رواية مازلت طفلة الفصل السابع عشر 17 - بقلم الكاتبة شمس السعدي

هلو حبايب .. نزلت هسا البارت لان رايحه زيارة للامام علي عليه السلام .

….البارت السابع عشر….
  {#مازلت_طفلة}
#بقلم_الكاتبة_شمس

السلام عليكم..
اني لؤي اخو الحجي رضا . عمري 31 سنه ..
جنت احب بنت عمي هديل . من اني صغير واحلم بيها تصير مرتي ..
وحجزوها الي .
وانتضر يوم يوم حتى تدخل غرفتي .
خلصت هندسه كهرباء وتخرجت . وگلت الامي تخطبها .
بس القدر لعب لعبته .
وتوفت هند بيوم ولادتها .
ورى الاربعين الشيخ گال ولد هنوده ماتربيهم غريبه .
هند ماخذه ابن عمي كاظم .
الشيخ خضير . گالي بويه لؤي ادري انت هاوي هديله .
بس هسا الوضع اختلف .
وهديله راح انطيها العدي لخاطر ولد اختها صغار ويتامى وخالتهم احن عليهم من غيرها .

اعترضت وانتفضت وحجيت . بس الشيخ اذا گال كلمته مايرجع بيها .
رحت العدي ابن عمي وگتله هديل الي ومالك حق تاخذها .
گال خويه ادري واني مارايدها مره بس الشيخ ماقبل وگال هاي كلمتي وماتكسرها لا انت ولا لؤي .

الشيخ راد يجبر بخاطري . هدالي بتول بنت كاظم .
گال گبعها واخذها وبلايه مهر .
مهرها عليه .
گتله هي موقصه مهر . وجا گلبي يشيخ شلون ينجبر 
بتول مثل اختي وماهاويها .
جا من خليتو بگلبي هديله واني صغير ماحسبتوا حساب هيج يوم .
گتله شيخنا . هي حجايه ورد غطاها .
بتول مااريدها وهديله صارت الغيري
بعد مالي گعده بالقريه هنا .
عندي صديقي بالاردن وراح اروح ادخل شريج وياه واشوف حالي ..
حجى الشيخ راد . دز رضا يحجي وياي .
امي حجت . ماكو . بعد اذا خليت شي ببالي ماارجع عنه .
رتبت اموري واوراقي وحجيت وي صاحبي .
وطلعت بعد ماغضبوا عليه كلهم .
طلعت للاردن واني مااعرف مصيري شني .
رحت گعدت بشقه وي صاحبي ..طابق ثاني .
وبديت الشغل وياه .
وشهر شهرين . تعودت واني شاطر بالكهربائيات .
مشى حالي هناك .

بالشقه الي تحت شقتنا .
اخوات عايشات وحدهن .
هنه مو صغار اكبر من عدنا . بس الي يشوفهن يگول صغار ليل ونهار على اخر حبايه .

من اصعد وانزل اشوف وحده منهن گبالي اسمها سناريا
تگول تعرف وكتي.
ودووم تجيب صينيه اشكال بيها وتصعدها النا .
يوم عن يوم تعودت عليها .
وصار بينا سوالف وضحك .
واحنه بغربه ووحده وهي تخلي الاعمى يشوف وبعدني ببدايه شبابي .
حسيت روحي تعودت عليها . وخاصه بعد مااعترفتلي بحبها .
صارت بينا علاقه وطلعات ومشيات والى ان گالت خلينا نتزوج ونعيش سوا .. اني عشقتك وبعد مااتحمل بدونك ..
وفعلا عقدت عليها. لان جنت محتاجها او غريزتي جبرتني وهي حلوه تموت ماگدرت اقاومها . بس ع الاقل بالحلال محد يدري متزوجها بس مهند صاحبي . واخواتها ..
لليل اروح ابات يمها . واطلع الصبح للشغل وهكذا ..

الى ان اجه هاتف . ابن عمي الشيخ . جان من زمان يريد يطلع وياي وطلعته . والشيخ غضب عليه هم .
المهم شغلناه ويانا .
بس اني وسناريا گمنا بالسر نلتقي .
خفت يشوفنا هاتف ويفضحنا .

بعد كم شهر . خابرني رضا وگال راح اتزوج .
والصراحه ماصدگت الي سمعته .
هو يموت على نضال . ومايشوف غيرها .
ومحد يگدر يوگف بوجهه اذا عصبي بس نضال .
وهمه اصلا عن حب تزوجوا .

حرت شلون اگول الهاتف . وهي اخته .
شگله اخوي راح يتزوج على اختك واريد اروح احظر عرسه .
تالي . تشجعت وگتله . راح اروح للعراق كم يوم وارجع الحجي يريدني .

هاتف .. علمود عرسه .

لؤي .. شمدريك .

هاتف .. ادري . نضال گالتلي جا غير هي الخطبتله مره

-لابربك . وشلون وافقت تخطبله .

