رواية ماء مغلي الفصل السابع والستون 67 - بقلم Zoka 🌷

..♣️🩸 ماء مغلي 🩸♣️..
* adzzon *

نهاية شهر الثامن ٢٠٠٤ ...

عيوني مغوشه من البجي وسمعت صوت
رضا ... يكولي ..
' شجااااابج هناااا شجاابج ليش تعوفيني وتجين للخيس برجليج شمسووووويه برووووحج '

هجمت عليه ضربته على بطنه وضليت مدنكه وعاصره ايدي واعيط عليه وهو يلزم جتفي وادفعه واعيط اكثر ...

لزم وجهي باثنين ايديه ويحاجيني واني بس ابجي واضرب بي .. صرت احس برجليه متنكعه .. باوعت عليهه من ركبتي وجوه كلها دم ...
كعدت رأساً وضليت حاصره رجليه  و ابجي
و مستحيه من نفسي وشكلي هيج
بقيت مدنكه راسي ومخليه ايدي على رجليه
حاصرتهن لجسمي ...

رضا ضل يصيح ويفشر و دنك عليه شالني
واخذني لسياره بقى مكعدني بحضنه واني بس ارجف وهو مخلي ايده على راسي
ويباوعلي يمسح بوجهي واني ارجع ابجي

دخلني للمستشفى واني شفت الدكاتره وهوسه الناس هنا كمت اعيط واضرب بي اريده يطلعني منا ... وماكدر احجي صوتي مطبك وبلاعيمي توجعني .. بس البجي  عندي
وهو يصيح عليه حتى اسكت ...

ونومني على السديه واني ضليت ساده عيوني بايدي وابجي ..
ضربني على وجهي بكل قوته وكالي ..
- لاا بجي ولا صوت اسمع
..
ضل مخنزر عليه واني عيني بعينه
' ليش تضربني ' ضلت بالي هاي الحجايه اريد احجيهه اله وماكدر ..
رهبة الموقف وتعبي وبلاعيمي كلها تجمعت وخلتني ساكته..

اجتي دكتوره وهو يحجي وياهه بعدين
كعد يمي وحصر راسي على جسمه وايده على عيوني ....
والدكتوره  تشيل ملابسي وتفحص بجسمي
وره شويه هو وخر مني واجتي دكتوره
تحجي وياي وتعدل بشعري واخذتني للحمام ...

وحده وياهه صارت تسبحني .. تفرك جسمي
و وجهي وغسلت شعري وتحجي وياي تسألني شسمي وبيا صف ؟ واني ساكته كلشي مااحجي ...
صارت تكولي ..
' انتي كبرتي هسه مو جاهله ولتخافين من الدم هو كل احنه البنات هيج يصيرلنه من نكبر وهسه تصيرين زينه وتكبرين تصيرين احلى بنيه شابه '
لبستني لبس مال مستشفى  وطلعتني هي
لازمه ايدي ونمشي ...

شفت رضا واكف ينتظرني .. و اجاني لزم ايدي واخذني لغير غرفه ونومني وغطاني وضل يمي يكولي ...
- شيوجعج ؟
..
ماحجيت .. حاول وياي هواي واني ساكته
راح هو وجاب دكتور وهم ضل يفحصني
بلاعيمي واذاني وصدري وبعدين ضلو يضربوني ابر واني ماابجي بس ساكته
واباوعلهم وهمه يضحكون بوجهي

راحو كلهم وبقى بس رضا يلف شعري بالخاولي ويخلي البطانية من يم اذني وركبتي
واني نمت وكعدت بطني توجعني وابجي
وهو مموجود..

بقيت متغطيه بالبطانية وابجي لحد ما دكتوره اجتني وكعدت تحجي وياي واني بس كلتلهه
' بطني توجعني '
اخذتني للحمام وهي تغسلي وتعتني بيه وتسولف وياي تعلمني شلون اسوي كلشي وحدي بعدين ..
وضربتني ابره كلتلي مال بطن وراحت

هواي انتظرت رضا و ما رجع وخفت اني رجعت وحدي بين الناس مادري شسوي وشنو عيشتي ! رجعت ابجي واتلمس مكان الابره بايدي ...
واغطي براسي واكمل بجيتي جوه البطانية
وساعات تمشي واني بين اباوع للباب وبين
اغطي راسي وابجي ..

سمعت صوته يمي يكولي ..
' فله جوعانه ؟ جبتلج كباب تحبين كباب الشوي ؟ '

رفعت البطانيه من وجهي وباوعتله
جان يفتح بالعلاكه ويباوعلي ..
رأساً عافهه وكعد يمي ...
يكولي
'ليش تبجين ! '

درت وجهي وضليت امسح بعيوني
وهو انطاني لفه واني ارجع بايده
جر ايدي وكعدني واني ما اباوعله
يكولي
' لا تزعلين مني فله ضربتج لان تعبتيني واني باعصابي جنت خايف عليج '

بقيت اشهك وابجي وما اباوعله وهو عافني
رجعت نمت وغطيت راسي .. وهو مره يحاجيني ومره يعوفني ...

اجتي دكتوره وضلت تحجي عليه وتنصح بيه
وكعدتني خلتني اكل وهو واكف يمي
بلاعيمي توجعني ضجت من الاكل وعفته
ودكتوره كعدت يمي تكولي
'  اسألج وانتي فهميني اي لو لا '

جانت لازمه ايدي وتكولي..
' اكو واحد ضربج ابره بالشارع ؟'
حركت راسي بمعنى ' لا '
سألتني بعد ..
' واحد شربج كلاص مو طيب لو حباية  دوا '
أشرتلهه ' اي '
هي باوعت لعمي وهو  لام ايده
وعاض اصبعه ويباوعلنه ....
كلتلي ..
' ولد لو بنيه شربج '
كلتلهه ..
' بنيه '
كلتلي ..
' لزمج ولد  لعب بجسمج  ؟ '
..
ضليت احرك راسي ' اي ' وبجيت ورجعت تمددت وغطيت  وجهي ... بعد ما حجيت وياهم شي ولا طلعت راسي من جوه البطانيه

الوكت الي مشى كله بجي وسكوت ..
رضا جابلي .. بجامه وخلاهه يم ايدي
ويكولي..
' مو تحبين الوردي البسيهه حلوه تطلع عليج '
ما حجيت وياه ولا لزمتهه للبجامه ..
جابلي قراصات بيض لاستيك ام البطه .. 
يكعد وره ظهري ويلم شعري ويضفره ويشده بهاي القراصه ويخلي ضفيرتي صفح على جتفي ..

اني انام وهو يبقى كاعد كل ماافز الكاه يباوعلي ويعض بايده ..
من الصبح اجاني وياه دكتوره ورادت ترفع ملابسي كدامه ماخليتهه وضليت ابجي
واعيط وهو راح ..
بنيه لازمتني من ايدي ودكتوره تفحصني
واني اباوعلهم وابجي ...

عافوني وراحو ورجعت تغطيت واعدل بملابسي وبس اشهك وبصدري احس اكو
شي يطبك بنصين صدري سوه ويخلي حتى الشهكه ما تطلع براحه من الصدر ..

جنت منداره ومغطيه راسي ورضا كعد يمي وشال الغطى وجر ايدي يبوسهه ويبوس راسي وضل حاضني ويبجي ..
يكولي ..
' شكد داريتج وعفتيني ليش عفتيني  ! ليش رحتيلههههههههم ليييييش ولجججج ليييش تطلعين وحدج '

دفعته ورجع كلشي بعيوني وصرت ماعرف اعيط لو اضرب بي لو ادفر برجلي
فقدت وهو يحضن بيه واني اخرمش بي بجتفه وايده ...
وهو لزم جتفي وحط ايده بحلكي
ويكولي
'عضيهه يلا بكل قوتج لتبجين يلا عضي ايدي حيييل شبيج اعصاب طلعيهه هنا '
..
عضيتهه لحد ما حسيت سنوني راح يطبكن واحد على الثاني بنص ايده ...

وخرت وهو لزم ايده ويباوعلي كالي ..
' قويه عضتج مثلي '

حسيت شي فرغ بداخلي وهديت ..
هو يفرك بايده واني كلتله ..
' رضااا '
باوعلي وكالي ..
' بس لتبجين شتردين  احجي '
ويه الشهكه كلتله...
' اريد اروح لبيتنا  '
بجيت وفركت  عيوني حيل ..

وهو حضني على صدره ويكولي...
' يمي ترتاحين ؟ كوليلي فله ترتاح من رضا موجود ؟ '
كلتله..
' اييي '
لزم ايدي وباوعلي ..
' نسوي بيت وحدنا '

جريت ايدي منه وبجيت ...
' اريد بيتنا بيتنااااا  ماريد بيتكم
اريد بيت بابا اخذني هناك '

مسح دموعي ويكولي ..
' كعدو بي غير ناس بعد متكدرين ترجعين هناك '
بجيت وضربت على راسي واني اكوله..
' ليش ما عندي ييت ! كلكم عدكم بيت
انييييي ليش ياخذون بيتي !!!
ليشششش ياخذون بابا والبيت واني كلشي ميبقولييييييي  !!!! '

جنت اعت بفنايلته وابجي وهو يلزم ايدي اثنين ويخليهه على وجهه ويكولي ..
' اني هم ماعندي بيت .. نسوي بيت
اني وياج نكعد مرتاحين .. اني اجيبلج بيت وغرفه وغراض وملابس وكلشي تريدي '
..
اخذت نفس قوي فتحت خشمي شويه بي
وكلتله ..
' اريد بيت بي بابا ماريد ملابس '

..
نزلت دموعه يم اصابعي على خده وكالي ..
' اني بابا '

..
جانت هاي الحجايه اول شي بالي صار واني
مفتحه عيني وصاحية وره البنج ..
اباوعلهم ' رضا و حيداار ' هنا كاعدين
كل واحد عينه بتلفونه..

