رواية ماء مغلي الفصل الثاني والعشرون 22 - بقلم Zoka 🌷

..♣️🩸 ماء مغلي 🩸♣️..
* adzzon *

جريت الحاسبه منهه واشوف
شي ماكدر اوصفه بفد كلمه

شي طويل حيل ومربوع اسود والحيايه على ركبته ملتفه كل وحده راسهه من جهه
ولا مبين منه ايد ولا رجل ولا وجه ولا شي بس سواااد بشكل مربع وطويييل جاي يصعد ع الدرج ..

ضلت هي تكلي ..
- لك هاي الجنيه الكالت عليهه اختك هاي اجتي علينه ولك اجتتتي حيداار اجتي

سديت حلكهه كلش عصرتهه بايدي
وضال اباوع للشاشه وهي وصلت يم بابنه وكفت ..

احس النفس بعد شويه وينكطع عندي وضال اذكر الله وكامش ريري وساد حلكهه
وعيونا بشاشه الحاسبه ..

نشوف شلون واكفه او واكف مادري شنو جنس هالمخلوق ..
كدام الباب ضبط وجهه على بابنا وهي جرت ايدي حيل من حلكهه وتكلي..

- البااااب ولك راح تجي هنا
-اششش مقفول شبيج اشش اسكتي

جريتهه وضليت كامش ايدهه ونباوع لهالمخلوق الواكف بعد شبرين عنا
كلشي ميسوي بس صافن على الباب

العجيب الي صار .. هالحيايه من وحدها نزلت من جسمه وراحت لجهه السطح

وهو هم اندار وراح وراهن .. انفتح باب السطح بدون ما يمد ايده بسس وصل يمه انفتح وراح للسطح والحيايه كدامه بالكاع طلعن وياه وضل الباب مفتوح وكلشي هدوووء .....

بعدني جامد دمي وصافن بالي شفته عقلي مجاي يستوعبه وريري كمزت من مكانهه وراحت فتحت الباب ..

ركضت كبل جريتهه من فانيلتهه وهي تدفع بيه وتكلي..
- لك خلي اشوف وين ولت هالصخامه وخرر شبيك

- وييين تولين لا يصيرلج شي استري عليه

- حيداااار لك هاي فرصتنااا غير نعرف شعدهه فوك اذا انته اثول ممخلي هناك كاميرا شمدرينا شصار مصار فوك هسه دعوووفني
مااموت لاتخاف عوفني اشوفهه

- اكعددددي مو مال خبااال هاي اكعددي

جريتهه وقفلت الباب وضلينه واكفين
كلتلهه..
- هسه اكيد راح ينزل اصبري وبعدين نصعد نشوف شكو فوك

- هو هذا شنو شنووو لك شنوو فهمني

- مااادري وحك علي مافتهم شنو جنسه

- يعني هذا جني ؟ هيج يصيرون شكلهم؟

- هسه انه شايف جني ! شمدريني

- لعد شنوووو
زين الحيه شجاااابهه بالنص !!! اذا هذا جني شعنده ويه الحيايه ؟؟

- مااااادررررري

-اييي ادري متدري بس دااسال

ضلت تفتر بالغرفه وتدخن واجتي كلتلي ..
- منين دخل هذا ؟ او منين طلع ؟ شو حتى ماله صوت من يمشي ماسمعنه اييي صوت لا على درج ولا باب ولا صوت نفس شنو هذا !!! شنوووو

كعدت كدام الحاسبه ورجعت التسجيل
وضليت اركز زين بشكله ..

الطول مو طبيعي وهالضخامه غريبه
زين الوجه ليش هيج مابيه ملامح بس سواد !

بعدني اركز بشكله وسمعنه صوت طبه قويه بالسطح ..
كبل اجتي كعدت يمي ..
- لك هاي شديصير فوك روسنا ولك حيدااار شوفلنه جاره

- ريري اصبري خلي نفتهم اصبري

بدات اصوات الدبيج فوك واحنه ضالين متلازكين بالكعده ونبلعم ..

رجعت اتابع تسجيل وانتظر يرجع ينزل
وساعه تجر ساعه وهو ماكو مانزل

ريري كل شويه تريد تصعد تشوف شكو فوك وانه ماخليهه اخاف يطلع بوجهنه ويندمر حالنه ..

صارت الصلاه وانه كاعد وانتظر ينزل او فد شي يصير احد يطلع منا منا وكلششي ماكو

طلع الضوا وبعد ماكدرت اصبر اكثر
رحت فتحت الباب وريري وراي وطلعنا للسطح ..

كلشي ماكو هنا .. السطح فارغ ونظيف وانه عقلي راد يوكف ..

افتر بالسطح وكامش راسي حتسودن وعلي هذا وين راح !!!

ريري تباوع من حافه سطحنا على الجيران
وراحت للتانكي تباوع وراه وفتحت القبق
وراحت للستاره الي ع الشارع واجتي عليه ..

- طاار هذاا طاار شنو فهمننني

- حتسودن وعلي ماجاي افهم شيصير

- حيدااار هذا شنو ؟ شكو هنا ؟

- مخزن مال عادل يخلي بي غراضه الي ماتنباع تضل عنده هنا يجمعهن ويطلعهن بنهايه موسم

- متكدر تفتحه نشوف شكو بي ؟

- لا مفتاحه عنده ماكدر

راحت عليه وكفت يم الباب وافترت على جهتينه .. هو جينكو بس السكف ساندوج ..

جريت ايدهه ونزلنه .. قفلنه الباب ورجعنه لغرفتنا..

ضلينه متمددين وصافنين ..
تالي هي كالت ..

- مامعقول تبخر
مستحيل يختفي هيج بالجو

- ليش يعني صعبه عليهم !

