رواية معتقل الصحراء الفصل الثامن وثلاثون 38 - بقلم الكاتبه أم مختار

صباح الحب اعتذر ع التأخير
بس اليوم ابني شغلني كلش بالطوه كملت
و البارت هم ٢٥٠٠ كلمة لا تزعلون باجر اعوضكم
بأذن الله قراءة ممتعة

#معتقل_الصحراء ٣٨
#بقلم_ام_مختار
#دنيا_غانم

مناسك _رأساََ صاح سائد بصوت عالي اخذووووني انييي وعوفوهم اخذوووني اني
جاوبه المهربجي هذولي جاي يعبرون وياكم
شصار بحالنه سائد نزل للارض ركع
كل فكرنه الحرس الث#وري
وراح ياخذونه ويسوون بينه ابشع من السوو بينه بالسجون خاصه بوقتها جانو يعبرون التبعيه الي بقو مطاردين من النظام السابق الي لزموهم هاربين كامو يعبرون هشكل
و الايرانين يگولون هذوله جواسيس للنظام
ومحد واكع بهاي الزوبعه غير الشعب العراقي المسكين هذوله الثنين جان اسمهم
سركان و ازاد
يحجون عربي مكسر شافيين عرب عابرين وهمه هم يردون ينهزمون سألهم المهرب انتو وين تردون ترحون
جاوبو يگولون نگدر نعبر التركيا واريد ننهزم

سائد _خطيه خليهم ويانه

_اي ادفعلهم فلوس واخليهم وياك

سائد_ بس بالفلوس تحجون استغفر الله

مناسك _عبرنه الحدود الايرانيه بعد ساعات وطلع الصبح واحنه نمشي
ام سائد تعبت سائد شالها على ظهرا وبقينه نمشي ابد ما تعب منها هيه تگله نزلني وهو يگلها هم يجي يوم واخذج شيل البيت اللله وهناك تنغفر ذنوبنه
وهيه تگله نزلني وهو يگله سكتي سلحفاة

_مووو زين على ظهرك تتوجع

_ تردين تسمنين روحج بالگوه اصلا ما احس بيج وانتِ فوگ ظهري

_استمر الجدال بينهم الحد ما اجتي سيارات واخذتنه جانت متوسطه الحجم شلون السيارات الي بيها براد الي حالياََ ينقلون بيها فواكة او الاشياء الي لازم متخرب بالضبط

دگ بينه الطريق ساعات جنه جايبين ويانه اكل بسيط طلع سائد ووزعلنه

سائد _اكلو بس مو حد الاشباع الحد ما نشوف من نوصل شنو يصير

مناسك _ جانو ويانه ثنين بالسياره غيرنه ويبينون كرد سائد ما هان عليه انطاهم اكل
اباوعله كلشي بي حلو اسلوبه ويانه حبه الي شكله
طوله عيونه الما تفارقني ابتسامته الي تحسسني احنه هسا بأأمن ارض بالعالم
لمسات ايده الدافيه الي تمر علينه كلنه واخيراََ احجاياته الحلوه الكلها صبرر ونهاياتها اشراقه امل
اشرلي شبيج لأن طالت نظرتي عليه

_ماكو شي

_ابتسم وهمسلي احبج
تذكرت من گتله اني هم
رجعت گتله اني هم ابتسم
تجيت راسي على السياره و ليلو بحضني صارت عيني على رحمة الي تباوعلها طالت نظرتها عليها

جاهد _انطينياها

_لا لا خليها مرتاحة خلي نظم قوتنه الطريق ورانه ولازم نتعاون عليها
البنيه ما طلعت الاربعين ومريضه
جان لازم رغم الاحنه بي نضحي بعمرنه الها
توقفت السياره نفتح الباب دخل ثنين
گله سائد شسالللفه تره صرنه جبس