هاللحظه اني ردت ابويه ..
وضليت مفتحه شويه واكول  ' بابا '
نطقتها بالمره الثانيه ورضا حفز من مكانه بساع
واجاني يلزم بوجهي ويكولي..
' ها بابه '

ميلت براسي على ايده وكلتله..
' تعبانه '

ضل يمسح وجهي بايده ويكولي..
' تنامين وترتاحين ونطلع لبيتنه وتصيرين زينه بعد ماكو تعب
هسه بس شغله ساعه ساعتين وكلشي يروح '

غمضت وحسيت بايد حيداار يعصر بايدي
شويه ودنك على راسي شاورني ..
- رور حبيبي فتحي عينج باوعيلي

باوعتله وهو باسني بخدي ويكولي..
- ماعندي دنيا بدونج ياروحي
حمدلله على السلامة

رجعت غمضت وهو يشاورني..
- ارتاحي وانه يمج بس تردين شي  كليلي

ضل لازم ايدي وكاعد يمي واني بين نايمه وبين كاعده ... جسمي تعبان بس عقلي صاحي شويه وياهم ..

اثنينهم ضلو يداروني على طول ايامي بالمستشفى ..
يكلولي وضعج تحسن وهاي العمليه راح تخلي سيطره على تليف الكبد والورم بالجسم والنفخه ترجع تخف ويه الايام ..
بس اني تعبانه بشكل بعد ما عندي حيل احجي وياهم دقيقتين متواصله ...

اغلب وكتي نايمه .. اكعد من يحاجيني حيدار
ويضل يبوس بوجهي ويكولي اهلي يريدون  يسلمون عليج ويفتحلي كاميرا وياهم
اضل بس اباوعلهم وابتسم واحجي كلمتين
وهمه يدعولي اصير زينه ..
وارجع انام ... اكعد اخذ دوا واكل شوربه
وهم انام ومادري الايام شيصير ميصير بيهه ..

وره فتره صارو يمشوني شويه واطلع بره على الهوا وعمي اجرلنه بيت باربيل كعدنا بي لان الوضع كال مو زين بغداد ..

حيدار اضطر يرجع لشغله وبقينا اني وعمي وريتا باربيل ...
هو كل مواعيد الدوا ونظام الاكل ضابطهن
الي .. وياخذني اتمشى الصبح وياه
اني اتعب من كل شي ماعندي حيل
بالمشي اربع مرات اوكف استراح يلا اكمل
وهنه خطوتين من البيت لراس الشارع

رجعلنه حيدار وكال شويه الشارع هدأ
بغداد ولازم نرجع البيت باقي فارغ وهو على دوامه مايكدر يضل ويانه هنا ...
ورجعنه نص شهر ال ١٢/٢٠١٩ لبغداد...

اخر فحص سويته باربيل .. بين مؤشرات صحتي مستقره وعلاج التليف يحتاجله التزام
والتعب هذا نتيجة فقد الدم والمناعه والاملاح
بالجسم ...

رجعت اكل اشياء غير الشوربه وبيها ملح
بس ملح بحري مو عادي والشكر لاغيته
من اكلي ..اي شي حلو احتاجه استخدم عسل بداله ...
الخضروات ثابته وياي بكل وجبه
مره مسلوكه مره عصير مره سلطه
واللحوم الحمراء مكطوعه عني بس الدجاج
مره كل اسبوعين
والسمج مره كل اسبوع ..
التمن ممنوع والخبز الا شعير و وجبه وحده باليوم اكل وياه شعير وشي قليل يعني
الرغيف اخذ ربعه بالريوك بس هذا اكله ..
حمدت الله وشكرته كدرت ارجع اضوك الاكل واشبع بطني شويه ...

بيتي ... اليوم كله اني بغرفتي .. احس على حيدار من يطلع لدوامه الصبح واكعد بس
احضنه وابوسه ويروح ارجع انام ..

عمي يجي ويه ريتا من تجيبلي الاكل
ويضل يمي حتى اخذ الدوا وهم يسولفلي شويه واني حجايتين اردهن اله وارجع اتمدد
اضل لازمه تلفون واكلب بي ...
بين القصص والمسلسلات يمشي اليوم ..

بالليل اني انام وره ما اتعشى وهالمره حسيت  بحيدار يكعدني ... باوعتله ولزمت وجهه
وهو يبوس بايدي ويكولي...
- رور ياااروحي انتي اترجااااج ارجعي زينه ارجعي وياي والله محتاجج حبيبي اترجاج
لاتعوفيني هيج جاي اضيع والله

حضنت راسه وبوسته .. كلتله..
- شبيك حبيبي

ماحجى شي ضل بس يحضن بيه وساكت
خليته ينام على ايدي وبقيت العب بشعره
لحد مانعست ونمت ...

ثاني يوم هو طالعة للدوام واني ماحسيت عليه
بقيت افكر بسالفته وخفت عليه ..
حيدار نفسه كلش حساسه ومن يضل وحده
ادنى شي يأثر عليه ويخليه متكأب ...

فكرت يجوز بوضع البلد هو ديعرف شغلات تصعب عليه .. وباقي كابت الحجي بكلبه
ومحد وياه يحاجيه ويشاركه يومه
اني اليوم كله اشوفه مره الفجر ومره المغرب
ومادري بي شوكت ينام شوكت يرجع
ياكل يطلع يسهر كلشي مادري عنه ...

جبرت نفسي وكلت كافي راحه خلي انتبه
لبيتي بعد اهمالي زاد عن حده ...

نزلت كعدت بالصاله واني لابسه بجامه وفوكاهه روب فرو  وجواريب لان جسمي فد مره صاير مبراد  ..
عمي اليوم مموجود بالبيت ...
ريتا كعدت تعدل شعري واني اباوع لوجهي بالمرايه الصغيره بايدي ...
وجهي ضعيف عيوني مقعره صايره بالصفار
والخطوط البنفسجية وشفايفي متيبسه
حواجبي صايره هوسه شعر ..

كلتلهه تجيبلي ملقط وكعدت اسويهن بس شويه ركزت بالمرايه عليهن راسي وجعني احس عظم عيوني كله يوجع وايدي راخيه
عفته وتمددت وضليت متغطيه فوك الروب الي لابسته متغطيه ببطانيه ثخينه ومشغلين هيتر ...

رجع حيدار واني باوعتله واضحك
هو هم ضحك وحضني بكل قوته ويكولي
- ابقي هيج حبيبي بس اضحكيلي اكعدي وياي لاتحرميني صوتج والله احتاجه

بوسته بشفته وبقيت حاضنته شويه وراح يبدل
ونزل .. ضل يمي  ياكل ويسولفلي ...

- هاي صار يومين اكو لجنه تفتر بالدائره
و صار اجتماع من طلعو احنه  جاي نبصم
حتى نطلع للبيت وهمه واكفين يسولفون
واحد منهم جبير ونجماته تارسه جتفه
جاي يحجي ويه مدير القسم ويكول ..
..
' هذوله شباب طايشه يزعزعون امان الشارع العراقي بالتجمعات ويخلون الجرائم والانحلال يكثر بالعلن '
..
فالمدير كال ' يريدون استجابه لمطالبهم
وينسحبون لو الدوله تخصم  الامر حتى لو بوعود وقتيه نحقن بيها الدم '
..
جان هذاك يضحك سامعتهه هاي ضحكتهم للضباط الكبار شلون تستفز الواحد

- مال خبث هاي ضحكتهم

- اييي .. يضحك ويكول بعلو صوته
حتى كلنه نسمعه ونأيد حجيه
يكول
' اذا الانسان يجي يريد كلشي حاضر جوه ايده
بيت وسياره وظيفه وراتب محترم ودراسه كلشي بيها سهل ولا تحاجوني ولا تندكون بيه وعوفوني مرتاح حصتي بجيبي والسلام
بعد شبقى بالعيشه ؟ شعنده عايش اذا الدوله كلشي توفرله اول ميفتح عينه بالدنيا !!!!
على شنو يعيش ! ماعنده بعد طموح
بس همه شباب جَهله وكساله وتريد كلشي ع الحاضر يجيها '

هذا حجي كبارية ضباطنا حبيبي
يريدون الشاب ينعل سلفى سلفاه يلا يحصل
وظيفه لو قطعه كاع ويضل يلزكهن منا ومنا
حتى يبنيله بيت ..

- عادي مو جديده هاي الحجايه
متوارثيها همه من نظام السابق هيج قانونهم جان
لازم تتعب حتى تحصل شي اذا تحصل كلشي شعندك عايش بعد !

- اييي
مشكله ماتنحل .. النفوس مابيها رحمه ومحبه بعد كلها احقاد وكلوب ميته

اخذ صينيه اكله للمطبخ غسل ورجعلي ..
يباوع لوجهي واني كلتله ..
-ادري بنفسي صايره اخوف وضاعت انوثتي

-لااا تضلين فله بس جاي اشوف عينج خف صفارهه لو زايد

- اي وشطلع ؟

- والله نص ونص ..الله كريم حبيبي الله كريم

باسني بخدي وضل لازم اصابعي يتلمسهن
ويكلب بتلفونه ... شويه وكالي...
- راح انام ساعه بس شويه اريح راسي وانزل يمج

- لا ياعومري نام على راحتك اكعدك على العشى
اني هم راح انام بعد ماكعد لليل

- ماشي حبيبي تصعدين وياي نام سوه ؟

-لا خليني هنا مرتاحه واريد اشوف عمي من يرجع ..اذا صعدت بعد مابيه انزل كل شويه

-اي اريحلج هنا ماشي نامي يارووحي

باسني وطفى الضوا وراح صعد ...
نمت اني وكعدني صوت عمي ..
يفتح بالضوا ويكول...
- بنيتنه اليوم جوه نازله الفله
شو باوعيلي بابه شلونج احجيلي ما شويه احسن

كعدت والملم بشعري وابتسمله وهو كعد يمي يكرص بخدي ويكولي ...
- اليوم كله اني افتر بالحارثيه اخذت تقاريرج كلهن لخمس دكاتره وبشروني على حالتج
تتحسن بابه بس شويه شدي همتج وحيلج
احسن علاج جبتلج ..
كتبلي اول دكتور ابر امريكيه كالي تحسن نشاط الكبد بظرف اسبوعين تشوف تحسن
ورحت تأكدت منهم بغير دكتور وكلهم مدحو بنوعيتها

- شكرًا دتتعب وتفتر بوضع خطر علمودي

- لا بابه دتصدميني انتي شبيج !!
شكر ! ياشكراً هاي بنتي انتي بنتي المن اتعب اذا مو الج
الرجال ينصدم من تشكره روحه
لاتصدميني باباتي حبابه

ضحكت من كل كلبي وهو كلي ..
- عبالك صار الصبح  ؟! شو الشمس من هسه نورت  بيتنا

-هههههههه رضاااا

- جوعااان جوعااان صيحيها خلي تسويلي اكل

صحتها لريتا وصيتهه تكعد حيدار وتخلي الاكل ...
وكمت غسلت وطلعت باب الصاله وكفت اتحسس هوا بارد على وجهي وشويه ورجعت لمكاني كعدت ... وتلفلفت..