- مو صعبه بس هو لو يريد محد يشوفه ويطلع منا جان كبل هم اختفى وطلع
ليش تعب نفسه وصعد تلث طوابق !؟

مو لو داامسلت اني ؟

- لا صح حجيج

- اي اكو شي بسالفته
اكووو شي ما صدك هيج هو عنده قدره يختفي ويتعب نفسه يصعد درج ويفتر هنا وهنا ؟

شنو غايته ؟ يخوفنا ؟ جان طلع من كاعدين
لو يفوت للغرف ويخبلنه يخلينه ننجلط بساعتنه

بس هو ما دخل علينه واحنه حتى ضوا غرفتنا  ممشتغل يعني مبين نايمين
ليش مادخل وخوفنا ؟ مو هاي سوالفهم كبل ينطون فوك الروس ؟

- صح
مو بس هيج هو اذا يكدر يختفي ميحتاج يفتح باب كبل يدخل

- ايييييي عفيه هسه بديت تفهمني
يعني شنووو

- يعني مو جني !؟

- عفييييه بس وين ولى هذاا ؟؟ وين اختفى ؟

- هي هنا المشكله اذا مو جني يعني انسان والانسان لااازم يبين وين يختفي ! يطير من السطح ؟ وين راح ! وشلون فات للبيت ؟

- يجوز هو من البيت

- ماعدنا احد هيج هالطول والضخامه

- يجوز متنكر حتى محد يكشفه

- يتنكر وجه شعر سمن مو طول هيج بكد الباب

- امممم ماادري بس اكو لغز هنا اذا عرفناه راح نفهم منو ابو السحوره الصدكي

- اييي هذا الخيط الاول لازم نعرفه شنو

- هسه اني اشك .. طنطول وسيف وحنفيش
هذوله حتى لو مطلعو همه السحارين بس الهم ايد بالسالفه ميه بالميه

-بس لازم من نقرر شي كون عدنا اثبات عليه

- يعني؟

- يعني هسه مانكدر نجزم هذا انسان مو جني او شيطان
توقعنا شي احنه بس نريد دليل حتى نمشي بزودنا بعد مانضل نتردد جاي تفهميني

- ايي فهمت
سهله هاي راح انتظره بالليل اليوم هم واثبتلك جني لو انسي

- عفيه عليج
هسه بدينا بالشغل الزين

- اكولك اني راح ابدل وانزل اشوف هذني موجودات ينزلن لو مختفيات

- يلا وانه اراقب منا خاف يصعد احد او يرجع هو ينزل شوف بلكت نلكط فد شغله

كبل لبست دشداشتهه ونزلت وانه ضليت ارجع بالتسجيل واشوف شكله واتعوذ من الشيطان ..
برحمه الله صاحين لهالساعه على هالشوفه ..

ضليت اكلب بالحاسبه وارجع شويه للكاميرا اشوف شكو ماكو وارجع اكمل شغلاتي بيهه

خابرتني ريري ..
- هاا
- اكولك هذني اثنينهن هنا
- من شوكت نزلن
- قبل شويه نزلن سوه وديسون ريوك
- زين امي وابويه كعدو ، اكلو
- اخذتلهم ريوك لغرفتهم بره حاره عليهم
اجيبلك ريوك لو تنزل
- لا راح انزل هسه

سديته ونزلت صليت بالهول وهي جابت الريوك .. ناكل وساكتين ..

كملنه اكل وانه دفعت الطبله شويه ومديت رجلي .. ادنت هي وخلت راسهه على جتفي
وانه هم خليت راسي على راسهه .. كلتلي ..
- اريد انام تره ماغفيت ولا دقيقه
- والله يرادلنه نومه  طويله نرجع بيهه الحيل
- دمشي نصعد نام هسه شعدنا
- متنظفين ؟
-العصر مابيه حيل هسه
راح انام على نفسي ويكلي نظفي

ضحكت وجان تجي ام فاطمه .. رافعه حواجبهه وتكول..
- عيني النسوان بالباب من رخصتكم

ريري شالت الصينيه وكالت ..
- عليمن جايين ! اصيح العلويه
- لا جايات على ام سيف
- ميصير اجي اسلم هم احب يصير عندي جارات اسأل عليهن ويسألن عليه
- مادري اسألي ام سيف اذا قبلت تعالي سلمي
-اوووكييي

طلعنه وضليت يم اهلي كاعد انتظرهه
وهي شويه واجتني تضحك ..
حجت شويه ويه امي وبعدين صعدنا
هي وتنزع دشداشتهه تكلي ..

- هاي جيرانكم البصفكم جنتهم الجبيره بعد ط..ي صاحبه طنطول

- ما رتاح لا الهه ولا كل بني ادم يوكف وياهه

اجتي تمددت يمي وقفلت تلفوناتهه وضلت تباوعلي وانه انزع التشيريت وبعدين خليت الغطى على وجهي ونمت ..

حسيت على الباب تندك .. كمت افتحه وانه مفتح تك عين .. جان اشوف احمد ..
- هاااا ولك شجابك
- عمممي اشتاكيت وعلي صاير ما تفكدني
بالك بس ويه مريتك
- لاااا بالي انته بس مشغول هالايام
اوكف هسه اجيك وننزل
- شكوو نازلين خلي نسلم
-ويييين بطل خفيتك هاي صرت مشورب اعقل عاد
- اصلا السلام من الاصول بس انته مدري شلونك
- مرتي مو من اصولك فهمت ولك

طبكت الباب بوجهه وريري لكيتهه جاره مخدتي مخليتهه فوك راسهه .. لبست تشيرت كلتلهه..
- متنزلين ؟ اجه احمد حضريلنه غدا
- نعساااانه مااااا
- ريري كملي نومتج وره الغدا
- مو بطلت اطبخ بعد شكو حير انته بالغدا