-تگول بلكي يصير عنده جهال خطيه كبر وماشاف خلفته .انقهرت عليه وخطبتله والله لو مرتي جان موتتني قبل ماتخطبلي . والمشكله اخوك يگلها مااريد مااتزوج
ولك لو اني جا اگوم ابوسها المرتي .

لؤي .. والله شگلك صدمتوني . واني صار ساعه حاير شلون افاتحك بالموضوع وطلعت تدري وموافق وفوگاها اختك الخاطبتله . عاد نعرفها من عدنا لو منين .

هاتف .. لا غريبه شايفتها نضال وعاجبتها . بعد ماادري .

رتبت اموري وي مهند صاحبي .
وودعت سناريا . والليل كله تبجي .

رجعت الاهلي وحظرت العرس . وفرحان الاخوي .هم حقه خطيه كبر وماعنده طفل يشيل اسمه .
الي عجبني نضال متكفله بكل شي .
وشرطت ع الحجي مايروح يجيب العروس هي تجيبها .
رحنا كم سياره لهناك ..

طلعت العروس متغشايه .
وماشفتها ابد ..
لليل اجت وفاء . گالت حظر السياره نروح بسكته البنيه تخربطت .
گلت بگلبي .خرب يومك رضا من اول ليله فلشتها للبنيه .
بس من رحنا للمستشفى وشفتها هنا جانت الصدمه .
معقوله هي هاي الي تزوجها الحجي .
لو مخلف من وكت جان هاي بگد بنته .

وخاصه لمن الدكتور عصبت وگامت تحجي لان مزوجيها بهيج عمر . جبت الطريق كله احجي على وفاء .
وعلى الحجي هم حجيت .
بس عرفت ساعتها هاي سوالف . نضال .
جابت طفله حتى تسيطر عليها .
ماعجبني الوضع ورجعت للاردن لان عفت شغلي وسناريا هناك.
سناريا كانت مثل مرهم الي حاولت اطيب بي جرحي الي ينزف بعد مازفوا هديل على غيري .
وخاصه من شفتها بعرس رضا . وتلاگت عيونا .
هي استحت ودخلت . واني ضربت الحايط بأديه من القهر بعد ماجنه نتلاگة بزوايا البيت حتى اسمع صوتها واشوف عيونها .
هسا تدور عينها عني مثل الغريب .
وصار الغير الها اگرب مني ..
#بقلمي_الكاتبه_شمس
…………………………………………

مااتحملت ورجعت للاردن .
تفاجأت بحمل سناريا ومااتوقعت . بس ماحجيت وگلت رزق مااتبطر عليه . وخاصه بعد حاله رضا .
گلت غيري حسره عليه الطفل . واني اتبطر .
اووووف بس ردته من هديله مو من غيرها .

ورى فترى . طلگت سناريا .
واجت اختها كسرت الباب بالدگ .
لان اني ابات يم الولد مرات حتى مايحس هاتف ولو جان يشك ويسأل انت وين تروح .

من گالت اختها سناريا راح تولد .
تخبلت بسرعه بدلت ونزلت اركض .
وهاتف اجه يركض وراي .
وراح ويانا .
واني بلا وعي . ونسيت هاتف ويانا .
وتالي عرف كلشي بعد ماجابت ولد .
وسميته محمد .. وحلفت هاتف مايگول الاحد ..

هو كتم السر مااعرف كم شهر وبعدين توفت بيبتي وراح للعراق وراه بكم يوم.. 
اتفاجأت برضا يخابرني .
ويححي ويرزل . وشلون تزوج وحده مناك وفوگاها مخلف منها .  ومن هذا الحجي .

لهنا واتصلت على هاتف وگتله خويه . مادام فشيت سري لهنا وكافي بعد لاتگول عندي اخو .
حاول يعتذر راد خلص اني راسي يابس ومااتفاهم .

عرفت الحجي صاير عنده ولد وهم اسمه محمد .
تمنيت اني هناك واشوف ابنه واحظنه .
ماانكر اشتاقيت الاهلي وگعداتهم والبساتين والصيد .
والحجيه اكثر شي وحضنها الدافي .
بس كبريائي وعزت نفسي . كانت اكبر من الاشتياق .

للعراق بعد مارحت حتى من تزوج مرتضى .
بسبب الشيخ وشرطه ارجع واتزوج بتول ..

مرت السنين وكبر ابني واختلفنا اني وسناريا .
تغيرت وطبعها مو مثل طبعي اني ماارضى ع الشينه وهي تريد تسرح وتمرح بكيفها .
مااتحملت طلگتها .
وبقى ابني بيني وبينها .
بعد ماحاولت تاخذه وتروح . وصارت بينا محاكم .
وحكموا الوصايه الها ..
بس هددتها اذا تاخذه وتروح عني
وخافت وخاصه هي ماعدها احد بس اخواتها وهن كل وحده شافت طريقها .