اكلنه وعمي صار يفتح بعلاكه الدوا
ويشكلي المغذي واني كلتله ..
- تعبت من الابر ايدي بعدهه توجعني عفيه كافي فدوه

- بس ابره كل يومين بابه تحمليها علاجج هذني حتى يصيرلج حيل

ضليت اتأفف وهو يريد يخلي الابره بايدي اليمنه ماخليته لان بعدهه ايدي زركه ومورم مكان الابر ... اني لمده اسابيع متواصله
الكانوله بايدي يبدلوهه بنفس المكان لحد ما ايدي ورمت ...

خلاهه الي باليسره وحيدار ماخذ غلاف الابره ويطلعهه بالنت يقرالنه فوائدها
و من راح عمي ينام حيدار سألني..

- رور سألتي عمج شكد سعرهن للابر
حتى ادفعهن اله مبينات غاليات

- لا ما سألته ولا تدفع شي مستحيل ياخذ فلوسهن منك

- لااا شنو المياخذ .. انه مو ناسي ولا هامل علاجج بس متفق وياه اجيبله اسم الدكتور والحجز  وهو يروح يراجع عنده لان وكت ماعندي واروح .. والعلاج موصي انه اشتري بس ردته يروح للعياده بدالي

- اي عومري ادري بكل شي متشاركين بس هو شتعرف بي ياخذ فلوس شي يجيبه النه !
عوفه عادي

-لا باجر اسأل على سعرهن بالصيدليه واحول فلوسهن لحسابه

عفت الموضوع وضليت مخليه راسي على ايدهه وهو دك تلفونه رأساً سواه صامت وعافه .. كلتله..
-جاوب
.
- بعدين مالي خلك احد
تطلعين نكعد بره شويه لو نتمشى وناخذ كانيور هم مخنطل هو هالايام ذبلانه روحه
اروح وارجع و لا عو ولا هو

ضحكت وكلتله..
- اووكيي بس تشتريلي شي دافي اشربه تره بسرعه يثلج جسمي
.
- ادفيج بروحي تدللين حبيبي

باسني وراح واخذ تلفونه خلاه بجيبه و
جابلي الجبه والشال لبستهن فوك الروب  وطلعنه .. هو ايد لازمني بيهه وايد الثانيه بيهه سلسله كانيور ..

مشينا مسافه وكعدت وبقى يمي كانيور وهو راح للمحل اشترى  نسكافيه الي واله والكلاص جبير .. اني احب  كلاص اللون الازرك وهو يحب الاحمر ...

شربنه وكانيور كل شويه يخلي جسمه على رجلي ويخلي راسه على بطني ويروح ياخذله فره ويرجعلنه ...
حيدار هالمره هو ساكت واني احجي
اباوعله بس يصفن عليه ومن اكوله
' شبيك ' يكولي ' احبج '
كل ماعيدها عليه نفس الجواب يردلي

رجعنه للبيت وصعدت نمت بغرفتي وهو
حاضني ويكولي ..
- باجر هم انزلي واكعدي وياي بالليل
لتعوفيني رور
انه مريض مثلج والله من تتمرضين اتمرض
بس اكعدي وياي حتى لو ساعتين باليوم كله .. ابقي كدام عيني سولفي وياي الزمي ايدي احضنيني لو ثانيتين بس لتعوفيني وحدي

بوسته بلحيته وكلتله ..
- تعبت من اهمالي ادري بيك بس غصباً عليه عفتك المرض مابقى بيه حيل حتى افتح عيني

- ارجعي قويه حبيبي لتتعبين من علاج ولتضلين بس نايمه نشطي نفسج لا تخلين المرض يغلبج

- عفيه اصبرو عليه شويه داحاول بكل حيلي بس احتاج وكت اكثر بعد

- كل عمرنا الج بس صيري زينه

ثاني يوم عمي اخذني سوالي تحليل كال دنثبت على نسبه اخيره ونقارنها بعد اسبوعين

من رجعنه جان حيدار بالبيت وشكله ممرتاح
بس سألني شصار وياكم كلتله تحليل عادي باجر يطلع .. كال زين وطلع من البيت
حتى عمي ما عجبه وضعه وضل يحجي عليه مهمل وما عنده حس بالمسؤولية واني ادافعله

لليل اني بقيت نايمه جوه .. كعدت ومالكيت بس ريتا فارشه بالكاع ونايمه يمي ..
شفت ساعه بالوحده بالليل .. كمت للحمام وبعدين صعدت فوك لغرفتي ..

فتحت الباب والغرفه ظلمه بس جمرة الجكاره مبينه و ريحه الدخان تارس المكان ...
شغلت الضوا وحيدار جان كاعد يم الكنتور
ويدخن .. حط ايده على عيونه وصاح عليه بصوت عالي ...
- اطلعيييي بررررره

ضليت واكفه بمكاني واباوع لحاله ..
نازع فانيلته وبس بالشورت كاعد وجسمه
مجوى برجليه وبطنه وخاصرته ..
ويمه نفاضه  مليانه جكاير وسجين صغيره

رحتله وهو ساد عيونه بايده وجكارته ترجف بايده ...
اخذتهه من ايده طفيتهه وهو دفعني وكام لزمت رجله وصحت عليه حتى يوكف
دنحجي وهو جر رجله حيل واخذ ملابسه وتلفونه وطلع من الغرفه ...

رحت وراه وبين ما نزلت الدرج هو طلع من البيت ...
بقيت خايفه عليه .. كلبي يحسني صاير وياه شي جبير ... احسه ضايع ويه نفسه ..
للصبح بقيت كاعده انتظر بي ومارجع
دزيت عمي يطلع اذا يعرف فد مكان هو يروحله .. يروح يشوفه موجود هناك ويرجعه للبيت دافتهم شبي ..

عمي مخابره وهو كايله اريد اضل وحدي اني ارجع بعدين بس ارتاح ....
من اخابره اني ما يجاوبني ...

يومين هو بره البيت لا شفته ولا سمعت صوته وكاعده على اعصابي انتظر بي ..
اني نايمه ومادري بي راجع بنص الليل
مبدل للدوام وطالع قبل الفجر كالتلي ريتا عليه
وتخبلت هنااا ... ليش هيج يعوفني ! يوصل يمي ويدري بيه خايفه عليه وميكعد يحاجيني كلمتين !!!!

انتظرته النهار كوله وهو ما رجع ..
اجتني رساله و طلب صداقه على الفيس من حساب غريب
مكتوب اسمه  (xfklrr ) وصوره بنيه  مصلخه ومخليه وشم على صدرها
فتحت الرساله وشفت دازتلي ..
' كلشي بفلوسه '

رفعت شعري وعدلت كعدتي وخابرتهه
متجاوب ترفض .. جان تدزلي  صوره
ولد وعلى وجهه سمايل وهو كاعد وفاتح رجليه وبنيه بين رجليه كاعده مصلخه وهو لازمهه من شعرهه .. البنيه طالع بس ظهرهه
والولد بملابسه ...
والصوره ماخذوه لقطه شاشه لفيديو ...

من شدهتي ما ركزت بعد بالصوره رحت خابرتهه وهم رفضتني ودزتلي رساله
' عرفتيه منو '

رجعت باوعت للصوره وانتبهت عليه هذا حيدار قميصه وقلمه الذهبي باسود بالقميص
نفسه ...
جذبت عيني وكتبتلهه ..
' مامبين منو دزي بدون سمايل '
شويه ودزتلي نفس الصوره بدون ساميل
وهو هذا حيداااار الكاعد وهاي المصلخه بين رجليه ومصوريهم فيديو ...

وكع تلفون من ايدي وضليت ساده حلكي وارجف ... ممعقول يسويها حيدار !!!
ميسويها ويخوني ..

فركت وجهي ورجعت احذت تلفوني واكبر بالصوره واباوع لوجهه مخنزر وفاتح حلكه ديحجي ولازم شعرهه بايده لامه وجارهه منه

دزتلي رساله ..
' تريدين الفيديو اشتريه مني بفلوسه
واسمعي الصوووت وشوفي شصار ماصار '

كتبتلهه ...
' ما تهمني الكحاب رجلي واعرفه ما يسويهه
خلي الفيديو يفيدج '

دزتلي صوره ثانيه مقدمه الفيديو
والبنيه فاتحه قميصه وصوره ثانيه هم
دتفتح بنطرونه واني كمت اعيط واضرب بوجهي وشمرت التلفون ...

بجيت بعلو صوتي وكل جسمي يرجف
اجتني ريتا تحاجيني واني اضرب بوجهي
وابجي وهي تجر بايدي ...
دفعتهه وكمت اخذت التلفون وضليت افتر بالبيت واخابر على حيدار وهو مقفل تلفونه
رجعت دزيتلهه رساله ....