كعدت يمهه وجريت المخده من راسهه وهي مكفوش شعرهه على وجهه ..
سحبت شعرهه المكفوش وكلتلهه ..
-ولج احمد هنا تريدين تفضحيني كدامه
انزلي بس اليوم اطبخي باجر انه دوري يلا بس كومي

- حيدااااار

- شعجب بنعوصه هالمره ! تريدين شي ؟

- اخذني باجر لبيتي

- ليش مو بعد وكت

- اريد اروح ارتاح شويه حتى صبح اطلع من وكت

-شوكت تكليلي شعندج شغل ؟

- تاخذني لو لااااا

- كعد جبار بسم الله

-هههه نعلى عليك ولك شكول جبار اني

-شكلج مال نونه الحنونه بس صوتج جبار مأصل

- ايااا عوينجي شعرفك بنونه الحنونه ولك

- تطلعلي بالفيس هههه كووومي يلاا

- صدك ولك ممصادق ابد لا منا ولا منا

- شعليج خصوصيات شكو تدخلين

- ديلااااا لتكول شعليه اني اووي عشتو عسى ماتصادق درزن بنات متهمني

- بس انتي تهميني واليوم اكعدج استجواب

- درووووح حجايه متحصل.

- انشوف

كامت تلبس دشداشتهه وكبل ما تلبس حجابهه كلتلهه..
- ريري حطي من هذا الكريم

- اووي حاره ماريد احط  شي بوجهي

- لاااا جاي اكلج حطي منه يلا لتجادلين

- اي شكو ليش شبي وجهي هيج ؟ مو تكره المكياج انته !

- مااكرهه بس احب بس هنا تخلين
ووجهج هيج فد مره يجذب العين هذا حمارج
واحمد عوينجي راح نقطه نقطه يباوعلهن بوجهج واضوج هيج ماتحمل اسكتله

ضحكت وفتحت علبة مكياجهه وتكلي ..
- صاير تغار ولك شالموضوع!

- شايفتني مكرن ماعندي غيره ! شو انتي هم تغنين

- هههههه ممتعوده عليك اصلا مادري بيك منتبه على نقاط الحمر هذني عبالي فد نوب مطفي

- لااا منتبه على كل شي بس

- بس من جوه لجوووه عيننني هههههه لكطتك ولك حويدر

- ههههه انتي حلوه هي كوه اغمض

- هااااا لك فد مره متطور

- بس مالي دخل بيج صدكيني يعني شتسوين هنا سوي ما اتجاوز حدي وياج

- اي بعد احسن
باجر تاخذني ؟

- ماكدر ريري يومين صعبه عليه هم سفط جذب وهم شغلي واهلي يضلون منو يداريهم

- نروح بالليل ونرجع ثاني يوم بالليل اووكي هيج !

- متوازين نطلع بالليل

-اييي متوازين داكولك شغل عندي من صبح مالحك شوكت اوصل شوكت اتحضر واطلع والشوارع ازدحام تكتل
نتعشى هنا ونطلع اوووكييي

- شرط اسألج شي وتجاوبين بصراحه

- اذا على شغلي فاكطع نفسك
ضل انته واني اخذ سيارتي واروح

- اكص رجلج واااالله

- سياررتي تره ورايحه لبيتي شكو بعد

- طرطور كاعدلج هنا وتاخذين سيارتج بنص الليل وتطلعين

-اهووووو هسه انته شتريد فضني كول

- اسألج غير الشغل وبصراحه تحجين

-اووكيي

- يلا لياخذج الواهس وتكومين تخطين منا ومنا كتلج بس كريم وخري هالحمار شكو طولتي

- اصير شبح غير بس كريم لازم شويه منا ومنا يرجع روح الوجه

وكفت يمهه وشتاخذ من مكياج اجره من ايدهه .. ونتعارك هي تريد تخط عيونهه وانه ماخليهه اعاركهه شكو تبرزهن
كرهتهه بالمكياج وبس خلت حمره انه كبل خليت ايدي عليهه ومسحتهه وهي تدفر بيه
تاليهه مسحت كلشي حطته ورادت تطلع ماخليتهه كامت تعيط ..

- لك شتريد خبلتني شبيك وياااي شسوي لاا لااا شكو شكووو شبيك

- انتي تعاندين متفهمين شريد

- مو حطيت صخام بوجهي واجيت لغمطت الاول وتالي شسويلك بعد

- كلت حطي كريم مو حمره تخلينه يفتح عشر عيون عليج

- اهووووووو ولك هو زعطوط هم حاسبله حسااب

- عوينجي هذا اعرف افكاره شلونهه
يلا بس هيج خلي خفيف

- ووييين اخلي كولي خلصني

- هنا بكصتج يم خشمج المدعبل وهاي جوه حنجج هم حمره اكلبيهه ابيض

ضلت تأفف وتمشي الاسفنجه على وجهه
شفتهن راحن هالنقط يلا نزلنه ..

كعدت ويه احمد وهي بس سلمت وراحت
شو هذا ضاج ويكلي..
- شبيهه مرتك شايله خشمهه علينه شدعواها لين حلوه هيج متتحاجى

كبل كفخته على راسه ..
- انجججب لك شكوو حاط عينك عليها
شتريد منها تجي تروح شعليك بيهه انته

- عمي ضااايج انه غير تحس بيه اريد اسولف اتشاقى كلكم وجهكم يبجي وين اروح انه وين فهمني

- ومرتي تونس !! هاي انه يمك سولف وياي

- مااريد

طلع بره ورحت وراه كالي ..
- تعال خلي استفاد منك اكعد دعفس وياي بالدراجه مبين غداكم مطول

- شبيهه هاي

- مادري ثكيله صايره متعبتني

ضليت وياه نفك بغراضهه وندعفس بيهه
وريري اجتي جابتلنه بطل مي هو بس يشوفهه ينتعش كبل يضحك ..

