تحميل رواية «معتكف في محراب قلبي» PDF

د

_ مش هتبطلي بقا بحلقه فيه وهو رايح وهو راجع ، ي بنتى عينك هتوجعك

فوقنى من سرحاني فيه ع صوت مها صاحبتي ، والحقيقه انه كلامها صح ، انا مش ببطل بحلقه ف نوح نهائي ، لو مش قدامي فيس تو فيس، ف عن طريق صوره ال ماليه الفون بتاعي ،

نوح ، حلمي البعيد ، وال بحلم اني اقربه ف يوم من الأيام ، وال يوم بعد يوم بكتشف ان المهمه دي صعبه جدا ، صعبه من كل النواحي ، صعبه ان لم تكن مستحيله

احنا مختلفين ، مختلفين جدا ، بنشتغل ف شركه واحده ، هو المدير عليا ووالدى مدير عليه ، ايوه انا بنت صاحب الشركه ، بس مش بتعامل كده ، موظفه عاديه بشهادتى ، هندسه ، وهو مدير عليا بشهادته واجتهاده ، مهندس برضه

_ ي حوراء ، روحتي فين ي بنتى؟

= ها ، معاكي اهو ي مها

_ معايا اي بس ، ده انتي مع سي نوح من بدرى

ختمت كلامها بغمزه خبيثه

= بحبه ي مها ، بحبه جدا ، معرفش اي ال وقعنى فيه بس بحبه

_ هو بغض النظر عن انه قمر فعلاً ، وعضلات وحاجه كده تتاكل اكل، بس مش شايفه انكو مختلفين شويه ، لا مختلفين كتير ، يعنى هو ملتحي وشيخ جدا ف نفسه كده ، ي بنتى ده مبيرفعش عينه ف موظفه ف الشركه ، وانتي يعنى ماشاءالله مش محتاجه اتكلم

خلصت كلامها وشاورت ع شعرى ال مش متغطي ولبسي ، وال عباره عن بنطلون بوي فريند وبلوزه طويله سيكا

اتكلمت بتنهيده بخرج فيها كل الحمول ال جوايا

=اتلمي ي مها ومتقوليش عليه كده ، وانا عارفه ي مها ، عارفه كل ال قولتيه ده ، بس اعمل اي ، حبيته ، دي حاجه مش بايدي ولا بمزاجي ، أعمل اي بس

ردت بامتعاض _ امممم

قبل م ارد عليها كان فون المكتب بيرن ، رديت وكانت سكرتيره نوح ، وال بلغتنى ان نوح طالبنى

قفلت معاها بفرحه وانا مش مصدقه انى هبقى قدامه كمان دقيقه

طلعت المرايه من الشنطه عشان اظبط شعرى وهدومي

_ مها ، كده شكلي حلو

= هو أنا مش عايزه احبطك والله ، بس هو كده كده مش هيبصلك ، فمفيش داعي لكل ال انتي بتعمليه ده

رديت بخيبه امل وانا بفتكر ان ده ال هيحصل فعلاً ، زي كل مره

_ تمام

سبتها وطلعت عند نوح ، او بشمهندس نوح عشان متهزقش

خبطت ودخلت بعد م سمحلي أدخل

اتكلمت بفرحه وأنا الابتسامه من الودن للودن

_ Hi

أتكلم وهو لسه باصص ف الورق ال قدامه من غير م يرفع عينه فيا فعلا

= وعليكم السلام ورحمة الله وبركاته

رديت بعد م احرجني برده

_ احم ، حضرتك طلبتنى

= فين الملف ي بشمهندسه

رديت بعدم فهم _ ملف اي؟

رد بعصبيه بيحاول يتحكم فيها

= نعم ؟ ملف اي! ، انتي جايه تهزرى ولا اي ي بشمهندسه

رديت وانا بحاول اتكلم بعد م اتفزعت من صوته

_ براحه حضرتك بس ، ملف اي

رد وهو بيحاول يهدي نفسه

= مش السكرتيره كلمت حضرتك وقالتلك تيجي بملف الفيلا ال انتي شغاله ع التصاميم بتاعتها وال المفروض تسلميها من يومين

ينهار ابيض ، انا نسيت ، مجرد ف السكرتيره قالتلى انه عايزني وانا مركزتش ف اي كلام قالته بعد كده ، ده باينها فيها رفد بعصبيته دي

_ انا..احم... انا نسيته ف المكتب

= نعم؟ ، نسيتيه ، ولما نسيتيه اي ال جابك من غيره مش فاهم

_ ي بشمهندس....

قاطعني = مش عايز كلام تاني ي بشمهندسه ، اتفضلي روحي هاتي الملف ومخصوم منك 3 ايام

رديت بغيظ _ تماام

نزلت مكتبي انا ومها تاني عشان أروح اجيب الملف للاستاذ ال خصم مني ده ، يخصم مني لي يعني ، مكنش ملف نسيته ده يعنى ، وبعدين مهو هو السبب ، مانا مصدقتش انه عايزني فنسيت نفسي وطلعتله ، اعمله اي يعنى ف قلبي ال بيدقله ده ، اعمله اي وهو بينسيني نفسي ، وبعدين ده خايف ع مصلحه الشركه اكتر مني ، اي ده ،

جبت الملف وطلعتله تاني وانا عماله ابرطم ف سري

خبطت ودخلت بعد م اذن اني أدخل

مدتله ايدي بملف ف اخده من غير م يبصلي برضه ، لا كده كتير بقا

فضلت سرحانه فيه وف ملامحه لحد م فوقت ع صوته العالي

_ ي بمشهندسه

= ها ، نعم ي بشمهندس

_ اتفضلي الملف سلميه للسكرتيره برا تراجع عليه

رديت بهمس = قال تراجع عليه قال ، ده انا سهرانه عليه شهر عشان تشكر فيه ويعجبك ، اي ياربي ده

_ بتقولي حاجه ي بشمهندسه ؟

= لا ي بشمهندس ، بعد اذن حضرتك

_ استني

هيقولي انه بيحبني اهو ، أكيد بيوقفني عشان كده ، مفيش سبب تاني

رديت وانا حرفياً منشكحه من افكاري ال توالت ع دماغى

= نعم

_ مفيش خصم هيحصل ، وده عشان التصاميم كويسه، فده شفعلك ، إنما بعد كده مفيش حاجه هتشفعلك عندي

رديت بتشنج = نعم ؟ خصم !

_ ف حاجه ي بشمهندسه

= لا تسلم ، بعد اذنك

بغض النظر عن احلامي ال حطمها بكلامه بس اي ده ، اي ده يواد اي ده ، قمر وعضلات وشياكه وكريزما وكمان حنين ، لا انا مقدرش ع ده كله ، اكاد من فرط الجمال اذوب والله

خرجت من عنده وانا هيمانه فيه وف ملامحه

__________________________

اليوم متعب ، والشغل متعب اكتر بس طبيعي ، مبدئيا عشان يبقالك اسم ف السوق لازم يطلع عينك ، وانا الحمدلله كانت فرصتي أحسن من غيري

تفوقي طول سنين الكليه كان تانى سبب بعد توفيق ربنا ف اني الاقي شغل وخاصه الفرصه دي ، الشركه ال شغال فيهاا حلم اي مهندس ، بس الحقيقه مش حلمي

انا حلمي ابني شركتي ، خاصه بيا اناا ، بس باذن قريب ، شغلي اتعرف وتصاميمي بفضل الله الكل بيشكر فيها

فمجرد م اعمل مكتب ليا ومعايا شويه من صحابي هننجح باذن الله ، خاصه انه لا غبار ع سمعه حد فينا ، فشويه كده ع نكون جمعنا رأس مال لشركه صغيره خاصه بينا ونبدأ فيهاا بإذن الله تعالى

سمعت اذان الظهر ، قمت صليت ف المكتب بعد م جه شويه مهندسين كمان وصليت بيهم امام ، وال طلبوا اني ابقى الامام بعد م عرفوا اني امام مسجد اصلا ، صلينا وقومت عشان اخد اي برشام مسكن عشان أعرف احضر اجتماع المهندسين الجداد ، قومت وانا بفتكرها ، وانا بفتكر ان كل التعب يهون عشانها ، آلاء ، بنت عمي ، حب 3 سنين ، لو عايز أوصل لحاجه غيرها ، فأنا عايز اوصل عشانها ، سواء ف الشغل او اي حاجه تانيه

اخدت مسكن وبدات الاجتماع

ف وسط تركيزي وكلامي مع الناس الجديده لقيت تلفوني بيرن ، لقيتها اميره أختي ، م اخدتش لحظه افكر ورديت ، انا عارف ان امي تعبانه فممكن تكون تعبت

اتكلمت بعياط _ الحقنا ي نوح ماما تعبت تاني ، تعال إحنا رايحين المستشفى

قفلت معاها وكلمت الشباب وانا بلم حاجتي من ع ترابيزه الاجتماع

= طيب بعد اذنكو ي شباب ، الاجتماع هيتعاد تاني ، معلش انا اسف

معرفش نزلت جري ازاى بس نزلت ركبت العربيه وطلعت ع المستشفى ال بنروح ليها بأمي لما تتعب

سألت الريسيبشن وطلعت جري ع اوضتها

لقيت أميره واقفه بتعيط قدام اوضه الكشف ، اول م شافتني جت جري عليا واترمت ف حضني

_ ماما ، ماما ي نوح

= هششش ، اهدي هتبقى كويسه ان شاء الله

معرفش كنت محتاج اهديها ولا اهدي نفسي

شويه والدكتور خرج

_ طمني ي دكتور الله يرضي عليك

= الحمدلله هي عدت الازمه دلوقتي ، بس محتاجين نعمل العمليه ، مينفعش تتأخر اكتر من كده

_ طيب هي هتتعمل ف مصر؟

= للأسف لا، لازم تسافر

_ طيب هتكلف كام؟

= مش اقل من 2 مليون

_ طيب ي دكتور احجز ف المستشفى ال هنسافرلها

= تمام ، ألف سلامه

سابني ومشي وانا مش عارف هعمل اي ، انا مش معايا يكمل ، الفلوس ال معايا هي ال كنت هعمل بيها الشركه ومش هتكمل العمليه ، حتي لو بعت العربيه ودهب اميره وامي مش هيكمل المليون الباقي ، حتي أراضي والدي مش هينفع ابيعها ، لأنها المفروض متاجرة لناس دلوقتي ،

رحماك يارب رحماك

اخدت اميره وامي وروحت وانا بفكر هعمل اي وهكمل الفلوس منين؟

وصلنا البيت وال ف الحقيقه عمارتنا ، وال برضه مش هعرف اتصرف فيها عشان الناس ال موجوده ،

واخدين فيها شقتين ، شقه لأمي واميره ، وشقه ليا انا والاء مستقبليا بإذن الله

دخلنا ورقدتها ع السرير وحاولت اتكلم معاها عشان أهون عليها

_ اي ي اميرتي ، ينفع كده تقلقيني عليكي

= معلش ي حبيبى حقك عليا

رديت وانا ببوس ايديها _ حق اي بس ي ست الكل ، انا تحت امرك العمر كله ي امي

اتكلمت بتردد بعد م مسحت ابتسامتها ال ظهرت بعد كلامي ليها

= نوح

_ نعم ي ست الكل

= م بلاش العمليه دي ي بني ، العمر مش هيبقى فيه اد ال راح

رديت بحزم _ العمليه هتتعمل يعني هتتعمل ي امي ، انا معنديش غيرك اصرف عليه عمري مش بس فلوسي ، والعمليه هتتعمل ، وهتقومي ليا بألف سلامه ي نور عيني

= آلله يرضي عليك ويراضيك ويريح بالك وقلبك ي ابن بطني ، ويرزقك بال تتمناها

رديت بتمني وانا ببتسم وبفتكر الاء _ يارب ي امي ، يارب

المهم يلا عشان أميرتي الحلوه تنام عشان تقدر تقوم لصلاه الفجر ، يلا ي حبيبتي عايزه حاجه ؟

= عايزه سلامتك ي نور عيني

سبتها وروحت اوضتي صليت وقرأت وردي ونمت وانا عارف ان ربناا هيدبرها ، لأنه عالم اني لا حول ولا قوه لي الا به

تاني يوم وانا رايح الشغل جه ف دماغي فكره اني اطلبهم من مدير الشركه، مش هيرفض ، أعتقد

خلصت شغلي وروحت فعلاً للمدير عشان اطلبهم منه

_ سلام عليكم

= وعليكم السلام ورحمة الله وبركاته ، تعالي ي نوح اتفضل

_ كنت محتاج من حضرتك حاجه

= اتفضل

_ كنت محتاج بس سلفه ع مرتبي من الشغل

= اممممم، ومحتاج كام؟

_ احم ، 2 مليون

رد بعد تفكير دام حوالي خمس دقايق

= تمام بس بشرط

رديت بأستغراب _ شرط؟ ، شرط اي حضرتك

= تتجوز حوراء.. بنتي

_...........

