رواية مازلت طفلة الفصل الحادي والثلاثون 31 - بقلم الكاتبة شمس السعدي

.…البارت الاخيييير  ….
   {#مازلت_طفلة}
#بقلم_الكاتبة_شمس

اول مرة امي ماتعترض . وقبلت تروح ويانا .
اخذنا فرقان وبطنها شكبرها .
وهي نجحت للسادس خطيه وجاي تحضر للسادس وتقرأ. ونعوش هم استأذنت من زوجها ومشت ويانا ..

لؤي جمعلي كل الاحبهم يمي بآخر الايام ..
تگابلن امي والحجيه بحزنهن .
والبنات يساعدني بالغراض .
يوم كامل كملناهن .
واصيل ونعوش .
سون كليجه وكعك . گالت للطريق تاكلون .
وشكو اكله نحبها .
سونها النا .
جانت لمه كلش حلوه .
خلتني اضوج اكثر لان راح اتركهم.
طلعنا اني ولؤي . اشتريت احتياجات للجهال والي .
وگلي اشتري عبايات اسلاميه احسن الج من العبايه الي ع الراس .
اخذت كم وحده ورهمت شالات وياهن .
ورجعنا للبيت ..

راح لؤي وخبر الشيخ .
بس الشيخ ماحجه شي . لان علاقته مو مثل الاول بلؤي .
بس اجت كلها النه .. ومامصدگين الخبر .
باجي وفاء ورجاء وبناتهم .
كلهم التموا يمنا بآخر ليله النا بالعراق ..

جانت لمه مليانا ضحك وسوالف . وبجي ووداع .
ممزوجه بكل انواع المشاعر .

والكل يوصي بينا . ولاتنسونا واتصلوا كل فتره .

شلون اگدر انسى هاي اللمه الحلوه الي بقت محفوره بداخلي .
اباوع الضحكاتهم وسوالفهم .
واباوع الؤي واعاتبه بعيوني .
وهو يبتسم ويغمزلي ..
اني اصلا زعلانه عليه من يوم الي گلي راح انسافر بس جنت اضحك واكابر ..

وصارت لحظه الوداع .
الساعه ستة الصبح .
اجه الرجال الي متواعدين وياه ياخذنا ..
الكل متواجد الوداعنا .
دخلوا الجنط كلها بالسياره .
وبديت اودع واحد واحد .
المن اودع والمن اعوف .
حتى نضال الي جنت مااحبها يمكن راح اشتاقلها .
ودعتها كلها .
وبقيت الحجيه وامي .
حضنتهن اثنين وابجي واشهگ .
الحجيه كابرت ومانزلت دموعها .
بس توصي بيه . اصير گدها واحافظ على عائلتي ..
فرقان ماتت وراي .
وحسين يخاف عليها ويواسي بيها .
لو اصيل الركضت وراي للسياره تبجي .
وعاط بيها مرتضى ودخلها .
لو مرتضى .
الحضن اخوه وگعدوا بالگاع من البجي .
ويگول الؤي ..
المن عفتني وحدي .
عود ردتكم اخوه توگفولوا .
بس واحد راح للگبر وعافني .
وانت سافرت وهم راح تعوفني .
هي هاي الخوة عندكم ..

بجونا كلنا ..

صعدت للسياره .
وعيني على واحد واحد .
اولادي فرحانين ومامصدگين .
جانت ملوكه من ايد الايد .
كلها تبوس بيها .
وهي حلوه ومدنفشه .

اخذها لؤي وصعد بالصدر وهي بحضنه .
اني بقت عيوني على واحد واحد .
امي دخلت مااتحملت .

حركت السياره .
واني بقت عيوني مشبوحه لورى .
الى ان ابتعدنا .
السياره تمشي . واحنه ابتعدنا عن المحافضه وگمنا نمر ع الشوارع الي بعد اثار الحرب بيها .
شفت مناطق بحياتي مشايفتها .
وطلعنا ع الشمال يخبل .
هيج گاعنا حلوه .
جا وين دافنين ارواحتنا احنه .
ملوگه تبجي .
والتهيت بيها .
رضعتنها ونيمتها بحضني .
والسياره تمشي وماوگفت ابد
غير بي بأماكن معينه .
للحمامات .
او من تغدينا بالمطعم ع الطريق .