وانه ارزل بي وهو يطنش ..
صار الغدا وجنت حاط ايدي على كلبي لا تطلع اكله من سابقاتهه منعرف شلون تنأكل

تالي طلعت صينيه افخاذ شوي ومرتبتهه بتيته على بصل وطماطه وكاسات لبن ..

ضليت متفاجىء .. كبل رحت يمهه شاورتهه
- منينلج هالافكار ولج

- من صاحبتي لتخاف ماعرف هيج افكر من وحدي

- اييي مو كلت جبيره عليج هالسوالف

-ديلااا اكل واسكت

- منين هالافخاذ

-دزيت من المحل بعد سواية طنطول ماامد ايدي على مجمدتهه حاطتهه بكلبهه وقافله عليهه امداهااا شكد نفسهه ضيكه

- اي زين سويتي كلشي هنا ميتأمن

كعدنا ناكل واحمد يسولف ويحجي بريري كوه .. عاد امي كالتله..
- شكو متعب نفسك بيهه بيعهه واخذلك جديده

- جده ااانه ارتاحلهه هيج

- علويه هذا ابو فليس مياخذ الا مستعمل ويضل يدك بيهه تصليح

- عمي اانه احب كلشي اخذه مستعمل وداعتك حتى المره هم اخذها مستعمله

كبل ريري طكتهه بضحكه عاليه وهو خرب ضحك وياهه .. كرصتهه برجلهه وهي تكلي

- مثل هالولد جذذب اكو واحد يفتهم
- ثكككل ثكككل

ضلت ساده حلكهه وتباوع بالوجوه جان تطكهه بضحكه النوب وهذا يكيف بس يريدله سالفه ..
كللهه ..
- هسه انه شكلج انتي شسمج بروح ابوج شو عمي مسوياهه فدنوب علينه شحجي يسكتني

- عادي كولي ريري مثل عمك

- ااااخ  ريري شلوون لكطه

كبل دفرته برجلي ووخرته من الصينيه
وهو يكلي ..
- الدجاج يخبل وداعتك عمي مماكل مثله كد ماطيب

- انجبببب فك حلكك بعد الااا ابلعك سنونك
وااالله بعد بس تمسلت بهالحجي اكوملك وحلفت الله بعد سويهه وشوف

ريري جرت ايدي وتكلي..
-شجاك حيداار دنتشاقى هسه شصار

-معليج انتي اسكتي

كعد وهو يضحك ويكول ..
- جده هذا الحب هيج يسودن الوادم جا انه هم احبلي وحيده تاليتي هم اتسودن مثل عمي هيج

امي تضحك وتكله ..
- الزواج يعقل الوادم يايمه بس الغيره تسودن

- هاااا وانته شبيك تغار مني زغيرون انته شبيك يا ازلمه شبيك

- لاااا اله الا الله
ااانه صوجي وانطيتك مجال

- هسه اكلج ريري هذا دجاجكم منين اصله فصله ما ضامين وحيده بعد اخذهه لاهلي

- اااااحممممد وتااالي وياك

- عمي شبيك هسه انه كلت شي جاي اسال على دجاج انته مسودن اليوم اطبك على صفحه اطبك عوفنه جاي نتفاهم عوفنه نشوف وجه الله هسه شكو حاط اذنك ويااي

- حلفت الله اكوملك وانته جلدك يحكك جاي حتى تنكتل

طفر هو بره طلع وانه رحت وراه كمشته يم السياره وضليت  ارزل بي وهو مختنك من الضحك كلتله..
- شبيك انته ماعندك احساس حس شويه وكول عيب مرت عمي هاي

- وعلي حبيتهه يكلك الكلوب سواجي عمي

- لاااانعل ساعه الخلفوك بيهه ياااجلب
امشي اطلع بره امشششي بس توصل هنا بعد اكسر رجلك

سحلته من فانيلته وطلعته بره بالشارع وهو يكحكح ويضحك .. قفلت باب الشارع وطبيت جوه ..

كعدت يم امي وهي تلومني عليه وجاي اشرب جاي وهو طب ويكول ..
- هااا وين استكاني خاف اخذته انته
- شجابك ولك ماعندك كرامه
- اااخ عمممي كلبي يحبك ياكرامه يابطيخ
شوف هيج كلبي يرفرف عليك خلاني اعبر امن الباب واجيك ركض وحاافي بهالظهريه
انته تدك بيه رزايل وانه رجلي انسمطت اكول هسه يحس هسه ينجوي ويهدني وانته ابببد قفلت على صويحبك فرررد نوووب

- ايي بعلي انجويت بس موبالي

- والله عمي هنيالهه لريري شلون ازلمه خذت
يشيل الوادم ويطكهم بالكاع لعيونهه

- اي صير مثلي لتضل مهتلف

- علمني شلون جبتهه وانه اكوم اضبط براسهه مثلك

ضليت اضحك وانه اتذكر سالفتي وياهه وشلون جبتهه بالف ياعلي وتواسيل وشروط وعناد ومشاكل وفلوس بكد راسه المربع تطلبني انطيهه ...

اخذته ورحنه للمحل وهو استلم الولد دك سوالف .. رجعنه من وكت للبيت ولكيت ريري محضره العشه نشواف بس نص ونص مستويات وصايرات دهن على حاله ..

