رواية ماذنبي انا الفصل الثاني 2 - بقلم Renad.m

#ماذنبي_انا
البارت 3
انا اكدر احجي لكن ماريد احجي ويه اي شخص

رانيه..من دك سرمد دكته الناقصه كنت عارفه راح تصير بيها فصليه واعترف انا شخصيتي ضعيفة وماكدر ادافع عن نفسي بس انا اذا رفضت الفصليه مو معناها ادافع عن نفسي معناها اصير انانيه مثل سرمد وافكر بس بنفسي .اختي فاديه اعرفها مو مال عيشه فصليه لسانها طويل وماعندها صبر .وافقت اروح لان اصلآ ماراح اتحمل انها تروح
رحت لهم ودخلت لبيتهم اسمع اصوات هوسه صوت رجال يصيح
....كلت لج سكتي حسج ما اسمعه
....ماتعقد لها على ابني هاي السكط شنو تتزوج ابني .زوجها لواحد من ولد سليمة
....ولدها كلهم متزوجين تردين تهجمين بيتهم النا خلك دوخة الشرايج .حلكج سدي وسكتي

ورة دقايق صاحولي علمود العقد وكلت لهم موافقه .عمي وصى ابوهم عليه وكال له ترى مالها ذنب بسوايه اخوها.ههه يوصي عليه ليش همة لو تنفع بيهم وصيه كان نفعت بيهم وصيه الرسول من كال ..رفقآ بالقوارير.... وهمة اخذوني من اهلي غصب اخذوني بذنب اخوي
الولد اللي عقد علي بس اعرف اسمه احمد كان الديوان بيه هواي شباب وانا مدنكة .بعدين رجال كال دخلي جوة بويه دخلت مدنكة وخايفه بمجرد مادخلت هجمت عليه مرة ضعيفه سمرة سحلتني سحل وبقت تضرب وتصيح بت السكط انت شنو وتاخذين ابني وصارت هوسه ردت اخلص روحي منها ماكدر لمن مادخلو الزلم طلعوني بقيت ابجي وبعدين اجة ولد كال تعالي وياي كمت وياه امشي وراه دخلني بغرفه صغيرة بيها كنتور بابين وسرير نفر استغربت هاي شنو
كعد على كرسي كدام ميز بي كتب كال شوفي انت هسه مرتي ومحسوبه عليه امي ابد ماتحجين وياها وتحملي تضربج تغلط تحملي
بقيت اسمع ودموعي تجري .طلع وبقيت كاعدة ورة دقايق رجع جايب لي جنطي واغراضي كال رتبيهن بين ما احط لج كنتور انا راح اطلع انت ارتاحي
طلع ونزعت عباتي وحجابي وما احس الا الباب اندفر ودخلت امه وياها ٣ بنات كالت اي مدللة الفصليه جنطها عبالك جنط عروس صاحت على بناتها فتشن جنطها فتحنها وكامن يشمرن غراضي كالت لهن شنو يعجبجن اخذنه كامن يتقاسمن اغراضي وانا اباوع وابجي اجت علي ضربتني على كتفي وكالت لاعبالج صرتي مرة براسنه والله ازوجه ست البنات واخليج خدامه الها بس صبري لي نوب التفتت لشعري  كالت فتحي الشكاله فتحتها وشافت شعري كامت تنثرة انا شعري طويل لحد الورك معتنيه بي مصرفي اجمعه واشتري زيوت وشامبوات اله
كالت لبتها جيبي مكص
انا تخبلت نزلت على ايدها خاله فدوة لا ابوس ايدج لا
جرتني من شعري وكالت صبري اذا ماخربت شكلج هذا صبري لي
اجت بتها وبيدها المكص وانا اصيح فدوة لا بين ما  اخذت المكص من بتها انا ركضت برة الغرفه واصيح فدوة لا واركض ردت واحد يخلصني منها  لزمتني بتها من شعري وتجر بي انا كعدت بالكاع وهي تسحل بي وانا اصرخ اخر شي جلبت بالمحجر مال الدرج واصيح يووم الحكي لي
على صوتي اجو الزلم ومن شفت احمد ختلت وراه واكول فدوة لاتكص شعري
احمد شكله كله تغير لزمني من زندي بقوة ودخلني للغرفة وسد الباب وطلع لامه وكال لها انت شنو مامعتبرتني رجال .انا قابل اتزوجها انت ليش هيج تسوين .مامسموح لاحد يضربها لو يسوي لها شي حرام عليكم هي شنو ذنبها
بقيت اسمع له وابجي واكول يارب هاي اولها تالي شلون انا لحد هسه ماشفت ام البنيه وياترى شنو ممكن تسوي بيه
انا اعرف امها لان اجيت ويا امي من خطبناها 