اني ماخذتلهم حلويات . وفواكه . والمعجنات الي سونهن البنات .
يعني الطريق كله ياكلون وعينهم ع الشباك وفرحانين بالمناظر .
صار الليل واحنه وصلنا لدهوك ..
گال لؤي السايق تعب .
خلي ننام كم ساعه ونرتاح . ونطلع .
حجز بفندق .
والمنظر ماينوصف .
رغم حزني على فراگ ناسي واهلي .
بس حسيت نفسي ارتاحت من شفت المنظر .
والجو بارد جان لبستهم قماصل .
وملوكه هم لبستها وگمطتها حتى تدفئ ..

بتنا بالفندق من التعب نمنا بسرعه.  حتى ملوكه طول الليل ماگعدت غير بس مره ماحسينا الا الفجر طالع .
گعدني لؤي ..
گعدت الجهال وبدلتلهم .
ونزلنا .
تريگنا وطلعنا .
وكانت هاي اخر ليله بأرض عراقيه ..

بدت رحلتنا بعد مادخلنا الحدود السوريا .
سلمنا جوازاتنا .
ودخلونا للتفتيش .
فتشوا الغراض .
وطلعنا .

السياره تمشي ع الجبال . وولدي صدگ ماشايفين فضحونا فضيحه . الكاتبه شمس
ماما باعي وباعي ..

وصلنا للمنطقه الي بيها مهند العصر ..
اول ماطلع الولد رحب بينا .
ونزلت مرته هم رحبت .
مرته حلوه ومحجبه وعندها بس طفل واحد اكبر من ملوكه بأشهر . وبسرعه دخلت گلبي .

مهند گال . البيت نضفناه وجهزناه الكم .
صعدنا .
ومهند ولؤي صعدوا الغراض ورانا .
احنه شقتنا تطل ع السطح .
والسطح مرتب بي زرع ومسويه مثل الحديقه .
وبي ميز وكراسي .
يعني عبالك حديقه .
والمنظر من فوگ حلو .
شويه ارتاحت نفسيتي ..
من شفته .

الشقه صغيره بس مرتبه كلش .
والاثاث بسيط ومحتاج نواقص .
بس لؤي گال اني وياج نطلع ونشتري الي ترديه ..

مهند شايل ملوكه . يمعودين ترى من هسا اگلكم ملوكه حجزتها الكرومي .
كرم ابنه .

لؤي .. ههههه بعدنا مااجينا وحطيت عينك على بنتي .
مو خوش جار انت .

مرت مهند اسمها فريده ..
گالت تؤبرني هالبنت حتصير كنتي ..

گالها مهند.. حبيبتي مو علمتج عراقي . بطلي التؤبرني .

ضحكنا هههههه ..

گال مهند . باعوا الخطار اله ثلاث ايام .
وانتو ثلاث ايام اكلكم وشربكم علينا .
وبعدين نعوفكم .

وفعلا .. طول ثلاث ايام ماتركونا . اكل فريده يخبل .
وخاصه المگدوس والمخللات تسويهن بطريقه رهيبه ماينشبع منه .
واني ولؤي طلعنا كملنا احتياجات البيت .
وبعدين من خلصنا ورتبنا البيت اني وفريده .
طلعونا افترينا .
ورحنا للسيده زينب والسيده رقيه عليهم السلام .
زرنا وتونسنا وطلعنا .

مرت الايام . واني صارت فريده صديقتي حيل .
علمتني على طبخهم .
وعلمتها طبخنا .
لان تگول . مهند يحب الاكل العراقي .

فگمت كل طبخه اسويها ادزلهم وهمه نفس الحاله ..
لؤي اشتغل وي مهند وفتحوا محلين .
وشغلهم نعمه من الله ..

اولادي سجلناهم بالمدرسه . وتأقلموا بسرعه احسن مني ..

