رواية ماء مغلي الفصل الثاني والستون 62 - بقلم Zoka 🌷

..♣️🩸 ماء مغلي 🩸♣️..
* adzzon *

اتلمس وجهه الحار وامسح الدم من حلكه
الابيض المتفطر ...
اغسل الوصله من الدم واعصرهه حيل
وارجع امسح جوه وجهه وركبته واغسلهه مره ثانيه واروح ركض للشباك اشرهه على محجر الشباك وارجع اشيل الخاولي الصغير
من كصته وانكعه بالمي البارد وارجع اخليه
عليه ..

ايده الجبيره الحاره تتلمس ظفايري
وبصوته يضحكني ويكولي ..
- فُله يا فُله
يا ئشطه الحِله

اضحك وانام على صدره واكوله ..
- وياسمين ؟

يتلمس وجهي ويغمض عيونه .. ويكولي
- ياسمين .. ورد الجنه والمؤمنين

- و دايي ؟

اباوع لوجهه وهو يبجي وجر راسي لحضنه
ضليت على صوت شهكته ابجي واحرك وجهي على ردانه امسح دموعي..

سمعت صوت الرعد و طلعت ركض لباب
الهول اباوع للمطر واركض اخلي الطاسه
الاستيل بنص الطرمه واكعد على حافه الباب
اباوع للمطر ينزل بيهه واندار اباوع لابويه
واضحك وهو يضحك ..

صار بيهه نص من مي المطر واخذتهه
وفتت جوه .. صبيت المي بكلاص وانطيته
يشربه .. والباقي اغسلّه منه ايده و وجهه
واروح ركض ارجع اخليهه جوه المطر ..
واسد الباب واكعد يمه ..

اسهر احجي وياه على المطر .. واسمع منه
سوالف على اهله والزواج .. وانام وراسي على بطنه والزم اصابعه باثنين ايديه اضل حاضنتهن ..

كعدت الصبح ولكيته وجهه متروس دم
ضليت اصيح واكعده وامسح بوجهه
اغسل وجهه وهو كعد وكالي اجيبله دفتر وقلم ..

فتحت جنطته واخذتله دفتر جبير وقلم
وخليتله المخاد وراه وكعدته وضليت
امسح بوجهه وهو يضحكلي شويه ويكتب
ويحضني شويه .. ويرجع يكتب ..

كتب ورقتين وطبكهن .. كالي ..
- واحده لفله و واحده للناس

اخذ اول ورقه ولفها بالوصله وشد الوصله على بطني جوه البلوز ...

والثانيه خلاهه بايدي ... وكالي ..
- اليوم جمعه والناس كُلها تصلي الجماعه هنا في الجامع الصُغير .. دول الي يلبسو الثوب الابيض والطائيه البيضه
تاخدين المكتوب ده و تروحي تديلهم
اسألي على شيخ الجامع مين وتخليها في يدو

- اروح لوحدي ؟!!

- روحي تفسحي ساعه كده واديلهم المكتوب ده وانتي ماشيه
معلوم ؟

- معلووم

- تخليها في يد الشيخ الكبير وتحكيلو من
بابا ممنووع يااا فله ياا حلوه بيتنا ممنوع
تحكي بااوِك
بابا سمعيهالي يلا !

- بااابا

- شاطره ياعين ابوكِ
رَوحي يلا

اخذت الورقة وطلعت للشارع مشيت وحدي
والاصوات عاليه هنا وهوسه خفت اكمل
ورجعت ركض للبيت ..

شفت ابويه واكف يغسل و اني ركضت
حضنت رجليه ...
كلتله اخاف .. الشارع هوسه واخاف السيارات مااندل وين الجامع ...

صار يدليني المكان بالمضبوط ويكولي اسألي الناس ويدلوج اذا نسيتي الطريق ..
واني مااريد اطلع وحدي .. كلتله ادز واحد من الجيران وما قبل ...

دنك عليه شم وجهي وشم شعري وركبتي
وكالي..
' الشارع ما يخوف الناس هي الي تخوف وانتي ما عليج بالناس ..انتي قويه انتي بنتي
ذكيه وقويه بيج كلب محمود '

حضنته وهو كالي بوسيني ..
بوست خده وكالي عيوني هم .. وبوستهن
وطلع وياي للباب ضل لازم الباب وواكف
واني امشي بالشارع والتفت اباوعله
وهو يباوعلي ويضحك ..

مشيت مسافه هواي بعيده عن بيتنا ويلا لكيت جامع .. شفت الباب مفتوح وفتت جوه حديقه
وكدامي هواي رياجيل وصوت عالي ماافهم شيحجون ..
ضليت واكفه ولازمه الورقه واجاني الحارس
سألني
ويامن جايه ؟ كلتله اريد الشيخ
كالي انتظري تخلص الصلاة

وانتظرت بالحديقه كاعده واتلمس من فوك البلوز اتأكد الوصله الشدهه ابويه بعدهه هنا ما وكعتهه ...
ضليت افتح الورقه وارجع اطبكهه
مااعرف اقرا المكتوب ...
اعرف بس احسب رياضيات...

انتظرت وانتظرت وهمه اصواتهم عاليه بالحجي جوه وطولو ما طلعو ...
جوعانه وصار الظهر واني مااكلت من غدا البارحه ..
افكر باابويه خاف رجع الدم ينزل على وجهه !
هم هو جوعان بس هو قوي واني من اشوف الشيخ اكوله محد يجيبلنه اكل وهو راح يجيبلنه ...