دخل للغرفه احمد كعد ع الجربايه وانا كنت كاعدة بالارض كدام الكنتور .بقى احمد يتأفف ويستغفر
اخر شي صاح تعاي هنا كمت وانا اتعثر بمشيتي كال ميخالف بس بلبدايه تحملي انا بقيت اشهك
كال انت تعرفين  لازم هسه  شنو يصير
هزيت راسي
كال روحي غسلي وجهج وتعاي
لاعفيه اخاف
طلعي لاتخافين
طلعت رحت للحمام وغسلت ورجعت للغرفه ركض ومن دخلت بسرعه سديت الباب ماعبالي موجود عبالي طالع
سمعته يضحك كال ..شر البليه مايضحك
كال نزعي هاي الصايه وتعالي
نزعتها وكعدت يمه
كنت لابسه تراك رصاصي كات 
باوع لي وكال شفتي البيت كله زلم ماريد لبس ضيق ولاالحجاب يطيح من راسج انا مارضيت عليج من طلعت
ي من الغرفه بلا حجاب
انا ماردتها تكص شعري عفيه كول لها لاتكصه الي
لزم شعري بيده وابتسم كال حلو شعرج ما اخليها تكصه
تقرب لي ووووو
من خلص وطلع دخلت امه الي وتفلت علي كال امداج كومي لاعبالج عروس ومدللة بقيت امسح دموعي وابدل
شكد كان احمد حنين عليه واللحظات اللي كانت وياه حسيت براحة على كد ماكانت امه كلامها مثل السم طلعت وياها كان الوقت تقريب ال١١ الصبح كالت كنسي الحديقة وغسليها .الشمس كانت حاميه تصهر وانا اكنس واغسل وحديقتهم كبيرة والغريب احمد شافني اشتغل بالشمس وماكال شي من خلصت دخلت لكيتهم يتغدون رحت سبحت وطلعت اصلي ومن خلصت اجه احمد للغرفه لكاني اصلي
....ابتسم وكال تقبل الله
...منا ومنك صالح الاعمال
صاحتني امه كالت نظفي المطبخ واخذت الاكل اللي بالجدورة ذبته بالزبل وكالت نذبه بالزبل تاكله الجلاب والبزازين بيهم اجر اقلها احسن منج
هنا احس غصيت بالعبرة ليش تهين وتحقر بيه
بقيت انظف المطبخ اجت لي وحدة ماعرفهة ماشاء الله بيت مليان نسوان وزلم وجهال هوسه هوسه
.....كالت عجني
......ماعرف
....شلون يمة
.....ماعرف اعجن
.....تعاي خانم انا اعلمج
حطت طاسه شكبرها ترستها طحين وماي وبدت تعجن كالت العصر اعلمج الخبز ومن باجر انت تخبزين
خلصت اريد اروح للغرفه صاحت ام احمد تعاي غسلي ملابس طلعت لي كووومه ملابس وبلشت اغسل للمغرب ماخلصت نوب جعت كم يوم بدون اكل ببيت اهلي منو يشتهي الاكل واحنا حياتنا تدمرت  وجماله شغل وتعب نوب اجوني تعاي تعلمي للخبز ونوب سوي عشى
زين شنو ماكو نسوان بس انا وطلعولي بطاطا بيها ٣ كيلو وباذنجان وطماطه تعاي قليهن متت من الوكفه والحر وانا اقلي والجهال تاخذ وتاكل كملت وصبيت خفت اروح اكعد صاحتني بنيه شابه تجي تقريبا من عمري كالت تعاي اكلي
صرخت ام احمد شنو هاي زباله النسوان تكعد ويانه وللاسف احمد مانطق حرف
رجعت للمطبخ ابجي خلصو اكل واستلمت المطبخ تنظيف ماكدرت اكل لقمه احس عبرتي مكسرة بصدري خلصت تنظيف واجتني ام احمد بيدها فراش قديم مسحوك ومخدة حتى الوجه مالتها وصخ كالت تنامين بالمطبخ
انا هنا اصدمت شنو هاي وين احمد شلون يقبل هيج
نمت وانا ابجي كعدت الصبح على رفسة اجتني بخاصرتي وصوت هيي كومي
فتحت عيني واذا هي ام احمد كومي عجني اباوع ساعه ٥ الفجر بديت اعجن وتركته يرتاح وبديت احضر ريوك نوب كالت خبزي كلت لها خاله ماعرف
تخلخلت سنونج وعظامج خبزي وعلى الله تخربين الخبز لا اخليج جنازة والله
تورطت بالخبز وطلعت مخربطه الخبزات  ماعرف كوة هي حتى اللي يتعلم ياخذ كم مرة الا يضبطها
كعدو كلهم وصبيت ريوك وهي شافت الخبز وكامت لي ضرب وغلط وفشار وانا بلمطبخ واعرف كلش زين احمد كاعد ويسمع هنا عرفت اني راح اعيش هيج طول عمري واحمد مثل اهله وكان ادمي وياي فقط علمود ياخذ حاجته

