رواية مازلت طفلة الفصل الثامن 8 - بقلم الكاتبة شمس السعدي

….البارت الثامن….
  {#مازلت_طفلة}
#بقلم_الكاتبة_شمس

لبست الصاية وحجاب اسود ونزلت ..
البيت فارغ . يمكن راحوا .

جا شلون راح امشي وحدي . دورت على مفتاح البيت ماكو ..
رحت للكاونتر ادور بالمجرات .
دخل مرتضى ..
گال انتي لسا هنا ..
كلها راحت . واني اجيت ابدل ملابسي وامشي ..

-اي اني هم اريد اروح بس المفتاح ماهو جاي ادور عليه .
گال تلگيه فوگ الثلاجه .
بس ابدل قميصي ونروح انتضريني لاترحين وحدج .

رحت للثلاجه مديت ايدي اتلمس ..
شفت مرتضى وراي وحصرني على الثلاجه .
بحجة يدور المفتاح الي .
گلبي يرجف وهو حاصرني حيل وقرب انفاسه يم خدي ..
ردت اسحب نفسي مااگدر همه كلهم بنيتهم ضخمه وطوال .
حتى مرتضى رغم صغير بس طويل وضخم .

بالگوه دفعته ورحت بسرعه اخذت عباتي .. گتله اني رايحه .
وگف گبال الباب .. اوكفي اوكفي شبيج خايفه قابل راح آكلج . لاتتصورين فد يوم ااذيج اكثر واحد يعزج بالبيت اني خليها ببالج هاي .

گتله اتأخرت عيب لايسألون عليه .
من الخوف اريد اركض بس رجليه مايشيلني .

عزا العزاج هدى هذا مبين وراه شي وماراح يعوفج بحالج واذا شافته نضال يسوي هيج . هسا تگول اني الغويته وتفضحني .ربي استرني وابعده عني .
(احجي بداخلي )

ركضت دخلت للبيت ومااسمع بس الصياح والهوسه .
شفتهم مخليها ع القبله ومغطين وجهها بحياتي ماشايفه ميت .
گمت ارجف من شفتها ومناك هبطه مرتضى وهبطه الطباخ البارحه .
كلهن التمن ..

رحت للمطبخ . ناس داخله وناس طالعه والصياح يرن بالاذن .
كلها تحبها والصغير والجبير يبجي عليها .
اجو ولدها واحفادها خلوها بالتابوت . واخذوها والنسوان راحن وياهم .
بقت الحجيه وعمه نضال وباجي رجاء  . والبنات والباقيات كلهن راحن .

بقينا بالبيت فرشناه كله من هاي الغلايج القديمه .
وخلينا منادر على طول الصاله والاستقبال بيت الشيخ جبير حيل لان هو بيت ابوهم بالاصل وكلهم ساكنين بي وبعدين كل واحد بنى بيت وطلع ..

بدت الناس تجي من المحافضات والمناطق القريبه كرايبهم هواي .
احس صارت خنكة .
واجن الملالي ترسن البيت ..
روحي راحت من الجوع واستحي اكلهم جوعانه وهمه عندهم فاتحه شيكولون عليه ..
واني اصلا من البارحه ماماكله شي ..

بقيت كاعده بالمطبخ .مانسوي شي بس نحظر جاي وماي لان الطبخ جايبين طباخ يطبخ بره . بس اني استحي اطلع يمهن .والنسوان كلها تلطم وتدبج . وهمه عادتهم من يلطمون يسون هوسات ويگمزن .
يعني راسي انصدع .
للظهر رجعوا من النجف . گلت اي بلكي يصبون اكل كتلني الجوع ولعبت نفسي .

دخلت باجي وفاء سلمت عليها وگلتلها البگى براسج .
گالت .. روحي سلمي على عماتي ونسوان عمامي فشله شيگولون متكبره وماتجي تسلم وانتي بأعتبار مرت الحجي ..

ياربي شلون ورطه . واني استحي من التجمعات والهوسه . بحياتي ماطالعه فواتح ..
دخلت تگول زياره مو لطم .

احس بين الهوسه كلها تعاين عليه . سلمت عليهن وهن ماشاء الله هواي .
الجو بارد بس من الهوسه صاير نار .
گلبت معدتي ومن الجوع احس عيوني غوشت .
ردت اطلع بسرعه ماحسيت الا خرت روحي ووگعت .

الحجي رضا .. بين الهوسه والزلم واني وگاف وي الشيخ گلت اروح اشرف ع الغدا . واسهم اللحم .
الولد يصبون تمن وحشو ومرگه بصواني مفطح واني اخلي كل نص خروف بصينيه ..