انتظرت هواي بالشمس وهمه بدو يطلعون
ركض بيناتهم اباوع بالوجوه وحسيت على واحد جرني من ايدي ..
شفته الحارس يكولي ..
اطلعي بعدين ماخلصو بعدهم ..

رجعت كعدت بمكاني وانتظرهم يخلصون
وشفتهم صارو يفوتون صياني اكل كبار
جوه الهم .. وردت افوت وهم الحارس ما خلاني لحد ما يكملون اكل ..
وضليت انتظر بالشمس اخلي الورقه على عيوني واضل هنا اتدفى جوه الشمس لان الجو بارد ..

صارو يطلعون يغسلون واني واكفه يم الحارس ما يخليني اتحرك ..
ضليت انتظر لحد ما هو اخذني جوه للشيخ
انطيته الورقه وكلتله ...
- بابا

اخذهه قراهه وضل يباوعلي ويهز براسه
وكالي اكعدي اكمل شغلي ويه الناس ونروح

وضليت كاعده وهو طلع .. وطول هواااي يلا رجعلي وسألني ..
ابوج شوكت انطاج الورقه ؟
كلتله الصبح ..
كالي لعد ابقي انتظري عندي حجي ويه رجال مهم اكمل واجيج
وكفته وكلتله ..
' بابا مريض وجوعان صار الظهر ما اكل '
كالي ماتأخر نص ساعه ونروح ...

وكعدت هنا انتظر واشوف ولد صغار مسوين دائره وحدهم وكاعدين يتشاورون ...
واني كل شويه اكول افففف
والشيخ طول يلا رجع ...
وكالي يلا نمشي ..

طلعنه وشفت ماابايده اكل .. كلتله ..
' اخذله اكل بابا مريض وجوعان '

هو مايفهم على نبرتي بالحجي اني احجي
بلهجه مصريه وشويه عندي مفردات كوردي
حافظتهن من امي .. والعربي على خفه لفظ المصري .. وضاج مني صار يطنش حجيي
واني الطريق كوله احاول افهمه واشرله على الاكل وهو ساكت بس يمشي ...

وصلنه المنطقه وهو عصبي ويمشي سريع
واني ركضت كدامه للبيت ...
دفعت الباب مفتوح وبسرعه فتت جوه
اصيح لابويه ...
وشفته نايم ...

طلعت ركضت بره وجبت الشيخ استعجلته
وفات جوه وياي .. واني كعدت جريت الوصله ومسحت حلكه وخشمه من الدم
والشيخ يمه يحاجيه واني احاجيه وهو ما يرد علينه ...
وخرت من يمه والشيخ فتح عيونه وحط راسه على صدره وبعدين باوعلي ...

ضل يباوعلي واني لازمه طرف البطانيه
وكاعده يم رجل ابويه ..
والشيخ وكف وكالي ..
ابقي هنا واني شويه وارجعلكم ...

هو راح واني كعدت بمكانه وسويت مثل ما سوه ..
فتحت عيونه واباوعلهن واحاجيه وبعدين سديتهن وخليت راسي على صدره و شويه وخرت ورجعت هم خليت راسي ومادري شسوي ! بقيت هيج مره احاجيه ومره
اتلمس بوجهه صاير بارد ..
بعدين شلت البطانيه ونمت بحضنه وتغطيت
وغفيت ....

حسيت على ايد بارده على ركبتي فزيت
وشفت رجال هنا ديشيلني واني كمت اصيح
وادفر بي ..
وهو نزلني وعافني كالي بس ابقي هنا بعيده
انداريت واشوفهم ديلفون البطانيه على ابويه
يق
- لااااا بابا

اصيح واصيح وهمه اخذوه وطلعو
ركضت وراهم للشارع حافيه وهمه صعدو بالسياره ادفع بالرجال اريد اصعد بالسياره
وما خلاني اصعد ..
دفعني ووكعت على الرصيف وضليت ابجي
واصيح وهمه شغلو السياره وراحو
ركضت وراهم و السياره صارت بعيده
واني ابجي براس الفرع واعيط بعلو صوتي
والناس تباوع عليه ....

اخذتني مريه سودانية رجعتني لبيتنه وكعدت
تغسل وجهي واني اشهك وابجي
فهمتني رايحين للدكتور وميصير الجهال يروحون هناك ...

رحت لفراش ابويه نمت بدون غطى
وبقيت ارجف وابجي وحدي بالبيت
واصيح..
- داااااااايييييي ... دااااايييي

صار الليل واجتي المريه جايبتلي لفه
خبزه وبيهه خضورات وبتيته ..
اكلتهه وهي كلتلي ...

عندي بنات بعمرج اكعدي وياهن العبي لحد مايرجع ابوج ..
ماقبلت اروح وياهه لبيتهه وضليت هنا وحدي قافله الباب وكاعده ..

انتبهت اكو جنط يم الثلاجة.. رحت جريتهن
ثكيلات .. فتحت اول وحده وشفت بيهه
ملابسي ولعاباتي واحذيتي والثانيه بيهه
ملابس امي وابويه وصورنا ودفاتر شغل ابويه وحذاء كعب لامي وحذاء اسود لابويه

ضليت نايمه على الجنط وابجي ...
ماتحملت ابقى هيج وحدي .. طلعت للشارع
وضليت امشي وامشي ورحت للجامع ..
فتت جوه ادور على الشيخ وما لكيته ...
ضليت كاعده يم عتبه الباب وانتظر بي
واجاني الحارس ضل يصيح عليه واني ابجي
يكولي روحي لبيتج واني اكوله اريد الشيخ

راح وبعدين رجعلي هو والشيخ ضليت ابجي واسأله على ابويه وهو كعد يمي فهمني
ابويه وصاني ابقى وياه وهو ياخذني لمدرسه
اتعلم واعيش ويه هواي جهال اهلهم دزوهم هناك يتعلمون بين ما يرجعولهم ...