#قصصي

#ماذنبي_انا
البارت 4

فاديه........
من يوم اللي راحت اختي وانا صرت انسانه ثانيه انطوائيه ساكته حتى امي وابوي كلامي قليل جدآ .صرت جسد بدون روح .صار وقتي بين دوام ودراسه وطبعآ انتشرت سالفه اختي والبنات يوميه يسألوني عنها ويسولفون لي شلون تكون حياة الفصليه من ضرب واهانه كنت يوميه ابجي عليها
بيوم طالبه من غير شعبه كالت انا امس رحت لبيت عيال اختج لان بنت عمي تصير مرت ابنهم وشفت اختج بس ماكدرت احجي وياها خطيه كانت بس تشتغل وعمتها ام رجلها تعاملها مو زين .متت بجي وانا اسمع بعدين كالت لي:ليش ماتحاولين توصلين لرجلها ترى خوش ولد وطلبي منه تشوفينها فكرت بكلامها وكلت اروح لهم للبيت واطلب اشوف احمد واحجي وياه بلكي يقتنع اشوف اختي
رانيه...
يومي ابتدة بضرب واهانه بسبب الخبز ماعجب ام احمد وظلت طول اليوم تغلط وتهين مرات تكول كلمات ما افهمها وطبعآ لحد هسه ماشفت ام زينه اللي شردت ويه اخوي لان ببيت اهلها من يوم المشكله
اليوم اللي بعده سافر احمد لكليته اللي هي ببغداد وبقيت اخدم وحالي من سئ الى اسوء حتى الجهال يصيحولي الفصليه نسيت اسمي
يمكن همه محد يعرف شنو اسمي .مر اسبوع على سفر احمد واجت ام زينه ويااا وييييل حالي من جيتها بس شافتني هجمت على ضرب وعض وغلط ولعبت بحالي لعب حسيت راح اموت بايدها
زاد الكراب والظلم ام احمد تنتقم مني لان تزوجت ابنها وام زينه تنتقم مني بسبب اخوي صارو يتفننون بالاهانه والشغل
البيت مليان بنات وجناين صارن كاعدات وانا اخدم حتى شغلهن الخاص بعوايلهن انا اسوي .وحدتهن يرجع رجلها من الشغل تجي تشمر الملابس علي تعاي غسلي
الصبح يظلن نايمات وانا اسوي ريوك لرجالهن
وصلن بيهن الحد اني انا ابدل حفاظات اطفالهن عشت تقريب ال٤ اسابيع كل  يوم اسوء من اللي قبله
بيوم الخميس العصر اجة احمد للبيت ماعرف ليش فرحت يمكن لان هو الوحيد اللي مايضرب ولايهين .كملت الخبز والعشى وانا فرحانه بوجودة اضحك على نفسي لج بس لاتكونين حبيتي خلصت الشغل بالليل وكلهم نامو انا همين نمت وبعد فترة ماعرف شكد حسيت على حركة يمي وواحد يحجي وياي
رانيه كعدي..رانيه .رانيه
امم فتحت عيني شفته احمد كال تعالي وراي رحت وراه للغرفة بس دخلت سحبني للسرير ووو كنت اعيش وياه سعادة مفتقدتها من يوم دخلت لهذا البيت من خلص شغلته واخذ حاجته كال:انا راح اسبح انت طلعي لاتبقين هنا واحد يشوفج
