رواية مازلت طفلة الفصل الثالث 3 - بقلم الكاتبة شمس السعدي

البارت الثالث 
  {#مازلت_طفلة}
#بقلم_الكاتبة_شمس

لملمت روحي من الالم والخوف ..
من دخلت باجي ام ايات ووياها مريه ..
خفت اكثر وعبالي راح يسوولي شي ..

ام ايات .. مبروك حبيبتي هداوي وبوستني ..

وعرفتني ع المره الي وياها . هاي اختي الاصغر مني متزوجه بالبصرة . ام علاوي ..

همه يتعارفون واني الالم موتني .

سألتني . شلونج هسا هم تأذيتي شي يوجعج ..

سكتت ماحجيت ..

ام ايات .. گومي حبيبتي اسبحي وبدلي حتى تنزلين تسلمين على امي ..

گلتلها .. شلون اگوم مااگدر ..

وحده صفنت ع الثانيه ..

شبيج حبيبتي احجي ..

شبيها يعني تتماوع وتتدلل .. سمعت صوت عمه نضال دخلت تحجي ..

ام علي .. يااا نضال على كيفج وي البنيه شبيج . لازم اشتغلت الغيره من هسا ..

نضال .. وعلى شنو غيره . يمعوده اعرف ذوق رجلي ميحب الزعاطيط بس لو مااني جبرته عمود الاطفال .
فلا يقبل يجيب وحده عليه ..

ام ايات .. كافي حجي وخلي نشوف البنيه شبيها ..

گومتني ام ايات واني لافة روحي بالشرشف ..
ومااحس الا عبالك حنفيه دم وگعت عليه ..

لطمت على صدرها .. يمه اسم الله ولجن البنيه تنزف بس لا يصير بيها شي ..

نضال .. ويييع شنو لعبان النفس هذا .. خلي انزل احسلي ..

التفتت ام ايات على اختها ..
شفتيها سوت سوايتها وانهزمت . جابت بنيه بگد توته ويمكن اصغر وبهذلتها . بس العتب على اخونا شلون طاوعها ..

ام علي .. وهو شمدريه انصدم بيها وگام يعيط على امي قبل شويه . بس تعرفين نضال شلون تقشمره وتلف عقلة بحجايتين ..

ام ايات .. دعوفينا من الحجي .. روحي انزلي الواحد من الولد خلي يحضرلنا سياره . على ما اغسللها وابدللها وناخذها للمستشفى.

نزلت ام علي ..
وبقت ام ايات گومتني ودخلتني للحمام ..
بالبدايه استحيت .
وماقبلت ..
گالت اني هم مثل امج لاتستحين ..
دارت وجهها واني غسلت ونطتني ملابس داخليه وقطعة قماش گلتلي لفلفي روحج بيها عن النزيف ..

ولبستني دشداشه حلوه وطلعتني ..
گالت وين عباتج ..

هدى ..مااعرف اني ماالبس عبايه وامي خيطتلي وحده بس بعدهي ماكامله مالحگت تكملها ..

ام ايات .. يله عيني دنزلي سلمي على امي .
بين مااجيبلج عبايه من اي وحده واجي وراج .
ولاتبينين الاي واحد ..

هزيت براسي ونزلت .. خايفه والالم موتني .
شفت هواي ولد عندهم جوه ..

اتذكرت امي من تگول عندهم شباب هواي لاتطلعين من المطبخ .
شافتني ام علي هلهلت .
واخذتني الغرفة امها . اني مخليه الحجاب على وجهي ونزلت مستحيه حتى ماباوعت منو بالصاله .

ام رضا .. صلاوات على محمد يمه . بالمبارك . منه المال ومنج العيال ان شاء الله..

بوستها وگلتلها شكرا بيبي ..

ام رضا .. اي والله اني هم بحسبة بيبيتج بس گليلي يمه احسن ..

هزيت براسي .

كلها اجت للغرفه تسلم عليه .. واكو بنات بگدي هم والبنيه الي گعدتني شفتها طلعت هاي ايات .
باوعتلي وابتسمت ..

شويه حسيت براحه .. لان اكو بنات بعمري اگدر اسولف وياهن ..

اجت ام ايات شاورت امها واخذتني گالت هاج هاي القمصلة البسيها بارده ..
ركبنا السيارة ام ايات گعدت بالصدر يم ولد واني بالورى
وبالگوة گاعده من الالم والنزيف ..

حسيت روحي راحت وصارت عندي رجفه .. الجو نص الليل وبارده . الطريق طويل .لان بيتهم بأطراف المدينه من نجي اني وامي هواي تمشي السياره وبعدنا مواصلين .
واكو مزارع يمهم ..

وصلنا للمستشفى اريد انزل رجليه مايشلني ..
لزمتني ام ايات ردت اوگع .
گالت للولد .. اركض جيب كرسي .
جاب كرسي .. وگعدوني بي ..