تابعوني عشان تعرفوا لما انزل الجديد♥️♥️♥️🫶

# يتبع

بقلم # Mai_Sayed

# معتكف_ف_محراب_قلبي

استغفروا الله لعلها تصادف ساعة استجابه.. 🌻

رديت بجمود _ موافق

طبيعي اوافق ، مش قدامي حل غيره، محاولتش اجادل لأني عارفه ، مش هيغير رأيه ، ولا هيغير شرطه ، وانا مش هضحي بوالدتي عشان رفاهيه مش متاحه ، مش هضحي بيها حتي لو عشان خاطر قلبى ، معنديش استعداد لده

= تمام ، هتاخد الشيك يوم كتب كتابك ع حوراء

_ تمام

= بنتي مش هيتقل منهاا ، تتفضل انت والوالده وتتطلب ايديها مني ، وبعدها نكتب الكتاب

_ أسبوع ، اسبوع وهاخد الشيك عشان محتاجه

= تمام ، أسبوع وتكتب كتابك ع حوراء

رديت وانا بقوم من القعده ال خنقتني كلها ع بعضها دي

_ انا جايلكو باليل عشان اتقدملها

= تمام

خرجت وانا مش مترجم ال حصل وال قادر اترجمه ، ولا عايز اترجمه حتي والله ، مش متخيل حجم الخساره ال خسرتها ، آلاء ، خسرت قلبي ، بس مش مهم ، فدي امي

وانا خارج لقيت حوراء واقفه ، بتهزر مع شاب وبتضحك

هزت راسي بياس وكملت مشي وانا مش متخيل ان دي هتبقى مراتي

بشعرها ال باين ، والبنطلون ال بتلبسه ، مش متخيل ان دي هتبقى ام لاولادي ، تعلمهم الصلاه وتحفظهم القرآن ، تطلعهم رجاله عارفين اصول دينهم ، بس هتعمل كده ازاى بمعاملتها دي ، بس لحظه ، ولادي اي ، انا مش متخيل ان هيبقى ليا ولاد منها اصلا

مقدرتش أكمل اليوم وروحت ، معرفش سوقت العربيه ازاي ووصلت البيت بسلام ازاي

وصلت ودخلت لأمي الاوضه ، سلمت عليها واتطمنت علي صحتها وحبيت افاتحها ف موضوع جوازي من حوراء

_ بقولك ي ست الكل

= قول ي نور عيني

_ مش نفسك تجوزيني وتخلصي مني بقا

= ده يوم المني ي نوح والله

_ طيب ي ست الكل ، احنا هنروح نتقدم باليل ان شاء الله

= طب وكلمت اهل عمك وعرفتهم ي ابني

_ اي علاقه عمي وأهله ي امي

= مش انت هتخطب آلاء ي حبيبى

رديت وانا ببلع ريقى بصعوبه ، كأنه سم مش قادر انزله ، داريت وشي عنها وانا برد

_ احم ، لا ي امي مش آلاء ، دي مهندسه معايا ف الشركه ال شغال فيهاا

= مالك ي نوح ، فيك اي ي حبيبى

_ مالي ي امي انا كويس اهو

= لا فيك حاجه؟

_ مفيش حاجه ي ست الكل اتطمني

= يعني مش هتقولي ي ابني

_ انا كويس والله ي امي

= طيب ي حبيبى ، انا بس عايزه افكرك انه ربنا مش بيعمل حاجه وحشه

_ ونعم المولي ي أمي ، انا هقوم أصلي واشوف هعمل اي عشان نروح نتقدم باليل باذن الله

= ماشي ي حبيبى ، ربناا يفرح قلبك يارب

سبتها ودخلت اوضتي عشان اغير ، خمس دقايق ولقيت اميره بتخبط ع الباب بعصبيه

_ اتفضل

= هو ال انا سمعته من ماما ده صح ي نوح

_ سمعتي اي

= انت هتتجوز فعلا حد غير الاء

_ اه ي أميره ، معنديش حل تاني

= لي ، لي معندكش حل تاني

_ عشان عمليه ماما ي اميره ، ولا انتي فكرك اني هتجوز الاء واسيب امي

= مش كده ، بس اكيد ف حل تاني ، اطلبهم من عمك

_ للأسف مفيش غيره ، وانتي عارفه اني مش هطلب من عمك حاجه

= وانت لما تتجوز البت دي ، اي الحل ف ده بقا

_ باباها صاحب الشركه ي اميره ، لما طلبت منه فلوس العمليه شرط اني اتجوز بنته عشان اخدهم

ردت بغيظ = حسبي الله ونعم الوكيل فيها وفيه ، منهم لله الاتنين ، هي أبوها

_ طب وهي عملتلك اي بس

= كفايه انه هتفرق بينك وبين قلبك

_ خير ان شاء الله ي اميره ، كله خير

= طب وانت هتتقدم امتي

_ احنا هنروح نتقدم النهارده ان شاء الله ، واسبوع ونكتب الكتاب ، عشان اخد الفلوس ونسافر بماما

= وهي بايره اوي كده عشان ابوها يخلي كتب الكتاب بعد أسبوع ، عايز يخلص منهاا بسرعه اوي كده لي

_ اميره ملناش دعوه ، وياريت بعد اذنك تعامليها كويس

ردت وهي بتفتح الباب عشان تخرج

= اه ان شاء الله

معرفش الوقت عدي بسرعه كده ازاي بس لقيت ف لحظه العشاء اذنت ، صليت واخدت امي واميره وركبنا العربيه عشان نمشي

___________________________

_ مالك ي حوراء ف اي

= ها ، بتكلميني

_ ايوه بقولك مالك

= نوح ف حاجه ، مش عارفه ماله بس فيه حاجه ، شكله متغير وتحسيه زعلان او مهموم

ردت بسخريه _ اه ي ام قلب حنين ، م تروحي تسأليه

= ااه ، عشان يطردني من الشركه عادي

_ بصراحه يعملها

رجعت لسرحاني تاني وانا برد

= اممممم

_ صحيح انا شوفته طالع عند والدك من شويه

= عند بابا! لي ف حاجه ولا اي؟

_ انتي بتسأليني انا

= خلاص ي مها اسكتي

_ سكتنا

لحظه اي ال ممكن يطلع نوح عند بابا ، لحظه بس هو اي الغباء ال انا فيه ده ، م عادي يطلع ، مهو مديره واكيد بيتكلمو ف شغل ،

لا بس دي فرصه كويسه اني اطلع لبابا اشوفه ، اصل بابا فعلاً وحشني ،

بابا اي ال واحشني احنا هنكذب ع بعض ، مانا جايه معاه الصبح ، بصراحه بقا نوح ال واحشني ، هه واي الجديد ، مهو ع طول واحشني

قبل م اقوم عشان اطلع لقيت مصطفي زميلنا ف الشغل جاي بيهزر ،

مصطفي ال صارحني انه معجب بيا ، الحقيقه مش عارفه معجب بيا انا لشخصي ولا لشركه بابا ، ده لو اعتبرنا انه معجب أصلا

وقفت معاه وانا ومها شويه وضحكنا ، قبل م اسيبهم واطلع لمكتب بابا لقيت نوح بيبصلنا بيأس ، او بمعني اصح بيبصلي انا بيأس ومشي

اي ال يخليه يبصلي كده ، لا ده اي ال يخليه يبصلي اصلا ، ده عمره م عملها

سبتهم وطلعت لبابا عشان اقوله اني عايزه امشي ، نظره نوح قفلتني من اليوم كله بصراحه ، عارف لما يكون حد خذلك ، اهي دي نظره نوح ، والحقيقه مش عارفه انا ممكن اكون خذلته ف اي

طلعت لبابا ، خبطت ودخلت

_ بابا ، انا عايزه امشي عشان تعبت

= فيكي حاجه ولا اي

_ لا مرهقه بس شويه

اتكلم بحنيه غريبه عليه ، بابا مش قاسي ، بس مش بيظهر حنيته ، ده غير ان الشغل واخده مننا ، هو خير مثال للاب ال عايز يبني نفسه ، ف نسي اهله وبنته ف وسط كم المشاغل دي

= تعالي ي حوراء عايزك

_ نعم ي بابا

مسك ايدي واتكلم بنفس الحنيه ال اول مره تظهر

= عندي ليكي خبر ان شاء الله يفرحك

_ اتفضل ي بابا

= نوح طلب إيدك مني ، وهيجي يتقدم باليل

اتكلمت بتيه وعدم استيعاب لل قاله

_ ها ي بابا ، حضرتك عايز اي

= مانا قولتلك ي بنتي

رديت بحذر _ ايوه قولت اي بقا

= نوح عايز يتجوزك ي حوراء ، مالك كده فوقي

لا لا لحظه ، هو ال بابا قاله ده صح ولا انا ال بيتهيألي ، جلبى هيجف ، جلبى هيجف ، احم ، افرح ولا اتكسف عشان بابا ، افرح ولا اتكسف

، لا لا اتكسف أحسن

_ احم ، وحضرتك رايك اي ي بابا

= والله ي بنتي الراي رأيك

_ لا ازاي ، رأي حضرتك مهم ، اهم من رايي كمان

اتكلم بخبث وبمرح غريب عليه

= طب انا بصراحه مش موافق

اتكلمت بزعيق وانا بقف من ع الكرسي بعصبيه

_ بتقول اي ي أخويا

= بت ي حوراء ، انا ابوكي يبت

اتكلمت بنفس الزعيق _ مختلفناش ، بتقول اي ي ابويا

= بهزر ي نيله انتي اقعدي

اتكلمت براحه وانا بقعد مكاني تاني

_ ااااه ، بحسب

= طب اعملي نفسك مكسوفه قدامي حتى

_ مش وقته بقا ي حاج ، انا هقوم اشتريلي لبس عشان بليل

= طب والارهاق

_ لا ارهاق اي بقا ، ده كان زمان دلوقتي بقا فيه نوح

= معرفتش اربي ، انا معرفتش اربي

_ انت لسه هتندب حظك ي حاج ، هات فلوس هات

= اندب حظي ، فكريني كده انا كنت مشغول ف اي ونسيت اربيكي

_ ي أخويا مش وقته ، هات فلوس

= خدي ي اخره صبري

خدت الفلوس وقبل م امشي محسيتش بنفسي غير وانا بجري ع بابا بحضنه ، مش عشان حاجه ، عشان دي اول مره نتكلم مع بعض براحه كده ، اول مره احس اني ممكن اهزر معاه ونضحك عادي ، اول مره ، اول مره احس انه موجود

اتكلمت بابتسامه _ شكراً ي بابا

فضل يمسح ع شعري ومتكلمش ، قبل م امشي باس راسي ومشيت ، مشيت بعد فرحتي م نستني ، ازاي ممكن نوح يبصلي ، او يبقى عايز يتجوزني

* قد تكون انانيه مني بال بعمله ف نوح بس انا عارف بنتي ، واقعه فيه ، وعارف نوح ، عمره م هيبلصها ، مش عشان وحشه ، بس عشان مش زيه ، وعارف برضه نوح ، هيعمل ال مقدرتش اعمله ، او بعمني اصح اتلهيت عنه ، هيقربها من ربناا ، اتمني بس مكونش ظلمت حوراء ، أتمني ، انا مغفلتش عن فرحتها لما قولتلها انه طلب ايديها ، زي م مغفلتش عن صدمته لما قولتله شرطي ، بس ان شاء الله اكون عملت الصح ، يارب أكون عملت الصح ،

نوح شخص كويس جدا ، اتمناه لحوراء حتي لو مكانتش بتحبه ، وحقيقي هو كويس من جميع النواحي ، من الناحيه العمليه والدينيه ، والاجتماعيه كمان ، فهو عريس اكتر من مناسب لو لغينا حته ان حوراء بتحبه ، وبما انها بتحبه ، فهو عريس فوق الممتاز بمراحل

يارب بس يحبها ، يارب يحبها

___________________________

_ مها مها مها

= اي اي اي

بفرحه _ نوح طلب ايدي

اتكلمت بصدمه وعصبيه غير مبرره

= نعم ، طلب ايدك ازاي يعني

اتكلمت بفرحه _ والله طلب ايدي ، وهيجي يتقدم باليل ، تعالي معايا بقا نشتري لبس ليا

اتكلمت بحقد وشر كنت غافله عنه

= روحي لوحدك انا مش جايه مع حد

_ ي مها بقا....

قاطعتني = قولت مش جايه معاكي

_ براحتك

انا معنديش استعداد بصراحه حد ينكد عليا ، وهي شكلها ناويه ع كده ، نزلت ، اخدت تاكسي وورحت اشتريت لبس وميكاب عشان ادلع نفسي بقا ، ده نوح ي جماعه ال جاي يتقدم مش اي حد

نوح جه باليل كنت جهزت ، لبست الدريس ال اشتريته وال كان ضيق من فوق بحزام ف الوسط وبينزل باتساع لحد بعد ركبتي بشويه ، كان بسيط ، يشبه لفساتين زمان ، حطيت ميكاب خفيف واستنيت ، استنيت ع احر من الجمر ، كأني مستنيه فرصه هتحييني ، كأني غريق مستني يتعلق باشايه ، ودي الحقيقه فعلا ، انا غريقه ف حب نوح

فضلت مستمره ف سرحاني لحد م جرس البيت رن

..................

