رواية مازلت طفلة الفصل الثلاثون 30 - بقلم الكاتبة شمس السعدي

…البارت الثلاثون ….
   {#مازلت_طفلة}
  #بقلم_الكاتبة_شمس

قربت ولادتي .. وجانت وي امتحانات ولدي .
وحايره بيهم ..

جبت بنوته .. شايله عيونه وعصبية ابوها من طلعت للدنيا معبسه وتبجي ..
بس جانت سمينه مو مثل اخوانها ضعاف من جبتهم
سماها لؤي .. واني كل اسم يطلعه اگله مااريده خاف هذا اسم حبيبتك قبل ..
وهو يضحك عليه ..
تالي بالاخير صفينا على اسم .. ملاك .
گال حتى وي اخوانها يبدون بحرف الميم ..
ويگول هي ملاكي .. وجان مامصدگ بيها .
گام يعشقها اكثر مني واني بديت اغار .
ومن كل عقله .
يطرد علي ابن مرتضى اذا وصل منها .
يگلي . هذا عينه زايغه .
ههههه يغار ع بنته من علي ..

اصيل ولؤي ماتركوا ولدي بالامتحانات .
رغم اصيل عندها رنونه بالمدرسه هم ..
والبيت عليها ..بس ماقصرت .
جانت الي اخت ونعم الاخت ..
بس لؤي هم ساعدها من يجي بالليل يراجعلهم ويشرحلهم الي مافاهميه ..

والحمد لله نجحوا كلهم .. وفرحونا .

لؤي بعد ماصار الهجوم للقريه ..
جانت علاقته قليله بالشيخ .
ومايروح هناك هواي .
بس مرات من يون فرقان وحسين وننجمع.
وسمعت من الحجيه . انه متعارك وي الشيخ وگاله شلون هيج گدرت تظلم هاي الناس وتاخذ ولدها .
وواحد معدوم بسببك .
وصايره مشاحنات بيناتهم ..

فأجاني لؤي بعد ماطلع اربعين ملوكة ..
گال هدى .. تتذكرين من انتي حامل وگتلج قررت شي بس من تجيبين اگلج بي .

هدى .. اي اتذكر ..

لؤي .. اني قررت من ساعتها نسافر كلنا السوريا .
بس من طلعتي حامل اجلت الفكره ..

هدى .. تحجي صدگ لؤي .. وين نسافر وعايفين اهلنا وبلدنا ..

لؤي .. شوفي هدى اني مااتحمل الغلط . واهلي مرة غلطوا بحقي وهجرتهم .
وهسا اكتشفت اني جنت عايش وي ثعالب مو اهل . جانوا يمكرون من ورانا . ولابسين ثوب الضمير والعدل .
وهمه بايعين ضميرهم من زمان ..

هدى .. لؤي اذا ماتريد نگعد هنا . نروح للناحيه لو الاي محافضه نستقر .
العراق كله النا ..

لؤي . تحجين صدگ هدى . ياعراق النا . والامريكان مستقرين بي . العراق نباع من زمان .
وناسه بدلت ثوبها .
صار الاخو يقتل اخوه .
والابو ينكر ابنه .
والقتل ع الهويه وكثرت الطائفيه..
والمصالح اهم من كلشي عدهم ..
شوفي هدى.  اني اريد اعيش حياتي مرتاح .
واربي جهالي .
واني من زمان اتفقت وي مهند يشوفلي بيت يمه .
وراح ارجع اشاركه بمحلاته .
ونعيش هناك احلى عيشه .

هدى .. بس اني مااگدر بلايه امي ..

لؤي .. واني هم عايف امي . وهم اشتاق .
بس اذا كلش خلينا نستقر ونجيبهن يمنا .

هدى .. امي واعرفها ماتقبل ..

لؤي .. هدى لاتسديها بوجههي ..
اني هيج هيج طالع .

هدى . انت متعود ع الغربه . ليش تصير اناني وتاخذني عن الي احبهم ..

لؤي .. لاتتجاوزين فاهمه .. المرة تباعت رجلها .
واني اعرف بمصلحتكم ..
واخذت قراري .
شگلتي هسا . تجين وياي لو لا ..

هدى .. يعني اذا گلت لا . تروح وتتركنا .

لؤي .. لا طبعا . اذا كلش اروح اشتغل هناك وي مهند وكل فترة اجيكم وارجع ..

هدى .. اي خوش حتى تلوف عليك سناريا ثانيه وتاخذك مني ..

لؤي .. هههههه اذا خايفه عليه اروح منج .انتي لاتعوفيني وخلي رجلج على رجلي ..
اني هسا طالع .. من تفكرين رجعيلي جواب .

لؤي ..
جنت بذيج الفترة مختنگ ومحتاج ارتاح واطلع استقر بغير مكان . تعبت من المشاكل والوضع .
فخبرت مهند . وهو ماقصر گال تعالوا وكلشي تريده يصير ..
بس هدى عاندت وماقبلت .
واني گلتلها بالحالتين اروح . سواء رحتي او لا .
بس الحقيقه غير .
مستحيل اعوفهم واروح .. حياتي بدونهم ماتسوه .
شلون اعوف حبيبتي وطفلتي الدلوعه .
واروح .
وشلون اعوف ملوكه وضحكتها واولادي الي ربيتهم .
بس جنت مضطر اگلها هيج حتى توافق .
والظاهر خطتي جابت نتيجه ..