' شتريدين المطلوب شنو !!! '
دزتلي ..
' جنت اريد فلوس مقابل الفيديو بس غيرت رأيي
هسه بيتج ورجلج  الي راح يصيرون  بدون ماتعب نفسي
ننتظرج تموتين ونخلص ضاله حجاره بدربنا'

داكتبلهه وهي حضرتني وضليت اعيط واضرب برجلي وافتر لازمه التلفون
واخابر بي مقفول جهازه ..

كعدت ابجي بالكاع واباوع للصور شلون مسلمهه نفسه ويباوع لجسمهه وهي بكيفهه
تكعد وتفتح بملابسه ...

وجع بكلبي وجع ما سكن ولا هود من ساعتهه
بديت اموت ...

على كعدتي ضليت وعيني على الساعه
انتظره يرجع ... وصار العصر وهو ما رجع
اخذت تلفوني ودزيتله رساله ..
' تعال للبيت '

انتظرته وعيني على باب الصاله افكر شحجي ! شسوي بي من يرجع !

انفتحت باب الصاله وهو دخل شايل بايده
فايل ... عيني راحت على القلم الي بجيب قميصه .. غصه بكلبي صارت شوفته ..
..
باوعلي واني بعدني بالكاع كاعده ولازمه راسي وريتا كاعده يمي بايدهه كلاص المي ..
.. صارت عيني بعينه وهو دار وجهه وراح حط فايله على الميز وكال لريتا تروح منا

بقى واكف يم الميز واني كاعده بنص الصاله
كلتله...
- خنتني حيدار !

ضل ساكت وينزع بساعته واني كمت على حيلي اخذت تلفوني وفتحت الصوره خليته كدامه على الميز ..
ما شفته تفاجىء ولا لزم تلفون بس باوع بطرف عينه للصوره و صار يكف قميصه
ويباوع لردانه ...

جريته من جتفه حيل وهو ضل يباوعلي
واني ابجي وشفايفي ترجف ..
- ما كدرت تنتظرني  اموت ! ماكدرت تصبر عليه كم يوم تضل وفي وياي !!!

لزم راسي ويمسح بوجهي واني دفعته وعيطت بعلو حسي عليه..
- اااااالله لااااا يرضى عليييييك الله يلووووع كلبك

ضربته على صدره وهو مدنك راسه ...
- لييييش تخوووون بيييييه !!! لك مريضه ااااني مررررريضه داوصل الموت كل يوم
وانته تروح تتونس بالبنات !!!
لييييش ماصبرت عليه اموت وجيب كحابك هناااا لفراشي وبيتي واشبع بيهن لييييش هسسسسه تذبحني هيييييج لييييش تموووتني انتتتتتته بايدك ليش حيداااار  ليش يااااااااااالله
شبييييك شغيرك عليه لك شبييييك وياي
مو ماعندي حيل جروحك بعد
والله مابيه حيل غدرك والله داموت اااااني ليش تسوووووي بيه هييييييج

كعدني بالكاع ويحضن براسي واني ابجي بكل حركة كلبي ... 
وهو يكولي...
- ماردت اخونج والله غلطت ومادري بروحي شسويت

ضربته على رجله وعلى صدره وهو يضغط على ايدي وعاصر وجهه ..
- شبييييك انته ماعندك عقل حتى متدري بروحك دتخوووووني !
رايحلهه لبيييتهااااا متدري بنفسك من جنت تمشيلها !!!
شكلت لرووووحك من وصلت بيتها وتصلخت كدامك مااااصرت بعينك اني !
كلبك هذااااا ماااحن عليه مااوكفك
ما ذكرك بيه !!!!

- والله ما رحتلهه حتى اخونج والله هي
الي لعبتهه انه وروح اخوتي ما مفكر ولا واصل لهيج شي

- حذاااااااااب والله بعد ماصدكك مااااااااصدكك انته واحد حقير ودوني
ونكس ما بيك حجايه صدك

-ريرررررررري جاااي اكلج مااااخنت والله ماردت هالشي والله احبج ولا انطيتهه مجال

- مكعدهه بنص رجليك وتنزع بملابسك شبقى من المجال مااااانطيتهااااا
حيداااااار اجذب عيووووني اجذبهن !!!!!

- بس افهميني حبيبي اسمعيني والله تعبان
والندم ماكل روحي

- رووووووووح منااااا الله لااا يهنيك بعيشه
ياساقط دكتك هاي وكعدتك وياهه بس الساقط يسوويهه

كمت من يمه ومشيت للدرج وهو لحكني
لزمني من ايدي وضل حاضني من وره
واني ادفع بي واعيط عليه وهو يتوسل بس اسمعه ... كعدني على الدرج وكعد كدامي
يكولي...

- هي لحت وياي ريري والله مامخليهه بالي
ولا مخلي اي مره بالي غيرج

- حيدااااار لتلجم كلببببي بهاي سوالفك
انته خنتني ويه وحده لو عشره اااانته خنتنننننني خنتني واني بنص عازتي الك
تعوفني مريضه ونايمه بفراشي مادري باليوم شيصير ميصير بيه من المرض وانته هناااك بين ايديهن تتونس

- والله ماااااردتهه تصيييير والله
وحك مصاب الحسين مااااردت اوصلهه والله منعتهه بس ماكدرت

-شنووووه الماكدرت شنوووو!!! لزمت عليك سيف الاااا تضل بحضنهه انته متختخ بين ايديهه وصورك تشهد لتبرر بسوالف بايخه تحرررك كلبي بيهه بالازيد لووو تسكت لو تحجيلك شي براسه خير لتضل تلجم بكلبي

- بس اسمعيني
وعلي هي من قبل ما تطلعين لاربيل
جانت تحاول وياي وانه مانطيهه مجال

- منين هاي !!! شعرفهه بيك !

- الممرضه

-عزااااااا بيعنننننننك حيدااااااااار عزا بعينك عزاااا بعييييييينك

- رور وعلي هي جانت تلحكني وين ماروح
حتى للحمام تلحكني واضربهه واطردهه
وماجازت

- لتجذذذذذذب حيداااار احجي صدك مره بعمرك احجيلي صدك وكول عجبتني

-مااااااعجبتنننننني ماعجبتني

-لاااااا عجبتك عجبتك هي بجسمهه وبحيلهه
واني كاتلني المرض بعد طلعت من عينك
هي تلبس وتتمكيج وتلحك وراك وبجسمهه هالكبره جرت عينك عليهه بعد اني ضعفت وراح حيلي وجمالي فلسين ماسوه عندك صرت

- وحك عينج ماعجبتني والله مااااعجبتني
بس هي استغلت ضعفي مو اكثر من هيج والله

- شبيك انته ضعيف !  شبييييك ضعيف كدام البنااات هيج تقصد مووو

- ريري مو هيج
انه عايفج صار شكد كليلي شجم شهر انه ماواصلج !
يمكن عبرت سبع شهور انه ما واصلج
صدكيني متأذي وبكلشي لهيت روحي
بس من وصلت بيتهه وهي اجتني هيج
مادري جسمي ماسيطرت عليه والله
عقلي يكلي لااا واحجي عليهه بس جسمي
ثكل ماكدرت والله مو بيدي ريري والله
استغلت ضعفي هنا تدريني مفاركج صار هواي ومحتاج مره وهي استغلته والله هي اجتني ماااطلبته منهه وحك لا اله الا الله ماااانطيتهه مجال
بس هنا ماسيطرت ماكدرت والله جنت متأذي وكل جسمي يوجعني غلبني جسمي والله بعقلي وبكلبي ماخنتج والله

دفعت ايده من رجلي وضليت مخليه ايدي على وجهي وابجي ... كل حجايه تشك بالكلب من جهه ..
صار يتلمس بشعري ويكولي...

- جانت هنا تجيني للغرفه بالليل احس عليهه يمي وانتي نايمه جوه .. اكللهه شجابج شتردين تكلي ماكدر مافكر بيك
وحك علي اكوم اجرهه من ايدهه واطلعهه من الغرفه وبراسهه اركعهه بالحايط واقفل الغرفه وانام
وثاني يوم تجيني لنص الحمام من اسبح
تجيني مصلخه ... وعليي ماااطخيتهه
وارزلهه واهددهه اذا ماتطلع وتكف عني اجرهه ليم رجلج بهيج وضعهه مصلخه
وهي تطلع بس تضل وين ماتشوفلهه فرصه تجيني وتكلي اريدك حتى لو مره وحده بس طلعهه من نفسي
والله تجيني نازعه كلشي نازعه وتكلي شتريد سوي وما وصلتهه وكل مره اضربهه واطردهه

-ليييييييش لعد بقيتهااااا وانته تدري بيها دتخون بيه عينك عيييينك
ليش بقيتها يممممي

- علمود علاجج والله كلت بس تكمل الشهر ويخلص علاجج هذا اطردهه منا
بس علاجج حرت بي ماكو وحده تتحصل بذاك الوكت بسرعه

-جذااااااب ارتاحيتلهه وياك تفرفر بجسمهه كدامك تونست عليهه
لحد ما جربتهه

- لاااا وعلييي ماردتهه شبيج رور ماتعرفيني انه شلون نفسيتي!!! جديد عليج انه ماتعرفين الي بيه !!

-اييييييي مااااعرفك لان انته واااحد جذاااااب
تدور بس راحتك ماتخليلي حساااب من تسوي شي

- وعلييي غلبني جسمي ماااكدررررت اسيطر بعد وااالله ماكدرررررت
ريري وحك الله رديتهه من هي هنااا ماااانطيتها مجال وحك اسم الله غير الرزايل والطرد ماااصار شي وياهه
بس هالمره بيتها وبالحيله اخذتني والله مااااارحتلهه متعني لهالشي

-لععععععد شوداااااك عليهه شودااااك
من تعرفهه هيج كحبه ونفسهه بيك
شودااااك لبيتهااااااااا

ضربته على جتفه بكل قوتي وهو لزم ايدي واخذهه يبوسهه ويخليهه على خده واني اجرهه منه وهو يرجعهه على وجهه ..

