رواية مازلت طفلة الفصل السادس عشر 16 - بقلم الكاتبة شمس السعدي

مساء الجوري حبايب ..
نزلت هسا لان احتمال بالليل ممتواجده 😘

….البارت السادس عشر….
  {#مازلت_طفلة}
#بقلم_الكاتبة_شمس

.. مازلت طفلة ...
تزداد سنين عمري ولكنني أشعر مازلت طفلة ..
رغم أن عمري يزداد و أكبر لكن في أعماقي. تعيش طفلة لم تتخلى عن عالم طفولتها
فهي مازالت عاشقة لذالك العالم
طفلة برئية رغم كبر سنها مازالت طفلة
أبكي٠٠٠أغضب٠٠٠أكسر٠٠٠أحب٠٠٠أقسو ..
أبكي لضعف مني مس المشاعر وهيج دموعي وأمطرها رغما عني ..
أغضب حين أجد نفسي وحيدة في طريق شائك ولم أجد يدا تمسك بيدي و تأخذني الى بر الأمان
أكسر بجبروتي كل قيل وقال عن هذه الطفلة الحالمة في عالم الاحلام الذي بنينه أجب بلا حدود وأعطي بلا مقابل و لكن اذا جرحت من احدهم ..
فسأقسو عليه بكبرياء طفلة ..
نعم ..  انا طفلة ومازلت وسأبقى طفلة مهما مضت الايام..
لكن ياسنين عمري تمهلي و لا تتعجلي فلم أعد أستطع اللحاق بك لأنني مازلت طفلة و سأبقى طفلة طول عمري ..
فمهما قست عليا الايام فسأتمرد عليها بغرور وكبرياء طفلة .. لأني مازلت طفله ..

… عمري 20 سنه وترملت .
ماشفت شي من حياتي بس القهر والظيم .
والجاي مااعرف شلون راح يكون ..
الخوف يوم عن يوم يزيد .
كنت طفله ومازلت .. بس ماكنت اعرف احارب .
وماكان عندي شي احارب علموده .
بس هسا مستحيل اخلي احد يوصل الاولادي .
لو اعرف اخرمش واهاجم كل من يتقرب الاولادي .
مثل ماتسوي اي طفله من ياخذون العابها .

من يوم حجي اصيل واني لا ليلي ليل ولانهاري نهار .
الخوف والدموع مافارگني .
حاضنتهم وخايفه عليهم .
ومن يجون ياخذوهم . كل يوم اطلع حجه .
ساعه اگول الامي گوليلهم نايمين .
لو مالهم خلگ .
لو حمودي عنده دراسه .

خلصت العده مالتي .. وحمودي هم ماعندا دراسه .
ويلح عليه يريد يروح البيت ابوه .
بس اني مااريد اروح .. وانجبرت علموده .
وهم اشتاقيت للحجيه واصيل ورنونه وعلاوي .
صحيح مرات تجي اصيل هي وولدها بس مو دايما وتجي شويه وتروح .

اجه مرتضى اخذنا ..
ورحت . دخلت البيت وكأنه بيت غريب عليه .
مو البيت الي كبرت بي وكبروا جهالي بي .

دخلت للحجيه . شافتني گام تبجي .
حضنتها واثنينه نبجي .
واجت اصوله هم حضنتني . واولادها هم يحبوني وخاصه. رنونه ربت وي اولادي .

گالت الحجيه . ها يمه ماناويه ترجعين الغرفتج .
بين فتره وفتره اخلي اصيل تنضفها .
وعلى حطت ايدج محد يدخللها .
حتى حمودي من يجي مااخليه يدخللها اگله بيها غريضات امك لاتروح تلعب بيهن .

سكتت وماعرفت شأحجي .
وهذا الي جنت خايفه منه يجبروني ارجع ..

گتله حجيه بعد الحجي وراح اني شلي هنا .

الحجيه . ليش يمه شلج هنا . اني وعمامهم هنا .
واولادج لازم يربون بنص اهلهم وياخذون اطباعهم .
اني جنت مااحجي اگول البنيه عندها عده وتريد تخلصها يم اهلها .
مو هاي نضال مافرگت حجرتها من يوم الي راح الغالي لسا .

سكتت . صار العصر گتله مرتضى وصلني .
اخذني مرتضى ورجعنا الاهلي .
سولفت الامي واني مقهوره .

امي .. يمه تردين الصدگ . والله المره حقها هم تريد اولاد ابنها يكبرون گبال عينها .
وهناك احسللهم من هنا . وانتي هم احسن الج
شعابج بعيشتج هنا .

هدى .. تحجين صدگ يمه . هاي بدال ماتگليلي ابقي بييت ابوج وكملي دراستج والزمي شهادتج .
وكبري اولادج .ولاتحتازين الاحد .
ترديني اروح هناك . وانتي تعرفين كلش زين اذا رحت لهناك بعد مايخلوني لااطلع ولااطب وحتى دراستي تصير حلم بالنسبه الي .
بيومها صدگ زعلت وضجت .