رواية معتكف في محراب قلبي الفصل الثالث

بابا قام يفتحلهم بحكم ان والدتي متوفيه وانا وهو والداده بس ال عايشين ف البيت

وقفت بلهفه عشان اشوف نوح ، كأني لسه مش مصدقه ال بيحصل ورؤيته هي ال هتاكدلي

دخل عليا هو واخته ووالدته ، بس اي ده ! اي ي راجل الجمال ده

ده الأسود طلع بيليق عليه هو بس والله ، بغض النظر عن انه مش فال حلو يعني بس ولو ، كان جامد بصراحه

سلم ع بابا وكالعادي مسلمش عليا ، والدته كانت ست طيبه ، سلمت عليا بهدوء وقعدت ، اخته كانت مش متقبلاني بس عادي ، يمكن غيرانه مثلا ومفكره اني هاخد اخوهاا منها

قعدوا يتكلموا شويه وانا باصه ف الارضه وساكته ، ههه بضحك عليكو ، كنت مركزه مع نوح

مفوقتش غير وهما بيستاذنوا عشان يسيبونا مع بعض شويه ، واخيرا نوح اتكلم

_ عامله اي

رديت بخجل = كويسه ، انت عامل ايه

_ الحمدلله ف فضل ونعمه

ورجعنا سكتنا تاني ، استنيته يتكلم عن شكلي ، عن جمالي ف الليله دي ، عن اني حلوه ف عنيه، بس متكلمش ، قولت يمكن عشان ملتزم وكده

سكتنا شويه ورجع اتكلم

_ حابه تسألي عن حاجه

= احم ، لا يعني مفيش اسأله ف دماغي

_ طيب ، كنت حابب أعرفك حاجه

هيقولي بحبك اهو ، اكيد هيقولها

= اتفضل

_ إحنا هنكتب الكتاب بعد أسبوع ، وهيبقى فرح مع كتب الكتاب ، ومش هيبقى فرح كبير ، يعني ع اد صحابك والعيلتين

= ايه ، طب لي كله

_ معلش انا عارف اني بضيقها عليكي بس عشان ماما تعبانه ، وهنسافر عشان تعمل عمليه كمان 10 أيام ، فعايزين نخلص حوار الفرح قبل م نسافر

بغض النظر عن انه بيتكلم بلامبالاه قبضت قلبي بس حاولت اتغاضي عن ده واركز مع نص الكبايه المليان ، اننا هنتجوز

= الف سلامه عليها ، ان شاء الله تبقي بخير

_ الله يسلمك ، ان شاء الله

= طب... طب

_ عايزه تقولي اي ؟

= طب والشقه ، والفرش وده كله يعني ، مش هيحلق يخلص ف أسبوع

_ الشقه جاهزه ، انا كنت عايش فيها اصلا ، فوق شقه ماما واميره ، مفيش حاجه فيها ناقصه ، لو حابه تغيري فيها حاجه بعد الجواز معنديش مشاكل

اي ده شقه اي ال جاهزه ، انا كنت عايزه نختار ده كله سوا ، نشوف كل حاجه مع بعض ، نتعب واحنا بنختار المكان ال هنعيش فيه ، نختار كل حاجه بحب وفرحه، نسيب مكان واتنين وتلاته عشان نختار الحاجه ال تعجبنا ، وف اخر اليوم نرجع برضه من غير م نجيب حاجه ، وننزل برضه تاني يوم بنفس الحماس عشان نختار ال احنا عايزينه ، بس.. بس يعني ، مش مهم اوي خلاص عادي

= تمام مفيش مشاكل

_ لو مش حابه نعمل كده ممكن نستني ، بس انا شايف انه مالوش داعي

نستني ، نستني اي ، ده انا مصدقت ، بس طبعاً خبيت كل ده واتكلمت بهدوء

= لا عادي ، مالوش داعي نستني فعلاً

_ تمام

= طيب انا كنت حابه اعرفك حاجه

_ اتفضلي

= انا عندي السكر

رد بحزن طبيعي _ لا حول ولا قوة إلا بالله

، طب بتقوليلى لي

= عشان تعرف انت داخل ع اى ، ولو طبعا غيرت رأيك مفيش مشاكل ، عادي

كدابة انا اوي ، لو غير رأيه عمره م هيبقى عادي ، بس انا قولتله عشان عارفه انه نوح راجل ، مش حاجه زي دي ال هتغير رأيه ، ومخيبش ظني

رد وهو بيقوم عشان يمشي

_ ان شاء الله كمان أسبوع هنيجي عشان نكتب الكتاب والفرح معاه طبعاً زي م اتفقنا

رديت بفرحه كان ليها اثر ع ملامحي

= تمام

سلمت ع مامته واخته ال مازلت مش طيقاني ومشي ، بعد م اتكلم مع بابا ف كل حوارات الفرح ال مسمعتش فيها كلمه ، ولا سألت عليها تاني ، اخدت بالي من بابا وهو بيبصلي بمكر

_ اي ي بابا ، ف اي

رد بخبث = انا بقول منوافقش عليه وخلاص ، وانتي كذا حد يتمناكي

رديت بمرح جديد ع علاقتنا طول السنين ال فاتت

_ بقولك ي بابا

= هممممم

_ انت عندك كام سنه؟

رد باستغراب= 50.... لي ؟

_ أصلك أكيد عايزهم يزيدو صح؟

= والله دي حاجه بتاعت ربنا ، لي برضه

رديت وانا بقرب منه وبربط ع كتفه باجرام

_ يبقى متجبش سيره انك ترفض نوح عشان ميقفوش ع 50 ، فهمتني ي أبو حوراء ؟

لقيته مسكني من قفايا مسكه حرامي الغسيل واتكلم

= انتي بتهدديني ي بت ي حوراء ، بتبعيني عشان نوح

رديت وانا بعد ع صوابع ايدي بمرح

_ مانت لو عندك عضلات كتير زيه ، ولا شعرك ناعم وطويل زيه ، ولا عندك دقن قمر زيه ولا عندك.....

= انتي لسه هتكملي عد ف مواصفات سي نوح بتاعك

رديت بتذمر وانا لسه ممسوكه المسكه ال ضيعت برستيجي وخلته ف الارض

_ استني أما اخلص ، كنا وصلنا فين ....

رد وهو بيهزني بهزار = عند دقنه ي اختي ، عند دقنه

_ اااااه ، ولا عندك دقن قمر زيه ، ولا عينك زيتوني زيه ، ولا بتبقي قمرين تلاته اربعه خمسه ف اللبس زيه ، مكنتش بصيت بره

لقيته سابني بذهول وبص لجسمه المتناسق وال باين اكتر ف البدل ال بيلبسها وال متدلش فعلا ع واحد عنده 50 سنه

= فكريني كده تاني ، انا كنت فين لما نسيت اربيكي

رديت وانا ببوسه من خده بهزار وبضحك

_ بهزر معاك ي حماده ي عسل ، هو اي نعم الواد جامد حبتين تلاته اربعه خم....

قاطعني وهو بيبص ف الساعه بملل مصطنع

= عرفيني هتخلصي امتي بس عشان عايز انام

_ احم ، بس انت برضه قمر ي ابو حوراء

= أيوه كده اتعدلي

اخدني ف حضنه وقعدنا وابتدي يتكلم بجديه

_ بصي ي حوراء ، خلينا نتكلم بجد ، انا عارف اني قصرت معاكي كتير ، وانشغلت عنك اكتر ، وجايز مكتشفتش ده الا لما لقيت العمر عدي ف ثانيه ، فحقك علياا ، انا ظلمتك ، وظلمت والدتك

صوته بدأ يتهدج ويبكي ف اخر كلام لما افتكر امي بس محاولتش اقاطعه ، لأني فعلا كنت بدأت ابكي انا كمان

_ امك ، كانت ست طيبه ، محترمه ، حبيتها ، بس كرجل شرقي معرفتش ابينلها حبي ، ولا وضحه ، وهي استحملتني ، لحد م راحت من ايدي ، محسيتش بيها وغير وانا بدفنها ، مش عارف ازاي كانت مستحملاني ، ومش عارف هحط عيني ف عينها ازاي لما نتقابل

طبطت ع كتفه ، عشان يهدي ، واهدي انا كمان

= متحملش نفسك فوق طاقتها ي بابا ، هي عمرها م زعلت منك ، بالعكس ، كانت مقدره كل ال انت بتعمله ، ومسمحاك ، صدقني ، كانت بتحبك اوي ي بابا

دموعه زادت وانا سبته محاولتش اتكلم ، شويه وهدي، فحاولت اتكلم عشان اخفف عنه

اتكلمت بمرح _ وبعدين انت بتعمل ده كله عشان تنام متاخر ومتروحش الشركه وتدبنسي فيهاا لوحدي صح؟

= لا مهى عروستنا مش هتروح الشركه الفتره دي بقا

رديت بأستغراب _ لي يعني؟

= قوليلي الأول ، نوح قالك انه عايز الفرح بعد اسبوع

_ احم ايوه

= طب وانتي اي رأيك؟

_ عادي مفيش مشاكل

= لو معترضه ي حوراء ممكن الغي الموضوع كله

_ تلغي اي ي حج بس استهدي بالله كده

= انا بتكلم بجد ي حوراء ، مش انتي كان نفسك ف فرح كبير وفستان تفرحي بيه ، لو نوح رافض ده فاحنا ممكن ننهي كل حاجه من دلوقتي

_ نوح مش رافض حاجه ي بابا ، هو هلبس فستان زي م كنت عايزه، والفرح هيتعمل بس هيبقي ع اد العيلتين وخلاص ، وهحاول اشتري اللبس خلال الأسبوع ده وخلاص

= طب وشقته

_ مهو أكيد قالولك ي بابا ، هو شقته جاهزه مفيهاش حاجه ، حتي هو قالي لو محتاجه اغير فيها حاجه معندوش مشاكل ، بس هو عايز يخلص بسرعه عشان مامته زي م قال لحضرتك

= طيب ي حبيبتي ، مدام موافقه خلاص ، قومي نامي بقا

_ اه والله ، عشان يدوب نروح الشركه واشوف اللبس ال هجيبه

= لا مانتي مش هتروحي الشركه ، قومي من النوم وروحي هاتي ال انتي عايزاه ، انا هسبلك فلوس كفايه ف الفيزا بتاعتك

_ ماشي ي بابا ، عايز حاجه

= لا ي حبيبتي سلامتك ، تصبحي ع خير

رديت وانا ببوس راسه _ وانت من اهله

طلعت عشان انام فعلا وانا عماله ارسم كل الأحلام الورديه ال ممكن تيجي ف بال اي حد ، الدنياا قدامي كانت كأنها لوحه بيضا ، وأنا رسام محترف، رسام ماسك فرشته وعارف هو بيعمل اي ، والحقيقه اني عمري م عرفت ارسم ولا جربت ، بس الحب اداني الطاقه ال تشجعني انقش كل جميل ع لوحه واحده ، لوحه هستلمها بعد أسبوع ، لسه بفكر هحضر اي نوع من الألوان ، بفكر هجيب اي نوع من الورق ال هرسم عليه ، بفكر ف كل ال هحتاجه عشان اطلعها افضل لوحه ممكن تترسم ، مهي مش اي لوحه برضه ، دي لوحه حياتي ، حياتي انا ونوح ، وال خلاص ، ع وشط البدء

............

رواية معتكف في محراب قلبي الفصل الرابع

خلصنا عند حوراء ومشينا ، واحنا ف الطريق امي اتكلمت

_ بس خطيبتك باين عليها طيبه ي نوح

اتكلمت بهدوء عشان متاخدش بالها من ال بيني وبين حوراء ووالدها

= أيوه ي امي

اتكلمت اميره بسخريه

_ وبالنسبه لشعرها ي ماما

= والله ي بنتي دي مهمه اخوكي بقا ، ربناا يجعل هدايتها ع ايديه

_ ده ع أساس ان مشكلتها الحجاب بس ي ماما ، مشوفتيش لبسها ولا الميكب ال هي حطاه ، مش عارفه انتي موافقه عليها ازاي

= مش معني ان لبسها مش شرعي انها مش كويسه ي أميره ، ممكن محدش نصحها ، ومش معني كلامي انها مش هتتحاسب ع البناطيل ال بتلبسها ولا الميكب ، لا هتتحاسب ، بس ربناا غفور رحيم ي بنتي ، ربنآ يجعلنا سبب ف هدايتها

فضلت اسمع كلامهم ومناقشتهم ف صمت ، أميره متحامله ع حوراء ، كأنها هي السبب ف ال انا فيه ، انا عارف ان هي زعلانه عشاني ، بس محدش بأيده حاجه ، فوقت من سرحاني ع صوت امي

_ ي نووح

= ها ، أيوه ي ماما

_ انت لحقت تبدا تسرح من دلوقتي

ختمت كلامها بضحكه بدعي دايما انها تدوم

= وانا اقدر اسرح وانا معاكي ي أميرتي

_ لا لا جايلك أميره غيرى ، خلي البكش ده ليها بقا

= ولا اي واحده تقدر تاخد دلعك ي ست الكل

_ طيب ي بني ، خلي بالك من خطيبتك ، انا عارفه انه انت عايز تتجوز قبل م نسافر للعمليه ، بس برضه عايزه اقولك بلاش العمليه دي

= مش هنعيد الكلام تاني ي امي ، انتي هتعملي العمليه ، وتخفي ، وتقومي بألف سلامه

ختمت كلامي وانا ببوس ايديها

_ الله يباركلي فيك ي بني

وسكتنا لحد م روحناا

صليت ركعتين قيام وانا بدعي ربناا انه يقويني ع ال جاي ، وال باين انه صعب ، مجرد م افتكر خنقتي وانا قاعد الشويه ال قعدتهم عند حوراء بيخليني اسأل نفسي ، ازاي هستحمل تبقى مراتي ، ازاي هستحمل أعيش معاها ف بيت واحد وانا مقدرتش اقعد معاها نص ساعه ع بعضها ، ربنا يهون ال جاي

قبل م انام لقيت ماما بتنادي عليا ف روحتلها

_ أيوه ي ماما

= تعالي ي نوح أقعد

_ نعم ي ست الكل

= عمرك م خبيت عليا حاجه ، ولا عمري ضغطت عليك عشام تقولي مالك ، ولا هاجي النهارده اضغط عليك عشان تقولي ف اي ، بس هقولك ان انا عارفه ف اي

_ عارفه اي بس ي امي ، اي الكلام الكبير ده ، مانتي بتقولي عمري م خبيت عليكي حاجه ، هخبي النهاردة لي بقا ؟

= وده ال عاوزه أعرفه منك ي نوح

_ مفيش حاجه ي ست الكل

قالت فجاه وبنظره متفحصه

= انت بتحب حوراء ي نوح؟

_ مانتي عارفه انه ماليش ف جو الحب ده ي امي

= اومال هتتجوزها لي؟

_ عادي ي ماما ، عشان محترمه ، وبعدين الحب بيجي بعد الزواج ، مانتي عارفه اني نفسي ف الحب الحلال

= ايوه عارفه ، زي مانا عارفه برضه ان حوراء مش هي ال كنت بتتمناها ، وقصدي ع طبعها مش شكلها

_ مانتي قولتي ي امي اني هغير طبعها ان شاء الله

= بص ي بني ، انا مش هعمل زي ال ممكن يقول انك متجوزها عشان طمعان ف شركه ابوهاا والجو ده ، لاني عارفه اني مخلفه راجل ، ومربيه راجل عارف ربناا ، وحامل كتابه ، وعارفه كمان ان ال عندك اكتر من ال عند ابوها ، فعشان كده هقولك حاجه بس