احمد كبل كللهه ..
- حسدتج يمعوده شبيج ويانه

فكت عيونهه بوسعهه وتباوعلي .. وانه ضليت الزكهه منا ومنا واضيع الوكت بالسوالف وياه لحد مااكلنه وكمنا .. اغسل واشاورهه..
- تعلمي بعد تنشفين دهن الاكل لا كبل تشيلين من الطاوه للماعون
- وهسه يلا تتندر وتكولي احجي من وكت قبل ماطبخ كول تعليماتك
- صاار عيني امري لله بعد كبل الغدا والعشه اعيدلج الدرس كل يوميه
- اييي رااح اصعد اتحضر
- اووكفي شكول لاهلي هسه وين رايحين
- كللهم نروح لعمي المريض
- بعد التوبه اجذب هالجذبه
- هههه كللهم عدنا موعد الصبح بدكتور بصخام اي شي دبرهه

عافتني وصعدت .. رحت كعدت يم اهلي
واحك بشعري وافكر شكول شكوول ؟؟

تالي احمد كال ..
- اكــــِلك شوكت تصير ابو مو عجزت متكلي شوكت شو زواج وتزوجت يلاا عاد لحلحهه

- شعلييك انته هو رزق شوكت ميجي يجي

ضل يفر بايده ويكول ..
- تجي الحجايه  واستغفر الله

طنشته وكلت لامي ..
- علويه هاي ريري تريد تروح لدكتوره
وباجر موعدهه من الصبح وراح نطلع هسه نبات بيت عمهه هم نسلم عليه وهم نلحك لسره من الصبح

- هااه دكتوره ! ليش يمه

- ااا هي تفهمج بعدين بس حجزنا بعد

- مو بعيده يايمه ما ترحون هنا ماعدنه دكاتره

- بعد هي تكول من صاحباتهه وتعرفهه
مانتاخر باجر العصر نرجع

- يلاا يمه توصلون بالسلامه ضل خابر لاتخلي بالنه عليكم

-اي صار صار

عفتهم و صعدت لكيتهه فاتحه خانتي وصافنه
جان تكلي ..
- يلا زين اجيت تعال شوف شتريد تاخذ ملابس
- اي شي خلي انتي

تمددت على بطني وهي تكلي ..
- شو مكلوب شكلك شبيك
- ريري هاي طلعتلنه سالفه صفح النوب
- شكو
- الجهااال يردوني اصير اب
- هههههههههههه من ط... ي اجيبلك ولد
- انجببي
- عادي كللهم مرتي متخلف وفض السالفه
- اوووووف ربييي اوووف
- كوم يلا نزل الغراض حلبس عباتي واجيك
- طفي كلشي يلا تنزلين
-اوووكيي

اخذت غراضهه نزلتهن وشغلت السياره
وطلعتهه بره وهي اجتي صعدت وطلعنه
اول شي مريت فولت بانزين
وبعدين اشتريتلهه من المحل جكاير وحلويات
وكملنه الطريق لبغداد...

كاعده متربعه وشايله البوشيه من وجهه
وتشغل اغاني كل شويه تكلب وحده
وانه بالي يم السلفه بعد خمس ايام لازم ادفعهه
وهالمره مالحكت اجمع شي واخلي نص راتب وياه .. والمصرف زاد هوااي مادري شلون حدبرهه ..

كلتلي ..
- بعدك تفكر بالجهال

-لااا يا جهال انتي

- لعد شبيك

- هيج سالفه بالي

-هااا محتاج فلوس؟

-لا

- سلفتك هالاسبوع ادري مجامعلهه شي

- شمدريج

- مرتك لو قندره انيييي
كلشي ادري

-هههه
- اداينك
-لا

- باوع اني انطيك هسه عادي ادري بعدين حاخذ منك الضعف

- الله يستر منج

- ايييي دسولف ولك طريق طويل طكت روحي هيج ساكتين

- سوووولفيلي انتتي
- شنو

- اتفقنه صراحه لا تضمضمين عليه
- دحجي عااد شتريد
- هنه سؤالين اريدهن منج
الاول .. ابوج صدك ميت !

- اي ميت لعد شلون اخذت تقاعده

- شجان يشتغل

- مهندس طرق وجسور.

- وااالله

- مااحلف انييي داحجي صدك

- شلون مات

- مات بعد هو شنو شلون ماات لتضل تلح بسالفته عوف اهلي على جهه عندك غير شي كول لااا اسكت احسن

- زيين ززين
الثاني .. هم حبيتي واحد وعلاقه وهيج يعني

طكتهه بضحكه طويله وتضرب على رجلهه وهي تضحك .. جان تكلي ..

- لك بابه ياحب هذا !!
همه وينهم الزلم حتى احبهم شو اني سايكتهم سوووك

- يعننني ابد ماسويتي علاقه باحد

- شوووف هالبطراااان
لك هي العلاقه شنووو حجي ويه ولد تقصد !
هذا تلفوني متروووس ولد كلهم احاجيهم يعني عندي علاقه بيهم ! لاااا بس هيج شغل هاي علاقاتي

بس حبجيات وعمري وكلبي مااااكووو يا مصخم هذا يستاهل احجيله هيج

- ههه ااانه حجيتيلي

- انته اجذب عليك وعلى اهلك قابل صدك

- المههم هسه يعني كلبج فارغ

- مصفرر وروح ابويه
ماحبيت
الولد العرفتهم كلهم شغل
لو يردون بنات مني وادبرلهم
لو يردون ادبرلهم شغل يم فلان لو فلان
لو استغلهم اني حتى امشي شغلاتي
والي اشوفه بي مجال وخيخه اخليه ويه طلياني وهيج ماشيه الحياه

- هااا والبشاوات تذكريهم

-اي موجودين بس ماحجيت بيهم كلت خاف اطنكر عليه
شنو يهموك ؟ تريد تعرفهم ؟

- لااا كافي سدي الموضوع

- جنت تريد تسمع مني هذوله ماكو مو

- ردددت بس هي متصير

- بس قليلين تره
لان شغلي گواده اكثر

- وشتفرقين عن البنات العندج !