ابني كبر بس مااخذ اطباعنا . شگد حاولت اخليه مثلي ومثل اهلي .
بس البيئه وامه عايش وياها .
وحتى من يجيني قليل . لان الوصايه الها .

ومرت السنين واني وحيد لان جربت مره وفشلت .
بقيت على هاي الحاله ..
الى ان اجاني اتصال من مرتضى
وگال رضا كتلوه ومات .
ساعتها الدنيا افترت بيه . وماصدگت الخبر .
واحس روحي راحت مني .
وضيعت شبابي كله بالغربه الى ان راح اخوذ وعضيدي واني ماشايفه ولا هو الراضي عني راح زعلان مني .
بلا وعي لميت غراضي ورجعت ..
لحگت على اخر ايام الفاتحه .
المفروض اني اشيل جنازته وادفنه بيدي .
بس مالحگت . العيون كلها تلوم بيه .
حگهم . وشماحجه الشيخ اني ساكت وماحجيت .

گال . كافي بعد . صفي امورك ورى الفاتحه وارجع لهنا مااضل اركض وراكم .
جبيركم وقطعه من روحي راح .
بعد امك مو حمل فراگ .
ارجع ولم اهلك محد الهم بعد رضا .
ادري بالشيخ جان يحب رضا ويفضله حتى على ولده .
رحت للنجف اخذني مرتضى ورى الفاتحه .
وبجيت مثل الطفل الي بجى ورى ابوه .
واستسمحته وطلبت الرضا منه .

ورى كم شهر . الشيخ وامي اتفقوا يزوجون مرت رضا الصغيره الي . بالبدايه گلتلهم مااريدها .
مرت اخوي شلون تصير مرتي .
بس الشيخ گال . انت ماتنصلح يالذيب .
تعودت تكسر كلامنا وتمشي على هواك .
ماتبت من سوالفك الراحت .
ومن شفت دمعة امي وتتوسل بيه الم ولد اخوي .
حمودي ومصطفى . الي ينحطون ع الجرح يطيب .
عاشرتهم كم شهر ودخلوا بروحي .
وخاصه حمودي . تگول هيبة ابوه .
ذكروني بأبني . بس ابني مو مثل اطباعهم .
ولد رضا هيبتهم من صغرهم .
بس رغم كلشي مااگدر اتزوج ذيج الطفله الشفتها .
عيونها وبرائتها لسا ببالي .
لكن ماگدر احجي بعد . واني مخالفهم قبل .
وافقت . وگلت مااجبرها واخليها مره الي وبس علمود اولاد اخوي ..

قبل هذا الحجي .. اني رجعت للاردن واتفاجأت بسناريا ماخذه محمد ومنتقله .
ماخليت مكان مادورته عليها .. بس ماكو فص ملح وذاب اتصلت على اختها وهددتها .
گالت والله احنه ماندري گالت راح نسافر بس وين ماگالت وودعتنا وراحت .
بعد ماگطعت الامل صفيت الشغل وي صاحبي واخذت نصييبي ورجعت واني روحي يم ابني وگلت المهند هذا رقم اهلي شوكت ماتخابر سناريا لو تشوفها تگلي  .

ورجعت واني مكسور . صح هو ماجان يريدني ومتعود على امه . بس هذا ابني ومن ظهري ولازم يربى عندي بس الله يجازيج ياسناريا لان حرمتيني منه .

من رجعت تفاجأت امي رايحه البيت اهل هدى . ومطيتهم حجايه ومحددين العقد .
ورحنا عقدنا . وماسمعت بس صوتها .
بعدها . گالت امي . عمك الشيخ ومرتضى واخواتك خل يرحون گدامنا .
واحنه ننتضر هداوي والجهال ناخذهم ويانا .

ارتبكت ومااعرف شصار بيه . مااتوقعت بهاي السرعه يرحون ويانا ..
اجو الولد يركضون بستهم وصعدتهم للسياره .
تالي صاحتني امي گالت تعال اخذ الجنط .
دخلت الطارمه . شفتها تحضن بأمها .
اخذت الجنط وطلعت .
صعدت .
اجن صعدت امي يمي وهي يم الجهال .
كان كاتلني الفضول . اشوفها بعد هاي السنين بعدهي مثل ماهي . ذيج الطفله الي عيونه مابطلت دمع وبرائه .
رفعت راسي لااراديا .
وشفت العيون هن نفسهن وحمر من البجي ولازم خاولي صغير بيدها تمسح خشمها . نزلت عيوني بسرعه .
بس بقت عيونها ببالي .

وتالي وعيت على حالي . اني شجاي اسوي .
هاي مرت اخوي . اللهم انعلك ياشيطان .
بسرعه صار رضا گبالي وحسيت روحي اخون الامانه .
#بقلمي_الكاتبه_شمس
يتبع..
………………………

حبايب هذا البارت خاص بلؤي وحياته حتى تتعرفون على بطل قصتنا . الي واخيرا ظهر وبان .😘