وبقى الليل كله وياي يعيدلي نفس الحجي
كلتله اريد الورقه وطلعهه من جيبه وانطاني اياهه .. ضليت لازمتهه بايدي لثاني يوم الصبح رجعت لبيتنا ويه الحارس مال جامع
ولكيت ابو الايجار هنا ما يقبل افوت للبيت
واني اتعارك وياه ...

اكوله هذا بيتنا وغراضنا وهو يصيح والحارس حجه وياه واخذ بس الجنطتين
وطلع .. رجعنا للجامع واخذني الشيخ بالسياره لمكان بعيد ....

نزلني بمكان بي بس جهال ونسوان كبار كاشخات وشايلات عوده خشب رفيعه
كالي الشيخ ...
' ابوج يريدج شاطره '

سألته شوكت يرجع ؟؟؟ كالي ..
' من تكبرين يرجع '

راح وعافني هنا وحدي اباوعلهم وهمه يباوعولي واجتي مريه اخذتني من ايدي
جوه لغرفه جبيره بيهه هواي جربايات
ودلتني على مكاني ...
كعدت على الفراش وهمه خلو جنط جوه جربايتي وراحو ....

بقيت متمدده هنا بس اباوع للمكان وامسح دموعي..
صارو ياخذوني وياهم للاكل وياخذوني للساحه واني من احجي ويه الست ماتفهمني تعيط عليه واضل ساكته ...

دخلوني صف الكل تتهجىء وتقرأ واني ماعرف اقرأ..
ماافهم على كتابتهم ومن تجي المعلمه
تكتبلي حروف وتكولي اقريهن اني على السمع منهه اعيد اقراهن وماكدر الفظ مثلهه
تضربني لان ماعرف الفظ (ح ) ولا ( ق)
ولا (ظ)

تصيحلي ( المصرية) وتستهزء بيه كدام الصف كوله .. واني اضل كاعده ومدنكه ساكته ...
كلشي ماعرفت اتعلم وكل درجاتي صفر
والدرس عندي كابوس كل يوم اعيشه

صرت اعاند مااروح الصبح للدرس
وكل الجهاال يطلعون للدرس واني ابقى بالغرفه ابجي والمديره هنا تصيح عليه وترزلني وتجرني من ملابسي بره الغرفه تطلعني واضل معانده مااروح ..
اضل كاعده بالكاع وافغر من البجي ومااروح وياهن ...

صارن يعوفني مااروح للدرس بس لازم اطلع
للساحه اضل بره كاعده لحد ما يخلصون الدرس يلا افوت وياهم ..
البس قمصلتي الكصيره ايدهه عليه واضل كاعده بره جوه السقيفه مال المبنى ..
والهوا البارد يصل باعظامي واضل كاعده هنا لحد ما يصير الظهر ويرجعون الجهال
للغرف وكت الغدا يلا افوت وياهم واحصل اكل لان الصبح ماعندي حصه بالاكل
عقاب لان ماروح للدرس واعاند ...

العصر ابقى بس بالغرفه افتح جنطه واطلع
بلوز ابويه الجبير اضل احضنه وابجي
عرفت هنا اني صرت يتيمة...
وهذا ميتم ... كل الي ماعدهم اهل هنا يبقون
واهلهم ابد مايرجعون ...
يعني بعد ماكو ابويه جذب ما راح لدكتور
ولا يرجع من اكبر ولا اسمع منه' فله ' بعد
كوله يصيحولي المصريه ...

ماكو بعد ' داي ' ما ترجع وتخيطلي هدوم جديده وتسمعني قصه بين ما يخلص دوام ابويه ويرجع نام كلنه سوه نفس الدوشك الجبير واللحاف الستن الوردي

كلهم راحو سوه ليش عافوني وحدي !
ليش اني مو وياهم هناك ونعيش نفس قبل كلنه سوه ... ليش ياسمين راحت واني بقيت ماعرف اروحلهم !!!!
كل يوم اسأل ليش اني وحدي!!

وعشت وحدي هنا من الكل منبوذه
محد يصيحلي باسمي ولا يكعد وياي
لان اني عنوديه ويخافون المديرة تعاقبهم اذا يحجون وياي لان هي متحبني يخافون
يكعدون ويه التكرههم المديرة لانهم
' مو زينين '

انسد خشمي بعد من الدموع والحسره كاتمتهه واكابر عليهه بالحجي السريع .. بس بعد ماكدر سديت التسجيل ...
وحفظته بعنوان ..
' اسمع هذا اولاً '

ذبيت التلفون وشهكت قهر فراكهم وضليت حاصره وجهي بالبطانيه وابجي ...

اندكت باب غرفتي ورفعت راسي وضليت اخذ نفس قوي وامسح وجهي بالكلينس
واصيح..
- هاااااا شكووو شكووووو

صوت خادمتي ' ريتا ' ..
- The bathroom is ready madam
Will cool down the water
Come on madam

( الحمام جاهز وسوف يبرد الماء هيا سيدتي )

- okkkkyyyyyy

فتحت الباب وطلعت هي تمشي وياي للحمام .. شفت البانيو
متروس مي و شرائح ليمون .. وصيتهه تترسه ليمون اريد اشتم الريحه بيه تبقى ...
مديت ايدي للمي حار ومناسبه حرورته ...