دخلوني للطوارئ . اجت الدكتوره كشفت عليه .
تخبلت .
گالت ماما انتي شگد عمرج . گلتلها 13 بعد شهرين قاطعتني ..

التفتت على ام ايات . مو حرام عليكم انتو شنو طفله بهيج عمر مزوجيها . ماعندكم لگمه تنطوها .

ام ايات .. والله اني هم استغربت من شفتها . صار العرس بسرعه بسرعه واني اخته مو امها ..

اخت زوجها يعني ..

اي دكتورة .

اذا انتي هذا عمرج هو شگد عمره لعد .. هو نفسه الي اجه صاحني من الردهه ..

لا هذا اخوه ..

والله عبالي هو كان عرفت شلون اتصرف وياه .

دكتوره الله يخليج اعرف الي صار مااتمناه البنتي بس موبيدي اهم شي هسا صحة البنيه شوفيها.

شنو اشوف اذا اگلج البنيه مملخة تمليخ .
طبعا هي صغيره ومتتحمل واكيد زوجها حيوان وممراعي عمرها وتلگيه بعده جديد ميعرف شلون يتعامل وياها ..

ام ايات ( ياجديد والله لو تعرفينه متزوج وجبير جان شريتيني ع الحبل . الله لاينطيج ينضال على هاي السوايه )

وهسا دكتوره شنو الحل ..

باعي . البنيه نازفه هواي خلوها تبقى هنا ع الاقل كم ساعه نراقب وضعها ونخلليلها مغذي . وهسا راح اخيطها واعقم المنطقه .
واكتبلكم علاج وغسولات تستخدمها وابر للالتهاب .

طلعت ام ايات وبقيت اني والدكتور واجت وحدها يمها .
الدكتوره سألتني هواي اسأله .

-انتي شنو اسمج گلتي .
-اسمي هدى .
-هدى تدرسين لو مبطله
-هسا اني بالثاني متوسط بس بطلوني وتزوجت .
-وليش تزوجتي بهيج عمر
-ابوي جبرني گال الامي اطلگج اذا ماوافقتي واني خفت امي تعوفنا .
-اوووف الله لينطيه . وهذا الي تزوجته هم زعطوط شكبره .
-مااعرف شكبره . بس اسمه حجي رضا ومرته اسمها نضال .
-ياااااعزا العزاهم حجي ومتزوج هم ..

بقت الدكتور تحجي وتدعي عليهم . واني ابجي من شفت الابره . بس گالت خدرتج ماراح تحسين بالالم .
وصدگ حسيت بشويه الم مو هواي .

بعدين اخذوني الغرفه بيها هواي مريضات .
وخلولي مغذي وابره بي .
وشويه واخذتني الغفه ونمت .
بقلمي الكاتبة شمس ..

………………………………………..

ماحسيت الا ام ايات تگعد بيه . والدكتور توصي بيها وتحجي عليها . وگالتلها هاي كارتي مال عياده عشر ايام ميتقربلها وراجعوني ..

طلعنا وبالگوه امشي لازمتني ام ايات . واسمع الولد الي وياها يحجي عليها .

والله مااتوقعت البنيه هيج طفله هي وين والحجي رضا وين مالگيتو الا هاي مو حرام عليكم ..

ام ايات .. لؤي كافي الخاطر ربك اليوم شبعت رزايل من الدكتور مو انت عليه دور .
ذيج نضال ورزلوها اني شعليه لو كلها تخاف من نضال محد يحجي وياها لان بنت الشيخ . واني طايح حظي بالرزايل ..

لؤي .. ومنو گلج مااحجي دخلي اوصل وشوفي . دصعدي البنيه يله .. وخلي نشوف بطريقنا بلكي صيدليه مفتحه ..

ام ايات .. وين اكو صيدليه هسا خليها من الصبح وجيبه .

من الالم والي بيه ماانتبهت عليه بس شفت ظهره هو هم مو صغير جبير .

من صعدنا .. گال الحمد لله على سلامتج خويه .من غير مايلتفت ..

گتله بصوت واطي الله يسلمك .

التفتت عليه ام ايات .. لؤي لاتكره روحك . انت باجر مسافر . ليش تسوي مشاكل ..

ولج والله لو ادري هيج يتزوج رضا من زعطوطه جان فلا اجيت وباقي بالاردن احسن الي .
اجيت فرحان العرس اخوي كم يوم تالي طلعتوها من عيني ودور الدكتورة تدخل وتطلع تذب حجي عبالك اني رجلها گوه عليه لزمت اعصابي ..

شويه عم السكون بالسياره . غطيت وجهي بالعبايه ورجعت نمت .
الى ان وصلنا تقريبا الساعه 2 بالليل .
البيت هادئ وكلها نايمه .
صعدتني ام ايات .. لگيت الغرفه منضفيها ومغيرين الفرشه .