_ اتفضلي ي امي

= البنت باين عليها بتحبك ، فلو مش هتقدر تحبها متكملش ، بلاش تظلمها ، بلاش تكسر قلبها عشان كسره القلب وحشه

وهل تخبريني انا ي امي عن كسره القلب ، اتخبري رجلاً قلبه مفتت لاشلاء

كتمت ال ف سري عنها _ حاضر ي امي

= لو جيت عليها ف يوم ي نوح صدقني ، انا ال هقفلك

اتكلمت بمرح مصطنع عشان اقفل الحوار ده

_ انتي بتدافعي عنها من دلوقتي ي امي ، اومال لما تيجي هتعملي اي

= هعمل زي م بعمل معاك انت واختك ، هتبقى بنتي زيكو

_ ربناا م يحرمنا من حنيتك دي ، هقوم انا بقا عشان شغلي الصبح

= ماشي ي حبيبي ، تصبح ع جنه

سبت امي ومشيت وانا بكتشف ال كل ال قالته صح ، بس اعمل اي ، انا مقدرش أحبها ، بس وعد هعاملها بما يرضي الله

فضلت طول الليل مش عارف انام ولا حتي عارف أفكر ، لحد م الفجر اذن ، صليت وقمت لبست عشان اتمشي شويه قبل م أروح الشغل

________________________

_ حوراء ، ي حوراء

= هاا، نعم ي بابا

_ قومي ي بنتي بقا

= ي بابا كمان شويه بس

_ ي بنتي قومي نوح كلمني وعايزك

نطيت مره واحده من ع السرير بعد اخترقت كلمته عقلي

= نوح ، لي ف حاجه ولا ايه

_ هو حضرتك ناسيه انه فرحك بعد اسبوع

رديت بغباء واحده لسه صاحيه من النوم

= لا عارفه ي بابا ، فيها اي يعني

= ي بنتي مش هتجيبي الشبكه وفستان فرحك ، قومي بقا

_ ااااااه ، صدق صح

= طيى قومي بقا الله يهديكي

_ حاضر ، طيب نوح قالك اي

= هو كلمني وقالي انه عايزك عشان تنقوا الشبكه وتجيبوا الفستان بتاعك

_ طب وهيجي امتي

= هو قالي لو هتروحي الشركه تعدي عليه ، لو كده يجيلك هو ، ف ال انتي عايزاه بقا

_ لا انا هروحله الشركه

= خلاص ال يريحك ، انا هسبق انا عشان متاخرش اكتر من كده ، وانتي البسي وتعالي

_ تمام حاضر

= عايزه حاجه

_ تسلم ي اخويا، منحرمش

رد وهو بيضرب كف ع كف = الله يهديكي

مشي وانا قومت لبست بنطلون بوي فريند واسع ، وده عشان نوح معايا ، وبلوزه طويله شويه ، حطيت روج وماسكرا والبرفيوم ال بحبه ، ومشيت

وصلت الشركه ودخلت عشان اروح لمكتب نوح

قبل م اسمع صوت ضحكه ، عاليه ، مدلعه ، لبنت ، ف مكتب نوح ، ده باينها هتبجي ليله مطينه بطين الليلادي

مخبطتش ورزعت الباب ودخلت ، لقيتها سلمي ، واحده من معجبات نوح ، ال مش مديهم وش ، بس باينه بيفكر ولا اي ؟

دخلت لقيتها واقفه قدامه بمياصه وهو مش بيبصلها ومديها الوش الخشب ، حلو والله ، لحق نفسه قبل م اسمي عليها

_ ف حاجه ولا ايه ي سلمي

= ازيك ي حوراء

_ احسن منك ي حبيبتي ، بس بتضحكي كده لي

اتكلمت بدلع ماااااسخ = أبداً ، كنت بتكلم انا وبشمهندس نوح

رديت وانا بمسك ايد نوح وبتعلق فيه

_ وبتتكلمي انتي وبشمهندس نوح _ خطيبي _ ف اي ؟

ردت بتفاجيء = اي ده خطيبك ؟

_ اه ي حبيبتي عقبالك

اتلكمت بغيظ = والفرح امتي بقا

اتكلمت وانا لسه ماسكه ايد نوح وال لسه م ابداش اي رد فعل ع ال بعمله غير ايده ال اتصلبت اول م مسكتها

_ بعد أسبوع ي حبيبتي بس معلش انتي مش معزومه خالص ، اصل الفرح ع قد الحبايب بس

ردت بغيط = بعد اذنكو

_ خدي الباب ف ايدك ي حبيبتي

ودي كانت اخر جمله قلتها قبل م العاصفه تهب

لقيت نوح نزع ايده مني مره واحده لدرجه اني كنت هقع واتكلم بصوت يرعب وهو بيقف بعنف ، لدرجه اني كرسي مكتبه وقع ، وكذلك انا

_ هو اي ال انتي عملتيه ده؟

رديت بخوف = ع.. عملت اي ؟

زعق بعصبيه شديده وصوت أعلي ، لدرجه اني شكيت ان الشركه كلها هتتجمع ف المكتب حالا ، لدرجه اني كنت هعيط ، او بالفعل عيطت

_ ازاي تمسكي ايدي وتعملي الحركات المبتذله دي

رديت بصدمه = أنا؟ انا بعمل حركات مبتذله ي نوح

رد بصرامه وعصبيه _ ايوه بتعملي حركات مبتذله ، لما تمسكي ايدي وتقربي عليا بالطريقه ال تخليني اشم ريحه البرفيوم بتاعك يبقي بتعملي حركات مبتذله ، تقدري تقوليلي انا اقربلك اي عشان تمسكيني كده

رديت بتردد _ خخ.. خطيبي

= ايوه يعني اقربلك اي ، اخوكي ، ابوكي ، جوزك ، حد من محارمك يعني

_ لا

رد بصرامه وعنف = يبقي اخر مره تلمسيني او تمسكي ايدي ، فاهمه ولا لا

جملته مكنش قصدها اني ممسكش ايده قبل م نتجوز لا ، حسيتها بعيده المدي ، كانه رافض قربي ، سواء دلوقتي او بعد الجواز

بس عشان القلب بيهواه ، اختلقله ميه عذر ، من ضمنهم انه فعلا بيقول كده عشان حرام ، وانه مينفعش امسكه ، بس مكنش لازم يزعق اوي كده ، لدرجه ترعب وتوجع اوي كده

رديت وانا بحاول امسك دموعي ، وال مساعدتنيش ف ده عيني بل بالعكس ، كأنها متفقه معاه ضدي

_ حاضر

رد بجمود كأنه مش شايفني ببكي ، او كأني مش فارقه معاه

= يلا عشان نجيب الحجات ال هنعوزها

مشيت معاه من غير كلام ، خرجنا من المكتب بعد م مسحت عيني وظبطت نفسي ، مشيت جمبه عشان يبان فرق الطول المهول ال بينا ، وال بيبنلي انه رأسي مقربتش حتي من كتفه ، ده غير جسمه الرياضي وال محافظ عليه ، وال بياكدلى ان مجيش اي حاجه جمبه

خرجنا بس الطريق كان لبيتنا مش لاي مكان تاني

اتكلمت بصوت مبحوح من البكا _ ال طنشه _

_ احنا رايحين فين

= هنرجع البيت

_ لي ؟

= عشان تغيري هدومك

بصيت لهدومي بأستغراب ورديت بأستغراب اشد

_ ايوه لي برضه

= عشان ريحه البرفيوم ال انتي مغرقه نفسك بيه ده

_ واي المشكله يعني مش فاهمه

رد وهو لسه منهمك ف السواقه من غير م يبصلي _ كالعاده _

= المشكله انه حرام حضرتك

_ لي يعني ، دي حاجه بحبها ، بحب ريحتي تبقي حلوه ، فين الحرام ف كده

= حرام لان الرسول عليه الصلاة والسلام قال

" ايما أمرأه استعطرت فمرت ع قوم ليجدوا من ريحها فهي زانيه "

فهمتي حرام فين؟

_ هااا... وانا اعمل اي يعني ، اسيب ريحتي وحشه ؟

رديت بطفوليه ، منكرش اني خوفت من كلامه بس حبيته ، حبيت فكره انه بينصحني ، شوفته وقتها كانه بابايا ، ال خايف ع بنته من الحرام او الغلط ، لي مكانش هادي كده ف المكتب ، يمكن لأن هنا ممسكتش ايده ، بس اي الفرق ، الاتنين حرام ، لي م تعصبش ع دي كمان

رد بهدوء = محدش قال كده ، حطي حاجه ميشمهاش الا ال يقرب منك اوي ، زي صاحبتك مثلا وهي بتحضنك ولا حاجه ، مش حاجه يشمها كل ال حواليكي

_ اممممم... طيب

سكتنا لحد م وصلنا ، وصلنا البيت ، هو فضل مكانه ف العربيه وانا نزلت عشان اغير لبسي

قبل م اخرج من العربيه اتكلم وهو مازال باصص قدامه

= البسي حاجه طويله ، وبلاش بناطيل

بدون جدال وبتلقائيه هزيت راسي وطلعت ، بدون م اركز انه مش هيشوفني وانا بأكد ع كلامه ، طلعت اخدت شاور وانا بحاول افوق من البكا ال بكيته ،

خلصت وخرجت ، لبست دريس كنت اشتريته مره بدون م البسه ، كان لونه اسود ف ورد صغير بلون الكاشمير ، وف الوسط حزام كاشمير

لبسته ، ولبست هيلز كمحاوله اني راسي توصل لكتفه حتي ، ورفعت شعري ديل حصان ، بدون م ازود اي حاجه ع شكلي ولا احط برفيوم نزلت ،

ركبت العربيه وهو ساق بدون م يبصلي ومشينا

...........

رواية معتكف في محراب قلبي الفصل الخامس

ركبت جمبه وهو فضل يسوق ومازال الصمت مغلفنا احنا الاتنين ، زعلانه منه ومن طريقته بس عايزاه يتكلم ، عايزه اسمع صوته ال بيعمل خلل ف دقات قلبي ، عايزه اسمعه وهو بيتكلم معاياا ، عايزه احس انه خطيبي فعلا ، احس انه أسبوع وهبقى مراته ف بيته

يأست اننا نتكلم ف سندت راسي ع الكرسي وسكت ، لي معلقش طيب ع لبسي ، لي مقالش انه الدريس شكله حلو عليا ،

هو معحبوش طيب ، شايفه وحش عليا ، بس شايف اي؟ ده هو مبصليش حتي ، لي ملتزم كده ، لي متدين كده ، او لي انا ال بعيده كده ، لي طيب قلبي وقعني ف اكتر شخص مختلف عني ، من كل النواحي

واحنا ف الطريق خرجني من سرحاني صوت الفون بتاعه ، خرج الفون بتاعه وهو بيشوف مين ال بيرن وانا مازلت مرقباه بطرف عيني عشان م ياخدش باله ، او هو كده كده مش هياخد باله ، ده هو تقريباً ناسي اننا جمبه

أميرتي ، ده الاسم ال ظهر ع الفون ، رافق الاسم الإبتسامة ال ظهرت ع وشه ، وال ظهر معاها غمازه اخترقت لحيته ال محلياه

ورافق الاتنين غيره حرقت قلبي وانا عماله اتخيل مين ال مسميها أميرتي ، مين اميرته ، مين...

_ سلام عليكم ، ازيك ي ست الكل.... انا الحمدلله بخير طول مانتي بخير....... لا انا مش ف الشغل.... تمام حاضر...... الله يسلمك

خلص كلامه وانا مازلت بصاله مستنياه يتكلم ، يقول اي حاجه ، يعرفني حتي مين ال بيكلمها ومسميها كده

قبل م اساله فعلا بعد م الغيره سيطرت عليا لقيته هو بيتكلم ، ومازال عينه اتجاهها متغيرش عن الطريق

_ ماما بتسلم عليكي

= الله يسلمك

وطبعا مش هسكت ع كده ، اهو ف اي حاجه اعرف اتكلم معاه فيها

_ هي عامله اي؟

= الحمدلله على كل حال

كملي ي حوراء كملي ، معلش اتكلمي انتي وبعد الجواز هيتكلم هو ان شاء الله

_ حددتوا معاد العمليه؟

= لسه بنشوف الدكتور هيقول امتي

_ ربناا يقومها بالسلامه ان شاء الله

= ان شاء الله

هو اي البرود ده ، لا بجد اي البرود ده، ده كأنه مغصوب عليا ، كان انا ال طلبت ايده مش العكس

كتفت ايدي وانا ببص من الشباك بحزن ، لي كده ، لي المعامله دي ، او لي مفيش معامله أصلا، لي اجابته ع قد السؤال ، لي مش بيبادر بأي حاجه ، كلمه حلوه، نظره ، اي حاجه انا راضيه والله

وصلنا المحل ال المفروض هنجيب منه شبكتي ، دخلنا وهو سلم علي صاحب المحل وطلب مني انقي ال يعجبني

بكأبه بدأت فعلاً اشوف الحجات ال الراجل عمال يعرضها بحماس مش موجود عندي او عند نوح ،

اخترت دبله وخاتم صغير واستكفيت،، مش وقت اني اشتري كل ال انا عايزاه ، اصلا انا مش بحب البس حاجه ف ايدي ، مهما كانت اى ، بس دي شبكة نوح ، ف ع قلبي زي نسمه الهوا عادي ، وإنما كمان هو عنده عمليه مامته ، ف اكيد عنده. مصاريف كتير ، وانا اكيد مش هتقل عليه يعني

قبل م ابصله عشان أعرفه اني اخترت خلاص سمعت صوته وهو بيوجهلي الكلام بهمس خلي قلبي يرفرف

_ هاتي ال انتي عايزاه

= احم ، خلاص جبت

_ هاتي تاني

_ لا لا ، انا اصلا مش بحب البس حاجه ف ايدي ، كفايه كده

_ هاتي حتي لو مش هتلبسيه ، هاتي شبكتك براحتك

= لي يعني ، لا انا جبت ال انا عايزاه

خلصت كلامي وطبعاا مسعمليش ولقيته بينقي حاجات تانيه مع ال اخترته ، حاسب عليهم بدون م يسمعلي ومشينا