_اذا ما عاجبك انززززل

مناسك _ما جاوبه بس عروگ ايده ورگبته برزن وهو يشددد على اعصاب ايده
سد الباب وراح

_بيك بخت وياي نسووووان جان بلعتك التراب الجوه رجليك

صليل _من نوصل هناك ندگه شرايك

_همه حلقة متصله اذا نسويلهم شي الوراهم يطلعوها من عينه نسد حلوكنه الحد ما نوصل

جاهد _وين نوصل

_وين ادري هسا خلي نعبر تركيا والباقي سهل يصير

صليل _يعني هسا احنه مو بأَمان

سائد _اني خايف كثر من خوفي واني بالعراق اذا لزمونه يگطعونه وصل ويدزونه للعراق لحم

مناسك _ههههههههه والله حياتنه حلوه ياهو التلزمه يكطع ويشگگ

_ههههههههه فدوه الهاي الضحكة التجي مو بوقتها

_ههههههههههههه

صليل _اذا لزمونه اكلهم اني من فدائي نظامكم

_يعفطلك مثل ما تعفطلنه

صليل _ واگله هذا الدليل اني هم اعفط

_هههههههه

مناسك _خلت مياسين راسها عليه ورحمة بعدها تباوع البنتها

صليل _تعاااي خلي راسج عليه

مناسك _ما جاوبته وغمضت عيونها ونامت
نمنه بالسياره يمكن الف مره واحنه ما واصلين  ينزلونه بمكانات مهجوره نخلص حاجتنه
وبعدها يكمل طريقة الجو برد كلشش بداية شتا جانت ملابسنه مو هواي
الجرجف الي نطيته الهم اخذه سائد منهم و غطه امه ويباوعلي جنت احسه يگول ما اگدر افضلج عليها هيه العلمتني الحب صعب احبج اكثر منها

صليل _ اني بردان سائده

سائد _ مو وكتك

_دفيني

_وين ادفيك

_بصدرج سائده

_ههههههههههه تعاي خيه تعاي

مناسك _تكرفصو واحد بصف اللخ و تحاضنو

صليل _ سائده حلو صدرج

سائد _نجب لا تاكل خرا هواي

_مو اني طكني الجفاف

جاهد _مو تغتصب سائده

سائد _ايي عيب بعدني باكر

مناسك _هههههه

سائد _ بردانه

_شوي

_ما عندي شي اغطيج بي تجين يمي بحضني

_لاااا خليني هنا

صليل _الغطا واخذته وحضنك الخايس هم تريد تاخذنه من عدنه سائده الخاينه

سائد _نجببب ولك كاافي ويانه ناس

صليل _ هههههههه سكتت

مياسين_ همست المناسك حديد السياره صاررر ثلج

مناسك _تعاي الحضني تذكرين ايام السجن من حضنتيني و دفيتي جتفي تعاي اني هسا ادفيج
وخلي ليلو بحضنج يدفه شوي
اني حضنتها وهيه حضنتني و ليلو بحضنها 
رحمة الوحيده المعزوله
وجاهد باوعلها بس ابددد ولا سألها ولا گلها ولا عبرها
نفتح الباب جانت الدنيا ليل

_ساعتين وندخل الحدود ما اريد حسسس اريد نعبر بسلام

_نعبر الحدود مشي لو بالسياره

_لا مشي بس هاي الطرق يصير بيها حرس اريدكم تسكتون

_حاضر

مناسك _جان اليحجي عراقي هيج اللهجة تخيلته  مع بعض الكلمات الغريبه
كلت سائد هذا عراقي ؟

_لاا هذا احوازي بس همه اغلبهم عراقيين

_هاااا

توقفت السياره ورجعت مشت ورجعت توقف واحنه ميتين رعب لا نلزم بس عدت الساعتين ونزلونه نمشي والجو شنووو يمه ما ينحمل ما يتواجه واني بسسس بقميص و الكل لابس ملابس خفيفه لأن ما فكرنه هيج يصير ولا احنه النگدر ناخذ ملابس هواي خفنه من المسافات النمشيها بس جاهد جان لابس جاكيته نزعها وبقه بالنص ردن