گالت نامي وغطتني ورادت تطلع ..
گلتلها باجي حبابه اريد امي خلوها تجي باجر اشتاقتيلها ..

رجعت باست راسي گالت ان شاء الله . هو المفروض امج تجي وياج شلون تعوفج وحدج .
هسا انتي نامي وارتاحي والصباح رباح ..

مااعرف انام وحدي المكان غريب عليه رادت تطفي الضوه گلتلها بقيه اخاف . ابتسمت وطلعت .

بين نايمه وبين گاعده حسيت الحجي دخل .. باوعلي شويه وطلع .
واني بقيت نايمه للصبح .. گعدت على دگت الباب .
فتحتها ايات ..
صباح الخير .

صباح النور ايات .

مااعرف شنو اصيحلج يعني انتي بگدي ومرت خالو .

عادي گوليلي هدى بأسمي ..

امي گالت هدى مريضه شلون صرتي ..

زينه .

اگلج هدى تگول امي اذا گاعده نجيبلها الريوگ حتى تاخذ علاجها ..

هااا بكيفكم ..

طلعت ايات ورجعت . ترى اجت امج وگالولها نايمه .

فرفحت روحي من گالتلي امج هنا .. بلا وعي .
نزلت اركض . نسيت الالم والجرح من سمعت بطاريها .

هي روحي وسلوتي بالدنيا .
امي وماكو مثلها بطيبتها وحنانها وتعبها .
اشتاقيت الحضنها الدافي وصوتها وخوفها علينا .
صحيح احنه ناس على گد حالنا بس غنانا بطيب گلبها وتعبها لحتى توفرلنا كلشي نريده ..

نزلت وشفتها نزلن دموعي وابجي . حضنتني .
كافي يمه عيب تبجين بعد كبرتي انتي ..

باوعتلها . مااريد اكبر يمه اريد ابقى يمج وبحضنج .
ليش عفتيني البارحه اني ابجي من الوجع وماهي انتي .

ام هدى .. سودة عليه يمه والله موبيدي مجبوره .
وباوعت العمه نضال ..

سألتني الحجيه ام رضا . شلون صرتي يمه هداوي .

هزيت براسي . زينه بيبي .

ههههه شگلنه البارحه مو گتلج گولي يمه .
يله حبيبتي اخذي امج واصعدي الغرفتج راح تجي وادم .

صعدنا اني وامي للغرفه .
واني حاضنتها وابجي ..
والوم بيها لان عافتني هنا وحدي .

ام هدى ..
من خطبوا مني هدى گلت مستحيل انطيها اني ضامتها عن العيون واجي وياها البيت الحجي انضف حتى محد يشوفها ويتعرضلها مااريد احد يمسها ويذلها هي وكل بناتي .
اهون عليه اني اتعب وانذل وهنه يعيشن براحه .
بس مرت الحجي من شافتها . بقت تسأل وتلح عليها واستغلت حالنا ووضعنا وگالت اريد اخطب للحجي وطاحت بعيني تريدها وتگول صغيره ونربيها على ادينا علمود خلفه وسند للحجي اريد .

ولأن اعرف مرت الحجي متسلطه وتظلم بنيتي . وهي بعدهي صغيره ومستقبلها گدامها بسرعه رفضت وماقبلت .

رجعت ضايجه من بيت الحجي . وسولفت الابو هدى گلت بلكي مايقبل على بنته تشتغل بعد هناك . وتحز عليه كرامته .
بس هو فرح والدنيا ماشالته من سمع . واصر اردلهم موافقه . ومن رفضت هددني بالطلاگ ويطردني ويبعدني عن بناتي .
سمعت هدى اجت تتوسل بيه اوافق حتى مااعوفهن وهي ماتدري بكل الحالات راح اعوفها .

اجه الحجي عقد عليها من غير مايشوفها . گلت بلكي يرفضها وهي صغيره .
بس عقد وراح . واني دموعي تجري . الناس حاسدتني لان راح اناسب بيت الحجي ومايدرون بنتي انباعت حتى فلوس مهرها ابوها اخذهن ومانطاني الا كم فلس اجهزها .
هي فرحت بالملابس الحلوه والجديده بس ماتدري شمنتضرها .
وبيوم العرس . حسيتهم اخذوا روحي مني . الليل كله ابجي وانوح عليها وابوها يگلي فگر بس تبجين بنتج راحت للدلال وانتي هنا تنوحين .

وعبالك گلبي يدري بنتي تتوجع وبالمستشفى .
حقها طفله وماتتحمل وجع وخاصه من رجال اكبر منها بالعمرين .

وبقيت ادعي على نضال الي بعدتني عنها وماخلتني اروح وياها بيوم العرس وابقى يمها ..
#بقلمي_الكاتبة_شمس
يتبع…