وحتى نعوش من سولفتلها ايدت كلام امي .
وتگول شعندج هنا . عايفه العز وگاعده يم ابوي الي ينگنگ كل ساعه .

معقوله هاي الناس كلها صح وشايفه مصلحتي اكثر مني
بعد اسبوع من روحتي .
اجه ابوي . بدل بسرعه ويريد يطلع .
گال الشيخ خضير موديلي طارش . يريدني بشغله واني رايح .

من گال هيج انكمش گلبي . وذبيت كل الي بيدي .
وگعدت والدموع وحدها تنزل .

امي . شبيج يمه هو شفتهمنا وانتي نزلت دموعج .

هدى . يمه اعرفهم يردون ياخذون جهالي .
مادام دزوا على ابوي .
حتى يساوموه لو ارجع لو ياخذوهم مني .
بقيت حاضنتهم وابجي .
وامي تگلي ولج خنتي الجهال عوفيهم .
بس گلبي ماينطيني ودي افتحه واخليهم بوسطه واخيفيهم عن العالم والناس كلها .

الساعه گامت تمشي ع كيفها واني گلبي ماكلني .

اجه ابوي .
واني اباوع على حلگه اريده يحجي . وهو ماكو .
لمن امي سألته .
شراد منك الشيخ .

ابوي .. اوووف مااعرف شگلج . راد هدى الواحد من حموينها .

لطمت على صدري . شنوووو يردوني يعني يزوجوني .

ابوي . اي . يگولون جهالنا ماتربى بعيد عنه وبنتك حديثه وباجر عگبه يجوها خطابه وترضى واولادنا مايعيشون عند الغرب ولد الحجي يربون عند اهلهم .
واذا ماترضى بحماها . تنطينا الجهال وتشوف حياتها .

گمت الطم على وجهي .. حمويني شنو هو منيلي بس مرتضى .
ولؤي اجه بالفاتحه ورجع للاردن حتى ماشفته .
ومرتضى لو يموتون مااخذه . واخرب حياة اصيل الي جانت اخت الي .
شنو هو الزواج جبر .
زوجتوني قبل جبر وجنت صغيره وماافهم وهاي نتيجتها .
ترملت واني صغيره وعندي اثنين ولد .
وهسا هم تردون تزوجوني جبر . والواحد مثل اخوي حاسبته . مااقبل لو شيسون اكو محاكم بكيفهم ياخذون جهالي مني ..
#بقلمي_الكاتبه_شمس
………………………………………………

ابو هدى .. ولج محاكم شنو همه الدوله كلها بديهم .
خاف ماتعرفين شنو شغل الحجي .
ولج جان يشتغل بالمخابرات .
ولابس عگال ويفتر حتى محد يحس عليه وهو ارگاب العالم كلها بيده .

-شنووو . معقوله . لا جذب الحجي شله بالسياسه .

ابو هدى .. جا ماتسألين روحج شعنده كل يوم والثالث ببغداد . ادري بكلشي من جنت اشتغل فلاح عندهم .
حتى ورى الحرب . ماخله افراري يعتب عليه كله كلبجوها من وراه .
خاف جنتي طفله ومو واعيه وماتعرفين .

-بقيت مصدومه . جا اذا تدري بالحجي هيج ليش زوجتني اله .

-شوف هاي . اگلها يشتغل وي الدوله تگلي ليش زوجتني . والله هاي بنتج فگر طالعه عليج.

امي هزت اديها . اي مبين عاشت بخيره مو هالمات بحوبة الوادم الاخذها . والله اليعلم المخفي بعد .

هدى . بحياتي ماجنت اتصور الحجي هيج . معقوله واحد ماخذه وعادميه واهله انتقموا منه .
كلشي يصير من هيج نضال تگول گتله عوف هاي الشغله .
اذا الحجي وحاج بيت الله وهيج طلع . الله اليستر من الباقين .

سديت سالفه الزواج وحلفت ما اتزوج مرتضى واخرب حياة اصيل .
حتى اذا ع الورق . بس اسمي ضره ومشاركتها برجلها .
شنو هالظلم والجبروت . الي عندهم وقوانينهم الي لازم تمشي ع الكل .

بعد يومين .. اجت باجي وفاء والحجيه ومرت عمهم الشيخ .
تعجبت من اجو .
اولادي طفروا الحضن بيبيتهم مامصدگين وهي تبوس بيهم . تالي طلعت من جيبها فلوس وگالتلهم روحوا اشتروا . طاروا من الفرح .
من راحوا ولدي .
التفتت عليه .
هداوي . الشيخ دز طارش الابوج وحجه وياه .
ويمكن عرفتي سبب جيتنا .. ولد رضا ولدنا . ومانريدهم يربون بعيد عنا .
وانتي هم بنيتنا وربيتي عدنا . واحنه شاريج ييمه ومانريد انفرط بيج .

هدى .. يمه اذا ع الرجعه اني ارجع وياج بس زواج مااتزوج .