وسمعت الجهال اجت تتراكض . حجي حجي مرتك الصغيره وگعت واختنگت ماتتنفس .
من سمعت هيج عفت كل الي بيدي ونسيت الفاتحه والزلم والغدا .
وركضت للبيت .
شمرت السويج على مرتضى گاله حظر السياره بسرعه .
وگلت للنسوان سولي طريق بسرعه ..
دخلت لگيتها تتلاگف الهوا بالگوه.
شلتها وطلعت خلت وفاء عليها العباية وگالت انتضرني جايه وياكم .

فتحت عيني لگيت روحي بالمستشفى.
شفت الحجي .
گال خوفتينا عليج ليش هيج .
عبالي وحده وگعتج لو شنو صار للطفل .

اجت الدكتوره . گالت يخلص المغذي وطلعوها . بس لازم تتغذى عندها فقر دم حاد .
وهبوط . شنو ماتنطوها اكل ندري حصار بس مو هيج .

الحجي .. والله دكتور احنه ال……  واكيد تعرفينا وتعرفين خيرنا يعني احنه نزرع بگيعانا وناكل . ماعرفنا الحصار شنو .
بس هي ليش ماتاكل ماادري .

اادكتوره . حجي كل حامل هيج يصير عندها وخاصه هي فترة نساوه وماتتحمل معدتها . شنو ماماره عليك هاي الشغلات من امها ..

درت وجهي ماردت احرجه . والدكتوره عبالها ابوي .
خبصته بنتك وبنتك .
تالي طگت روحه . گالها ترى هي زوجتي مو بنتي .
صار وجهها قوس قزح من الفشله والصدمه .

گالت ع العموم . كتبتلها مغذيات . هاي الفتره كل يوم تخلي واحد واذا عندكم احد يعرف يشده بعد احسن مما تجون لهنا كل يوم .
وهاي مقويات تلتزم بيهن . تركتنا وراحت .

طلعنا من المستشفى شفت مرتضى گبالي حاولت اتجنبه .
تلگاني . شلونج هداوي خوفتينا عليج .

گتله . شكرا.  وصعدت.
وصلنا .
گال الحجي . وفاء صبيلها غدا خلي تاكل .

اجه ولد يمكن ابن عمهم . گاله حجي انت وين والشيخ گلب الدنيا عليك .

دخلت . گبل للمطبخ .
گالت باجي تعالي ادخلي للغرفه ارتاحي .
اخذتني وگالت التوته . صبيلها غدا وجبيه للغرفه .
الغرفه يم الصاله .
وشفت عمه نضال گبالي تخوزر بيه وتهز بأديها .
#بقلمي_الكاتبه_شمس
………………………………
كل الي تشوفني تسأل عن حالي .
والي تگول . خطيه صغيره .
وهاي الي تگول شفتي الحجي شلون اجه يركض
سيست نضال .
يتهامسن بيناتهن .

دخلت بغرفه باجي .. جابت الاكل توته.  اكلت شويه وگلتلها بعد مااگدر .
شويه واجت عمه نضال . لافه اديها .
ولج يحيه بطلي تتماوعين كل ساعه . حتى تغيضيني .
ترى الحجي من اجه يركض علمود الطفل مو علمودج .
صاحت بيها باجي .
گالتلها اطلعي البنيه تعبانه خلي تنام .
طلعتها بالگوه . وعمه نضال وگفت يم الباب وتگلها والله دخلي تجيب فلا اخليها دقيقه بالبيت .
اخذ الطفل واشمرها منين ماجبتها ..

اووووه بعد احس عساس اني الميته عليها لو ع الحجي .
هو اني اريد اخلص منهم . واذا ع الطفل خلي ياخذه هسا اني شنو شفت بحياتي ..

بقيت كم يوم ع المغذي . يشكله الي زوج باجي وفاء مضمد اخو عمه نضال بس حباب كلش .

عمه نضال تبات عند اهلها . طول فترة الفاتحه .والحجيه هم تبات تگول مااگدر اروح وارجع رغم همه فرق كم بيت عنهم . بس من رجليها .

بس اني والحجي نرجع بالليل ومرتضى هم . بس گمت اتجنبه واشوفه منا ادخل للغرفه بسرعه واقفلها عليه.

الحجي ينام يمي ويخليه اديه ويگلي نامي عليهن .
بس شخيره بالليل يضوجني واضطر اسحب نفسي بهدوء وانام ع الجهه الثانيه .
والليل كله احلم بعمه نضال . تجي تدخل علينا وتفضحنا بالصياح .
لان هي متفقه وياه بس احبل . مايتقربلي ولاينام يمي .

طبعا بعدين عرفت . انه الحجي وعمه نضال بينهم قصه حب من الطفوله .
وكتل نفسه عليها . وشگد اجو خطابه الها وهو نهى عليها وماخلى واحد يتقربلها .