- لك بابه هذنيج كحااب وااني الگواده مالتهن
يعني انيي شغلتي ادزهن للولد وادز الولد الهن هاي يعني الگواده

هنه شغلتهن  كله بالعميق فتختلف السالفه

شويه خلي عندك ثقافه معلومات
لا بالجلاب عندك ثقافه ولا بالكحاب

اووف اووف

- هههه والله متشرفني هالثقافات

- ديلاا ع اساس شلونك انته
اكوولك  اني من الصبح تره اطلع فد بالسبعه اني طالعه فلا تكعد تسال وين وشعندج واجي وياج وتأخرني بهالسوالف من هسه داكولك اوووكييي

- بسس كليلي وييين وروحي شريد منج

- شعليك اسرار هاي
ولو انته صاير تخوفني صراحه

-لييش ولج

- احس بالك وياي وهالشي يضوجني
حياتي ماحب تحط خشمك بيهه وتنبش باسراري

- هااا وانتي ينعرف منج شي مااشاء الله مصفرره كلشي حواليج اسمج ماعرفته شنو شبعتيني جذب وماعرفت صدكج وين

- لحيت خو انته لحييت باسمي

رجعنا نتعارك بسالفه الاسم وشغلهه الممعروف وين .. لحد ما وصلنه بغداد احنه نتناكر بهالسالفتين ..

وصلنه البيت بنص الليل .. قفلت السياره ونزلت الغراض وطبينه البيت اضلم يخوف
كلتلهه ..
-هاي شلون دبرتيهه عيشتج هيج وحدج هنا

- تعودت

شغلت الاضويه والسبلت وراحت بدلت
واجتي كلتلي ..
- راح يجي حبزبز تريد اوصيه يجيبلك شي بطريقه
- لاا ، راح يجيب كانيور
- لا باجر اخذه منه بس فلوس عنده اريدهن
روح فوت نام الغرفه بدت تبرد
- لا خلي يروح المحروس ونام

ضلت بغرفتهه وره شويه اندكت الباب
وطلعت انه افتحه واجتي وراي ..

شفته شايل علاكه جبيره كبل اخذتهه من ايده
وانطاهه فلوس وراح ..

راحت كبل خلتهه بالثلاجه واجتي كالت
- راح اسبح انته نام على راحتك بيت بيتك عيننيي

راحت هي للحمام وانه ضليت متمدد ماكدرت انام بالي يم العلاكه .. شموصيه؟

رحت للثلاجه وفتحت العلاكه شفت كارتونه كيك .. ماكدرت اشيل لاصق خاف تدري بيه شفتهه ومبينه شغله خاصه عدهه ..

رجعت تمددت وضلت بالي شغلتهه وين تروح وشعدهه بالكيك ؟

اجتي لابسه الروب ولافه شعرهه وكعدت تصبغ اظافرهه .. انتبهت رجليهه منظفتهه
جان بادي الشعر بيهه هذنيج اليومين

ضلت تمشط بسرعه واجتي جرت مخده من جوه راسي وتكلي ..
-مخدتي هااي اخذ غيرهه

طفت الاضويه واجتي نامت ..
الغرفه فد نوب ظلمه وانه عيني ماخذت نوم بس اتكلب ..

ضليت منطيهه ظهري ومغمض اريد انام
وجان احس برجلهه بارده طخت رجلي

دفعت رجلهه برجلي ورجعت غمضت وهي كل شويه تشيل مخدتهه واطبطب عليهه
وترجع تنام .. تالي انداريت عليهه ..

- شبييج اركدي عاد
- شو ممرتاحه مدري شبيه يمكن لان كوني مو وياي هنا
- واانه شذنبي اريد انام
- ديلاااا عاد نمت

ضليت مغمض شويه وانداريت عليهه
وهي شالت مخدتهه وشمرتهه يم رجلي
عاد مديت ايدي كمشتهه جان اجفل
صحت بيهه ..
- هييي شبيج

-شكو

- ملابسج وين

-ههه سفردحي اليوم بيتي وبراحتي

- هاي صارلج ساعه نايمه هيج !

- اييي شنو ضوجتك !

- جفلتيني وعلي

- ههههه ليش يمه هاي بس لمس لو شوف شيصير بيك

- وعلي وعلي جفلت من طخيت بطنج
بويه استري على روحج شبيج وياي لخاطر الله

- شمسويتللك يااا تره معليه بيك
بس نوم مثل الاوادم مجاي انام
تفكيري باجر ومطير النوم من عيني
وهنا اني متعوده اناام هيج ارتاح اشبع بروده

- زين نامي بس لتخليني اشوفج هيج صبح
البسي حتى لو شورت بس لا هيج

- هههههههههه سوووده عليييه حويدر كاسر كلبببي

درت ظهري وعفتهه وهي خلت راسهه من يم رجلي .. مانداريت عليهه بعد وضليت مغمض لحد مااا نمت ..

حسيت الصبح على صوت الباب يندك  ..
هجموه هجم ..

كعدت واصيح ريري وماكو مترد ..

رحت فتحت الباب وشفت حبزبز سلم وانطاني علاكه بيهه صمون وجبن وكليجه
وكانيور وياه ..

ربطه بالشباك وراح ..
خليت العلاكه بالمطبخ وشفت الثلاجه ماخذه الكيك ..

خابرتهه مغلق جهازهه .. باوعت ساعه ثمانيه وثلث ..

هاي شوكت كعدت وتحضرت وطلعت؟؟

ضليت ادور على جاي وماكو هنا
لبست بجامتي وتمشيت لراس الشارع اخذتلي كلاص جاي واجيت للبيت تريكت وبعدني ادك عليهه ومغلق ..

للعشره ونص يلا نفتح خطهه وكبل خابرتهه ..
جاوبتني وصوت اغاني يمهه ..
- انتيي وين
- بالطريق فد لتلاثه  هيج وارجع 
- شكو طفيتي تلفونج
- اريد اخذ راحتي ميصير يعني
- استغفررر الله شكو هالكد تتاخرين بيامنطقه انتي
- طالعه هسه للرواد اريد اشتري كم شغله وارجع
- يلا لتتاخرين اكثر ولتقفلين تلفونج بعد
-اووكييي چااووو

سديته وضليت اكلب بالتلفون وبالي السلفه
عاد كبل سويتله فورمات وطلعت رحت ادور محل حتى ابيعه ..