كلتلهه...
- okay thanks
After one hour come to me

( شكرًا بعد ساعه تعالي الي )

طلعت واني نزعت ملابسي وتمددت بالبانيو ..
خليت ستاند التلفون على الخشبه الطويله كدامي وسماعات البلوتوث باذني وفتحت باليوتيوب
' كارتون إيميلي ' وضليت اباوع واني بالمي ...

اندمجت ويه الحلقات ونسيت كل الي جنت بي ..
اجتني ريتا وره ساعه .. دخلت للحمام وكلتلهه تاخذ التلفون
وتغسلي شعري ...

كملت غسل ونشفت جسمي واني اباوع للكدمات الصايره بي
على الخواصر وركبه رجلي ...
والترهل الي صاير بجسمي من الضعف ...
ماطقت شكلي ولبست البرنص وطلعت ....

نزلت جوه صايره الصاله والمطبخ وفوك غرف النوم والحمامات
كعدت على قنفتي الرصاصيه و جابتلي الغدا ...

صينيه كامله عباره عن بلاستك كل الي بيها ..
الخاشوكه والكلاص والماعون ..
اكل شوربه خضروات ومابيها زبد ولا ملح بس خليط خضروات
و عندي نص ليمونه هنا اعصرها عليهه واكل
بدون خبز او صمون ..
وبدون سلطه ..
مااكدر اكل اي نوع اكل ينهضم لازم الا سائل وبدون دهون ولا لحوم ولا ملح او شكر ...

اكلت ويمي سله زباله جبيره من اكمل اكلي اكوم ادوسهه برجلي وينفتح القبق واشمر كل الي بالصينيه استخدمه للزباله ..
واخذ الصينيه وحدهه للمطبخ ..

اشوف ريتا كاعده تاكل وتخلي بماعونهه اكل قليل
اروح افتح الثلاجه واطلع الفواكه واخلي يمهه وادزهه تصب الهه بعد
مشتريتلهه كارتونه كيك وكارتونه بسكوت محشى و هي عايفتهن متاكل منهن ..
الا اني اطلع وانطيهه وره ماتخلص اكل تاخذهن تاكل شويه منهن وتعوفهن ويضلن عدهه للمغرب يلا تخلصهن

تستحي تاكل هواي تكول هي ممتعوده تاكل اكثر من صاحب البيت
وتكولي انتي محرومه منهن اني ميصير اكلهن كدامج
افهمهه اني اريدهه تاكل لان اني محرومه من الاكل احس بقيمته
ماريد غيري هم ينحرم منه وهو يكدر ياكله ...

خادمتي ريتا سيريلانكيه ومتعرف تحجي عربي بس انكليزي .. اني من طلبتهه ردتهه ماتعرف عربي حتى بكيفي احجي كدامهه
من اضوج واخربط بالحجي هنا وهنا
ماتلزمهه عليه حجايه ...

فتحت تلفوني و عمي مراسلني وما رديت عليه بساعتهه .. هسه تفرغت وخابرته ..

- هلو عموو جنت اسبح وهسه لزمت تلفون

- اي نعيماً بابه نعيماً
شلونج مرتاحه وحدج؟

- اي مرتاحه

- خابرتي لرجلج ؟

- اي خابرته البارحه وتفاهمنه كلشي تمام

- ها يعني ماازوجه ثانيه ؟

- عمو فدوه اروحلك هاي هم سالفه تحجيهه
ضل عايز بس يزوج عليه

- ههههه بابه انتي وين كاعده دليني مكانج
خلي اجي اشوفج اني بغداد

- صدددددك !! من شوكت رجعت ! وشعجب

- من اجي احجيلج يلا كولي وينج
كاعد بالفندق وحدي طكت روحي
مشتاقلج بابه خلي اشوفج

سكتت شويه وكلتله...
- التقيت بحيداار؟

- اي طبعا
خوش رجال زين يعني اخلاق بس بدون خلقه

-لااااا تره هو حلووو ومرتب لتحجي عليه
خطيه هاي لان تعبان يجوز متغير

- يلاااا يلاااا هسه خلي يولي
كولي وينج يلا اريد اطلع احجي عاد

-تجيب حيداار وياك؟

-لااااا شعندي ماخذه اني اريد اشوفج وحدي
شعليه بي

- اوووكي لعد عمو اعذرني
اذا تريد اني اجي اشوفك كول يافندق واجيك
بس مكاني لاا مااكوله
اعتذر عمو
بس انته مو اعز من حيداار واحجيلك واله مااحجيله

- هيج صارت ولج!
تفضلييييه عليييه
ااااني تفضلين عليه خلك وجال ماعرفتي الا البارحه !

- عمو هذا حق وتعرفني مااضمضم حجي واجذب كدامك

سد الخط واني شمرت التلفون وتمددت على القنفه... وغفيت شويه ...
من كعدت دزيتله رسالة اصالحه بس هو ما شافهه ..
ماهتميت ... عشره الناس تعب وياريت يضلون بعيدين وزعلانين ...
بعد مااجامل احد واحجي الي مو بيه
هذا حجيي وهاي قناعتي ورغبتي
الي يعجبه خلي يسمعني والي مايعجبه خلي يدور وجهه ويروح
لا يأثر عليه ولا أثر عليه ...