ركبنا العربيه ، حط العلبه ف ايدي واتحرك عشان نروح السنتر ال هنشتري منه فستان الفرح

وقفنا بعد م وصفتله المكان ، نزل وانا نزلت وراه ودخلنا

البنت ال كانت واقفه عارفه اني هاجي بعد م كلمتهم ع البيدج بتاعتهم

اول م شافتنا ابتسمت لنوح ال مبصلهاش اصلا ، البسمه دي انا عارفها كويس ، هي نفس البسمه ال ابتسمتها اول م شفته وال دلت ع اعجابي ف وقتها ، وال اتغيرت بعدهاا بأسبوع عشان ابقي هيمانه فيه ، فتترسم بسمه لوحدها اول م أشوفه وبقت تدل ع عشقي ليه

روحتلها وانا بحاول اهدي ، مش ذنبها ، مش ذنبها انه عنده كل المواصفات ال تحبب اي بنت فيه ، مش ذنبها ان ملامحه تخطف القلب قبل العين ، حتي ف وسط الجمود ال مستوطن ملامحه، ومش ذنبي اني حبيته ، حتي وانا حاسه ان ف حد تاني محتل قلبه

دخل قعد ع الكرسي وطلع فونه يلعب فيه ، بدون م يوجه ليا اي كلامه

وبكائبه اشد بدأت اشوف هختار اي دريس عشان البسه ، وف وسط مانا بشوف الدريسات بعد م فكيت شويه بعد م شوفت جمالهم ال خطفني ، لقيته بيتكلم بعد م وقف وهو بيتحرك ناحيتي ، عشان يوصلي ويسيب مسافه اكتر من مترين

_ متجبيش حاجه مفتوحه

أكيد مش غيره بس تمام ، انا اصلا مش بحب البس مفتوح

= حاضر

_ وبلاش حاجه ضيقه

= حاضر

_ تمام اتفضلي

مش هو المفروض يختار معاياا ، يعني هو لازم ينقي معايا صح ، اومال لي قاعد وسايبني انا ال بختار كأنه فرحي انا بس ،

ف لحظه الدموع هاجمت عيني ، وع عكس العادي مقدرتش امنعها ،

غريبه انه عروسه بتختار فستان فرحها للشخص ال بتحبه وبتبكي بحزن ، جمله غريبه مش لايقه ع فرحتي ال كانت موجوده وانا بتحرك عشان اروحله الشركه

جمله باين منها الوجع مش محتاج اي توضيح ، جمله زودت بكايا اكتر ، لدرجه اني طلبت ادخل البروڤا عشان اقدر اسيطر ع البكا ال هاجمني بدون اي رافه اني معاه ، او ف مكان غريب ، بدون اي رافه اني بختار فستان فرحي

_ اهدي ي حوراء ، اهدي ، انتي لسه ف الأول ، لسه ف البدايه ، نوح خطيبك دلوقتي ولازم تستحمليه ، وكمان هو مشغول بتعب مامته ، أكيد مش قصده يهمشك يعني ، اهدي

مسحت وشي وخرجت ، اختارت الفستان لوحدي وهو قاعد ع الكرسي قصادي ، مغمض عينه وساند راسه ع ضهر الكرسي وبيسمع ف الآير بود

غصب عني ، اتحركت بقلبي قبل رجلي عشان اقف واتامله، شكله خطف نفسي قبل قلبي ، شعره ال راجع ورا والمروحه عماله تحركه عشان يجي ع جبينه وعينه ، لحيته ال محلياه وزايداه حلي ، غمازاته ال باينه حتي بدون م يضحك ، تفاحه آدم ال ظاهره بدون م يتكلم ، برفانه ال مالي المكان و ال بينعش قلبي مجرد م بتنفسه ، هيبته وشموخه ال فارضين حضورهم بدون م يتكلم ، جسمه المظبوط بالملي تقريباً ، حلو جدا ، حلو اوي

وبدل م يقابلني عينه ، لفيت عشان اقابل عيني انا ف مرايه المحل الموجوده ، لي يختارني ، شكلي عادي ، مش خارقه الجمال يعني ، ملامحي عاديه ، مش مبهره ، معنديش عين زرقا ولا زيتوني زيه ، عسلي عادي ، معنديش بشره ناعمه زي بشره الاطفال ، ومش بيضا بياض صافي ، لا قمحيه ، وجسمي مش زي الساعه الرمليه ، لا عادي مظبوط بس ، مش طويله زيه ، لا قصيره موصلش حتي لكتفه بالكعب ، شفايفي مش حمرا طول الوقت ، لا لونها طبيعي ، ولو تعبت بيبقي ازرق

باختصار معنديش اي حاجه من مواصفات ابطال الرويات ، وال من وصفهم بحس انهم مش بشر زينا ، ولذلك كرهت الروايات ، بحس انها بتزود عقده النقص ال جوايا ، اصل البنت ال تبقى بشرتها زي الاطفال وبيضا زي الحليب وجسمها مظبوط مجنن ال حواليها ، وشعرها طووويل وسايح ، تبقي مش تبع البشر ،

انا شخص بيكره الاڤوره ف اي حاجه ، مبحبش أبدا حاجه عشان استمتع والاقي شخص ببقفلني منها بأنه يحطلي حجات تعجزني او تحسسني اني قليله ، وده ال بيحصل ف الروايات ،

اصل بنت مين ال بشرتها مببجيش عليها وقت وتبقى مرهقه من تعب الشغل ، بنت مين ال مش بيكون تحت عنيها اسود من السهر والدراسه ، بنت مين ال عنيها مش بتدبل من الحزن او البكا ، بنت مين شعرها مبيضعفش من المجهود او من الزعل ، انا شخص بيكره اڤوره كاتبي الروايات جدا

انا شخص بيكره الاڤوره ، بس حبيت نوح بدرجه عدت كل الحدود ، حبي ليه مش أوفر ، ده بقا الهوا ال بتنفسه ، وانا مفرقلوش

نوح ، ال لسه منتبها انه واقف ورايا ، ولوهله عنينا اتقابلت ف المرايه ، قبل م يخفضها بسرعه وهو بيتمتم بحاجه اعتقد انه بيستغفر ، ابتسمت بسخريه ع حظ قلبي وسكتت ، قبل م يتكلم هو ومازال محافظ ع عينه بعيد عني

_ لو خلصتي يلا بينا

= مش حابب تشوفه

_ احم ، ف الفرح ان شاء الله

اتحركت بدون م ارد عليه وانا نفسي ابكي ، حاسب البنت بتاعه المحل ، وال مازالت هتاكله بعنيها ، وانا واقفه بجمود بدون م اتكلم

خلص واخدني ومشينا ، وصلني البيت ف وسط صمت تام طول الطريق ، مجرد م نزلت من العربيه كان طار بيها ، بدون ولا اي كلمه

طلعت فوق وانا بمني نفسي انه مش عارف يتكلم معايا براحته عشان انا غريبه عنه ، مهو مش معقول مغصوب ع الجواز يعني ، مش طبيعي حتي ، اذا كان مبقاش فيه بنات بتتغصب ، الراجل هيتغصب!!

عدي يوم ، واتنين ، وتلاته ، واربعه ، واحنا مبنتكلمش ، طول اليوم لوحدي بشتري الهدوم ال هحتاجها

نازله النهارده لوحدي زي باقي الايام ، عروسه فاضل ع فرحها اقل من اسبوع نازله لوحدها تختار لبسها ، بدون صاحبه ، بدون ام ، بدون اخت ، بدون حبيب ، بدون حتي خطيب

كم بؤس ووحده غير طبيعي بالمره ، وللحظه واحده حاولت اهدي فيها وامنع الغصه ال اتشكلت ف قلبي ، وقبل م اسيطر فعلاً لقيتني ولتاني مره مش قادره ، وبدأت بالبكا فعلاً ف الشارع ، بدون احساس بقت عيني عماله تدور ف وشوش الناس ال بتبص باستغراب وشفقه تدور ع اي حد ، اي حد يبقى جمبي ، الفتره دي بس ، حد يبقى معاياا وانا بختار لبسي ، يقولي اعمل اي ومعملش اي ، يقولي كفايه عليكي لف لحد كده تعالي نشرب حاجه وبعدين نكمل ، يشيل معاياا الشنط ال رميتها من تعبي دي

انا... انا مستاهلش الوجع ده والله ، مستاهلوش ، مستاهلش كم الوحده ال انا فيها دي ، مستاهلش كم القهره ال ف قلبي دي

محدش جمبي ، لا بابا ، ولا امي ال ماتت ، ولا صاحبتي ال كنت فاكراها هتقف ف ضهري ، ولا حبيبي ال المفروض بقا خطيبي ، خطيبي ال مكلمنيش ولا مره ، ولا شوفته من اخر مره كنت معاه فيهاا

وف لحظه وانا مازلت ببكي عيني وقعت ع الدبله ال ف ايدي ، هو فين صاحبها ، لي مش هنا معاياا ، لي مش جمبي ، لي مش حاسه بوجوده

وف لحظه يأس خرجت الفون وانا بضغط ع رقمه عشان ارن عليه ، مره واتنين وتلاته لحد م رد

_ يعني مردتش مرتين يبقى اكيد مشغول

وبدون م ارد ع كلامه كنت بتكلم بحده وانا بحاول اخبي البكا ال ف صوتي من رده

= عايزه اقابلك ، حالا

_ عندي اجتماع مش فاضي

= معلش مش هعطل حضرتك ، خمس دقايق بالظبط وامشي

رد وهو بيزفر بعنف وصلي عن طريق الفون وبرغم المسافات

_ انتي فين

= انا عند الكافيه ال ف المول ال جمب الشركه

_ تمام ، خمس دقايق وابقي عندك

= تمام

قفلت الفون وانا بلم الشنط وبتوجه للعربيه عشان السواق يروحهم البيت قبل وصول نوح

عم توفيق اول م شافني اتفزع من شكلي ، اتكلم وهو بينزل من العربيه بسرعه

_ مالك ي حوراء ي بنتي ، بتبكي لي

= احم ، مفيش حاجه يعم توفيق ، ده بس من التوتر عشان الفرح قرب وكده

_ خير ي بنتي متقلقيش ، ومتكبيش كله هيبقى تمام

= مش باين يعم توفيق ، مش باين

_ اسمعي مني بس ، انتي طيبه وبنت حلال ، وجواكي مازلتي طفله ، صدقيني هتفرحي ، وبكره تقولي عم توفيق قال

= ان شاء الله ، هستاذنك بس تروح الشنط البيت

_ طب وانتي؟

= انا لسه هقابل نوح وبعدين هبقى اجي ف تاكسي وخلاص

_ طب خلي بالك من نفسك

مردتش عليه وانا ببتسلمه بهدوء ، لمين؟ هخلي بالي من نفسي لمين ، انا ماليش اي لازمه ف حياه اي حد

اتوجهت للكافيه ال قولت لنوح عليه وانا بدمع تاني ، مش سهل الاحساس ال عايشاه ، مش سهل اني احس اني لوحدي ، احنا كذابين جدا ، مين بيحب الوحده ، مين بيستحملها

احنا حتي لو بنحب الوحده فمحتاجين حد نقوله اننا بنحب الوحده

كان نفسي ماما تبقى معاياا الفتره دي ، كان نفسي

عند الخاطر ده بدات ف البكا بعنف وانا بخبي بوقي بايدي بسرعه عشان معملش صوت ، حاولت اهدي وانا ببص ع باب الكفايه ولقيت نوح جاي ، مسحت عيني وانا مازلت موطيه رأسي

جه ، شد الكرسي وقعد بعيد عني ، حط نظارته وفونه ومفاتيحه ع الترابيزه ، وسكت

_ كنتي عايزاني لي

اتكلمي بقا ، مش انتي حبيتي تنهي ال م بينكوا ، اتكلمي يلا ، بس لحظه ، هو اي ال م بينا ، حته دبله ف ايدي ملهاش اي تأثير ف قلبه ، بس ليها ف قلبك انتي ،

فوقت من سرحاني لما اتكلم بحده

_ لا م انتي أكيد مش جيباني عشان اسمع صمتك ، انا مش فاضي ، وكان ف اجتماع مه.....

قطع كلامه لما رفعت عيني وانا بخلع الدبله وبحطها قدامه ع الترابيزه بدون م اتكلم ، او ابصله

................

رواية معتكف في محراب قلبي الفصل السادس

رد باستغراب بعد م شاف وشي ال باين عليه البكا

_ انتي بتعيطي؟

= احم ، لا مفيش حاجه

_ اومال وشك عامل كده ليه

= عيني بس بتوجعني شويه

_ متاكده

حاولت امسك نفسي ومبكيش تاني وانا بهزله راسي بهدوء تأكيد ع كلامه

مسكت الدبله حطيتها قدامه بهدوء وبدون م ابصله عشان مبداش ف البكا تاني

_ اتفضل

= اي ده؟

_ دبلتك

= مش فاهم

بدات كلام بدون اي احساس مني بالدموع ال غرقت وشي بدون م احس

_ حضرتك مش لازم تضغط ع نفسك وتخطبني، الحقيقه مش عارفه اي ال جبرك يعني ، بس مش لازم ، دبلتك اهي ، مش لازم تيجي ع نفسك اكتر من كده ، كفايه عليك خمس ايام جاي ع نفسك فيهم و...