رانيه ..حجايه كانت سهم بنص قلبي طلع وتركني احجي ويه نفسي  ..واحد يشوفني..واذا شافني ليش اني مو مرتك حلالك مو مكاني الصح يمك رجعت للمطبخ لمكاني وبقيت ابجي وخانكه صوتي بالمخده  شكد شفت مهانه وذل بهذا البيت مثل احمد اليوم محد ذلني حسيت نفسي خدامه حتى بالفراش لاحمد
بقيت ابجي لحد الفجر نمت ساعه وكعدت بس من كعدت احساسي كأنما اول يوم الي هنا كنت متأمله من يجي احمد احجي وياه بلكي يتحسن وضعي لكن احمد طلع اسوء منهم كلهم كنت اشتغل واكرب وانهان كل هذا كدام عينه ولايكول كلمة وحدة تمنعهم عني
ثاني يوم الصبح كعدت من الفجر عمتي كالت حضري ريوك احمد راح يسافر حضرت ريوكه ورحت دكيت باب الغرفه لكيته واكف كدام المرايه يدكم قميصه حطيت صينيه الريوك ومن جيت اطلع لزم ايدي وظل يباوع علي كال..
.... راح اروح محتاجة شي
....اي محتاجة
....شنو
.....بعد لاتجيبني هنا .واشرت ع السرير
.....التفت ع السرير ونظر لي بتعجب
...شوف شكد شفت من اهلك ذل واهانه انواع واشكال بالضرب والغلط والالفاظ بس مثل ذلي امس على فراشك ماشفت ولا حسيت الله يخليك لاتطلبني لفراشك مرة ثانيه ومن تخلص حاجتك تطردني حالي حال بنات الليل انا صح فصليه بس بنت عايله وبشر  الي احساس
تركته وطلعت
احمد:كلام رانيه كلش اذاني كعدت بالكاع وايدي على راسي انا شسويت شلون هيج ضعفت كدام رغبتي وجبته اخذت حاجتي وطردتها
اخذت جنطتي وطلعت من البيت وانا كاره نفسي ليش وافقت اتزوجها ليش تركتهم يذلوها ويضربوها..اخر شي وصلت لقرار اني بس ارجع اطلكها وارجعها لاهلها
#قصصي

#ماذنبي_انا
البارت 5
فاديه....
بعد كم يوم من كلام صديقتي رحت لبيت الناس اللي اخذو اختي فصليه دكيت الباب طلع لي طفل سألته عن احمد كال مموجود مسافر لان يداوم كليه ببغداد
رجعت وكلت شي اكيد ينزل الخميس او الجمعه ارجع الهم الخميس
صار الخميس رحت لهم وسألت عنه طلع لي رجال وكال ليش تسألين عن احمد ؟
عمو انا اخت رانيه
يا رانيه؟
رانيه بنت ابو سرمد اخذتوها فصل
الرجال عصب وصارت عيونه تجدح غضب وطردني وكال اذا وصلتي هنا والله احط طلقه براسج .
بقيت ابجي واتوسل بي طردني وسد الباب
رجعت للبيت اشهك بالبجي ودخلت لغرفتي وقفلت الباب امي بقت تدك الباب ...ماما كولي شبيج
لج ماما فتحي الباب لاتوجعين قلبي
انا مجاوبتها ابد بقيت ابجي وماطلعت من غرفتي لثاني يوم