- احجيلج كلشي والله بس صدكي بيه رور
ادري غلطت بس شوفي حالي لاتحكمين عليه بسرعه حبيبي والله احبج وماعيش بدونج

- مااااصدكك بسوالف المحبه بعد لو تحلف مية حلفان انته ماتحبني
احجيلي شوداااك هنااااك فهمننني

- من رحنا لاربيل وصارت عمليتج هي
خابرتني .. انه حاضر رقمهه والله بس دكت عليه بغير رقم وتكلي واكعه بمشكله
واعتبرني اختك وساعدني ماعندي بس الله وانته
كلتلهه شعندج .. تكلي ... اخويه طلع للمظاهرات من يومين ومارجع بعد
ونخابر وندور عليه وماكو
بلكت تشوفلنه اسمه ويه المعتقلين اذا تكدر توصلهم
وضلت تبجي وتتوسل وتكلي انسى السويته انه تندمت وتبت بعد وماريد بس اخويه يرجعلنه ماعدنه غيره بالبيت وامي متخبله عليه لا اكل ولا شرب
كلتلهه ماشي اشوفلج اسمه اذا كدرت

وعليي ريري وحك ابو الحسنين
انطتني اسم ولد من دزيته لجماعتي
كالو موجود معتقل
كلتلهم اريده يطلع هذا كرايبي ومنا و منا
حجي والولد كالو اصبرلنه بس اسبوعين
راح تجينا اوامر ونطلعهم كلهم بدون متصير شبهه علينه
وانطوني كلمه كالو اسبوعين اذا ما اجانه امر
نهربه الك بس اصبرلنه أسبوعين

وخابرتهه كلتلهه فد أسبوعين ويطلعوهم
كلتلي امي مريضه وماتصبر عليه أسبوعين
بس هالولد عدنا لا اب ولا عم عدنا وهو المعيل النه واحنه تدري بينا حالتنه ضعيفه وكاعدين بالحواسم وماعدنا غير الله وهالاخ

وصارت رجعتي لبغداد مريت على الولد
كلولي ضلن يومين ويخلص الاسبوعين
ونطلعهم على حسب الاوامر تدري بينا مانكدر مشددين علينه كلش هالايام
عاد وصيتهم عليه كلتلهم لا تأذونهم كلهم شباب واهاليتهم محروكين كلب عليهم
كلولي بس نخوفهم ما نموتهم احنه بس هاي الاوامر

والله والله بس خلصن الاسبوعين طلعو الولد
كلهم وهي خابرتني كلتلي امي تريد تتشكرك
واخويه هم هنا يريد يشكرك وينتظروك بيتنا
لان مرضى مايكدرون يجون لبيتك
وامهه هم حجت وياي بالتلفون وتشكرتني
وكلتلي لازم تجي ونقوم بواجبك والولد يريد يشوفك ويشكرك بنفسه وهو تعبان من الضرب والتعذيب ما يكدر يجيك انته مرلنه
وحلفتني اروحلهم على العشى اتعشى ويه الولد هاي ضلت اربع ايام امهه تخابر وتكلي ابني رايدك على العشى عازمك
وتحلف بيه اروحلهم

- وانته صدكت ورحت ركض

- اي رحتلهم شمدريني بيها جا غير امهه حجت وياي واخوهه انه ادري بي طالع مو جذبه
وعلي ماااااابالي شي رحتلهم لان استحيت من امهه وهي تحلفني وكل يوم تكلي احضرلك عشه انته والولد هم حاجيه قوي كلبه وهم يتشكر منك

ورحتلهم تلكاني الولد مزورك وجهه وايده مجبسه وسلم عليه وشكرني لحد ما يبس حلكه
وتعشينا سوه وكلتله وين الوالده اسلم عليهه
كالي جوه كاعده هسه اصيحهه الك
وراح هي الروحه روحه بعد لا رجع ولا شفته

وانه ضال كاعد انتظره وهاي اجتني لابسه روب  كصير وطبت وقفلت الباب
انه والله رزلتهه كبل ..
كلتلهه ماتجوزين من سوالفج انتي ماتستحين اخوج هنا وامج وتجيني هيج !
تكلي ..
يااخويه ! راح اخويه والبيت بس النه
كلتلهه ...وامج وين !!!
تكلي امي نايمه كلشي متدري
ونزعت الروب وكلشي مالابسه ضلت هيج كدامي مصلخه

- عفييييييييه شلووووون جذب مسفط
عفييييه ياحيداااار عفيه خوووش متعلم دروب ونذاله وجذب صاير بلسانك مثل المي

- وحك علييي مااااجذبت ريري ماجذبت عليج بحرف
وحك علي هي وامها نذلاااااات ولعبنها عدل

-شلوووون مو امها للمسعده ناااايمه واخوها مدري وين ولى
وعافلكم الجو

- ايييي لان امهه كحبه مثلهااا
محضرات تصوير والولد طلع جيرااانهم مو اخوهم وهنه مستغلاته حتى اجيهه للبيت
جلبتلي امهه الااااا تتزوج بنتي لو ادز الفيديو لمرتك واخليهه تطك وتموت بكاعهه

- عزاااااا بعينهم وعين الخلف شكولهن الزفرررررره وانته شبيييك ورطت نفسك ويااااهن شبيك هيج الله عماااك ورحتلهن تركض

- ماااادري بيهن هيج والله ماادري
جاا الولد اسمه موجود ومعتقل واروح اشوفه بيتهم وامهه تحاجيني وهي تحاجيني تبجي
وانه منين ماابحث عليه كله صدك
ليش ماصدك بيهم !!!
شمدريني انه من رحت وكعدت تعشيت ويه الولد على حسبة هو اخوهه شمدريني كوادهن هذا ويكمل شغلته ويشرد يعوفني بنصهن

احتريت واختنكت من الحجي ونزعت الروب الفرو وضليت ارفع بشعري من وجهي
وهو يكولي ...
- والله هذا الصار رور والله مووو بالي هي
بس لعبه منهن وتورطت بيهه
هاي انه لان صار فتره لابسهن وما رضيت لااا اتزوجها ولا انطيهن فلوس ولا امشي بطلبهن هنه دزن رساله كالن الفيديو اعتبره وصل لمرتك

لا تخليهن ينجحن بلعبتهن ويخربن بينا
ريري والله كل غايتهن يهجمن بيتنا
هاااي ماتت غيره منج ومن عيشتنا
وكلشي سوته حتى تحصل مكانج

- وانته نطيتها مجاااال انتتتتته خليتها تدووس  على كلبييي وتهجم بيتتتتي

-واااااااالله ماااادري بيهااا هيج مخططه وااااالله مو بااالي هي

-من شفتهه تصلخت كدااامك ماااتعرف تطلع
ماااتعرف تلزمهه تفرك حلكهه وتشمرهه
متكدر تسوووويلك موقف وااااحد وتخصم بي كلشي من جيافتهن وتخلصنه منهن
شبيييييك انعميت بيهاااااا

- والله كلشي سويت
ضربتهه وسبيتهه وحتى من شعرهه جريتهه وضربت راسهه بالقنفه والله ذليتهه بس هي
عين صلفه شسوي بيها هي متهتم
وانه الشيطان سيطر عليه بعد والله ماااااكدرت
انه اضربهه راشديات بوجهه وارزلهه وهي خدرانه رايحه منتهيه متهتم

- وانته خدرت ويااااااهه كيفت عليهه
نسسسسيت كلشي من شفتهاا بعد طااار العقل من رااااسك

- نجبرت والله ريري افهميني

- لك شفههههم شفهم
اشوف رجلي كاعد مسلم روحه لكحبه مصلخه وتنزع بيه وتكولي افهميني !!!
شفهمممممك ولك وانته رخصت روحك ورخصتني بايدهااا

ضل يضرب على راسه ويصيح ...
-اااااانه موووو نبي مووو نبي
مااااكدرت يااااامره افهمي ماااكدرت
انه محتاج ومتااااذي والحسسسين متاذي
وهي كدامي  مصلخه
شصيييير انه شصيييير
ماااااكدرت جسمي مااااسيطرت عليه
مااااسيطرت
مااااحبها ولاااا اريدها ولاا اجرعها
بس نفسي غلبتني

- ااااااانته خنتني خنتني لزمت غيري وماوكفت بعينك ولا نفسك ذكرتني
طلعت من كلبك بعد وضلت بس هي تريدهااااا الهااا بس الهاااا

-والله ماااالزمتها والله جسمها ولااا طخيته
ولا سويتلها شي
ريري والله عقلي صاحي يكلي  لاااا يكلي
اطلع منا عوفها يكلي حراام يذكرني بيج
بس جسمي غلبنننني والله جسمي جااان يوجعني وهي تعرف منين وجعي وتخلي ايدهه عليه بعد مااااكدرت اسيطر صدكينننني مااااكدرررررررت

ضل يبجي ويكولي ...
- ندمااااااان والله ندماان وعايش بجحيم من ذاك اليوم لليوم
ريري والله ندمااان
والله ماااردتهه ولاا مفكر بيهه بس انه متأذي والله مامتعود افاركج هالكد وجسمي يوجعني والله وجع بظهري لو يصير بيج ما تحمليه
وردت بس اخلص منه مااااردتهه والله
اكرهه ولااا عجبتني بيوم بس هالوجع ردت اخلص منه وهي دقيقتين بس دقيقتين لزمتني
بيهن ... دقيقتين راحت سيطرتي على نفسي والله بس هذني الدقيقتين
والله مااااالزمتهه ولا طخيت جسمهه
ايدي تضرب بوجهه بس هي مسيطره على جسمي ماااااكدرت بعد
والله من تخلي ايدهه على جسمي وجع يدك بيه ردت اخلص منه وكلشي صار بسرعه انه ماااتحركت من مكاني ولااا سويتلهه شي
بس وخرت هي من رجلي عفتهه وطلعت حجايه ماحاجيتهه بعد ولااا طخيتهه وحك الحسسسسسين ما طخيتهه لااا هنا ولا هناك بيتها

سمعت كل حجيه وكمت وهو لزم ايدي
يكولي ..
- لا تعوفيني رور والله ماااحبيت  ولا وصلت كلبي مره غيرج

جريت ايدي منه وعفته وصعدت لغرفتي
قفلت الباب وكعدت وراه ...
نشف الدمع بعيني ... وحسيت للحظه اني فقدت الاحساس بعد مادري اذا يوجعني هالشي ويوجعني حجيه !
بس داتخيل منظرهم ...
داتخيلها شلون لزمت جسمه
شلون صوتهه وهو يباوعلهه وهي كاعده بين رجليه وايدهه وحلكهه على جسمه وماسوه شي ! 
عافهه مرتاح وياهه !
كدر يرتاح ويه ثانيه ! جسمه كدر يشتهي غيري اني العودته بس عليه
بس اني داريته ودللته وبكل شي جنت اكوله ' احبك ' بكل حضنه وره كل بوسه وره كل لمسه اكوله ' احبك '
شلون كدر ينساني هيج ! ويرضى بيه !!!
مالعبت نفسه منها !!! عجبته ريحتها ونفسها وحلكهه وايدهه وكلشي بيها عجبه وخلاه يشتهيها !!!