اني وفريده مثل الاخوات. وعرفتني على اهلها ناس طيبه .
#بقلمي_الكاتبة_شمس
……………………………………
والجيران هم گامت تاخذني وياها الهم .
جانت عادتهم .
يوم بالاسبوع .
كل وحده تجيب طبخه .
وننجمع ناكل سويه .
لؤي ومهند بالشغل . والاولاد بالمدرسه .
بس الصغار ناخذهم ويانا ونروح .
جانوا يحبون اكلي
وخاصه الدولمه . والبرياني
والسمك المسگوف والتمن الاحمر .
بدعت بسوريا .

بالمقابل تعلمت منهم اكلات طيبه هم ..

مشت الايام والاشهر والسنين .
واهلي گمت اراسلهم واحجي وياهم ع النت.
بعد مانزل بالعراق ..

حياتنا صارت احلى .
وملوكه كبرت . واني حملت مره ثانيه وجبت ولد
سميناه ميراد .. هم بحرف الميم ههههه ..
وجان لؤي طاير من الفرح .
صارت ملوكه الاميره المدلله بنص اخوانها ..

اني بديت اعتني بنفسي . اكثر .
گمت اروح المراكز تجميل وي فريده .
واعتني ببشرتي واضافري .
ولبسي .
بحيث خليت لؤي مايشيل عينه عني ..
كل يوم مسويتله شي جديد.

(بيني وبينكم خفت لاوحده مثل سناريا تاخذه مني ههههه ولو ادري بي گلبه الي وثاقه بي .)

اولادي كبروا . واني الي يشوفني يگول اختهم مو امهم .
مرات لؤي .
يگلي لو باقيه طفله احسن .
كلما تكبرين تحلين.  ماتگليلي وين اضمج ..

الى ان بسنه 2011 خابر مرتضى گال .
امي كلش حالتها وصارلها اسبوع بالفراش ولو تلحگون لو لا .
بيومها . گضيناها بجي اني ولؤي .

بسرعه سوه حجز خلال كم يوم طلعنا بالطياره .
رغم جنت متواصله كل ساعه وياهم بالنت بس جنت مشتاقه الهم حيل .

وصلنا للقريه . والكل منتضرنا .
نزلت بس مو ذيج هدى الي ودعوها .
كلها تعجبت من شافتني .
وجسمي جنت محافضة عليه .
والعبايه الاسلاميه ماخربت جمالي بالعكس زادتني جمال
تلگيتهم بالبجي . بس هاي ماتغيرت عندي .
دمعاتي ..
حضنت اصيل حيل وابوس بيها .
فرقان جانت هنا .
حبيبة گلبي عندها اثنين بنات صايرات .
بعد ماسلمت ع الكل .
ودخلت .
شفت الحجيه . اتهسترت بالبجي ومامصدگه صايره جلد وعظم .
هو اسبوع ماشفتها معقوله هيج بسرعه المرض غيرها .
شافتنا ماتگدر تحجي .
بس دموعها تنزل .
حضناها ونبجي وبوسناها .
وجبتلها ميراد باسها .
وملوكه هم ماتعرفها لان كبرانه .

بس ولدي لا گبل راحوا حضنوها وباسوها ويبجون من شافوها بهيج حاله ..

كلها تعجبت على حمودي صاير شاب وشطوله.  ياخذ بالطول .
مرتضى يگله انت تخليني جو ابطك ولك ..

رحت الامي شفتها .. وهم گضيناها بجي ونعوش هناك .
تالي رجعت ويانا للقريه .
گالت اشوف الحجيه .

ورى يومين من جيتنا للعراق ..
توفت الحجيه وكت الفجر.
وبدا العياط والبجي .
وبقيت الوم بلؤي . الي حرمنا منها وماشبعنا .
بس شيفيد الندم كلشي الله قاسمه النا نشوفه .

نضال كالعاده نفس حالتها وحجيها ماتغيير .
الناس تبجي .
وهي تگول والله بنت الفلاح حليانه ومتطوره .
وبتول لسا مامتزوجه بعدهي ..