دورت كم واحد يلا حصلت بي سعر زين وبعته واخذت نوكيا خليت بي سيمكارت ورجعت اتمشى للبيت ..

صارت هالمنطقه اليفه عندي حفظتهه وحفظت ناسهه .. محد يندك بيك اذا ماتندك بي ..

صح هوسه بس كلمن  حاير بنفسه الغريب كلهه تلتم عليه متخليه يعبر بس العرف مالهم دخل بي ...

طبيت اسبح وشفت عدهه بانيو هنا مبني ومغلف فرفوري ابيض .. اسبح واباوع لغراضهه هنا كلشي مافهم شنو هنه ..

بس كلهن ريحتهن طيبه كضيتهه اشمشم واسد

طلعت وكعدت اباوع تلفزيون جان تخابرني
ممتعود على صوت النوكيا كبل جاوبتهه ..

- هاا
- اكوولك كوومي مو تخليه بره صارت حاره تسمط فوته جوه ع البروده وانطيه مي بالطاسه الزركه

- اييي .. وينج عاد ماخلصتي شرايه

- لا بعد شويه يلا ماتاخر چااو

سدته وانه شمرت التلفون .. وكمت اريد اجيب هالجلب وهو ماينكمش اجيه منا يروح منا لو يكمز عليه واضل ادفع بي
وبالويل يلا فتحت السلسه وجريته جوه ..

سديت الباب وكابلته وكعدت .. هو راح يم السبلت وكعد بهدوء ..

جبتله المي ونزلتله الريش وعفته هيج هادىء بكعدته وانه اكلب بالتلفزيون..

كضيتهه صفنه وملل لحد مارجعت ريري ..
فاتت وجهه احمر ولابسه ثوب وردي كصير جوه الركبه بشويه وبي نفشه .. وردانه مثل الكركش للعكس وكعب ابيض وشعرهه مسويته ظفاير منا ومنا ..

كبل صحت عليهه ..
- شهالللبسسسس

- يبوووو

- ووووين وليتي من الصبح هييج بلبس الحفلات شعندددج من فاااينه

- تره لبس طلعه هذاا مو حفله ثوب عادي لو تعودت عليه بالبنطرون

- عاااادييي هيج عااادي
تكيفين بالعري

- ايي اييي اكيف بي معليك انته
هاي حياتي وهاي اني البس بكيفي اطب واطلع بكيفي لا تضل كل مانجي هنا تكلبهه سم عليه تره البيه مكفيني لا تنرفزني زايد

طبت لغرفتهه وانه شمرت الريمونت للكاع
وضلينه نتصايح كل واحد من مكانه لحد ما طلعت من الغرفه واجتي يمي تفرك بوجهه وتكلي ..

- هنا ممتعوده اخذ رايك بلبسي وطلعتي افهمني عاد

- يطبببج مرض رووحي عساج للقير مالي دخل بيج بعد

- ماااارحت اگوود تره لتضل تحرك برووحك انطيتك كلمه اني ماخون الوعد

- لااا خنتي هواااي خنتي
طلعتج هاااي مدري وين وبهالشكل اكبر خيانه

- باوع اني ممجبوره اقنعك بس وروح ابويه ماخنت ومو الي بالك طلعتي

حيدااار هاليوم اني عندي يأذيني لا تزيدهه عليه

تره لو اريد اخون كلشي اكدر اسوي بس اني انطيتك وعد ومحترمه عشرتنا صدكني روحتي لشي بعيد عن بالك

ضليت ساكت وداير وجهي عنهه وهي راحت
بره .. واجتي شايله العلاليك خلتهن يم رجلي
وضلت تفتح بيهن ..

كلتلي ..
- حويدددر لطنكر شبييك
شوف ششتريت ل امليييكه شووف

باوعت وجان بيدهه ثوب سمائي طويل عبالك بدله قماشه وتطريزه ..
-حلو

-طبعا حلو بورقتين الا شويه  هذا اكيد حلو

- شدعوا هيج غالي جايبته

- غير عيد ميلادهه الاربعاء واريدلهه شي يسوه تلبسه وتفرح بي
مو اني وعدتهه اطلعهه ملكه بهاليوم وهي تنتظر مني الوعد

رحت تعنيت لارقى محل واخذتلهه ارقى فستان
شوف حتى حذاء اخذتلهه ووصيتلهه الايباد اليوم حبزبز يجيبه العصر

هااا وتره فلوس حلال هاي لاتكعد انته وابن عمك تستشرفون براسي هذني من فلوس ابويه اووووكييي

- زين

- هم اشتريتلك تره مانسيتك عبالك افكر بس بنت اختك وانته لاا

هاك هاي علاكه كلها الك

خلتهه يمي وانه بس متجتف واباوع لللغراض
طلعت بعد كلبيه سوده كلهه شغل وكالت ..

- هااي لامك اختاريتهه
من شفتهه كلت شكد حلوه تكعد عليهه
وهم اني مقرره اخذهه ويانه لبيت ابن عمك
غصبا عليهه اخذهه

- الله كريم

- بعد بقى ابوك مالكيت محل براسه خير  مال دشاديش فمااخذتله شي بس يلا نروح العصر ندور على ذوقك هالمره

ضلت تباوع بوجهي وتكلي..
-شبيك ! بعدك ضايج مني
-لا

عفتهه ورحت تمددت بالغرفه .. وهي اجتي يمي توخر ايدي من وجهي وانه مغمض وماحاجيهه ..

ضلت تحاول وياي وانه ساكت ..
تالي اندكت الباب وراحت ..

