كطعو عليه العلاج اصلا بس هذا هو الخلل بالانزيمات الصار عندي وصلني لهيج حاله ...

وهنا وصلت للجزء الثاني من المرحله الرابعه بالتليف ... الي هو بداية نهايتي ..

الاطباء انطوني مهله ٧ شهور اكدر اسوي بيها تبديل للكبد واعيش على علاج شهري منتظم يعبرني مرحله الخطر ...
بس بعد ماتخلص ٧ شهور ماكو داعي احاول بأي شي واتعب نفسي ..

طلعت للبيت وشفت الحديقه مثل ما ردتها
نافوره جانبيه وكرسي طويل ويتحرك شلون مايعجبني اسويه وطبله زجاجيه على اليسره
وسندانه الورد يم رجلي تصير .. وسقيفه خشبيه وبيهه مظله اتحكم بيها بريمونت

كلتله ' شكراً ' هاي الكلمه حجيتها اله من بعد اسابيع اني اسمع منه بس ما اردله حجايه

قبل مااحول كعدتي هناك صرت انام بالصاله
وانتبه على وضع حيدر ...

هو محلق شعره شبه الصفر ولحيته هم خفيفه حيل ... وجهه مابي روح .. وما يوصلني
يحاجيني من بعيد على كد الدوا او محتاجه شي راح اطلع
.
اذا يطلع لدوامه لبسه عادي راحت كشخته
ومن يرجع يضل بس كاعد خاف احتاج شي
باله يمي بس مايوصلني ..
.
حسيت عليه بعده بعذابه النفسي

وصيت ريتا تسويله جدر دولمه صغير
وتكثر بيهه حامض وسلك وتخلي يتغدا بيها
حيدر مااا ياكل الدولمه ابد مايحبها
وحيل يتأذى اذا اكلهه
ردت اشوفه يهتم اذا خليناهه اله غدا لو لا ؟

جابتله الدولمه وهو ماحجى شي ولا بين عليه رد فعل هو ماراغبهه
صار ياكلهه بالخاشوكه بسرعه بسرعه حتى ماعتقد يلحك يهضمها بحلكه
ياكل لكمه ويشرب مي وراهه
وخلص الماعون واخذ الصينيه
ورجع كعد يلعب ببجي ...

عيني عليه وما طول ربع ساعه وصار يلوب
اعرفه معدته تتأذى منها وهو عنده استعدادقبل
يضل جوعان اليوم كله ولا ياكل دولمه

بس هنا تأكدت هو كلشي مايحس بعد
ولا يدور الزين لنفسه ... ادري بي ديعيش عذاب نفسي على كل الحال الوصلناه

شمرتله شريط مال معده وهو مااخذه راح
تقيء كل الاكله وصعد لغرفته ...
من وحده نزل واخذ الحبايه واخذله شراب مال كافسكون يلا استقرت حالته ...

ضليت افكر بحل لوضعه وحاجيته
كلتله ..
- حيدار روح عيش حياتك لتنهيها بيه
اني اذا طولت لنهايه السنه عايشه يجوز سنه الثانيه ماتلكاني
لتضيع عمرك وياي بعدك بشبابك وبحيلك
روح تزوج واسس حياه جديده
صدكني مازعل عليك

هو ضحك وكالي...
- انه روحي ماحاملها وتريدين ادور حياه جديده ! هو هاي واحسبلها ساعات شوكت تخلص وارتاح

- اذا تريد تموت روح شوفلك سبب عيش عليه وشوف الموت شلون يركضلك ركض
الموت عمره مادك باب الميتين هو يدور بس على اليريدون يعيشون حتى يشوفوهم الموت شلونه

اذا تضل هيج تبقى ميه سنه بنفس عذابك كلشي ميتغير بيك

ضل ساكت واني رحت كعدت بالحديقه
اسمع صوت المي بالنافوره واباوع للورد
وصرت اخاف انعس وانام وتاخذني النومه
ايام تضيع بيهه حساب عمري

يجيني حيدر يكولي
' رضا حجزلج بلبنان على العمليه لازم نتحضر للسفر هذا الشهر نروح '

واني خصمتهه وياهم بحجايه..
' عوفوني ارتاح جسمي مابي حيل عمليات بعد '

كل ما يرجع يحاجيني اردله بنفس الحجايه
الى ان سد الموضوع

رضا من يوم الطلع منا بعد ما سمعت صوته
بس هو حيدر مراسله وشارحله حالتي
وهو ساعي بتحضير العمليه

مااعرف ليش مارجع ولا خابرني ولا اعترض على قراري برفض العمليه !
مادري اذا هو متأمل بيه شي ماعرفه
او فقد الامل بيه وعافني !