خلصت الفاتحه بقينا عشر ايام .والبيت احس صاير خنگه بفراگ الحجيه ..
رجعنا السوريا .
بعد مارجعت النفس معاناة الوداع ..

مرت ايامنا عادي ..
وحمودي يهددني ويگلي بعد ماتحبلين شني اني راح ادخل جامعه . وانتي بعدج تخلفين شيگولون جماعتي عليه ..
ولؤي يتعارك وياه يريد بعد ..

لؤي كبر . وشعره شاب . بس زاده حلاه ووقار .
صار يخبل .
وروحه خضره بعدهي .
مايبطل غزل وتبوس .وگدام ولده .
واگله عيب صاروا اطول منا .
وهو عادي عنده ..

جانت حياتنا بسوريا تخبل .
صادقنا هواي ناس وصاروا اكثر من اهل النا .
وشغل لؤي زاد والله رازقه ..

انتقلنا البيت اكبر مو شقه .
لان ولدنا كبروا .
بس بقينا احنه وبيت مهند على تواصل .
وصارت فريده اكثر من اخت الي ومااگدر افارگها .

عشنا سنين بسوريا . وتعودت عليها .
واهلي دووم متواصله وياهم بالفايبر لو الماسنجر .

الى ان تدهورت الاوضاع بسوريا .
وصار شغب .
وگالو بدأ منظمه اسمها الدوله الاسلاميه تدخل السوريا .
لؤي بسرعه صفا شغله .
هو ومهند .
وقرر نرجع للعراق ..

جهزنا امورنا . واوراقنا . ووثائق الجهال .
ورجعنا ..

ورغم فرحتي برجوعنا . بس ضجت لان راح افارگ فريده وولدها صاروا مثل ولدي ..

اهلنا فرحوا برجوعنا .
بس ولدي ضاجوا .
لان تعودوا على حياتهم هناك ..

مرتضى واصيل . گاعدين بالطابق الجوه .
واحنه گعدنا بالطابق الفوگ نفس غرفنا .
بس غرفة مرتضى القديمه .
سويناها لمحمد ومصطفى ..

امي كبرانه ومتغيره ..
وحسين راجع هو وفرقان البيت اهله ..
ونعوش هي ورجلها گاعدين وي امي ..

حمودي ولؤي مثل الاصدقاء طلعاتهم ومشياتهم سوه .
رغم بفترة ابتعد عنا ودرس جامعه ببغداد ..
كليه تحليلات ..

وراد بنت عمه رنونه .
فدوه كبرانه وتخبل .
والله جان عندي احساس من هي صغيره تصير جنتي ..

وطلع الاخ اول مااجينا مكبل وياها وعاشگها .
وابد مادرينا الا لمن راد يتزوجها .
طالع على عمه ابو الحب هههههه .

طلب يتزوجها وهو باخر سنه بعد مايتحمل الاخ ..
ورنونه من ليلتها حملت ..
وحاليا اني عمري 38 وصرت ببيبيه ..
اي الطفله نفسها الي اجت الهذا البيت تبجي .
هسا صارت ام وبيبيه .
رغم الي يشوفني مايصدگ.
لان ابد ماهملت نفسي وبقيت محافضه على شبابي .
وحبيبي رغم كبرنا بعده حبنا يقوى ويكبر .
هذي حياتي حبايب .
اتمنى عجبتكم واستمتعتم بيها ..
رغم هواي امور صارت بحياتي بجيت وحزنت وحبيت وكبرت وتغربت ورجعت وزوجت ابني وصار عندي حفيد .
لكن الى الان احس روحي مازلت طفله ..

تحياتي لكم احبتي 😘😘
#الكاتبه_شمس

………………………………………

حبايب گلبي ..
اتمنى القصه عجبتكم . واعذروني اذا قصرت وياكم.
حاولت اختصر بالنهايه قدر الامكان ..

انتضروني بالعطلة بقصة جديدة ومختلفة وايضا حقيقية 100% ..

احبكم هواي هواي 😘
شكرا لك من تابع وصوت واصحاب التعليقات الحلوه اشكركم عليها ..