حسيت نبض الي بكلبي صار براسي
وايدي ورجلي صارت تنمل
نفس كلش ديضيك عندي وغواشه العين رجعت ... الغرفه كلها دتتحرك كدامي وتغوش ..
كدرت افتح قفل الباب واطلع بس مادري
وين اريد اروح ...
بس اريد اصير زينه..

صار هذا اخر شي اتذكره ...
' اريد اصير زينه '
اني جنت اريد اصير زينه وطلعت
بس من كعدت اني بغير مكان وكلشي مختلف هنا ...
صوت الاجهزه و وجع ايدي وريكي الناشف
وحلكي المأذيني من اللزك الي باطرافه
والوحدة الي اني بيها هنا .. ماكو احد يمي
وحدي بالغرفه اباوع لكومه صوندات بجسمي ملفلفه و وايرات وصارت رجفه قويه بجسمي
عظامي توجعني من البرد وارجف واون
وماكو احد هنا ..
عليت صوتي وصيحت ..
' رضااااا '

و دخلي دكتور يلزم بجسمي ويكولي
' اهدي '
وصارت خبصه ممرضين هنا
واني غمضت عيني بس جسمي يرجف من البرد ...
طلعوني منا مغطيني بطانيات هواي
وصرت اسمع صوت حيدار يصيحلي
وهمه ياخذون بيه لغير مكان ..

غرفه ثانيه وحيدار يمي يغطي بيه ويبوس براسي ويبجي ويصيح ' الحمدلله '
كلتله..
' اريد  ابويه رضا  '

عافني وطلع واني اريد اجر البطانيه عليه اكثر ماكدرت ايدي راخيه وتوجعني حتى اصابعي يوجعني ...

بقيت مغمضة ومافتحت عيني الا من سمعت صوت رضا يمي ...
لزم وجهي ويبوس راسي ويكولي..
' ها بابه زينه! شيوجعج بنتي كوليلي احجيلي شي خلي اسمع صوتج بابه كولي اي شي حاجيني '

كلتله..
' جسمي يوجعني بردانه وعطشانه '

هو باوع لحيدار وضل لازم وجهي وحيدار طلع ..
دنك باس خدي وعيوني وراسي ويكولي ..
' رجعتيلي بنتي ماعوفج بعد
تعذبت بخوفي عليج ليش يااابويه ليش تعبين نفسج وتهلكيني عليج '

كلتله..
' طلعت ردت اصير زينه ردت اخذ دوا وارتاح بره بس مادري ليش ماكدرت'

كالي..
' ميخاف بابه ميخالف راحت شده وعبرتيهه انتي سباعيه مايكدرلج حتى المرض انتي اقوى منه بنيتي انتي قويه ميغلبج شي '

غمضت وابلع بريكي يابس  يجرح
جابلي حيدار المي و رضا شربني
وغطوني بعد بطانيه وحيدار يفرك برجلي من فوك البطانيه ورضا يفرك بايدي وجتوفي
لحد ما دفيت شويه عافوني ...

عرفت هنا ... اني صارلي
'   ١٢ يوم بغيبوبه كبديه '

والدكتور نبهني هاي
' غيبوبه صغرى اعتبروها بس بعد اكو خطر ارجع لغيبوبه ثانيه وتعتبر هذيج الكبرى والاخيره الي '

نفس الشي انعاد عليه العلاج والنظام الغذائي
ورفعو طلب زرع جزء من الكبد ورجعت لبيتي ولفراشي مره ثانيه بنفس المرض ونفس التعب ونفس ورم الايد من الابر والنوم بالوجع  والكعده بالوجع ..

اثنينهم فارشين بالكاع ونايمين يمي بالصاله
وريتا تحضن بيه وتبجي .. تكولي لا تعوفيني
لاتموتين ...
كلتلهه .. حتى لو متت تبقين مرتاحه بحياتج مأمنتهه لتخافين..

جانت الايام تمر عليه كأنها لحظات وداع
بس بالي مركز على شي واحد ..
اريده قبل مااموت ...
وهو الي علموده سويت لنفسي حيل
ورجعت وكفت على رجلي حتى اسويه ...

وسويت الي بالي كله بس هالمره وكفني حيدار ...
جنت راجعه للبيت ويه رضا ومن دخلت لغرفتي شفت حيدار كاعد ينتظرني هنا
وهو من زمان ماوصل للغرفه وحاجاني وجه بوجه ....

كالي...
- وين جنتي ؟
- شغل ويه عمي يعني كل شهر اعيدلك
- تحجين لو احجيلج العرفته
-احجي شعرفت عادي
- شعندج باابن الرشد ؟
- ذكرني قبل مااموت احجيلك

فتحت الكنتور وطلعت ملابسي وهو جرني من ايدي وعصر وجهي ويكولي...
- اااااانه الي مامتت بعدني وتطلعين تستغفليني
شعنددددج هناااك شضامه عليه !!!
ليش تطلعين وييييه رضاااا مو ويااااي
كل مره انتي تجذبين عليه بحجة تحاليل وفحص وتطلعين هنااااك مووو ترحين هنااااك ومادري بيج شسوين

- اي اروح بكيفي اروح اجي معليك انته
خلص دورك وياي بعد لتدور مثاليات براسي

- ريررررررري لاتخليني ابتلييي بيج
وعليييي ماااعندي عقل بعد ماااصبر عليج
لااااتدوسين بكلبييي بحجيج
كليليييي شعندج هناااك

وخرت منه ورحت كعدت على الفراش
وكلتله ...
- تذكر مالك الاشتر شلون عرف عنده گلب
اني هيج جنت وياك
مو تشبيهاً بشخصهم بسسس اني جنت
مالك وانته الي خفت من عينه

باوعتله وهو يفرك بوجهه ويستغفر
كلتله..
- صدكني جانت اي نظره منك تخليني احاسب نفسي الف حساب اذا جنت غلطانه اوووو افكر اني زعلتك بكلمه
والله من عرفتك ماجان عندي كلب يخاف ويهتم بس من صرت تباوع لعيني وتكولي لا تسوين هالشي وماارضى هالشي وتزعل عليه وتصير عصبي صددددك من وكتها حسيت عندي كلب وبي احساس مثل البشر
بسسس مااااات الكلب بعد لاااا يخاف ولااا يهتم

وكفت انزع ملابسي ولبست بجامه البيت
وكعدت امسح وجهي بالكلينس الرطب
وهو كعد يمي ... مخلي ايده على راسه ومدنك ويكولي ...

- شعندج بهذيج المستشفى
تروحين هناك لدكتور تتعالجين وتستحين تكولين ؟ عندج مشكله هناك.  ! فهميني

-لاااا اني كره عمري دكاترة النفس
مايعالجني احد اوووكييي

- جاااا شعندج !!!

تمددت وتغطيت .. وضليت اباوع للسكف
شويه وكلتله ...
- راح احجيلك لان الموت يجوز ماينطيني مجال اودعك وافهمك
اوو هو اصلا انته لازم تعرف واكيد راح تعرف بكل الاحوال راح نحجيلك مقررين هاليومين

عندي هناك ' امي ' مريضه من ١٨ سنه
هي عدهه مرض ضعف الذاكره و مرض
ضعف بخلايا الدماغ وهي متعرف شي بالدنيا ولا تمشي .. مقعده مرضهه الي براسهه
وكف رجلهه ومتسمع الا شي قليل
تشوف بعين وحده الثانيه تلفت الشبكيه عدها
وهي هناك استقرت اخر كم سنه خليتهه بابن الرشد شويه كادرهم الطبي احسن من البقيه

ضل صافن عليه وكالي ..
-امج امممج !!  زنار نفسها !!!

-اي هي نفسها

- شلون لكيتيها مو كلتي راحت لخوالي وماتت !!!! هاي انتي بكلشي تجذبين عليه

- ماجذبت هي صدك راحتلهم واني كم سنه ضليت عبالي هي ميته
بس لحيت على عمي رضا ياخذني لخوالي اريد اشوفهم اسألهم وين دفنو امي اريد ازورهه
ابويه جان كاتبلي العنوان واسماءهم بالتفصيل
واخذني ورحنالهم
من عرفوني بنتها اخذوني الها
جانو عايفيهه بغرفه وحدهه وهي كلشي متعرف بس تذكر
' ميلاد  ورداتنا يامحمود '
هاي تنام وتكعد هي بس بهذاك الحدث تتذكر

- جااا ليش حبسوهه يمهم !! مارجعوهه الكم

- ابوهه معاقبهه لان هي طلعت من دينهم
واخوهه كايللهه على اساس جاي سأل علينه
وكلنه ميتين بالبيت ودافنينا الجيران وماخذين البيت وعايفيها وحدهه متخبله من القهر
ومتمرضه ومحد بحالها ...
يعتبروهه كافره وزانيه وتستحق العذاب
عافوهه كم سنه مريضه بالغرفه ماتطلع بس للحمام تاخذهه مرت خالي وتوكلهه وهي حجتلي سالفتهم

-استغفر الله
وشلون قبلو تاخذيها

- مشاكل طبعا صياح وهوسه وتهديد يلا كدرت اطلعهه منهم وجبتها هنا حرت بيهه بالدكاتره ردت احد يلكالها علاج بس كلهه تكول تلف صاير بالدماغ ماله علاج
ودخلوهه مستشفى امراض عقليه
خبلوهه هناك بالزايد
اذيه بأذيه كضوهه وياهه ..

