رواية ماذنبي انا الفصل الأول 1 - بقلم Renad.m

#ماذنبي_انا

القصه مو كلها حقيقيه بعض المواقف والجمل حقيقيه وراح تلاحظون نتطرق لاحد الاعراف العشائريه وهو الفصليه لكن الفصليه الحقيقية اللي بالحقيقه تعيش الذل والضرب مو مثل بعض الكاتبات اللي تخلي الفصليه عشيقه
اتمنى تنطوني اراءكم وتناقشوني بالقصه
البارت الاول ......

القصه ليوم راح يسردها الكم الابطال اول شي راح تسردها الكم رانيه
اسمي عرفتو رانيه عمري ١٧ سنه صف خامس اعدادي احنه ٦ بنات وعندنا اخو واحد اسمه سرمد  هذا الاخو مدلل واصلآ امي خربته بدلالها لان ولد على ست بنات دللته لحد مافسدته صار انسان لا ابالي اللي يريده لازم يحصل عليه طبعا هو ترتيبه الثالث بين افراد عائلتنا قبله ٢ اخوات وبعد ٤ أخوات الاحداث اللي راح تعيشها عائلتي والتعاسه اللي راح نعيشها كلها بسببه

والدي موظف اداري بوزارة الاسكان  بيوم صارت شغله عنده بالدوام مالته ووالدي كشف تلاعب صاير بالقانون وكان الموضوع يخص واحد بالاحزاب طبعآ حاربو ابوي واذوه واخر شي نقلو من مكانه احنه من سكنه بغداد بمنطقه حالتها الاجتماعيه متوسطه انتقل ابوي للدوام بمحافظه  الديوانيه وهذه المحافظه معروف عنها الطابع العشائري بابا شال هم شلون راح نعيش هناك بدة يروح للدوام يظل شهر وينزل لنا كم يوم اخوي سرمد كان عمره ٢٢ سنه كل يوم والثاني مسوي مشكله لو يتعارك ويانه يعاملنا على انا خدم عنده وطبعآ ممنوع نعترض لان امي تكلب الدنيا تكول هذول الاخوان كل شي يسوون والاخت لازم تسكت كنت اتحمل الضرب وانواع الاهانه منه عندي اختي فادية اصغر مني بسنه احنه رويسيه على كولت اهلنا على طول نتناكر لكن وحدة تحب الثانيه بينا هواي صفات متشابها بالشكل والطباع لكن طبع واحد يختلف هذه كانت ماتتحمل افعال سرمد وعلى طول تعاند وترد كانت ملسونة وماتسكت تكول الحق لو تعرف تخجل اكبر واحد مرات تناقش امي بخصوص سرمد بحيث امي تخجل ترد عليها ماتعرف تسكتها تظل تصيح عليها وتكول لها مامؤدبه انت
استمر ابوي بدوامه كم شهر لكن امي تعبت من مشاكل سرمد لا دراسه فالح بيها ولا شغل وكل يوم ساحل وحدة منا وكاتلها كانو خواتي كلهن متزوجات بس انا وفاديه باقيات خواتي تزوجن حتى يخلصن من ظيمه
..بيوم ابوي نزل اجازة النا وبس وصل اجت له فاديه كالت له بابا وحدة من اثنين لو من تروح تاخذني وياك لو تبقى ماتروح ..بابا تفاجئ بكلامها ليش بنيتي شصاير ؟
_بابا تعبنا من سرمد واوامره اللي متخلص واذا رفضنا يضرب بينا عبالك يضرب بحيوان وامي من نشتكي لها تكول هذا اخوجن تاج راسجن .بابا خواتي تزوجن حتى يخلصن من ظيمه انا اريد ادرس ماريد اتزوج يعني شلون اخلص من ظيمه
الام.. انجبي لج ادبسز
فاديه...يوم خافي الله بينا احنا همين بناتج ترضين لنا بهذا الضرب والاهانه ..ترضاها بابا نايمه ساعه وحدة من الليل وهو كاعد يلعب بلي ويجي يرفسني رفس كعدي سوي لي جاي ادري حتى الخدم مو هيج يعاملوهم
الاب... ام سرمد صدك هذا الحجي؟ ابنج هيج مسوي بالبنات وانا مادري ليش محد يكول لي ؟
الام.. خل تولي هي لسانها طويل اخوها ويطلب منها شيصير يعني
فاديه رفعت بلوز التراك اللي لابسته وشوفت ابوي اثر ضربته الي بظهري وكلت له شوف ترضى ؟
بابا حيل تعصب وتعارك ويه ماما ومن رجع سرمد تعارك وياه وكال له والله اذا يوم سمعت ضارب وحدة بيهن صدك اتبرة منك واطردك من العشيرة كلها
قرر بابا يبيع البيت وننتقل نسكن بالديوانيه علمود نظل تحت عينه وبعد فترة انباع البيت واشترينا بيت هناك .بدت حياتنا تترتب هناك بدينه نداوم مدرسه وسرمد شويه خفت ايده بالضرب علينا لكن بقت انانيته وطباعه نفسها بعد سنه نجحت انا ورحت صف سادس واختي فاديه للخامس بفترة العطله سرمد طلب من ماما تخطب له بنت جيرانه عمرها ١٦ سنه اسمها زينه وكانت جميله جدآ واهلها عائله محترمة بس وضعهم غريب بيتهم كبير كلش وابوها متزوج اثنين نسوان وعندهم هواي ولد واغلبهم متزوجين ومخلفين بحيث من رحنا نخطبها كان بيتهم عبالك مدرسه مليان نسوان واطفال وضجة اصوات وهوسه هوسه .استغربت سرمد ليش راد بنتهم بالذات بعدين عرفت شايفها طالعه وعاجبته من طلبناها منهم ام البنيه كالت احنا الامر مو بيدنا نشوف ابوها واخوتها ونرجع لكم خبر
بعد يومين  راحت امي الهم وبلغوها انهم رافضين لان ابن عمها رايدها وهمة اصلأ ماينطون للغريب ..سرمد عرف وتخبل علينا وبعد اقل من اسبوع طلب من امي تدبر له فلوس يريد يفتح له شروع ويلتهي بي وامي تونست وباعت قسم من الذهب مالتها ونطته خوش مبلغ سرمد كال راح اسافر لبغداد علمود ولد صديقي يشاركني وطبعآ هذا كله ابويه مايعرف لان يعارض وامي تستر الامور لسرمد سافر سرمد وابد ما اتصل واحنه نتصل بي مغلق بدت امي تقلق  وبعد ثلاث ايام من سفرة كاعدين العصر ومانحس الا الطلق صار يرش على بيتنا وصوت رياجيل ويدكون الباب بقوة بابا طلع يريد يفتهم الموضوع خلال دقايق اقتحمو البيت ويصيحون وينه طلعو ؟ وينه اذا رجال خل يطلع
بابا ...منو تريدون
...ابنك الناقص سرمد
سرمد؟ وانتم منو وشتردون منه سرمد مسافر لبغداد
.....سرمد نهب بنتنا وشرد وياها والله ان ماكلتو وينه اليوم نذبحكم كلكم
بقينا نبجي وامي تصرخ وتلطم على صدرها وتصيح يمة سرمد شلون انطاك كلبك هيج تسوي ..يوومة اشوف راد مني فلوس
بقت الهوسه ببيتنا وتدخلو الجيران وطلعوهم وتحولت الشغله عشاير وناس رايحة وناس راجعه