قاطعني وهو بيتكلم بحنيه غريبه عليه معايا ، والاغرب أنه مازال باصصلي ، او بيحاول يتواصل معاياا بأنه يبصلي كل فتره

_ حوراء

قبل م اكمل كلامي كنت سكتت تاني بعد م سمعت اسمي بنبره صوته بالطريقه دي ، رديت بتوتر وانا بمسح عيني وببصله بأمل اتولد غصب عني

= نن.. نعم

_ انا اسف ، انا عارف اني قصرت معاكي اليومين ال فاتوا ، بس غصب عني ، ماما حالتها مكانتش افضل حاجه فمكنتش مركز ف اي حاجه حواليا ، حقك عليا معلش انا اسف

هو انا المفروض افضل زعلانه ، المفروض افضل شايله منه ، مش عدل انه يمسح كل الزعل ال جوايا من ناحيته بكلمتين ، مش عدل اني معرفش اسيطر ع دقات قلبي ال عليت ، ولا ع اللمعه ال نورت عيني ، ولا ع النجوم ال خرجت مني وانا ببص لملامحه وهو باعد عينه عني

فوقت ع صوته وهو بينادي ومازال باعد عينه عني

= طب هي عامله اي دلوقتي

_ الحمدلله يوم تعبانه ويوم كويسه

= احم ، ممكن اجي اشوفها

_ اه طبعاً ، دلوقتى لو تحبي

= تمام ، يلا

قومت وانا باخد فوني من ع المكتب وقبل م اتحرك لقيته بينادي عليا تاني ، هو صوته ف حنيه ولا عشان مش متعوده ع اسمي منه ، اصل اسمي منه له طعم مختلف جدا ، وممتع جدا جدا جدا

_ حوراء

بصيت ليه وانا مستنياه يتكلم ، لقيته بيشاور ع الدبله ال مازالت ع الترابيزه

اتكلم وهو بيديني مساحتي من القبول او الرفض بكلمه واحده

_ الدبله؟!

وبدون م انتظر منه اي مبادره تانيه كنت شيلتها ولبستها ، بدون م ادي لنفسي اي مساحه للتفكير ، كان قلبي بكل غباء وبدون تفكير اخد القرار

ابتسمت بأمل وانا ببصلها بعد م رجعت صابعي تاني ، هو انا هبقي بالغ لو قولت اني كنت حاسه اني مخنوقه من غيرها ، اصل انا مخدتش نفسي براحه إلا بعد م لبستها

اخد حاجته هو كمان من الترابيزه ، حط نضارته ع غابات عيونه عشان يداريهم عني ويرحم قلبي ومشينا

ركبت وهو ركب واتحرك بالعربيه عشان نروح البيت عنده ، وف وسط الطريق كلمت بابا عرفته اني هروح مع نوح عشان اشوف والدته ، وهو معارضش الحمدلله

وصلنا البيت ، نزل وطلع وانا مشيت وراه ، وبحكم اننا لوحدنا مرضاش نركب الاسانسير ، وطلعنا ع السلم ابن النحله دهو ، بس مش مهم والله ، فداه فداه ، المهم اني معاه ، حتي لو ف صحرا والله

دخلنا البيت وقعدني ف الصالون ع م يعرف مامته ، الحقيقه انه البيت راقي جداا ، تحس فيه بالراحه غصب عنك ، ف حاجه تشدك فيه ، تحس بأمان بيغلفك من كل جانب

ف وسط إحساس بالراحه ال كان غامرني ومخليني مش عارفه افكر ف اي حاجه تانيه لقيت نوح خارج من اوضه مامته وهو بيبتسم وبيطلب مني ادخلها

بهدوء اتحركت فعلاً عشان ادخلها ، سلمت عليها بهدوء وهي شدتني قعدتي جمبها ، اتكلمت بهدوء وانا بحاول اهدي ضربات قلبي ال مش مستوعبه اني مع نوح ف بيته

_ ألف سلامه ع حضرتك ي طنط

= الله يسلمك ي حبيبتي ، وبعدين اي طنط دي

_ اومال اقول لحضرتك اي؟

= انا ماما ، انتي زي نوح واميرة دلوقتي

اتكلمت بعدم تصديق وانا عيني بتدمع غصب عني من حنيتها الغريبه بالنسبالي

_ بجد ، اقولك ماما بجد

ردت بهدوء وهي بتطبطب عليا بحنيه

= اه ي حبيبتي ، انا ماما دلوقتي

بدون م احس كنت بترمي ف حضنها بفرحه وانا بتمسك بيه بعنف، مش بقول حاجه غير اني بردد كلمه شكراً ،

مش سهل انك تعيش عمرك كله محروم من حنيه الأم ، دفاها ، احتوائها ، مش سهل خااص

خرجت من حضنها بهدوء ، وبصيت لنوح بفرحه وانا بسمح لدموعي تنزل ، لقيته بيبصلنا وف ابتسامه هاديه مرسومه ع شفايفه ، حاولت اركز معاها وابعد تفكيري ع انها ابتسامه شفقه ، المهم انه ابتسم

ابتسمت لماما صفاء وسكتت قبل م هي تتكلم وتوجه كلامها لنوح ال محي ابتسامته وبعد عينه عننا

_ عرفت تختار والله ي واد ي نوح

= اه ي ست الكل

_ قومي ي حوراء روحي لاميره ساعديها

= احم ، هي أميره بتعمل اي؟

_ المفروض انها بتعمل الغدا ، فقومي عشان نتغذي سوا

= بس انا مش بعرف اطبخ

_ ولا يهمك ي حبيبتي ، شوفيها بس واقفي معاها وخلاص

= حاضر

خرجت وانا عارفه انها بتوزعني ، بس اشطا يعني ، ابنها فمش هتكلم

دورت ع المطبخ لحد م وصلتله ولقيت اميره فيه

اتكلمت بالراحه وانا بعمل حسابي انها مش متقبلاني لسبب مش عارفاه

_ ماما صفاء قالتلي اساعدك

التفتتلي بسخريه وهي بترد باستهزاء

= ماما!! طيب

بصت قدامها تاني بدون م توجهلي اي كلام ولا حتي تبصلي تاني ، بدون تفكير مني لقيتني بسألها عن سبب معاملتها

_ هو انتي لي بتعامليني كده؟

مردتش عليا وفضلت مستمره ف ال بتعمله فكملت

_ هو أنتي خايفه اخطف منك نوح وكده ، ع فكره انا مش هعم....

قبل م اكمل كلامي لقيتها بتبصلي وبتضحك بصوت عالي

بصيتلها بأستغراب وانا مش فاهمه بتضحك لي ، وقبل م اسألها عن قصدها لقيتها بترد

= تصدقي الحاجه الوحيده ال مطمناني من ناحيتك انك مش هتعرفي تخطفي نوح

قبل م اسألها عن قصدها وافهم هي تقصد اي ، لقيت صوت نوح ظهر وهو بيسالها خلصت الأكل ولا لا ، ومقدرتش اتغاضي عن نظراتها ليها وال كانت مليانه عتاب

بس عتاب ع اي؟ معرفش

...........

رواية معتكف في محراب قلبي الفصل السابع

اتكلم بهدوء وهو مازال بيبصلها بنفس النظرات ال حيرتني

_ خلصتي الأكل ي أميره

ردت هي بتوتر وهي بتبعد نظراتها عنه

= احم ، أيوه لحظه بس

_ طب يلا

خرج وانا اكتشفت انه ماليش لازمه ف المطبخ وهي مش طايقاني كده فخرجت وراه انا كمان

خرج قعد ع الركنه وحط اللاب ع رجله يشتغل عليه وانا قعدت ع الكرسي بعيد عنه ، فضلت مكاني بتوتر مش عارفه اعمل اي ، ولا حتي اتكلم بما اني مش مديني فرصه لكده

قاطع سرحاني صوته وهو بيوجهلي الكلام بدون م يبصلي- كالعاده يعني-

_ ممكن تتدخلي لماما لو تحبي

يعني يجدع انا هلاقي فرصه اقعد معاك فيها واسيبك ، دي تبقي قله ادب مني والله

= احم ، لا عادي ، عشان متعبهاش

رد وهو مازال باصص ف اللاب قدامه

_ هي مش هتتعب ولا حاجه ، بس خلاص ال يريحك

= شكرا

رفع حاجبه باستغراب وهو بيرد عليا بعد م رفعلي عينه ثانيه ونزلها تاني

_ ع اي؟

= عشان عرفتني ع مامتك ، او عشان جبتني ليها النهارده

رد بهدوء _ ولا شكر ولا حاجه وزي م سمعتي منها ، انتي بقيتي زينا ، وقت م تحبي تيجي ليها تعالي

اتكلمت وانا بحاول أفتح انا معاه اي موضوع

= هو ممكن اطلب منك حاجه؟

رد بنبره عاديه _ اتفضلي

= ينفع نعيش هنا بعد م نتجوز، انا ال...

بكل برود وبكلمه واحده قاطع كلامي ، بدون اي فرصه للمناقشه

_ لا

= لي طيب ، انا ال بطلب منك كده

رد بحزم _ انا قولت لا ، هنعيش ف الشقه ال قصادنا ع طول

اتكلمت بتصميم وانا بحاول اغير رأيه، الحقيقه اني حبيت دفا حضن مامته، وعايزه ابقي جمبها دايما

= طيب مش هتفرق اهي ، وانا ال عايزه كده

بنفس نبرته ال فاتت متغيرتش ، بل أعتقد انها زادت

_ وانا قولت لا يعني لا

قبل م اكمل كلام معاه واحاول اقنعه لقيت اميره جايه تنادي عشان الغدا وانها حطته ف اوضه السفره

* الغدا خلص ي نوح

_ تمام وصلي حوراء وانا هجيب ماما واجي

* اتفضلي

دخلت قعدت ع السفره وهو شويه جاب مامته وجه ، قعد وكذلك مامته واخته

جو أسري لطيف، لو بس اسثنينا ان اخته مش طيقاني ، وانه هو شخصيآ تقريباً مش حابب وجودي ، كان هيبقي لطيف فعلا

وبما ان محدش بيكلمني غير مامته فده كان محفز قوي جدا اني اقوم من ع الكرسي عشان استاذن وامشي

بصولي باستغراب بس ال اتكلم كان مامته

_ راحه فين ي بنتي

= احم ، هستاذن بقا

_ بس انتي مكلتيش ي حوراء ، اقعدي كملي اكلك مينفعش كده

= شبعت والله ي ماما شكراً ، انا بس همشي عشان بابا ، استاذنكو أنا

_ طب استني نوح هيوصلك

= لا لا انا هاخد تاكسي ، شكرا

بصتله وهي بتخبط دراعه من تحت ترابيزه السفره ، ع أساس اني مش شايفه وكده ، بس للاسف كانت باينه جدا ، او انا ال مركزه ، مش عارفه

_ قوم ي نوح وصل حوراء

بص لمامته بصمت ، وبعدين قام ، وبنفس الصمت خرج من الاوضه اخد مفاتيحه وفونه وخرج ، بدون م يوجهلي اي كلمه

قبل م اتحرك وراه بصمت انا كمان لقيت أميره بتبصلي بشماته وهي بتحاول تخبي ضحكتها ، تمام انا عارفه هي بتضحك ع اي ، بس مش عارفه لي ، لي الكره ال ليا من ناحيتها ده ، لي مش متقبلاني

ماما صفاء بصتلي وهي بتحاول تبتسم عشان تنسيني تصرفات نوح وبنتها ،

بس هو ال بيعلم ف القلب بيعرف يتنسي؟ مكنش حد غلب ولا كان حد اتكسر بخاطره

حاولت اردلها الابتسامه وانا بسلم عليها وبمشي لوحدي

خرجت من الباب لقيته واقف مستنيني ، اتحرك وانا اتحركت وراه

نزلنا ، ركب العربيه وكذلك انا ، وصلني لحد البيت وقبل م انزل كان حن عليا ووجهلي كلام أخيرا

_ فاضلك حاجه هتشتريها؟

= اجم، فاضلي بس اللبس الخروج

_ تمام ، هتشتريه امتي؟

= ببكره ان شاء الله

_ تمام ، ابقى رني عليا قبل م تنزلي

اتكلمت باستغراب من اسئلته ، او من اهتمامه

= هو ف حاجه؟

رد بهدوء كأنه شيء طبيعي، مانه موقف وبيحصل كل يوم

_ هبقي اجي معاكي

اتكلمت بفرحه وعدم تصديق

= بجد

_ احم ، ان شاء الله

رديت بتوتر من الفرحه ال مش قادره اسيطر عليها

= ماشي ماشي حاضر ، هبقى اكلمك بكره

_ تمام

= يلا باي

خرجت من العربيه وانا حرفياً مش مصدقه ال حصل ، مش مصدقه اني هشوفه بكره تاني ، لا وهبقي معاه كمان ، ده ي فرحة قلبي والله

___________________

مؤمن دايما انه ربناا مبيعملش حاجه وحشه ، حقيقي " وعسي ان تكرهوا شيئاً وهو خير لكم "

جايز اكون مش حابب حوراء ، ممكن اكون مش متقبل وجودها ، بس ده ميمنعش انه بسبب صبري ع الابتلاء عوضني

عوضني حقيقي بجد ، بس هي حوراء إبتلاء ، للأسف مش قادر اشوفها اكتر من كده ، مش سهل اني اتجبر ع شخص يكمل معايا حياتي ، وغصب عني ان دي كل مشاعري ناحيتها

مش غبي عشان مقدرش اشوف حبها ، مش هقول ف عنيها عشان مش ببصلها ، بس خلينا نقول انه باين جدا من تصرفتها ، لهفتها ، فرحتها ، ارتباكها

توترها قدامي ف الشركه ، فرحتها لما روحنا نتقدم ، غيرتها عليا ف المكتب ، بكاها وهي بتخلع الدبله ، ضحكتها وانا بقولها اني هبقي معاها وهي بتشتري لبسها

خلينا نقول اني دي كلها علامات أوضح من الشمس ، بس اعمل اي

غصب عني اني مش قادر احس بيهاا ، ولا حتي قادر اتقبلها

انا اتطمنت شويه من معامله ماما ليها ، ع عكس معامله أميره ليها ، وال مطمنتنيش خالص ، انا مدرك ان أميره زعلانه عشاني