اجت امي للفاتحه وابوي .. بس حسيت محد مهتمله وگاعده وحدها كسرت گلبي . احنه كلنا من طين ليش هيج يعاملن امي لان فقيره وجانت تخدم عندهم .
باجي وفاء ورجاء زينات بس بنات الشيخ يتكابرن .

بعد كم يوم اجه هاتف يصير ابن الشيخ خضير جان وي لؤي بالاردن .
حضر الفاتحه . وانطاهم خبر الكل ماكان متوقعه .
بيومها گلب البيت بالضجه .
والشيخ تحلف بيه . وگال يكسر كلمتي . واني حاجزله بتول .
يروح يتزوج اردنيه لان مانطيته هديل .

الحجيه ارتفع ضغطها .
وخبصوا الدنيا . اتعجبت هاي كله لان تزوج. جا يبقى قابل كل عمره بلايه زواج .

توته .. شبيج هدى . مو لان اتزوج .
بس لان كسر كلمة الشيخ . وبأعتبار حاجزله عمة بتول بس هو لان جان يحب عمه هديل .ومن زوجها الشيخ الرجل اختها علمود الجهال .
هو ضاج وهجّ من الديره .

-يا خطيه بس هو هم حقه . يحبها ويريدها شلون تنطوها الغيره .

-اگلج هدى دسكتي لايسمعج واحد وخاصه خالي رضا يطين عيشتج . لان هو هذا عمره وماكسر كلمه لا الجدي الشيخ الجبير ولا للشيخ خضير .
جان مطيع الهم من الصغر .

بس خالي لؤي بيهم جسر ويتصرف على هواه .
راح اشتغل بالاردن . وقشمر عمي هاتف واخذة وياه وتالي غضب عليه جدي .
بس بعدين اجه واستسمحه ورضا عنه .
بس عمي هاتف زين مو مثله.  عاد يروح ويجي دوووم بس خالي لؤي .
يجي يومين بالسنه ويروح .
ومرضت بيبيتي هم بفراگة .

خلصت الفاتحة ورجعنا للبيت والحجيه مريضه من سواية لؤي . وخاصه من عرفت عنده ولد من الاردنيه يعني صارله هواي من متزوجهها .
وماگايل الاهلها . وهو قبل كم شهر هنا اجه بزواجي من الحجي .
وحتى هاتف مايدري بي مكتشف بالصدفه .
وگال للشيخ .
والشيخ دز رساله للؤي گاله لو تطلگها وتجيب ابنك وتجي لو مالك اهل بعد ..

بس الي سمعته لؤي معاند وماراضي يطلگها .

بيوم الاربعين مال حجيه .. كلها راحت للنجف واني بقيت لان حامل ..
ماصعدت الغرفتي ..
نمت بالاستقبال . علمود التلفزيون . جاي اتابع فلم العبد الحليم . همه مايفتحون تلفزيون لان حزانه .
بس لان البيت فارغ ووحدي ضايجه فتحته بسكته .
واني اباوع غفيت .
مدري حلم مدري حقيقه . حسيت ايد تتلمس وجهي .

شويه وطفرت . باوعت ماكو احد .
لعنت الشيطان . وتذكرت مرتضى ماراح وياهم لان عنده امتحان .
خفت اكثر وگمت صعدت الغرفتي وقفلتها .

اني بطني گامت تكبر . وصرت خمس اشهر .گام يتحرك ببطني ويخليني اضحك .
احسه يلعب وياي .
ومبين وكح وكت ماانام يضل يحوس ويگعدني .
گمت احس بغير احساس .
وصار رفيقي الي اشكيله واحجي وياه من اضوج وافرح .
طبعا الحجي ماقبل نروح للمستشفى نشوفه ولد لو بنيه .
يگول ماصدگت الله انطاني خلفه وتالي اتبطر على نعمته ..

تمر الاشهر بصعوبه عليه . بس حالتي زينه ومااشكي من شي والطفل يتحرك دووم .

وبيوم سويت العشا من وكت واني مااشتهي .
گلت للحجيه ظهري يوجعني راح اصعد انام .

اني مانايمه الظهر والجو حار جان صيف..
ذبيت على روحي مي ودخلت انام .
وشعري مبلل ..
ومن نمت حسيت واحد يتلمس بشعري .
طفرت وشفته مرتضى فوگ راسي .

گتله انت شتسوي هنا ماتستحي . هاي مو اول مره تسويها . والله اگل للحجي عليك .
بهذي الاثناء مااشوف الا اندفعت الباب ودخلت نضال
تخوزر بينا .
گالت . والله عرفتكم مو خالين وانتي بيج البله ..
#بقلمي_الكاتبة_شمس
يتبع ..