جاهد _لفي بيها ليلو

_حاضر

_لفيتها وانطيتها اله هو بلش بيها

سائد _ تقربت منها تعاااي

_وين
لماني الصدره ولزم ايديه وخلاهن بأيده ونفخ
راححح اموت من البرررد

سائد _ميخالف  شوووي نصبر هسا بس نعبر اشتريلكم شي تلبسو ابويه انتِ

مناسك _تعدينه تل صغير وهناك المهرب مالتنه سلمنه المهرب ايراني  شوي يطكطك عربي
وويانه افغان اكثر من عددنه وويانه احوازيين و كرد صار عددنه هواي همه لابسين زين احنه لاا

صليل _تعاااي بحضني حتى لو ما تحجين وياي بس تعاي

_لاااا شكرََا ما بردانه عفته وصرت ورا
ظل كل ما يمشي يلتفت الي

_الطريق وعر وجبال المهرب اول واحد يمشي واحنه نلحگ بي
جاهد رجعلي ليلو  اباوع الليلو نايمه حراره ماكو بوقتها اي حراره ما احس بيها لأن ايدي صارت ثلللج حتى صارت زرگه من البرد خفت اطيحها من ايدي
انطيتها الصليل باسها و كمل الطريق الجبال الي نصعدها وننزلها واحد ينزل واحد يسلم ليلو و مكملين ام سائد تذب الجرجف على سائد وهو يعصب عليها تغطي لا تتمرضين شوي يمي وشوي يمها يلم ايديها يبوسهن ويخليهن على گصته ويرجع يدفيهن وهيه فرحانه بي صعب اشرح حبه الها
اما رحمة هيه اخير القافله مكمل جاهد بتجاهلها وهيه ما مهتمه بس جاهد جمدد لأن نص ردن صليل جان لابس قميص گله انزع نبدل شوي
كامو يتبادلون الطريق طويل مووو قليل
اكو ولد افغاني فتح جنطته وطلع قمصله شلووون قمصله يابه تخبللل دافيه هوو ناعم عكس الولد
انطانياها سائد جنت ميته برد بس من نشوف حب الولد البعضهم صعب اني اجي والبسها واعوف البنات انطيتها المياسه

مياسين _ايييي اييي ضلوعي اصطكت

_لبسيها بس تدفين انطيها الرحمة وبعدها انا خووش

رحمة _ راحح اموت من البرد انييي

مناسك _يگولون ما بقه شي
جانت اكو حرس حدود بس الحدود جبيره كلششش المهرب ياخذنه من المكانات الي ما بيها حرس وصلنه للشارع العام طلعن من بين الصخور واالجبال سيارات صعدنه ونسدت باب السيارات احس جسمي سكن من دفه
باوعت الليلو نايمه انطينياها سائد هسا تگعد تبجي نرضعها
شوي و گعدت شربناها بس السرنجات ما ذبيناها نخاف كلشي يصير  نخليها تشرب بمسعتمل ولا تموت جوع

ساعات وساعات دگت بينه السياره الحدد ما ملت وي الوقفات  والاكل الي اشترينا على حسابنه و ما شترينه بوقتها هواي خفنه ع الفلوس  بعد هلاك  گالو احنه باسطنبول بس هيه مو اسطنبول تموت هيه وبردها  اخذونه البيت خلونه بي جانو ويانه ناس وناس هم بالبيت وويانه اتراك هم
كال المهربجي باجر المغرب  نطلع للحدود اليونانيه 
سائد حجة وي المهرب  نكليزي ما عرف يحجي اشرلها ملابس اريد اشتري ملابس اخذه سائد وصليل راح وياهم. رجع جايب قماصل شتوويه وگال ديرو بالكم عليهن الطريق ورانه طويل
راد يحجي وي واحد من الموجودين محد عربي