وعلى مسؤوليتي طلعتهه مناك بقيتها وياي بالبيت ايام بس ماكدر اداريها مااعرف اتصرف وياها
اكابلهه بس ابجي لا اعرف اقنعهه تاكل ولا اعرف اخليهه تركز وياي بالحجي
لا اكدر ابقيهه كاعده من جانت تمشي صعبه تبقى بالبيت الا اربطها مثلهم يلا
وكلبي مينطيني هيج اسوي بيهه
عمي مقنع دكاتره ابن الرشد حتى يستقبلوهه
واخذناهه هناك
ندفعلهم ملايين كل سنه مقابل اقامتهه
يمهم  .. لان همه ياخذون بس الامراض النفسيه والعقليه يحولوها لغير مستشفى
وبالفلوس بقيناها على اساس هي مريضه ويه كبار السن بمرض الذاكره ...

- هااااي كلها بامج !!
وعفتيها !! كدرتي تعوفيها من اجيتي يمي كل الفتره هذيج ماشفتيها !!!

- اي عفتها علمودك
اني كلشي عفت لخاطرك بس شسوي
حظ ماكو

- ليييش عفتيها ليش ماحجيتي وانه اخذج الهه

- مااعرف احجي نقاط ضعفي
وامي اكبر ضعف عندي
جنت ماامن بيك بالبدايه حتى احجيلك
ومن صرنا وتزوجنا ماردت اشوفك شي من حياتي الهوسه ردت اعيش هيج فارغه من الهموم وكومة القهر الجان عندي قبل اعرفك

- وهسسسه كلشي تغير !!
عجبج تحجين هسه  !!

- هسه اني راح اموت ولازم اخذهه وياي
لهالسبب حجيتلك حتى من تدفني تخليني يمها

- شبييييج ريررري
كولي يالله المووت بعيد عنج
انتي صرتي زينه
وباقيلج عمليه وحده وتخلصين من كلشييي

- اني اعرف نفسي مااطول بعد
وكافي هي عذبتها هواي
انسان عايش كم سنه بيوم واحد لا يعرف ياكل ولا ينام ولا يحجي الا بي ..
عذاااب عفتها اني تتعذب بصحتهه وتصير عميه ومتسمع ومشلوله ومبقيتهه بس نفس

اني انانيه جنت اريد بس يبقى عندي اهل
حتى لو مريض بس المهم عندي وجه اباوعله
وجه من دمي .. امي حصلتهه من بعد سنين متشرده ويتيمه واصييييح باسمهه منين مادير وجهي .. تمسكت بيها واذيتها من كد ما
بقيتها وياي

جنت اتأمل بيوم يتطور الطب لو تصير فد معجزه وامي تصير زينه حتى لو شويه
واخذها ونسافر ... نكعد بيت وحدنا
ونرتب حياة بسيطه على كدنا ..
ادرس اني وياهه ونتعلم لغات ونروح سياحه لكل بلد يعجبنا
هاي بس هاااي امنيتي بقتني عايشه لحد ماعرفتك وصرت انته سبب حتى اعيش
لان طمعت وياك بحياة زوجيه وبيت وجهال

وكلشي اتمناه ميصير .. كلشششي اريده يكولي مااريدج ..

مسحت دموعي وهو لزم ايدي ويكولي ..
- رور

- لتحجي ..اي شي لتحجي روح اريد انام

انداريت وغطيت راسي وهو شويه وطلع
لليل رجعلي ...
جايبلي حلقتي وكلادتي ' راية  حيدره '
وخلاهن يم ايدي ويكولي ...
- لا تشيليني منج خليني ماافاركج للموت
لا تعوفيني حبيبي
شاريج بروحي والله

- عوفهن وروح ماعندي حجي وياك هسه بالي مو يمك ابد
ولا حيل الي بيه الك
اني دااعيش يومي بس لامي من اكمل شغلتهه اصفالك

- انه ظلمت نفسي لا هم انتي تظلميني
تعبان والله وحدي بالف ورطه متورط ودايخ
بس ريحي بالي منج بس كليلي كلمه انطيني امل نتفاهم فد يوم
بس كلمه ارحميني بيها ماريد بعد شي

كمت من الفراش وكلتله...
- انته ارحم نفسك .. لتتوقع شي مني بعد

طلعت من الغرفه غسلت ونزلت جوه اكلت
واخذت علاجي وطلعت للحديقه اخذت كانيور بحضني كعدته وخليت وجهي يم راسه ..
وهو يعويلي بصوت ناصي ويحرك بوجهه على خدي ...

بقيت سهرانه ويه كانيور .. وثاني يوم
عمي كالي ..
- رتبت كلشي ردتيه بس راجعي قرارج بابه
لتستعجلين بحاله عصبيه تخسرين كلشي

- عاشت ايدك من يومك متقصر وياي بشغله
موعدنا شوكت ؟

- باجر الصبح
فكري بقرارج عندج اليوم كله تأكدي من نفسج بعدج تكدرين تتراجعين

- ميحتاج اني واثقه بقراري هو الصح
الصبح تلكاني متحضره وحيدار يطلع ويانه هالمره

سكت وعافني .. جان الوجع بكلبي مو بأنصاف .. وبنفس الوكت البرود الطغى عليه هم مو بأنصاف ...
مادري شلون تجمعن نفس الحجم بنفس الوكت وبنفس الجسم مره وحده !!!

الليل طقوسي لوداع نفسي ... حضرتها
بحمام حار وصابون الزيتون غسلت بي
وطلعت نشفت شعري وسويته ظفاير
لبست ثوب الوردي للنوم ...
كلشي جان يمشي بهدوء ... لحد ما وصلت
للكنتور وطلعت كلشي قديم محتفظه بي ...

الرسايل بخط ايد ابويه .. الصور الاخيره الهم عندي .. دشداشه امي الي اشتريتها الهه
من جانت يمي ..بعدهه على ريحه جسمها ماغسلتهه ...

رجعت اقرا رساله ابويه ...
' السلام عليكم يا ايها المسلمين والداعين لرحمة الله وطاعته
انا المهندس محمود شاكر اسماعيل
من مصر الحبيبه
أقمت في عراقكم الحبيب لاجل العمل
ولقمة العيش الهنيء
وقد أحسن لي عراقكم وشعبه الباسل بالكثير من الكرم وحسن الضيافه والاحترام
واليوم أنا قد اوشكت على الموت وحيداً في بيتي
سوف يأخذني مرض التهاب الكبد الفايروسي
الذي اصبت به منذ ثلاث سنين ولم اجد له علاجاً
انا مغترب الان في وطنكم يااهل العراق
احسنو غُسلي ودفني في ارضكم العزيزه
واحسنو ايواء ابنتي الصغيره هي كل ماتبقى من عائلتي
قد خسرت زوجتي وابنتي الاخرى وافاهم الاجل قبلي
وتبقت ابنتي جميله وصغيره اخاف عليها من
ظلم وصعب المعيشه
ابنتي ليس لديها سواي في ارضكم هذه
انا لا املك ورثاً ولا مالاً ولا طعاماً
فأتركه اليها
انا مغترب ومريض و وحيد في ارضكم
ارحمو غربتي برحمتكم لابنتي فيرحمكم الله
ان كنتم قادرين على ايوائها في داركم
فاحسنو اليها
ابنتي رقيقة النفس ولا تعرف من دغش الحياة شيئاً
وان صعبت ابنتي عليكم اسكنوها دار الايتام
و اوصوها بالتعلم
لا تأذُ ابنتي اليتيمه هي امانتي في وطنكم العريق
إحضرو لبيتي اليوم فأني اسمع طرقات الموت على بابي وليس لي من اهل او اصحاب ليتكفلو  دفني
رجائي الا تتركون جثتي من دون تراب
والا تنسو ابنتي امانتي بأعناقكم  يا اهل العراق '

اخذت نفس ورقعت الرساله لوجهي بوستهه 
وبقيت مخليتهه على وجهي وحابسه دموعي بعيني مثل كل مره تعودت
احبس الدمعه وانسى البجي حتى مااخرب الرساله واصير هيج قويه من اسيطر على دمعتي ..

وطبكتهه ورجعتهه بمكانهه وفتحت الرساله الثانيه ...
قريت بيها من جديد كل هويتي وشخصي وعائلتي ...
هنا ابويه كاتبلي ..
اسمي بالتفصيل وعنوان اهله بمصر
وعنوان اهل امي واسمائهم
وكاتبلي رقم الهويه مالتي ورقم هويته وهوية امي ومكان الي تابعه اله نفوسنا
وراسملي ورده بالاخير وكاتب جواهه
' فله '

كلشي بايدي يكولي صح الي راح اسوي
كلشي ديكولي قرب اللقاء ...