بس مدرك برضه انه حوراء ملهاش ذنب ، مش انا ال هاخدها بذنب هي متعرفوش اصلا

مش ذنبها ان امي تعبانه ، مش ذنبها ان مكنش معايا فلوس ، مش ذنبها انه شرط باباها اني اتجوزها ، وال متأكد انها متعرفش حاجه عن الشرط ده

احنا لو هنقول ان ليها ذنب ف حاجه ، ف ذنبها الوحيد اني مش بحبها ، بس حتي ده مش ذنبها ، ذنبها اي إني بحب واحده غيرها

الحقيقه انه ذنب كل حاجه عليا ، وذنبها الوحيد انها حبتني

انا اصلا مش عارف لي اعتذرتلها ، لي طلبت تلبس الدبله تاني ، يمكن بكاها ، يمكن رعشتها ، يمكن حزنها ، مش عارف

بس خلينا نقول اني ممكن أطلع كسبان من حوار الجواز ده ، لو مثلا ساعدتها تقرب من ربنآ ، فأنا حقيقي مش محتاج مكسب اكتر من كده

ده غير انها بتصعب عليا ، بتثير جوايا مشاعر غريبه ، معرفش شفقه ، حزن ، مش عارف ، بس مش مشاعر حب ، وده مش بايدي

بكاها النهارده ف المول حسسني انها طفله تايهه من مامتها ف الزحمه ومش عارفه تروح فين ولا مين

بكاها لما ماما حضنتها عرفني كم الحزن ال هي فيه ، عرفني اد اي هي مفتقده مامتها وحنيتها

فرحتها لما نصحتها عشان حوار البرفيوم حسسني أنها طفله صغيره لسه بتتعلم تخطي برجليها ع الطريق الصح

تقبلها النصيحه وانها مجادلتش وسمعت الكلام هو ده ال شجعني اني اخدها تحدي ف انها تقرب من ربناا

اينعم مش بحبها بس ع الأقل اقربها ، هتتعب معايا انا عارف ، ولعل ده يكون شفيع ليا عندها بعدين

__________________

الساعه الآن التاسعه بتوقيت القاهره ، وي فرحه قلبي بالساعه دي

نوح بيه هيعدي عليا حالا عشان نتحرك نروح المول

مش معقول كم الفرحه ال انتي فيها دي ي حوراء عشان بس هتشوفيه وتروحي معاه المول

اومال لما يقولك بحبك هتعملي اي ، بس لحظه ، هو نوح ممكن يقولي بحبك

هششششششش والله م هنكد ع نفسي ، نتناقش ف الموضوع ده بعدين

وطبعاً كعاده اي بنت مدهوله ع عينها وبتحب ده كان حوار بين وبين عقلي ، بس انا حاولت اسكته

بس ده ميمنعش ان السؤال فعلا علق معاياا ، هو انا ممكن نوح يحبني

من ساعة م لبست الدبله تاني وانا قلب نوح بقا ملكي ، جايز مش ملكي دلوقتي ، بس هوصله ، مسيري يوم هوصله

انا ورايا اي يعني غير سي نوح وقلب سي نوح

مش غبيه انا عشان معرفش انه بيحب حد تاني ، وانا مش بيحبني ومش متقبلني ،

ومعرفش لي خطبني الحقيقه بس مدام قرار الخطوبه كان منه ، واني البس الدبله تاني بعد م قلعتها كان قرار مني ، فانا معاه للاخر

والموضوع مش تحدي ، بس انا الحقيقه معنديش اي استعداد اني افكر ف احتمال انه ميحبنيش ، مقدرش استحمل الفكره أصلا

انا مش هقدر اكمل من غير كده ، ومن غير انه يبقي جمبي

_ يلا ي ست حوراء ، نوح مستنيكي تحت

وده كان صوت بابا وهو بيجي عشان ينقذني من افكاري

الحقيقه انه اكتر شيء مؤذي للإنسان هي أفكاره ، كفيله انه ترميه ف سابع ارض بعد م طلعته سابع سما ، بدون اي رافه ولا شفقه

_ ي حوراء بكلمك

= أيوه ي بابا معاك

_ نوح مستنيكي تحت

= حاضر نازله اهو ، هلبس بس الكوتشي واجي

_ ماشي بس خلصي عشان متتاخروش

= حاضر

بابا خرج وانا لبست الكوتشي ونزلت ، بعد م اتأكدت من شكلي ف المرايه ، وانه البرفيوم ال حطاه مش طالع ، والحقيقه اني عملت كده عشان نوح ميضايقش مش عشان حاجه تانيه

نزلت لقيته قاعد مع بابا بيشربو القهوه ، اول م شافني قام واستاذن من بابا ومشينا ، بعد توصيات بابا ليه عليا ، بس المفروض والله يوصيني انا عليه ، ده انا باكله بعيني وهو مش بيبصلي أصلا ،

اصلا المفروض ماما صفاء تخاف ع نوح مني ، وابنها عامل زي لهطه الجشطه كده ، هيييح

فوقي ي حوراء يخربيتك هتفضحينا ، فوقي ، فوقي

بصراحه بقا مفيش حاجه بتشجعني اني افوق ، افوق ازاي يعني ببرفانه ال يدوخ ده ، ع فكره المفروض يراعي اني انسان دعيف وميحطوش

المهم اني احترمت نفسي طول الطريق ومعملتش فيه حاجه الحمدلله

وصلنا المول ودخلت عشان اشتري لبسي وقبل م نتحرك وندخل اتكلم

_ انتي عارفه محل معين هتشتري منه

= أيوه

_ طب ف محل كويس أميره بتشتري منه هي والاء ، انا عارفه تعالي نروحه

= لحظه بس ، مين آلاء

..............

رواية معتكف في محراب قلبي الفصل الثامن

_ مين آلاء ي نوح

رد بثبات = بنت عمي

_ ودي كام سنه بقا؟

25 =

يعني اكبر مني بسنتين كمان ، مانا اصغر من البيه بخمس سنين ، البيه ال بيتكلم بلامبالاه هتشلني

، اتكلمت بذهول وغضب ، وغيره بتنبش ف قلبي بعنف

_25 يعني اصغر منك ب 3 سنين

رد بلامبالاه غير طبيعيه

= اها واي المشكله؟

اتكلمت بغضب وعصبيه من لامبالاته

_ اي المشكله؟ انت مش شايف انه ف مشكله انك تيجي مع بنت عمك وهي بتشتري لبس

= ومين قال اني كنت باجي معاها

_ انت لسه قايل من دقيقه

= فكريني كده انا قولت اي معلش

_ قولت انه ف محل أميره بتشتري منه هي وال اسمها بنت عمك دي ، وانك عارف المحل ده

= أيوه فين جمله اني باجي معاها بقا مش فاهم

_ يعني اي

رد بهدوء ولا مبالاه بقلبي ال بيتحرق من فكره انها بتبقي معاه ، او هو بيشاركها مشاويرها

= يعني انا أكيد ببقا عارف المحلات ال اختي بتشتري منها لبسها

مقدرتش امسك غيرتي وانا برد عليه بسخريه

_ اختك ولا بنت عمك؟

اتكلم بتحذير غاضب ف حين انه محافظ ع نبره صوته الهاديه

= مش معني اني جاوبت ع اسئلتك انك تخطي حدودك ، اعرفي انتي بتقولي اي

_ انا عايزه أروح ، بعد اذنك

= استنى عندك ، انتي مفكره نفسك راحه فين

_ هروح ، وبعد اذنك عديني

= انا مش فاهم ف اي ، ومفيش مرواح ، اتفضلي عشان نخلص ف اليوم ده

_ وانا مش عايزه اشتري حاجه

= وانا قولت يلا

اتكلمت بتوتر وانا ع وشك اني أبكي

_ بس.. بس انا عايزه أروح

رد بهدوء وبنبره اقل من العادي ، بدون اي اهتمام بيا

= حوراء انا مش جايب معايا بنت اختي ، قولت يلا

_ طب مش هنشتري من نفس المحل

رد بنفاذ صبر وهو بيحاول ميزعقش

= زي م تحبي ، يلا

اتحركنا فعلا عشان نشتري وانا عايزه اعيط ، مش عارفه اعدي الفكره من دماغي ، اوك انا مش شاكه ف نوح ، بس الفكره نفسها متعبه

انه يبقى واخد باله من المحل ال هي بتشتري منه ده جنني ، حتي لو مفيش حاجه ، بس غصب عني

دخلنا المحل وانا بدأت اختار اللبس ف محاوله اني انسي افكاري شويه ، دقيقه ولقيته بيختار لبس هو كمان

مجاش ف بالي غير انه بيشتري لاخته ، اصله بيشتري استايل غير استايل لبسي ، ف اكيد مش ليا يعني

ده غير انه أكيد مش هيكون بيشتري ليا ومياخدش رايي ، مش طبيعي يعني ، انا مش قلقاسه للدرجادي ، او لا انا قلقاسه مع نوح عادشي

المهم اخترت لبسي وهو اختار لبس كمان وجينا عشان نحاسب ، طلعت الفيزا وقبل م امدها للبنت ال كانت واقفه ف المحل كان هو طلع بتاعته ومدها ليها ،

وبما انها كانت مبحلقه لسي نوح فهي أكيد مخدتش بالها مني

_ انا هحاسب ع لبسي ي نوح

طبعاً لو كنت مفكره انه هيرد عليا فلا محصلش ، ولو حد مفكر اني هعاند واصمم ولا انا هحاسب لنفسي وشغل الفيمسنت ده ، فبرضو لا

هو بصته كانت كفيله تخرسني ف سكت يعني ، م هو الواحد مش مستغني عن روحه برضه

حاسب ع اللبس وشال مني الشنط ومشينا ، خرجنا حطهم ف شنطه العربيه والتفتلي

_ تحبي تروحي ولا تروحي ف مكان تاني

والله انا مش عايزه اليوم يخلص مدام معاك ، ف بالتالي لا هنروح مكان تاني

= احم ، ممكن بس نروح اي كافيه ، عايزه اشرب قهوه عشان اصحي بس

_ طب م تروحي تنامي

= لسه عايزه أروح الشركه

_ طب تمام ، اتفضلي

روحنا الكافيه ال كنا فيه المره ال فاتت ، دخلنا ، قلع نضارته وحط مفاتيحه وفونه وقعدنا ، دقيقه وطلب سندوتشات واتنين قهوه

مجاش ف بالي انه طلب ليا انا السندوتشات غير لما الاوردر جه

بمد ايدي عشان اخد قهوتي لقيته بيمد ايده ويحط السندوتشات قدامي

_ اي ده؟

= كلي الاول ، بلاش قهوه من غير اكل

وطبعاا كاي بنت مش هكتفي بالحركه الچنتل دي لا ، لازم اسوق فيها

_ بس انا مش جعانه

= ال يريحك بس كده أحسن

_ اممم ، ع كده انت بتفطر قبل القهوه

رد بلامبالاه وهو بيرفع قهوته يشربها ويدور بعينه ف المكان

= لا

مش هتكلم خلاص ، يعني الواحد عايز اي اكتر من كده النهارده يعني ، خلصنا وحاسب ع القهوه ومشينا

وصلني البيت وقبل م انزل اتكلمت

_ انت رايح الشركه ولا هتروح

= لا رايح الشركه

_ طيب ممكن لو مش هتعبك تستناني

= تمام بس ياريت بسرعه

_ هوا

اخدت شنطي من العربيه وخرجت بسرعه عشان متاخرش عليه ، وانا عارفه اني لو اتاخرت مش هيستناني

غسلت وشي بسرعه ونزلت عشان نلحق نمشي وهو ميزهقش ، نزلت ركبت العربيه وهو اتحرك بسرعه ومشينا

شويه ووصلنا الشركه ، دخلت وانا جمبه ، هو اينعم انا مش باينه جمبه بس ولو ، جمبه برضه

وطبعا عشان انا معاه مكناش هنركب الاسانسير لوحدنا ، وعشان ميقوليش أمشي اخذناها مشي ع السلم ، طلع الأول وانا طلعت وراه

والله ي جدع لو مش بستغل كل دقيقه انت جمبي فيها كنت قولتلك اطلع ف الاسانسير ، بس مقدرش والله

وصلنا وهو اتحرك ع المكتب بتاعه بدون م يكلمني وانا دخلت مكتبي ، ال المفروض ف نهي وزميلنا مصطفي

دخلت قعدت ع المكتب وانا لسه هيمانه ف ملامح نوح ، او هيمانه ف تفاصيل اليوم ككل يعني

فوقت ع ايد نهي ال خبطتني بعنف

_ اااه، ف اي ي نهي ، م براحه

* م انتي ال داخله من غير لا سلام ولا كلام

_ ي ستي سلام وكلام ، كده انتي تمام يعني

* ف اي ي ست حوراء ، بتتكلمي كده لي ، هو محدش هيتجوز غيرك يعني

رديت بتبرير وانا بحاول مزعلهاش

_ ي نهي مش كده ، بس انتي خضتيني

اتكلمت بامتعاض وهي بتلوي بوقها بحركه غريبه

* اممم ، واخبارك مع سي نوح اي بقا

_ مش فاهمه يعني قصدك اي؟

اتكلم مصطفي ال كان قاعد بيتابع كل ده بصمت ، بص بخبث لنهي وهو بيتكلم

< سبيها ي نهي بقا ، مترخميش عليها وهي جايه هيمانه فيه كده

_ هو ف اي ، انتو بتتكلموا كده لي انتو الاتنين

اتكلمت نهي بغل وهي بتبصلي بسخريه _ غير مبرره _

* اصل كلنا مستغربين يعني ان نوح يخطبك

_ ومستغربين لي مش فاهمه

اتكلمت باهمال وهي بتقعد مكانها ع كرسي المكتب

* اصل كلنا عارفين انه عمره م بصلك ، بس بعد كده فهمنا بقا

اتكلمت وانا مازلت مستغربه من طريقتها والحقد ال فيها

_ طب م نوح طول عمره م بص لبنت ، وبعدين فهمتوا ازاي مش فاهمه؟

رد مصطفي وهو بيبصلي بطريقه غريبه

< فهمنا انه خطبك عشان شركه ابوكي

..........