مناسك _شتريد

سائد _اريد اعرف من يدخلون لليونان وين يرحون بعدها

مناسك _ اسال المهرب يجوز هم يعرف ياخذنه من اليونان بس انت وين تريد تروح  بالضبط

_عيني على وحده من الدول الاسكندنافيا

_بده يشرحلي ويحجيلي شنو هيه الدول الاسكندنافيا ولأن العراقيين هناك جماعة حفر الباطن وجاي ينطوهم اقايم يجوز احنه هم نحصل

صليل _ تتوقع كم بلد نعبره ياله نوصل الهاي الدَوله الجاي تحجي بيها

_ما اعرف لازم نشوف خارطه طركاعة ما فكرنه بيها بسوريا

صليل _احنه مو زين بسوريا عشنه ع البهذله الاكلناها بالاخير

مناسك _ اسال المهربجي اكيد عنده خارطه
من اجه سأله خارطه معرف طريق اشر بأيدي بالاخير فهم و گله باجر بس كلمة باجر گال  و طبعاََ گاله بالفصحى غداََ
اكلنه غسلت السرنجات
مياسين بقت طول الليل سهرانه وي ليلو واني نمت علمود بالطريق انبدل

مياسين _ كلنه بغرفة وحده ويانه ناس اشكال سائد  خله الفلوس  يم امه و ما نام ولا غمضت عينه رغم  الطريق  المتعب المرينه بي ما نام
نام اني گاعده

_لا مرتاح هيج هسا بس اتعب اگعد واحد منهم هذولي يخوفون هسا لو يكتلونه بيها مجال بس لو اخذو فلوسنه نضيع

_ صحيح
الحد ما طلع الضوا هو تعب كام يغفي گعد جاهد گووووم ابو ليلو الزم حراسه

_گايم

سائد _عينك لو رمشت انعل والدي والددديك سمعت

_سمعت سمعت
شلونها الولو مالتنه

_زينه كلش تتگلب علينه طول الليل معاجبها ساعة تحتر وساعة تبرد

_هههههه تعبتكم ويانه

_لا شسالفه مو انت اهتميت بينه بسوريا هسا اجه دورنه

_ما قصرتن والله
اني تعبت خليت ليلو بيني وبين مناسك و نمت
فزينه على هوسه و جاي يوزع هذا اكل وياخذ فلوس طبعاََ
الحد العصر طلعونه بسيارات من اسطنبول للحدود اليونانيه

سائد _الخريطه اريد اشوف الخريطة

مناسك _انطه الخريطة السائد طلعت خريطة تركيا يعني حدنه نشوف فقط اسم اليونان

سائد _ هاي شسوي بيها بالله

صليل _شتريد تشوف انت

_اريد اعرف من اوصل لليونان منو اقرب دوله نگدر نعبرلها ونوصل للدولة. الاريدها

صليل _ خلي نوصل اليونان و عود بعدها صير سباعي و فكرر تره احنه الحد هسا
الله مو بس يحبنه وداعتك احنه الله حاب يذلنه على السونيا وعلى الجاي يسوي النه 

مناسك _ استغفر الله تره الله يريد يردك اله رد جميل الله اقربلنه من حبل الوريد

صليل _ انا بس محتار بشغله وحده من نوصل الدول  الكفر شيشغلوج تهدين المسيح

مناسك _هههههههه خلي اهديك انت اول وبعدين اهديهم همه

صليل _على ايدج تركنه سوالف النثاية وگمنه نصلي  بعد شتردين اتحجب

سائد _ بشرفك كاافي المهربجي يباوعلنه يگول ذولي رايحين للموت ويضحكون والله الهم خلگ

صليل _ ذكرني اول  ما اخذوني للوكر وعدنان گلهم دخلووو للبلوعه
متت من ضحك هو بقه صافن بيه عباله تخبلت
گلي شبيك
كتله طعم  الخريان مو طيب ماكو خيارات ثانيه