ضميتهن وتمددت بس ماكدرت انام
باقيه مفتحه عيني وافكر بكل شي راح يصير
صار الفجر واني اخذت تلفوني ودزيت رسالة لحيدار...
' ابقى هنا اليوم عدنا طلعه سوه اخذ اجازه من دوامك واذا ما بقيت لتسألني بعدين شسويتي '

شويه واندكت باب غرفتي ... ودخل حيدار
كالي..
- صباح الخير
-هلو

كمت من فراشي وهو شغل الضوا وضل يباوعلي ... كالي..
- شعندج اليوم ؟
-نروح لامي

عفته وطلعت غسلت ورجعت لكيته نايم بمكاني وحاضن مخدتي مخلي وجهه عليهه
ومتغطي كالي ..
- يصير نروح فد ساعه النوب
بعدني مانمت هسه يلا نعست

- نام

اخذت ملابسي مال طلعه لبست كلشي اسود
واخذت جنطتي وحذائي ونزلت بقيت الشال
على الميز بالصاله ..
تريكت وحدي ماكعدت ريتا .. ومن رحت اغسل نزل عمي ... هو سوه ريوك لنفسه
وصارت ساعه سبعه ونص الصبح دزيت ريتا تكعد حيدار...
انتظرته نزل مبدل و راد مياكل بس عمي ما خلاه الا اكل وشرب جاي يلا طلعنه ...

وصلنه باب المستشفى وحيدار لزم ايدي
وشاورني ...
- خلي نطلعهه وبقيها بيتنا واجيبلج خادمه ثانيه تداريهه

جريت ايدي منه وكلتله ..
- ميحتاج

مشيت كدامه ويه عمي ورحنا كبل لغرفتهه
وياها ٣ عجايز  مريضات زهايمر وهي هنا بس تضحك عليهن وتعيب وتشوف نفسها احلى منهن ودائماً تريد تغسل بصابون ابو ريحة الزيتون وتخلي الممرضه تضم صابونتهه يم راسهه حتى هذني العجايز مياخذنهه ... وتضم ليفتهه وملابسهه الا يخلوهه بالميز ويقفلون عليهن ..

هي من تشوفني متعرفني اني بنتهه
بس تعرف اني يدزني ' محمود ' اخذلهه كيكه عيدالميلاد لبناتها ...
وتحبني هيج تنتظرني بس علمود خبر من محمود ...

شفتهه نايمه بفراشهه وبايدهه  حبل مطاط
بشكل دائره هي تلعب بي بس تجر بي منا ومنا وتخلي قريب من عينهه تباوعله وترجع تخلي يم الثانيه وتفوته كلش بعينها تريد تشوفه وهي عينهه الثانيه طافيه من سنين بس بعد بنفسهه تريد تشوف بيها ...

خليت جنطتي على الميز يمهه ودنكت عليها
بوستها براسها وهي تضحك وتلزم بايدي
خليتلها خدي على حلكهه وباستني
وهي تبوس بس مره وحده ..
عمي سلم عليها ودنك عليها باسها وحيدار نفس الشي ..

ضليت مخليه ايدي وره راسهه وحاضنتهه
وهي تسأل على محمود شوكت يجيب الكيك
واني اشرلهه بايدي بس شويه ...

عمي طلع وبقى حيدار يمي كاعد يم رجليها لامي وكال...
- صايره نسخه عن امج

بقيت اباوعله وعيوني تدمع واحضن بيها اكثر ... هو حط ايده على رجلي وكالي..
-لتبجين حبيبي اخذيها وياج للبيت وكلنه نداريهه واشبعي منهه حتى لو متفهمج بس انتي شبعي عينج منها

- مااريد .. اريدها ترتاح
طلبتلها الموت الرحيم اليوم

- عليييج علي !!! ليش ولج اخذيها وياج ليش تموتيها

اخذت ايدهه بوستهه وطلعتلهه من جنطتي
شيشة ريحه خليتها بايدها وهي كيفت عليها
ضلت ترشرش على جسمهه واني اباوعلهه واحجي...

- ابويه جان كل ظنه من يموت تتلكاه هي وياسمين هناك وراح وهي باقيه هنا تنتظره
اثنينهم واحد ينتظر الثاني واني بقيتهم متفاركين
هي كل شي متريد بالدنيا بس يجي محمود يمها وتسأل عليه الرايح والجاي
كافي عذبتها هواي وابويه انتظرها هواي
واني ماريد اموت واضل هناك انتظرها
اريدها تتلكاني وتعرفني
هناك اروح اشوفهه مرتاحه وابويه واختي مرتاحين كلهم سوه
مااريد اموت وهي تبقى وحدهه هنا
اريد اخذهه وياي هناك كلنه نلتم سوه من جديد

اخذت تلفوني وانطيته لحيدار كلتله..
-اخذلنا  صوره بس لاتفتح فلاش هي تخاف منه

حضنتهه ورفعت راسهه للكاميرا وحاولت كل  مابيه اضحك وما ادمع بالصوره
بس على كد صورتين ووخرت منها بعد ماكدرت ...
بجيت واني منطيتها ظهري وحيدار باقي وياهه يصورها ...

دخل عمي وياه الدكتور .. سلمت عليه
وعمي كالي...
- وقعت بدالج وعندج القرار بعده بايدج اذا متكدرين على فراكهه بابه لا تستعجلين

ما جاوبته وانداريت عليها ..
ضليت احجي وياهه لحد ماركزت وياي
وبقيت اسألهه واعيد الحجي بالاشاره وبحركة الحلك حتى تفهمني اسألهه ..على محمود وهي تضحك وتعيد باسمه
كلتلهه تروحين دينتظرج بره .. وهي انخبصت تخلي ايدهه على شعرهه وتعدل بي
وتريد الريحه بعد ترش منها
وتريد تكوم واني نومتهه عدل وصرت افهمهه
'هسه هو راح يجي ياخذج بس غمضي عينج '
واني بايدي غمضت عينها وضليت ابوسها
وحيدار يكولي ' لااا ' واني ماهتم لاحد

كلت للدكتور 'يلا' وبقيت لازمه ايدهه وراسهه من ضربها الابره بركبتها هي عيطت واني ضاغطه على شفايفي واحجي بكلبي
'  احبج يمه  احبج اريدلج الراحه من الدنيا'

نامت هي بحضني هيج واني كل جسمي خليته عليهه واشتم بيهه واشاورهه اوصيهه
' تسلملي عليهم وتكللهم ينتظروني '
وهواي بقيت هيج حاضنتهه لحد مالدكتور
كالي ...
' خلص وكت مفعول الدوا '
يعني ' ماتت امي '

رفعت راسي عنها وباوعت لوجها وبوست عيونهه وخدها وركبتهه وظفاير شعرهه
وعمي لزم ايدي وكالي..
— كافي بابه كافي هيج

باوعتله بس ما بجيت كلتله ...
-اووكي يلا ناخذها ونروح
طلعوهه انتو واني اخذ غراضهه واجيكم

كمت اباوعلهم شالوهه وطلعو واني
كعدت افتح بقفل الميز ولميت ملابسهه وغراضهه على فراشهه وحتى مشطها وصابونتهه اخذتهن ... جمعتهن كلهن
وطلعت شفت حيدار واكف ينتظرني واخذ الغراض من ايدي وراح للسياره..

اخذناهه للمغتسل وعمي وحيدار توسلو بيه ابقى بالسياره بين مايكملون تغسيلها بس
ما بقيت ... الااا بنفسي اغسلهه ...

ورحت جوه حجيت ويه المغسله وصرنا اثنينا نتعاون بتغسيلها ..
اباوع لجسمهه كطن ابيض لا بيه شعره ولا شخطه ولا خشونه ... وجسمها نظيف من قبل مانغسله ...
اخر شي بوست ركبتهه وخدودهه وايدهه ورجلهه ولفيناهه بالجفن ...

من طلعوهه صار التعب بجسمي
عبالك الحيل عنده وقت سحري ويخلص
مايدوم وياي ....

كعدت بالسياره وغمضت اريد ارتاح لان دوخه براسي وايدي دترجف ...
وهمه ديخلون التابوت فوك السياره ...

كعد يمي حيدار ويلزم بوجهي كلتله..
- مااااابيه شي داارتاح عوفني

عافني واني ضليت اباوع للشارع وعمي ديكولي ناخذهه للنجف ندفنها ؟
وحيدار هم يكول هناك نلحك نطلع هسه ونرجع ..
بس اني كلتلهم...
-لاا اهلي اندفنو بمقبرة الكرخ وين ما جان كبرهم همه راح يصيرون سوه
هناك ندفنها

ما ناقشوني بعد وطلعنه لمقبرة الكرخ
بقيت كاعده بالسياره بين ما حصلو مكان
ونزلت .. همه شالو التابوت ومشو كدامي
صلو عليها وصارو يحفرون وحيدار واكف يمي يكولي اقريلها دعاء او قران وينطيني تلفونه بس ماخذته منه ...
كلتله ..
-انته اقرا

بقيت كاعده وصافنه على االكبر شلون دينحفر ويصير اعمق .. واتخيل نفسي بعد كم يوم هنا
شلون راح يصير حالي ؟
خايفه ؟ مرتاحه من التعب والمرض؟

حيدار نزل بالحفره واستلمهه من عمي ونزلها
وطلع واالولد هنا بقى هو تكفل بالباقي
واني كاعده صافنه عليهم من كملو كلشي
رحت قريت الفاتحه وضليت كاعده يم ترابها
تلمسته شويه وباوعت على اليمنى واليسره
كلتلهم ...

- هاي الكاع محجوزه لا ؟ اريد هذا المكان اشتروه الي لا هم تضلون حايرين بيه وتفترون منا ومنا
اريد هناااا اووووكييي
.
ضلو يباوعولي وساكتين .. واني كمت نفضت ملابسي ومشيت وحدي للسياره
فتحت الباب وكعدت ...
وهمه تالي يلا اجوي ورجعنا للبيت

دخلت البيت ورحت للدرج وكلتلهم بصوت عالي ...
- اريد انام اووووكييي لا كل شويه واحد يجيني لاا دوا ولا اكل ولا شبيج ما بيج
تره اليصير بوجهي اطلع ضيم كلبي بي

.
.
يتبع 👇🏼