#قصصي

#ماذنبي_انا

البارت 2
وسرمد مامنه اي خبر البنيه اللي خطبها وما وافقو اهلها هي اللي شردت وياه اللي عرفنا كان اكو بينهم علاقه وكم مرة طالعين ومن خطبها ورفضو قررو يشردون سويه ..طبعآ سرمد مافكر بينا ابد ولاكال شلون اترك اهلي ومو بس اتركهم ترك لهم مصيبه كبيرة تجري بيها دموم وتروح بيها عشاير
وحتى البنيه اللي حبها همين انانيه مافكرت باهلها اخوتها وسمعتعهم تطورت المشكله واهل البنيه ماقبلو يتفاهمون وبقو يدورون على سرمد ومصرين الا يقتلو .
راحو لبغداد واخذو ولد عمامي ٢ اللي كانو اقرب شي لسرمد وشبعوهم كتل علمود يعترفون على سرمد لكن ماكو فايدة
بعد ايام عناء وتعب وخوف عشناها تدخلت شيوخ وناس من غير عشاير واتفقو اخيرآ على كعدة وتفاهم
صارت الكعدة وطبعآ احنا موقفنا ضعيف لان ابنا سوايته تكسر الوجه وهمة اعتبروها على جانب عنصري ان احنه اغراب مو من ديرتهم وتعدينه على عرضهم
صارت الكعدة وتقرر علينا فصل يكسر الظهر وينهدر دم سرمد وقررو يشيلونا من البيت .هنا ابوي حاول هو والشيوخ وبالف ياعلي الا اقتنعو لان بابا رجال كبير وبعد سنه يطلع تقاعد اذا طلعنا من الديوانيه شلون نعيش اقلها نكمل السنه هنا ومن يطلع تقاعد نشيل
واخر شرط من شروط الفصل هو اللي كسر ظهرنا ..طلبو مرة فصل ..  هنا كانت بدايه معاناتنا الصدك لحد هسه اللي فات اهون من عرفنا امي تخبلت دكت ولطمت واول مرة بحياتي اسمعها تحجي وتغلط على سرمد