طلعت وكت المغربيه بره بالطرمه وشفت كانيور هسه دياكل .. عفته وضليت اباوع للسمه شويه ورجعت جوه ...
اخذت علاجي وكعدت اشرب عصير
( موز وتمر و جوز مطحون )

تعشيت شوربه عدس بدون بصل وقليل شعريه وخفيفه كلش ومضروبه بالخلاط
مااحس بيهه بفد طعم غير طعم الليمون وشويه حلاه على فهاوه العدس ...

ردت اكمل تسجيل بس ماكدرت بعد
احس هواي كل هذا بيوم واحد ارجع احجي
واسمعه واشوفه واعيشه من جديد ..

عفته ورحت نمت بغرفتي فوك ...
وتمشي الايام بنفس الهدوء والوحده البارده
على الروح ...

مغربيه جنت اصلي والتلفون يدك ..
كملت صلاه يلا رحت جاوبت عمي ..
كبل كالي...

- رجلج تخربط واخذته للمستشفى تجين تشوفي لو اخابر اخوته وادزه لاهله ؟

- شبييي !!

- هو كلبه تعبان و يمشي تاتي تواتي
شبي يعني مريض يمكن انجلط شمدريني هذا
رجلج .. رجل مدندله بالكبر ويمشي بتك رجل بالدنيا
تريدي لو لااا !
يلا داعرف اتصرف

- عزا بعيننييي
اجي شلون اعوفه هسه اخذ تكسي واجيكم
انتو وين !

انطاني اسم المستشفى واني صحت لريتا جابتلي جبتي والجزدان وطلبت تكسي
كريم بين مانتظر ديوصل الكابتن
اني الف دعوه دعيت ...

وصلت التكسي وطلعت امشي بيه ما بيه ..
هناك رحت شفت عمي واكف بأب الطوارئ
ينتظرني ...
لزمت ايده وهو كبل اخذني عليه ...

شفت حيداار فاقد فد مره .. فهمت من عمي
هو جان كاعد وياه ومخلين العشه دياكلون وخابروه وصار يتعارك بالتلفون واختنك
راح يمشي مسافه ووكع وعمي متلاحكله ..

لزمت راسه واحاجيه وماكو ما كعد ..
عمي شاف وضع المستشفى خربطه
ولعبان نفس كالي ..
- خلي نطلعه منا شنو الحال هذا !
هسه نتمرض كلنه ونموت مو بس رجلج

راح وره شويه رجع وياه دكتور
فحصه وعمي يحجيله شنو انطوه من ابر والتخطيط السووه شوفه اله ...
وهذا من سمع حاله متكرره عنده كال
طلعوه عادي وهو يكعد وراجعوه عند اخصائي او اذا تريدون انتظر لحد مايكعد واخذوه كيفكم ...

هو راح وعمي كال ..
- زواااج احنه نضل ننتظر هنا
امشي ناخذه وهو خلي يريد يكعد يريد ميكعد
كيفه بس خلي نطلع منا لعبت نفسي

- عندك سياره ؟

-اي عندي

- زين لعد يلا خلي ناخذه لبيتي

باوعلي صفح وراح صاح ولد واجوي شالوه
وطلعوه للسياره ...
واني كعدت بالصدر يم عمي ودليته الطريق
وصلنه البيت ونزل عمي يباوع للبيت
ويكولي..

- احنه متهجولين وانتي كاعده بقصر وحدج !

- بفلوسي جبته
انتو شبيكم صغار  ماتعرفون تدبرولكم بيت !

- خلي يكععععد رجلج خلي يكععد
و اشوفه الحجي شلون قصدته

دكيت الجرس واجتي ريتا فتحتلي الباب
وكلتلهه تساعد عمي ...

وفتت جوه نزعت الجبه والشال وغسلت ايدي
بين ما همه فاتو ونوموه على القنفه ..
رحت يمه ومسحت وجهه بخاولي مبلل
وضليت اباوع لعمي ..
ضحكت وكلتله...

- صابغهن للشيبات تصغر بنفسك عيني

- لاحكتني ع الصبغ !
شيبني القهر وتلاحكتله

ابتسمتله ودنكت اباوع لحيداار وعمي راح
يغسل وره شويه رجع و حط طرف اصابعه
بطرف خشم حيداار كرصه هنا وحيداار فز وحرك راسه..

راح يغسل مره ثانيه واني ضليت اتلمس وجه حيداار وهو يفتح عينه ..
رحت شلت راسه وكعدت وخليته بحضني
هو ضل مفتح عيونه وصافن عليه
جان يرفع ايده وباصبعه طخ خدي
ضحكت ودنكت خليت كصتي على كصته

هو ضل يصيح...
- ريرررررررري تعبااااان نعلى علييييج
نعلى عليج ريررري
يضرب بيه واني حاضنه راسه.. شويه وخرت وكرصت خده مابيه لحمه ..

وكف عمي يمنه وصار يحرك بوجه حيداار
وهو دفع ايده ..
عمي كال...
- صااار زين صار زين
يلا عوفيه كومي سويلي عصير بارد
حطيلي بي عسل فد خاشوكتين كبار

رحت للمطبخ وطلعت العسل من الثلاجه ووصيت ريتا تسوي عصير برتقال
وتخلي بكلاصين ...
ضليت كاعده هنا على الميز وافرك براسي
من أكوم فجأه عيوني يصير كل شي بيهه اسود وبعدين مثل الضباب وراسي كأنه يتحرك ليكدام ويرجع لوره وبعدين يلا يرجعلي النظر زين واتوازن .....