رواية معتكف في محراب قلبي الفصل التاسع

_ معلش ي مصطفي قول تاني كده ، كنت بتقول نوح خطبني لي؟

* عشان شركه باباكي

_ اها ، وهو عشان انت كنت هتعمل كده مفكر كله زيك

* قصدك اي ي حوراء

_ قصدي انت‌َ عارفه كويس جدا ، فمش هنلف وندور ع بعض

* منكرش ان ده كان من ضمن الاسباب.، بس ده ميمنعش اني معجب بيكي ي حوراء

_اووو ، والمفروض اني اصدقك بقا، م بلاش نلعب ع بعض كتير، عشان الموضوع بيبقي ممل ، ولا انت اي رايك

اتكلمت نهي بعد صمتها طول كلامي مع مصطفي

_ اومال نوح خطبك لي ي ست حوراء ؟

= انتي مين ؟

_ انا مين ازاي يعني

= يعني انتي مين عشان تسالي سؤال ميخصكيش ، نوح ده قريبك ، اخوكي ، انا اختك ولا حاجه ، تقربي لحد فينا بحاجه عشان تسالي سؤال بجح زي ده

_ اها ، ده انتي شكلك عارفه بقا

= وانتي ما.لك برضه يخص.ك ف اي ؟

_ مسم ، صحيح ، مرايه الحب عاميه

= لا دي مكس.وره ، انتي مالك برضه ، يخصك ف اي

* بس ي نهي ، دول شكلهم اشتروه بفلوسه...

قاطعته بصوت عالي وانا بزعق بعصبيه بنفاذ صبر منهم ، او مستحملتش كلمه ع نوح ، كنت بعدي ف ال يخصني ، انما نوح معتقدش اني اقدر

_ اقسم بربي ، كلمه زياده ع نوح وم هخليكو تسووا تلاته مليم وسط الشركه كلها ، مش معني اني عديت طريقه الكلام دي انكو تنسو نفسكو وتتدخلو ف ال ملكوش فيه ، لا فوقو ، كل واحد يخليه ف حاله أحسن بدل م تشوفو مني وش هيزعلكو

= اااه ، مش عشان ابوكي صاحب الشركه ت..

_ مش انا ، وانتو الاثنين عارفين انه مش انا ، مش انا ال بتعامل بمبدا ابويا مين ، وعمري م عملتها ، ولا هعملها ، انا كفيله اجيب حقي بايدي ، وانتو برضه عارفين ، فبلاش لمصلحتكو انتو

* ماشي ي ست حوراء ، ماشي

_ مانتي قاعده شويه ي حبيبتي

* هووووف ، يلا بينا ي مصطفي ، خليلها المكتب تشبع بيه

_ لا انا شبعانه لوحدي ي حبيبتي ، الدور والباقي ع ال عمره لاشبع ولا هيشبع

* صدقيني مش هعدي كل ده ي حوراء ، والله م هعديه

_ ال بيقول مبيعملش ي عروسه ، ويلا شوفو كنتو رايحين فين

خرجوا بعصبيه وهما بيبصولي بغل وانا قعدت ع المكتب بسرحان

، والحقيقه اني مهتمتش بنظراتهم قد م اهتميت بكلامهم ، مش شاكه انه نوح طماع بس انا لسه لحد دلوقتي مش عارفه نوح خطبني لي

ممكن يكون مش كل كلامهم صح ، ممكن مش هدفه الشركه نفسها ، ممكن ف هدف تاني وراه ،حاجه تانيه غير الشركه

أصله بالعقل كده ، نوح لو خاطبني عشان يكسب الشركه فكان كسبني انا الأول ، كان مثلا يوهمني انه بيحبني ، يعاملني كويس حتي ، اي معامله غير معاملته دي

يعني انا بحبه ، وهو عايز الشركه ، فكان هيلف ويدور عشان يوصلها عن طريقي ، خصوصا انه حبي باين

أصله لي يختار الطريق الصعب مع ان الاسهل قدامه

مبدئياً كده انا مش هصدق كلامهم ، بس مش هنساه ، انا هحاول اتنساه لحد م اعدي الفتره ال مش عاوزه ازعل فيها ، او بمعني اصح ، لحد م افهم

ـــــــــــــــــــــــــــــــــــــــــــــــــــــــــــــــ

متفاجيء؟ ، اها جدا ، الحقيقه اني متفاجيء جدا من شراستها ، من حبها ، يعني صراحهً مكنتش متخيل انها هترد عني كده

مكنتش بتصنت بس كنت نازل اناديها عشان باباها طالبنا احنا الاتنين ف المكتب

وكاي اب حابب يطمن اني مش هاذي بنته طلب اني اجيبها واجي ، ع اساس انه الدنيا بينا تمام وخلاص انا رضيت بالامر الواقع ،

بس انا غصب عني مش قادر ارضي ، حتي بعد كل ال سمعته دلوقتي ، حتي بعد حبها ال كلامهم وضحه ، وال كان واضح جدا ف تصرفاتها قبل كلامهم

حتي بعد دفاعها عني بكل الشراسه ال كانت بتتكلم بيها ،

اوك حوراء كبرت ف نظري وانا صغرت ف نظر نفسي ، بس اعمل اي ، مش انا ال عملت كده فينا احنا الاتنين ، مش انا ال حطتها ف الموقف ده من البدايه

مش انا ال طلبت اني اخطبها ، انا يدوب نفذت شرط عشان انقذ أمي ، كنت هعمل اي بس

مكنش بايدي ابيع قلبي ، مش بمزاجي اني هبيع ال عشت ببني احلامي مع مواصفاتها ، مش راضي عن اني ابيع ال قلبي اختارها

انا مختارتش حوراء ، ولا ف يوم كنت هختارها ، ومش قابل وجودها حتي ، بس كنت أعمل اي ، ي اجي ع قلبي ي اجي ع امي

وانا مش هاذيها ، اعتقد..

عامه معدش فيه فرصه للرجوع تاني ، فاضل بس 4 ايام ع الفرح ، ومش انا ال هسيبها قبل فرحها ب 4 أيام

خبطت ع المكتب ودخلتلها ، بعد م قامت من ع الكرسي بفرحه اول م شافتني

_ سلام عليكم

= وعليكم السلام ورحمة الله وبركاته ، اتفضل

_ لا مالوش داعي ، باباكي بس عايزنا

= بابا ؟! ف حاجه ولا ايه ؟

_ مش عارف

اتكلمت باستغراب تاني وهي بتفتح فونها تبص فيه

= طب مكلمنيش ع فون المكتب لي

رديت ببرود اعتقد انها اتعودت عليه وانا بسيبها واخرج

_ ابقي اساليه ، يلا

اتكلمت بصوت واطي وهي بتلم حاجتها بعصبيه

= ده يخربيت البرود والله

خرجت وهي فضلت تبرطم بالكلام وخرجت ورايا ، وبدون م احس لقيتني ببتسم ببطء ع كلامها ، قبل م الف ليها وانا بكلمها ببرود

_ بتقولي حاجه ي حوراء

= انا ؟! محصلش وغلاوتك ي اخويا

_ متأكده

= يعني ، شويه

_ امممم ، هعمل نفسي مصدقك ، يلا

= يلا ي اخويا وانا قولت حاجه

_ ورايا

برطمت تاني بصوت متخيله انه واطي

= قال ورايا قال ، العسكري بتاعه انا عشان امشي وراه

لفيت ليها تاني وانا بكلمها بدون م ابص عليها

_ عارفه المشكله فين ؟

ردت بتوتر وهي بترجع خطوه لورا

= هاا ، فين ؟

_ المشكله انه صوتك عالي ، جداا

ردت بطريقه مضحكه وهي بتخبط بايديها

= نوطيه ي اخويا ، نوطيه

_ طب م تمسكي لسانك أسهل

= نمسكه ، منمسكوش لي

_ يلا

خرجنا روحنا لوالدها ، وال اتكلم ف حجات عاديه لأي حد المفروض انه بيتجوز ، خلصت معاه كلام ببرود اعتقد مكنش هيبقي موجود لو العروسه واحده تانيه

وزي م كنا متفقين انه الفرح ع الضيق ، الأهل من العيلتين وخلاص

خرجنا انا وهي بعد م خلصنا كلام مع باباها ، سبتها ودخلت مكتبي بدون م اتكلم

فضلت قاعد فيه شويه مش عارف اعمل اي ، مش عارف اصلا المفروض اعمل اي ، الحاجه لو مش معموله بحب مبتبقاش حلوه ، مهما بذلت فيها من مجهود

وده ال بيحصل بالظبط ، مهما حاولت اصبر نفسي او اقول انه عادي مش عارف افرح ، او اشوف حتي الموضوع عادي

فضلت حوالي ساعه وبعدين قومت عشان اروح ، نزلت ركبت العربيه وانا ماشي لقيت حوراء واقفه ، فكرت اسيبها وامشي ولا كاني شوفتها

بس مرضتش لسببين ، اولا انه مينفعش اعمل كده ، عيب ف حقي حتي ، وانا عمري م قبلت العيب ف حقي

تاني سبب انها هتبقى مراتي ، مش معقول كل م شوفها ف مكان هسيبه وامشي ،عال والله ، باين اني بدأت اتعود اهو

نزلت قزاز العربيه وانا بميل ع الشباك ال جمبي عشان اكلمها

_ واقفه لي ؟

بدون تفكير لقيتها بتقرب ، والواضح انها تقريبا عرفت انه انا من العربيه

= مستنيه تاكسي ، انت جبتني فمش معايا العربيه

_ طب مستنتيش باباكي لي

= هيتاخر وانا تعبانه وعايزه انام

_ طب تعالي هروحك

= بجد ؟

_ يلا

ركبت العربيه بسرعه وفرحه وانا اتحركت عشان نمشي ، وكالعاده بدات هي الكلام

_ ماما صفاء عامله اي ؟

= الحمدلله ، بتسلم عليكي

_ الله يسلمك

= انتي حابه تروحي لكوافير ؟

_ هو انا لو حابه انت هتوافق ؟

= وانا هرفض لي مدام مش هيبقي ف رجاله هتشوفك

اتكلمت بتوتر وهي بتفرك ف ايديها وبتبصلي

_ احم ، انت بتغير عليا

اتصدمت من السؤال ، ف اخدت وقت ع م رديت بسؤال تاني

= مردتيش ع السؤال ، هتروحي ولا لا

سكتت وهي بتبصلي بحزن ، قبل م تحرك رأسها وتبص من الشباك وهي بترد بنفس الحزن

_ لا

= لي ، اعتقد اني مرفضتش

ردت بنفس النبره الحزينه وهي بتبلع ريقها بصعوبه

_ هبقي لوحدي وسط كل واحده مع امها او صاحبتها او أختها ، هبقي لوحدي كالعاده

خلصت كلام وسكتت بوجع بان عليها من كلامها ، ومع كم الوجع ال كان ف صوتها مقدرتش اتكلم ولا انطق بحرف ، وسكتنا احنا الاتنين

............

رواية معتكف في محراب قلبي الفصل العاشر

وصلنا البيت ، فتحت الباب ونزلت بدون م توجهلي اى كلمه ع غير العاده ،

نزلت بعد م لمحت دموعها وهى بتنزل وبتحاول تخبيها ، فتحت الباب ودخلت بدون م ترجع تبص ع غير العاده ، وانا متحركتش بعد نزولها ع غير العاده

مقدرتش امنع نفسي انى افكر ف حالتها طول الطريق ، مشوفتهاش موجوعه كده غير النهارده ، او مخدتش بالي غير النهارده ، مش عارف

روحت البيت ، وروحت لماما حكيتلها ال حصل وانا مش عارف لى ، م براحتها مش عايزه تروح ، انا مالي

خلصت كلام مع ماما ، لقيتها بتبصلي ف عيني كانها هتخترق تفكيري ، ومقدرتش استمر انا ع الوضع ده كتير

قطعت الصمت ال غلفنا وانا بحاول ابتسم

_ اى يماما ف اى ، بتبصيلي كده ليه ؟

= وانت بتحكيلي لى ي نوح ؟

_ يعني اى بحكيلك لى ، بحكيلك عشان مش عارف اتصرف

= اه وتتصرف لى بقا ؟

_ هو اى ال اتصرف لى ي ماما ، انتى بتتكلمي بالالغاز لي مش فاهم

اتكلمت بصراحه صدمتني

= بص ي ابن بطني ، بلاش لف ودوران عشان نيجي مع بعض دوغري ، اسمع بقا ، انت لو مفكر انى فاهمه انك بتحب حوراء تبقي أهبل ، ولو مفكر انى كنت تايهه ع تفكيرك ف بنت عمك تبقي متعرفش أمك

يمكن انا لحد دلوقتي مش فاهمه انت عايز تتجوز حوراء لى ، ومش هقولك لازم تقولي ، انا طول عمري سايباكو تعملو انتو عايزينه مدام مش حرام ، بس قسما برب الخلق ي نوح م تيجي ع البنت دى قيراط لاجي انا عليك ٢٤

فاهم ؟؟

انهت كلامها بصرامه غريبه عليها خاصة معايا

_ احم ، فاهم يماما

= مراتك او خطيبتك ملهاش حد يبقي معاها ف اليوم ده ، بس انا واختك هنبقي معاها ، ف احجز ليها ف أحسن كوافير تروحه ، كده كده مش هيبقي فيه اجانب عنها ف الفرح ، كفايه ال هى شايفاه وال انت اعمي عنه مش شايفه

_ حاضر يماما

= فرحكو كمان تلت أيام ، عايز تكلمها تقولها ماشي ، عايز تعملها مفاجاه ليها برضو ماشي مش هتفرق ، بس اعمل حسابك ان انت ال هتودينا كلنا للكوافير ده

_ حاضر ي ماما ، تصبحي ع خير