سائد _ههههههههههه كل ما تسولفها اضحك

جاهد _ صولة ابوج جان يحب ياخذنه زيارات العائلته الكريمة

مناسك _موقف ما يضحك بالعكس يبجي بس همه خربانين ضحك حتى الي ويانه يباوعولهم ب استغراب الحد ما سائد سكتهم ياله كفو
الطريق جره وحده من اسطنبول للحدود اليونانيه تقريباََ ٣ ساعات ونص اربع ساعت هيج شي وكفنه بالحدود ظلمه بس مساحات شاسعه نشوف اكو خظار بعده  الخريف ما طال كل الزرع
جانت اكو ناس تنتظرهم
حسب الي فهمه  سائد منهم
الحدود اليونانيه طولها ٢٠٠ كيلو متر
جزء منها هيه البوابة الاساسيه الي العبور الها نظامي

بعدنه عنها كلشي بس عبرنه الحدود اليونانيه المهرب تركنه هذا حدوده ويانه

سائد _يلا شدووو حيلكم وقت  الجد بده
سألت اذا احد يعرف يحجي عربي محد رد سألت اذا يحجون نكليزي واحد افغاني گال اني
سألته وين رايحين بعد اليونان
جاوبني لازم نوصل مقدونيا

_وهاي شلون نوصللها

گال لازم نكمل مشي ونوصل للمدينه وبعدها نعرف اذا نگدر نمشي او سيارات او نصعد باخره الاثينا
احنه كلشي ما نفتهم بس الولد يحجون النه الجاي يگوله

مشي هواي حذرنه المهرب گال الصبح ما تمشون خيمو و بالليل طلعو
وفعلاََ بس صار الصبح نمنه وبالليل انطلقنه
مسافه قليل و شفنه اكو نهر لازم ينعبر
يجي تقريباََ ٥٠ متر اكو صخور
تعده سائد الصخور شوي شوي
گال خلو الناس تعبر وبعدها احنه وفعلاََ انطلقت الويانه يجي بينه ب ٢٠ شخص
رجع عبر سائد ولزم ايد امه وكام يعبر بيها
جاهد خله ليلو بقمصلته و لزمتها من جوه
صليل عبر مياسين و عبرني وعبر رحمة وبقينه هيج الحد ما تعدينه هذا النهر
الافغاني الي ويانه ساعد سائد
جان خوش انسان
كمنه نمشي ونمشي والدنيا ليل ليل
اسود من الايام العشناها بالسجون

سائد گال اكو سكة قطار اوكفو
خليهم يعبرون ونشوف شنو يصير

جاهد _يعني شنو قصدك

_قصدي مدام اكو سكة قطار معناها اكو حرس امن اي شي يعبرون اذا ما نلزمو نعبر

_تعدو قبلنه لازم يعبرون السكه
عبرو ماكو شي
سائد انطلق قبلنه عبرنه السكه اكو غابات صعععبه صعبه تنعبرر شوك كلشي اكو
تعدينه مسافه واحنه بالاخير من بين الاشجار طلع حارس بيده سلاح  سائد وگف الولد الي ورانه ركضوو
حجه ويا سائد
لحضات وسمعنه من سائد بسس ركضوووووو
احنه ركضنه وهو لزم ايد امه وركضو
الي فهمنا بعدها گله عندك ١٠ ثواني اذا ما غبت من عيني اطلق النار
من ركضنه وغاب عن انظارنه وگف سائد يضحك
على ضحكته كلنه ضحكنه
هناك وشفته رفع تشيرته ومسح دموعه
بيه شي خلاني اروحله شبيك خلاص عبرنه

_تعبت هلكتتتت روحي يمتى يخلص هذااا الكابوس والله روحي خلصت

مناسك _ولا تقنطوا من رحمة الله مديت ايدي الخده و مسحته بطرف اصابيعي

سائد _ونعم بالله يلا نكمل
كملنه الطريق للمدينه من وصلنه عرفنه لازم نروح الاثينا شلون نوصل الاثينا اكو سيارات و قطار
و مطار بأثينا اخير شي توصلو اله من الخوف نطلع سيارات خاف نوصل المحطة القطار ونلزم ع الاقل السيارات امان
صعدنه السيارات توجهنه الاثينا تقريباََ الطريق ٣ ساعات
رغم احنه بسياره و تعب بس اهون من الصار كله
دخلنه اثينا سائد گال ما ابقه