هدى ..
بقيت بحيره . قرار لؤي جان مفاجئ بالنسبه الي .
وشلون اعوف امي والحجيه واصيل واخواتي واروح .
هناك منو الي .
وويامن اسولف واضحك .
منو يرشدني ويوجهني .
لؤي راح يطلع للشغل .
واني ابقى وحيدي ..
الف حسبه اجت ببالي .
مثل الي گضه عمره يبني ببيت .
وبناه على ايده طابوگه طابوگه .
وتالي بلحظه يتهدم كله ويروح تعبه ..

اول ماگلت الاصيل .
وگلتلها لاتگولين الواحد . الى لؤي يخبرهم ..
بس هي شبعتني بجي .
حضنتني وتگلي .
ولج اني ماعندي اخوات .
وانتي صرتي اختي .
ضحكتنا وسالفتنا كلها سوه .
شلون تعوفيني وتروحين .
شلون مااشوفج بوجهي كل يوم .
نطبخ سوه وونضف سوه وجهالنا يلعبون سوه .
ومابيوم تعاركوا لو اتعاركنا علمودهم .
الناس كلها حاسدتنا على علاقتنا اني وياج معقوله بيت حسدهم هسا وراح تعوفيني ..
بيومها شبعنا بجي .

گلتلها . دليني اصيل ع الطريق مو تحيريني .
منا انتو واهلي . ومنا رجلي وحبيبي .
واني بنصكم . اذا رحت يبقى گلبي هنا .
واذا مارحت . يروح وحده وابقى عمري كله يمه وحياتي تصير ظلمه .
فهميني شأسوي ..

اصيل .. اختاري استقرارج وبيتج ورجلج .
صح راح نشتاقلكم وفراگم يموتنا .
بس نتعود مع الزمن .
بس اذا راح شمعة بيتج . من الي يضويها بعده .
ولج المره لو عندها عشيره تحميها .
بلايه رجلها ماتسوه فلس وتحس روحها مذلوله .
ولؤي يحبج ويعشگج هم .
خلي ايدج بيأيده ولاتخليه وحده ..

فكرت بحجيها . وفعلا .اني من راح للاردن وصار الحرب عشت ليالي وايام سوده رغم اهلي وناسي كلها يمي جاشلون هسا اموت والله بدونه .
#بقلمي_الكاتبه_شمس
……………………… …………… .

رجع لؤي بالليل . اني بغرفتي .
انوم بملوكه .
دخل .
-السلام عليكم .
دنگ على ملوكه باسها .

گلتله وعليكم السلام .
شوكت نسافر .

رفع راسه . يعني شنو وافقتي تروحون وياي .

-ليش هو احنه نگدر بدونك . بس الظاهر انت تگدر

ضحك . اتقرب اليه وعض شفتي .
ولج اموت عليج وحياتي ماتسوه بدونج .
انتي ام بيتي وبنت گلبي .
تتوقعين اروح واعوفج .
بس جنت مقتنع ماتعوفيني . لهذا ردت اتدلل شويه واشوف معزتي عندج .

ضربته على صدره ودموعي تنزل .
ماادري شلون راح افارگ امي . واصيل العصر شبعتتي بجي .
شلون بله افارگهم گلي .

لؤي .. نشوف سنه زمان اذا ماتعودنا نرجع . بس لاتعبسين وخلينا نروح براحه .
ونعيش حياتنا .

هدى .. ومدارس الجهال ..

لؤي .. سألت ولد بالتربيه وگال اني ادبرها الكم .
وهناك نسجلهم ويكملون .

هدى .. والله مرتب امورك كلها قبل ماتگلي ..

لؤي .. مو گتلج اني مفكر من اول ماحملتي بملوكه بس انتضرت تجيبين يله . وبهاي الفترة حضرت اموري كلها .
وحتى الشقه الي راح انأجرها .
فوگ شقه مهند .
ويعني مرته يمج تتعودين وماتضوجين .

هدى .. ماادري ماادري مامرتاحه . وابجي ..

لؤي .. ياربي ماتخلص دموعها وتريحني مو موتتني اقل شي ونزلتهن .

هدى .. وشوكت تگول للحجيه .

لؤي .. هسا ورى العشا لان كلهم ملتمين .

تعشينا وخلصنا واني التفت لؤي .
ع الحجيه .
يمه .. اريدكم بموضوع .
اصيل باوعتلي . اني دنگت مااتحملت .

لؤي .. يمه تعرفين مهند الي جان وياي بسوريا .
راح ادخل وياه شركه .

الحجيه .. يايمه جاانت موتگول راح السوريا .

-اي يمه راح هو الشغل هناك بسوريا يگول نعمه من الله .

مرتضى .. يعني شلون تروح انت هو مناك يتصرف وحده
لؤي .. لا اني اروح .