انطتني ريتا شويه عصير شربته وهي اخذتلهم الكلاصات .. من رجعت وصيتهه
تصعد تحضر غرفه لعمي .. بس تمسحها وتفتح بيهه التبريد ...
وتغير الفرشه ..

رجعت كعدت يمهم ... عمي عينه بتلفونه وبايده كلاص العصير وحيداار مخلي الكوشه على وجهه عاصرهه ...
وعايف عصيره ما شربه ...

وكفت و كلت لعمي...
- من رخصتك عمو راح اصعد حيداار ديرتاح
اشرلي بالكلاص روحي وما رفع عينه عليه

لزمت ايده وهو وخر الكوشه من وجهه واني جريت ايده كعدته ...
رفعت شعره من وجهه وهو يباوعلي بعصبيه
مشينا للدرج واني لازمه ايده وظهره
وصعدنا ..

اول غرفه هنا هي غرفتي.. بيهه نفس اخشابي هذيج ماغيرتهه..

سديت باب الغرفه و رحت فتحت الكنتور
وطلعت ملابسه .. بكلشي محتفظه اله
ومشتريتله جديد ..

وكفت يمه واني شايله الملابس واباوعله
وهو عصبي.. خليت ايدي على جتفه وهو ضربني راشدي ...
بقيت ساكته ولازمه جتفه .. ورجع هم مره ثانيه ضربني اقوى ..
رفعت عيني بعينه واحاول اسيطر على الدمعه ...
وهو عصر وجهي بايده ويكولي....

- ضاع الحجي ويااااج ضااع
من اموت يلا تحنين ! من كضيتي بيه يلا تذكرتي عندج رجل

لج انتي شنوو من بششششر !!
تدرين بروحج شسويتي ! تغافليني وتطلعين ومتحترمين ليييييش ولج هييييج علمتج وياااي هييييييج ردتج وعاشرررتج

يصيح عليه يكولي جااوبي واني ساكته
ضربني على وجهي ودفعني للكاع ..
وراح كعد وضل لازم راسه ...

جريت ملابسه من الكاع واخذتهن وكمت
رحت وكفت كدامه وحضنته وهو بايده يضربني على ظهري ...
جريت ايده وكلتله...

- كافي حبيبي كافي تعبان انته ارتاح كافي

جرني من زندي وكعدني كدامه بالكاع
وكالي...
- كلشي بمزاجج تسوي  ! تطلعين وتطبين وانه شامرتني وره ظهرج
وهسه تجيني حبيبي !!!!

-حيدااار مااسويت هيج من مزاجي
عفتكم لان طلعت روحي بعد مااتحملكم

- جاااا ما ضليتي بعيده
ليش هسه طلعتي بوجهي !
شتردين ! حنيتي ! لو ضل بعد عندج شي مااخذتي مني !

- هسه ارتاح ونحجي بعدين ماطايرين

- خراااااا بيييييج لاااتضلين تماطلين
مااااكعد بيتج بعد وانتي تصولين وتجولين وياي بمزاجج
هسسسسسه كلمه الوحده تحجيها
واروح اولي ونعلى على شيب اهله
اليدورج بعد ويفكدج

تريدين الطلاك ! كولي مااريدك طلكني
وخلي نكطع كلشي هسه ولا اعتب عليج بعد ولا تعتبين عليه

- يا طلاك حيداار شبيك

- انتتتتتتتي مااااترررهمين وياي
بعد ااااانه هيج مررره ماااتحملهه
انطيتج العذر مره و مرتين بسس بعد
مااالج عذر انتتتي مو شكول عشره ومحبه
مره التطلع من شور رجلهه مااالهه ضله وياي ولاا الهه عذر كدامي
اااانه مو كواد عندج و مكرن اعوفج بحل شعرج تعيشين
عفتج كااااعده بيتج مأمن عليج واثق بيج
ماااتطلعين وتغافليني لييييييش تدوسين على كلمتتتتي وتطلعيييين

دفعت ايده من وجهي وحجيت بصوت عالي..
- اااانته ورمت كلببببي مااااكدرت اعاشرك بعد
حتى من اريد انسى كلشي بيه يرجع يذكرني

- اااااجيتج معتذر انتي الماتقدرين وتنطين مجاااال واحد يداريج ويصلح غلطه
انتي عنوووديه وخشم يااابس ماتعرفين تحترمين ولاتقدرين العشره
تفكرين بس بروحج بس انتي تعبتي بس انتي نقهرتي
كلنه تعبنه ونغدرنا
اااانه تعبت اكثر منج وخسرت كلشي عندي
و وكفت وياااج ردتج وانتتتتي الي ما ردتيني

مسحت دموعي وباوعتله...
- المشكله انته اجيت بالاخير
اجيت وره كل التعب وصرت بس انته راحه
من غلطت اني حملتك ذنب كل ذاك التعب
كل وجع مر بيه طلعت قهره بيك

- انتي هم غلطتي وياي
غلطتتي بطلعتج وعنادج غلطتتتتي مو هينه طلعتج هاااي عليه
حركتي بيهه روووحي و كرهتيني بساعه العرفتج بيهه

وكف ونزع تيشرته وشمره على الميز
وجان اكو بطل مي بي نص
اخذه وفتح القبق ركضت داجره من ايده
وهو دار المي كله على راسه ..
صيحت عليه..