فادية.. ها يوم هسه طلع سرمد مو زين من طول عمرج مدلعته ومحسسته هو سلطان واحنه جواري وهاي النتيجة
بابا..كافي سكتي لسانج شويه كصري .خل اشوف حل للمصيبه اللي انا بيها
فاديه.. اول مرة بحياتي اشوف اختي رانيه هيج خايفه حسيتها فهمت انها هي اللي راح تروح فصليه .انا تخبلت صح اتناكر وياها بس اختي احبها اموت عليها ياما اكلت الضرب بدل عني من سرمد شلون اقبل تروح فصل واكيد يشبعوها ضرب ويطلعون حرقه قلبهم بيها
الاب.. ام سرمد دبريني شسوي منو انطي كل وحدة منهن عين كولي لي اضحي بيا عين
فاديه ..اباوع لرانيه احسها اول مرة تخاف وماتتبرع انها تكوم بمكاني كان كل مرة سرمد يعصب ويريد شي هي تكوم وتسوي اله لان تكول انت ام لسان هسه يضربج
اليوم بقت ساكته
فاديه..بابا انا اروح
الاب 🙄🙄
فاديه ..اي انا لازم وحدة بينا بعد هاي قسمتنا الله طيحنا بأخو اعوج وام دلعته وفسدته بدلالها والنتيجة لازم وحدة منا تنتهي حياتها حتى هو يعيش وتبدي حياته
امي تسمعني وتبجي..اعرف انا لساني طويل وصريحة زيادة بس من قهري احجي ليش عمرهم مافكرو بينا عبالها من تخلي يصيح ويضرب معناها صار رجال لااااا الرجوله عقل الرجوله اخلاق
الام..ولج يمة اللي تروح فصل لازم بالهة طويل وتتحمل انت وين تكدرين هناك لسانج هذا شلون بي
رانية..يوم انا الاكبر وانا اللي اروح .هاي اذا راحت بأول يوم يذبحوها
فاديه ..لا كافي خلص عمرج بضرب سرمد نوب ترحين تدفعين ثمن اخطاءه
رانيه كلت لج كافي ماترحين انا اكدر اصبر انت لا
بقينا طول اليوم الجو بلبيت مكهرب ومشحون ببجي ودموع لا اكلنا ولا نمنا وصار ثاني يوم  وهنا كان بالنسبه الي يوم القيامه لا مو يوم القيامه اصعب بيوم القيامة الحاكم الله والله ارحم الراحمين هنا الحاكم بشر الحاكم اعراف وتقاليد ظالمة
يوم القيامه نتحاسب بافعالنا ولاتزر وازرة وزر اخرى.. هنا الحساب بذنب غيرك
اوووف ربي رحمتك يامن وسعت رحمته كل شي ارحمنااااا
صارت هوسه بينا انا واختي وعمامي موجودين وللاسف قررو رانيه تروح فصليه
انهاريت بجي ولطم وصريخ صدك فقدت اعصابي تعاركت ويه امي وابوي وبقيت الوم بيهم واخر شي بابا كال لو تسكتين لو اوديج لبغداد ويه عمامج .سكتت وفوضت امري لله ومر عليه يوم مررر امر من الحنظل واجه اللليل وبقيت ابجي بسكوت ع المخدة واسمع اختي بفراشها تشهك بجي حضنتها وبجيت وعلى صوت بجينا اجت امي وحضنتنا انا هنا قلبي كان مليان من امي ابتعدت عنها وكلت لها دموعج هسه ماتحل خراب ٢٣ سنه خربتي بيها سرمد
تركتهم وطلعت كعدت بالحديقه ظليت لحد الصبح كاعدة صافنه من كد مابجيت حسيت حنجرتي ثقلت وتوجعني صار الصبح وعمامي اخذو اختي لبيت اهل زينه لان الاتفاق تروح لهم فصليه لازم يتنفذ من طلعت اختي تمشي مكسورة وعيونها كلها دموع حسيت هاي اخر مرة اشوفها بقيت واكفه ومنتجيه ع الحايط وهي تمشي للباب ومن طلعت احس طلعت روحي من صدري حسيت حياتي انتهت مو بس حياتها .اخذوها عمامي وانا بقيت كاعدة بالحديقه الشمس عاليه وانا كاعدة وعيني ع الباب وكل عقلي متأمله انها ترجع راحو وتقريب الساعه رجعو عمامي وحدهم والله من شفتهم عرفت احساس اللي يموت له ميت والدفانه يرجعون ويشوفهم شلون يحس اخر امل اله خلاص انتهى انا هيج حسيت نظرة وحدة نظرت الهم عمي كال بابا ليش بالشمس؟
عمو وينها ؟
بابا عقدولها على ابنهم وبقت هناك ادعي لها
دخلت لامي وابوي وكفت كدامهم كلت لهم عمري ما اسامحكم حرمتوني اختي ودمرتو حياة اختي
من هذا اليوم وانا صرت فاديه ثانيه فاديه ساكته ساكته بمعنى الكلمة