الحجيه .. وعيالك يمه تعوفهم شلك بهالشغله .

لؤي .. لا هدى والجهال وياي . اخذهم واستقر هناك .

لطمت الحجيه على صدرها . يارضا يبني. .
تاخذ عيالك وتهج وتعوف اهلك وناسك .

اني نزلت دموعي مااتحملت ..

لؤي .. يمه قابل وين رايح.  غير اريد استقر اني وعيالي
مرتضى .. وهنا ماكو استقرار ماكو شغل .
وهاي بساتين اهلك واشتغل بيها وكون روحك .
لو شيل بأي مكان اذا مامرتاح هنا .
لويش متغرب .

لؤي .. تدري من زمان الگيعان موش شغلتي .
اني مهندس .
شمفهمني بالزراعه .
وبعدين اني اريد اطلع ماتشوفون البلد واحد ياكل الثاني الله اليعلم شراح يصير بعد كم سنه .

الحجيه .. نار اهلي ولاجنه الغرب ..
يمه انت متعود ع الهجران .
اخذت من شبابك كم سنه بالاردن .
وماصدگت رجعتلي .
تالي هسا هم راح تهجر اهلك وتاخذ وياك بنيتي وولدي .

هدى ..گمت حضنتها . يمه اني هم متعوده عليكم وودي ابقى بس بعد تدرين بلؤي وعناده .
واني مرته ولتزم اتبعه وين مايريد ..

الحجيه .. لايمه اعرفج انتي بنت اصول وغزر بيج الملح .
بس شأگول على ابن بطني الماغزر بيه التسع اشهر والربى ..

حسيتها ماراضيه بس رغم كلشي ماعارضت .
وگالت مودعين بالله ومحمد وعلي .
بس ها . هدى واولادها امانه عندك .
مابيوم تضوجها .
ولاتزعلها .
وصير الها ابو وام .
وهي يتيمه وهله هله بولد رضا.
لاتفرقهم عن ولدك . هذا عمر ومانعرف بعد اذا ترجعون تلگوني عايشه لو ميته ..
هاي وصيتي الك يالؤي ..

نزلت دمعتها بطرف عينها . حضنتها وابجي وهي تبجي .
واصيل ويانا ..
وعيني على لؤي . اگول بلكي يتراجع .
بس لؤي واعرفه اذا خله شي براسه يسويه ..

مرتضى ماحجه بس گام وطلع . ومبين عليه معصب وضايج .
گام لؤي وراه. .
وطلعوا بره ..

وبقت الحجيه توصيني على لؤي وعلى جهالي .
وتگلي حافضي على رجلج وانتو بديرة غرب .
وخليكم گلب على گلب .

جهالي فرحانين .. لان راح يسافرون .
وبدوا يخططون .
وحمودي يگلي ماما لويش تبجين قابل احنه وين رايحين وبعدين شلج بالعراق . راح نروح السوريا .
والجبال . ومناك بلكي يهدي عمو ونسافر الغير دول .

باوعتله والفرحه بعينه . يحجي وعقله سابق عمره .
يخيلني بلؤي . بكلشي حتى يشبها .
بطموحه وعناده شخصيته .
رغم هو نجح للخامس ابتدائي.  بس الي يشوفه يگول عمره اكبر ..

**ساعه .. ورجع لؤي ومرتضى وعيونهم ورمانه من البجي .
گالت الحجيه . شوكت نويت ترحون .

لؤي .. الاسبوع الجاي ..

شهگت . شنو بهاي السرعه ..

لؤي .. ماعندي شي مرتب كلشي . حتى الجوازات كلفت ولد كملهن الي ..

هدى .. شألحگ الم غراضنا هواي .

لؤي .. شعندج غراض . هو بس ملابسنا . وذهبج وفلوسج والمستمسكات .
وهنا اصيل تساعدج .
قابل راح تاخذين الغرفه كلها .

هدى . اصيل الغرفه اذا رحنه انتو دوروا بيها .
علمود بيها غرفتين الكم والجهالكم هم كبروا .

اصيل .. لا ابد . راح تبقى مثل ماهي .
خاف تجون بالعطل لو ترجعون بيوم . اني كل فتره انضفها الكم وتبقى مثل ماهي .

جانت ليله صعبه مليانه دموع وحزن وفراگ ..
ثاني يوم صعدت وياي اصيل تساعدني بالملابس .
هم تگابلنا نبجي ووحده توصي الثانيه .
ووصيتها ع الحجيه ..

للضهر اجه لؤي . جان بالجوازات .
گال يله ترحين الاهلج ..

رحت الامي ..
ومن سمعت تخبلت .. وگلبتها نحيب هي وفرقان .
وخابرت نعوش واجت .
والتمينا ثلاثتنا .
وگامن يتوسلن بلؤي مانروح .
وهو ضاج .
گال ليش تعرضولنا . بمكان ماتدعولنا .

امي گالتله خليها كم يوم يمي اشبع منها .
گالها لؤي .
وراها غراض تلمهن .. گومن انتن روحن ويانا الى ان يصير موعد سفرنا ..
#بقلمي_الكاتبه_شمس
يتبع…
………………………………………