- لييييش تاااخذه لك هذا مالتي

- هسه شصار

- اخاف تنعدي مني حيداااار شبيييك هسه ذاك حمام روح غسل ليش تاخذ هذا

- هسسسسه ضلت على قطره المي تموتني
خااب ماتسكتين

- حيداااار

- شبيييييج !!! لتضلين تنكين براسي
احجي يلا مو تردين دين وصخام بعينج
شتردين كولي واطلكج يلا احجيهه شبيج ساكته

انداريت وعفته .. فتحت الكنتور وهو يكولي ..
- ماااتحجين ! جا تردين الطلاك كبل
اطلكج هسه والله واروح وكلشي مابينا بعد لا شروط ولا ديون

اخذت خاولي ورحت انشف شعره ووجهه
وهو يكولي ...
- لا تحنين عليه مااااريد محنتج
ااااانه مخنوك محتر عوفيني وخررري

- انته مو هستوك طالع من المستشفى شبيك هيج حامي واعصاب صاير
شو اني من اطلع مابيه اشحط رجلي

- انتي فززتي بيه كل الحيل والاعصاب
من شفتج كل القهر صحى براسي
ريري ماااريدج بعد صدك احنه ما نتراهم
انتي براسج شي وانه براسي شي ثاني
ولاا انتي تقنعين وياي ولا انه ارضى بسوالفج
خلينه صدك نتفارك بعد

وانه والله عفتج كلت بعد لو اموت بدونهه ماارجع وادورهه
بس ربج راااد ارجع واشوفج اليوم
وكعني بمرض حتى كلبج يحن بالتالي عليه

ولا اريد منج المحنه ولااا تكليلي حبيبي وهسه تكعدين تداريني
خاف جنت كبل اكلج ارجعج غصباً عليج
لان جنت اريدج بعد هسه اااانه اكلج مااريدج
وضلي بعنادج انه الاعوفج

باوعت بعيونه وهو دار وجهه ...
كلتله ...
- زين عوفني بس لا تطلكني

- هااا مااطلكج وتضلين تجرعين طول وعرض بكيفج وانه هناك حاط ايدي على خدي  ومسربت مرتي وحدهه

- متكدر تطلكني
انته مديون الي وحلفت وتعهدت تسويلي الي اريده

-واااااانتي شترررردين احجي
شتردين وانطيييج وروحي

شمر العطر من الميز ليم رجلي ..
وضل مركز بوجهي ..
كلتله ..

- اريدك تغسلني وتدفني بايدك من اموت

فتح حلكه يريد  يحجي وسكت .. تقربت عليه حضنته وكلتله ...
- من قبل ادري بروحي اموت وحدي ويخوفني هالشي مااريد يدفني غريب
اريد واحد من اهلي وياي ...

- هذا الشرط. ؟

- اي .. شرطي ما تطلكني حتى متخليني اموت وحدي
بس هالدين اريده منك

باوعتله وماسيطرت على دموعي بعد
كلتله ...
- اني عناديه وشرسه وماارحم الياذيني
الدنيا خلتني هيج اتعلم اصير
بس مااردت اذيك والله

شوف هذا البيت كوله الك .. الغرفه كلهه غراضك ..
اشتريت البيت الك .. اخذته بيت جبير
بي كلشي مثل ماتحبه ..
هذا بيتك وبمنطقتك الي تحبها
بعت بيتي والسياره ودار الازياء وفلوسك
وياهن واخذتلك البيت الي تحبه بمحيط الكاظميه

كولشي الك هنا .. الغرفه هاي شوفهه كلها صورك .. اشتريلك من اطلع للدكتور
ساعات وقمصان وشورتات للبيت
وكلهن مرتبات الك
ما ينقصك بيتك شي
من اموت اني .. انته مرتاح كلشي عندك ماتتعب بشي وتحتار
تبقى عايش بعز ما يخلص

كلشي الك اني ماعندي غيرك احبه واتعبله بهالدنيا ..
وغلطت وياك ادري غلطت وتعبتك
بس اني هيج اني متعوده وحدي كلشي اسوي واعيش واتاذى واكوم وحدي
لتزعل مني فدوه كلهن كم يوم اعيشهن واروح وابقى مرتاح مني بعد والله ماتعبك

حضني واني كل البجي نزل عليه ...
بجيت وهو اخذني بنفس الحضنه هاي راح كعد وكعدني يمه ....

مسح وجهي ويكولي ...
- ليش كلشي تحجي بالموت
انتي بعدج قويه وزينه وصغيره بعده العمر كدامج لا تخافين من المرض

- مااا خايفه بس

اخذت نفس قوي وباوعتله ...
- عندي تليف بالكبد بالمرحله الثالثه والالتهاب مالكيتله علاج ينخفض بنسبه قليله وكم يوم ويرجع يرتفع اكثر

باسني براسي واني حضنته ... كالي..
- بعد اكو وكت للعلاج
اخذج نسافر واعالجج بره

- ماعندي فلوس خلصت

- انه رااايد منج فلوس انجبي

- مو تريد تعوفني شكو تسافر وياي
متروح  تحير بنفسك

- لاااا احنه اثنينا صرنا سكراب
خلي نتصلح سوه

- مو تريد تطلكني

- انتي كسرتي ركبتي بعد ضل بيهه طلاك

- هااااااا

-هاااااااااااا

ضحكت بوجهه وهو ضحك ..كالي ..
- مااريدج تموتين ضلي اتعارك وياج ميخالف هو مزاج ساعه الساعه يصفى

- هسه انته شنو مكسور كلبك عليه
تره ماااريد اوووكي
اني كلتلك من اموت مو هسه تبقى مكابلني

- انجبي انجبببي
وعلي راح تموتيني  وتضلين انتي عمرج عمر تفكه

- ديلااا يعني تريدني اموت بسرعه

- وتااااالي !!!