رانيه...
مشت الايام يوم اتعس من يوم وانا اخدم وانهان وام احمد وام زينه وحدة تكبس وحدة ترفع بالكرب والشغل بديت اتعب وادوخ بديت احس باعراض الحمل وانا اصلا من يوم اجيتهم والشهريه ما اجتني حسيت قلبي انقبض يارب فدوة كون مو حمل ياربي انا مذلوله الهم من اجيب طفل راح يورث ذلي ومهانتي بقيت اسبوعين من بعد سفر احمد على نفس المنوال الى ان نزل احمد يوم الخميس بيومها كلش تحاشيت ان اشوفه اكره نفسي من اشوفه بليل نمت وانا خايفه انه يجي يريدني لان اكيد هو مثلهم وماتهمة مشاعري المهم حاجته .الحمد لله ما اجة بس قررت الصبح اطلب منه اختبار حمل منزلي اريد اتاكد اني حامل لو لا
رحت له للغرفه دكيت الباب
تفضل
دخلت لغرفه وكام وكف كدامي كال:شنو رايدة
رانيه ..أأأ
أأ خجلت احجي بقيت افرك بايدي
احمد..رانيه احجي شرايدة
رانيه ..انا متأخرة علي الشهريه ما اجت وعندي اعراض حمل
ظل صافن بوجهي احمد وبهت وجهه .
احمد..من شوكت
رانيه ..من يوم اجيت ببيتكم ما اجتني
احمد ..شلون هسه
رانيه اريد اروح احلل اتاكد
زين بدلي خل اخذج
ااا ماعندي ملابس
ليش ملابسج وين
امك كالت للبنات اخذوهن الكم
روحي وانا هسه اجيب لج
احمد تخبلت شنو حمل شنو هالورطه
ونوب ملابس ماعندها اوووف ياربي
رحت لامي وكلت لها شوفي لي عبايه وحذاء لرانيه
ليش يمة
اريد اخذها للدكتورة
ليش
يمكن حامل
شنوووو الفصليه مالها طلعه غير بس للكبر ..وهاي زباله النسوان منين حبلت ولك احمد ليكون من تنزل تبات يمك بالغرفه
احمد..شنو هالحجي ترى هي مرتي حلالي
رانيه..انا بالمطبخ اشتغل وما احس الا ام احمد فوك راسي جرتني من شعري واستلمتني ضرب  على وجهي وتسب وتلعن وتكول بت الفكر نوب حبلى
احمد..اجة خلصني من ايدهة
يمه شنو السالفه اكول لج حامل  اريد اخذها للدكتورة تضربيها
مالها طلعة منا غير بس للقبر .راح اجيب الجدة (القابله) ام وسام تفحصها
اجت ام وسام فحصتني وكالت البت حبلى بس وجها اصفر حللو دمها خاف فقر دم
عمتي اعتفس وجها وضاجت كلش
احمد حرف واحد مانطق اعتقد همين ضاج بقيت كاتمه حسرتي ودمعتي بقلبي لليل افرغها بمخدتي اللي صارت صديقتي وكاتمة شهكاتي وتمسح دمعتي
بليلتها بجيت بجي ماردت احمل ولا ردت ابقى هنا بس الله هاي ارادته وماكدر اعترض
احمد راح للدوام وظل ينزل كل اسبوعين ومرات شهر وابددد ابد ما يسأل عني توقعت من يعرف بالحمل راح يتقرب لي راح يهتم بيه لخاطر الطفل لكن اللي صار هو العكس
امه استمرت على وضعها وزادت مرات احسها تحاول تطيح الطفل..وكلهم كوم وام زينه كوووم لوحدهة
لا شافتني طبيبه طول فترة حملي لا اخذت لقاح لاتغذيت تغذيه جيدة كانت بطني تكبر ويكبر وياها خوفي على اللي ببطني كل مايقترب موعد ولادتي اخاف
بقيت ادعي ان الطفل يطلع سالم ومابي مرض لان ما زرت طبيبه ولا اخذت اي علاج او فيتامينات
واحمد يجي للبيت ويشوف بعينه بطني واصله لحلكي وتعبانه وما اكعد من الشغل ومرات تضربني امه لو ام زينه كدامه لو ينصي راسه لو يكوم يطلع .اسأل نفسي ليش اذا مو لخاطري لخاطر ابنك ببطني زين اذا جبت شلون بي منو يحن ع الطفل شراح يصير بي
بقيت على وضعي يوم بعد يوم اتعب اكثر الى ان صارت عندي الالام الولادة وعلى حسابي انا بالسابع من كلت لام احمد كالت .....اذا عندج ولادة تجيبين بقيت صافنه شلون اجيب يعني مايودوني مستشفى
زاد الالم وانا ابجي اجت القابله وكالت ولادة
توسلت بأم احمد خاله فدوة لقلبج بس خلي تجي امي
....وجع بقلبج بعد عايزة نوب امج مو كافي كصتج الفكر
.....خاله راح اموت فدوة خليني اشوفها
....موتي عساج
بقيت اطلك الى ان ولدت شفت الموت بعيني ومن شفت الطفل حمدت ربي وشكرتة