وراهه اجتني تكلي ..
- يلا وصل الغدا تعال ناكل
-شبعان
- حيدااار شبيك لتخبلني شهالاسلوب ويااي

مارديتلهه وضليت على نومتي ..
اجتي كعدت يمي وتجر بايدي وتكلي..
- شبيك ليش ضجت هيج يعني متعودت عليه وعيشتي الزفره شبيك مدكلي شجاك

- مضايج منج عفتج بعد مالي دخل بيج

-لعد شكوو

- هيج مالي خلك

-تره اني هم مالي خلك كوولشش بس علمودك داحجي ولا اني طافره روحي

-اسكتي وارتاحي معليج بيه خلي كل واحد بعيد عن الثاني احسن

راحت وانه تغطيت وضليت اريد انام
ماريد افكر بشي بعد ..

سمعت الباب نفتحت كبل غمضت وهي اجتي نامت بمكانهه .. وانه انداريت انطيتهه ظهري
جان تجي تلزك بيه .. كلتلي..
- مالبس كصير بعد راح افصل غير فستان لهاليوم
- معليه بيج بعد ضلي لبسي كصير شسويلج
- هسه انته شبيك ويااي

جرت جتفي ودارتني عليهه وضلت مخليه راسهه فوك راسي ..
- جاي تصعبين عليه بيه شي لا اكدر افهمه الج ولا اكدر اتحمله
- كل الي ردته بالبدايه سويته الك بعد شنو
- مابينه تفاهم هنا ريري
هنا افكارنا كل واحد بصوب
لا اتعبج ولا تعبيني خلينه ساكتين احسن

ضلت تباوع لعيني وساكته .. بعدين وخرت ودارت ظهرهه ونامت ..

عفتهه وطلعت تمددت ع القنفه .. جريت العلاكه الجابتهه الي .. لكيت مشتريه بجامتين وحده زيتوني ووحده رصاصي وقميص وشورتات اثنين وفانيلات ...

ماعندي اي شعور هنا شمرت كلشي بالكاع ونمت ..

كعدتني بعدين وهي تكلي..
- كووم اكل وخلي نرجع يلا

لكيتهه معزله المكان ومخليه صينيه الاكل
والساعه سته صارت .. كعدنا ناكل وساكتين
وقفلنه وطلعنه وطول الطريق احنه منحجي

سلمنه على الاهل وانه كضيتهه اشتغل بحاسبتي وماحاجيتهه بعد لثاني يوم الصبح
كاعد بنفس مكاني وحاسبتي بحضني اشتغل بيهه ....

انه عندي موقع لازم اضل كل يوميه اتفقده والشغل الي ماسويه بالمحل اسويه هنا

ريري اجتي واخذت ملابسهه وراحت عرفتهن راح تسبح ..

وره شويه رجعت طبكت الباب حيل وضلت تباوعلي ..

انه لابس نظارتي وارفعهه اباوعلهه وارجع اباوع للشاشه ..
جان تكلي ..

- حيدااار انزع

- شنو شنزع

- اففف انزع ملابسك بله داشوف

-شتشوفين ؟

ذبيت الحاسبه على جهه ونزعت النظاره
كلتلي..
- انزع داشوووف

-هوو شكو وتشوفيه شكوو

- هو الموجود اريد اشوفه

- شبيج انتي صاحيه ! مو رحتي تسبحين شرجعج !

- يبووو حيدااار تنزع لووو لااا يلا تره بزعتني

-مااانزع هي بكيفج

- لك بابه بس اشوف واروح عادي لتستحي اني هم انزع اذا تريد

- ولج لا تسودنيني هو شكوو وتشوفيه
شكو شتردين

اجتي يمي وانه رجعت ليوره ونزلت من طرف الثاني وهي تكلي ..

- مااكلك بس اشوف
انزع عاد شبيك عليت كلبي دنزع عاد

- مااا انزع مااريد تشوفين هو شكو وتشوفين ولج بويه استجلي عاد اثكلي

- لتخليني امشي وياك بالموزينه انزع عاد

- ولييي منا ريري لتلعبين باعصابي

- حيدااار راح اجيك تنزع لووو انييي اتصرف

-وعليييي اكسر ايدج بس تمديهه على جسمي
ابقي يمج لتتحركين

- ههههه ولك باااابه شبييييك نخلست
بس اشوووف واروح

- شتسوين تشوفين شكوووو شبييج مو عيب هالحجي
جايتني هداده انزع مانزع شبيج الله سودنج عليه بهالصبحيه

- زيييين يعننني متنززع موووو

- بكيفج هو انزع ماااريد هي كوتره تجيني انزع اشوف شبيج انتي شبيج طبكن عندج اليوم

- خوووش لعد انته واحد عاجز وتخاف ادري بيك

- شنوووووه !!! صددك تحجيين !
شهالخرابيط هاااي شبييج

- اي هسه انته متريد تنزع كولي اني عاجز جنسي وااستحييي كووولها شكو بيهه

- رااح الطمج على حلكج انجبي عاد

- هسه شنوو تنزع لو لا

- هااااي شبييييج شكوو انزع حتى تكعدين تفحصيني يعني هيج تردين !

-اييي هيج اريد اتأكد شغاال لو لا

- استغفررر الله وتاالي ويااج منين طلعتيلي بهالسالفه ولج بويه عيييب عييب شجاي تمسلتين انتي

- شكو عيب مو مرتك انييي والي حق اشوف واعرف
هسه اخر مره اكولك تنزع لووو لااا

-لااا لااا لااا

- زيين لعد راح اعوفك هسه تفكر براحتك بس الك منا لليل تثبتلي انته مو عااجز
اذا ماسويت شي يثبتلي بعد اضل لاااازكه عليك بهالكلمه وهالمره مو شقه نحجيهه مثل قبل لااا من صدك اكرهك روحك بيهه
فاكعد فكرر ولليل اريد اثبات

.
.
يتبع