- لااااا مبين عليك هذاك وينك بزعانه روحك مني وجايني محمل كلبك عليه
لتضل وياي هيج مدري شلونك

- هسه انتي شتردين لخاطر الله كليلي
شتردين

رفعت ايدي وضليت اعددله على اصابعي
وهو حط ايده على وجهه ويسمعني ...

- اولاااً .. تكعد ويااي هنا

ثانياً.. باسوورد حسابك الايكلود متغيره بعد وتنطيني الرمز

ثالثاً.. ماعليه باهلك ولا تكول لاحد احنه وين بيتنا وعايشين وماريد اشوف احد غيرك

رابعًا.. تبقى حباب وياي لان اااني احبك ومادام اني احبك انته لااااازم تبقى تحبني وتتحملني تره اذا ضوجتك اووكي اصالحك لان احبك اووووكيييي لتنسى

-ايي بعد

- كووول اووكي دنكمل

- اوووكيي

- اي خامساً .. الواتساب الغيرته على مدري يارقم ومسويله باسكود تنطيني الكود
والحسسساب مال لابتوبك الي مدري شلون قافله تعلمني شلون افتحه
والفيس الرقم مال الاسترجاع الي غيرته ترجعه على رقمي
وبريد الياهووو الي مخليه احتياط لكل حساباتك وبدلته ببريد ياهو جديد همممم
تنطينياه

جر اذاني لواهه وكالي ...
- شمدريج بالياهو والابتوب ولج !
شوكت لكطتيهن هذني !!

- اييييي لعد اني ثوله مادري بحساباتك شكد وشتسوي متسوي بيهن

- عقل ابلييييس خررا بيييج
لج الياهو راح اتعطل والرقم قديم محروك ماتعبت نفسي بي سويت جديد انتتتتي
شلوووون عرفتي انه غيرت بريد الاحتياط مال حساباتي !!!!!

- اي عومري مو اني غير احبك لازم اعرف كلشي عليك

- انجبببي شكوكيه
هذاااا شوداج عليه شبيه هو وتنبشين وراه
بريد احتياااط شعندج حاطه عينج عليه

- هسسسه ديلااااا
لتنطيني اني امخمخ واعرفه

نومني وعضني من ركبتي .. نبت سنونه بيهه
واني اعت بشعره ...
لحد ما وخر ...

- شبيييييك شضاربيك ابره مال همممش

- حتى توبين وتبطلين تحشرين نفسج بكلشي
هذني حساباتي خااااصه ماعندج شي خاص انتي متعرفين الخصوصيه
حسابات ماااال شغل
لتمدين ايدج عليهن وترحين تخربيلي الاول والتالي

- ديلااااا اوووكي اوووكي

- تعاااااي ولج اسمعي

-هاااااا

-راح نكعد سوه ترجعين عاقله
وتبطلين عناااد وتبطلين عناد وتعوفين العناد وماتوصلين للعناد وتنسين العناد وعناد ماكو

- اوووكي بس ابقى حباب لتدوس بكلبي
وتريدني انجب واسكت

- حباب انه لااا الي خلك مشاكل ولا بيه حيلهه

- ديلاا اووكي لعد

كمت عدلت شعري وشفت ركبتي خضره من العضه كلتله...
- صخااااامات هسه عمي يلكطني

- البسي حجااااب هو عمج هذا !! ما يحل عليج رجال غريب
تنزلين كدامه محجبه سمعتتتتيي

- ديلاا ماشي مااااشي
اكوولك
هسه انته شلون تصير زين ؟ تره دوختني
يمه من خابرني عمي رجلي كامت تطكطك
يمممه حويدر مريييض عزاا بعيني وين انطي وجهي

رحت كرصت وجهه وكلتله ..
- رادلك اكل ااااكل رايح ناشف وجهك
شبيك ياحظي

- بيج حيل تداريني لو اجيبلي ثانيه احتياط لماتصيرين زينه نرجعهه لاهلهه

- حيددداااار تررره ماتكرمت اوووكييي
اكو عندي خادمه وتساعدني معايزين  على مرتك الثانيه وتلكاهه حجه

-هههههه بويه والحسسين احبج

- اييي اووكي

- بس هيج !

- سبعين مره كلتلك احبك شكوو ماسمعتهه مني

كرصني بايدي واني دفعته ووخرت ..
رحت لبست حجاب ونزلت .. شفت عمي
متمدد ويخابر ..
حجيت ويه ريتا وصيتهه تسوي اكل وتحضر كيك لان عمي يحب ياكل شويه حلاه الصبح
ورحت اخذت علاجي وعمي سد تلفونه

وكف واجه يمي .. اخذ ايدي وباسهه بالاصابع واني ابتسمتله وجريت ايدي
منه ...
كالي..
- كبرت بنيتي
حلو الحجاب عليج

- شكرًا

- مشتاقلج مشتااااقلج

دايريد يحضني واني سمعت صوت الباب فوك نفتح كبل وخرت منه وهو ضاج
وطلع من البيت ...

عايف تلفونه هنا وضليت ضايجه عليه
وكاعده افكر شلون بي هنا اكيد راح يزعل حيداار بس يعرف بي ؟؟؟؟
.
.
يتبع 💕