صباح الخير
اعتذر قبل لاتقرون البارت عن قساوة الاحداث لكن للاسف فعلا الحدث حقيقي وصار بوحدة فصليه صدك سولفولي عنها وحبيت اضمنه ضمن احداث القصه حتى تعرفون بشاعه هذا الحكم العشائري الظالم

#قصصي
#ماذنبي_انا

البارت 6

بعد ما اخذو الطفل نظفو ولبسو ملابس
اجت القابله الي وشافتني كالت لام احمد ...البنيه عندها نزف لازم ناخذها مستشفى
....خل تولي حالها حال النسوان تولد بلبيت وتخلص
....القابله.. ام احمد خاف مايوكف النزف وتموت واتورط انا
....لاتتورطين ولا شي مو هاي احنا نجيب منا نكوم نخبز منا
....القابله..ام احمد خافي ربج هاي طفله وجايبه بالسابع
.....ام احمد.. ماعليج انت

رانيه....
سمعت الكلام اللي دار بينهن وانا ابجي تعبانه ودايخة من الولادة والنزف لو امي يمي ماجان تركتني هيج مرت فترة وغفيت بدون ما احس صار العصر وانا ولا واحد ذكرني بكلاص ماي ولا لكمه اكلها وانا من الصبح مماكله كمت ادوخ واتعب احس بنفسي مثل اللي روحي تنسلب مني بديت اتذكر اهلي واحد واحد اتذكر ايامي وياهم الا سرمد ما اشتهيت اتذكر اسمه حتى .زاد التعب وكلبي كام يخفق حيل لاكدرت اكوم صحت حسيت نفسي نكعت من جواي اتلمس الفراش كله دم صحت خاله ام احمد ...خاله ... ماكو جواب صحت اسماء خواته محد جاوب
حسيت نفسي راح اموت بقيت اقرأ شنو حافظة من ايات القران واتشاهدت كلت خاف اموت انا متشهدة
بعدها غفيت وماحسيت على نفسي

ام احمد جابت الفصليه وكنت مقررة الطفل ما انطي الها اصلا اخلي باسم ابني الكبير ..محسن ...لان احمد عزيز قلبي بزر الكعدة ومتعلم  هذا واريد له بنت خاله شلون بنيه مرتبه حلوة اذا عنده طفل ماتريدة
اخذت الولد ونطيته لمرت محسن هي عندها بنت صغيرة رضعته ونام
خابرت احمد وكلت له اجاك ولد

ثاني يوم الصبح كعدت رحت اريد اكعد الفصليه تكوم بعد شنو كافي دلال قابل بس هي جابت كلنا نجيب ونكوم ثاني يوم
دخلت عليها ولكيتها صفرررة وشفتها زركة وصايرة ثلج حركتها ماتحركت هزيتها حيل ماكو
....رحت للولد وكلت لهم لحكو مصيبه على راسنا الفصليه ماتت
.....شلووون
.....ولكم ماتت شلون شنو نكول لاهلها
.....الاب كل شي مانكول امر الله وصار كوليلهم اثناء الولادة ماتت
.....محسن.. انا اكول نروح لابوها يجي ياخذها ويدفنها شنو علاقتنا احنه