الحجيه .. يمه هذا قرار الشيخ . وانتي بالاول والاخير هم تجي قسمتج بيوم . ليش ماتخلين قسمتج يم ولدج .
وانتي بعدج صغيره ويرادلج سند .
ولؤي عمهم ويباريهم احسن من الغريب ..

لؤي😲😲 شنو . غير هو بالاردن .

-اي يمه لؤي رجع الديرته واهله من راح رضا .

-بس لؤي متزوج وعنده ولد .
-اي يمه طلگها لؤي اخذها على جياد الشيخ جيف ماانطاه هديله . بس لاهي من اطباعه ولامن ثوبه وطلگه من زمان والولد بيناتهم هم ماعايفه .
وهسا رجع ويريد يستقر هنا وطلب السماح من الشيخ ورضا عنه ومن شرط عليه يتزوج مرت اخوه ويلم جهال اخوه ماعارض .

-يمه بس اني مااعرفه وحتى ماشايفته غير بس بعرسي ومو كلش ولااعرف اطباعه . وخاف هم يجي يوم ويعفونا ويروح .وابقى اني وولدي هيج .

-جا انتي ماتعرفين لؤي هذا ذيب موش ثعلب ويغدر .
واذا انطى وعد يوفي ومايخلف . ابن بطني واعرفه .
وهو ميت لان رضا راح وماراضي عنه .
خليه يربي ولد اخوه يمه ويراضي اخيه بيهم .

سكتت ومااعرف شأحجي . الي باع اهله وعشيرته وهج مايجي يوم ويعوفنا بنص الطريق .
ربي ليش هيج وين مااخليها عوجه .
شوكت ارتاح ياربي . دلني ع الطريق وخليني ارتاح .

الحجيه .. باعي هداوي انتي عزيزه ومثل بنتي . بس ولد رضا اعز . من هسا گولي ترضين بلؤي . لو تلمين غراض الولد وخلينا ناخذهم . بعد هاي يمج .

باوعتلها وعيني مليانه دموع . ماخلتلي خيار ثالث واهلي صافين وياهم . يعني بكل الاحوال مجبوره اوافق مثل ماانجبرت قبل .

گلتلها .. تدرين بيه يمه ومن مايصيرون جهالي اني وياهم . سوو الي تردوه بس راح اقبل علمود جهالي ولا تطالبوني اصير زوجه اله واتقبله بسرعه .

-يمه هاي بيناتكم انتو بالعشره تتعودون وتتصافون بعد .
احنه نروح هسا .
والجمعه يجي الشيخ ولؤي والسيد يعقدلكم . وترجعون للبيت .

-يمه ليش مستعجلين . بعد سنه الحجي ماطالعه .

-اعرف يمه بس مااتحمل فرگت ولد رضا .
على عيوني ازوج مرت رضا وسنته ماطالعه بس هي هاي الدنيا ييمه .

طلعت واني شهگت بالبجي وگمت الطم على وجهي .
يمه ماتگليلي من جبتيني هم غميتي وجهي وگلتي يبووو ليش حظي هيج .

امي .. گولي يالله بنيتي سوي علمود ولدج خطيه .
ياما ضحيت وعشت وي ابوجن الي ماينعاش وياه علمودجن .

-يمه بس هذا لاشايفته ولااعرفه شلون اعيش وياه وهو عاف اهله وماسأل عنهم ومسح عشيرته وتزوج من غير مايردون . باجر عگبه هم يسوي بيه هيج .
وهم نفس المعاناة . تعبت والله .

لليل حجيت . وي ولدي .
گتله حمودي . انت شايف عمو لؤي .
محمد.  اي ماما شايفه ويحبنا كل ساعه يشتري النا .
وياخذنا بالبساتين ويم البحيره نصيد سمج .
ويلعب ويانا .

-يعني تحبه .

-اي احبه .

-جا ليش ماسولفتلي عنه من ترحون .

-هههه نسيت .

-زين اذا صار بمكان بابا رضا تقبل .

-اي اقبل لان احبه .

اووووه وهذا هم ضدي . حتى ولدي صفوا وي اهلهم عليه .

هن اجن الثلاثاء . والجمعه اجه يركض.  اني رتبت غراضهم . واجت مريه جيرانه حفتلي . وفككتني حزني هي علويه وعلى بختها .

كلشي ماسويت . حتى كحله ماخليت . لان هو مجرد عقد بالنسبه الي يعني حبر على ورق .
عقدولنا وخلصوا واني بودي انتفض واعترض بس اولادي صاروا گبالي وانجبرت على السكوت والرضوخ .
#بقلمي_الكاتبه_شمس
يتبع…
………………………………

جاي اكتب ولاحظت اغلب بطلات قصتي يتزوجن اثنين .
شنو السالفه متگلولي متفقين ههههههه .

وهداوي عيني دا تابعين اشو يومين ماكو صوت الج .
وصلنا للبارتات المشوقه اكثر مو تغيبين تابعي ..😚