هواي هذا السؤال يجي بالي وماعرفله جواب
وحتى حيدر اسأل نفسي
' ليش ما قسيت عليه ! ليش عاملته كأنه هو وحده المريض مو اني الي باقيلي شعرايتين واموت ! '

كل الي اعرفه اني بطلت اخذ حقي بايدي
من يوم ماتيقنت اكو رب ياخذ الحقوق
ويردها لاصحابها
جنت ماعرف الرب وكلشي اسوي بنفسي
ماتوكلت على احد
بس هسه اني مرتاحه لان عندي رب اتوكل عليه واسلمه كل كسره كلبي وهو ياخذ الحق

عشت ايامي وحدي ويه كانيور ونافورتي
و ورداتي والسمه والعود العراقي و ايهاب وعريان و صديق قائمتي الجديد
' عمر | نغمه وتر '

حيدر بقى بس بذاكرتي وجوده يمي بدون احساس بس مجرد شخص يهتم لعلاجي وطلبات البيت
حتى حجي مابينا ....
يجي العيد هو يطلع الصبح لاهله واني نايمه
اكعد الكاه دازلي ..
صوره معايده واني هم ادزله مثلهه
وادز لرضا ..
رضا ميرد عليهه
حيدر يردهه بمعايده ثانيه بشعر واني اشوف ومااردله شي

يمشي العيد والي وراه واني مكاني الحديقه
اتحرك منا بس بالليل اروح للصاله انام
وكل الايام نفس المنوال ...

ماانتظر شي
ولا اترجى شي من احد
اقتنعت
' ان الناجي الوحيد .. يبقى وحيداً '

ومرت ثلاث شهور من السبعه الباقيه لعمري
المريح ..

وحيدر اجاني العصريه كعد بالكاع ومرتجي على الكرسي .. واني متمدده عليه ..

كالي ...
- لا تخسرين عمرج لان ايستي مني
وتعبتج
سوي العمليه وارجعي لحيلج وانه اخلصج
مني وماغثج بعد
وانتي عيشي شلون مايعجبج بس صيري زينه
فدوه اروحلج لاتضيعين الوكت

ضليت ساكته وهو كالي ...
- بعدني ندمان على ساعه الغيرت رأيي بيها ومااجرت بيت بغداد واخذتج تكملين حملج وتجيبين هنا

وبعدني ندمان لان ماهتميت من جنتي تخابريني وتكليلي مريضه
ياريتني بذاك اليوم متت واني بطريقي راجعلج ولا باقي واكف بمكاني وعايفج
تتأذين

واليوم انه اكثر ندمي على هذيج بجيتج
دخلتج غيبوبه من وره قهري وحبي الي بس اذيتج بي
جنتي احلى من هذا الورد المفتح وانه
مابقيت بيج حتى لون

ياريتني اعيش مركع جلد واخلص من كره جسمي يمكن بساعتهه اتجرأ اكلج سامحيني
و خليني ارجع حبيبج

ريري انه ادري الندم خط النهايه
بس انه اريدج تبدين تعيشين من جديد
بدوني
انتي تكدرين بدوني احسن عيشه تصيرلج
وانه والله افرح ويخف عذابي بس لو اشوفج رجعتي تمشين وتلسبين اليعجبج وتطلعين
حتى لو بس اسمع صوتج وهوستج
من بعيد والله انسعد واكدر اعيش
بس هيج انه جاي اموت مرتين
مره عليج و مره بندمي

انه ماريد شي الي بس اجيت احاجيج
اريدج توافقين على العمليه مابقى وكت وتجازفين بي

- عوفني اني مرتاحه هيج

- زين خلي اخذج تغيرين جو
اسبوع لو عشره ايام
اخذج لسليمانيه للمزارع هناك شفت عارضين بيت ايجار بمزرعه والمنظر بديع
اخذج تونسي بالطبيعه وعيدي تفكيرج
واذا اقتنعتي مناك نطلع لبنان

كل فلوس العمليه محضرها وحتى جوازج
جددت صلاحيته والدكتور متواصل وياه
وكلشي محضرلج بس كولي اي

جريت الغطى الخفيف على صدري
ونزلت جسمي اكثر حتى انام
وخصمت الحجي وياه ب ...

' Don't you try and help me cause I know only time can heal but it running out '

( لاتحاول ان تساعدني لاني اعلم فقط الوقت بأمكانه الشفاء .. لكنه يـنـفـذ .)

........... النهايه .........