فاديه...
الصبح قبل لا اطلع للمدرسه اندك الباب وطلع بابا واكو رجال حجى وياه بابا كعد بالكاع ويصيح يابويه رانيه ياروح ابوج
ركضنا انا وامي عليه
....شكو بابا شبيك
....راحت ولج فاديه اختج راحت
....رانيه؟ شبيها
.....ولج ماتت
امي سمعت وعاطت يممممة بنيتي يمممة شلون ماتت
ركضنا بلشارع بدون وعي وصلنا لبيتهم كسرنا الباب بس فتحو لنا دخلنا نركض وامي تصرخ يمة بنيتي دخلونا لغرفه ولكيت اختي مثل الشبح جثه ولونها شاااحب حضنتها امي وتصرررخ ولج يمة عساني انا المتت ولا انت
بقيت اصرخ واكول لهم شلون ماتت
جاوبتني مريه كبيرة كالت بلولادة ماتت
....ولادة؟ ليش هي حامل
امي شالتها وحطتها بحضنها وتبجي كالت لهم ولكم البنيه دمها بارد وصايرة خشب من شوكت ميته ولكم مو موت ولادة انتبهنا فراشها كله دم صاحت امي الله اكبر ولكم هاي نازفه ليش ياظلام
انا سمعت هيج ماحست على نفسي ركضت على المريه الكبيرة جريتها من دشداشتها واصرخ ولكم لييييش موتوها لييييش
كوة خلصوها من ايدي دخل ابوي لفها ببطانيه واخذناها للمستشفى وانا وامي متهسترين ونصرخ
ابوي بدأ باجراءت اخراج شهادة وفاة واتصل بعمامي وكالوله راح نتلكاك بالنجف والفاتحة تعال عندنا نسويها
بقينا نبجي انا وامي ونلطم التمت علينا المستشفى وامي تصرخ تكول من يوم اخذوها فصليه وانا كل يوم باجر عكبه يكتلوها ويحركون كلبي ربي ليش ربي
اجت مرة وكفت على راسنا تشتغل بلمستشفى سألت شبيكم
امي كالت لها بتي فصليه وعيالها موتوها المرة كعدت كدام امي كالت لهة
....شلون ماتت
....يكولولي بلولادة
.....بيت من عيالها
.....بيت ابو محسن
الله اكبر عليج كلت لها البت تنزف خل ناخذها مستشفى ماقبلت
امي جلبت بيهاانت منو منين تعرفين بنتي كالت لها القابله انها هي اللي ولدتها وعرفنا ان عمتها ام زوجها هي السبب بموتها زاد الالم وحرقه القلب ليش ربي هيج البشر حقدهم يقتل شابه عمرها ١٨ سنه
اخذناها للمغيسل انا وامي نغسلها ونبجي اشوف ايديها سود ومشككات اصابعها هاي اللي ايديها تخبل واظافرها طوال ومهتمه بيهن حيل
شفت بيدها جويات من التنور اوووف ياخيه شنو شفتي من ظيم هناك عندهم
غسلناها وطلعنا للنجف طول الطريق امي تبجي وتنعى وتحجي وياها
وصلنا المقبرة وكانو عمامي هناك استلموها من ابوي ماخلو يدفنها وانا وامي نصرخ وقلبنا محروق على موتتها وعلى طريقه موتتها ..سنه فاتت ماشفناها وحملت وجابت وماشفناها وماتت غريبه نزفت لمن ماماتت
اكول لامي يوووم نزفت لحد ماماتت اكيد تعذبت بموتتها اكيد تأذت
امي تكول لايمه ربج رحمن رحيم ما اظنها تأذت
دفنوها وكل حفنه تراب يطمون بيها جثتها كانو يطمون بيها روحي يطمون بيها فرحتي يطمون املي بالحياة
رحنا ويه عمامي لبغداد وتلكونا خواتي حسيت نفسي بالديوانيه غريبه وهسه اجيت لشريكات بالمصيبهه صرخت صوت ولكم مااااااتت ولكم موتوها مايخافون الله
ميته من الليل للصبح تنزف ومحد اخذها للمستشفى
خلصت ايام العزا واحنا نار كلوبنا مستعرة
رابع يوم اجه ابن عمي صاح لامي وراحت وياه لغرفته انا استغربت رحت وراها