جاهد _اييي خلينه نفهم وين نروح

_ما اعرف لو نروح الاسر#ئيل هم اهون ما ابات باليونان احس رَوحي كبرررت عالطريق المريت بي اذا تخلوني اليوم باليونان اتخبل اتهستر

مناسك _هو سيد المجموعة من شافو بهذا الحال الكل ضاج عليه هناك وكام ينفخ ويستغفر الله
وگفلنه تخصر

_امشوووو ندور مكان انام بي

_هههههه غيرت رايك

_لحد يحجي وياي امشووو وبس

دورلنه على الفنادق يريدون اوراق
سأل ابو الفندق اذا اكو سكن يومي شقق مو داخل الفنادق
گله اي للطلبه اكو
اجر التكسي انطا العنوان ورحنه هناك
سأل ما تهنه وصلونه الشقه مشتركة احنه وويانه عائله يونانية بس البيت جبير
كلهم اريدها بس يوم واحد
دخلنه للغرفة وسدينه الباب سائد نام الحد عصر ثاني يوم ما گعد
طلب من اصحاب البيت مكان يگدر يشتري منه خريطة يريد يعرف شلون نوصل المقدونيا وهاي وين صايره والمن تابعه شغلته هاي الدوله جان عدهم بالبيت كتيب يجمع بي كل دول العالم وبي وعلى احد  الملجدات الخارطة اليونانيه وع الخ العالم
عرفنه مقدونيا تربط اليونان بعدة محافظات
والاقرب هيه سالونيك

طلعو يتعرفون على المدينه يجيبون اكل للطريق

سائد _احنه بمكان كلها طلبه واحنه جاي نسولف بيناتنه وگفنه شاب يحجي عربي

صليل _ اتزوجة واكسب بي اجر ويطلعنه من اليونان

سائد _هههه اصبرر اصبر
حجينه ويا جان من مصر  والدته يونانية والده مصري هو يحجي واني مجلب بأيده
سألته شلون نگدر نوصل الحدود مقدونيا
عرف احنه مهاجرين
گلي اكو سيارات توصل على سالونيك ومناك تكمل مشي ويوميا الاتراك و الافغان جاي يطلعون

_ما توصلني بيهم مووو ابو ابوي نسمط
هو خطيه ما فاهم من عدنه شي واحنه خلصناها يا باشه ويا معلم بعدنه على اللسان السوري
اخذنه المكان اطراف اثينا هناك جان التجمع تطلع سيارات بالليل يوميا السالونيك
جبنه حليب البنت جاهد وجبنه اكل و كتلهم هسااا نطلع وفعلاََ طلعنه بالسيارات مثل السيارات الموجوده بتركيا يسموها دولمش او هيج شي
انطلقنه واحنه ويانه ثنين من الاحواز
و الباقي خليط تعب مستمر خوف دائم
بعد ساعات  ياله  وصلنه السالونيك كملنه وي الجموع مشي كل ١٠ يمشون سوه وتخطينه حدود مقدونيا
وهناك. الحرس المقدوني لزمنه
لكن الحمد لله والشكر بسبب عددنه القليل و الانسانيه الي عدهم
اخذونه بسياراتهم للمقر العسكري انطونه اكل وشرب و اكيد نزعونه احنه ال جال كل ملابسنه وفتشونه وبعدين رجعو ملابسنه النه و خلونه بالمخيم  هناك نمنه يوم كامل بدون اي ضرب بس همه ملثمين اي شي منهم ما شفنه وهاي السياسة احنه حافظيها الصبح صعدونه بالسيارات ونقلونه من سياره السياره الى  الحدود البلغارية مع  تحذير
وخوفونه من صربيا ومن نظام صربيا

يتبع......